1-2. Bichi rhwaganirako mu gunola mwazi?

NKA GURHE onachiyunva amango omuzigo guli mw’echintu okenere bwenene gwamafunda kuhika omu kasanzi walilangalire? Ka wavunika omurhima si? Nkabaga wachiyunva nk’oku Mezali 13:12 ederhere: “Okulangalira kurhahwa kunavuna omurhima.” Aliko si, gurhe wakachiyunva amango wamamenya oku hali mpanvu zinja zarhumire ogola muzigo gurhakugerako omu kasanzi walilangalire? Mw’amola mango, nkabaga byakuhema obe wakulembera onabe tayari kulindira.

² Mu gunola mwazi, rhwashambala ku makanuni malebe me Biblia makarhurhabala rhugwarhe rhunagenderere “kuyerekana omurhima g’okulindira.” (Mik. 7:7) Kandi rhwashuba kuganira ku njira ebiri rhukwanene rhulemberemo n’okulindira Yehova ajire ech’ajira. Buzinda rhwashambala oku migisho balala bali tayari kulindira Yehova nji bagwarha.

3. Bichi akanuni kali mu Mezali 13:11 karhuyigirize?

³ Omufano guyerekene akamaro k’okulembera guli omu Mezali 13:11. Ederhere ntya: “Obuchire omuntu anagwarha juba-juba nji burhayushuka, aliko obuchire omuntu anagusha kubuyabuya nji bwaluga.” Bichi olola lwandiko lurhuyigirize? Omuntu mwengehe anajira ebintu omu kulembera n’okujira ntyo ntambu oku yindi.

4. Bichi akanuni kali mu Mezali 4:18 karhuyigirize?

⁴ Mezali 4:18 erhubwirire oku “enjira y’ab’okunali eba nka mwengezi gw’esezi guyinja gwayushuka bwenene kugera ezuba likulu.” Olula lwandiko luyerekene bwinja oku Yehova anarhabala abantu bage bayunve omuhigo gwage. Aliko olula lwandiko  lwakashuba koleswa mu njira zinene omu kuyerekana okuntu Omukristu anajira amaja-mbere m’ekiroho omu kalamo kage. Kunahema ebisanzi y’omuntu akula ekiroho. Amango rhuli rhwayiga n’obushiru n’okukolesa empanulo rhuli rhwahabwa kugerera Echinwa cha Mungu n’olubaga lwage, kubuyabuya, rhwagwarha engeso zili nk’eza Kristu. Kandi, rhwamenya Mungu bwinja. Rhuganirage oku mufano Yesu akolesaga omu kuyerekana echola.

5. Mufano guhe Yesu ahanaga guyerekene oku binahema ebisanzi bigere y’omuntu ahindamuka?

⁵ Yesu alikoleseze omufano omu kusabanura nka gurhe oburhumwa b’Obwami rhunahubiri buli nka kaburho kageke bwenene kanakula kubuyabuya omu mirhima ya balala banasima okunali. Aliderhere ntya: “Emburho zinamera n’okukula eyi yewe [omuhinzi] arhenji gurhe yi zakula. Obudaka bonyine bwanarhera kubuyabuya: oburhanzi omunkenyi, obwakabiri omufumba, n’obuzinda embeke zihakire omu mufumba.” (Mk. 4:27, 28) Bichi Yesu alonzaga kuderha? Ayinjaga afasiriya oku nka kulala emyaka enakula kubuyabuya, intyo ku n’omuntu naye wamayemera oburhumwa b’Obwami anajira amaja-mbere m’ekiroho kubuyabuya. Omufano, amango abanafunzi berhu be Biblia bamaba bera ba Yehova, rhwanahwanza kubona bintu binene bahindamwire omu kalamo kabo. (Efe. 4:22-24) Aliko rhukwanene kuyibuka oku Yehova yenakuza akola kaburho kageke.​—1 Ko. 3:7.

6-7. Bichi rhwakayiga oku bilolere okuntu Yehova alemaga egulu?

⁶ Mu ngasi byoshi Yehova anajira, anarhola akasanzi kakwanene y’amalisa bwinja-bwinja akasi kage. Anajira ntyo omu kulerhera ezino lyage obukuze n’omu kulonza arhabale abandi. Omufano, waza okuntu Yehova arheganyizaga abantu egulu ntambu oku yindi yi balilamako.

⁷ Ebiblia efasiriye gurhe amango Yehova alema egulu aheba “ebipimo,” ashinga “ebisimikiro” n’okurhabika “ebale ly’oku pembe.” (Yob. 38:5, 6) Arhola chiro n’akasanzi  k’okusuzuma akasi kage. (Mwa. 1:10, 12) Waza okuntu bamalayika baliri bachiyunva amango baliri babona buli chintu chihyahya Yehova aliri alema. Bakwanene kuba eyi baliri basima bwenene! N’echola charhuma bahwanza “kubanda empundu.” (Yob. 38:7) Bichi birhuyigirize? Yehova alimalire ebihumbi by’emyaka ey’ali lema egulu, enyenyezi na buli chilemwa choshi. Aliko amango Yehova asuzuma buli chintu abaga alemere, aderha oku “bikwirire bwenene.”—Mwa. 1:31.

8. Bichi rhukala shambalako?

⁸ Nk’oku emifano eli ahala nyanya eyerekene, rhwabona makanuni manene omu Chinwa cha Mungu mayerekene akamaro k’okulindira. Rhujage rhwashambala ku hali ebiri rhukwanene kuba tayari kulindiramo Yehova.

9. Mu hali ehe nguma byakarhuhemamo rhulindire Yehova?

⁹ Byakarhuhema rhulindire okw’amasala merhu mashubizwa. Amango rhuli rhwahema emisi y’okulwisa ebibazo, changwa oburhabale b’okuhima obuzamba bwerhu, hali oku rhwakachiyunva oku oburhabale rhuli rhwahema Yehova bwalegamire bwenene kulusha nk’okurhwalinihire. Bichi birhuma Yehova arhashubiza oku masala merhu moshi han’ahola?

10. Bulagurhe birhuhemere okulindira Yehova ashubize oku masala merhu?

¹⁰ Yehova anayunviriza bwinja amasala merhu. (Zb. 65:2) Anabona amalasa merhu m’oku murhima nka chimenyeso chiyerekene oku rhugwerhe obwemere emwage. (Ebr. 11:6) Anasimiswa kandi kubona gurhe yi rhwachihangana kulama omu kuntu kupatene n’amasala merhu, n’okujira obulonza bwage. (1 Yo. 3:22) Bobola byakarhuhema rhulindire n’okukola ebintu bipatene n’amasala merhu amango moshi-moshi rhuli rhwachihangana kuhima engeso mbi rhugwerhe. Yesu alirhurhabere rhumenye oku maguma omu masala merhu marhakashubizwa han’ahola. Aderha ntya: “Mugenderere okuhema, mwahabwa; mugenderere okulonza, mwapata; mugenderere okukongorha oku mulyango, mwachingulirwa; bulala buli yeshi onahema ahabwa, na buli yeshi onalonza anapata, na buli yeshi onakongorha oku mulyango anachingulirwa.” (Mt. 7:7, 8) Amango rhwamakenga eyola mpanulo “n’okugenderera kusalira,” rhwakachizera oku Darha w’embingu arhuyunva anashubize oku masala merhu.​—Kol. 4:2.

11. Nka gurhe olwandiko lwa Waebrania 4:16 lwakarhurhabala amango rhwamabona nk’echishubizo oku sala lyerhu chalegamire?

¹¹ Chiro akaba okw’echishubizo oku sala lyerhu chakabonekana nka chalegamire, Yehova arhulaganyize oku ashubiza oku sala lyerhu “omu kasanzi kakwanene.” (Osome Waebrania 4:16.) Che chirhumire rhurhakwanene chiro n’akatyu kuzimulira Yehova akaba mango maguma echishubizo chirhayinjire juba-juba nk’okurhwaliwazize. Omufano, bantu banene basalirire mu myaka minene babone gurhe Obwami bwa Mungu bwamala ebintu bibi by’elila gulu. Chiro na Yesu aliderhere oku rhukwanene kusalira eju y’echola. (Mt. 6:10) Aliko obwene kangana gurhe bwakaba buhwinja amango omuntu amaleka obwemere bwage buhole bulala obuzinda burhayinjire amango abantu baliwazize! (Hab. 2:3; Mt. 24:44) Buli bwengehe rhukagenderera kulindira Yehova n’okusalira eyi rhunalangalire okw’arhushubiza. Obuzinda nji bwayinja omu kasanzi kabo kakwanene, bulala Yehova ahebereho mira “olusiku n’esa nji bwayinjirako. Kandi, olola lusiku nji kaba kasanzi kakwanene ku boshi.​—Mt. 24:36; 2 Pe. 3:15.

12. Mango mahe ahanene byakarhukomerera okulindira?

 ¹² Byakarhuhema rhulembere amango rhulirhwalindira okw’ebintu byakolwa omu kunali. Mu linola gulu, abantu banazigana kulibuza abandi bulala bali balume changwa bakazi, bulala barhali ba shusho liguma n’abandi, barhali ba buko buguma changwa chihugo chiguma. Abandi bali babonererwa bulala bagwerhe buhashe bugeke b’omubiri changwa b’omu bwenge. Bahamirizi ba Yehova banene bakoleerwe oku mulyagane eju y’obwemere bwabo buyumangiire oku Biblia. Amango rhuli rhwakolerwa kubi omu njira zili nk’ezola, rhukwanene kuyibuka ebinwa bya Yesu. Aliderhere ntya: “Olala nji walembera kuhika oku buzinda yi nji wayokolwa.” (Mt. 24:13) Gurhe si wakajira amango wamamenya oku muntu mulebe ajirire amaligo omu chibaga? Enyuma y’okubimenyesa abashamuka, ka waleka olushinja omu fune zabo n’okulindira omu kulembera baluche nk’oku Yehova asimire? Bichi abashamuka bakwanene kujira amango bamamenya oku muntu mulebe ajirire echaha chikomere?

13. Bichi Yehova alonzeze abashamuka bajire amango muntu mulebe amajira echaha chikomere?

¹³ Amango abashamuka bamamenya oku muntu mulebe ajirire echaha chikomere omu chibaga, banasalira bwenene omu kuhema “obwengehe burhengere elugulu” yibagala kuyunva olola lushinja nk’oku Yehova naye ali aluyunva. (Yak. 3:17) Omuhigo gwabo, kuli kurhabala oyola muntu wakolere echaha “arhenge omu njira y’egosa” akaba byakagalikana. (Yak. 5:19, 20) Kandi balonzeze kujira buli chintu choshi bakagala omu kulanga echibaga n’okurhuliriza balala boshi bagayisizwe. (2 Ko. 1:3, 4) Amango abashamuka balibagera omu lushinja l’omuntu wakolere echaha chikomere, bakwanene barhange bamenye buli chintu k’olola lushinja n’echola chakarhola ebisanzi. Enyuma w’ahola, banasalira bwenene, banahanula oyola muntu kubuyabuya omu kukolesa Ebiblia, n’okumuha obuhane “akwanene.” (Yer. 30:11) Chiro akaba okw’abashamuka barhakwanene kulegamya olola lushinja, barhanakwanene kuhuba kulucha. Amango olushinja lwamachibwa bwinja, echola chanalerhera abantu boshi enyungu omu chibaga. Aliko, chiro akaba olushinja lwakachibwa omu njira eli nk’eyola, omuntu bakoleraga amaligo, akanachigenderera kuchiyunva ababere. Akaba oli mw’eyola hali, bichi wakajira y’ogehya oku malumwa mawe?

14. Mufano guhe guli omu Biblia gwakakuheba omurhima amango owenyu Mukristu amakukolera kubi?

 ¹⁴ Wachigerere kukolerwa kubi na muntu mulebe changwa n’owenyu Mukristu? Wakabona emifano minja omu Chinwa cha Mungu eyigirize okuntu rhwakalindira Yehova okw’anamala echola chibazo. Omufano, chiro akaba oku bene-babo Yosefu balimulibwize bwenene, amagosa bamujiriraga marharhumaga aba muntu w’okubikira abandi omujinya. Aliko agenderera kuseza obwenge bwage oku kasi ka Yehova bulala aligenderere kulembera omu kulindira. (Mwa. 39:21) Buzinda, Yosefu ahikira amango ababalira balala bamugosezaga n’okubona gurhe Yehova amugishire. (Mwa. 45:5) Kuguma na Yosefu, rhunapata echirhulirizo amango rhwamayegera Yehova n’okuleka yenyine amale echibazo omu kasanzi kage kakwanene.​—Zb. 7:17; 73:28.

15. Bichi byarhabalaga mwali-werhu muguma alembere n’okulindira amango aliri akolerwa kubi?

¹⁵ Kweri, amaligo moshi rhujirirwa marhaba makomere nk’ebi Yosefu ageragamo, aliko amango moshi rhwamakolerwa kubi byakarhuluma oku murhima. Amango rhugwerhe echibazo na muntu mulebe kuhira na balala barhaharamya Yehova, rhwakapata enyungu amango rhwamakolesa amakanuni me Biblia. (Flp. 2:3,4) Rhulole mufano muguma. Mwali-werhu muguma aliyunvirhe avunikire omurhima amango amenya oku muntu muguma baliri bakola naye aliri amuderha-derha kubi by’obubeshi oku bandi. Ahali h’okukaliha juba-juba, oyola mwali-werhu arhola akasanzi k’okukengera oku mufano gwa Yesu. Amango abantu baliri bamudukanga, arhaliri agalula ebidusi oku bindi. (1 Pe. 2:21, 23) Okuyibuka ntyo, oyola mwali-werhu abona oku arhamukulikirana. Buzinda, oyola mwali-werhu ayinja menya ok’oyola mukazi waliri amuderha-derha aligwerhe obulwala bubi analigwerhe milago minene omu bwenge. Mwali-werhu ayinja bona oku gasi oyola mukazi nkabaga arhaliyinji eby’alimo. Mwali-werhu ayunva asimire bwenene bulala ahanene alilembere n’okulindira okola kukolerwa kubi, anayunva arhulerere.

16. Bichi byakakurhuliriza amango oli walembera okukolerwa kubi? (1 Petro 3:12)

¹⁶ Akaba oli walibuka bulala abantu bakukolere kubi changwa oli wababala eju y’eyindi mpanvu, oyibuke oku Yehova aba hofi na balala  “bavunikire omurhima.” (Zb. 34:18) Akuzigiire bulala onalembera na bulala oli wamukabulira emizigo yawe. (Zb. 55:22) Ye Muzuzi w’egulu lyoshi. Anabona buli choshi. (Osome 1 Petro 3:12.) Che chirhumire, amango ogwerhe ebibazo orhakagala kumala, oyibuke oku kuli kwinja okulindira Yehova yenyine akole.

17. Nk’oku Isaya 30:18 eyerekene, bichi Yehova arhulaganyize?

¹⁷ Hanola hofi-hofi, Darha w’embingu arhugisha bwenene kugerera Obwami bwage. Olwandiko lwa Isaya 30:18 luderhere ntya: “Yehova ali agenderera kulindira y’abayereka olukogo, kandi ayumanga y’abayereka akababaro. Bulala Yehova ali Mungu w’okunali. Abasimire, bali balala bagenderere kumulindira.” Balala bagenderera kulindira Yehova bapata migisho minene mu manola mango, n’omu gulu lihyahya lyayinjire.

18. Migisho ehe rhulirhwalindira?

¹⁸ Amango abantu ba Mungu baja omu gulu lihyahya, birhakachibahema balembere emilago n’ebibazo byoshi bali bahurana nabyo zene. Okukolerwa kubi n’amalumwa birhakachibaho chiro n’akatyu. (Ufu. 21:4) Rhurhakachiyubaha mpu rhurhapata ebirhukenere bulala buli muntu nj’apata ebimutosheze omu kalamo. (Zb. 72:16; Isa. 54:13) Eyola nji yaba migisho minja bwenene!

19. Bichi Yehova yarhurheganyiza kubuyabuya zene?

¹⁹ Yehova ali ab’arhurheganya zene okuntu nji rhwalama omu burhegesi bwage omu kurhurhabala rhuhime engeso zibi, rhunagwarhe engeso zinja zimusimisize. Orhavunikaga omurhima, orhanalekaga kukolera Yehova. Ebinja bili embere! Oku rhuli rhwalindira echola chihe chinja bwenene chayinjire, rhugenderere kuba tayari kulindira Yehova n’okulembera okw’anayeneza eby’arheganyize!