1-2. Etɛ lɛ jí mǐ ka na ɖɔ xó dó ɖò xóta elɔ mɛ?

ENYI agban e a ɖó hudo tɔn tawun é ɖé ma wá dó hwenu e ba dó a ɖè é ǎ ɔ, nɛ̌ nǔ ka na cí nú we? A na flú à cé? A na ɖibla mɔ hwiɖée ɖò nǔ e Nǔnywɛxó 13:12 ɖɔ é mɛ; é ɖɔ: “È ɖò nǔɖe ɖó nukún wɛ bo ma ɖò mimɔ wɛ ǎ ɔ, azɔn wɛ é nɔ dó mɛ.” Amɔ̌, enyi a ka sè ɖɔ hwɛjijɔ ɖagbe wu wɛ agban e ɖó nukún wɛ a ɖè é ma wá dó hwetɔnnu ǎ ɔ, nɛ̌ nǔ ka na cí nú we? A sè mɔ̌ ɔ, a na ɖibla ɖó suúlu, bo nɔte kpɔ́n.

² Ðò xóta elɔ mɛ ɔ, mǐ na mɔ nǔgbododó Biblu tɔn e sixu d’alɔ mǐ bɔ mǐ na ‘nɔte kpɔ́n Jehovah’ bonu é na wà nǔ é ɖé lɛ. (Micée 7:7) Enɛ gudo ɔ, mǐ na kɛnu dó ninɔmɛ e mɛ mǐ ɖó na ɖó suúlu, bo nɔte kpɔ́n Jehovah bonu é na wà nǔ ɖè é we wu. Gudo mɛ ɔ, mǐ na gbéjé nyɔna e ɖò sɛxwetɛn nú mɛ ɖěɖee sɔ́ jlǒ bo ɖò te kpɔ́n Jehovah é lɛ é kpɔ́n.

3. Etɛ jí nǔgbododó e ɖò Nǔnywɛxó 13:11 mɛ é ka tɛɖɛ̌?

³ Nǔnywɛxó 13:11 na kpɔ́ndéwú e xlɛ́ ɖɔ è ɖó na ɖó suúlu é ɖé. É ɖɔ: “Mɛ e nɔ jɛ dɔkun ma xò kan ɔ, dɔkun tɔn ɔ gbà wɛ é nɔ gbadó; mɛ e ka nɔ jɛ dɔkun tɔn kpɛɖé kpɛɖé ɔ, dɔkun tɔn nɔ ɖò jijɛji wɛ.” A ka ɖ’ayi nǔgbododó ɔ wu à? Mɛ e ɖó nǔnywɛ ɔ nɔ xwè sɔ, bo nɔ ɖó suúlu dó wà nǔ, lobo ka nɔ mɔ nu tɔn.

4. Etɛ jí nǔgbododó e ɖò Nǔnywɛxó 4:18 mɛ é ka tɛɖɛ̌?

⁴ Nǔnywɛxó 4:18 ɖɔ nú mǐ ɖɔ: “Mɛ e nɔ wà nǔ jlɔjlɔ lɛ sín ali cí weziza zǎnzǎn tɔn ɖɔhun; é nɔ ɖò hinhɔ́n wɛ, é nɔ ɖò hinhɔ́n wɛ kaka bo nɔ wá hɔ́n bǐ, bo nɔ cí weziza hwemɛ tɔn ɖɔhun.” Xógbe enɛ lɛ kúnkplá lee Jehovah nɔ ɖè linlin tɔn  xlɛ́ togun tɔn gbɔn é tlɔlɔ, enɛ wɛ nyí kpɛɖé kpɛɖé. É ɖò mɔ̌ có, ɖò ali ɖevo nu ɔ, wemafɔ ɔ sixu lɛ́ kúnkplá lee Klisanwun ɖé nɔ yì nukɔn gbɔn ɖò gbigbɔ lixo ɖò gbɛzán tɔn mɛ é. Nukɔnyiyi ɖò gbigbɔ lixo nyí kplakpla sín nǔ ǎ. É nɔ byɔ hwenu. Enyi mǐ nɔ xwè sɔ dó kplɔ́n nǔ, bo nɔ lɛ́ zán wě e Xó Mawu tɔn kpo tutoblonunu tɔn kpo nɔ ɖè xá mǐ lɛ é ɔ, mǐ na sɔnǔ nú jijɔ e Klisu ɖó lɛ é kpɛɖé kpɛɖé. Mǐ na lɛ́ tuùn Mawu hugǎn. Mǐ ni kpɔ́n lee Jezu tinmɛ enɛ gbɔn é.

5. Nɛ̌ Jezu ka ɖexlɛ́ ɖɔ huzuhuzu lɛ nɔ byɔ hwenu gbɔn?

⁵ Jezu zán nǔjlɛdonǔwu ɖé dó tinmɛ lee wɛn Axɔ́suɖuto ɔ tɔn e mǐ nɔ jlá é cí nǔkún kpɛví tíwúntíwún e nɔ sù ɖò ayijlɔjlɔnɔ lɛ sín ayi mɛ kpɛɖé kpɛɖé é ɖɔhun gbɔn é. É ɖɔ: “Zǎn kú ɔ, nya enɛ ɔ nɔ dɔ́ amlɔ; ayǐ hɔ́n ɔ, é nɔ fɔ́n; lee é ka nyí gbɔn kaka bɔ nǔkún ɔ wú bo ɖò susu wɛ ɔ, é mɔ dò na ǎ. Ayikúngban ɔ ɖesu wɛ nɔ na jinukún; ama ɔ wɛ nɔ zɔ́n jɛ nukɔn; enɛ gudo ɔ, é nɔ gbà sɛ́, bo nɔ fɔ vǐ hwɛ̌ cobo nɔ wá ɖó kwín.” (Mak. 4:27, 28) Etɛ ɖɔ wɛ Jezu ka ɖè? É ɖò tintinmɛ wɛ ɖɔ lee nǔkún ɖé nɔ sù kpɛɖé kpɛɖé gbɔn é ɔ, mɔ̌ wɛ mɛ e yí wɛn Axɔ́suɖuto ɔ tɔn é ɖé nɔ sù ɖò gbigbɔ lixo kpɛɖé kpɛɖé gbɔn. Ði kpɔ́ndéwú ɔ, enyi Biblu kplɔntɔ́ mǐtɔn lɛ sɛkpɔ́ Jehovah ɔ, mǐ nɔ jɛ huzuhuzu ɖaaɖagbe vovo e bló wɛ ye ɖè lɛ é mɔ jí. (Efɛ. 4:22-24) Amɔ̌, mǐ ɖó na hɛn d’ayi mɛ ɖɔ Jehovah wɛ bló bɔ nǔkún kpɛví tíwúntíwún enɛ ɖò susu wɛ.—1 Kɔ. 3:7.

6-7. Etɛ lee Jehovah bló ayikúngban ɔ gbɔn é ka kplɔ́n mǐ?

⁶ Ðò nǔ e Jehovah nɔ wà lɛ é bǐ mɛ ɔ, é nɔ xwè sɔ bo nɔ zán hwenu e kpé é ɖ’ékɔn dó wà yì fó. Bo na dó sɔ́ nyikɔ tɔn sù, lobo lɛ́ d’alɔ mɛ ɖevo lɛ wu wɛ é nɔ wà mɔ̌. Ði kpɔ́ndéwú ɔ, mǐ ni kpɔ́n lee Jehovah bló ayikúngban ɔ nú gbɛtɔ́ lɛ gbɔn kpɛɖé kpɛɖé é.

⁷ Biblu tinmɛ lee Jehovah bló ayikúngban ɔ gbɔn é, bo ɖɔ ɖɔ é ‘ɖó dogbó lɛ na’  bo sɔ́ ɛ ‘jinjɔn dotín tɔn lɛ jí,’ lobo “dó awinnya e ɖò taji ɔ dò.” (Jɔb. 38:5, 6) É tlɛ lɛ́ ba hwenu bo lin tamɛ dó azɔ̌ e é wà lɛ é jí. (Bǐb. 1:10, 12) Dǒ nukún mɛ bo kpɔ́n lee nǔ na ko cí nú wɛnsagun lɛ, hwenu e ye na mɔ nǔ yɔyɔ̌ e dá wɛ Jehovah ɖè lɛ é é. Akpakpa ɖó na ko sɔ́ ye tawun! Nǔ e wu é wá sù hweɖenu bɔ wɛnsagun lɛ jɛ “xó sú [jí] kpo xomɛhunhun kpo” é nɛ. (Jɔb. 38:7) Etɛ ka nyí nǔkplɔnmɛ ɔ? Xwè afatɔ́n mɔ̌kpan wɛ nǔɖiɖó lɛ dídá ɖu nú Jehovah, amɔ̌, hwenu e Jehovah kpɔ́n nǔ e é ko xwè sɔ bo dá lɛ é bǐ é ɔ, é ɖɔ ɖɔ “nǔ ɖagbe wɛ ye nyí tawun.”—Bǐb. 1:31.

8. Etɛ jí mǐ ka na ɖɔ xó dó dìn?

⁸ Kpɔ́ndéwú e wá yì lɛ é xlɛ́ mǐ ɖɔ nǔgbododó gegě ɖò xó Mawu tɔn mɛ bo kplɔ́n mǐ ɖɔ mǐ ɖó na nɔ ɖó suúlu. Dìn ɔ, mǐ ni ɖɔ xó dó ninɔmɛ e mɛ mǐ ɖó na ɖó suúlu, bo nɔte kpɔ́n Jehovah ɖè é we wu.

9. Ðɔ ninɔmɛ e mɛ mǐ ɖó na nɔte kpɔ́n Jehovah ɖè é ɖokpo.

⁹ É sixu byɔ ɖɔ mǐ ni nɔte kpɔ́n Jehovah bonu é na na sinkɔn nú ɖɛ mǐtɔn lɛ. Enyi mǐ xoɖɛ bo byɔ hlɔnhlɔn bá dó ɖí xwi xá mɛtɛnkpɔn ɖé, alǒ byɔ alɔdó bá dó ɖu ɖò gǎnmaɖó ɖé jí ɔ, mǐ sixu mɔ ɖɔ alɔdó e ba wɛ mǐ ɖè é kún ɖò wiwa dó gan tɔn mɛ wɛ ó. Aniwu Jehovah ma ka nɔ na sinkɔn nú ɖɛ mǐtɔn lɛ bǐ afɔjiafɔji ǎ?

10. Etɛwu mǐ ka ɖó na ɖó suúlu, bo nɔte kpɔ́n Jehovah bonu é na na sinkɔn nú ɖɛ mǐtɔn lɛ?

¹⁰ Jehovah nɔ ɖótó ɖɛ mǐtɔn lɛ céɖécéɖé. (Ðɛh. 65:3) É nɔ kpɔ́n ɖɛ e mǐ nɔ xó sɛ́dó è dó nǔjɔnǔ mɛ lɛ é dó mɔ nǔɖiɖi e mǐ ɖó n’i é sín xlɛ̌. (Ebl. 11:6) Gɔ́ na ɔ, lee mǐ kánɖeji bo na wà nǔ sɔgbe xá ɖɛ e mǐ nɔ xò lɛ é, bo lɛ́ wà jlǒ tɔn gbɔn é mimɔ nɔ víví n’i. (1 Jaan 3:22) Enɛ wu ɔ, enyi mǐ na bo tlɛ ɖò gǎn dó wɛ bo na ɖu ɖò walɔ nyanya ɖé, alǒ gǎnmaɖó mǐtɔn ɖé jí ɔ, é sixu byɔ ɖɔ mǐ ni ɖó suúlu bo lɛ́ wà nǔ sɔgbe xá ɖɛ e mǐ nɔ xò lɛ é. Jezu ɖexlɛ́ ɖɔ Jehovah sixu nɔ ma na sinkɔn nú ɖɛ mǐtɔn ɖé lɛ afɔjiafɔji. É ɖɔ: “Mi byɔ nǔ Mawu, é na na mi; mi ba, mi na mɔ; mi xúxú hɔn, è na hun nú mi. Ðó mɛ ɖebǔ byɔ nǔ ɔ, è na na ɛ; mɛɖé ba ɔ, é na mɔ; mɛɖé xúxú hɔn ɔ, è na hun n’i.” (Mat. 7:7, 8) Enyi mǐ nɔ xwedó wěɖexámɛ enɛ, bo nɔ “xoɖɛ hwɛhwɛ” ɔ, mǐ sixu kúdeji ɖɔ Tɔ́ mǐtɔn jixwé tɔn ɔ na ɖótó mǐ, bo na na sinkɔn nú ɖɛ mǐtɔn lɛ.—Kolo. 4:2.

11. Enyi ɖɛ e mǐ xò é sín sinkɔn ɖò línlín wɛ ɔ, nɛ̌ Eblée lɛ 4:16 ka sixu d’alɔ mǐ gbɔn?

¹¹ Nǔgbo wɛ ɖɔ sinkɔn nina nú ɖɛ ɖé sixu lín ɖò nukún mǐtɔn mɛ, amɔ̌, Jehovah d’akpá ɖɔ emi na na sinkɔn nú ɖɛ mǐtɔn lɛ “ɖò hwetɔnnu.” (Xà Eblée lɛ 4:16.) Nǔ e wu enyi mǐ ma mɔ sinkɔn ɖɛ e mǐ xò é ɖé tɔn ɖò hwenu e ba dó wɛ mǐ ɖè é ǎ ɔ, mǐ ma ɖó na dóhwɛ Jehovah gbeɖé ǎ é nɛ. Ði kpɔ́ndéwú ɔ, mɛ gegě ko ɖò ɖɛ xò wɛ sín xwè mɔ̌kpan ɖíe bo na mɔ bɔ Axɔ́suɖuto Mawu tɔn na sú kún dó nú gbɛ̀ nyanya elɔ. Jezu ɖesu tlɛ ɖɔ ɖɔ mǐ ɖó na nɔ xoɖɛ dó enɛ takúnmɛ. (Mat. 6:10) Amɔ̌, enyi mɛɖé yí gbè bɔ nǔɖiɖi e é ɖó nú Mawu é vɔ́da, ɖó gbɛ̀ elɔ e ma vɔ hwenu e gbɛtɔ́ lɛ ba dó é ǎ wutu ɔ, kpɔ́n lee enɛ na nyí xlonɔnú sɔ é! (Xab. 2:3; Mat. 24:44) Te e nɔ kpɔ́n Jehovah wɛ mǐ ɖè, bo ɖò ɖɛ xò sɛ́dó è wɛ kpo nǔɖiɖi kpo é ɔ, nǔnywɛnú wɛ. Gbɛ̀ ɔ na vɔ ɖò hwenu e Jehovah ɖó dó é pɛ́ɛ, ɖó é ko sɔ́ “azǎn” e gbè nǔ na nyí mɔ̌ é kpo “gan ɔ” mɛ kpo wutu. Bɔ hwe enɛ nu wɛ ka na nyí hwenu ɖagbe hugǎn ɔ nú mɛ bǐ.—Mat. 24:36; 2 Pi. 3:15.

12. Hwetɛnu é ka sixu vɛwǔ tawun bɔ mǐ na ɖó suúlu?

¹² É sixu byɔ ɖɔ mǐ ni ɖó suúlu bo dɛ  ɖò nǔagɔwaxámɛ nu. Ðò gbɛ̀ elɔ mɛ ɔ, hwɛhwɛ wɛ mɛ lɛ nɔ xò daka mɛ ɖěɖee kpo ye kpo ma ɖó mɛ̌, sinmɛ agbaza tɔn kpo aca kpo ɖokpo ɔ lɛ ǎ é wu; mɔ̌ jɛn ye nɔ lɛ́ wà gbɔn nú mɛ ɖěɖee kpo ye kpo ma gosin akɔ ɖokpo ɔ mɛ, alǒ nyí tò ɖokpo ɔ mɛ nu ǎ lɛ é. Mɛ ɖevo lɛ tíìn bɔ ɖó ye ɖó wɔ̌n ɖò wǔ, alǒ ɖó azɔn ɖé ɖò taglomɛ wu ɔ, è nɔ wà nǔ agɔ xá ye. Mɛ gegě ɖò togun Jehovah tɔn mɛ bo ko dɛ ɖò nǔagɔwaxámɛ nu, ɖó nǔ e ye ɖi nǔ na b’ɛ jinjɔn Biblu jí lɛ é wutu. Enyi è ko wà nǔ agɔ mɔ̌hun lɛ xá mǐ hǔn, mǐ ɖó na hɛn xó Jezu tɔn elɔ lɛ ayi mɛ. É ɖɔ: “Mɛ e na dɛ ɖò ya enɛ lɛ nu kaka yì fó ɔ, è na hwlɛn ɛ gán.” (Mat. 24:13) Bɔ enyi a ka mɔ nǔ jɛ wu ɖɔ mɛɖé ɖò agun towe mɛ bo hu hwɛ syɛnsyɛn ɖé ɔ ka lo? Ee mɛxo agun tɔn lɛ ko tuùn nǔ e jɛ é gudo é ɔ, a ka na jó xó ɔ dó alɔ mɛ nú ye, bo na ɖó suúlu bo nɔte kpɔ́n ye bɔ ye na kpé nukún dó ninɔmɛ ɔ wu lee Jehovah ba gbɔn é à? Nɛ̌ mɛxo agun tɔn lɛ ka sixu ɖeɖɛ ninɔmɛ mɔ̌hun gbɔn?

13. Etɛ nukúnkpíkpé dó nǔ lɛ wu lee Jehovah nɔ ba gbɔn é ka nɔ byɔ?

¹³ Enyi mɛxo agun tɔn lɛ mɔ nǔ jɛ wu ɖɔ mɛɖé hu hwɛ syɛnsyɛn ɖé ɖò agun ɔ mɛ ɔ, ye nɔ xoɖɛ bo nɔ byɔ “nǔnywɛ e gosin Mawu gɔ́n” é bo na dó tuùn linlin e Jehovah ɖó dó ninɔmɛ ɔ wu é. (Ja. 3:17) Nǔ e gbé nya wɛ ye ɖè é wɛ nyí ɖɔ ye na d’alɔ mɛ e hu hwɛ é bɔ enyi é nyɔ́ bló ɔ, é na ‘gosin ali nyanya e jí é ɖè é jí.’ (Ja. 5:19, 20) Ye nɔ lɛ́ ba na wà nǔ e wu ye kpé lɛ é bǐ dó cyɔn alɔ agun ɔ jí, bo lɛ́ dó gbɔ nú mɛ ɖěɖee wu è wà nǔ dó lɛ é. (2 Kɔ. 1:3, 4) Enyi mɛxo agun tɔn lɛ ɖò nukún kpé dó ninɔmɛ e mɛ mɛɖé hu hwɛ syɛnsyɛn ɖè é ɖé wu wɛ ɔ, ye ɖó na tó ba dò nú nǔ e lɛlɛ̌ dó xó ɔ lɛ é bǐ hwɛ̌; enɛ ka sixu ɖu hwenu kpɛɖé. Enɛ gudo ɔ, ye nɔ xoɖɛ, bo nɔ zán Mawuxówema ɔ dó ɖè wě xá mɛ ɔ ganji, lobo nɔ gbɛ́ nǔ n’i ‘lee é jɛxa gbɔn é.’ (Jel. 30:11) Mɛxo agun tɔn lɛ nɔ dán lɛjɛlɛjɛ ǎ, amɔ̌, ye ka nɔ lɛ́ zɔn kplakpla jí dó wá gbeta ɖé kɔn ǎ. Enyi mɛxo agun tɔn lɛ kpé nukún dó ninɔmɛ ɔ wu ganji ɔ, agun ɔ na mɔ ɖɔ enɛ wà ɖagbe nú mɛ lɛ bǐ titewungbe. É ɖò mɔ̌ có, è na bo kpé nukún dó ninɔmɛ ɔ wu gbɔn mɔ̌ ɔ, xomɛvɔ́nɔ ɔ sixu kpò ɖò wuvɛ̌ sè wɛ ɖò lanmɛ. Enyi mɔ̌ wɛ nǔ cí nú we ɔ, nɛ̌ a ka sixu wà gbɔn bɔ wuvɛ̌ e mɔ wɛ a ɖè é na ɖekpo?

14. Enyi Klisanwun ɖé wà nǔ nyi dò nú we b’ɛ vɛ́ nú we tawun ɔ, kpɔ́ndéwú Biblu tɔn tɛ ka sixu d’alɔ we?

 ¹⁴ Mɛɖé wà nǔ agɔ xá we kpɔ́n à? Mɛ ɔ tlɛ sixu nyí nǔɖitɔ́ hatɔ́ ɖé. A sixu mɔ kpɔ́ndéwú e kplɔ́n mǐ lee mǐ sixu nɔte kpɔ́n Jehovah, b’ɛ na ɖeɖɛ ninɔmɛ lɛ gbɔn é tɔn ɖaaɖagbe gegě ɖò Biblu mɛ. Ði kpɔ́ndéwú ɔ, Jozɛfu sín fofó lɛ wà nǔ agɔ xá ɛ có, é ka lɔn nú hwɛhuhu yetɔn lɛ zɔ́n bonu é huzu hunnylatɔ́ ǎ. É nyɔ́ wà ɔ, é kpò ɖò ayi sɔ́ ɖó sinsɛnzɔ́ Jehovah tɔn jí wɛ, bɔ Jehovah ka d’ajɔ ɛ ɖó suúlu tɔn kpo didɛ tɔn kpo wu. (Bǐb. 39:21) Ee hwenu ɖò yiyi wɛ é ɔ, Jozɛfu kpéwú bo wɔn nǔ nyanya e è wà xá ɛ lɛ é, lobo sɔ́ ayi ɖó lee Jehovah ko dó n’i gbɔn é jí. (Bǐb. 45:5) Jozɛfu ɖɔhun ɔ, enyi mǐ vɛ́ kpo Jehovah kpo bo jó xó lɛ d’alɔ mɛ n’i bonu é na ɖeɖɛ ɔ, é nɔ dó gbɔ nú mǐ tawun.—Ðɛh. 7:18; 73:28.

15. Etɛ ka d’alɔ nɔví nyɔnu ɖé, b’ɛ dɛ ɖò nǔagɔwaxámɛ nu, lobo ɖó fífá?

¹⁵ Nǔagɔwaxámɛ lɛ bǐ nɔ syɛn ee è wà xá Jozɛfu é ɖɔhun ǎ, amɔ̌, ɖé lɛ tíìn bo sixu bló bɔ mǐ na kpò ɖò wuvɛ̌ sè wɛ ɖò lanmɛ. Enyi tagba ɖé ɖò mǐ kpo mɛɖé kpo tɛntin, bonu mɛ ɔ na bo ma tlɛ nɔ sɛn Jehovah ǎ ɔ, nǔgbododó Biblu tɔn lɛ zinzán na hɛn lè wá nú mǐ. (Fili. 2:3, 4) Kpɔ́ndéwú ɖé ɖíe: Ee nɔví nyɔnu ɖé sè ɖɔ azɔ̌gbɛ́ emitɔn ɖé ɖó adingban dó emi kɔ nú mɛ ɖevo lɛ é ɔ, é vɛ́ n’i tawun. Nɔví nyɔnu ɔ zɔn kplakpla jí dó wà nǔ ǎ, é nyɔ́ wà ɔ, é zán hwenu dó lin tamɛ dó kpɔ́ndéwú Jezu tɔn jí. Ee è zun Jezu é ɔ, é zun mɛ ǎ. (1 Pi. 2:21, 23) Kpɔ́ndéwú enɛ d’alɔ nɔví nyɔnu ɔ b’ɛ wá gbeta ɔ kɔn bo wɔn nǔ e jɛ é. Nukɔnmɛ ɔ, é wá sè ɖɔ azɔ̌gbɛ́ emitɔn enɛ ko ɖò xwi ɖí xá azɔn syɛnsyɛn ɖé wɛ, bo lɛ́ ɖò linkpɔ́nzɔn syɛnsyɛn ɖé jɛ wɛ. Nɔví nyɔnu ɔ wá gbeta ɔ kɔn ɖɔ azɔ̌gbɛ́ emitɔn sixu ko nɔ ma tuùn nǔ e é ɖɔ dó emi wu é. Enɛ wu ɔ, é víví nú nɔví nyɔnu ɔ tawun ɖɔ é ɖó suúlu, bo dɛ ɖò nǔagɔwaxámɛ nu, lobo ɖó fífá.

16. Enyi nǔagɔwaxámɛ ɖé nu dɛ ɖè wɛ a ɖè ɔ, etɛ ka sixu dó gbɔ nú we? (1 Piyɛ́ɛ 3:12)

¹⁶ Enyi a ɖò didɛ wɛ ɖò nǔagɔwaxámɛ nu, alǒ mɛɖé wà nǔ nyi dò nú we, b’ɛ vɛ́ nú we hǔn, flín ɖɔ Jehovah ɖò kpɔ́ xá “mɛ e ayi yetɔn gbadó lɛ” é. (Ðɛh. 34:19) Suúlu e a nɔ ɖó é kpo nǔ linlin towe e a nɔ sɔ́ dó  alɔ mɛ n’i é kpo zɔ́n bɔ é yí wǎn nú we. (Ðɛh. 55:23) É wɛ nyí Hwɛɖɔtɔ́ nú mɛ e ɖò ayikúngban ɔ jí lɛ é bǐ. Nǔ e ɖò jijɛ wɛ lɛ é bǐ wɛ é nɔ mɔ. (Xà 1 Piyɛ́ɛ 3:12.) Enyi wuvɛ̌ e a ma sixu ɖeɖɛ ǎ é mɔ wɛ a ɖè ɔ, a ka ɖò gbesisɔmɛ bo na nɔte kpɔ́n ɛ à?

17. Lee Ezayíi 30:18 ɖɔ gbɔn é ɔ, ganjɛwu tɛ Jehovah ka na mǐ?

¹⁷ Tɔ́ mǐtɔn jixwé tɔn ɔ na gbɔn Axɔ́suɖuto tɔn gblamɛ bo na kɔn nyɔna dó mǐ jí ɖò malin-malin mɛ b’ɛ na túnflá. Ezayíi 30:18 ɖɔ: ‘Jehovah ɖó jlǒ bo na wà ɖagbe nú mì. É na site bo na kú nǔblawu nú mì, ɖó Jehovah ɔ, Mawu hwɛjijɔnɔ wɛ. Nǔ nyɔ́ nú mɛ e ɖò nukún ɖó è wɛ lɛ bǐ.’ Mɛ ɖěɖee kpò ɖò te kpɔ́n Jehovah lɛ é na mɔ nyɔna gegě dìn, bo na lɛ́ mɔ ɖò gbɛ̀ yɔyɔ̌ e ja é mɛ.

18. Nyɔna tɛ lɛ ka ɖò te kpɔ́n mǐ?

¹⁸ Enyi togun Mawu tɔn byɔ gbɛ̀ yɔyɔ̌ ɔ mɛ ɔ, é sɔ́ na dɛ ɖò tagba e mɔ wɛ é ɖè ɖò égbé lɛ é nu gbeɖé ǎ. Nǔagɔwiwa sɔ́ na tíìn ǎ; wuvɛ̌ mimɔ lɔ ka sɔ́ na ɖè ǎ. (Nǔɖe. 21:4) É sɔ́ na byɔ ɖɔ ado ni hu mǐ ɖɔ mǐ ka na kpéwú bo mɔ nǔ e hudo mǐ lɛ é à jí ǎ, ɖó ye na tíìn kɔn nyi kpɔ́. (Ðɛh. 72:16; Eza. 54:13) É na jiwǔ kpɔ́n!

19. Jehovah ɖò nǔ sɔ́ nú mǐ wɛ nú nǔɖe dìn, etɛ ka wɛ?

¹⁹ Dìn hwɛ̌ ɔ, Jehovah ɖò alɔ dó mǐ wɛ bonu mǐ na ɖu ɖò jijɔ nyanya mǐtɔn lɛ jí, bo sɔnǔ nú ee é yí wǎn na lɛ é, bo na dó ɖò gbesisɔmɛ bá nɔ gbɛ̀ ɖò acɛkpikpa tɔn glɔ́. Awakanmɛ ni ma kú we ó; ma ka jó gbè ó. Ðagbe kpò! Mi nú mǐ ni hɛn sɔgudo ɖaaɖagbe enɛ ayi mɛ, bo ɖó suúlu lobo nɔte kpɔ́n Jehovah bonu é na w’azɔ̌ tɔn yì fó!