တၢ်မၤလိ ၃၁
မ့ၢ်နကအိၣ်ခိး ယဟိဝၤယွၤလၢ တၢ်ဝံသးစူၤအပူၤဧါ
“ယကမုၢ်လၢ်တၢ်.”—မံကၤ ၇:၇.
တၢ်သးဝံၣ် ၁၂၈ အိၣ်ဂၢၢ်ဆိးကျၢၤ တုၤအကတၢၢ်
တၢ်မၤလိအံၤ အတၢ်တိာ်ပာ် *
၁-၂. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
နမုၢ်လၢ်လၢ တၢ်ဘိၣ်လၢနလိၣ်ဘၣ်အီၤတဘိၣ် ကဟဲတုၤ ဘၣ်ဆၣ် ဟဲမ့ၢ်တတုၤဘၣ်န့ၣ် နကတူၢ်ဘၣ်ဒ်လဲၣ်. နသးကဟးဂီၤဧါ. ဘၣ်သ့ၣ်သ့ၣ် နတၢ်တူၢ်ဘၣ် ကအိၣ်ဒ်သိးဒီး ကတိၤဒိ ၁၃:၁၂ တဲဝဲလၢ “တၢ်မုၢ်လၢ်လၢအသုးနံၤသုးသီန့ၣ် မၤဆါပှၤအသးလီၤ.” ဘၣ်ဆၣ် နမ့ၢ်သ့ၣ်ညါလၢ ဘၣ်မနုၤအဃိ တၢ်ဘိၣ်အံၤ တဟဲတုၤ ဘၣ်ဆၢဘၣ်ကတီၢ်ဘၣ်လဲၣ်န့ၣ် နသးတဟးဂီၤဘၣ်. ဒီးနကအိၣ်ခိးလၢ တၢ်ဝံသးစူၤအပူၤလီၤ.
၂ လၢတၢ်မၤလိအံၤအပူၤ ပကတဲသကိး လံာ်စီဆှံအတၢ်ဟံးစုနဲၣ်ကျဲတနီၤလၢ ကမၤစၢၤပှၤဒ်သိး ပကအိၣ်ခိး “မုၢ်လၢ်တၢ်” လၢတၢ်ဝံသးစူၤအပူၤလီၤ. (မံကၤ ၇:၇) ဝံၤဒီး ပကတဲသကိး တၢ်အိၣ်သးခံခါလၢ ဘၣ်မနုၤအဃိ ပဘၣ်အိၣ်ခိး ယဟိဝၤယွၤလၢ တၢ်ဝံသးစူၤအပူၤလဲၣ်. လၢခံ ပကတဲသကိး ပှၤလၢအအိၣ်ခိး ယဟိဝၤယွၤလၢ တၢ်ဝံသးစူၤအပူၤန့ၣ် ကဒိးန့ၢ်ဘၣ် တၢ်ဆိၣ်ဂ့ၤဒ်လဲၣ်န့ၣ်လီၤ.
လံာ်စီဆှံအတၢ်ဟံးစုနဲၣ်ကျဲတဖၣ် မၤစၢၤပှၤလၢ ပကအိၣ်ဒီးတၢ်ဝံသးစူၤ
၃. လံာ်စီဆှံအတၢ်ဟံးစုနဲၣ်ကျဲလၢ ယၤကိာ် ၅:၇ အပူၤန့ၣ် မၤစၢၤပှၤဒ်လဲၣ်.
၃ ဘၣ်မနုၤအဃိ ပဘၣ်အိၣ်ဒီး တၢ်ဝံသးစူၤလဲၣ်. ယၤကိာ် ၅:၇ တဲဝဲလၢ “ပှၤမၤစံာ်ဖိတဂၤ ခိးကွၢ်လၢ်လၢ ဟီၣ်ခိၣ်ကဟ့ၣ်ထီၣ် တၤသၣ်လၢ အလုၢ်ဒိၣ်ပှ့ၤဒိၣ်တဖၣ် ဒီးအဝဲအိၣ်ခိးဝဲလၢ တၢ်ဝံသးစူၤအပူၤ တုၤလၢ တၢ်စူၤလီၤ အဆိကတၢၢ်တတီၤ ဒီးတၢ်စူၤလီၤလၢခံတတီၤန့ၣ် ဟဲတုၤဝဲတစုလီၤ.” ပမၤလိန့ၢ်တၢ်မနုၤလဲၣ်. ပှၤလၢအကူၣ်တၢ်သ့န့ၣ် ကမၤတၢ်လီၤတံၢ်လီၤဆဲးဒီး အိၣ်ဒီးတၢ်ဝံသးစူၤ အဃိ အမၤတၢ်ကဲထီၣ်လိၣ်ထီၣ်ဝဲလီၤ.
၄. လံာ်စီဆှံအတၢ်ဟံးစုနဲၣ်ကျဲလၢ ကတိၤဒိ ၄:၁၈ အပူၤန့ၣ် မၤစၢၤပှၤဒ်လဲၣ်.
၄ ကတိၤဒိ ၄:၁၈ တဲဝဲလၢ “ပှၤတီပှၤလိၤအကျဲန့ၣ် မၤသးဒ်မုၢ်ဆ့ၣ်ထီၣ်အတၢ်ကပီၤ ဒံးယံာ်ဒံးကပီၤထီၣ်, ဒံးယံာ်ဒံးကပီၤထီၣ်, တုၤလၢမုၢ်ထူၣ်အသိးန့ၣ်လီၤ.” တၢ်ကတိၤအံၤ ဒုးသ့ၣ်ညါပှၤလၢ ယဟိဝၤယွၤမၤစၢၤ အပှၤဂီၢ်မုၢ်ဒ်သိး ကနၢ်ပၢၢ်ထီၣ် အတၢ်တိာ်ပာ်တဖၣ်လီၤ. ဘၣ်ဆၣ် လံာ်စီဆှံတဆၢအံၤ ဒုးသ့ၣ်ညါစ့ၢ်ကီးပှၤလၢ ခရံာ်ဖိတဂၤအတၢ်အိၣ်မူ ဆီတလဲအသးဒ်လဲၣ် ဒီးအသုးဘူးအသးလၢ ယဟိဝၤယွၤအအိၣ် ဒ်လဲၣ်န့ၣ်လီၤ. နီၢ်သးအတၢ်ဒိၣ်ထီၣ် ထီထီၣ်န့ၣ် ပမၤဒိၣ်ထီၣ်ထီထီၣ်အီၤ ချ့ချ့တသ့ဘၣ်. ဒ်သိးပှၤတဂၤ အတၢ်အဲၣ်ယဟိဝၤယွၤ ကဒိၣ်ထီၣ်အဂီၢ် အကဘၣ်ဟံးန့ၢ် တၢ်ဆၢကတီၢ်လီၤ. ပကဘၣ်မၤလိလံာ်စီဆှံ ဒီးမၤထွဲတၢ်ဟ့ၣ်ကူၣ်ဟ့ၣ်ဖးလၢ လံာ်စီဆှံအပူၤ ဒီးမၤထွဲတၢ်ဟ့ၣ်ကူၣ်လၢအဟဲလၢ ကစၢ်ယွၤ အတၢ်ကရၢကရိအအိၣ်လီၤ. ပမ့ၢ်မၤဒ်န့ၣ်န့ၣ် ခရံာ်ဖိအတၢ်ဂ့ၤတၢ်ဝါတဖၣ် ကအိၣ်ဖျါထီၣ်ဝဲလီၤ. ပကသ့ၣ်ညါအါထီၣ် ကစၢ်ယွၤကလုၢ်ကထါစ့ၢ်ကီးလီၤ. ပကကွၢ်သကိး ယ့ၣ်ၡူးဟ့ၣ်တၢ်အဒိ ဘၣ်ဃးဒီးတၢ်ဂ့ၢ်အံၤလီၤ.
ဒ်တၢ်မုၢ်တၢ်ဘိဒိၣ်ထီၣ် ကယီကယီအသိး ပှၤလၢအနၢ်ဟူဒီး တူၢ်လိာ်ဘီမုၢ်တၢ်သးခုကစီၣ်န့ၣ် ကမၤတၢ်ဆီတလဲအဂီၢ် လိၣ်ဘၣ်တၢ်ဆၢကတီၢ်လီၤ (ကွၢ်လံာ်အဆၢ ၅)
၅. ပှၤတဂၤကမၤတၢ်ဆီတလဲအဂီၢ် လိၣ်ဘၣ်ဝဲတၢ်ဆၢကတီၢ်န့ၣ် ယ့ၣ်ၡူးဒိလီၤဝဲဒီးတၢ်မနုၤလဲၣ်.
၅ ယ့ၣ်ၡူးဟ့ၣ်ဝဲတၢ်အဒိတခါ လၢအဘၣ်ဃးဒီး ဘီမုၢ်တၢ်သးခုကစီၣ်လၢ ပတဲဘၣ်ပှၤဂၤန့ၣ် အလီၤဂာ်ဒ် တၢ်ချံဆံးဆံးဖိလၢ အဒိၣ်ထီၣ်ထီထီၣ် လၢပှၤသးပူၤလီၤ. ယ့ၣ်ၡူးတဲဝဲလၢ “တၢ်ချံတဖၣ်ဟဲမဲထီၣ် ဒီးဒိၣ်ထီၣ်ဝဲ ဒ်လဲၣ်ဒ်လဲၣ်န့ၣ် [ပှၤဖှံလီၤတၢ်ဖိ] တသ့ၣ်ညါဝဲဘၣ်. ဟီၣ်ခိၣ်ဒုးမဲထီၣ်ဝဲ တၢ်ချံတဖၣ် ကယီကယီလီၤ. အဆိကတၢၢ်န့ၣ် အထူၣ်ဟဲထီၣ် ဒီးအစဲၤတဖၣ် ဟဲလီၤဝဲ ဒီးလၢခံ လၢအစဲၤလိၤန့ၣ် ပှဲၤဝဲဒီး အသၣ်တဖၣ်လီၤ.” (မၢ်ကူး ၄:၂၇, ၂၈) ယ့ၣ်ၡူးအဲၣ်ဒိးတဲဝဲ အခီပညီဒ်လဲၣ်. ဒ်တၢ်မုၢ်တၢ်ဘိ မဲထီၣ်ဝဲ ကယီကယီအသိး ပှၤလၢအတူၢ်လိာ် ဘီမုၢ်တၢ်သးခုကစီၣ်န့ၣ် ကမၤတၢ်ဆီတလဲအဂီၢ် လိၣ်ဘၣ်ဝဲတၢ်ဆၢကတီၢ်လီၤ. အဒိ, ဖဲပပှၤမၤလိလံာ်စီဆှံဖိ သုးဘူးအသးဆူ ယဟိဝၤယွၤအအိၣ်အခါ ပကထံၣ်ဘၣ် အဝဲသ့ၣ်ကမၤဝဲ တၢ်ဆီတလဲတဖၣ်လီၤ. (အ့းဖ့းစူး ၄:၂၂-၂၄) ဘၣ်ဆၣ် ပကဘၣ်သ့ၣ်နီၣ်ထီၣ်လၢ ယဟိဝၤယွၤဒုးဒိၣ်ထီၣ် တၢ်ချံဆံးဆံးဖိအံၤန့ၣ်လီၤ.—၁ ကရံၣ်သူး ၃:၇.
၆-၇. ယဟိဝၤယွၤတ့လီၤ ဟီၣ်ခိၣ်န့ၣ် ပမၤလိန့ၢ်ဘၣ်တၢ်မနုၤလဲၣ်.
၆ ကယဲၢ်တၢ်လၢ ယဟိဝၤယွၤမၤဝဲခဲလၢာ်န့ၣ် ဒ်သိးအတၢ်မၤ ကကဲထီၣ်လိၣ်ထီၣ်အဂီၢ် အဝဲအိၣ်ဒီးတၢ်ဝံသးစူၤလီၤ. ယဟိဝၤယွၤ ဝံသးစူၤတၢ် ဒ်သိးအမံၤကဘၣ် တၢ်မၤလၤကပီၤအီၤအဂီၢ် ဒီးအတၢ်ဝံသးစူၤန့ၣ် ကဲဘျုးလၢပှၤဂၤအဂီၢ်စ့ၢ်ကီးလီၤ. အဒိ, ပကကွၢ်သကိး ယဟိဝၤယွၤ ကတဲာ်ကတီၤပာ်စၢၤ ဟီၣ်ခိၣ်လၢ ပှၤဟီၣ်ခိၣ်ဖိတဖၣ် အဂီၢ်ဒ်လဲၣ်န့ၣ်လီၤ.
၇ ဖဲယဟိဝၤယွၤတ့လီၤ ဟီၣ်ခိၣ်အခါ လံာ်စီဆှံပာ်ဖျါထီၣ်ဝဲလၢ ကစၢ်ယွၤ ပာ်လီၤ “နီၢ်ထိၣ်တၢ်,” ဘျၢလီၤ “တၢ်အခီၣ်ထံး” ဒီးပာ်လီၤအီၤလၢတၢ်နီ “တမံၤအဖီခိၣ်” လီၤ. (ယိၤဘး ၃၈:၅, ၆) ယဟိဝၤယွၤ ဟံးန့ၢ်တၢ်ဆၢကတီၢ်လၢ ကကွၢ်က့ၤအစုတၢ်မၤတဖၣ်လီၤ. (၁ မိၤၡ့ ၁:၁၀, ၁၂) ဖဲမူခိၣ်ကလူးတဖၣ်ထံၣ်ဘၣ်ဝဲ ယဟိဝၤယွၤတ့လီၤတၢ်ဝံၤအခါ ထံၣ်တမှံကွၢ် မူခိၣ်ကလူးတဖၣ် ကသူၣ်ပိၢ်သးဝးထဲလဲၣ်. လံာ်စီဆှံပာ်ဖျါထီၣ်ဝဲလၢ အဝဲသ့ၣ် “ကိးထီၣ်လၢတၢ်သူၣ်ဖှံသးညီ” အပူၤလီၤ. (ယိၤဘး ၃၈:၇) ပမၤလိန့ၢ်ဘၣ်တၢ်မနုၤလဲၣ်. ယဟိဝၤယွၤတ့လီၤတၢ်န့ၣ် တံာ်တာ်ဝဲ အနံၣ်လၢအကထိတဖၣ်ညါ ဘၣ်ဆၣ် ဖဲအတ့လီၤတၢ်ဝံၤ ဒီးကွၢ်က့ၤဝဲအခါ အထံၣ်ဝဲလၢ “အဂ့ၤမးလီၤ.”—၁ မိၤၡ့ ၁:၃၁.
၈. ခဲအံၤ ပကတဲသကိး တၢ်ဂ့ၢ်မနုၤလဲၣ်.
၈ ဒ်ပထံၣ်ဘၣ် တၢ်အဒိလၢ တၢ်ဖီခိၣ်အသိး ပသ့ၣ်ညါဘၣ်လၢ လံာ်စီဆှံအတၢ်ဟံးစုနဲၣ်ကျဲလၢ ကစၢ်ယွၤအကလုၢ်ကထါအပူၤန့ၣ် မၤစၢၤပှၤလၢ ပကအိၣ်ဒီးတၢ်ဝံသးစူၤလီၤ. ခဲအံၤပကကွၢ်သကိး တၢ်အိၣ်သးခံခါလၢ ဘၣ်မနုၤအဃိ ပကဘၣ်အိၣ်ခိး ယဟိဝၤယွၤလၢ တၢ်ဝံသးစူၤအပူၤလဲၣ်န့ၣ်လီၤ.
ဘၣ်မနုၤအဃိ ပဘၣ်အိၣ်ခိး ယဟိဝၤယွၤလၢ တၢ်ဝံသးစူၤအပူၤလဲၣ်
၉. ပကဘၣ်အိၣ်ခိး ယဟိဝၤယွၤလၢ တၢ်ဝံသးစူၤအပူၤ လၢတၢ်အိၣ်သးဖဲလဲၣ်အခါလဲၣ်.
၉ ဖဲပဃ့ဘါထုကဖၣ်တၢ်အခါ ပကဘၣ်အိၣ်ခိးလၢ ယဟိဝၤယွၤ ကစံးဆၢပှၤလီၤ. ဖဲပဃ့ဘါထုကဖၣ် ဒ်သိး ပကအိၣ်ဒီး တၢ်ဂံၢ်တၢ်ဘါလၢ ပကလဲၤခီဖျိ တၢ်မၤကွၢ် ဒီးပကမၤနၢၤကွံာ် ပနီၢ်ကစၢ် တၢ်ဂံၢ်စၢ်ဘါစၢ်အခါ ဘၣ်သ့ၣ်သ့ၣ် ပကတူၢ်ဘၣ်လၢ ယဟိဝၤယွၤ တစံးဆၢပတၢ်ထုကဖၣ် တဘျီဃီဘၣ်. ဘၣ်မနုၤအဃိ ယဟိဝၤယွၤ တစံးဆၢ ပတၢ်ထုကဖၣ် တဘျီဃီဘၣ်လဲၣ်.
၁၀. ဖဲပဃ့ဘါထုကဖၣ်တၢ်အခါ ဘၣ်မနုၤအဃိ ပကဘၣ်အိၣ်ဒီးတၢ်ဝံသးစူၤလဲၣ်.
၁၀ ယဟိဝၤယွၤဒိကနၣ် ပတၢ်ထုကဖၣ် လီၤတံၢ်လီၤဆဲးလီၤ. (စံးထီၣ်ပတြၢၤ ၆၅:၂) ယဟိဝၤယွၤပာ်လုၢ်ပာ်ပှ့ၤ ပတၢ်ထုကဖၣ် မ့ၢ်လၢ အသ့ၣ်ညါဝဲလၢ ပနာ်န့ၢ်အီၤလီၤ. (ဧ့ၤဘြံၤ ၁၁:၆) ဖဲပဃ့ဘါထုကဖၣ်လၢ ယဟိဝၤယွၤကမၤစၢၤပှၤဒ်သိး ပကမၤအတၢ်ဘၣ်သးအခါ အဝဲအဲၣ်ဒိးထံၣ် ပတၢ်ဂုာ်ကျဲးစၢးလီၤ. (၁ ယိၤဟၣ် ၃:၂၂) ဖဲပဃ့ယဟိဝၤယွၤလၢကမၤစၢၤပှၤ ဒ်သိးပကမၤနၢၤကွံာ် လုၢ်လၢ်လၢအတဂ့ၤဘၣ် ဒီးပတၢ်ဂံၢ်စၢ်ဘါစၢ်အခါ ပကဘၣ်အိၣ်ဒီးတၢ်ဝံသးစူၤဒီး ပကဘၣ်ဂုာ်ကျဲးစၢး မၤတၢ်ဆီတလဲလီၤ. ယ့ၣ်ၡူးဒုးသ့ၣ်ညါပှၤလၢ ပတၢ်ထုကဖၣ်တနီၤန့ၣ် ကစၢ်ယွၤ တစံးဆၢဝဲ တဘျီဃီဘၣ်. အဃိ ယ့ၣ်ၡူးဟ့ၣ်ဂံၢ်ဟ့ၣ်ဘါပှၤလၢ “ဆဲးဃ့တၢ်တက့ၢ် ဒီးတၢ်ကဟ့ၣ်လီၤသုလီၤ. ဆဲးဃုတၢ်တက့ၢ် ဒီးသုကထံၣ်န့ၢ်တၢ်လီၤ. ဆဲးဒိတကျိာ်တၢ်တက့ၢ် ဒီးတၢ်ကအိးထီၣ်န့ၢ်သုလီၤ.” (မးသဲ ၇:၇, ၈) ဖဲပမၤထွဲတၢ်ဟ့ၣ်ကူၣ်အံၤ ဒီး “ဆဲးဃ့ဘါထုကဖၣ်တၢ်ထီဘိ” အခါ ပနာ်သ့သပှၢ်ကတၢၢ်လၢ ပပၢ်လၢမူခိၣ်နၢ်ဟူ ပတၢ်ထုကဖၣ်ဒီး ကစံးဆၢပှၤလီၤ.—ကလီးစဲ ၄:၂.
ဖဲပအိၣ်ခိးယဟိဝၤယွၤအခါ ပကဘၣ်ဆဲးဃ့ဘါထုကဖၣ်ဒ်သိး ပတၢ်နာ်ကအါထီၣ်အဂီၢ်လီၤ (ကွၢ်လံာ်အဆၢ ၁၁) *
၁၁. ဖဲပမ့ၢ်တူၢ်ဘၣ်လၢ ကစၢ်ယွၤတစံးဆၢ ပတၢ်ထုကဖၣ် တဘျီဃီဘၣ်န့ၣ် ဧ့ၤဘြံၤ ၄:၁၆ မၤစၢၤပှၤဒ်လဲၣ်.
၁၁ တဘျီတခီၣ် ပမ့ၢ်တူၢ်ဘၣ်လၢ ယဟိဝၤယွၤမ့ၢ်တစံးဆၢ ပတၢ်ထုကဖၣ် တဘျီဃီဘၣ်ဒၣ်လဲာ် ယဟိဝၤယွၤအၢၣ်လီၤပှၤလၢ အကစံးဆၢပှၤ “ဖဲပလိၣ်ဘၣ် . . . အဆၢကတီၢ်” န့ၣ်လီၤ. (ဖး ဧ့ၤဘြံၤ ၄:၁၆ တက့ၢ်.) အဃိ တၢ်မ့ၢ်တကဲထီၣ်အသး ဒ်ပမုၢ်လၢ်ပာ်စၢၤအီၤ အသိးဘၣ်န့ၣ် ပတဘၣ်ပာ်ဒ့ၣ်ပာ်ကမၣ် ယဟိဝၤယွၤဘၣ်. အဒိ, ပှၤအါဂၤဃ့ဘါထုကဖၣ်လၢ ကစၢ်ယွၤအဘီမုၢ် ကမၤဟးဂီၤကွံာ် ဟီၣ်ခိၣ်လၢမုၣ်ကီၤလံၢ်ပၢဝဲအံၤ အိၣ်လၢအနံၣ်တဖၣ်လံ. ယ့ၣ်ၡူးမၢပှၤလၢ ပကဘၣ်ဃ့ဘါထုကဖၣ်လၢ ယွၤအဘီမုၢ်ကဟဲအဂီၢ်လီၤ. (မးသဲ ၆:၁၀) ဘၣ်ဆၣ် ပတၢ်နာ်မ့ၢ်လီၤစှၤ ခီဖျိလၢ တၢ်အကတၢၢ် တဟဲးဒံးဘၣ်အဃိန့ၣ် ပတမ့ၢ်ပှၤလၢအိၣ်ဒီး တၢ်ကူၣ်သ့ဘၣ်. (ဃဘးကူာ် ၂:၃; မးသဲ ၂၄:၄၄) ပကအိၣ်ခိးယဟိဝၤယွၤ ဒီးဃ့ဘါထုကဖၣ်ဒ်သိး ပတၢ်နာ်ကအါထီၣ်အဂီၢ်လီၤ. တၢ်အကတၢၢ် ကဟဲဝဲသပှၢ်ကတၢၢ် မ့ၢ်လၢယဟိဝၤယွၤ ဃုထၢပာ်စၢၤ “မုၢ်နံၤအဝဲန့ၣ် ဒီးနၣ်ရံၣ်အဝဲန့ၣ်” လံအဃိလီၤ. ဒီးမုၢ်နံၤအဝဲန့ၣ် မ့ၢ်တၢ်ဆၢကတီၢ် လၢအကြၢးဝဲဘၣ်ဝဲ လၢတၢ်ခဲလၢာ်အဂီၢ်လီၤ.—မးသဲ ၂၄:၃၆; ၂ ပ့းတရူး ၃:၁၅.
စီၤယိၤသးအိၣ်ဒီး တၢ်ဝံသးစူၤန့ၣ် ပမၤလိန့ၢ်တၢ်မနုၤလဲၣ် (ကွၢ်လံာ်အဆၢ ၁၂-၁၄)
၁၂. ပကအိၣ်ဒီးတၢ်ဝံသးစူၤအဂီၢ် ကကီလၢအခါဖဲလဲၣ်.
၁၂ ဒ်သိး တၢ်တီတၢ်လိၤ ကအိၣ်ထီၣ်အဂီၢ် ပကဘၣ်အိၣ်ခိးတၢ်လၢ တၢ်ဝံသးစူၤအပူၤလီၤ. ညီနုၢ်ခီဖျိလၢ နကလုာ်ဒူၣ်, နဒိၣ်ထီၣ်တၢ်လီၢ်တၢ်ကျဲ ဒီးနတၢ်ဆဲးတၢ်လၤ တဒ်သိးဒီးပှၤဂၤဘၣ်အဃိ ပှၤတရ့နၤဂ့ၤဂ့ၤဘၣ်. ပှၤတနီၤနီၤ မ့ၢ်လၢအဝဲသ့ၣ်အနီၢ်ခိက့ၢ်ဂီၤ ဒီးအခိၣ်နူာ်တဖၠဲးဘၣ်အဃိ ပှၤဆိကမိၣ်ဆံးအဝဲသ့ၣ်လီၤ. မ့ၢ်လၢ ယဟိဝၤယွၤ အခ့အပှၤတဖၣ် အတၢ်စူၢ်တၢ်နာ် ဒိးသန့ၤထီၣ်အသးလၢ လံာ်စီဆှံအဃိ ပှၤရ့အဝဲသ့ၣ်တတီတလိၤဘၣ်. ပှၤမ့ၢ်ရ့ပှၤတတီတလိၤဘၣ်န့ၣ် ပကဘၣ်သ့ၣ်နီၣ်ထီၣ်က့ၤ ယ့ၣ်ၡူးအတၢ်ကတိၤလီၤ. ယ့ၣ်ၡူးတဲဝဲလၢ “ပှၤလၢ အတူၢ်တၢ်လၢ တၢ်သးတီအပူၤ တုၤလၢအကတၢၢ်န့ၣ် ကဘၣ် တၢ်အုၣ်က့ၤခီၣ်က့ၤအီၤလီၤ.” (မးသဲ ၂၄:၁၃) ဘၣ်ဆၣ် ဒီပုၢ်ဝဲၢ်လၢတၢ်အိၣ်ဖှိၣ်အပူၤတဂၤဂၤ မ့ၢ်မၤဘၣ်တၢ်ကမၣ်န့ၣ် နကြၢးမၤဒ်လဲၣ်. ဖဲတၢ်အိၣ်ဖှိၣ်သးပှၢ်သ့ၣ်ညါ တၢ်ဂ့ၢ်အခါ မ့ၢ်နကအိၣ်ခိး အဝဲသ့ၣ်လၢတၢ်ဝံသးစူၤအပူၤ ဒီးနာ်န့ၢ်အဝဲသ့ၣ်လၢ ကမၤဘၣ်ဂီၢ်ထီၣ်က့ၤ တၢ်ဂ့ၢ်အံၤဒ် ယဟိဝၤယွၤ အတၢ်ဟံးစုနဲၣ်ကျဲ အိၣ်ဝဲအသိးဧါ. ဖဲပှၤတဂၤမၤတၢ်ကမၣ်ဖးဒိၣ်အခါ တၢ်အိၣ်ဖှိၣ်သးပှၢ် ကဘၣ်မၤတၢ်မနုၤလဲၣ်.
၁၃. ဖဲပှၤတဂၤ မၤဘၣ်တၢ်ကမၣ်ဖးဒိၣ်အခါ ယဟိဝၤယွၤအဲၣ်ဒိးဝဲလၢ တၢ်အိၣ်ဖှိၣ်သးပှၢ်တဖၣ် ကမၤဝဲဒ်လဲၣ်.
၁၃ ဖဲတၢ်အိၣ်ဖှိၣ်သးပှၢ်တဖၣ် သ့ၣ်ညါဝဲ ပှၤတဂၤမၤဘၣ် တၢ်ကမၣ်ဖးဒိၣ်အခါ အဝဲသ့ၣ် ဃ့ဘါထုကဖၣ်လၢ ယဟိဝၤယွၤအအိၣ် ဒ်သိးကဒိးန့ၢ်ဘၣ် “တၢ်ကူၣ်သ့လၢထး” ဒီးကအိၣ်ဒီးတၢ်ထံၣ်ဒ် ယဟိဝၤယွၤအသိးလီၤ. (ယၤကိာ် ၃:၁၇) အဝဲသ့ၣ်အတၢ်တိာ်ပာ်န့ၣ် ဒ်သိးကမၤစၢၤပှၤလၢ အမၤကမၣ်တၢ်တဂၤက “ဃၣ်လိၤက့ၤ . . . အကျဲကမၣ်” ကသ့အဂီၢ်လီၤ. (ယၤကိာ် ၅:၁၉, ၂၀) တကးဒံးဘၣ် အဝဲသ့ၣ်အဲၣ်ဒိးဒီသဒၢ တၢ်အိၣ်ဖှိၣ် ဒီးမၤမုာ်ထီၣ်က့ၤပှၤလၢ အသးဘၣ်ဒိတဖၣ်လီၤ. (၂ ကရံၣ်သူး ၁:၃, ၄) ဖဲတၢ်အိၣ်ဖှိၣ်သးပှၢ်တဖၣ် သ့ၣ်ညါဘၣ်ဝဲ ပှၤမၤတၢ်ကမၣ်ဖးဒိၣ်အခါ အဆိကတၢၢ်အဝဲသ့ၣ် ကဘၣ်ဃုသ့ၣ်ညါ တၢ်ကဲထီၣ်အသးခဲလၢာ်လီၤ. အဃိ အဝဲသ့ၣ်ကဘၣ်ဟံးန့ၢ်ဝဲ တၢ်ဆၢကတီၢ်လီၤ. ဝံၤဒီးအဝဲသ့ၣ်ဃ့ဘါထုကဖၣ် ဒီးဃုကွၢ်တၢ်ဟ့ၣ်ကူၣ်လၢ လံာ်စီဆှံအပူၤ လီၤတံၢ်လီၤဆဲး ဒီးဘှီဘၣ်ထီၣ်က့ၤ ပှၤလၢအမၤတၢ်ကမၣ်တဂၤ “ဒ်တၢ်တီတၢ်လိၤအသိးန့ၣ်လီၤ.” (ယံးရမံယၤ ၃၀:၁၁) တၢ်အိၣ်ဖှိၣ်သးပှၢ်တဖၣ်န့ၣ် တထုးယံာ်ထုးနီၢ်အသးဘၣ် ဘၣ်ဆၣ် အဝဲသ့ၣ်တကရီ ဆၢတဲာ်တၢ်ချ့ချ့စ့ၢ်ကီးဘၣ်. ဖဲတၢ်အိၣ်ဖှိၣ်သးပှၢ်တဖၣ် မၤထွဲယဟိဝၤယွၤအတၢ်ဟံးစုနဲၣ်ကျဲအခါ တၢ်အိၣ်ဖှိၣ်ဒီတဖု ကဒိးန့ၢ်ဘၣ်ဝဲအဘျုးလီၤ. တၢ်အိၣ်ဖှိၣ်သးပှၢ်တဖၣ် မၤဘၣ်ဂီၢ်ထီၣ်က့ၤတၢ်ဂ့ၢ်ကီ ဝံၤလံ သနာ်က့ ပှၤလၢပှၤမၤဆါဘၣ်အီၤတဂၤန့ၣ် အသးကဘၣ်ဒိဒံးဝဲလီၤ. အဃိ ဒ်သိး နသးတဘၣ်ဒိလၢၤတဂ့ၤအဂီၢ် နကြၢးမၤမနုၤလဲၣ်.
၁၄. ဒီပုၢ်ဝဲၢ်မုၣ်ခွါ မ့ၢ်မၤဘၣ်ဒိနသးန့ၣ် တၢ်အဒိလၢ လံာ်စီဆှံအပူၤ မၤစၢၤနၤကသ့ဒ်လဲၣ်.
၁၄ ဒီပုၢ်ဝဲၢ်မုၣ်ခွါလၢ အမၤဘၣ်ဒိနသးန့ၣ် အိၣ်ဧါ. လၢလံာ်စီဆှံအပူၤ ပှၤလၢအအိၣ်ခိး ယဟိဝၤယွၤဒ်သိး အတၢ်ကီတၢ်ခဲကဘၣ်ဂီၢ်ထီၣ်က့ၤအဂီၢ် အဝဲသ့ၣ်အဒိအတဲာ်န့ၣ် ကမၤစၢၤနၤလီၤ. အဒိ, စီၤယိၤသးအကၠီတဖၣ် ရ့ဒီးအီၤ တတီတလိၤဘၣ်. ဘၣ်ဆၣ် အတသးဒိၣ်ထီၣ်အကၠီဘၣ်. လၢတၢ်န့ၣ်အလီၢ် အဝဲဂုာ်ကျဲးစၢး မၤယဟိဝၤယွၤအတၢ်မၤလၢ အဂ့ၤကတၢၢ် ဒီးခီဖျိလၢအအိၣ်ဒီး တၢ်ဝံသးစူၤအဃိ ယဟိဝၤယွၤဆိၣ်ဂ့ၤအီၤလီၤ. (၁ မိၤၡ့ ၃၉:၂၁) လၢခံ စီၤယိၤသးပျၢ်ကွံာ်ပှၤလၢ အမၤကမၣ်ဘၣ်အီၤတဖၣ် အတၢ်ကမၣ် ဒီးအထံၣ်ဘၣ် ယဟိဝၤယွၤဆိၣ်ဂ့ၤအီၤလီၤ. (၁ မိၤၡ့ ၄၅:၅) ဒ်စီၤယိၤသးအသိး ပမ့ၢ်အိၣ်ခိး ယဟိဝၤယွၤ လၢတၢ်ဝံသးစူၤအပူၤန့ၣ် ပသးကမုာ်ထီၣ်ဒီး ပကဘူးဒိၣ်ထီၣ်ဒီး ယဟိဝၤယွၤလီၤ.—စံးထီၣ်ပတြၢၤ ၇:၁၇; ၇၃:၂၈.
၁၅. ဖဲပှၤရ့ဒီး ဒီပုၢ်ဝဲၢ်မုၣ်တတီတလိၤဘၣ်အခါ တၢ်မနုၤမၤစၢၤအီၤလဲၣ်.
၁၅ တၢ်တတီတလိၤလၢ ပထံၣ်ဘၣ်အီၤတဖၣ်န့ၣ် တနးထဲသိးဒီးစီၤယိၤသးထံၣ်ဘၣ်ဝဲဘၣ် ဘၣ်ဆၣ် ဖဲပှၤရ့ပှၤတတီတလိၤဘၣ်အခါ ပသးဘၣ်ဒိလီၤ. ဖဲပတၢ်ဂ့ၢ်ကီအိၣ်ထီၣ်ဒီး ပှၤတဂၤဂၤအခါ အဝဲသ့ၣ် မ့ၢ်ပဒီပုၢ်ဝဲၢ်မုၣ်ခွါမ့ၢ်ဂ့ၤ, တမ့ၢ်ဘၣ်မ့ၢ်ဂ့ၤ ပမ့ၢ်မၤထွဲလံာ်စီဆှံအတၢ်ဟံးစုနဲၣ်ကျဲန့ၣ် အဘျုးအိၣ်ဝဲလီၤ. (ဖံလံးပံၤ ၂:၃, ၄) ပကကွၢ်သကိး တၢ်လဲၤခီဖျိတခါလီၤ. ပှၤမၤတၢ်ဖိတဂၤ တဲဆါဒီပုၢ်ဝဲၢ်မုၣ်အဃိ ဒီပုၢ်ဝဲၢ်မုၣ်အံၤ အသးဘၣ်ဒိဒိၣ်မးလီၤ. ဘၣ်ဆၣ်ဒီပုၢ်ဝဲၢ်မုၣ်အံၤ တက့ၤမၤဆၢက့ၤအီၤဘၣ် လၢတၢ်န့ၣ်အလီၢ် အမၤထွဲယ့ၣ်ၡူးအဒိအတဲာ်လီၤ. ဖဲပှၤမၤအၢမၤနး ယ့ၣ်ၡူးအခါ ယ့ၣ်ၡူးတက့ၤမၤဆၢဝဲဘၣ်. (၁ ပ့းတရူး ၂:၂၁, ၂၃) ခီဖျိလၢတၢ်ဂ့ၢ်အံၤအဃိ ဒီပုၢ်ဝဲၢ်မုၣ်အံၤ တမၤဆၢက့ၤဝဲတၢ်နီတမံၤဘၣ်. လၢခံ ဒီပုၢ်ဝဲၢ်မုၣ်သ့ၣ်ညါထီၣ်ဘၣ်ဝဲလၢ ပှၤမၤတၢ်ဖိတဂၤအံၤ အိၣ်တဆူၣ်ဘၣ်ဒီး အိၣ်ဒီးတၢ်သူၣ်ကိၢ်သးဂီၤတၢ်ဆါလီၤ. အဃိ ဒီပုၢ်ဝဲၢ်မုၣ်တဲဝဲလၢ တၢ်လၢပှၤမၤတၢ်ဖိတဂၤအံၤ မၤဝဲန့ၣ် တမ့ၢ်လၢအသးအိၣ်မၤဆါအီၤဘၣ်. ဒီပုၢ်ဝဲၢ်မုၣ်အံၤ သးခုဝဲ မ့ၢ်လၢအအိၣ်ဒီးတၢ်ဝံသးစူၤ ဒီးတၢ်ဃူတၢ်ဖိးအဃိလီၤ.
၁၆. ဖဲနထံၣ်ဘၣ် တၢ်တတီတလိၤအခါ တၢ်မနုၤ ကမၤမုာ်ထီၣ် နသးလဲၣ်. (၁ ပ့းတရူး ၃:၁၂)
၁၆ နမ့ၢ်လဲၤ ခီဖျိဘၣ်တၢ်တတီတလိၤ မ့တမ့ၢ် ပှၤမၤဆါဘၣ်နသးန့ၣ် သ့ၣ်နီၣ်ထီၣ်က့ၤလၢ ယဟိဝၤယွၤအိၣ်ဘူးဒီး “ပှၤလၢအသူၣ်ကၢ်အသးလီၤ” န့ၣ်တက့ၢ်. (စံးထီၣ်ပတြၢၤ ၃၄:၁၈) ကစၢ်ယွၤအဲၣ်နၤ မ့ၢ်လၢနအိၣ်ဒီးတၢ်ဝံသးစူၤ ဒီးပာ်ထီၣ်တၢ်ဝံတၢ်ယိာ် လၢအလိၤအဃိလီၤ. (စံးထီၣ်ပတြၢၤ ၅၅:၂၂) ယဟိဝၤယွၤမ့ၢ်ဝဲ စံၣ်ညီၣ်ကွီၢ်လၢ အဒိၣ်ကတၢၢ် လၢဟီၣ်ခိၣ်ချၢလီၤ. အဝဲထံၣ်ဝဲ တၢ်ကဲထီၣ်အသး ခဲလၢာ်လီၤ. (ဖး ၁ ပ့းတရူး ၃:၁၂ တက့ၢ်.) အဃိ ဖဲနထံၣ်ဘၣ် တၢ်ကီတၢ်ခဲနးနးကလဲာ် တုၤဒၣ်လဲာ် နမၤဘၣ်ဂီၢ်ထီၣ်က့ၤ မ့ၢ်တန့ၢ်ဘၣ်န့ၣ် သ့ၣ်နီၣ်ထီၣ်က့ၤလၢ နကဘၣ်အိၣ်ခိးယဟိဝၤယွၤ လၢတၢ်ဝံသးစူၤအပူၤ လၢအကမၤဘၣ်ဂီၢ်ထီၣ်က့ၤ တၢ်သ့ၣ်တဖၣ်အံၤလီၤ.
ပှၤလၢအိၣ်ခိးယဟိဝၤယွၤ လၢတၢ်ဝံသးစူၤအပူၤန့ၣ် ဒိးန့ၢ်ဘၣ်တၢ်ဆိၣ်ဂ့ၤ ထူးထူးတီၤတီၤ
၁၇. ဒ် ယၡါယၤ ၃၀:၁၈ ပာ်ဖျါထီၣ်ဝဲအသိး ယဟိဝၤယွၤကဆိၣ်ဂ့ၤပှၤဒ်လဲၣ်.
၁၇ တယံာ်လၢၤဘၣ် ပပၢ်ယဟိဝၤယွၤ ကဆိၣ်ဂ့ၤပှၤ ထူးထူးတီၤတီၤ ခီဖျိလၢ အဘီအမုၢ်အဃိလီၤ. ယၡါယၤ ၃၀:၁၈ တဲဝဲလၢ “မၤသးဒ်န့ၣ်ဒီး ယွၤကအိၣ်ခိးဒ်သိး အကသးကညီၤသု, ဒီးမၤသးဒ်န့ၣ်ဒီး ကဂဲၤဆၢထၢၣ်ဒ်သိး အကသးအိၣ်သုလီၤ. အဂ့ၢ်ဒ်အံၤ, ယွၤမ့ၢ်တၢ်စံၣ်ညီၣ်အကစၢ်လီၤ. ပှၤလၢအကွၢ်လၢ်အကျဲန့ၣ် ဘၣ်ဆိၣ်ဂ့ၤခဲလၢာ်လီၤ.” ပှၤလၢအအိၣ်ခိးယဟိဝၤယွၤလၢ တၢ်ဝံသးစူၤအပူၤန့ၣ် ကဒိးန့ၢ်ဘၣ် တၢ်ဆိၣ်ဂ့ၤထူးထူးတီၤတီၤ လၢခဲအံၤ ဒီးလၢခါဆူညါဟီၣ်ခိၣ်သီအပူၤလီၤ.
၁၈. ပကဒိးန့ၢ်ဘၣ် တၢ်ဆိၣ်ဂ့ၤ မနုၤလဲၣ်.
၁၈ ဖဲကစၢ်ယွၤအခ့အပှၤတဖၣ် နုာ်လီၤလၢ ဟီၣ်ခိၣ်သီပူၤအခါ အဝဲသ့ၣ်တထံၣ်ဘၣ် တၢ်ကီတၢ်ခဲ ဒ်မုၢ်မဆါတနံၤအံၤ အသိးလၢၤဘၣ်. တၢ်တတီတလိၤဒီး တၢ်လၢအမၤဘၣ်ဒိ အဝဲသ့ၣ်အသးတဖၣ် တအိၣ်လၢၤဘၣ်. (လီၣ်ဖျါ ၂၁:၄) ပတလိၣ်ဘၣ်ယိၣ်တၢ်လၢၤဘၣ် မ့ၢ်လၢ တၢ်ကအိၣ်လၢလၢပှဲၤပှဲၤ လၢပှၤကိးဂၤဒဲးအဂီၢ်လီၤ. (စံးထီၣ်ပတြၢၤ ၇၂:၁၆; ယၡါယၤ ၅၄:၁၃) ပကဒိးန့ၢ်ဘၣ် တၢ်ဆိၣ်ဂ့ၤတဖၣ်အံၤ သပှၢ်တၢၢ်လီၤ.
၁၉. ခဲအံၤ ယဟိဝၤယွၤသိၣ်လိပှၤ တၢ်မနုၤလဲၣ်.
၁၉ ခဲအံၤ ယဟိဝၤယွၤမၤလိထီၣ်ပှၤ ဒ်သိးပကမၤနၢၤကွံာ် လုၢ်လၢ်လၢတဂ့ၤဘၣ်တဖၣ် ဒီးမၤဒိၣ်ထီၣ်အါထီၣ် ခရံာ်ဖိအတၢ်ဂ့ၤတၢ်ဝါလၢ ယဟိဝၤယွၤဘၣ်သူၣ်ဘၣ်သးဝဲတဖၣ်လီၤ. အဃိ တဘၣ်သးဟးဂီၤဒီး ဟ့ၣ်အၡူတဂ့ၤ. ပကဒိးန့ၢ်ဘၣ်တၢ်အိၣ်မူ လၢအဂ့ၤလီၤ. အဃိ ဖဲပအိၣ်ခိးကွၢ်လၢ်တၢ် အဆၢကတီၢ် မ်ပအိၣ်ဒီးတၢ်သးခုလၢ ပအိၣ်ခိးယဟိဝၤယွၤ လၢတၢ်ဝံသးစူၤအပူၤ ဒီးမၤတၢ်လၢအအဲၣ်ဒိး မၢပမၤန့ၣ်တက့ၢ်.
တၢ်သးဝံၣ် ၁၁၈ “မၤအါထီၣ်ပတၢ်နာ်”
^ လံာ်အဆၢ. 5 မ့ၢ်နထံၣ်ဘၣ်ပှၤတဂၤဂၤလၢ အမၤတ့ၢ်ယဟိဝၤယွၤအတၢ်မၤ ဖးယံာ် တဲဝဲလၢ ‘ယတဆိကမိၣ်လၢ ဟီၣ်ခိၣ်လၢမုၣ်ကီၤလံၢ်ပၢဝဲအံၤ ကအိၣ်ယံာ်ထဲအံၤညါဘၣ်.’ ပအဲၣ်ဒိးလၢ ယဟိဝၤယွၤကမၤလီၤမၢ်ကွံာ် တၢ်အၢတၢ်သီလၢ ပထံၣ်ဘၣ်အီၤတဖၣ်အံၤ သပှၢ်ကတၢၢ်လီၤ. ဘၣ်ဆၣ် ဒ်သိးတၢ်သ့ၣ်တဖၣ်အံၤ ကကဲထီၣ်သးအဂီၢ် ပကဘၣ်အိၣ်ဒီး တၢ်ဝံသးစူၤလီၤ. လၢတၢ်မၤလိအံၤအပူၤ ပကထံၣ်ဘၣ် လံာ်စီဆှံ အတၢ်ဟံးစုနဲၣ်ကျဲတနီၤလၢ ကမၤစၢၤပှၤဒ်သိး ပကအိၣ်ခိးတၢ်လၢ တၢ်ဝံသးစူၤအပူၤလီၤ. ပကတဲသကိး တၢ်အိၣ်သးခံခါလၢ ဘၣ်မနုၤအဃိ ပဘၣ်အိၣ်ခိး ယဟိဝၤယွၤလၢ တၢ်ဝံသးစူၤအပူၤလဲၣ်. လီၢ်ခံကတၢၢ် ပကတဲသကိး ပှၤလၢအအိၣ်ခိး ယဟိဝၤယွၤလၢ တၢ်ဝံသးစူၤအပူၤန့ၣ် ကဒိးန့ၢ်ဘၣ် တၢ်ဆိၣ်ဂ့ၤဒ်လဲၣ်န့ၣ်လီၤ.
^ လံာ်အဆၢ. 56 တၢ်တဲဖျါထီၣ်တၢ်ဂီၤ အခီပညီ– စးထီၣ်လၢ ဒီပုၢ်ဝဲၢ်မုၣ်အနီၢ်ဆံးအခါ အဃ့ဘါထုကဖၣ်လၢ ယဟိဝၤယွၤအအိၣ်ထီဘိလီၤ. ဖဲအနီၢ်ဆံးအခါ အမိၢ်အပၢ်သိၣ်လိအီၤလၢ ကဘၣ်ဃ့ဘါထုကဖၣ်ဒ်လဲၣ်. ဖဲအသးစၢ်အခါ အဝဲမၤပှၤလဲၤလၢညါ ဒီးဃ့ဘါထုကဖၣ်ဒ်သိး ယဟိဝၤယွၤ ကဆိၣ်ဂ့ၤအတၢ်စံၣ်တဲၤတဲလီၤလီၤ. ပူၤကွံာ်အါနံၣ် ဖဲအဝၤအိၣ်တဆူၣ်ဘၣ်အခါ အဝဲဃ့ကညးယဟိဝၤယွၤလၢ ကဟ့ၣ်အီၤတၢ်ဂံၢ်တၢ်ဘါလၢ ကလဲၤခီဖျိတၢ်ကီတၢ်ခဲအဂီၢ်လီၤ. ခဲအံၤ ဒ်အမ့ၢ်မုၣ်ကမဲတဂၤအသိး အဝဲဃ့ဘါထုကဖၣ် ဒီးနာ်ဝဲလၢယဟိဝၤယွၤ ကစံးဆၢအတၢ်ထုကဖၣ် ဒ်လၢညါအသိးလီၤ.
