1, 2. ¿Toni tikitaskej itech nejin tamachtilis?

MAJ tiknemilikan ke se akin kuali iuan timouikaj techualkuiliti se taman tein tikuisnekij uan ke tikchixtokej, sayoj ke amo ejko. Xa semi titatanemilijtoskej. Yejua ika Proverbios 13:12 kijtoua: “Tein tikchiaj uan amo niman mochiua techtayokoltia”. Sayoj ke, xa okachi amo ouij techkisas tikchiaskej komo tikmatij keyej ayamo ejko.

² Itech nejin tamachtilis tikitaskej miak tajkuilolmej itech Biblia tein uelis techpaleuiskej maj tiksentokakan timochiakan (Miq. 7:7). Ompa, tikitaskej ke moneki amo tiyolijsiuiskej uan tikchiaskej maj Jiova kichiua tein moneki itech ome taman. Uan satepan ika titajtoskej tatiochiualismej tein kiseliskej akin mochiaskej.

3. ¿Toni techmachtia Proverbios 13:11?

³ Proverbios 13:11 techmachtia keyej moneki timochiaskej. Ompa kijtoua: “Tomin tein ijsiujka se kisentilia kaxanis, sayoj ke tein yolik se kisentilijtiuj momiakilis”. ¿Toni techmachtia nejin tajkuilol? Ke okachi kuali komo yolik tikchiuaj teisa porin okachi kuali kisas.

4. ¿Toni techmachtia tein kijtoua Proverbios 4:18?

⁴ Proverbios 4:18 kijtoua: “Kampa nejnemij akin yolmelaujkej kemej yeskia itanex tonaltsin kualkampa, tein okachi  milintiuj hasta ke ajsi tajko tonal”. Nejin tajtolmej senkis kinextiaj ke Jiova yolik kinmatiltijtiuj itekitikauan tein kineki kichiuas. Sayoj ke no uelis techpaleuis maj tikajsikamatikan keniuj se akin momachtijtok Biblia kipatatiuj inemilis uan okachi motokia iuan Jiova. Nejin amo ijsiujka se kichiua. Komo kuali timomachtiaj uan tikchiuaj tein techyolmajxitia iTajtol Dios uan inechikol, yolik tiknextijtiaskej ikualneskayouan Cristo uan okachi tikixmatiskej Dios. Maj tikitakan neskayot tein kijtoj Jesús keman ika tajtoj nejin.

5. ¿Katiyejua neskayot ika kinextij Jesús ke se taltikpaknenkej yolik kipatatiuj seki taman itech inemilis?

⁵ Itech se neskayot, Jesús kijtoj ke tein tikteixmatiltiaj ke kichiuas iTekiuajyo Dios kemej yeskia se tatet tein yolik moskaltijtiuj itech ininyolo taltikpakneminij. Kijtoj: “In xinach ixua, moskaltia uan xochioua, pero in tagat [akin tatokak] amo kemati kiniu mochiutok. Porin ika ichikaualis den tal mochiua ne takilot, achto in xiuit, niman ichikaualoni, uan satepan in xinach mochikaualtia” (Mar. 4:27, 28). ¿Toni kijtosneki? Ke akin kineltoka tein Biblia tamachtia yolik mopatatiuj ijkon kemej se tatok yolik moskaltijtiuj. Kemej neskayot, keman akin tikinmachtiaj ika Biblia peua motokiaj iuan Jiova, peua tikitaj ke kipatatiuijya seki taman (Efes. 4:22-24). Sayoj ke moneki tikelnamikiskej ke Jiova kichiua maj moskalti nejon tatet (1 Cor. 3:7).

6, 7. ¿Toni techmachtia kemej Jiova kichijchiuak taltikpak?

⁶ Kemej Jiova kineki kiueyitalis itokay uan kinpaleuis oksekin, nochipa keman kichiua teisa amo kiijsiujkachiua, ta kikui nochi tiempo tein monekis. Kemej neskayot, maj tikitakan keniuj tachijchiujtiaj nikan taltikpak.

⁷ Keman Biblia ika tajtoua keniuj Jiova kichijchiuak taltikpak, kijtoua ke kiixtalij itamachiuj, kani yetoskia uan kitalij yekinika tet tein kitsakuilijtoskia nochi (Job 38:5, 6). Hasta kiitstiaya keniuj mokaujtiaya  tein kichijchiuaya (Gén. 1:10, 12). ¿Ueli tiknemiliaj keniuj momachiliayaj ángeles keman kiitayaj tein Jiova kichijchiujtiaya? Xa semi yolpakkej porin hasta “peuak kiueyichiuaj ika tajtol chikauak” (Job 38:7). ¿Toni techmachtia kemej Jiova tachijchiuak? Ke yejuatsin miak xiujmej kichijchiujtoya taltikpak, sitalimej, tapialmej uan taltikpakneminij. Uan keman kiitak nochi tein kichijchiujka kijtoj ke “nochi semi kuali katka” (Gén. 1:31).

8. ¿Toni tikitatij itech párrafos tein kisentoka?

⁸ Neskayomej tein tikitakej kinextiaj ke Biblia kipia miak tajkuilolmej tein techmachtiaj ke moneki timochiaskej. Axkan maj tikitakan ome taman keman moneki tikchiaskej maj Jiova kichiua tein moneki.

9. ¿Kemanian moneki tikchiaskej maj Jiova kichiua tein moneki?

⁹ Keman tiknemiliaj ke Jiova amo niman technankilia keman tiktataujtiaj. Komo tiktajtaniaj maj techpaleui maj titaxikokan keman tikpiaj se ouijkayot oso maj amo tikchiuakanok tein amo kuali xa tiknemiliskej ke amo niman technankilia. ¿Keyej Jiova amo nochipa niman technankilia?

10. ¿Keyej moneki amo tiyolijsiuiskej keman tiktataujtiaj Jiova?

¹⁰ Jiova kuali techkaki keman tiktataujtiaj (Sal. 65:2). Kiita ke ijkon tiknextiaj ke iuan titakuaujtamatij (Heb. 11:6). Uan no, keman tiktajtaniaj maj techpaleui maj tikchiuakan tein kiyolpaktia, yejuatsin kineki kiitas ox yekmelauj tiknekij tikchiuaskej tein kineki (1 Juan 3:22). Yejua ika, komo tiktajtaniaj maj techpaleui maj amo tikchiuakanok teisa tein amo kiyolpaktia, maj amo tiyolijsiuikan uan maj timochikauakan tikaujtiaskej nejon tein amo kuali. Jesús kiteajsikamatiltij ke Dios xa amo nochipa niman technankilis keman tiktataujtiaj. Yejua kijtoj: “Xitajtanilikan Dios uan namechmaktis ne ten moneki. Ijkon keme tensa se kiyektemoa de se kipoloa, no ijkon xiktatatautilikan Dios uan Yejuatsin namechseliltis. Uan no ijkon kuak se takakalatsa ma tatapoukan, no ijkon xiksentokakan xikilikan Dios ten moneki uan Dios namechmakas. Porin nochi tokniuan ten tajtaniliske, yejuan nojonkes Dios kinseliltis. Uan nochi tokniuan ten kitemoske tensa tatiochiualis, yejuan nojonkes Dios kinpaleuis para ma kajsikan. Uan nochi tokniuan ten tanotsaske, yejuan nojonkes Dios kintatapouilis” (Mat. 7:7, 8). Komo tikchiuaj tein Jesús tayolmajxitij uan tiksentokaj tiktataujtiaj Jiova, uelis titakuaujtamatiskej ke toTajtsin techkakis uan technankilis (Col. 4:2).

11. ¿Keniuj techpaleuia Hebreos 4:16 keman tiknemiliaj ke Jiova amo niman technankilia satepan ke tiktataujtiaj?

¹¹ Maski xa tiknemiliaj ke Jiova amo niman technankilia satepan ke tiktajtanijkej teisa, yejuatsin kijtoua ke technankilis “tech ne momento kuak moneki” (xikonixtajtolti Hebreos 4:16). Yejua ika, maj amo keman tiknemilikan ke Jiova amo kichiua tein kijtoua komo amo technankilia keman tejuan tiknemiliaj ke monekiskia kichiuas. Kemej neskayot, miakej miak xiujmejya kitajtanijtokej maj ueli kiitakan keniuj iTekiuajyo kiixpoloua tein amo kuali. Jesús hasta kijtoj maj titajtanikan maj uiki iTekiuajyo Dios (Mat. 6:10, TNM). Sayoj ke amo tiknextiskiaj tamatilis komo amo titakuaujtamatiskiajok iuan Dios porin ixpoliuilis amo ejkok keman tejuan tikchiayaj (Hab. 2:3; Mat. 24:44). Tiknextiskej tamatilis komo tiksentokaj timochiaj uan tiksentokaj tiktataujtiaj Jiova uan  titakuaujtamatij ke technankilis. Ixpoliuilis ejkos keman monekis porin Jiova kiixtalijya “ne tonal”. Uan tikitaskej ke ijkuak okachi kuali katka (Mat. 24:36; 2 Ped. 3:15).

12. ¿Kemanian xa okachi ouij techkisas timochiaskej?

¹² Keman amo mochiua tein melauak. Itech nejin tonalmej, taltikpakneminij kintajyouiltiaj sekin porin takamej oso siuamej, porin okseko kayomej oso porin kipiaj se kokolis itech ininnakayo oso itech inintsontekon. Miakej itekitikauan Dios kintajyouiltianij porin kitekitiliaj. Komo techtajyouiltiaj, maj tikelnamikikan nejin tein kijtoj Jesús: “Akin taxikos hasta keman ejkos tamilis makisas” (Mat. 24:13, TNM). Sayoj ke ¿toni tikchiuaskej komo tikmatij ke se tokniuj tajtakolchiuak? Komo tokniuan tayekananij kimattokejya, ¿timochiaskej uan titakuaujtamatiskej ke kiyektaliskej nejon kuejmol kemej kijtoua Jiova? ¿Toni uelis kichiuaskej tokniuan tayekananij?

13. ¿Toni kineki Jiova maj kichiuakan tayekananij keman se tokniuj tajtakolchiuak?

¹³ Keman tokniuan tayekananij kimatij ke se tokniuj tajtakolchiuak kitajtaniaj Jiova maj kinmaka ‘itamachilis’ porin kinekij maj kinpaleui maj kiitakan tein panok kemej yejuatsin kiita (Sant. 3:17). Kinekij kipaleuiskej tokniuj maj amo kisentokaok kichiua tein amo kuali (Sant. 5:19, 20). No kinekij kinyekpiaskej nochin tokniuan itech nechikol uan kinyolseuiskej akin kinyolkokoj tokniuj akin tajtakolchiuak (2 Cor. 1:3, 4). Keman tokniuan tayekananij kimatij ke se tokniuj tajtakolchiuak, yekinika moneki kimatiskej toni yekmelauj panok uan nejon xa uejkauas. Ompa, moneki kichiuaskej netataujtil, moneki kiyolmajxitiskej ika Biblia ika nejmachkayot uan moneki kimelauaskej “kemej kinamikis” (Jer. 30:11). Melauj ke tayekananij amo ijsiujka kiixtaliskej keniuj kimelauaskej tokniuj, sayoj ke no moneki amo semi uejkauaskej. Okachi tapaleuia itech nechikol keman tayekananij mokauaj maj Jiova kinixyekana. Maski ijkon, xa se tokniuj kisentokaok kiyolkokoua tein kichiuak akin tajtakolchiuak. Komo tejuan timoyolkokojtokej, ¿toni techpaleuis maj amo tiksentokakan ijkon timomachilikan?

14. ¿Katiyejua neskayot uelis techpaleuis komo se tokniuj techchiuilij tein amo kuali?

¹⁴ ¿Kemansa techchiuilianij tein amo kuali,  xa hasta akin techchiuilij se tokniuj? Komo kemaj, itech iTajtol Dios tikajsij neskayomej tein uelis techpaleuiskej maj tikchiakan maj Jiova kiyektali tein monekis. Kemej neskayot, maski iikniuan José kichiuilijkej miak taman tein amo kuali, yejua amo kikauak maj nejon kichiuani maj nochipa kualantoni, ta kisentokak kitekitilij Jiova uan yejuatsin kitatiochiuij porin mochiak uan taxikoj (Gén. 39:21). Satepan, José kintapojpoluij iikniuan uan uelik kiitak keniuj Jiova kitatiochiuij (Gén. 45:5). Ijkon kemej José, tiyolseuij keman timotokiaj iuan Jiova uan keman tikauaj maj yejuatsin kichiua tein monekis (Sal. 7:17; 73:28).

15. ¿Toni kipaleuij se tokniuj siuat maj amo yolijsiuini keman kichiuilijkej tein amo kuali?

¹⁵ Maski xa amo techtajyouiltiskej kemej kitajyouiltijkej José, tinochin techyolkokoua keman techchiuiliaj tein amo kuali. Komo tikpiaj se kuejmol iuan se tokniuj oso hasta iuan se akin amo itaixpantijkauj Jiova, semi techpaleuis komo tikchiuaj tein Biblia tayolmajxitia (Filip. 2:3, 4). Maj tikitakan tein kichiuak se tokniuj siuat keman kimatik ke se siuat akin iuan tekitia kijtouilijtoya seki taman. Maski semi kiyolkokoj tein siuat kijtouilij uan kualanik, amo kichiuilij tein amo kuali, ta itech tanemilij tein Jesús kichiuak. Keman Jesús kiuijuikaltijkej, amo tauijuikaltij (1 Ped. 2:21, 23). Yejua ika tokniuj amo teyi kichiuak. Satepan kimatik ke nejon siuat semi mokokouaya uan ke semi motekipachojtoya. Yejua ika tokniuj kinemilij ke siuat amo kitemouaya kiyolkokos. Nejon kichiuak maj kuali momachiliani uan semi yolpakik porin amo yolijsiuik keman kichiuilijkej tein amo kuali.

16. ¿Toni uelis techyolseuis komo techchiuilijkej tein amo kuali? (1 Pedro 3:12).

¹⁶ Komo techchiuilijkej tein amo kuali oso tikpanotokej okse ouijkayot tein semi techyolkokoua, maj tikelnamikikan ke Jiova iniuan yetok “akin tajyouijtokej” (Sal. 34:18). Yejuatsin techtasojta porin timochiaj uan tikauiliaj tein techtekipachoua (Sal. 55:22). Yejuatsin Tamelaujkej itech nochi taltikpak uan kiita nochi (xikonixtajtolti 1 Pedro 3:12). Yejua ika, keman tikpanouaj ouijkayomej tein amo ueli tikyektaliaj, maj tikelnamikikan  ke moneki tikchiaskej maj Jiova kichiua tein monekis.

17. Ika tein kijtoua Isaías 30:18, ¿toni kijtoua Jiova ke kichiuas?

¹⁷ Amo uejkaua, toTajtsin Jiova techmakas miak tatiochiualismej ika iTekiuajyo. Isaías 30:18 kijtoua: “Jiova amo yolijsiui, ta kichia keman uelis namechpaleuis, uan moajokuis uan namechnextilis teiknelilis porin Jiova se Dios akin kichiua tein melauak. Yolpakij nochin akin kisentokaj kichiaj”. Akin kisentokaj kichiaj maj Jiova kichiua tein monekis, kiseliskej miak tatiochiualismej axkan uan itech Xochital.

18. ¿Toni tatiochiualismej tikseliskej?

¹⁸ Keman tiitekitikauan Dios tinemiskejya itech Xochital, amo kemanok tikpiaskej ouijkayomej tein axkan tikpiaj nion timotekipachoskejok. Amo mochiuasok tein amo kuali nion titayokoyaskejok (Apoc. 21:4). Amo techtekipachosok keniuj timoixpanoltiskej porin tikpiaskej nochi tein monekis (Sal. 72:16; Is. 54:13). ¡Semi kualtsin yeski!

19. ¿Keyej techpaleuijtok Jiova axkan?

¹⁹ Jiova techpaleuia axkan maj amo tikchiuakanok tein amo kuali uan maj tikpiakan kualneskayomej tein kiyolpaktiaj. Nejon techpaleuis keman iTekiuajyo techixyekantosya. Maj amo timosenkauakan, satepan okachi kualtsin tinemiskej. Yejua ika, maj tiksentokakan tikchiakan maj Jiova kichiua nochi tein kijtoj.