EKICWEKA C’OKWEGA 31
Mbehi oyetegwire kutegereza Yehova?
‘Ntegereze Ruhanga ow’okujunwa kwange.’—MIK 7:7.
ECESHONGORO CA 128 Okugumisiriza Okuhitsya aha Muheru
EMPINYE *
1-2. Ni enki eki twaza kushwijuma omuri eki kicweka?
NOYEHURIRA ota ekikapu ekirimu ebintu ebi ori kwetenga munonga catinda kwija kandi okitegerize? Mbehi eco nikituma wagubwa kubi? Nikibasa kutuma wayehurira nk’oku omu Nfumu 13:12 hari kugira hati: ‘Amasiko gatahwire garusya omutima.’ Konka shi okayehurira ota wamanya ku hariho enshonga ndungi eyatuma kitayija aha bwire obu waba okitegerize? Eco nikibasa kutuma wayehangana kandi okakitegereza.
2 Omuri eki kicweka, twaza kushwijuma emisinge ya Bibuli emwe eri kubasa kutukwasa kuguma ‘tutegerize.’ (Mik 7:7) Nambwenu twaza kureba obu tushemerire kutegereza Yehova. Bwanyima, nitwija kushwijuma emigisha ebikirwe abari kutegereza Yehova.
EMISINGE YA BIBULI ERI KUTWEGESA KUTEGEREZA
3. Omu Nfumu 13:11 nihatwegesa ki?
3 Ecokureberaho ekiri kutwereka enshonga ahabw’enki tushemerire kutegereza kiri omu Nfumu 13:11. Nihagira ngu: ‘Itungo rya bugubugu riryatuba, konka ori kutunga mporampora aryarikanyisa.’ Ni enki eki hari kutwegesa? Omuntu w’omunyabwenge nakora ebintu ayetonzire kandi niharugamu ebirungi.
4. Omu Nfumu 4:18 nihatwegesa ki?
4 Omu Nfumu 4:18 nihatugambira ngu: ‘Omuhanda gw’abahikirire ni nk’omushana og’omu kasheshe ogugumizamu nigwaka gukahisya omu ihangwe.’ Ebyo bigambo nibyereka ku Yehova ari kushururira abantu ekigendererwa ceye mporampora. Nambwenu, eco cahandikirwe nicereka oku Omukristo ari kukora empindahinduka omu kubaho kweye mporampora. Omuntu tari kubasa kukura omu by’omwika ahonaho. Nikitwara obwire. Ku turi kwega Ekigambo ca Ruhanga twetonzire kandi tukata omu nkora obuhabuzi obu turi kukitungiramu n’obu turi kutunga omu kitongore ceye, mporampora nitugira emitwarize nk’eya Kristo. Nambwenu nikituma twamanya ge Ruhanga. Yetegereze oku Yesu yayerekire eyo nshonga.
Nk’oku ekimera kiri kukura mporampora, ni ko omuntu ori kuhurira obutumwa bw’Obukama kandi akabwikiriza ari kugenda nakura omu by’omwika mporampora (Reba paragurafu ya 5)
5. Ni kiha c’okureberaho ca Yesu ekiri kwereka ku hari kuhwaho obwire ngu omuntu akore empinduka?
5 Yesu akakoresa ecokureberaho ari kushoborora oku obutumwa bw’Obukama obu turi kuburira buri nk’akajuma kace akari kukura mporampora omu mitima y’abantu abine emitima mirungi. Akagamba ati: ‘Embibo zikamera, zikakura, atamanyire oku zikuzire. Itaka ni ryo rimeza ryonka; habanza akababi, hataho obushisha, na bwanyima enjuma nkuru.’ (Mak 4:27, 28) Ni enki eki Yesu yabire ari kumanyisa? Nk’oku embibo eri kukura mporampora, ni ko omuntu ori kwikiriza obutumwa bw’Obukama ari kukura omu by’omwika mporampora. Ecokureberaho: Abegi ba Bibuli ku bari kugira obunywani burungi na Yehova ni bwo turi kutandika kureba ku bakozire empinduka. (Efe 4:22-24) Konka tushemerire kwijuka ku Yehova ari we ori kutuma ogo muntu yagira empinduka.—1 Kor 3:7.
6-7. Ni enki eki turi kwegera aha ku Yehova yahangire ensi?
6 Omu bintu byona ebi Yehova ari kukora, nayehangana ategereza obwire obu arabimariremu. Nakikora kugira ngu ahimbise izina ryeye kandi akwase abandi. Reba oku Yehova yakozire ebintu mporampora omu bwire obu yabire ari kuhangira abantu ensi.
7 Bibuli ku eri kushoborora oku Yehova yahangire ensi negamba ku ‘yagitire aha rugero rwayo,’ ‘akagibyara’ aha ‘musinge gwayo,’ kandi ‘akagitaho ibare ry’obuhamizo.’ (Yob 38:5, 6) Nambwenu akatunga n’obwire bw’okushwijuma ebi yabire yamara kuhanga. (Kut 1:10, 12) Tekateka aha ku ba marayika babire nibehurira ku babire nibareba ekintu kisya eki Yehova yahanga? Kikaba nikibashemeza munonga! Eco kikatuma batandika ‘kutera akari k’okushemererwa.’ (Yob 38:7) Eco nikitwegesa ki? Yehova kikamutwara obwire buringwa kugira ngu amaririze ebi yahangire, konka ku yabirebire akareba byona ‘biri birungi munonga.’—Kut 1:31.
8. Ni enki eki twaza kushwijuma?
8 Ebyokureberaho byona ebi twareba nibyereka ku hariho emisinge myingi omu Kigambo ca Ruhanga eri kwereka ku tushemerire kutegereza. Hati twaza kureba obwire obu tushemerire kutegereza Yehova.
NI RYARI OBU TUSHEMERIRE KUTEGEREZA YEHOVA?
9. Ni ryari obu tushemerire kutegereza Yehova?
9 Tushemerire kutegereza Yehova ngu agarukemu eshara zitu. Ku turi kushaba Yehova amani g’okutukwasa kwehanganira ekizibu eki twine ninga shi kusingura obweremwa bwitu, nitubasa kuhurira atinzire kutugarukamu. Ahabw’enki Yehova atari kugarukamu eshara zitu zona ahonaho?
10. Ahabw’enki tushemerire kutegereza Yehova ngu agarukemu eshara zitu?
10 Yehova nahurira eshara zitu. (Zab 65:2) Nareba ku eshara zitu ziri kwereka okwikiriza oku twine. (Heb 11:6) Nambwenu, Yehova nashemererwa yareba amani agu turi kutaho ngu tubeho turi kubuganisa n’ebi twashaba kandi turi kukora ebi ari kukunda. (1 Yoh 3:22) Obwe rero, tushemerire kwehangana kandi tukakora cona eki turi kubasa ngu tusingure obweremwa bwitu. Yesu akatugambira enshonga ahabw’enki hine obu eshara zitu zitari kuhika nizigarukwamu ahonaho. Akagira ati: ‘Mushabe, muryahebwa; musherure, muryazora; mwiguze, muryigurirwaho. Ahakuba omuntu wena oshaba ahebwa; osherura azora; oyiguza ayigurirwaho.’ (Mat 7:7, 8) Ku turakuratize obwo buhabuzi kandi tukezirikira kushaba, nitwija kwesiga ku Tata witu ari kuhurira eshara zitu kandi akazigarukamu.—Kol 4:2.
N’obu tutegerize Yehova, nitugumizamu kumushaba twesigire ku natuhurira (Reba paragurafu ya 11) *
11. Ni bata oku omu Baheburaayo 4:16 hari kutukwasa twahurira eshara zitu ziri kutinda kugarukwamu?
11 N’obu kiri kubasa kutwara obwire buringwa kugira ngu eshara zitu zigarukwemu, Yehova naturaganisa ku arije kugarukamu eshara zitu omu bwire buhikire. (Shoma omu Baheburaayo 4:16.) Ni yo nshonga tutashemerire kwetombitera Yehova ngu eki twashaba ticahika nikiba nk’oku turi kucenda. Ecokureberaho: Hahwireho emyaka myingi abantu bari kushaba ngu Obukama bwa Ruhanga bwije bwiheho egi nsi mbi. Yesu akagamba ngu tugume tubushabe. (Mat 6:10) Konka nikiba kitari ec’obwenge abantu bareka kwikiriza Ruhanga, ngu ni ahakuba emperu etarizire omu bwire obu abantu bari kutekateka! (Hab 2:3; Mat 24:44) Tushemerire kuguma tutegerize Yehova kandi tuguma turi kwikiriza ku arije kugarukamu eshara zitu. Emperu neza kwija aha bwire buhikire, ahakuba Yehova akatorana ekiro n’obwo ‘bwire.’ Kandi obwo bwire buryaba buhikire aha bantu bona.—Mat 24:36; 2 Pet 3:15.
Ni enki eki turi kubasa kwegera aha kwehangana kwa Yosefu? (Reba paragurafu ya 12-14)
12. Ni ziha mbera eziri kubasa kutuma kwehangana catugumira?
12 Tushemerire kugumizamu kwehangana tutegerize obwire obu haribaho oburinganiza. Abantu b’omuri egi nsi, nibatwariza kubi abu batari kubuganisa obuhangwa, obwoko, oruhu, omucwe n’ihanga. Abandi nibatwarizibwa kubi ahakuba bine obumuga bw’aha mubiri n’omu bwenge. Abahereza ba Yehova bingi nibatwarizibwa kubi ahabw’enyikiriza zabo ezegamire ahari Bibuli. Twaba turi kutwarizibwa kubi omuri obwo buryo, tushemerire kuguma turi kwijuka ebigambo bya Yesu. Akagira ati: ‘Origumisiriza okuhisya aha muheru, ni we arijunwa.’ (Mat 24:13) Konka shi ni enki eki oshemerire kukora waba ori kumanya omuntu w’omu kibina ori kukora ebintu bibi? Mbehi abazehe ku baramare kubimanya noyija kubibarecera otegereza kandi oyesiga ku barije kubitereza nk’oku Yehova ari kwenda? Ni enki eki abazehe bashemerire kukora hagira owakora ekibi c’amani?
13. Ni enki eki Yehova ari kwenda ngu abazehe bakore hagira owakora ekibi c’amani?
13 Abazehe ku bari kumanya ngu hine okozire ekibi c’amani, nibashaba, rero baronda ‘obwenge oburi kuruga omu iguru’ kugira ngu bamanye oku Yehova ari kureba ebintu. (Yak 3:17) Entego yabo ni okwiha omuntu okozire ekibi ‘omu muhanda ogu yahabiremu.’ (Yak 5: 19, 20) Nambwenu nibaba bari kwenda kukora cona eki bari kubasa ngu barinde ekibina kandi bahumurize abu biri kuba bishashire. (2 Kor 1:3, 4) Abazehe bamanya ku hine okozire ekibi c’amani, bashemerire kubanza bamanya amazima gona kandi eco nikitwara obwire. Bwanyima nibashaba, baha ogo muntu obuhabuzi bw’omu Byahandikirwe kandi bamuhana batarengeserize. (Yer 30:11) N’obu abazehe batari kutegereza obwire bwingi ngu batereze ebizibu, tibari kukora ensharamu bari kuhubuka. Abazehe ku bari kutereza ge ebizibu, ab’omu kibina bona nibagasirwa. N’obu abazehe bakutereza ebizibu omu buryo burungi, owatwarizibwe kubi nabasa kuguma ari kushasha. Waba ari ko ori kwehurira, ni enki eki ori kubasa kukora ngu ocendeze aha busaasi obu oyine?
14. Ni kiha cokureberaho c’omuri Bibuli ekiri kutukwasa kwehangana haba hine Omukristo mugenzi witu owatutwarize kubi?
14 Mbehi omuntu yarakukorire ebintu ebiri kukushasha, nangwa n’Omukristo mugenzi wawe? Nobasa kubona ebyokureberaho birungi omu Kigambo ca Ruhanga ebiri kukukwasa kutegereza obwire obu Yehova arigira eki yakora. Ecokureberaho: N’obu benishe ba Yosefu bamutwarize kubi, tarikirize ngu bitume yaba omuntu mubi. Omu mwanya gw’eco, akaguma atire omutima aha kuhereza Yehova, kandi na we akamuhemba ahabw’okuguma amutegerize. (Kut 39:21) Aha muheru, Yosefu akasaasira abamutwarize kubi kandi Yehova akamuha emigisha. (Kut 45:5) N’itwe nikituhumuriza twagira obunywani burungi na Yehova kandi tukategereza obwire obu ariretaho oburinganiza.—Zab 7:17; 73:28.
15. Ni enki ecakwasize omunyanyazi omwe kwehanganira okutwarizibwa kubi?
15 Ni amazima, nitubasa kuba tutarabugine ebizibu nk’ebya Yosefu, konka ku bari kututwariza kubi omu buryo obutari bumwe nikitushasha. Twaba twine ekizibu n’omuntu, n’obu yakuba atari omuhereza wa Yehova, nitugasirwa twakuratira emisinge y’omuri Bibuli. (Fil 2:3, 4) Reba ecokureberaho kimwe. Omunyanyazi akashasha munonga ku yamanyire ngu omukozi mugenzi weye namugambaho ebintu bibi aha bandi. Omu mwanya g’okurahukiriza kugira ekiniga, akabanza yatekateka aha cokureberaho ca Yesu. Yesu ku yajumirwe tarabagarurire. (1 Pet 2:21, 23) Omunyanyazi ku yabitekatekireho, akasharamu kubyehuza. Bwanyima, akamanya ku omukozi mugenzi weye yabire arwire munonga kandi ayemerize omutima. Omunyanyazi akahika ari kumanya ku buri omukozi mugenzi weye yabire atagenderire kumutwariza kubi. Kandi omunyanyazi akashemererwa ahakuba yayehanganire okutwarizibwa kubi, kandi akatunga obusinge.
16. Ni enki ekiri kubasa kukuhumuriza waba ori kwehanganira okutwarizibwa kubi? (1 Petero 3:12)
16 Waba ori kubonabona ahabw’okutwarizibwa kubi ninga shi ahabw’ezindi nshonga, yijuka ku Yehova ari hihi ‘ab’emitima ehendekire.’ (Zab 34:18) Nakukunda ahabw’okuguma oyehangine n’okumwegecerera emitwaro yawe yona. (Zab 55:22) Ni we muramuzi w’ensi yona. Tihine ekiri kubaho ngu atakimanye. (Shoma omuri 1 Petero 3:12.) Mbehi waba ori kuraba omu bizibu ebirengire obushoborozi bwawe, oyetegwire kutegereza obwire obu aribimaraho?
EMIGISHA EBIKIRWE ABARI KUTEGEREZA YEHOVA
17. Nk’oku biri kugambwa omuri Isaaya 30:18, ni enki eki Yehova ari kuturaganisa?
17 Juba aha, Tata witu w’omu iguru nayija kutuha emigisha birabire aha Bukama bweye. Omuri Isaaya 30:18 nihagira hati: ‘Ni co [Yehova] aritegerereza, ngu abagirire embabazi, kandi ni co ariherwa ekitinisa, ngu abagirire esaasi; ahabw’okuba Yehova ni Ruhanga ocwa emanja z’oburyo, abari kumutegereza bona bine omugisha.’ Abari kuguma bategerize Yehova nibija kutunga emigisha hati n’omu nsi ensya eri kwija.
18. Ni eha migisha eyi tutegerize?
18 Abahereza ba Ruhanga ku baritaha omu nsi ensya, tibarije kushuba kwemereza omutima n’okubugana ebizibu ebi bari kubugana omuri obu bwire. Okutwarizibwa kubi kuryarugaho kandi obusaasi tiburibaho bundi. (Kush 21:4) Titurije kutegereza ebi turi kwenda twemerize omutima ahakuba turyaba twine ebiri kutumara. (Zab 72:16; Isa 54:13) Ebyo ku nibyija kuba biri kushemeza!
19. Ni enki eki Yehova ari kututegurira hati?
19 Obwo bwire butakahikire, Yehova ari kututegura hati ngu twije kutegekwa n’Obukama bweye ari kutukwasa kusingura emitwarize mibi n’okugira emitwarize eri kumushemeza. Otacweka entege ngu oreke kuhereza Yehova. Ebirungi biri hihi kwija! Obu tucategerize ebirungi omu biro by’omu misho, nimureke tugumizemu kutegereza Yehova kuhisa obu arimaririza emirimo yeye!
ECESHONGORO CA 118 “Twongyereho Okwikiriza”
^ par. 5 Mbehi okahuriraho omuntu owamazire obwire buringwa ari kuhereza Yehova ari kugira ngu: ‘Nkaba ntari kumanya ku ndije kuhika omuri egi myaka yona emperu etakizire?’ Twine ekihika c’okureba Yehova ari kwihaho egi nsi mbi. Konka tushemerire kwega kuba abantu abari kutegereza. Omuri eki kicweka, twaza kushwijuma emisinge eri kubasa kutukwasa kugumizamu kutegereza Yehova. Nambwenu twaza kushwijuma embera ibiri ezi turi kubasa kutegerezamu Yehova. Bwanyima, nitwija kureba emigisha eyi Yehova ariha abetegwire kumutegereza.
^ par. 56 EKISHUSHANI: Omunyanyazi akaguma ari kushaba Yehova kwiha acari omwana. Obu yabire acari omwana, abazire beye bakamwegesa kushaba. Ku yabire omunyeto, yaba omupayoniya kandi yaguma kushaba Yehova ngu amuhe omugisha. Bwanyima y’emyaka, omushija weye akarwara munonga, rero omunyanyazi yashaba Yehova amani g’okwehanganira eco kigezo. Omuri obu bwire ni omufakazi kandi nagumizamu kushaba ayine obwesige ku Ishe w’omu iguru arije kugarukamu eshara zeye nk’oku yagenzire ari kubimukorera.
