1-2. Wetin wi go tɔk bɔt insay dis atikul?

IMAJIN se yu de ɛkspɛkt wan pan yu padi dɛn fɔ briŋ sɔntin fɔ yu we yu rili nid. Aw yu go fil if i nɔ kam di tɛm we yu de ɛkspɛkt am? Yu at go pwɛl? Prɔvabs 13:12 se: “Drɛg fut pan prɔmis de gi brok at.” Bɔt aw yu go fil we yu yɛri se gud rizin dɛn de we mek yu padi nɔ ebul fɔ kam di tɛm we yu bin de ɛkspɛkt am? If dat apin, yu go want fɔ peshɛnt ɛn rɛdi fɔ wet.

² Insay dis atikul, wi go tɔk bɔt sɔm Baybul prinsipul dɛn we go ɛp wi fɔ bi pɔsin we de “wet.” (Mayk. 7:7, NWT) Wi go tɔk bak bɔt tu eria dɛn we wi nid fɔ peshɛnt wet fɔ Jiova. Dɔn, wi go tɔk bɔt di gud tin dɛn we Jiova dɔn prɔmis fɔ du fɔ di wan dɛn we rɛdi fɔ wet.

3. Wetin Prɔvabs 13:11 (NWT) de tich wi?

³ Prɔvabs 13:11 (NWT) de tich wi wetin mek wi fɔ peshɛnt. I se: “Jɛntri we pɔsin gɛt kwik kwik wan de go lɛk briz, bɔt jɛntri we pɔsin gɛda smɔl smɔl go ad mɔ ɛn mɔ.” Wetin wi lan frɔm dis vas? Pɔsin we gɛt sɛns de tek tɛm ɛn peshɛnt du tin, ɛn i go gɛt di bɛst rizɔlt.

4. Wetin Prɔvabs 4:18 de tich wi?

⁴ Prɔvabs 4:18 se: “Di rod we pɔsin we de waka tret na PAPA GƆD in yay de waka tan lɛk we san de grap, we i de shayn brayt brayt wan te di ples klia.” Dis vas sho klia wan se na smɔl smɔl Jiova de ɛp in pipul dɛn fɔ ɔndastand wetin i want. Dis vas de ɛp wi bak fɔ ɔndastand aw Kristian de mek chenj dɛn na in layf ɛn  kam nia Jiova. I kin tek tɛm fɔ mek pɔsin kam nia Jiova. If wi tek tɛm stɔdi ɛn fala di advays dɛn we wi de gɛt frɔm Gɔd in Wɔd ɛn in ɔganayzeshɔn, smɔl smɔl wi go ebul fɔ gɛt di kwaliti dɛn we Krays gɛt. Dɔn bak, wi go no Gɔd gud gud wan. Lɛ wi tɔk bɔt di ɛgzampul we Jizɔs bin yuz fɔ ɛksplen da pɔynt de.

5. Us ɛgzampul Jizɔs yuz fɔ sho se na smɔl smɔl pɔsin kin mek chenj na in layf?

⁵ Jizɔs bin yuz wan ɛgzampul fɔ ɛksplen aw di Kiŋdɔm mɛsej we wi de prich tan lɛk sid we de gro smɔl smɔl insay pipul dɛn we lɛk fɔ du wetin rayt dɛn at. I bin se: “Di sid bɔs ɛn gro, bɔt i [di fama] nɔ no aw dat apin. Na smɔl smɔl di grɔn de bia frut bay insɛf. Di smɔl tik we jɔyn di lif to di plant na in fɔs kin sho, dɔn di ed, ɛn leta di sid we de insay we dɔn rɛp.” (Mak 4:27, 28) Wetin Jizɔs bin min? I bin de ɛksplen se jɔs lɛk aw plant kin gro smɔl smɔl, na so pɔsin we biliv di Kiŋdɔm mɛsej de go bifo pan Gɔd biznɛs smɔl smɔl. Fɔ ɛgzampul, we wi Baybul studɛnt dɛn de kam nia Jiova, wi kin bigin fɔ si di bɔku fayn chenj dɛn we dɛn dɔn mek na dɛn layf. (Ɛfi. 4:22-24) Bɔt wi fɔ mɛmba se na Jiova de mek da smɔl sid de gro.—1 Kɔr. 3:7.

6-7. Wetin wi lan frɔm di we aw Jiova mek di wɔl?

⁶ We Jiova de du ɛni wok, i kin peshɛnt ɛn yuz ɔl di tɛm we i nid fɔ dɔn da wok de. I kin du dat fɔ briŋ prez to in nem ɛn fɔ ɛp ɔda pipul dɛn. Fɔ ɛgzampul, lɛ wi tɔk bɔt di we aw Jiova bin mek di wɔl smɔl smɔl fɔ mɔtalman.

⁷ We di Baybul de tɔk bɔt aw Jiova bin mek di wɔl, i se Jiova bin ‘disayd aw di wɔl fɔ big lɛk,’ ‘wetin di bɔtɔm we ol di pila dɛn na di ath tinap pan,’ ɛn i bin “le di fawndeshɔn ston.” (Job 38:5, 6) I bin de ivin tek tɛm fɔ wach  di wok we i du. (Jɛn. 1:10, 12) Imajin aw di enjɛl dɛn go dɔn fil we dɛn bin de si ɔl di nyu tin dɛn we Jiova bin de mek. Dat go dɔn mek dɛn rili gladi! Infakt, tɛm bin de we dɛn bin stat fɔ ‘ala wit gladi-at.’ (Job 38:7) Wetin wi lan? Wɛl, i bin tek lɔng lɔng tɛm fɔ lɛ Jiova mek di wɔl, di sta dɛn, ɛn ɔl di tin dɛn we gɛt layf, bɔt we Jiova luk ɔl di tin dɛn we i bin dɔn tek tɛm mek, i se dɛn “gud ɛn fayn.”—Jɛn. 1:31.

8. Wetin wi de kam tɔk bɔt?

⁸ Dɛn ɛgzampul dɛn ya dɔn sho wi se bɔku prinsipul dɛn de na Gɔd in Wɔd we de tich wi se wi nid fɔ peshɛnt. Naw, wi go tɔk bɔt tu eria dɛn we wi fɔ rɛdi fɔ wet fɔ Jiova.

9. Wetin na wan eria we wi nid fɔ wet fɔ Jiova?

⁹Sɔntɛm wi go nid fɔ wet fɔ mek Jiova ansa wi prea dɛn. We wi pre fɔ trɛnk fɔ bia wi prɔblɛm dɛn ɔ fɔ mek Jiova ɛp wi fɔ stɔp fɔ du sɔntin we i nɔ lɛk, sɔntɛm wi go fil se Jiova de tek lɔng tɛm fɔ ansa wi prea dɛn. Wetin mek Jiova nɔ de ansa ɔl wi prea dɛn wantɛm wantɛm?

10. Wetin mek wi fɔ peshɛnt wet fɔ lɛ Jiova ansa wi prea dɛn?

¹⁰ Jiova de tek tɛm lisin to wi prea dɛn. (Sam 65:2) I de si se wi prea dɛn we de kɔmɔt frɔm wi at de sho se wi gɛt fet pan am. (Ibru. 11:6) Dɔn bak, we wi pre to Jiova fɔ mek i ɛp wi fɔ du wetin go mek i gladi, i kin want fɔ si se wi rɛdi fɔ tray tranga wan fɔ du wetin i want. (1 Jɔn 3:22) So we wi pre to Jiova fɔ ɛp wi mek wi lɛf fɔ du sɔntin we i nɔ lɛk, sɔntɛm wi go nid fɔ peshɛnt ɛn du ɔl wetin wi ebul fɔ chenj. Jizɔs bin ɛp wi fɔ ɔndastand se sɔntɛm Jiova nɔ go ansa sɔm pan wi prea dɛn wantɛm wantɛm. I bin se “Una kɔntinyu fɔ aks ɛn una go gɛt wetin una de aks fɔ; una kɔntinyu fɔ luk, ɛn una go fɛn; una kɔntinyu fɔ nak, ɛn di domɔt go opin; bikɔs ɛnibɔdi we de aks go gɛt wetin i de aks fɔ, ɛn ɛnibɔdi we de luk go fɛn, ɛn ɛnibɔdi we de nak, di domɔt go opin fɔ am.” (Mat. 7:7, 8) So we wi fala dis advays ɛn we wi “nɔ taya fɔ pre,” wi shɔ se wi Papa we de na ɛvin go yɛri wi ɛn ansa wi prea dɛn.—Kol. 4:2.

11. Aw Ibruz 4:16 de ɛp wi we i tan lɛk se Jiova de dile fɔ ansa wi prea?

¹¹ Pan ɔl we i go tan lɛk se Jiova de dile fɔ ansa wi prea, i prɔmis wi se i go ansa wi “di rayt tɛm.” (Rid Ibruz 4:16.) Na dat mek wi nɔ fɔ ɛva blem Jiova if sɔntin nɔ apin di tɛm we wi tink se i fɔ apin. Fɔ ɛgzampul, fɔ lɔng tɛm naw, bɔku pipul dɛn dɔn de pre fɔ lɛ dɛn si we Gɔd in Kiŋdɔm de dɔnawe wit dis wikɛd wɔl. Jizɔs bin ivin se wi fɔ pre fɔ dat. (Mat. 6:10) Bɔt i nɔ go mek sɛns atɔl fɔ lɛ pɔsin lɛf fɔ gɛt fet pan Gɔd jɔs bikɔs di ɛnd nɔ kam di tɛm we mɔtalman tink se i fɔ kam! (Aba. 2:3; Mat. 24:44) Wi go sho se wi gɛt sɛns if wi kɔntinyu fɔ wet fɔ Jiova ɛn gɛt fet se i go ansa wi prea dɛn. Di ɛnd go kam di rayt tɛm, bikɔs Jiova dɔn ɔlrɛdi pik di “de ɛn di awa” we i go kam. Ɛn da de de go bi di bɛst tɛm fɔ ɔlman.—Mat. 24:36; 2 Pit. 3:15.

12. Ustɛm mɔ i nɔ kin izi fɔ lɛ wi peshɛnt?

 ¹²Sɔntɛm wi go nid fɔ peshɛnt ɛn bia we dɛn nɔ de trit wi fia wan. Bɔku tɛm, pipul dɛn na dis wɔl kin trit ɔda pipul dɛn bad jɔs bikɔs dɛn na man ɔ uman, dɛn gɛt difrɛn kɔlɔ, ɔ dɛn kɔmɔt na difrɛn trayb ɔ kɔntri. Dɛn kin trit ɔda pipul dɛn bad bikɔs dɛn na kripul ɔ dɛn gɛt ed prɔblɛm. Bɔku pan Jiova in pipul dɛn dɔn bia we dɛn nɔ de trit dɛn fia wan bikɔs ɔf di tin dɛn we dɛn biliv na di Baybul. Ɛnitɛm we dɛn nɔ trit wi fia wan, wi fɔ mɛmba wetin Jizɔs bin tɔk. I bin se: “Di wan we dɔn bia te di ɛnd na in go sev.” (Mat. 24:13) Bɔt wetin yu fɔ du if yu kam fɔ no bɔt di bad tin we pɔsin du na di kɔngrigeshɔn? Afta we di ɛlda dɛn go dɔn no bɔt wetin apin, yu go peshɛnt ɛn biliv se dɛn go andul di prɔblɛm di we aw Jiova want? Wetin di ɛlda dɛn go nid fɔ du we pɔsin kɔmit siriɔs sin?

13. Wetin Jiova want lɛ ɛlda dɛn du we pɔsin kɔmit siriɔs sin?

¹³ We di ɛlda dɛn kam fɔ no bɔt di siriɔs sin we pɔsin na di kɔngrigeshɔn kɔmit, dɛn kin pre ɛn aks Jiova lɛ i gi dɛn di “sɛns we de kɔmɔt ɔp” so dat dɛn go ɔndastand di tin we apin di we aw i ɔndastand am. (Jems 3:17) Di tin we dɛn want fɔ du na fɔ ɛp di pɔsin we dɔn sin fɔ “tɔn bak ɛn lɛf di bad we i bin de du.” (Jems 5:19, 20) Dɔn bak, dɛn want fɔ du ɔl wetin dɛn ebul fɔ protɛkt di kɔngrigeshɔn ɛn fɔ ɛnkɔrej ɔl di wan dɛn we dis siriɔs sin afɛkt. (2 Kɔr. 1:3, 4) We di ɛlda dɛn kin dɔn no bɔt pɔsin we kɔmit siriɔs sin, di fɔs tin we dɛn fɔ tray fɔ no na wetin rili apin, ɛn sɔntɛm dat go tek sɔm tɛm. Dɔn dɛn kin pre, tek tɛm gi advays we kɔmɔt frɔm di Baybul, ɛn kɔrɛkt di sina “di rayt we.” (Jɛr. 30:11, NWT) Pan ɔl we di ɛlda dɛn nɔ kin wet fɔ lɔng lɔng tɛm, dɛn nɔ kin rɔsh we dɛn de disayd wetin fɔ du. We di ɛlda dɛn de fala Jiova in dayrɛkshɔn, ɔlman na di kɔngrigeshɔn go bɛnifit. Bɔt pan ɔl we ɛlda dɛn kin sɔlv prɔblɛm dɛn di rayt we, i go bi se di sin we di pɔsin kɔmit go stil afɛkt ɔda pɔsin we  inosɛnt. If i bi se na yu na da pɔsin de, wetin yu go du fɔ lɛ yu nɔ kɔntinyu fɔ fil pen?

14. Us Baybul ɛgzampul go ɛp yu fɔ bia if yu kɔmpin Kristian du yu bad bad tin?

¹⁴ Yu kɔmpin Kristian ɔ ɔda pɔsin dɔn ɛva du yu bad bad tin? Wi kin fɛn fayn ɛgzampul dɛn na Gɔd in Wɔd we de tich wi aw fɔ wet lɛ Jiova kɔrɛkt di prɔblɛm. Fɔ ɛgzampul, pan ɔl we Josɛf in brɔda dɛn nɔ bin trit am fia wan, i nɔ bin alaw dɛn sin fɔ mek i bi pɔsin we gɛt wamat. Bifo dat, i kɔntinyu fɔ du in bɛst fɔ sav Jiova, ɛn Jiova bin blɛs am fɔ we i peshɛnt ɛn we i bia. (Jɛn. 39:21) Leta, Josɛf bin ebul fɔ fɔgiv di wan dɛn we bin du am bad ɛn fɔ si aw Jiova blɛs am. (Jɛn. 45:5) Lɛk Josɛf, wi kin gɛt kɔrej we wi kam nia Jiova ɛn wet fɔ am fɔ kɔrɛkt prɔblɛm dɛn di rayt tɛm.—Sam 7:17; 73:28.

15. Wetin bin ɛp wan sista fɔ bia we dɛn nɔ trit am fayn ɛn fɔ gɛt kolat?

¹⁵ Na tru se di bad we aw dɛn kin trit sɔm pan wi nɔ go siriɔs lɛk Josɛf in yon, bɔt wi kin stil fil am we dɛn trit wi bad. Ɛnitɛm we wi gɛt prɔblɛm wit pɔsin, ilɛksɛf na pɔsin we nɔ de sav Jiova, wi go bɛnifit if wi fala Baybul prinsipul dɛn. (Fil. 2:3, 4) Lɛ wi tɔk bɔt wan ɛgzampul. Wan sista bin rili fil bad we i kam fɔ no se in wokmet de lay ɛn tɛl ɔda pipul dɛn bad tin bɔt am. Di sista nɔ rɔsh fɔ du sɔntin bɔt dat. Bifo dat, i bin tink bɔt Jizɔs in ɛgzampul. We dɛn bin de tɛl Jizɔs bad wɔd, insɛf nɔ bin yuz bad wɔd. (1 Pit. 2:21, 23) We di sista mɛmba dat, i disayd se i nɔ go du natin bɔt wetin apin. Leta, i kam fɔ no se in wokmet bin gɛt siriɔs wɛlbɔdi prɔblɛm ɛn i rili strɛs. Di sista bin tɛl insɛf se i go mɔs bi se in wokmet nɔ min wetin i tɔk. Ɛn di sista bin rili gladi fɔ we i peshɛnt ɛn bia di bad we aw dɛn bin de trit am, ɛn dat bin mek i gɛt kolat.

16. Wetin go kɔrej yu if dɛn nɔ de trit yu fayn? (1 Pita 3:12)

¹⁶ If yu de sɔfa bikɔs dɛn nɔ de trit yu fayn ɔ bikɔs ɔf ɔda rizin, mɛmba se  Jiova de nia “ɔl udat fil se i dɔn dɔn fɔ am.” (Sam 34:18) I lɛk yu fɔ we yu de peshɛnt ɛn we yu de lɛf yu prɔblɛm to am. (Sam 55:22) Na in na di Jɔj fɔ di wanol wɔl. I de si ɔltin we de apin. (Rid 1 Pita 3:12.) Yu rɛdi fɔ wet fɔ Jiova ɛnitɛm we yu gɛt prɔblɛm we yu nɔ ebul fɔ sɔlv?

17. Wetin Jiova prɔmis fɔ du akɔdin to Ayzaya 30:18 (NWT)?

¹⁷ I nɔ go te igen, wi Papa we de na ɛvin go yuz in Kiŋdɔm fɔ blɛs wi bɔku we dɛn. Ayzaya 30:18 (NWT) se: “Jiova de peshɛnt wet fɔ sho se i lɛk una, ɛn i go grap fɔ sɔri fɔ una. Jiova na Gɔd we de du tin tret. Ɔl di wan dɛn we de wet fɔ am gɛt gladi-at.” Di wan dɛn we de kɔntinyu fɔ wet fɔ Jiova go gɛt bɔku blɛsin dɛn naw ɛn insay di nyu wɔl tumara bambay.

18. Us blɛsin dɛn de wet fɔ wi?

¹⁸ We Gɔd in pipul dɛn go go insay di nyu wɔl, dɛn nɔ go ɛva gɛt di prɔblɛm dɛn we de mit dɛn tide. Da tɛm de, dɛn nɔ go trit ɛnibɔdi bad, ɛn pen nɔ go de igen. (Rɛv. 21:4) Wi nɔ go gɛt fɔ wɔri se wi nɔ go ebul fɔ gɛt wetin wi nid bikɔs plɛnti tin go de fɔ ɔlman. (Sam 72:16; Ayz. 54:13) Dat go rili wɔndaful!

19. Wetin Jiova de rɛdi wi fɔ smɔl smɔl?

¹⁹ Jiova de rɛdi wi naw fɔ de ɔnda in rul bay we i de ɛp wi fɔ lɛf wi bad abit dɛn ɛn gɛt kwaliti dɛn we de mek i gladi. Lɛ yu at nɔ pwɛl, ɛn nɔ stɔp fɔ sav Jiova. Wi go gɛt layf we bɛtɛ pas dis fa fawe! As wi de wet fɔ dis wɔndaful tɛm, lɛ wi gladi as wi de peshɛnt wet fɔ Jiova fɔ du di tin dɛn we i se i go du.