1-2. Ве готареда, әме дәрһәԛа чь хәбәр дьн?

ГАВА тьштәки кӧ тә бь онлайне кʹьрʹибу ԝәʹдәда нагьһижә тә, гәло тӧ әʹщьз наби? Мәтʹәлок 13:12-да те готьне: «Гӧмана кӧ дәрәнги дьбә, дьл дешинә». Ле һәгәр тӧ пебьһʹәсийайи, ԝәки әв тьшт жь бо һьнә мәʹнийед фәрз дәрәнги дькʹәвә, тӧйе дьбәкә бь сәбьр һивийе буйайи.

² Ве готареда, әме дина хԝә бьдьн чәнд принсипед Кʹьтеба Пироз, йед кӧ ԝе али мә бькьн бь сәбьр «һивийа Хԝәде» бьн (Миха 7:7, ДТʹ). Паше, әме дина хԝә бьдьн дӧ дәрәща, кʹижанада әм гәрәке бь сәбьр һивийе бьн һʹәта кӧ Йаһоԝа тьштәки бькә. Ӧса жи әме бьвиньн чь кʹәрәма ԝе бьстиньн әԝед кӧ бь сәбьр һивийа Йаһоԝа дьсәкьньн.

3. Принсипа жь Мәтʹәлок 13:11 чь мә һин дькә?

³ Мәтʹәлок 13:11 рʹьнд нишан дькә, ԝәки чьма фәрз ә сәбьр бькьн. Ԝедәре те готьне: «Һәбука һʹәрамийе һати, һʹәрамийе жи дьчә, ле бь худана һʹәлал кʹәдкьри ԝе зедә бә». Гәло тӧ принсипа ве рʹезе фәʹм дьки? Мәрьве билан, ԝе бь сәбьр һәр тьшти һеди-һеди бинә сери у ԝе пешдачуйи бә.

4. Принсипа жь Мәтʹәлок 4:18 чь нишан дькә?

⁴ Ӧса жи, Мәтʹәлок 4:18 ӧса дьбежә: «Рʹийа рʹаста мина рʹонайийа бәрбанге йә, кӧ һеди-һеди дәрте, һʹәта кӧ тʹәмамийа рʹоже рʹонайи дьбә». Готьнед ве  рʹезе нишан дькьн, ԝәки Йаһоԝа нета хԝә чаԝа гав пәй гав зәлал дькә. Дькарьн бежьн ԝәки принсипа ве рʹезе ӧса жи дәрһәԛа ԝан хьзмәткʹара йә, йед кӧ гав пәй гав рʹӧһʹанида пешда дьчьн. Бәле, бона пешдачуйина рʹӧһʹани, ԝәхт лазьм ә. Һәгәр әм бь хирәт леколине бькьн у ширәтед Хәбәра Хԝәде у тʹәшкиләта ԝи жийина хԝәда биньн сери, хәйсәт-һʹӧнӧред мә ԝе һеди-һеди мина йед Иса бьн. Ӧса жи, әме Хԝәде дьһа баш нас бькьн. Ԝәрә әм дина хԝә бьдьн Иса дәрһәԛа ве йәке чь гот.

5. Мәсәла Иса дәрһәԛа тʹохьме, чь мә һин дькә?

⁵ Иса мьзгинийа Пʹадшатийе бәрамбәри тʹохьмәки кьр, йе кӧ дьле кәсед дьлсахда һеди-һеди мәзьн дьбә. Әԝи гот: «Тʹохьм шин дьбә, бьльнд дьбә у хԝәха [тʹохьмрʹәш] пе наһʹәсә кӧ әв чаԝа дьбә. Әʹрд жь хԝә бәр дьдә, пешийе зил, паше сьмбьл, пәйрʹа жи гәньме гьһишти сьмбьлда» (Марԛос 4:27, 28). Гәло Иса чь дьхԝәст бьгота? Әԝи дьхԝәст бьгота ԝәки һәма чаԝа гәньм һеди-һеди мәзьн дьбә, ӧса жи мәрьве кӧ мьзгине ԛәбул дькә, рʹӧһʹанида һеди-һеди пешда дьчә. Мәсәлә, чьԛас хԝәндәкʹаред мә дьһа незики Йаһоԝа дьбьн, һаԛас әм дьвиньн ԝәки әԝана алийе башда тенә гӧһастьне (Әфәси 4:22-24). Ле йәкә гәрәке әм бир нәкьн ԝәки йе кӧ тʹохьм мәзьн дькә, Йаһоԝа йә (1 Корьнтʹи 3:7).

6-7. Жь ве йәке кӧ Йаһоԝа чаԝа әʹрд чекьр, әм чь дькарьн һин бьн?

⁶ Йаһоԝа һʹәму шьхӧлед хԝә бь сәбьр тинә сери, фьрԛи тʹӧнә бона ве йәке чьԛас ԝәʹдә лазьм бә жи. Әԝ ве йәке һьм бона пирозкьрьна наве хԝә, һьм жи бона ԛәнщийа мәрьва дькә. Ԝәрен әм дина хԝә бьдьнә ве йәке, кӧ чаԝа Йаһоԝа гав пәй гав әʹрд бона мәрьва һазьр дькьр.

⁷ Кʹьтеба Пироз дьбежә кӧ гава Йаһоԝа Әʹрд әʹфьранд, әԝи «пиванед ԝе», «бьнгәһед ԝе» у «кәвьре ԝе» дани  (Ибо 38:5, 6). Йаһоԝа һәла һе ԝәʹдә вәдьԛәтанд, ԝәки сәр кьред дәсте хԝә бьньһерʹә (Дәстпебун 1:10, 12). Бинә бәр чʹәʹве хԝә мәләк чьԛас ша дьбун гава Йаһоԝа тьштәки тʹәзә чедькьр. Кʹьтеба Пироз дьбежә ԝәки ԝана бь шабуне ‹банг дькьр› (Ибо 38:7). Әԝ йәк чь мә һин дькә? Бь һʹәзара сал лазьм бун ԝәки Йаһоԝа әʹфьрандьне хьлаз кә, у гава Йаһоԝа сәр һʹәму кʹаред дәсте хԝә ньһерʹи, әԝи гот кӧ «әԝ гәләки ԛәнщ бун» (Дәстпебун 1:31).

8. Әме ньһа дина хԝә бьдьнә чь?

⁸ Чаԝа кӧ мә жь ван мәсәла дит, гәләк принсипед Кʹьтеба Пироз нишан дькьн ԝәки фәрз ә әм сәбьр бькьн. Ньһа әме дина хԝә бьдьн дӧ дәрәща, кʹижанада әм гәрәке бь сәбьр һивийа Йаһоԝа бьсәкьньн.

9. Чьчах лазьм ә, ԝәки әм һивийа Йаһоԝа бьсәкьньн?

⁹ Дькарә лазьм бә, ԝәки әм һивийа щаба дӧайед хԝә бьн. Гава әм Йаһоԝарʹа дӧа дькьн, ԝәки әԝ ԛәԝате бьдә мә сәва кӧ сәри бь тәнгасикирʹа дәрхьн йан сәва кӧ әм кемасикә хԝә алт кьн, әм дьбәкә хәмгин дьбьн кӧ чьма щаб дәрәнги дькʹәвә. Гәло Йаһоԝа чьрʹа дәрберʹа щаба һʹәму дӧайед мә надә?

10. Гава әм Йаһоԝарʹа дӧа дькьн, чьма гәрәке әм бь сәбьр бьн?

¹⁰ Йаһоԝа рʹьнд гӧһ дьдә дӧайед мә (Зәбур 65:2). Чахе әм жь дьл дӧа дькьн, әԝ дьвинә ԝәки әм бь рʹасти баԝәрийа хԝә ԝи тиньн (Ибрани 11:6). Гава әм дӧа дькьн, Йаһоԝа дьхԝазә бьвинә һәла әм ль гора дӧайе хԝә һәр тьшт дькьн у хирәт дькьн, ԝәки ԛьрара ԝи биньн сери, йан на (1 Йуһʹәнна 3:22). Мәсәлә, гава әм дьхԝазьн тʹәрка хәйсәтәки хьраб йан сьстбунәке бьдьн, ԝе мәрʹа лазьм бә бь сәбьр чь жь дәсте мә те бькьн, ԝәки сәркʹәвьн. Жь ве готьна Иса, әм фәʹм дькьн ԝәки щаба һьнә дӧайед хԝә әме дәрберʹа нәстиньн: «Бьхԝазьн һуне бьстиньн, бьгәрʹьн һуне бьбиньн, дәри хьн ԝе бәр ԝә вәбә. Чьмки кʹи кӧ дьхԝазә дьстинә, кʹи кӧ дьгәрʹә дьбинә у кʹи кӧ дәри дьхә бәр вәдьбә» (Мәтта 7:7, 8). Әм дькарьн баԝәр бьн, кӧ һәгәр әм гӧһ бьдьн ве ширәте у «һәр гав» дӧа бькьн, Баве мәйи әʹзмана ԝе мә бьбьһе у щаба дӧайед мә бьдә (Колоси 4:2).

11. Һәгәр әм дьфькьрьн кӧ щаба дӧайе мә дәрәнги дькʹәвә, Ибрани 4:16 чаԝа дькарә али мә бькә?

¹¹ Щарна, әм дьбәкә дьфькьрьн ԝәки щаба дӧайе мә дәрәнги дькʹәвә. Ле Йаһоԝа соз дайә, ԝәки әԝе ԝәхтда, демәк «гава әм һʹәԝщә бьн» щаба дӧайе мә бьдә (Ибрани 4:16 бьхунә). Ләма, һәгәр хԝәстьна мә зу нәйе сери жи, гәрәке әм тʹӧ щар нәфькьрьн, ԝәки Йаһоԝа пьшта хԝә дайә мә. Мәсәлә, гәләк кәс бь сала дӧа дькьн, ԝәки Пʹадшатийа Хԝәде бе у ве система хьраб кʹӧта кә. Иса жи дьгот, ԝәки әм гәрәке бона ве йәке дӧа бькьн (Мәтта 6:10). Һәгәр кәсәк баԝәрийа хԝә ӧнда кә жь бо ве йәке кӧ ль гора ньһерʹандьна ԝи хьлазийа дьнйайе ԝәхтда нәһатийә, әв йәк чь беаԛьлайи йә! (Һәбаԛуԛ 2:3; Мәтта 24:44) Ԝе баш бә әм бәрдәԝам кьн һивийа Йаһоԝа бьн у баԝәр бьн ԝәки әԝе щаба дӧайед мә бьдә. Хьлазийа дьнйайе ԝе ԝәхте хԝәда бе, чьмки Йаһоԝа «ԝе рʹоже у ԝе сьһʹәте» ида кʹьфш кьрийә. У әԝ рʹож ԝе бона һәр кәси ԝәхта һәри баш бә (Мәтта 24:36; 2 Пәтрус 3:15).

12. Сәбра мә кʹижан дәрәщеда дькарә бе щерʹьбандьне?

 ¹² Дьбәкә лазьм ә, ԝәки әм һьмбәри нәһәԛийе сәбьр кьн, һʹәта әв бе сафикьрьне. Мәрьвед ве дьнйайе гәләк щар кәсед дьн жь бо бәрәк, мьләт, култур у әʹдәтед ԝан ньмьз дькьн. Һьнә кәс жи сәва нәхԝәшийед хԝәйә физики йан психики тен беһӧрмәткьрьне. Гәләк Шәʹдед Йаһоԝа жи сәва баԝәрийа хԝә рʹасти нәһәԛийе тен. Дәрәщед ӧсада, гәрәке әм ван готьнед Иса биньн бира хԝә: «Кʹи кӧ һʹәта хьлазийе тәйах кә, әԝе хьлаз бә» (Мәтта 24:13). Ле һәгәр тӧ пебьһʹәси, ԝәки хушк йан бьраки гӧнәки гьран кьрийә, гәрәке тӧ чь бьки? Әԝ йәк рʹуспийарʹа гәрәке бе готьне. Ле паше, лазьм ә бь сәбьр һивийе би у баԝәр би, ԝәки әԝана әве дәрәще ԝе ль гора рʹебәрийа Йаһоԝа сафи кьн. Гәло рʹуспи дәрәщед ӧса чь щурʹәйи сафи дькьн?

13. Гава кәсәк гӧнәки гьран дькә, рʹуспи чь дькьн?

¹³ Гава рʹуспи педьһʹәсьн, ԝәки хушк йан бьраки гӧнәки гьран кьрийә, әԝана дӧа дькьн, кӧ Йаһоԝа биланийе бьдә ԝан сәр ве дәрәще бь чʹәʹве ԝи бьньһерʹьн (Аԛуб 3:17). Нета ԝан әв ә, ԝәки али кәсе гӧнәкʹар бькьн жь рʹийа шаш вәгәрʹә (Аԛуб 5:19, 20). Ӧса жи, әԝана чь жь дәсте ԝан те дькьн, ԝәки щьвате бьпарезьн у бәрдьлийе бьдьн ԝан кәса, йед кӧ жь ве дәрәще зьрар стандьнә (2 Корьнтʹи 1:3, 4). Чахе рʹуспи дәрәщед ӧса леколин дькьн, бәри пешьн лазьм ә, ԝәки әԝана пебьһʹәсьн кӧ бь рʹасти чь ԛәԝьмийә, у бона ве йәке ԝәʹдә лазьм ә. Әԝана дӧа дькьн, у бь нәрми сәр һʹиме Кʹьтеба Пироз ширәте дьдьн кәсе гӧнәкʹар, у паше бь һәԛи ԝи ширәт у рʹаст дькьн (Йерәмйа 30:11). Рʹаст ә рʹуспийед щьвате сафикьрьна ве дәрәще паш нахьн, ле диса жи әԝана ләзә-ләз диԝана ԝи кәси накьн. Гава әв дәрәщә рʹаст у һәԛ те сафикьрьне, әв йәк щьватерʹа кʹарәкә мәзьн тинә. Ле дьԛәԝьмә паши ве сафикьрьне жи, еша дьле кәсе кӧ зьрар стандийә диса жи сьвьк нәбә. Һәрге тӧ ԝи һʹалида ни, тӧ дькари чь бьки, ԝәки еша дьле хԝә сьвьк ки?

14. Һәгәр хушк йан бьраки нәһәԛи мә кьрийә, кʹижан сәрһатийа жь Кʹьтеба Пироз дькарә дьле мә рʹьһʹәт кә?

 ¹⁴ Гәло хушк йан бьраки ԛә нәһәԛи тә кьрийә у дьле тә бьриндар кьрийә? Һьнә сәрһатийед жь Кʹьтеба Пироз нишани мә дькьн, ԝәки әм ча гәрәке һивийа Йаһоԝа бьсәкьньн, һʹәта кӧ әԝ ве дәрәще сафи кә. Мәсәлә, Усьв жь бьред хԝә рʹасти нәһәԛийе һат. Ле диса жи, әԝ сәва гӧнед ԝан нәбу йәки сәрт у һерс, ле бәрдәԝам дькьр дина хԝә бьдә достийа хԝә тʹәви Йаһоԝа. Хьлазийе, Йаһоԝа сәбра ԝи хәлат кьр (Дәстпебун 39:21). Ԝәʹдә шунда Усьв бахшандә бьред хԝә у дит, ԝәки Йаһоԝа ча ԝи кʹәрәм кьр (Дәстпебун 45:5). Мина Усьв, һәгәр әм незики Йаһоԝа бьн у баԝәр бьн кӧ әԝе ԝәхта рʹастда ве дәрәще сафи кә, дьле мә ԝе рʹьһʹәт бә (Зәбур 7:17; 73:28).

15. Чь али хушкәке кьр һьмбәри нәһәԛийе сәбьр кә?

¹⁵ Рʹаст ә һәр нәһәԛи, ԛаси нәһәԛийа кӧ һатьбу сәре Усьв, мәзьн нинә, йәкә һьнә готьн у кьред кәсед дьн дькарьн дьле мә бешиньн. Гава ортʹа мә у кәсәки дьнда проблем чедьбә, фьрԛи тʹӧнә әв кәс Шәʹде Йаһоԝа бә йан на, ԝе баш бә әм принсипед Кʹьтеба Пироз бьдьн хәбате (Филипи 2:3, 4). Ԝәрә әм дәрәщәкә ӧса биньн бәр чʹәʹве хԝә. Хушкәк бьһист, ԝәки һәвалхәбатчикә ԝе әԝ бәр чʹәʹве кәсед дьн рʹәш дькә, у әԝ гәләк хәмгин бу. Диса жи, хушка мә дәрберʹа щаба ԝе нәда, ле сәр мәсәла Иса фькьри. Гава Иса «дьһатә рʹәзилкьрьне, жь бәрва кәс рʹәзил нәдькьр» (1 Пәтрус 2:21, 23). Ләма жи, хушка мә сафи кьр ве проблеме мәзьн нәкә у бир бькә. Ле паше әԝ пеһʹәсийа, ԝәки һәвалхәбатчийа ԝе гьран нәхԝәш ә у стресәкә мәзьн дькʹьшинә. Хушка мә фәʹм кьр, кӧ һәвалхәбатчийа ԝе дьле ԝе беһʹәмде хԝә ешанд. Хушка мә ша бу, ԝәки әԝе һьмбәри нәһәԛийе сәбьр кьр, у әʹдьлайи кʹәтә дьле ԝе.

16. Һәгәр тӧ рʹасти нәһәԛийе тейи, чь дькарә дьле тә рʹьһʹәт кә? (1 Пәтрус 3:12).

¹⁶ Һәгәр дьле тә жи ешандьнә йан тӧ рʹасти нәһәԛийе һати, бир нәкә ԝәки Йаһоԝа «незики дьлшкәстийа йә» (Зәбур  34:18). Әԝ тә һʹьз дькә у әԝ ша дьбә чахе тӧ сәбьр дьки у баре хԝә дьди дәсте ԝи (Зәбур 55:22). Әԝ Һʹакьме дьнйайе йә, у әԝ һәр тьшти дьвинә (1 Пәтрус 3:12 бьхунә). Гава тӧ рʹасти проблема тейи у нькари чʹарәке бьвини, гәло тӧйе һивийе би һʹәта кӧ Йаһоԝа проблема тә сафи кә?

17. Ль гора Ишайа 30:18, Йаһоԝа чь соз дьдә мә?

¹⁷ Зутьрәке Баве мәйи әʹзмана ԝе бь сайа Пʹадшатийа хԝә кʹәрәма сәр мәда бьбаринә. Ишайа 30:18 ӧса дьбежә: «Йаһоԝа бь сәбьр һивийе йә, ԝәки ԛәбулкьрьна хԝә ԝәрʹа нишан кә, у әԝ ԝе рʹабә сәва кӧ рʹәʹма хԝә ԝәрʹа бьдә кʹьфше. Чьмки Йаһоԝа Хԝәдейе һәԛийе йә. Һʹәмушк кӧ һивийа ԝи нә бәхтәԝар ьн», ДТʹ. Кәсед кӧ һивийа Йаһоԝа нә, ԝе һьм ньһа һьм жи дьнйа тʹәзәда гәләк кʹәрәма бьстиньн.

18. Әм һивийа кʹижан кʹәрәма нә?

¹⁸ Чахе хьзмәткʹаред Хԝәде бькʹәвьнә дьнйа тʹәзә, әԝана ԝе жь кӧл-дәрдед иройин хьлаз бьн. Нәһәԛи у еш ԝе ида дәрбаз бьн (Әʹйанти 21:4). Әме ида бона тʹӧ тьшти хәма нәкьн, чьмки һәр тьшт ԝе тʹер-тʹьжә бә (Зәбур 72:16; Ишайа 54:13). Кʹәрәмәкә чьԛас мәзьн һивийа мә йә!

19. Йаһоԝа мә бона чь һазьр дькә?

¹⁹ Йаһоԝа али мә дькә тʹәрка хәйсәтед хьраб бьдьн у һʹӧнӧред баш пешда биньн, у бь ԝе йәке мә бона жийина бьн сәрԝертийа хԝәда һазьр дькә. Мерхасийа хԝә ӧнда нәкә у нәԝәстә. Рʹожед хԝәш незик ьн! Ләма жи ԝәрен әм бь сәбьр һивийа Йаһоԝа бьн, һʹәта кӧ әԝ ԛьрара хԝә бинә сери!