1-2. He thuziakah hian eng nge kan sawiho vang?

I MAMAWH tak i thil chah chu i beisei huna a lo thlen loh hian engtin nge i awm ṭhin? Lungawi loh phah nân i hmang em? Thufingte 13:12-naa: “Beiseina tihkhawtlai hian thinlung a tinâ,” tih hi dik i ti ngei ang. Mahse, i thil chah chu i beisei huna a lo thlen theih lohna, chhan ṭha a awm a nih chuan engtin nge ni ang? Chutiang hunah chuan, dawhthei taka i nghah ngei a rinawm.

² He thuziakah hian, “nghah peihna” nei tûr leh nei zawm zêl tûra min ṭanpui theitu Bible thu bul ṭhenkhat kan sawiho vang a. (Mik. 7:7, NW) Chumi zawhah, Jehova hma lâk hun dawhthei taka kan nghah a ngaihna dinhmun pahnih kan sawiho vang. A tâwpah, dawhthei taka Jehova nghâktute dawn tûr malsâwmnate kan sawiho bawk ang.

3. Jakoba 5:7-na thu chuan eng nge a târ lan?

³ Dawhtheihna kan neih a ngaih chhan entîrna pakhat chu Jakoba 5:7-ah târ lan a ni a. Chu Bible châng chuan: “Lalpa lo kal hma loh zawng chhel takin awm rawh u. Ngai teh u, lo neitu chuan ruah tui tla hmasa leh hnuhnûng chu a hmuh hma loh chuan chhel takin lei rah hlu tak chu a nghâk ṭhîn,” tiin a sawi a ni. Heta ṭang hian eng nge kan zir? Mi fing chuan fîmkhur tak leh dawhthei takin thil a ti ṭhîn a, rah ṭha tak a seng ṭhîn, tih hi.

4. Thufingte 4:18-naa chhinchhiah thu bul chuan eng nge a târ lan?

⁴ Thufingte 4:18-na chuan: “Mi felte kawng erawh chu chhûn ên lai tak pawha êng zual deuh deuh, êng fîm tak ang a  ni,” tiin a sawi a. Chûng ṭawngkamte chu Jehova’n a thiltum an hriatthiam theih nâna zawi zawia a mite a ṭanpui dân sawi nâna inâwm taka hman a ni a. Mahse, he Bible châng hi Kristian pakhatin thlarau lama hma a sâwnna chungchâng sawi nâna a huap zau zâwng pawha hman theih a ni. Thlarau lama hmasâwnna chu rei lo te chhûnga lang chhuak mai thei a ni lo va. Hun a ngai a ni. Pathian thu leh a inawpna pâwl aṭanga kan dawn kaihhruainate chu tih tak zeta kan zira kan nunpui chuan, zawi zawiin Krista neih ang miziate kan nei chho vang a. Pathian chanchin kan hre tam lehzual bawk ang. Chumi chungchânga Isua sawi entîrna hi i lo ngaihtuah ang u.

5. Isua’n zawi zawia ṭhan chhohna chu engtin nge a khaikhin?

⁵ Isua chuan Lalram thuchah kan hrilh chu mi rilru ṭha pute thinlunga zawi zawia ṭhang chho thlai chi te tak tê nên a khaikhin a. Ani chuan: “Chi chu, a [thehtu] hriat lohvin, lo ṭiakin lo ṭhang sela; chutiang chu a ni. Lei hian amahin rah a rawn chhuah ṭhîn; a tîr berah a kûng, chumi hnuah chuan a vui; tin, chumi hnu lehah a vuiah chuan buh fang pum chu,” tiin a sawi. (Mk. 4:27, 28) Isua sawi tum chu eng nge ni? Thlai chi chu zawi zawia a ṭhang chho angin, Lalram thuchah pawmtute pawh thlarau lamah zawi zawiin an ṭhang chho a ni. Entîr nân, kan Bible zirpuite’n Jehova an hnaih lehzual hian, a ṭha lama an inthlâkthlengna tam tak chu kan hmu ṭan a. (Eph. 4:22-24) Mahse, chutianga ṭhantîrtu chu Jehova a ni tih kan hre reng tûr a ni.—1 Kor. 3:7.

6-7. Jehova’n leilung a siam dân aṭangin eng nge kan zir?

⁶ Jehova chuan a hnathawh a zawh fel nân hun eng anga rei pawh ngai dâwn mah se, dawhthei takin a thawk ṭhîn a. Chutianga a tih chhan chu, a hming tihropui nân leh mi dangte hlâwkpui nân a ni. Zawi zawia mihringte chênna tûr leilung a siam dân hi han ngaihtuah teh.

⁷ Bible chuan Jehova’n leilung a siam dân chungchângah “a len lam” a bithliahin,  “a nghahchhan” a tinghet a, “a kil lungphûm” a phûm tih a sawi a. (Job. 38:5, 6) A thil siamte endik nân hun a hmang bawk. (Gen. 1:10, 12) Jehova’n thil thar a siam apianga vântirhkohte’n an hmuh huna an rilru awm dân tûr chu i mitthla thei em? An va phûr dâwn tak êm! Chutianga an phûr êm avâng chuan “an au” hial a ni. (Job. 38:7) Heta ṭang hian eng nge kan zir? Jehova’n a thil siamte a zawh fel theih nân kum sâng tam tak a ngai a; mahse, a thil siam zawng zawngte ngun taka a han endik chuan “ṭha a ti êm êm” a ni.—Gen. 1:31.

8. Tûnah eng nge kan sawiho vang?

⁸ A chunga kan hriat tâk entîrnate ang khân, Bible-ah hian dawhtheihna kan neih a ngaih chhan thu bul tam tak kan hmu a ni. Tûnah, Pathian Jehova kan nghah a ngaihna dinhmun pahnih i lo sawiho vang u.

9. Jehova kan nghah a ngaihna dinhmun pakhat chu eng nge ni?

⁹Kan ṭawngṭainate chhân a nih hun chu kan nghah a ngai thei. Fiahna hmachhawn thei tûr, a nih loh leh kan chak lohnate hneh thei tûra chakna dîla kan ṭawngṭai hian, kan beisei aiin a chhânna kan hmu har niin kan ngai mai thei. Engvângin nge Jehova’n kan ṭawngṭaina zawng zawng chu a chhân nghâl vek loh?

10. Engvângin nge Jehova’n kan ṭawngṭainate a chhân hun chu dawhthei taka kan nghah a ngaih?

¹⁰ Jehova chuan kan ṭawngṭainate chu ngun takin min ngaihthlâksak a. (Sâm 65:2) Tih tak zeta kan ṭawngṭainate chu kan rinna târ lanna angin min thlîrsak a ni. (Heb. 11:6) Kan ṭawngṭaina mila nun kan tum tlatna leh a duh zâwng tih kan tumna chu hmuh a duh a. (1 Joh. 3:22) Chuvângin, chîn dân ṭha lo kan neihte emaw, kan chak lohnate emaw hneh kan tum apiangin dawhtheihna lantîr a, kan ṭawngṭaina mila thil kan tih a ngai thei a ni. Isua chuan kan ṭawngṭaina ṭhenkhat chu chhân nghâl a ni lo thei tih hre thiam tûrin min ṭanpui a. Ani chuan: “Dîl rawh u, tichuan an pe ang che u; zawng rawh u, tichuan in hmu ang; kik rawh u, tichuan, an hawnsak ang che u; tu pawh a dîl apiang chuan an hmu ṭhîn a; tu pawh a zawng chuan an hmu ṭhîn a; tu pawh a kik chu an hawnsak dâwn a ni,” tiin min fuih a. (Mt. 7:7, 8) A fuihna zâwma kan “ṭawngṭai fan fan” chuan, kan Pa vâna mi chuan min ngaihthlâksakin, min chhânsak ang tih kan ring tlat thei a ni.—Kol. 4:2.

11. Engtin nge 1 Petera 5:6-na chuan kan ṭawngṭainate chhân a nih nghâl loh huna min ṭanpui?

¹¹ Kan ṭawngṭaina chhânna kan hmu nghâl lo nia a lan hunah pawh, Jehova chuan “a hun têah” min chhânsak a tiam a. (1 Petera 5:6 chhiar rawh.) Chuvângin, kan ṭawngṭainate chu kan duh anga ranga chhân a nih loh pawhin Jehova kan mawhphuh ngai tûr a ni lo. Entîr nân, mi tam tak chuan Pathian Ramin he khawvêl hi a tihboral theih nân kum tam tak chhûng an lo ṭawngṭai tawh a. Isua pawhin chumi atâna ṭawngṭai tûrin min hrilh reng a ni. (Mt. 6:10) Mahse, mihringte beisei huna tâwpna a lo thlen loh avângin, tu emawin Pathian a rinna a hloh a nih chuan a va âtthlâk dâwn tak êm! (Hab. 2:3; Mt. 24:44) Jehova nghâk tlat a, rinna nêna a hnêna ṭawngṭai zawm zêl chu a finthlâk a ni. Tâwpna chu a hun dik takah a rawn thleng ang; Jehova’n chumi “nî leh a hun” chu a ruat tawh si a. Chu bâkah, chu nî chu mi zawng zawng tâna hun ṭha ber a ni ngei bawk ang.—Mt. 24:36; 2 Pet. 3:15.

12. Eng dinhmunah nge dawhtheihna lantîr a harsat lehzual mai theih?

¹²Rorêlna dik a awm theih nâna kan nghah  lai hian dawhtheihna kan neih a ngai thei. Khawvêl mite chuan a mipatpui leh hmeichhiatpui ni lo te, an hnampui ni lo te, leh ram dang mite chu dik lo takin an cheibâwl ṭhîn a. Mi dangte chuan taksa lamah emaw, rilru lamah emaw rual an ban loh avângin dik lo taka cheibâwl an tâwk a ni. Jehova mite zînga tam tak pawhin Bible ṭanchhan an rinnate avângin dik lo taka rorêlna an hmanchhawn bawk. Chutianga dik lo taka cheibâwl kan nih hunah, Isua thusawi: “A tâwp thlenga tuar peih apiang chu, chu mi ngei chu chhandamin a awm ang,” tih hi kan hre reng tûr a ni. (Mt. 24:13) Mahse, kohhran chhûnga tu emawin thil sual lian tak a ti tih hre ta ila, engtin nge ni ang? Upate hnêna hriattîr a nih hnuah, Jehova kaihhruaina mila an chinfel theih nâna hma an lâk hun chu dawhthei takin kan nghâk ang em? Chutianga hma lâknaah chuan engte nge tel thei?

13. Jehova kaihhruaina mila buainate chinfelnaah eng nge tel?

¹³ Upate chuan kohhranah tu emawin thil sual lian tak a ti tih an hriat hunah, dinhmun chu Jehova thlîr anga an thlîr thiam theih nân a hnênah “chung lam aṭanga finna” chu an dîl ṭhîn a. (Jak. 3:17) An thiltum chu, a theih phawt chuan thil sual titu chu ‘a kawng bona ata hawi kîrtîr’ hi a ni. (Jak. 5:19, 20) Kohhran vênhim nân leh a sawhkhâwk tuartute an thlamuan theih nâna an tih theih apiang tih chu an duh bawk. (2 Kor. 1:3, 4) Upate chuan thil sual lian tak tih chungchânga thubuai an chei hunah, thil nih dân engkim an hre hmasa tûr a ni a, chu chuan hun a duh thei a ni. Tichuan, ṭawngṭaiin leh fîmkhur takin thil sual titu chu Bible ṭanchhanin zilhna an pe a, “a tâwk lekin” an thunun a ni. (Jer. 30:11) Upate chu an thiltihah vuaicha lo mah se, thu tlûkna siam erawh an hmanhmawh lo. Upate’n Jehova kaihhruaina an zawm hian kohhrana mi zawng zawngin an hlâwkpui a ni. Mahse, buaina chu chutianga chinfel a nih hnuah pawh, a tuartu chu rilru nâin a la awm reng pawh a ni thei. Chutiang chu i tawng a nih chuan, i rilru natna tiziaawm tûrin eng nge i tih theih?

14. I Kristian unau tu emawin i rilru a tina a nih chuan, Bible-a tu entîrnain nge thlamuanna nei tûra ṭanpui thei che?

¹⁴ I Kristian unaute pawh tiamin, tu emawin i rilru a tina tak zet tawh ngai em? Bible-ah hian dinhmunte chingfel tûra Jehova kan  nghah theih dân min zirtîrtu entîrna ṭha tak takte i hmu thei a ni. Entîr nân, Josefa chuan a pianpui unaute ngeiin dik lo taka an cheibâwl avângin hrehawm tuar mah se, chu chu anmahni huat phah nân a hmang lo. Chu aiin, chhel taka a tawrh avânga malsâwmna tam tak petu Jehova rawngbâwl chu a ngaihven tlat zâwk a. (Gen. 39:21) Hunte a liam zêl chuan, a rilru natnate chu theihnghilhin, Jehova’n a ṭanpui dânte chu a ngaihtuah tlat a ni. (Gen. 45:5) Josefa anga Jehova kan hnaih a, rorêlna dik a rawn thlentîr hun tûr kan nghah hian, thlamuanna kan nei a ni.—Sâm 7:17; 73:28.

15. Engin nge unaunu chu dik lo taka cheibâwlna a tawh chu dawhthei taka tuar chhuak tûr leh thlamuanna nei tûra ṭanpui?

¹⁵ Ni e, rorêlna dik lo zawng zawng hi Josefa thiltawn ang tluka hrehawm a ni vek kher lo; chutih rualin, dik lo taka cheibâwlna chuan kan rilru a la tina thei tho a ni. Jehova be lotute pawh tiamin, tu emaw nêna kan inhmuh thiam loh hunah Bible thu bulte kan nunpui tlat a nih chuan kan hlâwkpui ang. (Phil. 2:3, 4) Thiltawn pakhat hi han ngaihtuah teh. Unaunu chu a hnathawhpui pakhatin mi dang bulah a chanchin dik lo takin a sawi tih a hriat chuan a rilru a na hle a. Mahse, chhâng lêt nghâl lovin, chutiang dinhmuna Isua entawn tûr siamte chu a ngaihtuah a. Isua chuan mi hauva a awmin a hau lêt ve lo. (1 Pet. 2:21, 23) Chu chu rilrua vawng rengin, a thawhpuinu chu engtin mah a ti lêt lo va. A hnuah, a thawhpuinu chuan natna khirh tak leh rilru hahna nasa tak a lo nei reng tih unaunu chuan a hria a ni. A thawhpuinu thusawite chu a tum rêng vâng a ni lo tih a pawm ta a. Dik lo taka cheibâwlna chu dawhthei taka a tawrh theih avângin a hlim hle a, chhûngrila thlamuanna a nei bawk a ni.

16. Rorêlna dik lo i hmachhawn hunah engin nge thlamuan thei che? (1 Petera 3:12)

¹⁶ Rorêlna dik lo i hmachhawn emaw, chhan dang avânga i rilru a nâ emaw a nih chuan, Jehova’n “thinlunga lungchhiate” chu a hnaih ṭhîn tih hre reng ang che. (Sâm 34:18) Ani chuan i dawhtheihna avâng leh a chunga i ritphurhte i nghah avângin a hmangaih che a. (Sâm 55:22) Ani chu lei chung zawng zawnga Rorêltu a ni. Eng thil mah hi a hmuh loh leh  a hriat loh rêng a awm lo. (1 Petera 3:12 chhiar rawh.) I chinfel theih loh harsatnate i hmachhawn hunah Jehova’n hma a lâk hun chu i nghâk ang em?

17. Isaia 30:18-a chhinchhiah angin, Jehova’n eng nge min tiam?

¹⁷ Nakin lawkah, kan Pa vâna mi chuan a Lalram hmangin malsâwmna tam tak min pe tawh ang. Isaia 30:18-na chuan: “LALPA chuan a khawngaih theihna tûr che uin a nghâk ang a, a lainat theihna tûr che uin chawimawiin a awm ang. LALPA chu rorêl felna Pathian a ni si a; amah nghâktute zawng zawng chu an eng a thâwl e,” tiin a sawi a ni. Jehova beiseitu zawng zawngte chuan tûnah leh nakin hunah malsâwmna tam tak an dawng ang.

18. Eng malsâwmnate’n nge min hmuak?

¹⁸ Pathian mite chuan khawvêl thara an luh hunah lungkhamna leh harsatnate hi an hmachhawn leh tawh ngai lo vang. Rorêlna dik lo a awm tawh lo vang a, natnate pawh a awm tawh hek lo vang. (Thup. 21:4) Mi tinin kan mamawhte chu hnianghnâr taka kan neih ṭheuh tawh dâwn avângin kan ngaihtuah buai a ngai tawh lo vang. (Sâm 72:16; Is. 54:13) Chu chu malsâwmna a va ni dâwn êm!

19. Eng atân nge Jehova’n tûnah min buatsaih?

¹⁹ Chumi hma zawng chuan, Jehova chuan a rorêlna hnuaia kan chên theih nân chîn dân ṭha lo kan neihte hneh tûr leh a lâwm zâwng miziate nei chho tûra min ṭanpuiin, min buatsaih mêk a ni. Chuvângin, lunghnualin beidawng mai suh. Nun ṭha ber chu a lo la thleng dâwn si a! Hma lam hun duhawm tak chu thlîr tlatin, Jehova’n a hnathawhte a zawh fel hun chu dawhthei takin i nghâk zawm zêl ang u!