1-2. Ania dagiti usigentayo iti daytoy nga artikulo?

ANIA ti mariknam no adda namnamaem a package a naglaon iti kasapulam unay ngem saan pay a simmangpet? Madismayaka kadi? Posible a kasta ti mariknam ta kuna ti Proverbio 13:12: “Ti namnama a maitantan pagsakitenna ti puso.” Ngem kasanon no naammuam nga adda dagiti nasayaat a rason a saan a simmangpet ti package iti ninamnamam a tiempo? Posible nga agan-anuska ken situtulokka nga aguray.

² Iti daytoy nga artikulo, usigentayo ti dadduma a prinsipio ti Biblia a makatulong kadatayo nga ‘aguray.’ (Mik. 7:7) Kalpasanna, ammuentayo ti dua a situasion a masapul a siaanus nga urayentayo ti panagtignay ni Jehova. Kamaudiananna, usigentayo dagiti bendision para kadagiti situtulok nga aguray ken Jehova.

3. Ania a prinsipio ti isuro kadatayo ti Proverbio 13:11?

³ Ti maysa a pagarigan a mangyilustrar iti kinapateg ti kinaanus ket mabasa iti Proverbio 13:11. Kunana: “Bumassitto ti kinabaknang a nalaka a nagun-od, ngem umadunto ti kinabaknang daydiay in-inut nga agurnong.” Ania a prinsipio ti masursurotayo? Ti masirib a tao siaannad ken siaanus nga aramidenna ti bambanag, isu a nagsayaat ti resulta dagita.

4. Ania a prinsipio ti isuro kadatayo ti Proverbio 4:18?

⁴ Kuna ti Proverbio 4:18 a “ti dana dagiti nalinteg ket kas iti naraniag a lawag iti agsapa a lumawag a lumawag agingga iti tengnga ti aldaw.” Dagita a sasao ket siuumiso nga agaplikar iti in-inut a pamay-an ni Jehova a mangipakaammo iti panggepna  kadagiti adipenna. Ngem mabalin met a tumukoy dayta a bersikulo iti panangparang-ay ti maysa a Kristiano iti espiritualidadna. Saan a mabalin nga apuraen ti naespirituan nga irarang-ay. Agkasapulan dayta iti tiempo. No nagagettayo nga agadal ken iyaplikartayo ti balakad ti Sao ti Dios ken ti organisasionna, in-inut a matuladtayo dagiti kualidad ni Kristo. Ad-adda met a maam-ammotayo ti Dios. Kitaentayo no kasano nga inyilustrar dayta ni Jesus.

5. Kasano nga inyilustrar ni Jesus ti in-inut nga irarang-ay?

⁵ Nagusar ni Jesus iti ilustrasion tapno ilawlawagna no kasano a ti mensahe ti Pagarian nga ikaskasabatayo ket kas iti bassit a bin-i nga in-inut nga agtubo iti puso dagiti nasingpet a tattao. Imbagana: “Agrusrusing ken dumakdakkel dagiti bin-i​—no kasano a mapaspasamak dagita, [ti agmulmula] dina ammo. In-inut nga agbunga a bukbukodna iti nakaimulaanna. Umuna, rummuar ti bulong, sa agdawa, ket kamaudiananna, matangkenan ti dawa.” (Mar. 4:27, 28) Ania ti punto ni Jesus? Inlawlawagna a no kasano nga in-inut ti panagdakkel ti maysa a mula, in-inut met ti naespirituan nga irarang-ay ti tao nga umawat iti mensahe ti Pagarian. Kas pagarigan, bayat a sumingsinged ken Jehova dagiti napasnek nga iyad-adalantayo iti Biblia, makitatayo ti adu a nasayaat a nagbalbaliwanda. (Efe. 4:22-24) Ngem masapul a laglagipentayo a ni Jehova ti mangpadakkel iti dayta a bassit a bin-i.​—1 Cor. 3:7.

6-7. Ania dagiti masursurotayo iti pamay-an ni Jehova a nangparsua iti daga?

⁶ Siaanus a mangiwaya ni Jehova iti umdas a tiempo tapno mairingpasna ti amin nga ar-aramidenna. Kasta ti ar-aramidenna agpaay a pakaidayawan ti naganna ken pakagunggonaan ti sabsabali. Kas pagarigan, saan nga inap-apura ni Jehova ti panangaramidna iti daga no di ket in-inut nga insaganana dayta para iti sangatauan.

⁷ Ibaga ti Biblia no kasano a pinarsua ni Jehova ti daga. Inkeddengna ‘dagiti rukod,’  insaadna ‘dagiti adigi,’ ken inkabilna ti ‘bato a pasuli’ ti daga. (Job 38:5, 6) Nangiwaya pay ketdi iti tiempo a mangpaliiw kadagiti inaramidna. (Gen. 1:10, 12) Maimadyinmo kadi ti narikna dagiti anghel bayat a makitkitada ti in-inut a panangiringpas ni Jehova kadagiti pinarsuana? Sigurado a nakaragragsakda! Adda pay ketdi gundaway nga ‘impukkawda ti ragsakda.’ (Job 38:7) Ania ti masursurotayo? Adu a ribu a tawen ti limmabas sakbay a nairingpas ni Jehova ti panamarsuana, ket idi sinurbeyna ti amin a pinarsuana, imbagana a “nakasaysayaat” dagita.​—Gen. 1:31.

8. Ania itan ti usigentayo?

⁸ Kas nakitatayo kadagiti nadakamaten a pagarigan, adu a prinsipio ti masarakantayo iti Sao ti Dios a mangisuro iti kinapateg ti panaganus. Usigentayo itan ti dua nga espesipiko a situasion a masapul a situtuloktayo nga aguray ken Jehova.

9. Ania ti maysa a situasion a masapul nga aguraytayo ken Jehova?

⁹ Nalabit masapul nga urayentayo a masungbatan dagiti kararagtayo. No ikararagtayo ti bileg tapno maibturantayo ti maysa a suot wenno tapno mapagballigiantayo ti maysa a pagkapuyantayo, baka mariknatayo a nagbayag metten a masungbatan dayta. Apay a saan a dagus a sungbatan ni Jehova ti amin a kararagtayo?

10. Apay a masapul nga aganustayo no maipapan kadagiti kararagtayo?

¹⁰ Dengdenggen a naimbag ni Jehova dagiti kararagtayo. (Sal. 65:2) Ibilangna dagiti napasnek a kararagtayo kas ebidensia ti pammatitayo. (Heb. 11:6) Interesado met ni Jehova a makita ti determinasiontayo a mangtungpal kadagiti kararagtayo ken mangaramid iti pagayatanna. (1 Juan 3:22) Isu a no adda naalas nga ugali wenno pagkapuyan a kayattay nga isardeng, masapul nga aganus ken agreggettayo nga agtignay maitunos iti ikarkararagtayo. Impasimudaag ni Jesus a mabalin a saan a dagus a masungbatan ti dadduma a kararagtayo. Imbagana: “Itultuloyyo ti agdawat, ket maikkankayto; itultuloyyo ti agsapul, ket makasarakkayto; itultuloyyo ti agtuktok, ket mailukatankayto; ta asinoman nga agdawat maikkanto, ken asinoman nga agsapul makasarakto, ken asinoman nga agtuktok mailukatanto.” (Mat. 7:7, 8) No surotentayo daytoy a balakad ken “itultuloy[tayo] ti agkararag,” makapagtalektayo a denggen ken sungbatan ti nailangitan nga Amatayo dagiti kararagtayo.​—Col. 4:2.

11. Kasano a makatulong kadatayo ti Hebreo 4:16 no kasla saan a dagus a sinungbatan ni Jehova ti kararagtayo?

¹¹ Nupay kasla saan a dagus a sinungbatan ni Jehova ti maysa a kararagtayo, ikarkarina a sungbatanna dayta iti “umiso a tiempo.” (Basaen ti Hebreo 4:16.) Isu a ditay koma pulos pabasolen ni Jehova no saan a mapasamak a dagus ti banag a namnamaentayo. Kas pagarigan, nabayagen nga ikarkararag ti adu a tattao a pagpatinggaen koman ti Pagarian ti Dios daytoy a sistema ti bambanag. Imbaga pay ketdi ni Jesus a masapul nga ikararagtayo dayta. (Mat. 6:10) Ngem anian a kinamaag no ipalubos ti maysa a tao a kumapuy ti pammatina iti Dios gapu laeng ta saan pay a dimteng ti panungpalan iti tiempo a namnamaen dagiti tattao! (Hab. 2:3; Mat. 24:44) Masiribtayo no itultuloytayo ti aguray ken Jehova ken agkararagtayo kenkuana buyogen ti pammati. Dumtengto ti panungpalan iti umiso a tiempo, ta inkeddengen ni Jehova ti “aldaw ken oras” para iti dayta. Mapaneknekanto a dayta  nga aldaw ti kasayaatan a tiempo para iti amin.​—Mat. 24:36; 2 Ped. 3:15.

12. Ania a situasion ti mabalin nga ad-adda a mangsubok iti kinaanustayo?

¹² Nalabit masapul nga aganustayo agingga a magun-odantayo ti hustisia. Dagiti tattao iti daytoy a lubong masansan a maltratuenda dagidiay naiduma ti sekso, kultura, puli, tribu, wenno nasionalidadda. Dadduma met ti mamaltrato gapu ta adda depekto ti bagi wenno isipda. Adu nga adipen ni Jehova ti mangib-ibtur iti kinaawan hustisia gapu kadagiti naibatay-Biblia a patpatienda. No kasta ti mapaspasarantayo, masapul a laglagipentayo daytoy nga imbaga ni Jesus: “Ti makapagibtur agingga iti panungpalan, maisalakanto.” (Mat. 24:13) Ngem kasano ngay no naammuam nga adda nadagsen a basol ti maysa a kakongregasionmo? No naipakaammo daytan kadagiti panglakayen, italekmo kadin dayta kadakuada, ken siaanus nga urayem a tamingenda dayta iti pamay-an ni Jehova? Ania ti ramanen ti panangasikasoda iti dayta?

13. Ania ti karaman iti panangasikaso kadagiti bambanag iti pamay-an ni Jehova?

¹³ No naammuan dagiti panglakayen nga adda nakaaramid iti nadagsen a basol iti kongregasion, ikararagda ti “sirib manipud ngato” tapno maammuanda ti panangmatmat ni Jehova iti dayta a situasion. (Sant. 3:17) Ti kalatda ket tapno matulongan ti nagbasol nga “agbabawi iti kamalina” no posible. (Sant. 5:19, 20) Kayatda met nga aramiden ti amin a kabaelanda tapno maprotektaranda ti kongregasion ken maliwliwa dagiti nasaktan. (2 Cor. 1:3, 4) No tamtamingen dagiti panglakayen dagiti nadagsen a basol, masapul nga ammuenda pay laeng ti amin a detalye ket mabalin nga agkasapulan dayta iti tiempo. Kalpasanna, agkararagda ken siaannad a mangtedda iti Nainkasuratan a balakad ken iyaplikarda ti panangilinteg iti “maitutop a pamay-an.” (Jer. 30:11) Nupay saan a mangitantan dagiti panglakayen, saanda met nga agap-apura a mangukom. No umiso ti pannakaasikaso dagiti bambanag, magunggonaan ti amin iti kongregasion. Ngem uray no naasikaso dagiti problema iti kasta a pamay-an, mabalin a masaktan latta ti nakaaramidan iti basol. No kasta ti kasasaadmo, ania ngata ti mabalinmo nga aramiden tapno makissayan ti nasaem a marikriknam?

14. Ania a pagarigan iti Biblia ti mangliwliwa kenka no nasaktannaka unay ti maysa a kapammatiam?

 ¹⁴ Napadasam kadin ti nasaktan unay, a nalabit inaramid dayta ti maysa pay ketdi a kapammatiam? Adda dagiti nagsayaat a pagarigan a masarakam iti Sao ti Dios a makatulong iti pananguraytayo nga ilinteg ni Jehova ti bambanag. Ni Jose ti maysa kadagita. Minaltrato dagiti mismo a kakabsatna. Ngem saan a nagsakit ti nakemna kadagiti basolda. Imbes ketdi, nagpokus iti panagserbina ken Jehova, ket sibabaknang a nabendisionan gapu iti panaganus ken panagibturna. (Gen. 39:21) Idi agangay, napakawan ni Jose dagiti nangirurumen kenkuana ket nakitana ti panangbendision kenkuana ni Jehova. (Gen. 45:5) Kas ken Jose, maliwliwatayo met no umadanitayo ken Jehova ken bay-antayo nga isu ti mangipakat iti hustisia.​—Sal. 7:17; 73:28.

15. Ania ti nakatulong iti maysa a kabsat tapno maibturanna ti saan a nasayaat a pannakatratona?

¹⁵ Siempre, saan nga amin a di kinahustisia ket kas iti kakaro dagiti napadasan ni Jose. Ngem masaktantayo latta no saan a nasayaat ti pannakatratotayo. No adda problematayo iti maysa a tao, a pakairamanan ti maysa a saan nga agdaydayaw ken Jehova, magunggonaantayo no iyaplikartayo dagiti prinsipio ti Biblia. (Fil. 2:3, 4) Usigentayo ti maysa a kapadasan. Adda kabsat a nasaktan unay idi naammuanna nga adda katrabahuanna a negatibo ken di agpayso ti iyes-estoriana maipapan kenkuana. Imbes a komprontaenna a dagus ti katrabahuanna, pinanunotna ti ulidan ni Jesus nga idi nainsulto, dina sinubadan iti insulto. (1 Ped. 2:21, 23) Tinantandaananna dayta, isu a dinan pinagbalin nga isyu ti napasamak. Idi agangay, naammuanna nga adda gayam nakaro a sakit ti katrabahuanna isu a mais-stress unay. Pinanunot ti kabsat a saan nga inggagara dayta ti katrabahuanna. Isu a naragsak ti kabsat ta nagan-anus ken inibturanna ti saan a nasayaat a pannakatratona, ket kimmalma ti riknana.

16. Ania ti mabalin a makaliwliwa kenka no ib-ibturam ti di kinahustisia? (1 Pedro 3:12)

¹⁶ No ib-ibturam ti di kinahustisia wenno adda nangpasakit kenka, laglagipem nga asideg ni Jehova “kadagiti nasaktan ti pusoda.” (Sal. 34:18) Ay-ayatennaka gapu ta  agan-anuska ken ipalpalladawmo kenkuana ti dadagsenmo. (Sal. 55:22) Isu ti Ukom iti intero a daga. Makitkitana ti amin a mapaspasamak. (Basaen ti 1 Pedro 3:12.) Isu a no adda dagiti problema a dimo masolbar, situtulokka kadi nga aguray kenkuana?

17. Sigun iti Isaias 30:18, ania ti ipaspasigurado kadatayo ni Jehova?

¹⁷ Asidegen a sibabaknang a bendisionannatayo ti nailangitan nga Amatayo babaen ti Pagarianna. Kuna ti Isaias 30:18: “Siaanus nga agur-uray ni Jehova tapno ipakitaannakayo iti pabor, bumangonto tapno kaasiannakayo. Ta ni Jehova ket Dios ti hustisia. Naragsak ti amin nga agtultuloy a mangnamnama kenkuana.” Dagidiay agtultuloy a mangnamnama ken Jehova ket umawat iti adu a bendision ita ken iti um-umay a baro a lubong.

18. Anianto dagiti bendision a sagrapentayo?

¹⁸ Inton ti ili ti Dios ket addan iti baro a lubong, didanton ibturan manen dagiti pakadanagan ken problema a mapaspasaranda ita. Awanton ti di kinahustisia ken ut-ot. (Apoc. 21:4) Ditayton pakadanagan dagiti kasapulantayo ta aglaplapusananton a maipaay dagita. (Sal. 72:16; Isa. 54:13) Talaga a nagsayaatto dayta!

19. Ania ti in-inut a pangisagsaganaan kadatayo ita ni Jehova?

¹⁹ Kabayatanna, bayat nga ik-ikkatentayo ti tunggal naalas nga ugalitayo ken patpatanorentayo dagiti nasayaat a kualidad, isagsagananatayo itan ni Jehova iti panagbiag iti sidong ti panangiturayna. Dika maawanan iti namnama ken dika sumuksuko. Asidegen a sagrapentayo ti kasayaatan a panagbiag! Naraniag a masakbayan ti agur-uray kadatayo. Isu a situtulok ken siaanus koma nga urayentayo a tungpalen ni Jehova dagiti karina!