1-2. Inai atikol ai dahaka do ita herevalaia?

OI URA henia harihari gauna ta be nega maorona ai ia ginidae lasi neganai, emu hemami be edena bamona? Reana emu hemami be Aonega Herevadia 13:12 ena hereva hegeregerena, ia gwau: “Ta ena ura gauna ia guguru lasi neganai, ia lalohisihisi.” To, dahaka do oi karaia bema gabeai oi kamonai, badina maorona dainai unai harihari gauna be ia ginidae haraga lasi? Reana mai haheauka ida do oi naria.

² Inai atikol ai, Baibel ena hakaua herevadia haida do ita herevalaia, unai ese ita do ia durua ‘mai haheauka ida ita naria’ totona. (Mika 7:7) Bena, mai haheauka ida Iehova do ita naria daladia rua do ita herevalaia. Dokonai, Iehova ese mai haheauka ida ia idia naria noho taudia totona do ia havaraia hahenamo idauidau do ita herevalaia.

3. Aonega Herevadia 13:11 amo dahaka ita dibaia?

³ Aonega Herevadia 13:11 ese do ita haheauka ena badina ia hahedinaraia. Ia gwau: “Dala kererena ai ia taga haraga tauna ena taga be do idia ore. To metairametaira kohu ta ta ia haboua tauna ena kohu be do idia momo herea.” Unai siri amo dahaka ita dibaia? Aonega tauna be mai haheauka ida gaudia ia karaia namonamo bona unai ese namo ia havaraia.

4. Aonega Herevadia 4:18 ena hakaua herevana amo dahaka ita dibaia?

⁴ Aonega Herevadia 4:18 ia gwau: “Kara maoromaoro tauna ena dala be daba ena diari bamona, unai diari ia bada  ia lao ela bona dina tubu.” Unai siri ese ia hahedinaraia goevagoeva, Iehova be ena taunimanima ia durua ena ura idia lalopararalaia totona. Danu, unai siri ese Keristani tauna ta be iena mauri ai senisi ia karaia bona Dirava kahirakahira ia lao dalana ia hahedinaraia. Tau ta ena hetura karana Dirava ida be metairametaira do ia goada ia lao. Bema Dirava ena Hereva bona iena orea amo idia mai hakaua herevadia ita stadilaia namonamo bona ita badinaia, metairametaira Keriso ena kara namodia do ita tohotohoa bona Dirava do ita diba namonamo. Mani Iesu ena haheitalai ta ita herevalaia.

5. Iesu ese ia gwauraia haheitalai amo dahaka ita dibaia?

⁵ Iesu ena haheitalai lalonai ia hahedinaraia, sivarai namona be uhe ta bamona metairametaira kudou-maoro tauna lalonai ia tubu. Ia gwau: “Uhe ena raurau matamata ia hedinarai bona ia tubu daekau, to edena bamona ia tubu be ia diba lasi. Metairametaira tano be huahua ia havaraia, witi ia tubu matamaia guna, gabeai witi ena kwarana ia hedinarai, bena dokonai huahua ia mage.” (Mar. 4:27, 28) Iesu ena hereva anina be dahaka? Ia hahedinaraia tubutubu gauna be metairametaira ia tubu daekau hegeregerena, ta be sivarai namona ia abia dae neganai, metairametaira senisi do ia karaia. Hegeregere, Baibel stiuden ta be Dirava kahirakahira ia lao noho neganai, do ita itaia ena mauri lalonai senisi ia karaia matamaia. (Efe. 4:22-24) To, namona be ita laloatao Iehova sibona ese unai uhe maragina ia hatubua.​—1 Kor. 3:7.

6-7. Iehova ese tanobada ia karaia dalana amo dahaka ita dibaia?

⁶ Iehova ena gaukara ibounai lalonai, nega ia atoa ena gaukara ia karaia namonamo totona. Unai bamona ia karaia ena ladana ia hanamoa bona ma haida ia durua totona. Hegeregere, Iehova ese dina ta ta ai taunimanima totona tanobada ia hegaegaelaia dalana mani ita laloa.

⁷ Iehova ese tanobada ia karaia dalana ia  herevalaia neganai, Baibel ia gwau, ia ese “tanobada ena bada,” ena “badina nadi” bona “kona nadi” ia atoa. (Iobu 38:5, 6) Bona nega ia atoa iena gaukara ia itaia namonamo totona. (Gen. 1:10, 12) Aneru be Iehova ese ia karaia gau matamatadia idia itaia neganai, edia hemami be edena bamona? Idia be mai ‘moale ida idia boiboi.’ (Iobu 38:7) Unai amo dahaka ita dibaia? Ena be Iehova ese lagani tausen momo lalonai tanobada ia karaia, to ia karaia gaudia ia itaia neganai, ia gwau “ibounai be namo herea.”​—Gen. 1:31.

8. Hari dahaka do ita herevalaia?

⁸ Ataiai ita herevalaia haheitalai ese idia hahedinaraia, Baibel lalonai hakaua herevadia momo ese ita dekenai haheauka karana ia hadibaia. Hari, Iehova dekenai ita naria noho daladia rua do ita herevalaia.

9. Edena negai Iehova dekenai ita naria be namo?

⁹ Nega haida do ita naria Iehova ese iseda guriguri ia haerelaia totona. Hekwakwanai ta ita haheaukalaia eiava manoka gauna ita ura hanaia totona, Iehova ena heduru ita noia neganai, nega haida ita mamia ita naria daudau iseda guriguri ia haerelaia totona. Dahaka dainai Iehova ese iseda guriguri ibounai ia haerelaia haraga lasi?

10. Ita guriguri neganai dahaka dainai ita haheauka be namo?

¹⁰ Iehova be iseda guriguri ia kamonai namonamo. (Sal. 65:2) Ia ita guriguri henia neganai, ia abia dae ia ita abidadama henia. (Heb. 11:6) Danu, Iehova ia ura itaia bema iseda guriguri hegeregerena, iena ura do ita karaia. (1 Ioa. 3:22) Iseda manoka gauna ta ita hanaia totona Iehova ena heduru ita noia neganai, namona be ita haheauka bona iseda guriguri hegeregerena senisi ita karaia. Iesu ese ia hahedinaraia, iseda guriguri haida edia haere do ita abia haraga lasi. Ia gwau: “Umui noinoi noho, bona umui dekenai do ia henia. Umui tahua noho, bona do umui davaria, bona iduara dekenai umui pidipidi noho, bena ia ese do ia kehoa. Badina idia noinoi taudia ibounai be do idia abia, bona idia tahua taudia ibounai be do idia davaria, bona idia pidipidi taudia ibounai dekenai iduara do idia kehoa.” (Mat. 7:7, 8) Unai sisiba ita badinaia bona ita “guriguri noho” neganai, ita diba iseda guba Tamana ese iseda guriguri do ia kamonai bona ia haerelaia.​—Kol. 4:2.

11. Iseda guriguri ena haere ita abia haraga lasi neganai, edena dala ai Heberu 4:16 ese ita do ia durua?

¹¹ Ena be ita mamia Iehova ese iseda guriguri ia haerelaia haraga lasi, to Iehova ia gwauhamata “nega maorona ai” iseda guriguri do ia haerelaia. (Heberu 4:16 duahia.) Unai dainai namo lasi, Iehova ese iseda guriguri ia haerelaia haraga lasi neganai, ia dekenai ita badu. Hegeregere, momo be lagani momo lalonai idia guriguri Iehova ena Basileia ese inai nega oromana ena dokona ia mailaia totona. Iesu danu ia gwau unai do ita gurigurilaia. (Mat. 6:10) To, ita laloa negana ai dokona ia mai lasi dainai, namo lasi Iehova ita rakatania, badina unai be kavakava karana! (Hab. 2:3; Mat. 24:44) Aonega karana be mai abidadama ida Iehova ita guriguri henia, bona ia ita naria iseda guriguri ia haerelaia totona. Dokona be nega korikori ai do ia ginidae, badina Iehova ese “dina bona hora” ia abia hidi vadaeni. Bona ibounai dekenai unai be nega namona.​—Mat. 24:36; 2 Pet. 3:15.

12. Edena bamona negadia ai do ia auka ita haheauka totona?

 ¹² Kara gageva ita haheaukalaia. Tanobada taudia ese nega momo, haida be edia toana, kopina ena kala bona edia tano dainai, idia kara dika henia. Haida be edia tauanina kahana ia dika eiava kwara gorerena idia abia dainai, idia kara dika henia. Iehova ena taunimanima momo be edia abidadama dainai, taunimanima ese idia kara dika henidia. Unai bamona negadiai Iesu ena hereva ita laloatao, ia gwau: “Ia haheauka ela bona dokona tauna be mauri do ia abia.” (Mat. 24:13) To bema kongrigeisen lalonai oi itaia ta be kara dika badana ia karaia, dahaka do oi karaia? Elda taudia be unai hekwakwanai idia diba murinai, mai haheauka ida do idia naria bona Iehova ena dala ai do idia hamaoromaoroa, a? Ta be kara dika badana ia karaia neganai, elda taudia be dahaka do idia karaia?

13. Elda taudia be hekwakwanai idia hamaoromaoroa neganai, Iehova ena ura be dahaka?

¹³ Elda taudia idia diba ta be kongrigeisen lalonai kara dika badana ta ia karaia neganai, Iehova idia noia “ataiai amo ia mai aonegana” ia henia totona, unai amo iena lalohadai hegeregerena unai hekwakwanai idia hamaoromaoroa. (Iam. 3:17) Idia ura ‘kara dika tauna be ena dala kererena amo idia hakaua giroa lou.’ (Iam. 5:19, 20) Danu idia ura kongrigeisen idia gimaia bona unai kara dainai idia hisihisi taudia idia hagoadaia. (2 Kor. 1:3, 4) Bema elda taudia idia ura kara dika badana ta idia hamaoromaoroa, namona be hamomokania gaudia idia tahua namonamo guna. Bena idia gurigurilaia bona Baibel ena hakaua herevadia idia tahua namonamo, unai amo “dala maorona ai” kerere tauna idia hamaoromaoroa diba. (Ier. 30:11) Ena be elda taudia ese kerere tauna idia durua haraga, to hahemaoro idia karaia haraga lasi. Elda taudia ese Iehova ena hakaua dalana idia badinaia neganai, kongrigeisen lalonai namo ia havaraia. Ena be elda taudia ese dala maorona ai hekwakwanai idia hamaoromaoroa, to ia kerere lasi tauna be ia lalohisihisi noho. Bema emu hemami be unai bamona, dahaka oi karaia diba?

14. Bema tadikaka ta o taihu ta ese oi ia hahisia, edena Baibel sivarai ese oi ia durua diba?

¹⁴ Tadikaka ta o taihu ta ena kara o hereva amo oi ia hahisia bada, a? Baibel lalonai  idia noho haheitalai namodia ese ita idia hadibaia, Iehova dekenai do ita naria unai hekwakwanai ia hamaoromaoroa totona. Hegeregere, ena be Iosepa be ena tadikaka korikoridia ese idia hahisia bada, to edia kara dika dainai ia badu lasi. Ia gaukara goada Iehova ia hesiai henia totona. Bona ena haheauka karana dainai Iehova ese ia hanamoa. (Gen. 39:21) Gabeai, Iosepa ese ena tadikaka edia kara dika ia gwauatao bona Iehova ese ia hanamoa dalana ia itaia. (Gen. 45:5) Iosepa hegeregerena, Iehova kahirakahira ita lao neganai, goada ita abia, bona ia dekenai ita naria nega maorona ai hekwakwanai do ia hamaoromaoroa.​—Sal. 7:17; 73:28.

15. Dahaka ese taihu ta ia durua hekwakwanai ta ia haheaukalaia bona lalomaino ia abia?

¹⁵ Oibe, reana haida ese ita idia kara dika henia dalana be Iosepa idia kara henia dalana hegeregerena lasi, to edia kara dainai ita lalohisihisi diba. Ita bona Witnes lasi tauna huanai hekwakwanai ia vara neganai, Baibel ena hakaua herevadia ita badinaia karana ese namo do ia havaraia. (Fili. 2:3, 4) Mani ekspiriens ta ita laloa. Taihu ta ia kamonai iena gaukara hahine ta ese haida dekenai iena ladana ia hadikaia neganai, ia lalohisihisi bada. Taihu be kara ta ia karaia haraga lasi, to Iesu ena haheitalai ia laloa dobu. Haida ese Iesu idia hahisia neganai, idia ia hahisia lou lasi. (1 Pet. 2:21, 23) Taihu be unai ia laloatao dainai, ia vara gauna dekenai kara ta ia karaia lasi. Gabeai, ia kamonai unai hahine be ia gorere bada bona ia lalometau. Unai amo taihu ia laloparara unai hahine be ia gorere dainai ia hereva kava. Taihu ia moale badina unai kara ia haheaukalaia bona lalomaino ia abia.

16. Bema haida ese oi idia hahisia, dahaka ese oi do ia hagoadaia? (1 Petero 3:12)

¹⁶ Bema haida ese dala idauidau ai oi idia hahisia, namona be oi laloatao “Iehova be lalometau taudia kahirakahira ia noho.” (Sal. 34:18) Oi ia lalokau henia badina oi haheauka bona ia dekenai oi tabekau. (Sal. 55:22) Iehova be tanobada ibounai ena Hahemaoro Tauna bona ia ese idia vara gaudia ibounai ia itaia noho. (1 Petero 3:12 duahia.) Unai dainai hekwakwanai badadia oi hamaoromaoroa lasi neganai,  namona be oi naria Iehova ese kara ta ia karaia totona.

17. Isaia 30:18 hegeregerena, Iehova ia gwauhamata dahaka do ia karaia?

¹⁷ Kahirakahira iseda guba Tamana ese iena Basileia amo hahenamo momo do ia mailaia. Isaia 30:18 ia gwau: “Iehova be mai haheauka ida ia naria noho umui ia lalonamo henia totona, bona do ia toreisi umui dekenai hebogahisi ia hahedinaraia totona. Badina Iehova be hahemaoro maoromaoro Diravana. Ia totona mai ura ida idia naria noho taudia be idia moale.” Iehova dekenai idia naria noho taudia ese hari bona tanobada matamatana ai hahenamo momo do idia abia.

18. Dahaka hahenamo ita naria noho?

¹⁸ Dirava ena taunimanima be tanobada matamatana ai do idia vareai neganai, hari idia davaria lalometau o hekwakwanai do idia davaria lou lasi. Kara gageva bona hisihisi be do idia ore. (Apok. 21:4) Unai nega ai gau ta totona do ita lalohekwarahi lasi, badina iseda ura gaudia ibounai do idia hegeregere. (Sal. 72:16; Isa. 54:13) Unai be hahenamo badana!

19. Iehova ese ita ia durua dahaka ita karaia totona?

¹⁹ Hari, Iehova ese ita ia durua noho iseda kara ita hamaoromaoroa bona ia hamoalea karadia ita karaia totona, unai amo iena lohia henunai do ita noho diba. Namo lasi oi lalomanoka bona Iehova tomadiho henia karana oi hadokoa. Mauri namona be kahirakahira do ita abia! Vaira nega namona ita naria noho lalonai, namona be mai haheauka ida ita naria, Iehova ese ena gaukara ia hagugurua totona!