1-2. Oshike tatu ka kundathana moshitopolwa shika?

OHO kala wu uvite ngiini ngele oshinima shoka wa landa nowa pumbwa osha kala inaashi thika pethimbo ndyoka wa li wa tegelela? Mbela oho kala wa yemata? Otashi vulika wu kale wu uvite ngaashi Omayeletumbulo 13:12 ngoka ga ti: “Etegelelo lyethimbo eleeleka ohali gombokitha omwenyo.” Ihe ongiini ngele owu uvu kutya opu na etompelo ewanawa kutya omolwashike shoka wa landa inaashi thika natango? Otashi vulika wu mone kutya owa pumbwa owala okutegelela neidhidhimiko sigo sha thiki.

² Moshitopolwa shika, otatu ka tala komakotampango gontumba gOmbiimbeli ngoka taga vulu oku tu kwathela tu kale hatu “tegelele” neidhidhimiko. (Mika 7:7) Otatu ka tala wo koonkalo mbali moka twa pumbwa okutegelela Jehova neidhidhimiko a katuke oonkatu. Hugunina, otatu ka tala komalaleko nuuyamba ngoka Jehova u uvanekela mboka ye na ehalo lyokutegelela a katuke oonkatu.

3. Oshike tatu ilongo mekotampango ndyoka li li mOmayeletumbulo 13:11?

³ MOmayeletumbulo 13:11 otatu ilongo mo kutya omolwashike twa pumbwa okukala hatu idhidhimike. Otaga ti: “Eliko ndyoka inaali longelwa, otali pepuka po, ihe mboka taa longo nuudhiginini, otaa mono oshindji.” Oshike tatu ilongo movelise ndjoka? Omuntu omunandunge oha ningi iinima nuukeka nonethimbo, opo a mone iizemo iiwanawa.

4. Oshike tatu ilongo mekotampango ndyoka li li mOmayeletumbulo 4:18?

⁴ Omayeletumbulo 4:18 otaga ti: “Ondjila yaayuuki oya fa uuyelele weluwa tali tende, mboka tau yele sigo kwa shi.” Ovelise ndjoka otayi shi ulike sha yela kutya Jehova oha kwathele oshigwana she shu uve ko elalakano lye kashona nakashona. Ovelise ndjika otayi vulu wo oku tu kwathela tu mone kutya ohashi pula ethimbo, opo omuntu a ninge omalunduluko monkalamwenyo  ye noku hedhe popepi naJehova. Otwa pumbwa okukonakona Oohapu dhaKalunga nuukeka noku dhi tula miilonga, mwa kwatelwa wo omayele ngoka hatu pewa kehangano lyaJehova. Ngele otwa kala hatu shi ningi, otashi ke tu kwathela tu kokeke kashona nakashona omaukwatya ga fa gaKristus notashi ke tu kwathela wo tu tseye Jehova nawa. Natu ka taleni kethaneko ndyoka Jesus a li a gandja kombinga yoshinima shoka.

5. Jesus okwa longitha ethaneko lini u ulike kutya ohashi pula ethimbo, opo omuntu a ninge omalunduluko?

⁵ Jesus okwa li a longitha ethaneko a yelithe nkene etumwalaka lyUukwaniilwa ndyoka hatu uvitha lya fa ombuto ndjoka hayi koko kashona nakashona momitima dhaamboka ye hole shoka shu uka. Okwa ti: “Ombuto oya mene e tayi koko, ye [omukuni] ina tseya, nkene sha ningwa, oshoka evi olyo lyene tali kokitha iimeno e tali etithitha oomuma: tango omuno, tagu landulwa komutse, nosho wo oomuma tadhi kolo komutse.” (Mark. 4:27, 28) Mbela Jesus okwa li a hala okutya shike? Okwa li ta yelitha kutya ngaashi owala oshimeno hashi koko kashona nakashona, nomuntu ngoka a taamba ko etumwalaka lyUukwaniilwa oha ningi omalunduluko kashona nakashona. Pashiholelwa, sho mboka hatu konakona nayo Ombiimbeli taye ende taya hedha popepi naJehova, ohatu mono nkene taya ningi omalunduluko. (Ef. 4:22-24) Ihe katu na okudhimbwa kutya Jehova oye ha kokitha oombuto ndhoka twa kuna. — 1 Kor. 3:7.

6-7. Oshike tatu ilongo komukalo moka Jehova a shita evi?

⁶ Ashihe shoka Jehova ha longo ohe shi longo nethimbo lye, sigo e shi mana. Ohe shi ningi, opo a simanekithe edhina lye noshi etele yalwe uuwanawa. Natu ka taleni komukalo ngoka Jehova a shiti evi.

⁷ Ombiimbeli oya ti kutya sho Jehova a shiti evi, okwe li “yeleke nondjelekongodhi,” okwe li ‘thikameke’ nokwe li dhike ‘komakankameno galyo.’ (Job 38:5, 6) Okwa li nokuli a kutha ethimbo a konakone shoka a shita. (Gen. 1:10, 12) Dhiladhila owala kunkene aayengeli ya li yu uvite sho ya tala iinima iipe mbyoka Jehova a shiti. Oye na okukala ya li ya nyanyukwa. Pompito yimwe oya li nokuli ya “ligola kenyanyu.”  (Job 38:7) Mbela shoka otashi tu longo shike? Nonando osha pula Jehova omimvo odhindji opo a mane okushita evi, oonyothi niinima ayihe yi na omwenyo, sho a konakona nuukeka iinima ayihe mbyoka a shita, okwa ti kutya oyo “opala lela.” — Gen. 1:31.

8. Ngashingeyi otatu ka kundathana shike?

⁸ Iiholelwa mbyoka twa za nokukundathana otayi ulike kutya mOohapu dhaKalunga omu na omakotampango ogendji ngoka taga ulike kutya eidhidhimiko uukwatya wa simana. Ngashingeyi natu ka taleni koonkalo mbali moka twa pumbwa okukala hatu tegelele neidhidhimiko Jehova a katuke oonkatu.

9. Uunake tashi vulika tu kale twa pumbwa okwiidhidhimika?

⁹ Otashi vulika tu kale twa pumbwa okwiidhidhimika sigo Jehova a yamukula omagalikano getu. Uuna twa pula Jehova megalikano e tu kwathele tu idhidhimikile uudhigu wontumba nenge e tu kwathele tu sinde uunkundi wontumba, otashi vulika tu kale tu uvite itaa yamukula mbala omagalikano getu. Omolwashike Jehova omathimbo gamwe ihaa yamukula omagalikano getu nziya?

10. Omolwashike twa pumbwa okutegelela neidhidhimiko Jehova a yamukule omagalikano getu?

¹⁰ Jehova oha pulakene aluhe neitulomo komagalikano getu. (Eps. 65:2) Oha kala e ga tala ko ge li euliko kutya otu na eitaalo. (Heb. 11:6) Uuna tatu galikana Jehova e tu kwathele tu longe ehalo lye, oha kala a hala okumona ngele otatu katuka ngaa metsokumwe naashoka twa galikana kombinga yasho. (1 Joh. 3:22) Onkee ano, uuna twa pula Jehova e tu kwathele tu sinde uunkundi wontumba, otwa pumbwa okukala aaidhidhimiki nokulonga nuudhiginini tu ninge omalunduluko. Jesus okwe tu kwathela tu uve ko kutya hamagalikano getu agehe taga ka yamukulwa nziya. Okwe tu ladhipike a ti: “Indileni, e tamu pewa; kongeni, e tamu mono; konkoleni, e tamu egululwa. Oshoka kehe ngoka ti indile, ota pewa; naangoka ta kongo, ota mono; naangoka ta konkola, ote egululwa.” (Mat. 7:7, 8) Ngele otwa ningi ngaashi Jesus a ti, e tatu ‘dhiginine okugalikana,’ otatu vulu okukala nuushili kutya Tate yetu gwomegulu ote tu uvu nota ka yamukula omagalikano getu. — Kol. 4:2.

11. Aahebeli 4:16 otaya vulu ngiini oku tu kwathela uuna tu wete omagalikano getu itaaga yamukulwa nziya?

¹¹ Nonando opu pite ethimbo opo omagalikano getu ga yamukulwe, Jehova oku uvaneka kutya ote ke ga yamukula “pethimbo lyo opala.” (Lesha Aahebeli 4:16.) Onkee ano, katu na nando okupa Jehova ombedhi ngele oshinima shoka twa kala twa tegelela shi ningwe osha kala inaashi ningwa nziya, ngaashi twa tegelela. Pashiholelwa, uule womimvo aantu oyendji oya kala nokugalikana Uukwaniilwa waKalunga wu ye wu hulithe po uuyuni mbuka wa kolokosha. Jesus okwa ti nokuli kutya natu kale hatu galikana wu ye. (Mat. 6:10) Ano itashi ka kala pandunge ngele otwe etha eitaalo lyetu muKalunga li nkundipale, molwaashoka owala ehulilo inaali ya pethimbo ndyoka twa li twa tegelela. (Hab. 2:3; Mat. 24:44) Oshi li pandunge tu kale twa tegelela neidhidhimiko Jehova a katuke oonkatu noku mu galikana tu na eitaalo. Ehulilo otali ya pethimbo lyo opala, oshoka Jehova okwa tula po nale “esiku notundi” ndjoka li na okuya. Oli na okuya pethimbo ndyoka lye tu opalela atuheni. — Mat. 24:36; 2 Pet. 3:15.

12. Uunake tashi vulika shi kale unene oshidhigu kutse okwiidhidhimika?

¹² Otashi vulika tu kale twa pumbwa okwiidhidhimikila okuningilwa okwaanuuyuuki. Aantu muuyuni ohayu ungaunga nayi nayalwe, molwaashoka owala ye na uukashikekookantu wa yooloka kuwawo, ya za momuhoko gulwe, meputuko lilwe, ye na omuthigululwakalo gwa  yooloka ko kugwawo nenge molwaashoka ya za koshilongo shilwe. Yalwe ohaya ungaungiwa nayo nayi molwaashoka owala ye na uunkundi wopalutu nenge wopamadhiladhilo. Oyendji yomoshigwana shaJehova oya kala nokwiidhidhimikila okuningilwa okwaanuuyuuki omolweitaalo lyawo. Uuna tatu ungaungiwa natse nayi, natu kale hatu dhimbulukwa oohapu dhaJesus ndhoka tadhi ti: “Ngoka ti idhidhimike sigo ehulilo, ota hupithwa.” (Mat. 24:13) Ihe oto ka ninga po shike mbela, ngele owa mono kutya gumwe megongalo okwa yona eyono lya kwata miiti? Ngele aakuluntugongalo oye shi tseyithilwa, oto ka ethela ngaa iinima miikaha yawo e to tegelele neidhidhimiko yu ungaunge nasho ngaashi Jehova a tegelela ya ninge? Oshike aakuluntugongalo ye na okuninga uuna gumwe a yono eyono lya kwata miiti?

13. Jehova okwa hala aakuluntugongalo yu ungaunge ngiini niipotha yomayono ga kwata miiti?

¹³ Uuna aakuluntugongalo ya mono kutya opu na gumwe a yona eyono lya kwata miiti, ohaya galikana Jehova e ya pe “uunongo wokombanda,” opo yu uve ko ashihe shoka sha kwatelwa mo noyu ungaunge neyono ndyoka ngaashi Jehova a tegelela. (Jak. 3:17) Elalakano lyawo okukwathela omuyoni a ze “mondjila ya puka” ngele otashi wapa. (Jak. 5:19, 20) Oye na wo okuninga ngaashi taya vulu ya gamene egongalo noya hekeleke mboka yu uvithwa nayi kwaangoka a yona. (2 Kor. 1:3, 4) Uuna aakuluntugongalo taya ungaunga noshipotha sheyono lya kwata miiti, tango ohaya kambadhala okukala ye na uuyelele wi ihwapo kombinga yaashoka sha ningwa po, shoka tashi vulika shi kuthe ethimbo. Konima yaashono ohaya galikana, e taya pe ngoka a yona omayele ga kankamena kOmbiimbeli noku mu “pukulula she eleka.” (NW) (Jer. 30:11) Nonando aakuluntugongalo ihaya kakadhala okuungaunga niipotha yomayono ga kwata miiti, ihaya endelele ya ninge etokolo nziya. Ngele aakuluntugongalo oya landula ewiliko lyaJehova, ohashi etele egongalo alihe uuwanawa. Ihe nuuna ya ningi iinima ayihe mbyoka e taya ningi etokolo, mboka ye ehamekwa kwaashoka nakuyona a ninga otashi vulika ya kale natango yu uvite nayi. Ngele owi iyadha wu uvite ngawo, oshike mbela to vulu okuninga kuu kale we wu uvite nayi unene?

14. Oshiholelwa shini shopaMbiimbeli tashi vulu oku ku kwathela, ngele owu uvithwa nayi noonkondo komwiitaali omukweni?

¹⁴ Mbela owu uvithilwe nale nayi kugumwe, tashi vulika nokuli komwiitaali omukweni? MOmbiimbeli omu udha iiholelwa oyindji  iiwanawa mbyoka tayi tu longo kombinga yankene sha simana okutegelela Jehova u ukithe iinima. Pashiholelwa, Josef okwa li a ningilwa okwaanuuyuuki kaamwahe, ihe ine etha shoka ye mu ningile shi mu ningithe a kale a geya. Pehala lyaashono okwa tsikile owala okugandja eitulomo kokulongela kwe Jehova, na Jehova okwa li e mu laleke nuuyamba omolweidhidhimiko lye. (Gen. 39:21) Mokweendela ko kwethimbo Josef okwa dhimine po aamwahe, shoka she mu etele omauwanawa ogendji. (Gen. 45:5) Ngaashi Josef, ohatu mono ehekeleko uuna twa hedha popepi naJehova nokweethela iinima momake ge. — Eps. 7:17; 73:28.

15. Oshike sha kwathele omumwameme gumwe i idhidhimike?

¹⁵ Nonando haaluhe hatu ningilwa okwaanuuyuuki ngaashi kwa li kwa ningilwa Josef, okuungaungiwa natse nayi kehe ohaku tu uvitha nayi. Uuna tu uvithwa nayi kugumwe, nokuli nonando ke shi omwiitaali, okutula miilonga omakotampango gOmbiimbeli otaku ke tu etela uuwanawa. (Fil. 2:3, 4) Natu taleni koshimoniwa shimwe. Omumwameme gumwe okwa li u uvu nayi noonkondo sho u uvu kutya omuniilonga omukwawo okwa li te mu popile muuwinayi noku mu lundila. Ihe pehala lyokukatuka onkatu meendelelo a yeleke edhina lye, omumwameme ngoka okwi ipula kombinga yoshiholelwa shaJesus. Jesus ka li a tuku mboka ya li ye mu tuku. (1 Pet. 2:21, 23) E na shoka momadhiladhilo, okwa tokola kaa ninge po sha. Konima yethimbo okwe ku uva kutya omuniilonga ngoka okwa ninga ethimbo ta kondjo nuuvu wa kwata miiti nokwa li a gwililwa po noonkondo komadhiladhilo. Omumwameme okwa thiki pehulithodhiladhilo kutya shoka omuniilonga pamwe naye a popi kombinga ye ine shi ningila owina. Okwa li wo u uvite nawa sho a tokola i idhidhimikile shoka a ningilwa nokwa kala u uvite ombili.

16. Oshike tashi vulu oku ku hekeleka ngele otatu idhidhimikile okuningilwa okwaanuuyuuki kwontumba? (1 Petrus 3:12)

¹⁶ Ngele oto idhidhimikile okuningilwa okwaanuuyuuki nenge wu uvithwa nayi kugumwe, dhimbulukwa kutya Jehova oku li popepi naamboka “ya dhengwa pevi.” (Eps. 34:18) Oku ku hole omolwuukwatya woye weidhidhimiko naasho we ethela iinima momake ge. (Eps. 55:22) Oye Omupanguli gwaantu ayehe noku wete kehe shoka tatu ningilwa. (Lesha 1 Petrus 3:12.) Onkee ano, ngele owi iyadha monkalo  ondhigu ndjoka itoo vulu okukandula po, oshi li hwepo wu ethele iinima momake gaJehova.

17. Ngaashi sha popiwa muJesaja 30:18, Jehova okwe tu uvanekela shike?

¹⁷ Masiku Tate yetu gwomegulu ote ke tu laleka nuuyamba uuna Uukwaniilwa we wa tameke okupangela kombanda yevi. Jesaja 30:18 ota ti: “Omuwa ota tegelele e mu sile ohenda. Okwi ilongekidha e mu sile olukeno, oshoka aluhe oha ningi ashike shoka shu uka. Aanelago oyo mboka ye mu inekela.” Mboka yi inekela Jehova otaya ka mona omayambeko ogendji ngashingeyi nosho wo muuyuni uupe mboka tawu ya.

18. Omalaleko nuuyamba geni tatu ka mona muuyuni uupe?

¹⁸ Muuyuni uupe aapiya yaKalunga itaye ki idhidhimikila we iimpwiyu yonkalamwenyo nosho wo omaupyakadhi ngoka hage tu adha kunena. Okuningilwa okwaanuuyuuki itaku ka kala po we nenge uuwehame. (Eh. 21:4) Itatu ka kala tatu ipula noompumbwe dhetu dhakehe esiku, oshoka otatu ka kala tu na eloolo lyiinima ayihe mbyoka twa pumbwa. (Eps. 72:16; Jes. 54:13) Ethimbo ndyoka itali ka kala tuu ewanawa.

19. Jehova ote tu longekidhile shike ngashingeyi?

¹⁹ Jehova ote tu longekidha ngashingeyi tu ka kale kohi yepangelo lye, moku tu kwathela tu ethe po omikalondjigilile dha nyata nokukokeka omaukwatya omawanawa. Onkee ano, ino kala wa teka omukumo nenge wu ethe po okulongela Jehova. Masiku otatu ka kala tu na onkalamwenyo ombwanawa. Manga twa tegelela ethimbo ndyoka li thike, natu tsikile okukala tu na uukwatya weidhidhimiko, e tatu tegelele Jehova a gwanithe po ashihe shoka u uvaneka a ninge!