1-2. Avyani vino twandi tusambilile mwe co-o icipande?

 UZYE mukayivwa wuli nga ca kuti iciya cino temukulindilila nkaninye citafisile pa mpindi yino temukwenecelapo ukuti candi cifike? Uzye mukasakamala? Ukwasowa nu kuvwilika mufwile mukayivwa ngati avino iwaliko lya Imilumbe 13:12 likalanda ukuti: “Cino cikwenecelwa nga cazimba cikalwalika umwezo.” (NWT) Nomba mukayivwa wuli nga cakuti mwamanya umulandu wuno citaficizile zuwa? Nga cawa wowo mufwile mukatekanya nu kuyinkundila ukulindilila.

² Mwe co-o icipande twandi tulole ivisinka vya masundo ya mu Baibolo vino vingatwavwa “ukuwa nu mwezo wakulindilila.” (Mika 7:7) Twandi tulande na pa vintu viwili vino tuzipizile ukulindilila sana pe Yehova. Mukulecelezya twalanda na pa vizima vino alicitila wano wakalindilila pe weliwe.

3. Avyani vino tukasambililako kwi waliko lya Imilumbe 13:11?

³ Iwaliko lya Imilumbe 13:11 likatusambilizya umulandu wuno tuzipizile ukuwela awatekanye. Likati: “Insawo yakuzana nanti ntazi ikasila nanti kuzimba, ukuwa ndi wayitwincila apano ungawa ni mvule.” Avyani vino tukusambililako kwe lyo-o iwaliko? Umuntu wino akawomba ivintu mu kutekanya swinya katici katici akazanamo ivizima.

4. Avyani vino tungasambililako kwi waliko lya Imilumbe 4:18?

⁴ Iwaliko lya Imilumbe 4:18 likalanda ukuti, “inzila yino awalungamane wakapita yakolana nu kufuma kwi lanzi, kuno kukulanga kukuwala akusuka akuca.” Lyo-o iwaliko likalanjizya  ukuti e Yehova akusokololela awawomvi wakwe ukulonda kwakwe katici katici. Swinya likatwavwa nu kumanya vino umwina Klistu angapiluka nu kupalamila sana kwe Yehova. Lelo cikasumba impindi pa kuti apalamile kwe Yehova. Nga ca kuti tukuwika amano ku kuyisambilizya Baibolo nu kukonka vino tukuyisambilizya swinya tukuwomvya na vino iwungwe lya kwe Leza likutupekanizizya, tuliwaya tukuwa ni miwele ndi yino Yesu wawa nayo. Cinji aca kuti tulimanyilako e Leza. Lolani vino Yesu walondolozile co-o icisinka.

5. Acilanjililo ci cino Yesu wawomvizye pa kulanjizya ukuti pakapita impindi pa kuti umuntu apiluke?

⁵ E Yesu wawomvizye icilanjililo ca lumbeyu pa kulondolola vino icisinka cino tukakomela mu wantu wano wawa ni myezo imizima cikakula katici katici. Walanzile ukuti: “Imbeyu ikatunzya imela, ukuwa naponye e kakomela nanti kumanya muno ikamelela, ansinye iyeneco ayino ikamezya nga ica nu kuca. Pakutalika ikatunzya umwenze apakonka umutwe nga ikamba iwika ipumba.” (Mar. 4:27, 28) Uzye Yesu wasuzile mwinye pa kulanda ya-a amazwi? Cino walandangapo aca kuti wulyanye vino imbeyu ikaya ikumela katici katici avino na wantu wano wakazumila ukusambilila icisinka ca mu Baibolo wakaya wakupiluka katici katici. Ku cakulolelako, nga ca kuti wino tukasambilizya Baibolo wapalamila kwe Yehova tukalola vino akatalika ukupiluka. (Efes. 4:22-24) Lelo tuzipizile twakwizuka ukuti e Yehova awino akalenga wa-a awantu ukupiluka.—1 Kor. 3:7.

6-7. Avyani vino tukusambililako kwe vino Yehova welewulanga insi?

⁶ Pakumala umulimo uwuli wonsinye wuno Yehova watalika ukuwomba akatekanya. Akacita wo-o pa kuti izina lyakwe licindikwe nu kuti ivintu vizipile wanji. Ku cakulolelako, lolani vino Yehova watekinye pano welewulilanga awantu insi umwakwikala.

⁷ E Baibolo yalondolola vino Yehova wacisile pano welewulanga insi. Yalanda ukuti, “wapimile uwukulu wa nsi,” “asimpa impanda” awika ni “liwe lya pakona.” (Job 38:5, 6)  Swinya wapawulangako ni mpindi ya kulola ivintu vino welewulanga. (Inta. 1:10, 12) Teyelenganyani vino awangeli wayivwanga pano wakulola ivintu vino Yehova welewulanga vikuya vikuzipa. Ala wafwile wasecelezile nkaninye! Awuli umulandu wuno impindi yimwi “wapongomosile ni cimwemwe.” (Job 38:7) Avyani vino tukusambililako? Casumvile imintapendwa ya myaka pa kuti e Yehova ayelewule vyonsinye vino welewuzile. Lelo walile walolecesya pe vyonsinye vino welewuzile waweni ukuti “vyazifile nkaninye.”—Inta. 1:31.

8. Avyani vino twandi tusambilile?

⁸ Vyo-o ivyakulolelako vikutulanjizya vye ukuti mu Baibolo mwawa ivisinka vya masundo ivivule vino vingatwavwa ukuwa awatekanye. Nomba pe yo-o impindi lekani tulanzyanye pa vintu viwili vino tuzipizile ukuyikundila ukulindilila pe Yehova.

9. Amucani muno tuzipizile ukulindilila pe Yehova?

⁹ Tuzipizile ukulindilila ukuti Yehova ayasuke amapepo yitu. Manda yamwi nga mwapepa kwe Yehova ukuti amyavwe ukusipicizya intazi nanti ukuleka ukucita vimwi vino wapata ncepamwi mungalola ngati wazimba ukwasuka. Nomba amulandu ci wuno e Yehova asikwasucila amapepo yamwi papo na papo?

10. Amulandu ci wuno tuzipizile ukuwela awatekanye pano tukulindilila ukuti e Yehova ayasuke amapepo yitu?

¹⁰ E Yehova akateyelezya sana nga tukupepa. (Amalu. 65:2) Akalola amapepo yano tukapepa ukuti acilanjililo ca kuti twawa ni suwilo. (Hebe. 11:6) Akakwivwa icete nkaninye nga walola tukuwombesya ukufika pano papelezile amaka yitu ukucita vino tukupepelapo. (1 Yoh. 3:22) Fwandi nga ca kuti twapepa kwe Yehova ukuti atwavwe ukuleka ukucita vino wapata tuzipizile ukutekanya nu kwelezya na maka ukupiluka. E Yesu watwavwizye ukumanya ukuti amapepo yamwi yatanga yasukwe papo na papo. Walanzile ukuti: “Lenganji mulipocelela; vwambanji mulizanwa; kong’onsyanji muliyiyulilwa; amuno wensi wino akalenga akapocelela; na wino akavwamba akazana; na wino akakong’onsya akakwiyulilwa.” (Mat. 7:7, 8) Nga ca kuti twakonka ko-o ukupanda amano nu kutwalilila ‘ukupepa nu mute,’ tutaliwavwilika ukuti Umukwasi witu uwa kwi yulu akakwivwa amapepo yitu.—Kolo. 4:2.

11. Avyani vino tuzipizile twakwizuka nga twalola ngati Yehova akuzimba ukwasuka ipepo litu? (Waheberi 4:16)

¹¹ Nanti aca kuti manda yamwi tungalola ngati e Yehova akuzimba ukwasuka amapepo yitu, walaya ukuti aliyasuka “pa mpindi njanane.” (NWT) (Wazyani Waheberi 4:16.) Fwandi tutazipizile ukupa e Yehova umulandu nga ca kuti cino tukulonda citacitisile pa mpindi yino sweweneco tukulonda ukuti cicitike. Ku cakulolelako, awavule wapepa pa myaka imivule, ukulenga ukuti e Yehova afumyepo yo-o insi mbipe. Wonye wo-o avino Yesu walanzile ukuti twapepelapo. (Mat. 6:10) Lelo citanga ciwemo amano nga ca kuti umuntu waleka isuwilo lyakwe lyatonta pa mulandu wa kuti Leza wakana ukonona zuwa insi ukulingana na vino awantu wakalonda! (Haba. 2:3; Mat. 24:44) Acino tuzipizile ukutwalilila ukupepa kwe Yehova nu kusuwila ukuti alitwasuka. Insilo ya nsi yiliyiza pa mpindi njanane. Amuno e Yehova wimika kali “uwanda ni mpindi” wuno wuliyizilapo. Swinya yo-o yiliwa ampindi injanane kwe wonsinye.—Mat. 24:36; 2 Pet. 3:15.

12. Ampindi ci yino cingatutalila ukuwa awatekanye?

¹² Tuzipizile ukutekanya nga watufyenga. Awantu wa mwe yo-o insi wakacuzya awantu wawuye pa mulandu wa kupusana kwa nkanda,  umutundu, intambi nanti insi kuno wafuma. Awonsi wakacuzya awanaci ne awanaci nawo wakacuzya awonsi. Wanji wakawacuzya pa mulandu ni ndwala zino walwala nanti pa mulandu wa kulemala. Awawomvi wa kwe Yehova nawo wakawacuzya pa mulandu we vino wazumilamo. Nga ca kuti watufyenga munzila iyili yonsinye pe zyo-o, tuzipizile ukwizuka amazwi ya kwe Yesu aya kuti, “Ukuwa wino wiza wazizimicizya wafika na ku nsilo alitulwa.” (Mat. 24:13) Nomba avyani vino muzipizile ukucita nga mwamanya ukuti wumwi mwi wungwe acisile uluwembu ulukulu? Uzye nga ca kuti mwamanya ukuti wowo umulandu wumanyisilwe kwa eluda, mulilindilila ukuti wawombelepo ukulingana na vino Yehova akalonda? Swinya avyani vino waeluda wazipizile ukucita nga ca kuti wumwi mwi wungwe wacita uluwembu ulukulu?

13. Avyani vino Yehova akalonda ukuti waeluda wacita nga ca kuti wumwi wacita uluwembu ulukulu?

¹³ Nga ca kuti waeluda wamanya ukuti wumwi mwi wungwe acisile uluwembu ulukulu, wakapepa kwe Yehova nu kumulenga ukuti awape “amano yano yafuma kwi yulu” pa kuti wivwicisye umulandu ukulingana na vino akalonda. (Jemu. 3:17) Cino waeluda wakacitila wo-o wakalonda ukwavwa umuwembu “wamufumye ku wuwipe wakwe.” (Jemu. 5:19, 20) Cinji aca kuti wakalonda ukuwombesya ukufika pano papelezile amaka yawo ukucinjilila iwungwe nu kuwomelezya wano wivwile uwuwi pa luwembu luno weyo umuntu acisile. (2 Kor. 1:3, 4) Nga ca kuti waeluda wamanya ukuti wumwi acisile uluwembu ulukulu wazipizile ukuvwambilizya ivisinka nu kumanya vino vyacitisile. Pa kuti wacite wo-o pakasumba impindi. Pa nsizi wakapepa nu kusunda wino aluvinye ukuwomvya amawaliko. Swinya wakamusunda ukulingana na vino ‘azipizile ukusundwa.’ (Jere. 30:11) Nanti aca kuti waeluda wasileka apapita impindi intali nkani wasisamalila ukupingulapo zuwa pa milandu. Nga ca kuti waeluda wakonka uwutunguluzi wa kwe Yehova ivintu vikazipila awa mwi wungwe wonsinye. Lelo manda yamwi nanti waeluda wangawombela pa mulandu ukulingana na vino Yehova akalonda, nce pamwi wano wivwile uwuwi pa luwembu luno weyo umuntu wacisile wangatwalilila ukuyivwa wowonye. Nga vino na mwemwe mukayivwa, avyani vino muzipizile ukucita pa kuti muleke ukuyivwa uwuwi?

14. Alilyasi ci ilya mu Baibolo lino lingamisansamusya nga ca kuti umwanawitu wumwi wamiluvyanya nkaninye?

 ¹⁴ Uzye umwanawitu nanti e nkazi nanti umuntu vye winji akatela amifyengapo ica kuti amwivwa uwuwi nkaninye? Nga ca kuti camiciticilapo mu Baibolo mwawa ivya kulolelako ivizima vino vingamyavwa ukuwa awatekanye nu kulindilila pe Yehova. Ku cakulolelako, nanti aca kuti e Jozefu wamufyenzile kwa ndume zyakwe, atalesile lo-o ulufengo ukumulenga ukuwa amuntu umuwipe. Lelo nanti ciwe wo-o wawisile amano ku kuwombela Yehova. Co-o calenzile ukuti amulambule pa kutekanya kwakwe nu kusipicizya. (Inta. 39:21) Mukupita kwa mpindi e Jozefu watetezile wano wamuluvinye swinya walolanga vino Yehova wamupaalanga. (Inta. 45:5) Kwe Jozefu tukasambililako ukuti, tuzipizile ukupalamila kwe Yehova nu kulindilila ukuti umweneco ayize awombelepo.—Amalu. 7:17; 73:28.

15. Acani cino cavwizye e nkazi wumwi ukusipicizya nu kuwa nu mutende pano wamucuzyanga?

¹⁵ Kweni pamwi tutanga tupite mu ntazi ndi zino Jozefu wapisilemo. Lelo tukayivwa uwuwi nga watufyenga. Nga ca kuti wumwi watufyenga ukuwikako na walyanye wano wasipepa Yehova tuzipizile ukukonka ivisinka vya masundo ya mu Baibolo. Nga twacita wo-o ivintu vilituzipila. (Flpi. 2:3, 4) Yivwani cimwi cino cacitisile. E nkazi wumwi camulumile nkaninye pano wivwile ukuti wino wakawomba nawe walandanga iviwipe pe weliwe ku mbali. Ukucila ukukalawuka ukuya mukulanda na wino walandanga iviwipe pe weliwe, wawomvizye yo-o impindi ukwelenganya pa miwele ya kwe Yesu. Amuno e Yesu pano wamutukanga atawanyocezizyemo. (1 Pet. 2:21, 23) Ukwelenganya pe co-o icisinka, kwalenzile asolepo ukukanacita icili consinye pe vino vyacitisile. Mukupita kwa mpindi e nkazi wizile amanya ukuti we-e wino wawombanga nawe walwile nkaninye swinya wasakamikwanga. E nkazi wizile ayiluka ukuti, vino we-e umuntu walandanga asa vino wapiliwulanga nu kupiliwula. E nkazi wivwile icete nkaninye pe vino watekinye nu kusipicizya pe vino wamucuzyanga swinya wizile awa nu mutende.

16. Uzye iwaliko lye 1 Peter 3:12 lingamyavwa wuli nga wamifyenga?

 ¹⁶ Nga ca kuti mukusipicizya pa mulandu wa kuti wakamifyenga nanti pa mulandu wa vintu vinji. Mwakwizuka ukuti e Yehova wawa mu pipi na wano “wasi ni nsimpo nanti awamyezo ya wulanda.” (Amalu. 34:18) Wamikunda pa kutekanya kwinu na pa kumusumbila icisendo. (Amalu. 55:22) Amuno awili e kapingula wa nsi yonsinye. Swinya akalola vyonsinye vino vikacitika. (Wazyani 1 Peter 3:12.) Fwandi nga mwawa ni ntazi inkulu zino mutanga muwe na maka ya kuzimala mwakwizuka ukuti cacindama nkaninye ukulindilila pe Yehova.

17. Ukulingane ne Ayizeya 30:18, avyani vino Yehova watulaya?

¹⁷ Nombanye umukwasi witu uwa kwi yulu ali nu kutucitila ivizima ivivule nkaninye ukupitila mu Wufumu wakwe. E Ayizeya 30:18 yikanda ukuti: ‘E Leza akulindilila ukuwalolela inkumbu, ali ni cilanda nkaninye amuno weni akacita icete nkaninye. Awa nsansa wonsinye wano wakalindilila pe weliwe.’ Wonsinye wano wakalindilila pe Yehova aliwalambula pe yo-o impindi na kunkolelo.

18. Avizima ci vino tukulindilila ku nkolelo?

¹⁸ Nga ca kuti awantu wa kwe Leza wiza winjila mu nsi mpya watalitela wasipicizyepo intazi zino wakasipicizya pe yo-o impindi. Ulufyengo nu wulumila vitaliwako. (Ukuwu. 21:4) Tutaliwasakamikwa nu kulindilila pe Yehova amuno vyonsinye vino tukalonda viliwako. (Amalu. 72:16; Ayize. 54:13) Ala cilizipa nkaninye!

19. Avyani vino Yehova akutusambilizya pe yo-o impindi?

¹⁹ Pe yo-o impindi e Yehova akatusambilizya vino tuliwakwikala mu nsi mpya ukupitila mu kutwavwa ukucimvya imiwele miwipe nu kuwa ni miwele yino ingamusecelesya. Acino mutakanenuke nu kuleka ukuwombela Yehova. Ivintu ivizima vili mu nzila vikwiza! Fwandi pano tukulindilila, lekani tutwalilile ukuwa ni nsansa swinya awatekanye.