1-2. Ano ang binagbinagon naton sa sini nga artikulo?

IBUTANG ta nga may ginahulat ka nga package kag kinahanglan mo gid ang unod sini. Ano ang mabatyagan mo kon wala ini mag-abot sa tion nga ginapaabot mo ini? Posible nga magalalain ka gid. Ang Hulubaton 13:12 nagasiling: “Ang ginapaabot nga wala madayon nagapasubo sang tagipusuon.” Pero ano abi kon ginpaathag sa imo ang mga rason kon ngaa wala ini mag-abot? Kon amo sini ang sitwasyon, posible gid nga mangin mapinasensiahon ka kag handa ka nga maghulat.

² Sa sini nga artikulo, binagbinagon naton ang pila ka prinsipio sa Biblia nga makabulig sa aton nga ‘maghulat.’ (Miq. 7:7) Dayon, binagbinagon naton ang duha ka sitwasyon nga kinahanglan naton mangin mapinasensiahon kag maghulat kay Jehova. Kag binagbinagon naton ang mga pagpakamaayo nga ginpromisa ni Jehova sa mga handa maghulat sa iya.

3. Ano ang matun-an naton sa prinsipio nga mabasa sa Hulubaton 13:11?

³ Ang Hulubaton 13:11 nagatudlo sa aton kon ngaa dapat kita mangin mapinasensiahon. Ini nagasiling: “Ang manggad nga natigayon sa madasig nga paagi, magadiutay, apang ang manggad nga natigayon sing amat-amat, magadugang.” Ano ang matun-an naton sa sini? Maayo ang resulta kon mapinasensiahon naton nga ginahimo ang aton mga hilikuton.

4. Ano ang ginatudlo sa aton sang prinsipio nga mabasa sa Hulubaton 4:18?

⁴ Ang Hulubaton 4:18 nagasiling nga “ang banas sang matarong kaangay sang kapawa sang aga nga nagaamat-amat sanag tubtob nga mag-udto.” Ginapakita sini nga teksto nga ginabuligan ni Jehova ang iya katawhan nga mahangpan ang iya katuyuan, kag ginahimo niya ini sing amat-amat. Pero ginabuligan man  kita sini nga teksto nga mahangpan ang pagbag-o nga ginahimo sang isa ka Cristiano. Nagakinahanglan sang tion para mangin suod kay Jehova ang isa ka tawo. Kon ginatun-an naton sing maayo kag ginaaplikar ang mga laygay halin sa Pulong sang Dios kag sa iya organisasyon, amat-amat naton nga mapakita ang mga kinaiya sang Cristo kag mas makilala naton sing maayo ang Dios. Binagbinagon naton kon paano ini ginpaathag ni Jesus.

5. Ano nga ilustrasyon ang gingamit ni Jesus para ipaathag nga amat-amat ang pag-uswag sang isa ka tawo?

⁵ Paagi sa isa ka ilustrasyon, ginpaathag ni Jesus nga ang mensahe sang Ginharian nga aton ginabantala daw pareho sa isa ka gamay nga binhi nga amat-amat nga nagatubo sa tagipusuon sang mapainubuson nga mga tawo. Nagsiling sia: “Ang binhi nagatubo kag nagataas, nga wala niya [ukon sang tawo nga nagsab-ug] mahibalui kon paano. Ang duta nagapatubas sing amat-amat, una ang dahon, masunod ang uhay, sa katapusan ang matinggas nga uyas.” (Mar. 4:27, 28) Ano ang buot silingon ni Jesus? Ginapahangop niya nga pareho sa tanom nga amat-amat ang pagtubo, amat-amat man ang pag-uswag sang tawo nga nagbaton sang mensahe sang Ginharian. Halimbawa, samtang nagasuod kay Jehova ang aton mga Bible study, makita naton nga nagahimo sila sing mga pagbag-o sa ila kabuhi. (Efe. 4:22-24) Pero dapat naton tandaan nga si Jehova ang nagapatubo sining gamay nga binhi.—1 Cor. 3:7.

6-7. Ano ang matun-an naton sa paagi ni Jehova sa pagtuga sang duta?

⁶ Mapinasensiahon gid si Jehova kag wala sia nagadali para lang matapos dayon ang iya mga ginahimo. Ngaa? Para mahimaya ang iya ngalan kag para sa kaayuhan sang iban. Halimbawa, binagbinaga ang ginhimo ni Jehova sang gintuga niya ang duta para istaran sang mga tawo. Amat-amat niya ini nga ginhanda.

⁷ Parte sa pagtuga ni Jehova sang duta, ang Biblia nagasiling nga ‘ginpat-od niya ang kadakuon sini,’ ‘gintungtong niya ang pundasyon sini,’ kag ‘ginbutangan niya ini sang pamusod nga bato.’ (Job 38:5, 6) Nagpain pa gani sia sang tion para apresyahon ang iya mga gintuga. (Gen. 1:10, 12) Imadyina kon ano ang ginbatyag  sang mga anghel samtang nagapanuga si Jehova. Sigurado gid nga nalipay sila. ‘Nagsinggit pa gani sila sa kalipay.’ (Job 38:7) Ano ang matun-an naton sa sini? Natapos ni Jehova ang pagtuga sang duta, sang mga bituon, kag sang tanan nga buhi nga tinuga sa sulod sang linibo ka tuig. Bisan pa malawig ini nga tion, nagsiling sia nga “maayo gid” ang iya mga gintuga sang gintan-aw niya ini.—Gen. 1:31.

8. Ano ang binagbinagon naton?

⁸ Ginapakita sini nga mga halimbawa nga madamo sing mga prinsipio sa Pulong sang Dios nga makabulig sa aton nga mangin mapinasensiahon. Binagbinagon naman naton ang duha ka sitwasyon nga kinahanglan naton ipakita nga handa kita maghulat kay Jehova.

9. Ano ang isa ka sitwasyon nga kinahanglan naton maghulat kay Jehova?

⁹Posible nga kinahanglan naton hulaton ang sabat sa aton mga pangamuyo. Halimbawa, nangamuyo kita nga hatagan kita sang kusog nga mabatas ang isa ka problema ukon mabatuan ang aton kaluyahon, kag posible nga nagabatyag kita nga kadugay gid sang sabat ni Jehova. Pero, ngaa wala niya dayon ginasabat ang tanan naton nga pangamuyo?

10. Ngaa kinahanglan naton mangin mapinasensiahon kon nagahulat kita sang sabat ni Jehova sa aton mga pangamuyo?

¹⁰ Ginapamatian sing maayo ni Jehova ang aton mga pangamuyo. (Sal. 65:2) Para sa iya, ginapakita naton ang aton pagtuo kon hanuot kita nga nagapangamuyo sa iya. (Heb. 11:6) Gusto man makita ni Jehova nga nagapanikasog gid kita kag gusto naton nga himuon ang iya kabubut-on. (1 Juan 3:22) Gani kon nangamuyo kita kay Jehova nga buligan kita nga kuntani mauntat naton ang ginahimo naton nga malain ukon mabatuan naton ang aton kaluyahon, dapat kita mangin mapinasensiahon kag himuon naton ang aton bug-os nga masarangan nga magbag-o. May ginsiling si Jesus nga nagapahangop nga posible indi dayon pagsabton ang aton mga pangamuyo. Nagsiling sia: “Padayon kamo sa pagpangayo, kag kamo pagahatagan; padayon kamo sa pagpangita, kag kamo makakita; padayon kamo sa pagpanuktok, kag kamo pagabuksan; kay ang tanan nga nagapangayo makabaton, kag ang tanan nga nagapangita makakita, kag ang tanan nga nagapanuktok pagabuksan.” (Mat. 7:7, 8) Kon sundon naton ini nga laygay kag ‘magpadayon kita sa pagpangamuyo,’ makasalig kita nga pamatian kita sang aton Amay sa langit kag sabton niya ang aton mga pangamuyo.—Col. 4:2.

11. Paano makabulig sa aton ang Hebreo 4:16 kon pamatyag naton daw wala dayon ginasabat ang aton pangamuyo?

¹¹ Bisan pa pamatyag naton daw wala dayon ginasabat ni Jehova ang aton pangamuyo, nagpromisa sia nga sabton niya ini ‘sa tion nga kinahanglan gid naton ang bulig.’ (Basaha ang Hebreo 4:16.) Gani indi gid naton pagbasulon si Jehova kon wala niya ginsabat ang aton pangamuyo sa tion nga gusto naton. Halimbawa, madamo ang madugay na nga nagapangamuyo nga kuntani tapuson na sang Ginharian sang Dios ining malain nga sistema. Ginsugo pa gani ni Jesus nga ipangamuyo naton ini. (Mat. 6:10) Indi gid maayo kon magluya ang aton pagtuo sa Dios kay wala mag-abot ang katapusan sa tion nga ginapaabot naton. (Hab. 2:3; Mat. 24:44) Mas maayo kon padayon kita nga maghulat kay Jehova, mangamuyo sa iya, kag magtuo nga sabton niya ang aton mga pangamuyo. Maabot ang katapusan sa husto gid nga tion, kay may gintalana na si Jehova nga “adlaw kag oras” para sa sini. Kag amo gid ini ang pinakamaayo nga tion para sa tanan.—Mat. 24:36; 2 Ped. 3:15.

12. Sa ano nga sitwasyon mahimo mabudlayan kita nga mangin mapinasensiahon?

 ¹²Posible nga kinahanglan anay naton batason ang malain nga ginahimo sa aton kag mangin mapinasensiahon. Sa kalibutan, masami nga ginapakalain sang iban ang indi pareho sa ila sing rasa, tribo, kultura, ukon ang mga halin sa iban nga pungsod. Ginapakanubo sang mga lalaki ang mga babayi, kag sang mga babayi ang mga lalaki. Ginapakanubo man ang mga may diperensia sa lawas ukon sa hunahuna. Madamo nga katawhan ni Jehova ang ginapakalain ukon ginahingabot bangod sang ila mga ginapatihan nga nabase sa Biblia. Kon nakaeksperiensia kita sini, dapat naton dumdumon ang ginsiling ni Jesus. Nagsiling sia: “Ang nagbatas tubtob sa katapusan maluwas.” (Mat. 24:13) Pero ano ang himuon mo kon nabal-an mo nga may nahimo nga serioso nga sala ang isa ka utod sa kongregasyon? Kon napabalo na ang mga gulang parte sa sini, mangin mapinasensiahon ka bala kag magasalig nga asikasuhon nila ini suno sa kasuguan ni Jehova? Ano bala ang dapat himuon sang mga gulang?

13. Ano ang gusto ni Jehova nga himuon sang mga gulang kon may nahimo nga serioso nga sala ang isa ka utod?

¹³ Kon nabal-an sang mga gulang nga may nahimo nga serioso nga sala ang isa ka utod sa kongregasyon, nagapangamuyo sila kay Jehova nga hatagan sila sang “kaalam nga halin sa langit” para mailog nila ang panghunahuna ni Jehova sa sini nga sitwasyon. (Sant. 3:17) Gusto nila buligan ang nakasala nga makapanumbalik kag untatan ang “iya sayop nga dalanon.” (Sant. 5:19, 20) Himuon man nila ang ila bug-os nga masarangan para maamligan ang kongregasyon kag paumpawan ang mga naapektuhan sang ginhimo nga sala. (2 Cor. 1:3, 4) Kon nagaasikaso sang serioso nga sala, dapat anay usisaon sing maayo sang mga gulang kon ano gid ang natabo. Posible nga nagakinahanglan ini sang malawig nga tion. Dayon nagapangamuyo sila, nagalaygay base sa Biblia, kag nagadisiplina “sa nagakaigo nga paagi.” (Jer. 30:11) Wala nagapabuyanbuyan ang mga gulang sa pag-asikaso sa serioso nga sala, pero wala man sila nagapadasudaso sa pagdesisyon. Kon ginasunod sang mga gulang ang panuytoy ni Jehova, makabenepisyo gid ang tanan sa kongregasyon. Pero bisan pa gin-asikaso sing husto sang mga gulang ang problema, posible nga nasakitan gihapon ang mga naapektuhan sang ginhimo nga sala. Kon isa ikaw sa naapektuhan, ano ang puede mo himuon para maghaganhagan ang kasakit nga imo ginabatyag?

14. Kon may nahimo nga serioso nga sala ang isa ka utod sa imo, kay sin-o halimbawa sa Biblia ang makapaumpaw sa imo?

 ¹⁴ May nahimo bala nga serioso nga sala ang isa ka tawo sa imo? Ano abi kon isa sia ka utod sa kongregasyon? Madamo sing halimbawa sa Pulong sang Dios ang nagatudlo sa aton nga mas maayo nga maghulat kay Jehova kon san-o niya ini tadlungon. Halimbawa, bisan pa nag-antos si Jose bangod sang ginhimo sa iya sang iya mismo mga utod, wala sia nagdumot. Sa baylo, padayon sia nga nag-alagad kay Jehova sa bug-os niya nga masarangan. Gani ginpadyaan sia ni Jehova bangod nagbatas sia kag nangin mapinasensiahon. (Gen. 39:21) Sang ulihi, ginpatawad niya ang mga nakasala sa iya kag nahangpan niya nga ginpakamaayo sia ni Jehova. (Gen. 45:5) Pareho kay Jose, maumpawan kita kon magpalapit kita kay Jehova kag itugyan naton sa iya ang tanan.—Sal. 7:17; 73:28.

15. Ano ang nakabulig sa isa ka sister nga mabatas ang indi maayo nga ginhimo sa iya?

¹⁵ Grabe gid kasakit ang mga naagyan ni Jose. Pero bisan pa indi pareho kalain sa ginhimo kay Jose ang ginhimo sa aton, masakit man gihapon kon ginhimuan kita sing malain sang iban. Kon may indi maayo nga ginhimo sa aton ang iban, pati na ang mga wala nagaalagad kay Jehova, makabulig sa aton ang mga prinsipio sa Biblia. (Fil. 2:3, 4) Binagbinaga ang isa ka eksperiensia. Nasakitan gid ang isa ka sister sang nabal-an niya nga ginapakalain sia sa iban sang iya upod sa obra. Sa baylo nga maakig dayon, ginpamalandungan niya ang halimbawa ni Jesus. Sang gin-insulto si Jesus, wala sia magbalos. (1 Ped. 2:21, 23) Gani nagdesisyon ang sister nga pabay-an na lang ang natabo. Sang ulihi, nabal-an niya nga may malala gali nga balatian ang iya upod sa obra kag grabe gid ang iya stress. Gani nahunahuna sang sister nga indi hungod sang iya upod sa obra nga pakalainon sia sa iban. Nalipay gid ang sister kay nangin mapinasensiahon sia kag ginbatas niya ang indi maayo nga ginhimo sa iya, gani nangin malinong ang iya hunahuna.

16. Kon ginhimuan ka sing malain, ano ang makapaumpaw sa imo? (1 Pedro 3:12)

¹⁶ Kon nagaantos ka bangod ginhimuan ka sing malain ukon bangod sa iban pa nga rason, tandai nga malapit si Jehova “sa mga nagaantos.” (Sal. 34:18) Palangga ka niya bangod mapinasensiahon ka kag ginatugyan mo sa iya ang imo mga problema. (Sal. 55:22) Sia ang Hukom  sa bug-os nga duta. Makita niya ang tanan nga nagakatabo. (Basaha ang 1 Pedro 3:12.) Kon may problema ka nga indi mo masolbar, handa ka bala nga maghulat kay Jehova?

17. Suno sa Isaias 30:18, ano ang ginpromisa ni Jehova sa aton?

¹⁷ Sa indi na lang madugay, pakamaayuhon gid kita sang aton Amay sa langit paagi sa iya Ginharian. Ang Isaias 30:18 nagasiling: “Si Jehova nagahulat sing mapailubon agod pakitaan kamo sing kahamuot, kag magatindog sia agod pakitaan kamo sing kaluoy. Kay si Jehova Dios sang hustisya. Malipayon ang tanan nga padayon nga nagalaum sa iya.” Kon padayon kita nga nagalaum kay Jehova, madamo nga pagpakamaayo ang mabaton naton subong kag sa bag-ong kalibutan sa palaabuton.

18. Ano nga mga pagpakamaayo ang mabaton naton?

¹⁸ Kon ara na sa bag-ong kalibutan ang katawhan sang Dios, indi na gid nila maeksperiensiahan ang mga problema nga ginabatas nila subong. Wala na sing inhustisya kag kasakit. (Bug. 21:4) Indi na gid kita mabalaka sa aton mga kinahanglanon kay bugana ini nga ihatag sa aton. (Sal. 72:16; Isa. 54:13) Dalayawon gid ini nga mga pagpakamaayo!

19. Ngaa ginahanas kita ni Jehova subong?

¹⁹ Samtang wala pa ini nga mga pagpakamaayo, ginahanas kita subong ni Jehova para mangin handa kita nga magkabuhi sa bag-ong kalibutan. Paano? Paagi sa pagbulig sa aton nga mauntat ang ginahimo naton nga malain kag mapakita ang maayo nga mga kinaiya. Indi maluyahan sing buot kag indi mag-untat sa pag-alagad kay Jehova. Malapit na lang gid naton mabaton ang dalayawon nga mga pagpakamaayo. Kabay pa nga padayon kita nga mangin mapinasensiahon kag maghulat kay Jehova, kay tumanon gid niya ang mga ginpromisa niya sa aton.