1-2. Yinki beto ke zonzila na artikle yayi?

YINKI ya ke salá nge na ntima ntangu nge ke na vingilá koli, kasi ya ke na kwizá ve na mbangu? Ya ke lembisá nge? Bingana 13:12 ke zonzá: ‘Kivuvu yina ke lunganá ve na mbangu ke salá ti ntima bela.’ Kasi, yinki ya ke sala nge si ba me zonza na nge kima yina ke na salá ti koli ya nge kuma ntete ve? Kuwa mambu yayi lenda pesa nge ngolo ya kuvingila na ntima mosi.

² Na artikle yayi, beto ke tala mwa baverse ya Biblia yina lenda sadisa beto na kukulisa mpe kubumba ‘kifu ya kuvingilá.’ (Mika 7:7) Na manima, beto ke tala bima zole yina lenda lomba na beto na kuvingila tii ntangu Yehova ke sala kima. Na kumanisa, beto ke tala babima ya mbote yina Yehova me bumbila na ba yina ke lemba ve na kuvingila.

3. Yinki Bingana 13:11 ke longá beto?

³ Bingana 13:11 ke longá beto samu na yinki beto me lunga kuvanda na ntima ya yinda. Ya ke zonzá: ‘Bimvwama yina muntu ke zwá na mbangu ke manisa, kasi bimvwama ya muntu yina ke vukisá bima malembe-malembe ke kuma mingi.’ Yinki verse yayi ke na longá beto? Muntu ya mayela ke ve na ntima ya tiya, yandi ke salá bamambu malembe-malembe. Na manima, yandi ke zwá bima ya mbote.

4. Wapi mambu ya mbote ke na basiká na Bingana 4:18?

⁴ Bingana 4:18 ke zonzá ti ‘nzila ya bantu ya mbote ke faso nsemo ya suka yina ke kwendá kumá kaka mingi tii Ntangu ke kuma ngolo.’ Beto ke sadilá verse yayi na kulakisa ti, Yehova ke sadisá bisadi ya yandi na kuzaba dikanisi ya yandi malembe-malembe. Verse yayi lenda sadisa mpe beto na kuzaba faso muntu ke kulá na kimpeve, mpe ke tungá kikamarade na Yehova. Kukula na kimpeve, ke baká ntangu. Si beto ke longoká mpe ke sadilá bamambu  yina beto ke zwá na Biblia mpe na organizasion ya Yehova, malembe-malembe, beto ke banda kusala bamambu faso Yesu. Mpe, beto ke lutila dyaka kuzaba Nzambi. Beto zonzila ekzample mosi yina Yesu baká, yina ke sadisa beto na kusimba mambu yayi.

5. Wapi ekzample Yesu sadilá samu na kulakisa ti ya ke baká ntangu na muntu na kusala bachanjema na luzingu ya yandi?

⁵ Yesu sadilá ekzample mosi na kulakisa ti nsangu ya Kimfumu ya Nzambi yina beto ke precheke ke faso bambuma yina muntu ke kundá na bilanga. Ya ke kulá fioti-fioti na kati ya bantima ya bantu ya mbote. Yandi zonzá: ‘Mbuma yina ke basiká mpe ke yelá. Kasi [muntu yina ke kundá mbuma] ke zabá ve mutindu ya ke salamá. Ntoto ke menisá yawu mosi bambuma. Ya ke basisá ntete yinti. Na manima, yinti ke banda na kubasisa mbuma, mpe mbuma ke yelá.’ (Mrk. 4:27, 28) Yinki Yesu vandá sosa kuzonza? Yesu vandá sosa kuzonza ti kaka faso yinti ke kulá malembe-malembe, ba yina ke ndimá nsangu ya Kimfumu ya Nzambi, ke kulá mpe na kimpeve malembe-malembe. Na kifwani, ntangu muntu yina ke longoká Biblia ke kumá pene-pene na Yehova, beto ke banda kutala bachanjema ya fioti-fioti yina yandi ke banda kusala na luzingu ya yandi. (Ef. 4:22-24) Kasi beto zimbana ve ti, ni Yehova ke salá ti mbuma yina beto kundá na ntima ya muntu kulá.—1 Ko. 3:7.

6-7. Yinki beto ke na longoká na faso Yehova yidiká ntoto?

⁶ Yehova ke ve na ntima ya tiya. Yandi ke baká ntangu yina me lunga samu na kusala kima yina yandi me zola. Yandi ke salá faso yayi samu na kupesa nkembo na nkumbu ya yandi mpe kusadisa ba yina yandi ke zolá. Na kifwani, beto zonzila faso Yehova bongisá malembe-malembe ntoto samu ya kuma yinzo ya kitoko samu na bantu.

⁷ Biblia ke zonzá ti ntangu Yehova vandá yidika ntoto, yandi salá ‘bandilu ya yawu,’ ‘ditadi ya mfunu yina ke simbá yawu,’ mpe tulá ‘bafondasio ya yawu.’ (Yobi 38:5, 6; Nku. 104:5) Na manima, yandi baká dyaka ntangu ya kutala faso bima yina yandi yidiká vandá talana.  (Kub. 1:10, 12) Kanisa na kilengi yina vandá na ba-ange ntangu ba vandá tala mosi na mosi ya bima ya malu-malu yina Yehova vandá yidika. Ya natá bawu na kubanda ‘kusala makelele ya kilengi.’ (Yobi 38:7) Yinki ya ke na longá beto? Ya baká bamvula mingi na Yehova na kuyidika ntoto, ba-etwale mpe bima nyonso ya moyo. Kasi, samu Yehova baká ntangu nyonso yina, yandi kwizá tala ti bima yina yandi yidiká vandá ‘mbote mingi.’—Kub. 1:31.

8. Yinki beto mase zonzila?

⁸ Faso beto me tala yawu, ya ke na ba-ekzample mingi na Biblia yina ke na lakisá ti beto me lunga kuvanda na ntima ya yinda. Ntangu yayi, beto tala bima zole yina ke lombá na beto na kulemba ve na kuvingila Yehova.

9. Na wapi mambu beto lenda vanda na nsatu ya kuvingila Yehova?

⁹ Beto zolá vingila tii ntangu Yehova ke pesa beto kima yina beto ke na lombá yandi na lusambu. Ntangu beto ke vandá na bamambu ya mpasi yina ke kwamisá beto to ntangu beto ke nwaná na kifu mosi ya yimbi, beto ke vandá na nsatu Yehova sadisa beto. Kasi, bantangu ya nkaka, beto ke talá ti yandi ke na salá ve na mbangu mambu yina beto ke na lombak’ yandi. Samu na yinki Yehova lenda baka ntangu avan na kupesa beto kima yina beto ke na sosá?

10. Samu na yinki beto zolá vanda na ntima ya yinda ntangu beto ke lombá kima na Yehova?

¹⁰ Ntangu beto ke sambilá, Yehova ke wá bamambu nyonso yina beto ke zonzilak’ yandi. (Nku. 65:2) Balusambu ya beto yina ke katuká na ntima ke lakisak’ yandi ti beto ke na kiminu na yandi. (Ebr. 11:6) Ntangu beto ke sambilá Yehova samu yandi sadisa beto na kusala bamambu yina yandi zola, yandi mpe ke vandá na nsatu ya kutala bangolo yina beto mosi ke na salá. (1 Yoa. 3:22) Kubika kifu ya yimbi lenda baka mwa ntangu. Na yawu, beto zolá vanda na ntima ya yinda mpe kunwana samu na kusala bamambu yina beto ke zonzá na balusambu ya beto. Yesu lakisá ti, bantangu ya nkaka, Yehova ke vanda na nsatu beto vingila samu yandi pesa beto kima yina beto me lomba na yandi. Yandi zonzá: “Beno [lemba ve na] kulomba, mpe ba ke pesa beno. Beno [lemba ve na] kusosa mpe beno ke kuzwa. Beno [lembe ve na] kukonkota mpe ba ke [fungudila] beno. Ya tsyeleka, ba ke pesa na [muntu nyonso] yina ke lombaka. Muntu yina ke [sosá ke kuzwá], mpe ba ke [fungudila] muntu yina ke [konkotá.]” (Mat. 7:7, 8) Si beto landa konseye yayi mpe beto ‘lemba ve na kusambila,’ Tata ya beto ya zulu ke pesa beto kima yina beto ke na yawu nsatu.—Kol. 4:2.

11. Wa’ faso Baebre 4:16 ke na sadisá beto ntangu kima yina beto ke na lombá na Yehova ke na kwizá ve na mbangu?

¹¹ Ata kima yina beto ke na lombá ke na kwizá ve na mbangu, Yehova zonzá ti beto ke kuzwa yawu na ‘ntangu ya kulunga.’ (Tanga Baebre 4:16.) Ni na yawu, beto zolá dasukila ve Yehova si kima yina beto me lomba na yandi, yandi me pesa ntete ve beto yawu. Na kifwani, ntangu ya nkaka beto ke sambilá depwi bamvula mingi samu na kutala Kimfumu ya Nzambi kufwa yinza yayi. Yesu mpe zonzá na beto na kusambila samu na yawu. (Mat. 6:10) Kasi, ya ke vanda buzoba si muntu bika kusadila Yehova samu nsuka ya yinza yayi ke na kwizá ve na ntangu yina yandi ke na vingilá ya kuma. (Aba. 2:3; Mat. 24:44) Beto lemba ve na kuvingila Yehova mpe beto kontinye na kusambila yandi na kiminu nyonso. Nsuka ya yinza yayi ke kuma na ntangu yina me lunga. Yehova zaba ‘kilumbu mpe ntangu’ yina ya ke salama. Mpe kilumbu yango ke vanda kilumbu ya kulunga samu na beto nyonso.—Mat. 24:36; 2 Pi. 3:15.

12. Na wapi ntangu ya lendá vanda mpasi na beto na kuvanda na ntima ya yinda?

 ¹² Beto zolá vanda na ntima ya yinda ntangu beto ke kutaná na bamambu ya mpasi. Na yinza yayi, bantu ke nyokolá ba yina ke katuká na babwala ya nkaka, to ba yina ke ve ndinga mosi to mpusu mosi na bawu. Babakala ke nyokolá bakento mpe bantu ya nkaka ke nyokolá ba yina ke na makulu, meso mpe makutu ya kufwa, to ba yina ke na maladi ya yintu. Ba ke nyokolá bisadi mingi ya Yehova kaka samu ba ke landá mambu ya Biblia. Si mosi ya bamambu ya mpasi yayi ke na kuminá beto, beto zimbana ve mambu yayi Yesu zonzá: “Muntu yina ke kanga ntima tii na nsuka ke [vuuka].” (Mat. 24:13, nwt-MK) Kasi, yinki nge ke sala si nge me kwiza zaba ti mpangi mosi ya kimvuka me sala mambu ya vrai yimbi? Si nge me zaba ti bakuluntu me zaba mambu yango, nge ke bika kwandi bamambu na kati ya maboko ya bawu mpe kuvingila tii ntangu Yehova ke yidika bamambu na faso ya yandi? Beto zonzila samu na yinki ya lenda baka mwa ntangu na bakuluntu na kuyidika mambu yina mpangi mosi me sala.

13. Yinki Yehova ke na nsatu bakuluntu sala ntangu muntu ke salá disumu ya ngolo?

¹³ Ntangu bakuluntu me zaba ti mpangi mosi me sala disumu ya ngolo, ba ke sambilá Yehova samu na kuzwa “mayela yina ke [katuká] na zulu.” Mayela yango ke sadisá bawu na kutala bamambu faso Yehova ke na tadilak’ yawu. (Zaki. 3:17, nwt-MK) Dikanisi ya bawu ke ya kusala nyonso samu na kusadisa muntu yina me sala disumu na kubika “nzila ya yimbi.” (Zaki. 5:19, 20) Ba ke salá mpe nyonso samu na kubumba kimvuka mpe kupesa ngolo na ba yina mambu yango me lwalisa. (2 Ko. 1:3, 4) Ntangu bakuluntu ke zabá ti mpangi mosi me sala disumu ya ngolo, ba ke sosá ntete kuzaba mbote-mbote faso mambu me lutila. Kusala yawu ke baká ntangu. Na manima, ba ke sambilá mingi samu na kupesa bakonseye yina ke katuka na kati ya Biblia na faso ya mbote. Mpe, ba ke pesa yandi disipline ‘yina me bonga.’ (Yer. 30:11) Ata bakuluntu zolá vingila ve mingi, ba zolá sala mpe ve bamambu na mbangu. Ntangu bakuluntu ke landá nzila ya Yehova samu na kuyidika bamambu, kimvuka nyonso ke kuzwa bambote. Kasi, ata ntangu bakuluntu ke yidiká bamambu na faso ya mbote, bantangu ya nkaka, ba lenda belusa ve mputa ya muntu yina mambu yina me lwalisa. Si mambu ya faso yayi me kumina nge, yinki nge lenda sala samu ya lwalisa ve ntangu nyonso ntima ya nge?

14. Wapi ekzample ya Biblia lenda pesa nge ngolo si mpangi mosi ya kimvuka me lwalisa nge?

 ¹⁴ Muntu mosi to mpangi ya nge Temwe ya Yehova me sala kima yina me lwalisa ntima ya nge? Biblia ke na ba-ekzample ya mbote yina ke lakisá beto faso ya kuvingila Yehova tii ntangu yandi ke yidika bamambu. Na kifwani, bampangi ya Joseph yina butamá na yandi papa mosi, salak’ yandi bamambu ya yimbi. Ata faso yina, yandi kumá ve ndudi. Yandi biká ve kusadila Yehova. Na yawu, Yehova pesak’ yandi bima ya mbote samu yandi kangá ntima mpe lakisá ntima ya yinda. (Kub. 39:21) Na manima, Joseph lendá kulemvukila ba yina lwalisá ntima ya yandi mpe yandi talá faso Yehova bongisá luzingu ya yandi. (Kub. 45:5) Faso Joseph, beto lenda vanda na ngolo ntangu ba ke lwalisá ntima ya beto, si beto ke pene-pene na Yehova, mpe beto bika bamambu nyonso na maboko ya yandi.—Nku. 7:17; 73:28.

15. Yinki sadisá mpangi mosi ya kento na kukanga ntima ntangu ba vuninak’ yandi bamambu?

¹⁵ Ya vrai, bamambu nyonso ya yimbi yina ba lenda sala beto lenda vanda ve ntangu ya nkaka ngolo faso yina kuminá Joseph. Kasi, mambu ya yimbi vanda fioti to nene, ya ke salá beto nyonso mpasi na ntima. Ntangu nge ke zwá mambu na muntu ata yandi ke ve Temwe ya Yehova, nge ke kuzwa bambote mingi si nge sadila bamambu ya Biblia. (Flp. 2:3,4) Beto zonzila mambu yina kuminá mpangi mosi ya kento. Mpangi ya beto yayi lwalá mingi ntangu yandi kwizá zaba ti kento mosi yina vandá salá na yandi, vuninak’ yandi bamambu. Kasi, yandi dasuká ve na mbangu. Yandi baká ntangu ya kukanisa na Yesu. Ntangu ba vandá fingá Yesu, yandi vandá vutulá ve. (1 Pi. 2:21, 23) Samu yandi kanisá mingi na ekzample ya Yesu, yandi baká desizion ya kunata ve bamambu yinda. Na manima, yandi kwizá zaba ti kento yina vandá na maladi ya ngolo mpe basusi mingi. Na yawu, yandi vandá zonza bamambu kaka kidi-kidi. Yandi vandá ve muntu ya yimbi. Mpangi ya beto ya kento vandá na kilengi samu yandi kangá ntima na mantwala ya mambu ya yimbi. Ya salá ti, yandi bumba kizunu ya ntima.

16. Yinki lenda pesa beto ngolo na mantwala ya bamambu ya mpasi? (1 Piere 3:12)

¹⁶ Si ntima ya nge ke ya kulwala samu ba me sala nge mambu ya yimbi, kuzimbana ve ti Yehova ke pene-pene ya ba yina ‘ke na mawa.’ (Nku. 34:18) Samu nge ke lakisá ntima ya yinda  mpe nge ke losilak’ yandi kilo yina ke na nge, yandi ke zolá nge. (Nku. 55:22) Meso ya Yehova ke talá bamambu nyonso yina ke lutá mpe ni yandi ke jujeke ntoto nyonso. (Tanga 1 Piere 3:12.) Na yawu, si ya ke na mambu mosi ya ngolo yina nge ke na lendá ve kuyidika, kulemba ve na kuvingila tii ntangu Yehova ke sala kima.

17. Na Izaya 30:18, wapi garanti Yehova me pesa beto?

¹⁷ Na mwa bilumbu yina ke na kwizá, Tata ya beto ya zulu ke sadila Kimfumu ya yandi samu na kupesa beto bima mingi ya mbote. Izaya 30:18 ke zonzá: ‘Yehova ke vingilá na ntima ya yinda nyonso samu na kulakisa beno ntima ya mbote, mpe yandi ke telama samu na kutala beno mawa. Samu Yehova ke zolá ve mambu ya kutengama. Kilengi na ba yina nyonso ke lemba ve na kuvingila yandi.’ Ba yina ke lemba ve na kuvingila Yehova ke kuzwa bima ya mbote bubu yayi, mpe na yinza ya malu-malu yina ke na kwizá.

18. Wapi mambu ya kitoko beto ke kuzwa na mantwala?

¹⁸ Ntangu bisadi ya Nzambi ke kota na yinza ya malu-malu, ba ke tala dyaka ve bampasi yina ba ke na talá bubu yayi. Mambu ya yimbi ke vanda dyaka ve mpe bantu ke tala dyaka ve mpasi. (Luz. 21:4) Beto ke vanda dyaka ve na boma ya kuzwa ve bima yina beto ke na yawu nsatu, samu bima ke fuluka na ntoto. (Nku. 72:16; Iza. 54:13) Ya vrai, luzingu ke vanda kitoko!

19. Yinki Yehova ke na salá samu fioti-fioti beto kuma bantu ya mbote?

¹⁹ Bubu yayi deja, Yehova ke na sadisá beto na kubika bifu ya yimbi mpe na kukulisa bifu ya mbote. Yehova ke na salak’ yawu samu beto vanda bantu yina me lunga kuvanda na yinza ya malu-malu. Na yawu, kulemba ve mpe kubika ve na kusadila Yehova. Bima ya kulutila mbote ke na kwizá! Yina beto zaba bamambu ya mbote yina ke na kwizá na mantwala, na kilengi nyonso, beto vingila Yehova.