1-2. Ki nou pou diskite dan sa lartik?

KI MANNYER ou santi ler en parsel ki ou vreman bezwen pa ariv ler ki ou pe ekspekte? Eski ou dezapwente? I tre probab ki ou pou santi parey Proverb 13:12 (NWT) i dir: “Ler en keksoz ki ou pe espere pa arive, sa i fer ou leker malad.” Me ki mannyer ou santi si ou tande ki i annan en bon rezon akoz sa parsel pa’n arive ler ki ou ti pe ekspekte? Dan sa ka, i tre probab ki ou pou annan pasyans e pare pour espere.

² Dan sa lartik, nou pou vwar bann prensip Labib ki kapab ed nou pour esper Zeova azir. (Mik. 7:7) Nou pou osi diskit lo de sityasyon kot nou bezwen esper Zeova avek pasyans. Apre, nou pou vwar bann bon keksoz ki Zeova in promet pour fer pour bann ki pare pour espere.

3. Ki nou aprann dan Proverb 13:11?

³ Proverb 13:11 i montre nou akoz nou devret annan pasyans. I dir: “Larises ki’n ganny vit i disparet vit; me larises ki’n ganny anmase ptitapti ava ogmante.” Ki nou aprann avek sa verse? En dimoun saz i annan pasyans e i fer keksoz byen. Sa pou fer li ganny bann bon rezilta.

4. Ki sa prensip dan Proverb 4:18 i montre?

⁴ Proverb 4:18 (NWT) i dir nou ki “santye bann dimoun drwat i parey sa lalimyer ki briye dan bomaten ki pe vin deplizanpli kler ziska gran lizour.” Sa verse i montre klerman ki Zeova i ed son pep pour konpran son plan  ptitapti. Sa verse i osi kapab ed nou konpran ki mannyer en Kretyen i kapab fer bann sanzman dan son lavi e vin pli pros avek Zeova. I pran letan pour en dimoun vin pli pros avek Zeova. Alor, si nou etidye byen e aplik konsey ki nou gannyen dan Parol Bondye e avek son lorganizasyon, nou pou ptitapti devlop bann kalite ki Kris i annan. Nou pou osi aprann konn Bondye pli byen. Aprezan, annou vwar en legzanp ki Zezi ti donnen pour ed nou konpran sa pwen.

5. Ki legzanp Zezi ti servi pour montre ki i pran letan pour en dimoun fer bann sanzman?

⁵ Zezi ti servi en legzanp pour eksplike ki mannyer mesaz Rwayonm ki nou anonse i parey en pti lagrenn ki pouse ptitapti dan leker bann ki kontan sa ki drwat. I ti dir: “Bann lagrenn i zermen e vin gran, ki mannyer sa i arive, [sa enn ki’n senmen] i zis pa konnen. Later par li menm i raport fri gradyelman, premyerman son tiz, apre zepi e finalman lagrenn i mir dan zepi.” (Mark 4:27, 28) Ki Zezi ti pe esey dir? I ti pe dir ki zis parey en plant i pouse ptitapti, en dimoun ki krwar dan mesaz Rwayonm pou pran en pe letan pour li fer bann sanzman. Par egzanp, ler nou etidyan Labib i vin pli pros avek Zeova, nou konmans vwar bann bon sanzman ki zot in fer. (Efe. 4:22-24) Me nou bezwen rapel ki Zeova ki fer pouse sa pti lagrenn.​—1 Kor. 3:7.

6-7. Ki nou aprann avek lafason ki Zeova ti kree later?

⁶ Dan tou sa ki Zeova i fer, i demontre pasyans e i pran letan ki neseser pour fini son travay. I fer sa pour anmenn loner lo son non e pour ed lezot. Par egzanp, annou vwar ki mannyer Zeova in ptitapti prepar later pour bann imen.

⁷ Labib i dir ki ler Zeova ti kree later, i ti ‘desid son bann mezir,’ ‘met son fondasyon’ e “met premye pyer.” (Zob 38:5, 6, NWT) I ti menm pran letan pour egzamin son travay. (Zen. 1:10, 12) Mazin  ki mannyer bann lanz ti santi ler zot ti vwar sak nouvo keksoz ki Zeova ti kree? I bezwen ki zot ti vreman eksite parski zot ti konmans “kriye avek lazwa.” (Zob 38:7) Ki nou aprann? I ti pran plizyer milye lannen pour Zeova kree later, zetwal, bann imen ek tou bann zannimo. Me ler Zeova ti get tou sa ki i ti’n kree, i ti dir ki i “tre bon.”​—Zen. 1:31.

8. Ki nou pou diskite aprezan?

⁸ Sa bann legzanp in montre nou ki i annan en kantite prensip dan Parol Bondye ki montre nou ki nou bezwen annan pasyans. Aprezan, annou diskit lo de sityasyon kot nou bezwen esper Zeova avek pasyans.

9. Dan ki sityasyon nou bezwen esper Zeova?

⁹ I kapab ki nou bezwen espere pour Zeova reponn nou lapriyer. Ler nou priye pour ganny lafors pour andir en problenm oubyen pour ganny led pour aret fer en keksoz ki Zeova pa kontan, nou kapab santi ki Zeova i tarde reponn nou lapriyer. Me akoz Zeova pa reponn tou nou lapriyer deswit?

10. Akoz nou bezwen esper avek pasyans pour Zeova reponn nou lapriyer?

¹⁰ Zeova i ekout nou lapriyer atantivman. (Ps. 65:2) I vwar nou bann lapriyer senser konman laprev ki nou annan lafwa dan li. (Ebr. 11:6) I anvi vwar nou fer zefor pour viv an armoni avek nou bann lapriyer e pour fer son lavolonte. (1 Zan 3:22) Alor ler nou demann Zeova pour ed nou aret fer en keksoz ki i pa kontan, i kapab ki nou bezwen annan pasyans e fer tou sa ki nou kapab pour aret fer sa keksoz. Zezi i ed nou konpran ki Zeova pa pou reponn serten nou lapriyer deswit. I ti dir: “Kontinyen demande e zot pou gannyen, kontinyen rode e zot pou trouve, kontinyen tap laport e i pou ouver. Parski tou sa ki demande i gannyen e tou sa ki rode i trouve e tou sa ki tap laport, laport pou ouver.” (Mat. 7:7, 8) Ler nou swiv sa konsey e nou “persevere dan lapriyer,” nou kapab asire ki nou Papa ki dan lesyel i ekout nou e i pou reponn nou lapriyer.​—Kol. 4:2.

11. Ki mannyer Ebre 4:16 i ed nou ler i paret ki nou lapriyer i tarde ganny reponn?

¹¹ Menm si i paret ki nou lapriyer i tarde ganny reponn, Zeova i promet pour reponn nou lapriyer “ler nou bezwen.” (Lir Ebre 4:16.) I pour sa rezon ki nou pa devret zanmen blanm Zeova si i pa reponn nou lapriyer deswit parey nou ti pe ekspekte. Par egzanp, pour plizyer lannen, en kantite dimoun in priye pour Rwayonm Bondye met en lafen avek sa move lemonn. Zezi ti menm dir ki nou devret priye pour sa arive. (Mat. 6:10) Me i ti pou bet si nou les nou lafwa afebli akoz lafen pa’n ariv ler nou ti krwar ki i pou arive. (Aba. 2:3, NWT; Mat. 24:44) I ti pou pli saz pour kontinyen esper Zeova azir e kontinyen priye avek lafwa ki i pou reponn nou lapriyer. Lafen pou ariv egzakteman dan sa bon moman parski Zeova in fini swazir sa “zour ek sa ler” pour li arive e i pou sa pli bon moman pour nou tou.​—Mat. 24:36; 2 Pyer 3:15.

12. Dan ki sityasyon i kapab difisil pour demontre pasyans?

¹² I kapab ki nou bezwen annan pasyans anmezir ki nou esper Zeova rann lazistis. Souvan dimoun dan sa lemonn i tret  dimoun lot sèks, ras, kiltir oubyen nasyonalite dan en move fason. Lezot pa ganny trete dan en bon fason parski zot annan dezabilite fizik oubyen mantal. En kantite serviter Zeova in andir lenzistis akoz zot krwayans ki baze lo Labib. Ler nou ganny trete dan sa fason, nou devret rapel sa ki Zezi ti dir. I ti dir: “Sa enn ki’n andire ziska lafen pou ganny sove.” (Mat. 24:13) Me ki nou devret fer si nou konnen ki en dimoun dan kongregasyon in fer en pese grav? Apre ki bann ansyen in ganny enformen lo sa ki’n arive, eski ou pou annan pasyans ek konfyans ki zot pou fer keksoz dapre prensip Zeova? Petet, ki bann ansyen pou bezwen fer ler en dimoun in fer en fot grav?

13. Ki Zeova i anvi bann ansyen i fer ler en dimoun i fer en pese grav?

¹³ Ler bann ansyen i konnen ki en dimoun dan kongregasyon in fer en pese grav, zot priye pour ganny “lasazes ki sorti dan lesyel” pour zot kapab vwar sa sityasyon parey Zeova i vwar. (Zak 3:17) Zot lobzektif i pour ed sa dimoun aret fer pese si i posib. (Zak 5:19, 20) Zot osi anvi fer tou sa ki zot kapab pour protez kongregasyon e pour rekonfort bann ki’n ganny blese. (2 Kor. 1:3, 4) Ler bann ansyen i konnen ki en dimoun in fer en pese grav, zot premyerman rode kwa ki’n vreman arive e sa i kapab pran en pe letan. Apre ki zot in priye, zot donn sa dimoun konsey sorti dan Labib e zot disiplin li “lo en degre apropriye.” (Zer. 30:11, NWT) Menm si bann ansyen pa pran bokou letan, zot osi pa pran desizyon tro vit. Ler bann ansyen i swiv gidans Zeova, sa pou anmenn bokou byenfe dan kongregasyon. Menm si bann ansyen i fer keksoz dan sa bon fason, i kapab ki bann ki’n ganny afekte par sa ki sa dimoun in fer, i ankor pe soufer. Si ou santi koumsa, ki ou kapab fer?

14. Ki legzanp dan Labib ki kapab rekonfort ou si en Kretyen in bles ou santiman?

¹⁴ Eski en dimoun in deza bles ou santiman? Petet menm en dimoun dan kongregasyon? Ou kapab vwar bann bon legzanp dan Parol Bondye ki montre nou ki mannyer pour esper Zeova rann  lazistis. Par egzanp, menm si bann frer Zozef ti tret li dan en move fason, Zozef pa ti les zot fot fer li vin en dimoun ki gard rankin. O kontrer, i ti reste konsantre dan son servis pour Zeova e Zeova ti rekonpans li pour son pasyans ek landirans. (Zen. 39:21) Avek letan, Zozef ti pardonn bann ki ti’n bles li e i ti vwar ki mannyer Zeova ti beni li. (Zen. 45:5) Parey Zozef, nou ganny rekonforte ler nou vin pli pros avek Zeova e esper li rann lazistis dan son moman apropriye.​—Ps. 7:17; 73:28, NWT.

15. Kwa ki ti ed en ser pour andir en sityasyon avek pasyans?

¹⁵ Pa nou tou ki eksperyans lenzistis parey Zozef ti eksperyanse. Me nou tou nou santiman i ganny blese ler nou pa ganny trete dan en bon fason. Ler nou annan problenm avek en dimoun, enkli en dimoun ki pa ador Zeova, nou pou ganny bann byenfe si nou aplik bann prensip Labib. (Fili. 2:3, 4) Annou vwar en legzanp. En ser ti vreman ganny blese ler i ti dekouver ki enn son koleg travay ti pe dir bann move keksoz ki pa vre lo li avek lezot. Olye reakte tro vitman, sa ser ti pran letan pour reflesir lo legzanp Zezi. Ler dimoun ti ensilte Zezi, i pa ti ensilte zot li osi. (1 Pyer 2:21, 23) Sa ser ti deside pour swiv legzanp Zezi e i pa ti fer nanryen. Pli tar i ti aprann ki sa koleg travay ti vreman malad e ki sa ti pe fer li vreman strese. Alor, sa ser ti mazinen ki sa koleg travay ti’n dir sa bann parol san reflesir. Sa ser ti vreman kontan ki i ti’n andir sa sityasyon avek pasyans e i ti ganny son lape lespri.

16. Kwa ki kapab rekonfort ou si ou pe andir en lenzistis? (1 Pyer 3:12)

¹⁶ Si ou pe soufer akoz en lenzistis oubyen pour lezot rezon, rapel ki Zeova i pros avek sa “bann ki annan en leker brize.” (Ps. 34:18, NWT) I kontan ou akoz ou annan pasyans e ou pe larg ou fardo lo li. (Ps. 55:22) I sa enn ki ziz later antye e i vwar tou keksoz. (Lir 1 Pyer 3:12.) Alor ler ou annan en problenm grav ki ou pa kapab rezourd, rapel ki i enportan pour esper Zeova azir.

17. Dapre Izai 30:18, ki Zeova in promet pour fer?

¹⁷ Byento, nou pou ganny bokou benediksyon avek nou Papa ki dan lesyel atraver son Rwayonm. Izai 30:18 (NWT) i dir: “Zeova pe esper avek pasyans pour donn zot son laprouvasyon e i pou azir pour demontre pitye anver zot. Parski Zeova i en Bondye lazistis. Ere tou bann ki kontinyen esper li.” Bann ki kontinyen esper Zeova pou ganny bokou benediksyon la konmela e dan nouvo lemonn.

18. Ki benediksyon nou pe espere?

¹⁸ Ler pep Bondye pou dan nouvo lemonn, zot pa pou zanmen andir bann problenm ki zot pe fer fas avek ozordi. I pou nepli annan lenzistis ek douler. (Rev. 21:4) Nou pa pou bezwen enkyet konsernan sa ki nou bezwen parski i pou annan ase pour tou dimoun. (Ps. 72:16; Iza. 54:13) Sa pou en gran benediksyon!

19. Ki Zeova pe prepar nou ptitapti pour fer?

¹⁹ Depi la konmela, Zeova pe prepar nou pour viv anba son dominasyon par ed nou pour sirmont nou bann move labitid e devlop bann kalite ki fer li plezir. Pa dekouraze e pa aret servi Zeova. Byento, nou pou annan en lavenir merveye. Anmezir nou pe esper sa letan merveye, annou reste zwaye e esper Zeova avek pasyans pour fer bann keksoz ki in dir i pou fer!