1-2. Ina atikol ai dahaka baita herevalaimu?

BEMA boksi ta na o nariamu dinana ai basine kaumu, emu hemami be ede bamona? Bo badumu, a? Hereva Lada-isidia 13:12 na e gwaumu: “Helaro mai halahena ese lalo-hisihisi e havaraiamu.” To bema gabeai o diba boksi na badi namodia haida daidiai o laloa dinana ai se kau be ede bamona? Reana mai emu haheauka bona ura ida bo narimu.

² Ina atikol ai Baibul ena hahekau herevadia haida baita itamu, unu ese be durudamu mai haheaukada ida baita nari. (Mika 7:7) Bena, Iehova baita naria negadia rua baita herevalaimu. Bona dokonai, mai edia ura ida Iehova e nariamu taudia ese bae abi hahenamodia baita herevalaimu.

3. Hereva Lada-isidia 13:11 ena hahekau herevana ese dahaka e hadibadamu?

³ Hereva Lada-isidia 13:11 ese e hadibadamu dahaka dainai baita haheauka na namo. E gwaumu: “E abi kava kohudia na bae ore haraḡa-haraḡa, a ena kohu taidia taidia amo e haboumu tauna ese ena taḡa baine habadaia.” Una siri amo dahaka ta dibamu? Aonega tauna na mai haheaukana ida ḡau e kara namonamomu bona anina namona baine havaraia.

4. Hereva Lada-isidia 4:18 ena hahekau herevana ese dahaka e hadibadamu?

⁴ Hereva Lada-isidia 4:18 na e gwaumu, “Kara maoromaoro taudia edia dala na daba matana na heto; diarina na e bada e laomu ela bona dina e taramu.” Una hereva amo ta dibamu Iehova ese taina rua ena taunimanima e durudiamu ena ura  bae lalopararalaia totona. To, danu ina siri ese be durudamu baita lalopararamu edena dalai Kristen tauna ta ese ena mauri baine haidaua bona Dirava turana ai bainela. Ta na dia haraḡa herea to taina ruana Iehova turana ai be laomu. Bema ita na Dirava ena Hereva, bona ena orea amo ta abimu sisiba herevadia baita stadilai namonamomu bona baita badinamu, taina ruana Keriso ena kara baita hahedinaraimu. Bona danu, Dirava baita dibaia namonamomu. Mani Iesu ese una point e haheitalaia dalana aita laloa.

5. Edena haheitalai amo Iesu ese e hahedinaraia ta na taina ruana ena mauri baine haidaua diba?

⁵ Iesu ese haheitalai ta amo e hahedinaraia edena dalai ta harorolaiamu Basileia sivaraina na uhe maraḡina ta bamona kamonai taudia kudoudiai taina ruana e tubumu. Ia na eto: “Uhe na sibodia tuhutuhudia e tubu, ta na edia tubu dalana asi dibana. Tano sibona anina e havaraiamu, tuhutuhuna na guna, murinai na peka, gabeai anina peka lalonai.” (Mar. 4:27, 28) Iesu ena hereva anina be dahaka? Anina na uhe ta taina ruana e tubumu heḡereḡerena Basileia sivaraina e abia daemu tauna danu lauma dalanai taina ruana e tubumu. Heḡereḡere, eda Baibul stiuden na Iehova turana ai e laomu neganai, ta itaiamu edia mauri lalonai sensi namodia momo e kara. (Efe. 4:22-24) To baita laloatao Iehova ese una uhe maraḡina e hatubuamu.​—1 Kor. 3:7.

6-7. Iehova ese tanobada e karaia dalana amo dahaka ta dibamu?

⁶ Iehova na mai haheaukana ida ena ḡaukara e haḡuḡurumu. Unu e kara tomamu badina ladana baine hanamoa, bona ma haida baine durudia. Mani ina aita laloa, Iehova ese taina ruana tanobada e heḡaeḡaelaia taunimanima ese bae noholaia totona.

⁷ Iehova ese tanobada e karaia dalana na Baibul ese e herevalaia neganai e gwa, Iehova ese tanobada ena “lata bona lababa” e gwauraia, “badina e hadaia” bona “daiguni nadina e atoa.” (Iobu 38:5, 6) Bona ia na nega e ato e kara ḡaudia e haerodia.  (Gen. 1:10, 12) Iehova ese e karava ḡau matamatadia na aneru ese e itava neganai, edia hemami be ede bamona? Idia na e moale dikadika! Una dainai, mai moaledia ida e “lolo bou.” (Iobu 38:7) Una ese dahaka e hadibadamu? Laḡani tausen momo lalodiai Iehova ese tanobada, hisiu, bona mauri ḡaudia iboudiai e karadia to unu iboudiai e itadia neganai “nanamo heherea.”​—Gen. 1:31.

8. Hari be ma dahaka baita herevalaimu?

⁸ Tame herevalai haheitalaidia ese e hadibadamu Dirava ena Hereva ai hahekau herevadia momo ese haheauka karana e hahedinaraia. Hari, mai eda ura ida Iehova baita naria negadia rua mani aita herevalai.

9. Nega ede bamodiai Iehova baita naria be namo?

⁹ Reana eda ḡuriḡuri haeredia baita abi totona, baita narimu. Hahetoho ta baita haheaukalaia totona eiava eda manoka ḡauna ta baita hanaia totona, ta ḡuriḡurimu neganai reana baita mamiamu Iehova ese eda ḡuriḡuri haerena na se heni haraḡamu. Dahaka dainai Iehova ese eda ḡuriḡuri iboudiai haeredia na se heni haraḡamu?

10. Dahaka dainai mai haheaukada ida baita nari Iehova ese eda ḡuriḡuri haeredia baine heni totona?

¹⁰ Iehova ese ḡuriḡuri na e hakala heni namonamo. (Sal. 65:2) E itadamu mai momokanida ida Ia ta ḡuriḡuri heniamu karana ese eda abidadama ienai e hamomokaniamu. (Heb. 11:6) Iehova ihamoalena totona ienai heduru ta noimu neganai, ia na e uramu baine itada ta hekwarahimu iena ura baita badinaia. (1 Ioa. 3:22) Una dainai bema eda manoka ḡauna ta ihanaina totona, ta ḡuriḡurimu neganai namona na baita haheauka bona eda ḡuriḡuri heḡereḡerena baita kara. Iesu ese e durudamu baita laloparara eda ḡuriḡuri haida haeredia na basita abi haraḡamu. Ia na eto: “Ba noinoi, do baine henimui; ba tahua, do ba davaria; ba pidipidi, iduara baine hekeho emui. Badina be noinoi taudia iboudiai na e abimu; itahuna tauna ese e davariamu; iduara na e hekehomu, pidipidi tauna ena.” (Mat. 7:7, 8) Bema una sisiba baita badinaiamu bona ‘baita ḡuriḡuri goadamu,’ ta dibamu Tamada gubai ese eda ḡuriḡuri be kamonaimu bona haeredia be henimu.​—Kol. 4:2.

11. Eda ḡuriḡuri haeredia asita abi haraḡamu neganai, edena dalai Heberu 4:16 ese baine duruda?

¹¹ Ena be eda ḡuriḡuri haerena na asita abia haraḡamu, to Iehova na e gwauhamata eda ḡuriḡuri na “nega maorona ai” baine haerelaia. (Heberu 4:16 ba duahia. *) Una dainai bema ḡau ta na ita ese ta laloamu dalanai se vara haraḡamu, gwau na Iehova basita henia. Heḡereḡere, momo na Dirava ena Basileia ese ina nega oromana baine haorea totona laḡani momo lalodiai e ḡuriḡuriva. Iesu danu e gwa una Basileia totona baita ḡuriḡuri. (Mat. 6:10) To bema Dirava iabidadama henina karana baita rakataniamu badina dokona na ta laloa neganai se kau, una na kavakava karana! (Hab. 2:3; Mat. 24:44) Aonega karana na Iehova baita naria bona mai eda abidadama ida Ia baita ḡuriḡuri henia. Dokona na nega korikori ai be kaumu, badina Iehova ese “una dina” bona “una hora” na vada e abia hidi. Bona una dina be kaumu neganai, una na nega namona ita iboudai edai.​—Mat. 24:36; 2 Pet. 3:15.

12. Dahaka ese eda haheauka karana baine tohoa diba?

 ¹² Hahemaoro maoromaoro totona mai haheaukada ida baita nari. Ina tanobada ai taunimanima edia iduhu, kastom, bona tano na i’idau dainai ma haida ese se kara namo henidiamu. Haida be se kara namo henidia badina mai edia gorere. Iehova ena taunimanima momo na Baibul ai e abi daemu ḡaudia daidiai e hahemaoro henidia kereremu. Bema ita na unu e kara auka henida tomamu, namona na Iesu ena hereva baita laloatao. Ia na eto: “Baine haheauka ela bona dokona tauna na do baine mauri.” (Mat. 24:13) To, bema oi na mai dibamu kongrigeisin lalonai ta na kara dika badana ta e karaia, dahaka ba kara be namo? Elda bo hadibadiamu murinai, oi be mai haheaukamu ida bo narimu idia ese Iehova ena dala heḡereḡerenai una hekwakwanai bae hamaoromaoroa, a? Elda taudia be dahaka bae kara bema ta na kara dika badana ta e karaia?

13. Iehova be e uramu elda taudia be dahaka bae kara, bema ta na kara dika badana ta e karaia?

¹³ Elda taudia na e dibamu kongrigeisin lalonai ta na kara dika badana ta e karaia neganai, idia na ḡuriḡuri amo Iehova ena ‘aonega’ bae noia, unu amo Iehova ena lalohadai heḡereḡerenai una hekwakwanai bae lalopararalaia. (Iak. 3:17) Idia na e uramu kara dika e karaia tauna bae durua ena “dala kererekererena amo” baine helalo-kerehai bona baine lou. (Iak. 5:19, 20) Idia na e uramu kongrigeisin bae gimaia bona hisihisi taudia bae hagoadadia. (2 Kor. 1:3, 4) Kerere badadia e hamaoromaoromu neganai, namona na elda taudia ese sivarai momokanina ibounai bae tahua namonamo guna. Bena bae ḡuriḡuri, Baibul amo sisiba bae heni, bona dala maorona ai matahakani bae heni. (Ier. 30:11) Ena be elda taudia na basie nari daudau, to danu disisin na basie karaia haraḡa. Bema elda taudia ese Iehova ena hahekau daladia be badinamu, kongrigeisin ibounai namo be davarimu. Ena be elda ese ḡau iboudiai na dala maorodia ai be karadiamu, to reana kara dika tauna ese e hahisidia taudia na dounu be lalohisihisimu. Bema oiemu ai una e varamu, dahaka ba kara diba ba haheauka totona?

14. Bema Kristen tauna ta ese baine hahisimu, edena Baibul sivaraina ese baine hagoadamu diba?

¹⁴ Oi be tadikaka ta eiava taihu ta ese e  hahisimu, a? Baibul ai baita davarimu haheitalaidia ese be durudamu edena dalai Iehova baita naria hekwakwanai baine hamaoromaoro totona. Heḡereḡere, ena be Iosef na tadikakana ese e kara auka heniava, to ia na se badu. Ia ese Iehova ihesiai henina karana na e laloa bada, bona ena haheauka dainai Iehova ese e hanamoa. (Gen. 39:21) Gabeai, Iosef na ia e hahisia taudia edia dika e gwautao bona Iehova ese e hanamoa dalana e itaia. (Gen. 45:5) Iosef heḡereḡerena, bema Iehova baita raka henia kahi bona ia baita naria hekwakwanai na nega korikori ai baine hamaoromaoro, una ese be hagoadadamu.​—Sal. 7:17; 73:28.

15. Taihu ta na bamona ese se kara namo henia neganai, dahaka ese e durua e haheauka?

¹⁵ Momokani, haheisi karadia haida na dia Iosef ese e davari ḡaudia heḡereḡeredia, to haida ese se kara namo henidamu neganai ita na ta lalohisihisimu. Bema ita bona taunimanima ta eiava Iehova se tomadiho heniamu tauna ta padadai hekwakwanai ta baine vara, Baibul ena hahekau herevadia baita badinamu karana ese be durudamu. (Fili. 2:3, 4) Mani ina ekspiriens aita laloa. Taihu ta na e kamonai ia ida e ḡaukara heboumu hahinena ta ese ia na ma haida vairadiai e gwauraia dika neganai, e lalohisihisi. Taihu ese una hahine ena kara davana na se haloua haraḡa, to nega e ato Iesu ena haheitalai e laloa. Iesu na haida ese e ere dika henia neganai, edia kara davana na se haloua. (1 Pet. 2:21, 23) Una e laloa neganai, lalona e hadaia e vara ḡauna na baine laloaboio. Gabeai e diba una hahine na mai ena gorere bona e lalometau momova. Unu amo taihu na e laloparara, reana una hahine na se lalo namonamo bena e hereva. Taihu na e haheauka dainai e moale bona e lalomaino.

16. Bema haida ese se kara namo henimumu, dahaka ese baine hagoadamu diba? (1 Petro 3:12)

¹⁶ Bema oi na hahemaoro kereredia eiava badi ma haida daidiai o lalohisihisimu, ba helalotao Iehova na “lalo-hisihisi taudia dekedekediai.” (Sal. 34:18) E lalokau henimumu badina o haheaukamu bona emu metau na ienai o taho kaumu. (Sal. 55:22) Ia na tanobada ibounai Ihahemaoro Henina Diravana. E varamu ḡaudia iboudiai na e  itamu. (1 Petro 3:12 ba duahia.) Bema oi na hekwakwanai badadia o davarimu bona ihamaoromaorodia na auka, ba helalotao ḡau badana na Iehova ba naria kara ta baine karaia totona.

17. Isaia 30:18 ai, Iehova be e gwauhamata dahaka baine kara?

¹⁷ Kahirakahira Tamada gubai ese ena Basileia amo hahenamo momo be henidamu. Isaia 30:18 na e gwaumu: “Iehova na e henarimu, baine hanamomui e tomamu; taunabunai ia na e tore isimu, baine bogamui hisi e tomamu. Badina be Iehova na hahemaoro ḡoevaḡoeva Diravana; ia e nariamu taudia iboudiai na nanamo.” Iehova e nariamu taudia na hahenamo momo e abimu hari bona tanobada matamatana ai.

18. Ededia hahenamo baita abimu?

¹⁸ Dirava ena taunimanima na tanobada matamatana ai be nohomu neganai, hari ina negai e davarimu hekwakwanai idauidau na ma basie davari loumu. (Apok. 21:4) Hahemaoro kerere bona hisihisi na be oremu, basita lalohekwarahimu badina eda dabu ḡaudia iboudiai na baita davarimu. (Sal. 72:16; Isa. 54:13) Una na hahenamo hereadaena!

19. Dahaka dainai hari Iehova ese hari e haheḡaeḡaedamu?

¹⁹ Iehova ese hari e durudamu ta manadalai kara kereredia baita dadaraidia bona Ia ihamoalena karadia baita kara, unu amo e haheḡaeḡaedamu iena lohia henunai baita noho totona. Basio lalomanoka, bona Iehova ihesiai henina karana basio hadokoa. Badina mauri hereadaena na kahirakahira be varamu! Una nega namona ta nariamu lalonai, namona na baita moale bona baita nari Iehova ese e gwaurai ḡaudia baine haḡuḡuru totona!