1, 2. ¿Tlenon tikitaskej ipan yejuin tlamachtijli?

MATIKONNEMILIKAN ika tikchiatokej itlaj tlen otitetlatkitijkej, san ika, xnimantsin techuajkuiliaj. ¿Xmelak ika ijkuak ijkon panoua kemantika hasta tiajmankamikij? Ika yejon, Proverbios 13:12 kijtoua: “Ijkuak sen tlakatl kicha kiselis itlaj niman xueli kiselia, sanoyej najmana”. San ika, ijkuak tikmatij tleka xyejko tlen otitetlatkitijkej, ¿xmelak ika tiuajyolseuij niman ika toyojlo tikchiaj?

² Ipan yejuin tlamachtijli, tikimitaskej seki itlaxeloluan Biblia, tlen techpaleuiskej matitlamachiakan niman maka matosiaujkauakan (Miq. 7:7). Noijki, tikitaskej kenon noneki titlamachiaskej itech Jehová ijkuak tiknemiliaj ika xnimantsin kinnankilia toteoyouan niman ijkuak texchiuiliaj tlen xkuajli. Sa ika tlami, tikitaskej kenon Jehová kinteochiuas akin tlamachiaj.

3. ¿Tlenon techmachtia Proverbios 13:11?

³ Proverbios 13:11 techititia kenon noneki titlamachiaskej. Yejuin tlaxelojli kijtoua: “On tomin yejuan kisijkamiyekiliaj no niman kitlamiyaj, pero yejuan ika yolik kisentlalijtiuij  kimiyekiliaj”. ¿Tlenon techmachtia yejuin tlaxelojli? Ika, ijkuak itlaj tikchiuaskej, xnoneki tosiaujkauaskej niman ika noneki ika yolik tikchiujtiaskej.

4. ¿Tlenon techmachtia Proverbios 4:18?

⁴ Proverbios 4:18 kijtoua: “Iminnemilis on kuajkualtin tlakamej, ken itlaj on tlanexyotl de sen ye[n]kuik tonajli, yejuan peua ika yolik uajnestiu, hasta kaman kualtsin tona”. Yejuin tlaxelojli, kuajli techititia ika Jehová ika yolik kimachtijtiuj ikalpan tlen kichiuas, san ika, yejuin tlaxelojli noijki techititia kenon se itekipanojkauj ika yolik kichikaujtiuj itlaneltokil. Niman yejuin xsan isiujkan nochiua, noneki tiempo. Tla kuajli tomachtiaj niman tikchiuaj tlen tiuelij ipan Biblia niman ipan ikalpan toTajtsin, ika yolik tikchiujtiaskej ken Cristo niman kuajli tikixmatiskej Jehová. Matikitakan kenon Jesús otechasikamachilti yejuin.

5. ¿Tlenon okijto Jesús ipan Marcos 4:27, 28?

⁵ Ipan Marcos 4:27, 28 Jesús okijto ika iTlajtol toTajtsin, tlen tikteijliaj, yeskia kentla xinachtli tlen ika yolik noskaltijtiuj ipan inyojlo akin tikinnojnotsaj. Yejua okijto: “On xinachtli ixua, niman kemaj noskaltia, pero yejua xkimati kenijki. On tlajli san iselti kiskaltia. Achtoj kisa on imilouayo, kemaj on imiyauayo, [...] niman kemaj sintli”. ¿Tlenon okijtosnek? Ika akin tikinnojnotsaj, ika yolik kichikaujtiuej intlaneltokil, ijkon ken se planta ika yolik noskaltijtiuj. Ijkon nesi ijkuak tikitaj kenon akin tikinmachtiaj Biblia ika yolik kinisiuijtiuej Jehová niman nopatlatiuej (Efes. 4:22-24). San ika, noneki tikilnamikiskej ika Jehová kiskaltia yejon xinachtli ipan inyojlo (1 Cor. 3:7).

6, 7. ¿Tlenon tiuelij itech ken Jehová okichijchiuj tlaltikpaktli?

⁶ Ijkuak Jehová itlaj kichiua, tlamachia niman ika yolik kichiujtiuj. Ijkon kichiua pampa kineki makiueyiteneuakan itoka niman para oksekimej manemikan ika inyojlo. Matikitakan kenon okichijchiujtia yejuin tlaltikpaktli.

 ⁷ Ipan Biblia kijtoua ika ijkuak Jehová okichijchiuj yejuin tlaltikpaktli kachtopa okitak “kech tlatemachijtli yes”, okitlali “ipeuyan” niman “okitlalilij on ueyitetl yejuan iesquinero” (Job 38:5, 6). Yejua hasta okixelo tiempo niman ijkon tlanemilis itech nochi tlen yokichijchiujka (Gén. 1:10, 12). ¿Kenon onomachilijkej ángeles ijkuak okitakej kenon Jehová tlachijchiujtiaya? Kuajli tikmatstokej ika melak oyolpakej, pampa Biblia kijtoua: “On ángeles sanoyej tsajtsiyaj ikan paktli” (Job 38:7). ¿Tlenon techmachtia yejuin? Ika Jehová melak ouejkauj ijkuak okichijchiuj yejuin tlaltikpaktli, sitlalimej niman nochi tlen yoltok niman onka. San ika, ijkuak otlan yejua onotelti niman okijto ika nochi “sanoyej kuajli okis” (Gén. 1:31).

8. ¿Tlenon tikitaskej aman?

⁸ Ken yotikitakej, Biblia kuajli techititia ika noneki titlamachiaskej. Aman matikitakan kemanon melak noneki titlamachiaskej itech Jehová.

9. ¿Kemanon noneki titlamachiaskej itech Jehová?

⁹ Ijkuak tiknemiliaj ika Jehová xnimantsin kinnankilia toteoyouan. Tla tiktlajtlaniliaj matechpaleui matikxikokan itlaj tlen ouijtika noso para maka matikchiuakan itlaj tlen xkuajli, kanaj uelis tiknemiliskej ika xnimantsin technankilia. ¿Tleka Jehová xnimantsin kinnankilia nochi toteoyouan?

10. ¿Tleka noneki titlamachiaskej ijkuak tikchiuaj teoyotl?

¹⁰ Jehová kuajli kinkaki toteoyouan (Sal. 65:2). Ijkuak tiknotsaj, yejua kita ika itech titlaneltokaj (Heb. 11:6). Yejua kita tla yemelak tiknekij tikchiuaskej tlen tiktlajtlaniliaj niman tla tiknekij tiktlakamatiskej tlen technauatia (1 Juan 3:22). Ika yejon, tla tikyejyekojtokej tijkajkauaskej itlaj tlen xkuajli, noneki titlamachiaskej niman tikchiuaskej tlen tiktlajtlanij ipan toteoyouj. Jesús otechasikamachilti ika toTajtsin kanaj kemantika xnimantsin kinnankiliskia seki toteoyouan. Pampa yejua okijto: “Xtlajtlanilikan Dios on tlen mechpoloua, niman yejua mechmakas. Xtejtemokan on tlen mechpoloua, niman nenkinextiskej. Xtetepinikan on tsakuijlotl, niman Dios mechtlapouilis. Ijkon xchiuakan, pampa yejuan kitlajtlani kiselia, niman yejuan kitejtemoua kinextia, niman yejuan kitetepinia on tsakuijlotl, kitlatlapouiliaj” (Mat. 7:7, 8). Tla tikchiuaj tlen kijtoua yejuin tlaxelojli niman xkeman tijkajkauaj ika tikchiuaj teoyotl, kuajli tikmatstokej ika Jehová techkakis niman technankilis (Col. 4:2).

11. ¿Kenon techpaleuiya Hebreos 4:16 ijkuak tikitaj ika toTajtsin xnimantsin kinankilia toteoyouj?

¹¹ Kanaj kemantika tiknemiliaj ika Jehová xnimantsin kinankilia se toteoyouj, san ika, yejua kuajli techijlia ika technankilis ijkuak melak nonekis (xpoua Hebreos 4:16). Ika yejon, maka matiknemilikan ika Jehová nopopoloua san pampa xtechnankilia ijkuak tejuamej tiknekij. Matontlanemilikan itech yejuin, miyekej tokniuan melak youejkauj kitlajtlanilijtokej Jehová makinkauili makitakan kenon iTekiuajyo kipopoloua nochi tlen xkuajli. Niman Jesús okijto matiktlajtlanikan mauajla iTekiuajyo toTajtsin (Mat. 6:10). San ika, melak xkuajli yeskia tla tiktlalkauiyaj Jehová san pampa xyejko yejon tonajli ijkuak tejuamej tiknekij (Hab. 2:3; Mat. 24:44). Maka ijkon matikchiuakan, yej matitlamachiakan itech Jehová niman nochipa matikchiuakan teoyotl.  Jehová tlapopolos ipan “on tonajli niman on hora” tlen yokijto. Niman yejua kichiuas ijkuak kitas ika nochimej kinpaleuis (Mat. 24:36; 2 Ped. 3:15).

12. ¿Kemanon noijki noneki titlamachiaskej?

¹² Ijkuak texchiuiliaj tlen xkuajli. Aman miyekej kintlajyouiltiaj pampa oksekan ualeuaj, ipampa ken tlachiaj noso pampa kipiyaj se kokolistli. Miyekej tokniuan kintlajyouiltiaj san pampa kichiuaj tlen kijtoua Biblia. Tla tejuamej yejon tlen tikixnamiktokej, matikilnamikikan tlen Jesús okijto ipan Mateo 24:13. Yejua okijto: “Pero on yejuan noyolchikauas niman xkaman nokuepas hasta ijkuak nochi tlamis, on yejua makisas”. San ika ¿tlenon tikchiuaskiaj tla tikmatij ika se tokniuj yokichiuj se ueyi tlajtlakojli? Tla tokniuan tlayekankej ikimatij, ¿titlamachiaskej niman tikneltokaskej ika yejuamej kiyektlaliskej yejon tlauejli ijkon ken Jehová technauatia? ¿Tlenon kichiuaskej?

13. ¿Tlenon kineki Jehová makichiuakan tlayekankej ijkuak yakaj kichiua se ueyi tlajtlakojli?

¹³ Ijkuak tokniuan tlayekankej kimatij ika yakaj yokichiuj se ueyi tlajtlakojli, kitlajtlaniliaj Jehová makinmaka “itlamatkilis” para uelis kiyektlaliskej yejon tlauejli (Sant. 3:17). Ijkon kichiuaj pampa kinekij kipaleuiskej on tokniuj akin yotlajtlako makitlalkaui “on xkuajli ojtli kampa yau” (Sant. 5:19, 20). Noijki, nokojtiliaj kitlajpiyaskej tlanechikojli niman kinyolseuiskej akin yokinyolkokojkej (2 Cor. 1:3, 4). Ijkuak tlayekankej kipaleuiyaj se tokniuj akin yokichiuj se ueyi tlajtlakojli, kachtopa kitaj nochi tlen onochiuj. Niman yejon uejkaui. Sakin, kichiuaj teoyotl niman ika Biblia kipaleuiyaj akin yotlajtlako niman kimelajkatlaliaj (Jer. 30:11). Yejuamej nokojtiliaj nimantsin kiyektlaliskej yejon tlauejli, san ika, xsan isiujkan kichiuaj. Ijkuak yejuamej kichiuaj ijkon ken Jehová kinnauatia, melak kipaleuiyaj tlanechikojli. Maski ijkon, kanaj akin okinchiuilijkej tlen xkuajli ok noyolkokouaj. Tla tejuamej otechyolkokojkej, ¿tlenon uelis tikchiuaskej para maka ok ijkon matomachilikan?

14. ¿Tlenon uelis techpaleuis tla se tokniuj yotechyolkoko?

¹⁴ ¿Yakaj ipan tlanechikojli yotexchiuili itlaj tlen xkuajli? Tla kema, ipan Biblia uelis tiknextiskej tlen techpaleuis matitlamachiakan  hasta ijkuak Jehová kiyektlalis tlen tikixnamiktokej. Ipan Biblia tikitaj ika José xsan noyolkokojtoya ipampa tlen ikniuan okichiuilijkaj. José nochipa onokojtili kuajli kitekichiuilis Jehová. Niman pampa yejua otlamachix niman otlaxiko, Jehová okiteochiuj (Gén. 39:21). Sakin, José ouel okintlapopolui ikniuan niman okitak kenon Jehová okiteochiuj (Gén. 45:5). Ijkuak tikchiuaj ken José, tiyolseuij pampa tiknisiuiyaj Jehová niman tijkauiliaj yejua makiyektlali tlen tikixnamiktokej (Sal. 7:17; 73:28).

15. ¿Tlenon okipaleui se tokniuj matlaxiko ijkuak okichiuilijkej tlen xkuajli?

¹⁵ Kanaj tejuamej xkeman texchiuiliaj tlen José okichiuilijkej, san ika, tinochimej xkuajli tomachiliaj ijkuak texchiuiliaj itlaj tlen xkuajli. Melak techpaleuis tla tikchiuaj ijkon ken kijtoua Biblia ijkuak tikpiyaskej se tlauejli iuan se tokniuj noso maski tla xtokniuj (Filip. 2:3, 4). Matikitakan tlenon okichiuj se tokniuj siuatl ijkuak okimat ika se siuatl akin iuan tekitiya okitejteneuj. Maski tokniuj melak onoyolkoko, yejua xokualan, yej otlanemili itech tlen Jesús okichiuj. “Ijkuak on tlakamej okuijuikaltijkej Cristo, yejua xotlanankilij ikan tlauijuikaltilistli” (1 Ped. 2:21, 23). Tokniuj xokitlauelitak on siuatl akin okitejteneuj. Sakin, okimat ika on siuatl kualouaya niman ika melak ajmankamikiya. Yejua okasikamat ika yejon siuatl kanaj xkinekiya kiyolkokos. Tokniuj oyolseuj niman oyolpak pampa xnimantsin okualan ijkuak okichiuilijkej tlen xkuajli.

16. ¿Tlenon uelis techyolseuis tla tikixnamiktokej itlaj tlen xkuajli? (1 Pedro 3:12).

¹⁶ Tla aman texchiuilijtokej itlaj tlen xkuajli noso toyolkokojtokej, matikilnamikikan ika Jehová nemi nisiuj intech “on yejuan sanoyej noyolkokouaj” (Sal. 34:18). Yejua techtlasojtla pampa titlamachiaj niman pampa tikijliaj nochi tlen techajmana (Sal. 55:22). Jehová kitstika nochi tlen nochiujtika niman san yejua uelis kiyektlalis nochi tlen techajmana (xpoua 1 Pedro 3:12). Yejua ika, tla aman tejuamej tikixnamiktokej itlaj tlen xueli tikyektlaliaj, matikilnamikikan ika noneki titlamachiaskej hasta ijkuak Jehová kiyektlalis.

17. ¿Tlenon yotechijli Jehová ipan Isaías 30:18?

¹⁷ Sa achijtsin poliui para Jehová techteochiuas itechkopa iTekiuajyo. Isaías 30:18 kijtoua: “Pero toTEKO mechcha, para mechiknelis. Yejua kinektikaj mechititis itetlajsojtlalis, pampa toTEKO yejua sen Dios yejuan kichiua tlen melajki. ¡Tlatiochijtin on yejuan itech yejua kitlaliaj iminyojlo!”. Akin tlamachiaj itech Jehová kinteochiuaskej ipan yejuin tonaltin niman ika tlayekapan.

18. ¿Kenon techteochiuas toTajtsin?

¹⁸ Ipan xochitlalpan, akin tiitekipanojkauan toTajtsin xok keman tikixnamikiskej tlen ouijtika niman xok tajmanaskej ijkon ken aman. Xok nochiuas tlen xkuajli niman xok itlaj techyolkokos (Apoc. 21:4). Pampa onias miyek tlen tikuaskej, xok tajmanaskej ipampa tlen ika topanoltiskej (Sal. 72:16; Is. 54:13). ¡Melak kualtsin yes!

19. ¿Tleka Jehová techyektlalijtika?

¹⁹ Chika yejko yejon tonajli, toTajtsin techpaleuijtika matikmapeuakan nochi tlen xkuajli niman matikchiuakan tlen yejua kuelita. Ijkon kichiua pampa techyektlalia para ijkuak itinemiskej ipan xochitlalpan. Ika yejon, maka matoyolkokokan niman maka matosiaujkauakan. ¡Iyejkotika on tonajli ijkuak ika toyojlo tinemiskej! Ika yejon, matitlamachiakan hasta ijkuak toTajtsin kichiuas nochi tlen yokijto.