អត្ថបទសិក្សា ៣១
តើអ្នកសុខចិត្តរង់ចាំព្រះយេហូវ៉ាឬទេ?
«ខ្ញុំនឹងរង់ចាំ . . . ដោយចិត្តអត់ធ្មត់»។—មីកា ៧:៧
ចម្រៀងលេខ១២៨ ចូរស៊ូទ្រាំរហូតដល់ទីបញ្ចប់
សេចក្ដីសង្ខេប *
១-២. តើយើងនឹងពិចារណាអ្វីខ្លះក្នុងអត្ថបទនេះ?
តើអ្នកមានអារម្មណ៍យ៉ាងណាពេលអីវ៉ាន់ដែលអ្នកពិតជាត្រូវការមិនមកនៅពេលដែលអ្នករំពឹងទុក? តើអ្នកខកចិត្តឬទេ? អ្នកទំនងជាមានអារម្មណ៍ដូចសុភាសិត ១៣:១២ចែងថា៖ «សេចក្ដីសង្ឃឹមដែលក្រនឹងកើតឡើង នាំឲ្យក្រៀមក្រំចិត្ត»។ ប៉ុន្តែចុះយ៉ាងណា បើអ្នកឮថាមានមូលហេតុត្រឹមត្រូវដែលអីវ៉ាន់នោះមិនមកដល់តាមការស្មានទុករបស់អ្នក? ក្នុងករណីបែបនោះ អ្នកទំនងជានឹងមានចិត្តអត់ធ្មត់ ហើយសុខចិត្តរង់ចាំ។
២ ក្នុងអត្ថបទនេះ យើងនឹងមើលគោលការណ៍គម្ពីរខ្លះដែលអាចជួយយើងឲ្យចេះ«រង់ចាំ... ដោយចិត្តអត់ធ្មត់» ហើយរក្សាចិត្តគំនិតនោះ។ (មីកា ៧:៧) បន្ទាប់មក យើងនឹងពិចារណាអំពីស្ថានភាពពីរដែលយើងត្រូវរង់ចាំព្រះយេហូវ៉ាដោយចិត្តអត់ធ្មត់ឲ្យចាត់វិធានការ។ ក្រោយមក យើងនឹងពិចារណាអំពីពរដែលពួកអ្នកដែលសុខចិត្តរង់ចាំព្រះយេហូវ៉ានឹងទទួល។
គោលការណ៍គម្ពីរដែលបង្រៀនយើងឲ្យមានចិត្តអត់ធ្មត់
៣. តើសុភាសិត ១៣:១១បង្រៀនយើងអ្វី?
៣ សុភាសិត ១៣:១១ជួយយើងឲ្យយល់អំពីមូលហេតុដែលយើងគួរតែមានចិត្តអត់ធ្មត់។ បទគម្ពីរនោះចែងថា៖ «ទ្រព្យដែលបានមកងាយៗនឹងរលស់ទៅវិញ តែទ្រព្យដែលបានមកបន្តិចម្ដងៗនឹងកើនឡើងជាលំដាប់»។ តើយើងរៀនអ្វីពីខគម្ពីរនេះ? គឺជាការឈ្លាសវៃឲ្យធ្វើអ្វីផ្សេងៗសន្សឹមៗដោយចិត្តអត់ធ្មត់។
៤. តើគោលការណ៍នៅសុភាសិត ៤:១៨បញ្ជាក់អំពីអ្វី?
៤ សុភាសិត ៤:១៨ប្រាប់យើងថា៖ «ផ្លូវរបស់មនុស្សសុចរិតប្រៀបដូចជាពន្លឺនៅពេលព្រឹកដែលភ្លឺបន្តិចម្ដងៗរហូតដល់ភ្លឺខ្លាំងដូចពេលថ្ងៃត្រង់»។ ពាក្យទាំងនេះបង្ហាញយ៉ាងច្បាស់ថាព្រះយេហូវ៉ាជួយរាស្ត្រលោកឲ្យយល់អំពីគោលបំណងរបស់លោកបន្តិចម្ដងៗ។ ប៉ុន្តែ ខនេះក៏អាចជួយយើងឲ្យយល់អំពីរបៀបដែលគ្រិស្តសាសនិកធ្វើការផ្លាស់ប្ដូរផ្សេងៗក្នុងជីវិតដើម្បីចូលកាន់តែជិតព្រះយេហូវ៉ា។ គឺត្រូវការពេលឲ្យបុគ្គលម្នាក់ចូលទៅជិតព្រះយេហូវ៉ា។ បើយើងសិក្សាយ៉ាងយកចិត្តទុកដាក់ ហើយធ្វើតាមយោបល់ដែលយើងទទួលពីបណ្ដាំរបស់លោកនិងអង្គការលោក បន្តិចម្ដងៗយើងនឹងបណ្ដុះឲ្យមានគុណសម្បត្តិដូចគ្រិស្ត។ ចំណេះរបស់យើងអំពីព្រះក៏នឹងកើនឡើងដែរ។ សូមពិចារណាអំពីឧទាហរណ៍របស់លោកយេស៊ូដែលពន្យល់អំពីរឿងនោះ។
ដូចរុក្ខជាតិដុះឡើងបន្តិចម្ដងៗ មនុស្សដែលស្ដាប់និងទទួលយកដំណឹងអំពីរាជាណាចក្រ រីកចម្រើនបន្តិចម្ដងៗ (សូមមើលវគ្គ៥)
៥. តើលោកយេស៊ូបានលើកឧទាហរណ៍អ្វីដើម្បីបង្ហាញអំពីការរីកចម្រើនបន្តិចម្ដងៗ?
៥ លោកយេស៊ូបានលើកឧទាហរណ៍មួយដើម្បីពន្យល់អំពីរបៀបដែលដំណឹងអំពីរាជាណាចក្រដែលយើងផ្សាយ គឺប្រៀបដូចជាគ្រាប់ពូជតូចមួយដែលដុះឡើងបន្តិចម្ដងៗក្នុងចិត្តរបស់បុគ្គលដែលមានចិត្តស្មោះ។ លោកបានមានប្រសាសន៍ថា៖ «គ្រាប់ពូជ . . . ចេញពន្លកហើយធំឡើង តែគាត់[អ្នកសាបព្រោះ]មិនដឹងថាវាដុះតាមរបៀបណាឡើយ។ បន្តិចម្ដងៗ ដីបង្កើតផលដោយឯកឯង មុនដំបូងចេញដើម រួចមានកួរ ហើយទីបំផុតមានគ្រាប់»។ (ម៉ាក. ៤:២៧, ២៨) តើប្រសាសន៍របស់លោកយេស៊ូមានន័យយ៉ាងណា? លោកកំពុងពន្យល់ថា ដូចរុក្ខជាតិដុះឡើងបន្តិចម្ដងៗ មនុស្សដែលទទួលយកដំណឹងអំពីរាជាណាចក្ររីកចម្រើនបន្តិចម្ដងៗ។ ជាឧទាហរណ៍ កាលដែលសិស្សគម្ពីររបស់យើងដែលមានចិត្តស្មោះចូលទៅជិតព្រះយេហូវ៉ា យើងចាប់ផ្ដើមឃើញការកែប្រែល្អៗជាច្រើនដែលពួកគេបានធ្វើ។ (អេភ. ៤:២២-២៤) ប៉ុន្តែ យើងត្រូវចាំថាគឺព្រះយេហូវ៉ាដែលធ្វើឲ្យគ្រាប់ពូជតូចនោះដុះលូតលាស់ឡើង។—១កូ. ៣:៧
៦-៧. តើយើងរៀនអ្វីពីរបៀបដែលព្រះយេហូវ៉ាបានបង្កើតផែនដី?
៦ មិនថាព្រះយេហូវ៉ាធ្វើអ្វីក៏ដោយ លោកបង្ហាញចិត្តអត់ធ្មត់ ដោយប្រើពេលដែលចាំបាច់ដើម្បីបង្ហើយកិច្ចការនោះ។ លោកធ្វើដូច្នេះ ដើម្បីឲ្យនាមរបស់លោកទទួលការសរសើរតម្កើង និងជាប្រយោជន៍ដល់អ្នកឯទៀត។ ជាឧទាហរណ៍ សូមគិតអំពីរបៀបដែលព្រះយេហូវ៉ារៀបចំផែនដីបន្តិចម្ដងៗឲ្យមនុស្សរស់នៅ។
៧ ពេលរៀបរាប់អំពីរបៀបដែលព្រះយេហូវ៉ាបានបង្កើតផែនដី គម្ពីរចែងថាលោកបាន«កំណត់ទំហំផែនដី» ដាក់«គ្រឹះផែនដី» និង«បញ្ចុះសសរផែនដី»។ (យ៉ូប ៣៨:៥, ៦) លោកថែមទាំងលៃទុកពេលដើម្បីពិនិត្យពិចារណាស្នាដៃរបស់លោកទៀតផង។ (ដក. ១:១០, ១២) តើអ្នកអាចស្រមៃគិតថាពួកទេវតាមានអារម្មណ៍យ៉ាងណាពេលពួកគេឃើញអ្វីថ្មីៗដែលព្រះយេហូវ៉ាបានបង្កើត? ពួកគេច្បាស់ជារំភើបចិត្តខ្លាំងណាស់! នៅពេលមួយ ពួកទេវតាបាន«បន្លឺសំឡេងត្រេកអរ»។ (យ៉ូប ៣៨:៧) តើយើងរៀនអ្វី? ព្រះយេហូវ៉ាបានចំណាយពេលរាប់ពាន់ឆ្នាំដើម្បីបង្កើតអ្វីផ្សេងៗ ហើយពេលព្រះយេហូវ៉ាបានឃើញអ្វីៗដែលលោកបានបង្កើតយ៉ាងយកចិត្តទុកដាក់ លោកបានមានប្រសាសន៍ថា៖ «គឺសុទ្ធតែល្អប្រពៃ»។—ដក. ១:៣១
៨. តើយើងនឹងពិចារណាអ្វីនៅឥឡូវនេះ?
៨ ដូចដែលយើងបានឃើញក្នុងឧទាហរណ៍ខាងលើ មានគោលការណ៍ជាច្រើនពីបណ្ដាំរបស់ព្រះដែលបង្ហាញថាយើងត្រូវមានចិត្តអត់ធ្មត់។ ឥឡូវ យើងនឹងពិចារណាអំពីស្ថានភាពពីរដែលយើងត្រូវសុខចិត្តរង់ចាំព្រះយេហូវ៉ា។
តើយើងត្រូវរង់ចាំព្រះយេហូវ៉ានៅពេលណាខ្លះ?
៩. តើយើងត្រូវរង់ចាំព្រះយេហូវ៉ាក្នុងស្ថានភាពអ្វី?
៩ យើងប្រហែលជាត្រូវរង់ចាំឲ្យព្រះយេហូវ៉ាតបឆ្លើយសេចក្ដីអធិដ្ឋានរបស់យើង។ ពេលយើងអធិដ្ឋានសុំកម្លាំងដើម្បីប្រឈមមុខនឹងទុក្ខលំបាកណាមួយ ឬសុំជំនួយដើម្បីយកឈ្នះភាពទន់ខ្សោយ យើងប្រហែលជាមានអារម្មណ៍ថាព្រះយេហូវ៉ាមិនឆាប់តបឆ្លើយសេចក្ដីអធិដ្ឋានរបស់យើងទេ។ ហេតុអ្វីព្រះយេហូវ៉ាមិនតែងតែតបឆ្លើយសេចក្ដីអធិដ្ឋានរបស់យើងភ្លាមៗ?
១០. ហេតុអ្វីយើងត្រូវរង់ចាំដោយចិត្តអត់ធ្មត់ឲ្យព្រះយេហូវ៉ាតបឆ្លើយសេចក្ដីអធិដ្ឋានរបស់យើង?
១០ ព្រះយេហូវ៉ាស្ដាប់សេចក្ដីអធិដ្ឋានរបស់យើងយ៉ាងយកចិត្តទុកដាក់។ (ចសព. ៦៥:២) លោកចាត់ទុកការអធិដ្ឋានដ៏ស្មោះរបស់យើងជាទីសំអាងដែលបញ្ជាក់ថាយើងមានជំនឿលើលោក។ (ហេ. ១១:៦) ព្រះយេហូវ៉ាក៏ចាប់អារម្មណ៍ចង់ដឹងថាយើងតាំងចិត្តរស់នៅសមស្របតាមសេចក្ដីអធិដ្ឋានរបស់យើង និងធ្វើតាមបំណងប្រាថ្នារបស់លោកខ្លាំងយ៉ាងណា។ (១យ៉ូន. ៣:២២) ដូច្នេះ យើងប្រហែលជាត្រូវបង្ហាញចិត្តអត់ធ្មត់ ហើយប្រព្រឹត្តស្របតាមសេចក្ដីអធិដ្ឋានរបស់យើង នៅពេលណាដែលយើងព្យាយាមយកឈ្នះទម្លាប់អាក្រក់ឬភាពទន់ខ្សោយណាមួយ។ លោកយេស៊ូបានជួយយើងឲ្យយល់ថាសេចក្ដីអធិដ្ឋានខ្លះរបស់យើងនឹងមិនទទួលចម្លើយភ្លាមៗទេ។ លោកបានមានប្រសាសន៍ថា៖ «ចូរសុំឥតឈប់ នោះអ្នកនឹងទទួល ចូររកឥតឈប់ នោះអ្នកនឹងរកឃើញ ចូរគោះទ្វារឥតឈប់ នោះទ្វារនឹងត្រូវបើកឲ្យ។ ពីព្រោះអស់អ្នកដែលសុំ នឹងទទួល ហើយអស់អ្នកដែលរក នឹងរកឃើញ ហើយចំពោះអស់អ្នកដែលគោះ ទ្វារនឹងត្រូវបើកឲ្យ»។ (ម៉ាថ. ៧:៧, ៨) ពេលយើងធ្វើតាមយោបល់នេះ ហើយ«តស៊ូអធិដ្ឋាន» យើងអាចជឿជាក់ថាបិតារបស់យើងនៅស្ថានសួគ៌ស្ដាប់យើង ហើយនឹងតបឆ្លើយចំពោះសេចក្ដីអធិដ្ឋានរបស់យើង។—កូឡ. ៤:២
កាលដែលយើងរង់ចាំព្រះយេហូវ៉ា យើងបន្តអធិដ្ឋានទៅលោកដោយមានជំនឿថាលោកនឹងតបឆ្លើយសេចក្ដីអធិដ្ឋានរបស់យើង (សូមមើលវគ្គ១១) *
១១. តើហេប្រឺ ៤:១៦ជួយយើងយ៉ាងណាពេលយើងមិនទទួលចម្លើយភ្លាមៗចំពោះសេចក្ដីអធិដ្ឋាន?
១១ ទោះជាព្រះយេហូវ៉ាតបឆ្លើយសេចក្ដីអធិដ្ឋានរបស់យើងយូរជាងយើងនឹកស្មានក្ដី លោកសន្យាថាលោកនឹងតបឆ្លើយនៅ«ពេលដែលយើងត្រូវការ»។ (សូមអាន ហេប្រឺ ៤:១៦) ហេតុនេះ យើងមិនត្រូវបន្ទោសព្រះយេហូវ៉ាទេ បើយើងមិនទទួលចម្លើយចំពោះសេចក្ដីអធិដ្ឋានឲ្យបានឆាប់ដូចដែលយើងនឹកស្មាន។ ជាឧទាហរណ៍ បងប្អូនជាច្រើនបានអធិដ្ឋានអស់ជាច្រើនឆ្នាំឲ្យរាជាណាចក្ររបស់ព្រះបំផ្លាញរបៀបរបបពិភពលោកនេះ។ លោកយេស៊ូថែមទាំងបានមានប្រសាសន៍ថាយើងគួរអធិដ្ឋានអំពីរឿងនេះ។ (ម៉ាថ. ៦:១០) ប៉ុន្តែ គឺជាការល្ងង់ខ្លៅដែលបុគ្គលណាម្នាក់ឲ្យជំនឿរបស់គាត់ទៅលើព្រះចុះខ្សោយ ដោយសារទីបញ្ចប់មិនបានមកដល់ដូចពេលដែលមនុស្សនឹកស្មាន! (ហាប. ២:៣; ម៉ាថ. ២៤:៤៤) គឺជាការឈ្លាសវៃឲ្យយើងបន្តរង់ចាំព្រះយេហូវ៉ា ហើយអធិដ្ឋានទៅលោកដោយមានជំនឿថាលោកនឹងតបឆ្លើយសេចក្ដីអធិដ្ឋានរបស់យើង។ ទីបញ្ចប់នឹងមកនៅពេលត្រឹមត្រូវ ដោយសារព្រះយេហូវ៉ាបានកំណត់«ថ្ងៃនិងម៉ោង»រួចហើយ។ ពេលនោះនឹងជាពេលដ៏ល្អបំផុតចំពោះបុគ្គលគ្រប់រូប។—ម៉ាថ. ២៤:៣៦; ២ពេ. ៣:១៥
តើយើងអាចរៀនអ្វីពីយ៉ូសែបអំពីចិត្តអត់ធ្មត់? (សូមមើលវគ្គ១២-១៤)
១២. តើយើងប្រហែលជាពិបាកមានចិត្តអត់ធ្មត់ជាពិសេសនៅពេលណា?
១២ យើងប្រហែលជាត្រូវការចិត្តអត់ធ្មត់ពេលរង់ចាំឲ្យមានយុត្តិធម៌។ មនុស្សក្នុងពិភពលោកនេះច្រើនតែធ្វើបាបពួកអ្នកដែលមានភេទផ្ទុយ ពូជសាសន៍ ជនជាតិ ឬវប្បធម៌ខុសពីខ្លួន។ អ្នកឯទៀតបានត្រូវគេធ្វើបាបដោយសារមានកាយសម្បទាមិនគ្រប់គ្រាន់ ឬបញ្ហាសតិអារម្មណ៍។ រាស្ត្ររបស់ព្រះយេហូវ៉ាជាច្រើននាក់បានរងអំពើអយុត្តិធម៌ ដោយសារជំនឿរបស់ពួកគេដែលមានមូលដ្ឋានលើគម្ពីរ។ ពេលយើងបានត្រូវគេធ្វើបាបបែបនេះ យើងត្រូវនឹកចាំអំពីប្រសាសន៍របស់លោកយេស៊ូ ដែលថា៖ «អ្នកណាដែលស៊ូទ្រាំរហូតដល់ទីបញ្ចប់ អ្នកនោះនឹងត្រូវសង្គ្រោះ»។ (ម៉ាថ. ២៤:១៣) ប៉ុន្តែ តើអ្នកគួរធ្វើអ្វី បើអ្នកស្រាប់តែដឹងថាបងប្អូនណាម្នាក់ក្នុងក្រុមជំនុំបានប្រព្រឹត្តអំពើខុសឆ្គងធ្ងន់ធ្ងរ? ក្រោយពីពួកអ្នកចាស់ទុំដឹងឮអំពីរឿងនោះ តើអ្នកនឹងបង្ហាញចិត្តអត់ធ្មត់ ហើយមានទំនុកចិត្តថាពួកគេនឹងដោះស្រាយរឿងនោះតាមរបៀបរបស់ព្រះយេហូវ៉ាឬទេ? តើអ្នកចាស់ទុំត្រូវធ្វើអ្វីពេលបុគ្គលណាម្នាក់ប្រព្រឹត្តអំពើខុសឆ្គងធ្ងន់ធ្ងរ?
១៣. តើការដោះស្រាយបញ្ហាតាមរបៀបរបស់ព្រះយេហូវ៉ារួមបញ្ចូលអ្វីខ្លះ?
១៣ ពេលពួកអ្នកចាស់ទុំដឹងថាបុគ្គលណាម្នាក់ក្នុងក្រុមជំនុំបានប្រព្រឹត្តអំពើខុសឆ្គងធ្ងន់ធ្ងរ ពួកគេអធិដ្ឋានសុំព្រះយេហូវ៉ាផ្ដល់«ប្រាជ្ញាពីស្ថានលើ» ដើម្បីពួកគេអាចមានទស្សនៈដូចលោកចំពោះរឿងនោះ។ (យ៉ា. ៣:១៧) គោលដៅរបស់ពួកគេគឺ«ជួយនាំអ្នកប្រព្រឹត្តអំពើខុសឆ្គងមកពីផ្លូវអាក្រក់វិញ» បើអាចធ្វើបាន។ (យ៉ា. ៥:១៩, ២០) ពួកគេក៏ចង់ខំប្រឹងអស់ពីសមត្ថភាពដើម្បីការពារក្រុមជំនុំនិងសម្រាលទុក្ខពួកអ្នកដែលរងទុក្ខ។ (២កូ. ១:៣, ៤) មុនដំបូង ពេលឮថាបងប្អូនណាម្នាក់ប្រព្រឹត្តអំពើខុសឆ្គងធ្ងន់ធ្ងរ ពួកអ្នកចាស់ទុំត្រូវស្វែងយល់អំពីហេតុការណ៍ពិត ហើយនេះប្រហែលជាត្រូវការមួយរយៈពេល។ បន្ទាប់មក ពួកគេអធិដ្ឋាននិងផ្ដល់ឱវាទយ៉ាងយកចិត្តទុកដាក់ពីបទគម្ពីរ ហើយកែតម្រង់បុគ្គលដែលប្រព្រឹត្តអំពើខុសឆ្គងនោះ«ដល់កម្រិតត្រឹមត្រូវ»។ (យេ. ៣០:១១) ទោះជាពួកអ្នកចាស់ទុំមិនបង្អែបង្អង់ក្ដី ពួកគេក៏មិនឆាប់វិនិច្ឆ័យអ្នកនោះដែរ។ ពេលពួកអ្នកចាស់ទុំធ្វើតាមការណែនាំពីព្រះយេហូវ៉ា ក្រុមជំនុំនឹងឃើញថានេះនាំឲ្យទាំងអស់គ្នាទទួលប្រយោជន៍ច្រើនបំផុត។ ប៉ុន្តែ ទោះជាពួកអ្នកចាស់ទុំធ្វើអ្វីៗតាមរបៀបត្រឹមត្រូវក្ដី ជនដែលគ្មានកំហុសប្រហែលជានៅតែឈឺចិត្ត។ បើអ្នកជួបរឿងបែបនេះ តើអ្នកអាចធ្វើអ្វីដើម្បីកាត់បន្ថយការឈឺចាប់?
១៤. តើគំរូអ្វីពីគម្ពីរអាចសម្រាលទុក្ខអ្នក បើអ្នកឈឺចិត្តខ្លាំងដោយសារគ្រិស្តសាសនិកម្នាក់ទៀត?
១៤ តើអ្នកធ្លាប់ឈឺចិត្តយ៉ាងខ្លាំងដោយសារបុគ្គលណាម្នាក់ មិនថាបុគ្គលនោះជាបងប្អូនរួមជំនឿឬទេ? អ្នកអាចរកឃើញគំរូដ៏ល្អក្នុងបណ្ដាំរបស់ព្រះដែលបង្រៀនយើងអំពីរបៀបរង់ចាំព្រះយេហូវ៉ាឲ្យរកយុត្តិធម៌។ ជាឧទាហរណ៍ ទោះជាយ៉ូសែបរងអំពើអយុត្តិធម៌ពីបងប្អូនរបស់គាត់ក្ដី គាត់មិនអនុញ្ញាតឲ្យអំពើខុសឆ្គងរបស់ពួកគេធ្វើឲ្យគាត់ខឹងឡើយ។ ផ្ទុយទៅវិញ គាត់បន្តផ្ដោតអារម្មណ៍ទៅលើការបម្រើព្រះយេហូវ៉ា ហើយលោកបានឲ្យពរគាត់ចំពោះការស៊ូទ្រាំយ៉ាងអត់ធ្មត់របស់គាត់។ (ដក. ៣៩:២១) យូរៗទៅ យ៉ូសែបអាចអភ័យទោសឲ្យពួកអ្នកដែលធ្វើឲ្យគាត់ឈឺចិត្ត ហើយយល់អំពីរបៀបដែលព្រះយេហូវ៉ាបានឲ្យពរគាត់។ (ដក. ៤៥:៥) ដូចយ៉ូសែប យើងទទួលការសម្រាលទុក្ខពេលយើងចូលទៅជិតព្រះយេហូវ៉ា ហើយទុកឲ្យព្រះយេហូវ៉ារកយុត្តិធម៌ឲ្យ។—ចសព. ៧:១៧; ៧៣:២៨
១៥. តើអ្វីបានជួយបងស្រីម្នាក់ឲ្យស៊ូទ្រាំនឹងអំពើអយុត្តិធម៌ដោយចិត្តអត់ធ្មត់ ហើយមានសេចក្ដីសុខសាន្ត?
១៥ មិនមែនអំពើអយុត្តិធម៌ទាំងអស់ធ្ងន់ធ្ងរដូចដែលយ៉ូសែបបានជួបទេ ប៉ុន្តែយើងទាំងអស់គ្នាឈឺចិត្តពេលគេប្រព្រឹត្តមិនល្អមកលើយើង។ ពេលយើងមានបញ្ហាជាមួយអ្នកណាម្នាក់ រួមទាំងជាមួយបុគ្គលដែលមិនមែនជាអ្នកគោរពប្រណិប័តន៍ព្រះយេហូវ៉ា យើងនឹងទទួលប្រយោជន៍បើយើងធ្វើតាមគោលការណ៍គម្ពីរ។ (ភី. ២:៣, ៤) សូមគិតអំពីបទពិសោធន៍មួយ។ បងស្រីម្នាក់ឈឺចិត្តយ៉ាងខ្លាំងពេលគាត់ដឹងថាអ្នករួមការងារម្នាក់និយាយមិនល្អនិងមិនពិតអំពីគាត់ប្រាប់អ្នកឯទៀត។ ជាជាងមានប្រតិកម្មលឿនពេក បងស្រីនោះលៃទុកពេលដើម្បីរំពឹងគិតអំពីគំរូរបស់លោកយេស៊ូ។ ពេលដែលលោកត្រូវគេប្រមាថ លោកមិនបានប្រមាថគេវិញទេ។ (១ពេ. ២:២១, ២៣) ដោយចាំអំពីចំណុចនេះ គាត់បានសម្រេចចិត្តមិនធ្វើអ្វីទេ។ បន្ទាប់មកគាត់បានដឹងថា អ្នករួមការងារនោះមានបញ្ហាសុខភាពធ្ងន់ធ្ងរ ហើយមានការតានតឹងចិត្តជាខ្លាំង។ យ៉ាងនេះ បងស្រីនោះសន្និដ្ឋានថាអ្នករួមការងារនោះទំនងជាគ្មានបំណងនិយាយដូច្នេះទេ។ ក្រោយមក បងស្រីយើងមានសេចក្ដីសុខសាន្តក្នុងចិត្ត ហើយគាត់ពិតជាសប្បាយដែលគាត់បានស៊ូទ្រាំយ៉ាងអត់ធ្មត់។
១៦. តើអ្វីអាចសម្រាលទុក្ខអ្នក បើអ្នកកំពុងរងអំពើអយុត្តិធម៌? (ពេត្រុសទី១ ៣:១២)
១៦ បើអ្នកកំពុងរងអំពើអយុត្តិធម៌ ឬឈឺចិត្តដោយសាររឿងផ្សេងទៀត សូមចាំថាព្រះយេហូវ៉ា«នៅជិតអ្នកដែលមានចិត្តខ្ទេចខ្ទាំ»។ (ចសព. ៣៤:១៨) លោកស្រឡាញ់អ្នកដោយសារអ្នកមានចិត្តអត់ធ្មត់និងបានផ្ទេរបន្ទុកទៅលោក។ (ចសព. ៥៥:២២) លោកគឺជាចៅក្រមនៃផែនដី ហើយលោកឃើញអ្វីៗទាំងអស់ដែលកើតឡើង។ (សូមអាន ពេត្រុសទី១ ៣:១២) ពេលអ្នកមានការពិបាកដែលអ្នកមិនអាចដោះស្រាយបាន តើអ្នកសុខចិត្តរង់ចាំលោកឬទេ?
ពួកអ្នកដែលរង់ចាំព្រះយេហូវ៉ានឹងទទួលពរជារៀងរហូត
១៧. នៅអេសាយ ៣០:១៨ តើព្រះយេហូវ៉ាបានសន្យាថាលោកនឹងធ្វើអ្វី?
១៧ មិនយូរទៀត បិតារបស់យើងនៅស្ថានសួគ៌ នឹងឲ្យពរជាបរិបូរដល់យើងតាមរយៈរាជាណាចក្រលោក។ អេសាយ ៣០:១៨ចែងថា៖ «ព្រះយេហូវ៉ាកំពុងរង់ចាំដោយចិត្តអត់ធ្មត់ដើម្បីបង្ហាញ ការពេញចិត្តដល់អ្នករាល់គ្នា ហើយលោកនឹងក្រោកឡើងដើម្បីបង្ហាញសេចក្ដីមេត្តាករុណា ចំពោះអ្នករាល់គ្នា។ ព្រោះព្រះយេហូវ៉ាជាព្រះនៃយុត្តិធម៌។ មានសុភមង្គលហើយ! អស់អ្នកដែលទន្ទឹងរង់ចាំលោកដោយចិត្តរំភើប»។ ពួកអ្នកដែលទន្ទឹងរង់ចាំព្រះយេហូវ៉ាដោយចិត្តរំភើបនឹងទទួលពរជាច្រើននៅឥឡូវនេះ និងនៅក្នុងពិភពលោកថ្មីដែលជិតមកដល់។
១៨. តើយើងនឹងទទួលពរអ្វីខ្លះ?
១៨ ពេលរាស្ត្ររបស់ព្រះចូលក្នុងពិភពលោកថ្មី ពួកគេនឹងលែងមានទុក្ខកង្វល់និងការពិបាកដែលពួកគេត្រូវប្រឈមមុខនៅសព្វថ្ងៃនេះទៀតហើយ។ អំពើអយុត្តិធម៌នឹងលែងមានទៀត ហើយការឈឺចាប់ក៏នឹងលែងមានទៀតដែរ។ (បប. ២១:៤) យើងនឹងមិនចាំបាច់ខ្វល់ខ្វាយអំពីអ្វីដែលយើងត្រូវការ ដោយសារយើងនឹងមានអ្វីៗជាបរិបូរ។ (ចសព. ៧២:១៦; អេ. ៥៤:១៣) នោះពិតជាពរដ៏អស្ចារ្យមែន!
១៩. តើព្រះយេហូវ៉ាជួយយើងឲ្យត្រៀមខ្លួនបន្តិចម្ដងៗនៅឥឡូវនេះចំពោះអ្វី?
១៩ រហូតដល់ពេលនោះ រាល់ដងដែលយើងយកឈ្នះទម្លាប់អាក្រក់ណាមួយ ហើយរាល់ដងដែលយើងបណ្ដុះឲ្យមានគុណសម្បត្តិដូចព្រះយេហូវ៉ា គឺសឲ្យឃើញថាលោកកំពុងជួយយើងឲ្យត្រៀមខ្លួនដើម្បីរស់នៅក្រោមការគ្រប់គ្រងរបស់លោក។ របៀបរស់នៅដ៏ល្អប្រសើរគឺជិតមកដល់ហើយ! ដូច្នេះសូមកុំធ្លាក់ទឹកចិត្ត និងកុំឈប់ព្យាយាមឡើយ។ ដោយគិតដល់អនាគតដ៏អស្ចារ្យនៅខាងមុខនេះ សូមយើងសុខចិត្តបន្តទន្ទឹងរង់ចាំព្រះយេហូវ៉ាដោយចិត្តអត់ធ្មត់ កាលដែលលោកបង្ហើយកិច្ចការរបស់លោក!
ចម្រៀងលេខ១១៨ «សូមផ្ដល់ជំនឿមកយើងថែមទៀត»
^ វគ្គ 5 តើអ្នកធ្លាប់ឮបុគ្គលដែលបានបម្រើព្រះយេហូវ៉ាអស់ជាច្រើនឆ្នាំនិយាយថា ‹ខ្ញុំមិននឹកស្មានថាខ្ញុំចាស់ប៉ុណ្ណេះ ហើយនៅតែមានពិភពលោកអាក្រក់នេះទៀត› ឬទេ? ជាពិសេសនៅគ្រាដ៏ពិបាកដែលយើងកំពុងរស់នៅ យើងទាំងអស់គ្នាចង់ឲ្យព្រះយេហូវ៉ាបំបាត់ចោលពិភពលោកដ៏អាក្រក់នេះ។ ប៉ុន្តែយើងត្រូវរៀនឲ្យមានចិត្តអត់ធ្មត់។ ក្នុងអត្ថបទនេះ យើងនឹងមើលគោលការណ៍គម្ពីរខ្លះដែលអាចជួយយើងឲ្យចេះរង់ចាំដោយចិត្តអត់ធ្មត់។ យើងក៏នឹងពិចារណាអំពីស្ថានភាពពីរដែលយើងត្រូវរង់ចាំព្រះយេហូវ៉ាដោយចិត្តអត់ធ្មត់។ ក្រោយមក យើងនឹងពិចារណាអំពីពរដែលពួកអ្នកដែលសុខចិត្តរង់ចាំនឹងទទួល។
^ វគ្គ 56 ការពណ៌នាអំពីរូបភាព: តាំងពីនៅតូច បងស្រីម្នាក់អធិដ្ឋានទៅព្រះយេហូវ៉ាជារឿយៗ។ ពេលគាត់នៅតូច ឪពុកម្ដាយគាត់បានបង្រៀនគាត់អំពីរបៀបអធិដ្ឋាន។ កាលដែលគាត់វ័យជំទង់ គាត់ចាប់ផ្ដើមបម្រើជាអ្នកត្រួសត្រាយ ហើយច្រើនតែសុំព្រះយេហូវ៉ាឲ្យពរទៅលើកិច្ចបម្រើផ្សាយរបស់គាត់។ ច្រើនឆ្នាំក្រោយមក ពេលប្ដីរបស់គាត់ធ្លាក់ខ្លួនឈឺធ្ងន់ គាត់អង្វរសុំកម្លាំងដែលគាត់ត្រូវការពីព្រះយេហូវ៉ាដើម្បីស៊ូទ្រាំនឹងទុក្ខលំបាកនោះ។ សព្វថ្ងៃនេះ គាត់ជាស្ត្រីមេម៉ាយដែលតស៊ូក្នុងសេចក្ដីអធិដ្ឋាន។ គាត់មានទំនុកចិត្តថា ព្រះយេហូវ៉ានឹងបន្តតបឆ្លើយសេចក្ដីអធិដ្ឋានរបស់គាត់ ដូចដែលលោកបានធ្វើកន្លងមកក្នុងជីវិតរបស់គាត់។
