1-2. Ngano nti tutaluzula mu timoko ti?

NGANO bwe mona tala ti koli ye naku nsatu ka yita tula ko mu ntangu yi ta ya kêla? Ngano mbo fwema? Bingana 13:12 mbo yitâka ti: “Tima ti batomo kwe kêlese mutima tibelesaka.” Ngano bwe mona tala ti wizi zaba ti misamu mia mbote miasiri ti koli yo ka yitulandi mu ntangu yi wabele ya kêlaka? Mu bungu dia musamu wo, mbo bâ na luvivululu mpe mbo zolo mu kêla.

² Mu timoko ti, mbo tulongoka mitieno miamingi mia Bibila milendi tu bakisa mu “kêla na luvivululu lwalwansoni.” (Mika 7:7) Mbo tutaluzula mpe misamu miole mi tufweti kêlela Yehova na luvivululu. Ha manima, mbo tutaluzula tusakumunu tu baka bantu bô bazololo mu kêla Yehova.

3. Ngano Bingana 13:11 nti yitulongesaka?

³ Bingana 13:11 mbo yitulongesaka ka mu bungu dia nti tufweti bêla na luvivululu. Mbo yitâka ti: “Bimvwama bi babakilaka mu ntinu-ntinu, mbo bikonoka, kâ bimvwama bia muntu wuyonzekaka malembe-malembe, mbo bifuna.” Ngano nti tuta longoka mu verse yi? Muntu wa ndwenga mbo wuyirikaka misamu na luvivululu, mpe mbo wubakaka ndandu za mbote.

4. Ngano nti tuta longoka mu Bingana?

⁴ Bingana 4:18 mbo yitutêlaka ti: “Nzila ya bantu ba sungama yena ntiana mutsamina wa ntielolo bwisi wukwe kenge malembe-malembe tii bu wukwizi bâ ngolo.” Verse yo mbo yita tomo tu songela ti Yehova mbo kabakisaka kanda diandi malembe-malembe mu bakula makani mandi. Verse yo yilendi  tu bakisa mpe mu bakula ka bwe Mukristo wusilaka nsobolo mu luzingu lwandi, mpe kapusanaka kwe Yehova. Ntangu yayingi yifwanakanaka kwe muntu mu pusana kwe Yehova. Tala ti tubongele ntangu ya longoka na ya sarila malongi ma tubakaka mu Zu dia Nzambi na mu organizasio’andi, malembe-malembe mbo tukwizi bâ na timuntu tia bukristo. Mbo tukwizi tomo zaba Nzambi. Tataleno tifwani tia Yezu mu musamu wo.

5. Ngano Yezu ntia tifwani kahana tisongelaka ti ntangu yifwanakane ngatu muntu wasa nsobolo?

⁵ Yezu wasarila tifwani tisongelaka ka bwe nsangu za Timfumu zi tusamunaka zena ntiana mbutu ya fioti yikulaka malembe-malembe mu mitima mia bantu ba nsungu. Watâ ti: ‘Mbutu ni mu tomboka (mena), ni mu kula, [tikuni] yandi kazabi. Mutoto yandi beni tetese mbutu, menese muturila, heni bifulu, mboko ni mbutu zilebamane mu [bifulu].’ (Mak. 4:27, 28) Ngano Yezu bwe keri zolo tâka? Wabangula ti ntiana kwa muti wukulaka malembe-malembe, muntu wutambulaka nsangu za Timfumu mpe malembe-malembe wukulaka mu timpeve. Mu tifwani, mu ntangu milongoki mieto mia bunsungu mipusanaka kwe Yehova, mbo tumonaka nsobolo za mbote zi basaka. (Efz. 4:22-24) Kâ, tufweti bambukaka ti ni Yehova kurisaka mbutu.​—1 Kor. 3:7.

6-7. Ngano nti tuta longoka mu mpila Yehova yi kasarila mutoto?

⁶ Mu misamu miamiansoni mi kayirikaka, Yehova mbo kabongaka ntangu yifwanakane na luvivululu lwalwansoni mu manisa tisalu tiandi. Mbo kasilaka bo mu bungu dia mukembo wa nkumbu’andi na mu bungu dia ndandu za bantu bakaka. Tazonzeleno tifwani tia mpila yi kasarila mutoto malembe-malembe.

⁷ Bibila bu dizonzelaka mpila Yehova yi kasarila mutoto, mbo dizonzelaka ndilu zandi, mbuka zasikamana “bandu” diandi na “tari disikamanaka nzo.” (Yobe 38:5, 6) Wabonga mpe ntangu ya taluzula tisalu tiandi. (Mba. 1:10, 12) Ngano lendi banza ka bwe bambazi bamona, bu beri monaka bisalu bia Yehova bieri  yilamaka malembe-malembe? Diangana musamu wo watomo ba tâ nsayi yayingi! Ntiangu beri kawulaka, mpe beri sikaka nsaki. (Yobe 38:7) Ngano nti tuta longoka? Bima bia sala Yehova biabonga mafunda ma mvula mu yilama, kâ bu kataluzula bima biango, wamona ti bia “nguria bia mbote bieri.”​—Mba. 1:31.

8. Nti tuzonzela bwawu bu?

⁸ Ntiana bu tumweni wo mu bifwani biyôkele, tulendi baka mitieno miamingi misongelaka ti nsatu luvivululu ye neto. Bwawu bu mbo tutaluzula misamu miole mi tufweti kubamana mu kêla Yehova.

9. Mu ntia musamu tufweti kêlela Yehova kasala?

⁹ Tulendi bâ na nsatu ya kêla mvutu mu tusambulu tweto. Bu tusambilaka mu baka ngolo za telamana ntontolo peleko mu baka lubakusu lwa nunga bunôkena, tulendi mona ti Yehova zingila kata zingila mu hana mvutu mu tusambulu tweto. Mu bungu dia nti Yehova kalembo haninaka mvutu mu tusambulu tweto ho nkatika bendo?

10. Mu bungu dia nti tufweti bêla na luvivululu mu musamu wutariri tusambulu tweto?

¹⁰ Yehova tusambulu tweto twa katomo wirikilaka. (Mik. 65:2) Bu tumusambilaka na bunsungu, mbo kamonaka ti timinu tie neto mu Yandi. (Ebr. 11:6) Yehova nsayi mpe yibâka nandi bu kamonaka ti ngolo tusarilaka mu sala tintwari na lusambulu lweto na mu sarila luzolo lwandi. (1 Za 3:22) Buna, tufweti bâ na luvivululu, mpe tufweti sala tintwari na tusambulu tweto ntangu zazansoni zi tuyêlaka mu telamana tifu tia tibi peleko mu nunga bunôkena. Yezu watubakisa mu bakula ti ntangu zakaka tusambulu tweto ka bahanina to mvutu ho nkatika bendo ko. Watâ ti: ‘[Tatamaneno] mu lomba mbo baluhana, dingeno mbo lumona, konkoteno mbo baluziburila. Mu bungu ti kanso lomba mbo kabaka, wô dinga mbo kamona kanso konkota mbo bamuziburila.’ (Mat. 7:7, 8) Bu tulandaka malongi mo, na bu tutatamanaka mu tusambulu, tulendi bâ na lukwikulu ti Tata’eto dia ku mazulu mbo kawâ, mpe mbo kahanina tusambulu tweto mvutu.​—Kol. 4:2.

11. Ngano Bahebre 4:16 bwe yitubakisilaka mu ntangu yi tumonaka ti mvutu ya lusambulu ka yita kulu kwiza ko?

¹¹ Ni bu sa ti mvutu ya tusambulu tweto ka yita kulu kwiza ko, Yehova watukanisina ti mbo kahanina tusambulu tweto mvutu mu ntangu ya fwanakana. (Tanga Bahebre 4:16.) Buna, ka tufweti’â tabanzaka ko ti Yehova musamu wa mbi kayirikaka tala ti ka ta kulu hanina tusambulu tweto mvutu ko mu ntangu yi tuta ya kêla. Mu tifwani, bantu babingi basambilaka tûka mivu miamingi, ngatu bamona Timfumu tia Nzambi tikwizi tûla nsuka mu nza yi. Yezu mpe watâ ti tufweti sambirilaka musamu wo. (Mat. 6:10) Kâ, ka wubâ musamu wa ndwenga ko tala ti muntu wuhombese timinu tiandi mu Nzambi, mu bungu ti nsuka ya nza yi ka yita tula ko mu mpila yi kêlelaka yo bantu! (Hab. 2:3; Mat. 24:44) Ndwenga tusarilaka bu tutatamanaka mu kêla Yehova na bu tumusambilaka na timinu tiatiansoni. Nsuka mbo yitula mu ntangu yifwanane mu bungu ti Yehova watisolela ‘tilumbu na ngunga’ ya yitûla. Mpe tilumbu tîna, mbo tibâ tilumbu tia mbote mu bungu dia bantu babansoni.​—Mat. 24:36; 2 Pi. 3:15.

12. Mu ntia musamu wulendi bâ musamu wa mpasi kwe beto mu bâ na luvivululu?

 ¹² Tufweti bâ na luvivululu mu ntangu yi tukêlaka batuyirikila musamu na buderede. Bantu bakaka mu nza mbo baniekonaka bampwana’awu mu bungu ti ba bakento peleko ba babakala bena, mu bungu dia mukanda nitu’awu, zu diawu, hata diawu, peleko nsi’awu. Bakaka mbo babaniekonaka mu bungu ti tifuma tie nawu, peleko malari ma mutu me nawu. Bantu babingi mu kanda dia Yehova bakorelaka kondo kwa buderede mu bungu dia nkwikulu zawu zisikamanaka mu Bibila. Mu ntangu yi batuniekonaka mu mpila zo, tufweti bambukaka misamu mia tâ Yezu bu katâ: ‘Wô korela tii ku nsuka, mbo kavuka.’ (Mat. 24:13) Kâ, ngano nti fweti sa tala ti mpangi ya mu timvuka yita ku niekona? Bu mana zonzela musamu wo kwe bakuluntu, ngano mbo babikila wo, mpe mbo kêla na luvivululu bayirika wo mu nzila ya mitieno mia Yehova? Ngano bakuluntu nti bafweti sa mu ntangu muntu wusaka disumu dia dinene?

13. Ngano Yehova nti kazololo bakuluntu basa tala ti muntu wusiri disumu dia dinene?

¹³ Mu ntangu bakuluntu yi bawâka ti muntu wusiri disumu dia dinene mu timvuka, mbo basambilaka mu baka ndwenga ngatu babâ na mabanza ma Yehova mu musamu wo. (Zaki 3:17) Kani diawu ni mu bakisa muntu wusumukini mu kâla mu nzila ya mbote tala ti bulendi bâ. (Zaki 5:19, 20) Mbo bazoloko mu sa miamiansoni mi balenda mu kengerela timvuka na mu tindisa bantu ba bafwemese. (2 Kor. 1:3, 4) Bu bakipaka misamu mitariri masumu ma manene, mbo badingaka mu tomo zaba misamu miamiansoni. Musamu wo wulendi sa ti ntangu yayôka. Ha manima mbo basambilaka, mbo bahanaka malongi matûkaka mu Matsonoko, mpe mbo bahanaka nsembolo yifwanakane. (Yer. 30:11) Ni bu sa ti bakuluntu ka balembeketaka ko, ka babongaka mpe nzengolo mu ntinu-ntinu ko. Bakuluntu bu balandaka lutwalusu lutûkaka kwe Yehova, timvuka tiatiansoni mbo tibakaka ndandu. Ni bu sa ti mu mpila yo bayirikiri musamu, muntu wu babongele na kondo kwa buderede wulendi tatamana mu fwema. Tala ti musamu wo ni nge wuturiri, ngano nti lendi sa mu lembo tomo mona mpasi?

14. Ntia tifwani tia Bibila tilendi ku tindisa tala ti mpangi ye Mukristo yikulwekese?

¹⁴ Ngano nge beka bongela na kondo kwa buderede kwe muntu, kampe kwe mpangi ye Mbangi ya Yehova? Lendi baka bifwani bia nzitukulu mu Zu dia Nzambi bitulongesaka ka bwe tulendi kêlela Yehova kayirika musamu. Mu tifwani, ni bu sa ti Yozefe bamubongela na  kondo kwa buderede kwe bayaya ba yandi beni, ka bika ko ti masumu mawu masa ti kabâ muntu wa mbi. Kâ, watatamana mu tûla mabanza mandi mu tisalu tia Yehova, mpe Yehova wamusenda mu bungu dia luvivululu lwandi na mu bungu dia tifu tiandi tia korela. (Mba. 39:21) Ha manima, Yozefe wayizi bâ na lenda dia lemvokela bantu bamumwisa mpasi, mpe Yehova wamusakumuna. (Mba. 45:5) Ntiana Yozefe, mbo tubakaka lutindusu mu ntangu yi tupusanaka kwe Yehova, mpe yi tumubikaka kayirika misamu na buderede mu ntangu yifwanakane.​—Mik. 7:17; 73:28.

15. Ngano nti biabakisa mpangi yimosi ya yikento mu korela kondo kwa buderede na luvivululu lwalwansoni?

¹⁵ Wa matieleka, kondo kwa buderede kwakwansoni ka kudelakane’â ko na ko kwa bwabana na Yozefe, kâ beto bansoni mbo tumonaka mutima mpasi tala ti batumwisini mpasi mu mpila ni mpila. Bu tubâka na musamu na muntu, ni bu sa ti na muntu wulembolo Mbangi ya Yehova, mbo tubaka ndandu tala ti tusariri mitieno mia Bibila. (Flp. 2:3, 4) Tabongeno tifwani. Mpangi yimosi ya yikento yayizi mona mpasi ku mutima bu kayizi zaba ti mpwana’andi ya ku tisalu yeri lembo mu zoloko, mpe yeri mu zonzelaka mu mpila ya mbi kwe bantu bakaka. Kani kayirika musamu mu ntinu-ntinu, mpangi yo wabonga ntangu ya dimbitila mu tifwani tia Yezu. Bu beri mu fingaka, keri’â karisaka tituku ko. (1 Pi. 2:21, 23) Na mabanza mo mu mutu, mpangi yo ya yikento wabonga nzengolo ya yôkesa musamu wo. Ha manima, wayizi wâ ti mpwana’andi yo ya ku tisalu timbevo tia ngolo keri bêlaka, mpe tieri saka ti kabâ na lwaka lwalwingi. Mpangi yo ya yikento yayizi bakula ti misamu mieri mu yirikaka mpwana’andi yo ya ku tisalu, keri’â mia banzaka ko. Buna mpangi yo ya yikento yayizi bâ mu nsayi mu bungu ti wakorela misamu mio mia mbi mi beri mu yirikaka na luvivululu, mpe wayizi bâ mu tidzunu.

16. Ngano nti bilendi ku tindisa tala ti kondo kwa buderede ta korela? (1 Piere 3:12)

¹⁶ Tala ti kondo kwa buderede ta korela peleko musamu wakaka wa mpasi wufwemesaka, bambuka ti Yehova penepene kena na bô bê na mitima mia pasuka. (Mik. 34:18) Nge kazololo mu bungu dia luvivululu lwaku, mpe mu bungu ti dema diaku losaka kwe Yandi.  (Mik. 55:22) Yandi ni Mfundisi ya mutoto wawansoni. Misamu miamiansoni mia kamonaka. (Tanga 1 Piere 3:12.) Mu ntangu yi bwabana na misamu mia mpasi mi lendi lembo yirika, ngano mbo kêla Yehova na luvivululu lwalwansoni?

17. Tintwari na Izaya 30:18, ntia lukwikulu Yehova katuhanaka?

¹⁷ Ntamana, Tata’eto dia ku mazulu mbo katomo tu sakumuna mu nzila ya Timfumu tiandi. Izaya 30:18 mbo yitâka: “Kâ, Yehova mbo kata kêla na luvivululu lwalwansoni mu lu songela tiari tia mutima, mpe mbo katelama mu lusongela tiari. Mu bungu ti Yehova Nzambi ya buderede yena. Nsayi kwe bô bata tatamana mu mu kêla.” Bô batatamanaka mu kêla Yehova, mbo babaka tusakumunu twatwingi bwawu bu na mu nza ya môna yita kwiza.

18. Ngano ntia tusakumunu tuta kêla?

¹⁸ Mu ntangu yi dikota mu nza ya môna, kani kabwe kanda dia Nzambi ka divutu’â bâ na nsatu ko ya korela misamu mi dibwabanaka na mio lumbu ti. Kondo kwa buderede mbo kuwa, mpe mpasi ka zivutu’â kwa sâla ko. (Nza. 21:4) Ka tuvutu’â kêla bima bie neto nsatu ko na lwaka mu bungu ti mbo bibâ bia funa ha mutoto. (Mik. 72:16; Iza. 54:13) Diangana, mbo wubâ musamu wa nguria wa mbote!

19. Malembe-malembe Yehova mu ntia musamu kata tu kubikila?

¹⁹ Yehova mbo katukubikaka lumbu ti mu bâ mu lutumu lwandi bu katubakisaka mu telamana bifu bia bibi, na mu bâ na bifu bia bibote bimutâka nsayi. Kunôkandi, mpe kubikandi mu sarila Yehova. Luzingu lwa lubote ku matu lwena! Buna, bu twe na tivuvu tia toma mu bungu dia bilumbu bita kwiza, tabêno na nsayi mu ntangu yi tuta kwe kêle Yehova kayirika misamu mi katâ!