1, 2. ¿Tlen timomachtiskej?

MA TIMOKUAYEJYEKOKAN tikchixtokej se toyolikni tlen techualikilis itlaj tlen tiktekitiltiskej. ¿Ken timomachiliskej tla amo ajsiki ijkon ken iuan otimokajkej? ¿Timoyolkokoskej? Itech Proverbios 13:12 kijtoua: “Moyolkokoua akin kichixtok itlaj tlen amo mochiua”. Pero tla tikmatiskej itlaj opanok, ik non, ayamo ajsiki, xamo ijkuakon timochiaskej.

² Axkan timomachtiskej seki principios bíblicos tlen techpaleuiskej ma timochixtokan uan amo ma timosotlauakan (Miq. 7:7). Noijki tikitaskej itech ome tlamantli moneki timochiaskej hasta ijkuak Jehová kichiuas tlen yokijto. Uan saiktlami tikitaskej Jehová kinteochiuas akinmej kimatij mochiaskej.

3. ¿Tlen techmachtia tlen kijtoua Proverbios 13:11?

³ Proverbios 13:11 techititia tleka moneki timochiaskej. Ompa kijtoua: “Akin san niman kitemoua miak tlamantli satepan ayakmo kipias, pero tla yolik kololojtias satepan kipias miak”. ¿Tlen techmachtia non versículo? Tiyetoskej tiixtlamatkej tla tikchiuaj ken moneki uan tikmatij timochiaskej.

4. ¿Tlen techmachtia tlen kijtoua Proverbios 4:18?

⁴ Proverbios 4:18 kijtoua: “Pero inmiojui akinmej yolmelauakej kajki ken ijkuak tlanestiuits okachi uan  okachi tlanestiuits hasta kuali tlanesi”. Non techititia Jehová kimachtijti ialtepe tlen ye kineki. Non versículo noijki kiteititia ijkuak ikaj okachi mochikajti itlaneltokilis. Pero nochi non amo san niman uelis panos. Tla kuali timomachtiaj uan tikchiuaj tlen kijtoua iTlajtol toTajtsin Dios, yolik tikpiaskej tonemilis ijkon ken Cristo uan okachi kuali tikixmatiskej toTajtsin Dios. Ma tikitakan ken okiyekijto Jesús.

5. ¿Tlen okiyekijto Jesús ijkuak tipeuaj ikaj tikmachtiaj?

⁵ Jesús okijto titetlapouiaj iTekiuajkayo toTajtsin Dios yetoskia ken ijkuak tiktokaj se semilla intech inyolo akinmej yolkualmej uan yolik moskaltia, kijtosneki ijkuak mochikajti intlaneltokilis. Jesús okijto: “Tlátoktli kisentoka moskaltijti, pero ye [akin tlatoka] mach kimati kenijki moskaltia. Inewia n tlali kiskaltia n tlátoktli, achto ixwa iwa moxiujyotia, tlami miawati iwa iksemi tlaaki” (Mar. 4:27, 28). ¿Tlen kijtosneki tlen Jesús okijto? Ijkuak ikaj kikaki tlen titetlapouiaj yetoskia ken se tlatoktli tlen yolik moskaltia. Ijkon tikitaj ijkuak akinmej tikinmachtiaj yolik kixmatij Jehová uan tikitaj ken kipatlaj innemilis (Efes. 4:22-24). Pero ma tikilnamiktokan Jehová kinpaleuia ijkon ma kichiuakan (1 Cor. 3:7).

6, 7. ¿Tlen techmachtia ken Jehová okichijchi tlaltikpak?

⁶ Jehová kiteititia kimati mochias ijkuak itlaj kineki kichiuas. Ijkon kichiua para kiueyichiuas itoka uan para kinpaleuis oksekimej. Ma tikitakan ken okichi ijkuak okichijchi tlaltikpak para itech ma tichantikan.

⁷ Itech Biblia kijtoua ken Jehová okichijchi tlaltikpak, okijto ken yetoskia (Job 38:5, 6). Noijki omokuayejyeko tlen ye okichijchi (Gén. 1:10, 12).  ¿Timokuayejyekouaj ken omomachilijkej ángeles ijkuak okitayaj Jehová okichijchiuaya sejse tlamantli? Sapanoua oyolpakej, Biblia kijtoua “opejkej chikauak tsajtsij” (Job 38:7). ¿Non tlen techmachtia? Omonek miak xiuitl para Jehová kinchijchijtias sitlalimej, tlaltikpak uan nochi tlen itech yoltok. Pero ijkuak okitak nochi tlen okichijchi okijto nochi kuali okatka (Gén. 1:31).

8. ¿Tlen timomachtiskej?

⁸ Yotikitakej Biblia kipia principios tlen techititia tleka moneki timochiaskej. Ma tikitakan itech tlen ome tlamantli moneki timochiaskej hasta ijkuak Jehová kichiuas tlen yokijto.

9. ¿Keman moneki timochiaskej Jehová ma technankili?

⁹ Ijkuak timokuayejyekouaj Jehová amo san niman technankilia. Tikiluiaj ma techpaleui ma titlaxikokan ijkuak titlajyouiaj noso ma techpaleui para amo tikchiuaskej tlen amo kuali. Xamo ijkuakon tikmachiliskej amo san niman technankilia. ¿Tleka Jehová amo san niman technankilia?

10. ¿Tleka moneki timochiaskej ijkuak timotlatlaujtiaj?

¹⁰ Jehová kuali kikaki ijkuak tiktlatlaujtiaj (Sal. 65:2). Ijkuak ijkon tikchiuaj ye kita titlaneltokaj (Heb. 11:6). Noijki kipatioita ijkuak tikititiaj melauak tiknekij tikchiuaskej tlen tiktlajtlaniliaj uan tiknekij tikchiuaskej tlen ye kineki (1 Juan 3:22). Ik non, tla ayakmo tiknekij tikchiuaskej itlaj tlen amo techpaleuis, xamo moneki timochiaskej uan moneki tikchiuaskej tlen otikiluijkej Jehová. Jesús okiteititi xamo amo san niman techkakis Jehová ijkuak tiktlatlaujtiskej. Ye okijto: “Xiktlajtlanikah tlan nomechpoloa iwa nomechmakaskeh. Xiktemokah tlan nomechpoloa iwa nonkajsiskeh, xitenotsakah kan kaltentli iwa nomechtlatlapoliskeh. Yika, akin itla kitlajtlani, kiselia. Iwa akin itla kitemoa, kajsi. Iwa akin tenotsa kan kaltentli, kitlatlapoliah” (Mat. 7:7, 8). Tla tikchiuaj tlen ye okijto uan nochipa timotlatlaujtiaj, uelis tikneltokaskej Jehová techkaki uan technankilis (Col. 4:2).

11. ¿Ken techpaleuia Hebreos 4:16 ijkuak tikitaj Jehová amo san niman technankilia?

¹¹ Xamo tikitaj Jehová amo san niman technankilia ijkuak tiktlatlaujtiaj pero ye kijtoua technankilis ijkuak moneki (xiktlajtolti Hebreos 4:16). Ik non, amo keman ma timokuayejyekokan Jehová uejkaua uan amo technankilia. Miakej tokniuan kiluiaj san niman ma kitlajtlami nochi tlen amo kuali ika iTekiuajkayo. Jesús okijto ma tiktlajtlanikan ma ualtlanauati iTekiuajkayo toTajtsin Dios (Mat. 6:10, TNM). Pero amo kuali tla ayakmo titlaneltokaj itech toTajtsin Dios porque amo kipojpoloua tlen amo kuali ijkuak tejuan tiknekij (Hab. 2:3; Mat. 24:44). Tiyetoskej tiixtlamatkej tla nochipa timotlatlaujtiaj uan timochiaj hasta ijkuak Jehová kichiuas tlen yokijto. Ye yokitlali “tonati iwa n ora” ijkuak ye kipojpolos tlen amo kuali. Ijkuakon techpaleuis ken yokijto (Mat. 24:36; 2 Ped. 3:15).

12. ¿Keman oui tikitaskej tikmatiskej timochiaskej?

 ¹² Ijkuak techtlajyouiltiaj. Axkan miakej kintlajyouiltiaj porque oksekan inmialtepe, okse tlamantli okinmiskaltijkej noso porque mokokouaj. Miakej itekipanojkauan Jehová kintlajyouiltiaj porque kineltokaj tlen kijtoua Biblia. Tla ijkon techpanoua, ma tikilnamikikan tlen Jesús okijto: “Akin nochi kixikos, momakixtis” (Mat. 24:13). Pero ¿tla tikmatij ikaj tlen iuan timonechikouaj otlajtlakolchi? Tla yikimatij tlayekankej, ¿tikmatiskej timochiaskej uan tikneltokaskej kikauiliskej Jehová ma kinyekana?

13. ¿Tlen kineki Jehová ma kichiuakan tlayekankej ijkuak ikaj tlajtlakolchiua?

¹³ Ijkuak tlayekankej kimatij ikaj tlen iuan timonechikouaj otlajtlakolchi, kitlatlaujtiaj Jehová ma kinmaka ixtlamatilistli para mokuayejyekoskej ken ye mokuayejyekoua (Sant. 3:17). Yejuan kitemoskej ken kipaleuiskej para ma moyolkopa (Sant. 5:19, 20). Noijki kitaskej ken kinmaluiskej tokniuan akinmej okinyolkokojkej (2 Cor. 1:3, 4). Para kimatiskej tlen kichiuaskej tlayekankej, achto moneki kitaskej tlen melauak opanok. Noijki moneki kiyektlaliskej ika Biblia ken moneki (Jer. 30:11). Amo san niman kipejpenaskej tlen kichiuaskej pero noijki amo uejkauaskej. Ijkon kinpaleuiaj tokniuan tlen inmiuan monechikouaj ijkuak tlayekankej kikauiliaj Jehová ma kinyekana. Xamo ikaj tlen amo kuali okichiuilijkej ok moyolkokojtok. Tla tejuan ijkon techpanotok ¿tlen uelis tikchiuaskej para amo timoyolkokojtoskej?

14. ¿Ken techpaleuis tlen okichi José tla ikaj sapanoua otechyolkoko?

¹⁴ ¿Ikaj tlen iuan timonechikouaj sapanoua otechyolkoko? Tla ijkon otechpanok, iTlajtol Jehová techpaleuis. Ma tikitakan tlen okipanok José. Ye amo oyolchichiak ijkuak ikniuan amo kuali okichiuilijkej. Ye okachi okipatioitak kitekichiuilis Jehová uan ye okiteochi porque okimatki mochias uan otlaxiko (Gén. 39:21). José okintlapojpolui ikniuan uan noijki okitak  ken Jehová okiteochi (Gén. 45:5). Ijkon ken José, timoyolseuiaj ijkuak okachi timouikaj iuan Jehová uan tikkauiliaj ye ma kiyektlali tlen techtlajyouiltia (Sal. 7:17; 73:28).

15. ¿Tlen okipaleui se tokni siuatl ma tlaxiko ijkuak amo kuali okichiuilijkej?

¹⁵ Xamo amo sapanoua techtlajyouiltiskej ken José pero tinochtin techyolkokoua ijkuak ikaj techchiuilia tlen amo kuali. Tla ijkon techpanotok uan techchiuiliaj tlen amo kuali akinmej amo iTlaixpantijkauan Jehová, ma tikchiuakan tlen kijtouaj principios bíblicos (Filip. 2:3, 4). Ma tikitakan tlen okipanok se tokni siuatl. Ye sapanoua omoyolkoko ijkuak okimatki iuan akin otekipanouaya okiteneuak. Pero tokni amitlaj okichi, ye omokuayejyeko tlen okichiuilijkej Jesús, Biblia kijtoua: “Keman okiwijwikaltiayah, Ye amo okinnankiliaya” (1 Ped. 2:21, 23). Satepan tokni okimatki iuan akin otekipanouaya sapanoua omokokouaya uan omotekipachojtoka. Tokni okajsikamatki amo okinekiaya kiyolkokos. Ik non, oyolpakik porque okiteititi kimati mochias ijkuak okitenejkej.

16. ¿Tlen techyolseuis tla titlajyouiaj? (1 Pedro 3:12).

¹⁶ Tla titlajyouiaj noso timoyolkokouaj porque ikaj otechchiuili tlen amo kuali. Ma tikilnamiktokan Jehová kajki iuan “akinmej moyolkokouaj” (Sal. 34:18). Ye techtlasojtla porque tikmatij timochiaj uan tikiluiaj tlen techtekipachoua (Sal. 55:22). Ye kita nochi uan kimati tlaixkomakas (xiktlajtolti 1 Pedro 3:12). Ik non, tla amo tikmatij ken tikyektlaliskej tlen sapanoua techtlajyouiltia, ma tikilnamikikan moneki timochiaskej hasta ijkuak Jehová techpaleuis.

17. ¿Tlen techiluia Jehová kichiuas ijkon ken kijtoua Isaías 30:18?

¹⁷ Ayakmo poliui miak uan Jehová ika iTekiuajkayo techteochiuas. Isaías  30:18 kijtoua: “Jehová kichixtok namechpaleuis uan kiteititis namechiknomati. Porque Jehová ye se Dios tlen nochi kichiua ika melajkayotl uan yolpakij akinmej kichixtokej”. Tla timochiaj hasta ijkuak Jehová kichiuas tlen yokijto, ye techteochiuas axkan uan itech xochitlali.

18. ¿Ken techteochiuas Jehová?

¹⁸ Itech xochitlali ayakmo keman titlajyouiskej uan amo timotekipachoskej ijkon ken axkan techpanoua. Amo techchiuiliskej tlen amo kuali uan amikaj techyolkokos (Apoc. 21:4). Ayakmo timotekipachoskej para tikpiaskej tlen ika timopanoltiskej, ijkuakon nochi tikpiaskej (Sal. 72:16; Is. 54:13). ¡Kualtsin tiyetoskej!

19. ¿Tleka Jehová techmachtijti?

¹⁹ Axkan ma timochijchikauakan para amo ma tikchiuakan tlen amo kuali uan ma tikpiakan kuali tonemilis ijkon ken Cristo. Jehová techmachtijti ken moneki tikpiaskej tonemilis para tiyetoskej ijkuak ualtlanauatis itech iTekiuajkayo. Amo ma timosotlauakan uan nochipa ma timochijchikajtokan porque satepan Jehová kichiuas nochi tlen yotechilui. Tla tikmatij timochiaj ye techmakas nochi tlen yokijto.