TUN-ANANG ARTIKULO 31
Andam Ka Bang Magpaabot Kang Jehova?
“Mapailobon kong magpaabot.”—MIQ. 7:7.
AWIT 128 Molahutay Ta Hangtod sa Kataposan
SUMARYO *
1-2. Unsay atong hisgotan niining artikuloha?
UNSAY imong bation kon duna kay gipaabot nga package nga imo gyong gikinahanglan pero wala ni moabot sa panahon nga imong gidahom? Maguol ba ka? Tingali bation nimo ang giingon sa Proverbio 13:12: “Ang gidahom nga malangan makapasakit sa kasingkasing.” Pero, komosta kon mahibaloan nimo nga dunay balidong mga hinungdan kon nganong wala moabot ang package sa panahon nga imong gidahom? Kon ingon ana ang kahimtang, posible nga magpailob ka ug andam magpaabot.
2 Niining artikuloha, atong hisgotan ang pipila ka prinsipyo sa Bibliya nga makatabang nato nga padayong ‘magpaabot nga mapailobon.’ (Miq. 7:7) Dayon, hisgotan nato ang duha ka kahimtang diin kinahanglan tang mapailobong magpaabot nga molihok si Jehova. Ug hisgotan nato ang mga panalangin nga gisaad ni Jehova niadtong andam magpaabot kaniya.
MGA PRINSIPYO SA BIBLIYA NGA NAGTUDLO KANATO SA PAGPAILOB
3. Unsay atong makat-onan sa Proverbio 13:11?
3 Ang usa ka pananglitan nga nagpakita sa kaimportante sa pagpailob mabasa sa Proverbio 13:11. Kini nag-ingon: “Ang bahandi nga dali ra kaayong nakuha mogamay, apan ang bahandi nga gianam-anam pagtigom modaghan.” Unsay atong makat-onan niini nga bersikulo? Maalamon ang paghimo sa mga butang sa mapailobong paagi.
4. Unsay gipasiugda sa Proverbio 4:18?
4 Ang Proverbio 4:18 nag-ingon nga “ang dalan sa matarong sama sa kahayag sa adlaw nga mag-anam ka hayag hangtod sa udtong tutok.” Ang maong mga pulong haom nga nagtumong sa paagi ni Jehova sa pagpadayag sa iyang katuyoan ngadto sa iyang katawhan—anam-anam. Pero ang maong teksto mapadapat sab sa paagi diin ang usa ka Kristohanon mouswag sa espirituwal. Ang espirituwal nga pag-uswag dili puwedeng dalidalion. Nagkinahanglan nig panahon. Kon makugihon natong tun-an ug ipadapat ang tambag nga atong madawat gikan sa Pulong sa Diyos ug sa iyang organisasyon, anam-anam natong maugmad ang mga hiyas sa Kristo. Mouswag sab ang atong kahibalo sa Diyos. Tagda kon giunsa kana pag-ilustrar ni Jesus.
Sama nga ang tanom anam-anam nga motubo, ang tawo nga maminaw ug modawat sa mensahe sa Gingharian anam-anam sab nga mouswag sa espirituwal (Tan-awa ang parapo 5)
5. Unsang ilustrasyon ang gihatag ni Jesus aron ipakita nga nagkinahanglag panahon ang paghimog mga kausaban?
5 Si Jesus migamit ug ilustrasyon aron ipatin-aw kon sa unsang paagi ang mensahe sa Gingharian nga atong gisangyaw nahisamag gamayng binhi nga anam-anam nga motubo sa kasingkasing sa mga tawo nga nahigugma sa pagkamatarong. Siya miingon: “Ang binhi moturok ug motubo—kon sa unsang paagi, siya [ang nagpugas] wala mahibalo. Sa kaugalingon niini, ang yuta inanay nga magpatubo sa binhi; una ang lindog, dayon ang uhay, ug sa kataposan ang bus-ok nga mga lugas sa uhay.” (Mar. 4:27, 28) Unsay gipasabot ni Jesus? Iyang gipatin-aw nga sama nga ang tanom anam-anam nga motubo, ang tawo nga modawat sa mensahe sa Gingharian anam-anam sab nga mouswag sa espirituwal. Pananglitan, samtang ang atong mga Bible study mas masuod kang Jehova, makita nato ang daghang maayong mga kausaban nga ilang nahimo. (Efe. 4:22-24) Pero kinahanglan natong hinumdoman nga si Jehova ang nagpatubo nianang gamayng binhi.—1 Cor. 3:7.
6-7. Unsay atong makat-onan sa paagi nga gilalang ni Jehova ang yuta?
6 Sa tanang gibuhat ni Jehova, siya mapailobong naggahin ug panahon hangtod nga mahuman kana. Gihimo niya kana alang sa kadayeganan sa iyang ngalan ug sa kaayohan sa uban. Pananglitan, konsideraha kon sa unsang paagi anam-anam nga giandam ni Jehova ang yuta para sa tawo.
7 Sa pagpatin-aw kon sa unsang paagi gilalang ni Jehova ang yuta, ang Bibliya nag-ingon nga iyang gitakda ang “mga sukod niini,” giugbok ang “pundasyon niini,” ug gipahiluna ang “batong pamag-ang niini.” (Job 38:5, 6) Naggahin pa gani siyag panahon sa pagsusi sa iyang gibuhat. (Gen. 1:10, 12) Maimadyin ba nimo ang gibati sa mga anghel dihang nakita nila ang matag bag-ong butang nga gilalang ni Jehova? Seguradong nalipay gyod sila adto! Aw, diha gani higayon nga sila “misinggit sa pagdayeg.” (Job 38:7) Unsay atong makat-onan? Gidangtag libolibo ka katuigan una mahuman ang pagpanglalang ni Jehova kay iyang gipamalandongan ang matag butang una niya kini lalanga. Ug sa dihang gisusi niya kini, siya miingon nga kini “maayo kaayo.”—Gen. 1:31.
8. Unsay atong hisgotan karon?
8 Ang maong mga pananglitan nagpakita nga dunay daghang prinsipyo sa Pulong sa Diyos nga nagtudlo nato nga kinahanglan tang magpailob. Hisgotan nato karon ang duha ka kahimtang diin kinahanglan tang maghulat kang Jehova.
KANUS-A TA KINAHANGLANG MAGHULAT KANG JEHOVA?
9. Unsa ang usa ka kahimtang nga kinahanglan tang maghulat kang Jehova?
9 Kinahanglan tingali tang maghulat nga tubagon ni Jehova ang atong mga pag-ampo. Dihang mag-ampo ta alang sa kusog sa pag-atubang sa usa ka kalisdanan o alang sa tabang nga madaog ang usa ka kahuyangan, mobati tingali ta nga dugay motubag si Jehova sa atong mga pag-ampo. Nganong duna tay mga pag-ampo nga dili dayon tubagon ni Jehova?
10. Nganong kinahanglan tang mapailobong maghulat nga tubagon ni Jehova ang atong mga pag-ampo?
10 Si Jehova maminaw pag-ayo sa atong mga pag-ampo. (Sal. 65:2) Iyang giisip ang atong kinasingkasing nga mga pag-ampo ingong ebidensiya sa atong pagtuo. (Heb. 11:6) Interesado sab si Jehova nga makita kon unsa ta ka determinado nga magkinabuhi sumala sa atong mga pag-ampo ug mobuhat sa iyang kabubut-on. (1 Juan 3:22) Busa, kinahanglan tingali tang magpailob ug molihok sumala sa atong mga pag-ampo dihang maningkamot ta nga madaog ang dili maayong kinaiya o kahuyangan. Gipakita ni Jesus nga ang pipila sa atong mga pag-ampo dili tingali tubagon dayon. Siya miingon: “Padayon sa pagpangayo, ug kamo pagahatagan; padayon sa pagpangita, ug kamo makakaplag; padayon sa pagpanuktok, ug kamo pagaablihan; kay ang matag usa nga mangayo makadawat, ug ang matag usa nga mangita makakaplag, ug ang matag usa nga manuktok pagaablihan.” (Mat. 7:7, 8) Dihang sundon nato kini nga tambag ug ‘molahutay ta sa pag-ampo,’ makasalig ta nga dunggon ug tubagon sa atong langitnong Amahan ang atong mga pag-ampo.—Col. 4:2.
Samtang magpaabot ta kang Jehova, padayon tang mag-ampo kaniya uban ang pagtuo (Tan-awa ang parapo 11) *
11. Sa unsang paagi ang Hebreohanon 4:16 makatabang nato dihang morag nalangan ang tubag sa atong pag-ampo?
11 Bisag para nato morag nalangan ang tubag sa atong pag-ampo, si Jehova nagsaad nga tubagon niya kini sa hustong panahon—“dihang manginahanglan tag tabang.” (Basaha ang Hebreohanon 4:16.) Busa, dili gyod ta angayng maghunahuna nga nasayop si Jehova kon dili dayon niya tubagon ang atong pag-ampo sa panahon nga atong gidahom. Pananglitan, daghan ang dugay nang nag-ampo nga taposon sa Gingharian sa Diyos kining sistemaha sa mga butang. Si Jesus miingon pa gani nga angay nato kining iampo. (Mat. 6:10) Pero dili gyod maalamon kon tugotan nato nga mohuyang ang atong pagtuo sa Diyos kay ang kataposan wala moabot sa panahon nga atong gidahom! (Hab. 2:3; Mat. 24:44) Maalamon ta kon padayon tang magpaabot kang Jehova ug mag-ampo kaniya uban ang pagtuo. Ang kataposan moabot sa hustong panahon, kay gitakda na ni Jehova kon unsang “adlawa ug orasa” kini moabot. Ug kanang adlawa mao ang kinamaayohang panahon para sa tanan.—Mat. 24:36; 2 Ped. 3:15.
Unsay atong makat-onan kang Jose bahin sa pagpailob? (Tan-awa ang parapo 12-14)
12. Sa unsang kahimtang tingali ta ilabinang malisdan sa pagpailob?
12 Kinahanglan tingali tang magpailob samtang magpaabot nga matul-id ang inhustisya. Ang mga tawo niining kalibotana sagad dili maayog pagtratar niadtong dili nila parehas nga lalaki o babaye, o dili nila parehas ug rasa, tribo, kultura, o nasyonalidad. Ang uban nakasinatig inhustisya kay duna silay depekto sa lawas o hunahuna. Daghan sa mga alagad ni Jehova ang nakaagom ug inhustisya tungod sa ilang binase sa Bibliya nga mga pagtulon-an. Dihang maeksperyensiyahan nato ang maong mga inhustisya, kinahanglan natong hinumdoman ang mga pulong ni Jesus: “Siya nga makalahutay hangtod sa kataposan maluwas.” (Mat. 24:13) Pero unsay imong buhaton kon mahibaloan nimo nga dunay nakahimog seryosong sala diha sa kongregasyon? Kon ang mga ansiyano nahibalo na niana, magpailob ka ba ug mosalig nga atimanon nila kana sa paagi ni Jehova? Unsa tingali buhaton sa mga ansiyano?
13. Unsay gusto ni Jehova nga himoon sa mga ansiyano dihang dunay makahimog seryosong sala?
13 Sa dihang mahibaloan sa mga ansiyano nga dunay nakahimog seryosong sala diha sa kongregasyon, sila mag-ampo ug mangayog “kaalam nga gikan sa langit” aron masabtan nila ang panglantaw ni Jehova sa kahimtang. (Sant. 3:17) Tumong nila nga kon posible, matabangan ang nakasala nga motalikod “sa iyang sayop nga dalan.” (Sant. 5:19, 20) Gusto sab nilang himoon ang tanan aron mapanalipdan ang kongregasyon ug mahupay kadtong nasakitan sa gihimong sala. (2 Cor. 1:3, 4) Dihang ang mga ansiyano mag-atiman ug mga kaso sa seryosong sala, kinahanglan una nilang sayron ang tinuod nga nahitabo, nga tingali dangtan ug pipila ka panahon. Dayon, sila mag-ampo, mohatag ug tambag gikan sa Kasulatan, ug mopahamtang ug disiplina “sa hustong paagi.” (Jer. 30:11) Bisag ang mga ansiyano dili maglangaylangay, dili pod sila magdalidali sa paghimog desisyon. Kon sundon sa mga ansiyano ang giya ni Jehova, ang tanan diha sa kongregasyon makabenepisyo. Pero bisan pag giatiman sa mga ansiyano ang mga problema sa hustong paagi, ang mga naapektohan sa gibuhat sa nakasala tingali masakitan gihapon. Kon kini ang imong kahimtang, unsay imong mahimo aron mamenosan ang kasakit nga imong gibati?
14. Unsang ehemplo sa Bibliya ang makatabang nimo kon napasakitan ka pag-ayo sa usa ka Kristohanon?
14 Diha bay higayon nga gipasakitan ka pag-ayo sa laing tawo, tingali sa usa ka Kristohanon pa gani? Dunay nindot nga mga ehemplo diha sa Pulong sa Diyos nga nagtudlo nato kon unsaon pagpaabot nga tul-iron ni Jehova ang mga inhustisya. Pananglitan, bisag si Jose nakasinatig inhustisya gikan sa iya mismong mga igsoon, wala niya tugoti ang ilang kasaypanan nga maghimo niyang madumtanon. Nagpokus hinuon siya sa pag-alagad kang Jehova, ug dagaya siyang gipanalanginan ni Jehova tungod sa iyang pailob ug paglahutay. (Gen. 39:21) Ngadtongadto, napasaylo ni Jose kadtong nakapasakit kaniya ug nakita niya kon sa unsang paagi si Jehova nagpanalangin kaniya. (Gen. 45:5) Sama kang Jose, mahupayan ta kon makigsuod ta kang Jehova ug mosalig nga tul-iron niya ang mga inhustisya sa hustong panahon.—Sal. 7:17; 73:28.
15. Unsay nakatabang sa usa ka sister nga palabyon ang inhustisya?
15 Siyempre, dili tanang inhustisya parehas ka grabe sa naeksperyensiyahan ni Jose, pero tingali masakitan ta kon dili maayo ang pagtratar kanato. Kon gipasakitan ta sa laing tawo, apil na niadtong wala magsimba kang Jehova, makabenepisyo ta kon atong ipadapat ang mga prinsipyo sa Bibliya. (Filip. 2:3, 4) Konsideraha ang usa ka eksperyensiya. Nasakitan pag-ayo ang usa ka sister dihang nahibaloan niya nga ang iyang kauban sa trabaho nanabi ug dili tinuod, sakit nga mga estorya bahin kaniya. Imbes mo-react dayon, gipamalandong sa sister ang ehemplo ni Jesus. Dihang giinsulto si Jesus, wala siya mobalos ug insulto. (1 Ped. 2:21, 23) Tungod niana, nakadesisyon ang sister nga palabyon na lang ang nahitabo. Sa ulahi, nahibaloan niya nga ang iyang kauban sa trabaho duna diay grabeng sakit ug na-stress pag-ayo. Ang sister nakahunahuna nga tingali wala ra tuyoa sa iyang kauban ang gipanulti niini. Busa nalipay kaayo ang sister nga nagpailob siya bisan pa sa dili maayong pagtratar kaniya, ug gibati niya ang kalinaw sa hunahuna.
16. Unsay makahupay nimo kon nag-antos ka tungod sa inhustisya? (1 Pedro 3:12)
16 Kon nag-antos ka tungod sa inhustisya o sa uban pang rason, hinumdomi nga si Jehova duol niadtong “mga dugmok ug kasingkasing.” (Sal. 34:18) Gimahal ka niya tungod sa imong pagpailob ug pagtugyan sa imong palas-anon kaniya. (Sal. 55:22) Siya ang Maghuhukom sa tibuok yuta. Walay butang nga dili niya makita. (Basaha ang 1 Pedro 3:12.) Busa, kon nakasinati kag mga problema nga dili nimo masulbad, andam ka bang magpaabot kaniya?
WALAY KATAPOSANG MGA PANALANGIN ALANG NIADTONG NAGPAABOT KANG JEHOVA
17. Sumala sa Isaias 30:18, unsay gipasalig ni Jehova kanato?
17 Sa dili madugay, ang atong langitnong Amahan dagayang magpanalangin kanato pinaagi sa iyang Gingharian. Ang Isaias 30:18 nag-ingon: “Si Jehova mapailobong naghulat nga pakitaan mog pabor, ug siya motindog aron pakitaan mog kaluoy. Kay si Jehova usa ka Diyos sa hustisya. Malipayon ang tanan nga padayong nagpaabot kaniya.” Kadtong padayong nagpaabot kang Jehova makadawat ug daghang panalangin karon ug sa umaabot nga bag-ong kalibotan.
18. Unsang mga panalangin ang nagpaabot kanato?
18 Sa bag-ong kalibotan, dili na gyod maeksperyensiyahan sa mga alagad sa Diyos ang mga kabalaka ug problema nga ilang giatubang karon. Wala na unyay inhustisya, ug wala na poy kasakit. (Pin. 21:4) Dili na ta kinahanglang mabalaka sa mga butang nga atong gikinahanglan kay abunda na kining itagana. (Sal. 72:16; Isa. 54:13) Nindot gyod nâ nga mga panalangin!
19. Sa unsa ta anam-anam nga giandam ni Jehova?
19 Pinaagi sa pagtabang nato nga madaog ang dili maayong mga kinaiya ug maugmad ang maayong mga hiyas, si Jehova nag-andam kanato karon para sa kinabuhi ubos sa iyang pagmando. Ayawg kadismayar, ug ayawg hunong sa pag-alagad kang Jehova. Dunay maayo kaayong kinabuhi nga nagpaabot nimo! Samtang naghinamhinam ta nianang nindot nga kaugmaon, hinaot nga padayon tang magpaabot nga malipayon ug mapailobon kang Jehova hangtod nga mahuman niya ang iyang buluhaton!
AWIT 118 “Hatagi Mig Dugang Pagtuo”
^ par. 5 Nakadungog na ba ka nga ang usa ka dugay nang alagad ni Jehova miingon, ‘Wa gyod ko magdahom nga matiguwang pa ko niining sistemaha’? Kitang tanan naghinamhinam nga taposon na ni Jehova kining sistemaha, ilabina karon nga lisod na kaayo ang kahimtang. Pero kinahanglang makakat-on ta sa pagpailob. Niining artikuloha, hisgotan nato ang mga prinsipyo sa Bibliya nga makatabang nato sa pagpaabot nga mapailobon. Susihon sab nato ang duha ka kahimtang diin kinahanglan tang mapailobong magpaabot kang Jehova. Ug hisgotan nato ang mga panalangin nga gisaad ni Jehova niadtong andam magpaabot.
^ par. 56 HULAGWAY: Sukad sa pagkabata, ang sister pirme nang mag-ampo kang Jehova. Sa gamay pa siya, gitudloan siya sa iyang ginikanan kon unsaon pag-ampo. Sa batan-on na siya, nagpayunir siya, ug pirme niyang hangyoon si Jehova nga panalanginan ang iyang ministeryo. Katuigan sa ulahi, dihang grabeng nasakit ang iyang bana, nangayo siyag kusog kang Jehova aron makalahutay niini nga kalisdanan. Karon nga balo na siya, padayon gihapon siyang nag-ampo, nga masaligon nga tubagon sa iyang langitnong Amahan ang iyang mga pag-ampo—sama sa gihimo ni Jehova sukad pa sa una.
