1-2. Hadia nitutunöda ba artikel daʼa?

HEWISA dödöu na lö manö tohare gama-gama soguna khöu ba ngaluo nidöna-dönau? Hadia afatö dödöu? Tola manö örasoi zimane nitutunö ba Gamaedola 13:12, ”Fanötöna si no tetaha ba möi fangafökhö dödö.” Hizaʼi, hewisa na fatema ba dödöu me örongo hadia mbörö wa lö tohare gama-gama andrö ba ngaluo nidöna-dönau? Na daʼö zalua, tola manö omasiʼö öbaloi si fao faʼebolo dödö.

² Ba artikel daʼa, tatutunö ösa goi-goi Zura Niʼamoniʼö si tola manolo yaʼita enaʼö lö tebulö ’tadöna-döna si fao faʼebolo dödö’. (Mi. 7:7) Aefa daʼö, tatutunö dombua ngawalö zalua sanandraigö faʼebolo dödöda ba wodöna-döna khö Yehowa. Safuria, tatutunö hadia manö howu-howu nitema niha sanötöna khö Yehowa.

3. Hadia wamahaʼö si tola tahalö moroi ba Gamaedola 13:11?

³ No mututunö ba Gamaedola 13:11 hadia mbörö wa moguna taʼokhögö waʼebolo dödö. Imane, ”Sabata alö harato nisöndra ba waʼalio, hizaʼi harato nizara-zara fangowuloi ba monönö-nönö manö.” Hadia wamahaʼö si tola tahalö moroi ba ayati daʼa? Izara-zara wamalua halöwönia niha satua-tua, ba hasambalö itema mbua sabölö sökhi börö me so khönia waʼebolo dödö.

4. Hadia wamahaʼö si tola tahalö moroi ba Gamaedola 4:18?

⁴ Imane ba Gamaedola 4:18, ”Lala niha satulö simane haga na moluo itugu mohaga ofeta ba zi laluo.” Ayati daʼa zangoromaʼö  wa izara-zara Yehowa ba wangombakha ohitö dödönia ba nono mbanuania. Baero daʼö, manandrösa göi ayati daʼa ba waʼatedouda ba wamati. Moguna khöda ginötö ba wamalua daʼö. Na owölö-ölö ita ba wamahaʼö yaʼita hegöi ba wamalua mene-mene nibeʼe Yehowa ba Daromalinia mazui ba organisasinia, itugu ara itugu fakhili mbua-buada khö Keriso. Tola göi itugu aboto ba dödöda Lowalangi. Nehegö atö hadia gamaedola niʼogunaʼö Yesu ba wanutunö sanandrösa ba daʼö.

5. Hadia gamaedola niʼogunaʼö Yesu ba wanutunö wa moguna ginötö khö zi samösa niha ba wombulöʼö faʼaurinia?

⁵ Iʼamaedolagö Yesu duria nifaʼemada ba niha andrö simane tanömö zinanö si tumbu ba dödö niha sangomasiʼö sindruhu. Imane, ”Moliwiö danömö andrö ba tedou waʼalawa, ba lö aboto ba dödö [zamazaewe tanömö zinanö] hewisa waʼalua daʼö. Tanö andrö mbörö wa mowua zinanö. Si oföna töla, aefa daʼö ngalai, awena bua gandru sasoso.” (Mrk. 4:27, 28) Hadia geluaha wehede Yesu andrö? Simane faʼatedou danömö zinanö, moguna ginötö ba niha sanemaʼö turia somuso dödö ba wombulöʼö faʼaurinia. Duma-dumania, na no itugu aro wahuwusa niha nifahaʼöda khö Yehowa, ibörögö taʼila wa oya zi no ibulöʼö ba waʼaurinia. (Ef. 4:22-24) Hizaʼi, böi olifu ita wa Yehowa zamanöi tanömö zinanö andrö.​—1 Ko. 3:7.

6-7. Hadia wamahaʼö si tola tahalö moroi ba lala wamazökhi Yehowa ulidanö?

⁶ Gofu hadia halöwö nifaluania, lö irai aösö-aösö Yehowa ba wamalua daʼö. Lö tebulö iforomaʼö waʼebolo dödö enaʼö tefolakhömi döinia ba oya mbua si sökhi nitema gomböila dangania. Duma-dumania, nehegö hewisa me izara-zara Yehowa wamazökhi ulidanö tobali nahia waʼatoröi niha.

⁷ Itutunö Sura Niʼamoniʼö hewisa wamazökhi Yehowa ulidanö andre. No itatugöi ’zuʼa-suʼania’, itaruʼö ”döla-döla sanuwu ulidanö”, ba ibeʼe ’gara wondrasinia’. (Yob. 38:5, 6) Baero daʼö, ibeʼe göi ginötönia ba wonehe-nehegö halöwö si no ifalua. (1 Mo. 1:10, 12)  Hadia tola ökhalaigö hewisa dödö ndra malaʼika ero na so zi bohou iwöwöi Yehowa? Tatu ahöli sibai dödöra! Börö daʼö, ibörögö lalau ”manunö”. (Yob. 38:7) Hadia wamahaʼö si tola tahalö? Sindruhu sa, moguna khö Yehowa ginötö mato hauga ribu fakhe faʼara ba wamazökhi banua si yawa awö danö. Hizaʼi, me inehegö fefu zi no iwöwöi, iwaʼö wa ”sökhi sibai” fefu daʼö.​—1 Mo. 1:31.

8. Hadia nitutunöda iadaʼa?

⁸ Simane duma-duma sawena tatutunö no mege, oya goi-goi si so ba Daromali Lowalangi sangoromaʼö wa moguna taʼokhögö waʼebolo dödö. Iadaʼa, datatutunö dombua ngawalö zalua sanandraigö faʼebolo dödöda ba wodöna-döna khö Yehowa.

9. Hawaʼara moguna tabaloi Yehowa?

⁹ Na lö iʼanemaiʼö tatema wanema li moroi ba wangandröda. Na taʼandrö waʼabölö ba wanaögö abula dödö mazui fanolo ba wamöhöli amuata si fatuwu khö Yehowa, tola manö tarasoi wa ara sibai ibeʼe khöda wanema li Yehowa. Hana wa lö iʼanemaiʼö ibeʼe wanema li ba wangandröda Yehowa?

10. Hana wa moguna tabaloi wanema li nibeʼe Yehowa ba wangandröda si fao faʼebolo dödö?

¹⁰ Ihaogö ifondrondrongo wangandröda Yehowa. (Si. 65:2) Ba wamaiginia, fangandrö soroi ba dödö nifaʼemada andrö zangoromaʼö wa mamati ita khönia. (Heb. 11:6) Adöni göi dödönia wamaigi hadia omasi ita tafalua zi tefaudu ba zi no taʼangandröi ba sindruhu-ndruhu taʼoʼö goroisania. (1 Yo. 3:22) Börö daʼö, na omasi ita taböhöli wamalua amuata si fatuwu khönia, tola manö moguna taforomaʼö waʼebolo dödö ba tafalua zi tefaudu ba zi no taʼangandröi. Iforomaʼö Yesu wa so ösa wangandrö si lö iʼanemaiʼö mubeʼe fanema li. Imane, ”Böi miböhöli wangandrö ba tebeʼe khömi; böi mibato wangalui ba misöndra; mibökö-bökö mbawandruhö ba tebokai khömi; dozi sangandrö ba latema, sangalui ba lasöndra, ba samökö-mökö bawandruhö ba tebokai khönia.” (Mat. 7:7, 8) Na taʼoʼö mene-menenia andrö ba ’lö taböhöli wangandrö’, tola faduhu dödöda wa hasambalö ifondrondrongo ba ibeʼe wanema li ba wangandröda Amada si so ba zorugo.​—Kol. 4:2.

11. Na lö iʼanemaiʼö tatema wanema li moroi ba wangandröda, hewisa wa tola möi fanoloda Heberaiʼo 4:16?

¹¹ Hewaʼae na lö iʼanemaiʼö tatema wanema li moroi ba wangandröda, no ifabuʼu khöda Yehowa wa hasambalö ibeʼe wanema li ba ”ginötö si tefaudu”. (Baso Heberaiʼo 4:16.) Börö daʼö, böi tatahigö Yehowa na lö ibeʼe wanema li ba wangandröda simane faʼalio nidöna-dönada. Duma-dumania, ato zoʼangandröi ba zi hauga fakhe faʼara enaʼö tohare Wamatörö Lowalangi ba wangohori ulidanö si lö sökhi andre. No göi ifarou ita Yesu enaʼö taʼohe daʼö ba wangandröda. (Mat. 6:10) Hizaʼi, hewisa na lö manö tohare gamozua andrö ba ginötö nidöna-dönada? Hadia awuwu wamatida khö Lowalangi? Tatu manö löʼö! No sambö tödö ita na tafalua daʼö. (Hab. 2:3; Mat. 24:44) No taforomaʼö waʼatua-tua na lö tebulö tadöna-döna khö Yehowa ba lö taböhöli wangandrö si fao famati. Hasambalö tohare gamozua andrö ba ginötö si tefaudu, börö me no itatugöi Yehowa ’mbaŵa hegöi inötö’ waʼatoharenia. Daʼö ngaluo fondrege zi tefaudu ba niha samosumange Lowalangi.​—Mat. 24:36; 2 Fe. 3:15.

12. Hawaʼara tetandraigö waʼebolo dödöda?

¹² Na lafalua khöda zi lö atulö. Ba gulidanö andre, asese lafakao niha börö me faböʼö ngaʼeu, mado, si toʼölö lafalua, mazui soira.  Lafalua göi zi lö atulö ba niha si no cacat mazui si no göna fökhö wangera-ngera. Alua göi zi lö atulö ba nono mbanua Yehowa börö wamatira. Na alua khöda zi lö atulö simane daʼö, moguna tatörö tödöda wehede Yesu. Imane, ”Sanau ölö irugi gamozua daʼö niʼorifi.” (Mat. 24:13) Hizaʼi, hewisa na so niha ba mbanua niha Keriso samalua horö sebua? Na no larongo daʼö ira satua sokubaloi, hadia öforomaʼö waʼebolo dödö börö me faduhu dödöu wa hasambalö lahalö gangetula si tefaudu ba zomasi Yehowa? Hadia manö zinangea lafalua ira satua sokubaloi na so niha samalua horö sebua?

13. Na so niha samalua horö, hadia zinangea lafalua ira satua sokubaloi?

¹³ Na laʼila ira satua sokubaloi wa so zamalua horö sebua ba mbanua niha Keriso, laʼandrö ’waʼatua-tua si otarai moroi yawa’ enaʼö tola laʼila hewisa lala wangera-ngera Yehowa sanandrösa ba zalua andrö. (Yak. 3:17) Ohitö dödöra yaʼia daʼö ba wanolo niha samalua horö andrö enaʼö ifalalini gera-erania. (Yak. 5:19, 20) Lafalua göi wondrege zi sökhi ba wolumöʼö banua niha Keriso hegöi ba wondrara tödö niha si göna abula dödö. (2 Ko. 1:3, 4) Na laʼila ira satua sokubaloi wa so niha samalua horö sebua, moguna khöra ginötö ba wangosisiʼö hadia zindruhunia zalua. Aefa daʼö, mangandrö ira, lahaogö wameʼe mene-mene si so ba Zura Niʼamoniʼö, ba ’landrohugö’ wameʼe fotu ba niha samalua horö andrö. (Yer. 30:11) Hewaʼae na lö laradö-radö, lö göi aösö-aösö ira ba wangai angetula. Na laʼasiwai zalua andrö ba lala si tefaudu ba zomasi Yehowa, hasambalö latema mbua ira talifusöda ba mbanua niha Keriso. Hizaʼi, hewaʼae na no laʼogunaʼö lala si tefaudu ira satua sokubaloi, tola manö lö iʼanemaiʼö taya waʼafökhö nirasoi niha sanaögö lua-lua moroi ba gamuata zamalua horö andrö. Na alua khöu zimane daʼö, hewisa enaʼö alö waʼafökhö nirasoimö?

14. Na so dalifusöda sangafökhöiʼö tödöu, hadia duma-duma si so ba Zura Niʼamoniʼö si tola möi fondrara dödöu?

¹⁴ Hadia no irai laʼafökhöiʼö dödöu ira niha böʼö, duma-dumania ira talifusöda? Na noa, tola ösöndra duma-duma si sökhi ba Daromali Lowalangi sanolo yaʼugö ba wodöna-döna khö Yehowa si fao faʼebolo dödö ba wangasiwai salua andrö. Duma-dumania, hewaʼae na lafakao Yosefo ira talifusönia, lö mofönu  ia khöra ba horö si no lafalua andrö. Hizaʼi, lö tebulö ifalua wondrege zi sökhi ba wamosumange Yehowa, ba ifahowuʼö ia Yehowa me no iforomaʼö waʼebolo dödö hegöi faʼanau gölö. (1 Mo. 39:21) Ba gafuriata, tola iʼefaʼö zala niha samakao yaʼia Yosefo ba iʼila samösa howu-howu nibeʼe Yehowa khönia. (1 Mo. 45:5) Simane Yosefo, tola terara dödöda na itugu ahatö ita khö Yehowa ba tatouʼö ba dangania gabula dödöda andrö.​—Si. 7:17; 73:28.

15. Hadia zanolo si samösa talifusöda ira alawe irege tola itaögö walöʼatulö si fao faʼebolo dödö ba irasoi waʼahono dödö?

¹⁵ Sindruhu sa, tola manö lö alua khöda walöʼatulö sabölö-bölö simane salua khö Yosefo. Hizaʼi, hasambalö tarasoi waʼafökhö na so niha samalua khöda si lö atulö. Na fatiti ita khö zi samösa niha, tefarahu ba daʼö niha si tenga samosumange Yehowa, tola möi fanoloda goi-goi si so ba Zura Niʼamoniʼö. (Fil. 2:3, 4) Nehegö atö zi no irai alua andre. Afökhö sibai dödö zi samösa talifusöda ira alawe me irongo wa so samösa nawönia wohalöwö sangobousi töinia ba samatou-tou yaʼia föna niha böʼö. Hizaʼi, moroi na iʼanemaiʼö ihalö gangetula, ibeʼe ginötönia talifusöda andrö ba woʼangerönusi duma-duma nibeʼe Yesu. Hewaʼae na laʼoʼaya ia, lö ilau mbalönia. (1 Fe. 2:21, 23) Ihalö gangetula ba wangolifugö salua andrö. Awena irongo ba gafuriata wa no göna nawönia wohalöwö andrö fökhö sabölö-bölö ba fawuka sibai wangera-ngerania. Andrö wa tola iʼila wa tenga niʼodödögö nawönia wohalöwö andrö wehede si lö sökhi si no ifaʼema. Börö daʼö, irasoi waʼahono dödö talifusöda no mege ba omuso dödönia me no iforomaʼö waʼebolo dödö ba wanaögö falöʼatulö.

16. Hadia zi tola möi fondrara dödöu na lafalua khöu zi lö atulö? (1 Fetero 3:12)

¹⁶ Na tefakao ndraʼugö börö me so zamalua khöu si lö atulö mazui ötaögö gabula dödö tanö böʼö, böi olifu ndraʼugö wa ahatö Yehowa ba ”niha sarasa tödö”. (Si. 34:18) Iʼomasiʼö ndraʼugö börö me öforomaʼö waʼebolo dödö ba ötouʼö khönia noro dödöu. (Si. 55:22) Yehowa andrö Sanguhuku ösi gulidanö. Ahori iʼila fefu ngawalö zalua. (Baso 1 Fetero 3:12.) Börö daʼö, na ötaögö gabula dödö si tebai öʼasiwai, hadia ödöna-döna ia si fao faʼebolo dödö?

17. Simane nisura ba Yesaya 30:18, hadia nifabuʼu Yehowa khöda?

¹⁷ Ba zi lö ara tö, hasambalö iʼogunaʼö Wamatörönia Amada si so ba zorugo ba wameʼe khöda howu-howu. Imane Yesaya 30:18, ”Ebolo dödö Yehowa khömi ba wombaloi, ba ifalua daʼö ba wangoromaʼö faʼahakhö dödönia khömi. Börö me Yehowa andrö Lowalangi satulö. Dozi niha sanötöna khönia lasöndra waʼomuso dödö.” Oya howu-howu nitema niha sanötöna khö Yehowa ba götöda andre ba fahöna göi howu-howu nitemara dania ba gulidanö si bohou.

18. Hadia howu-howu nitemada ba zi so miföna?

¹⁸ Ba gulidanö si bohou dania, lö saʼae larasoi waʼaombö-aombö dödö ono mbanua Lowalangi, ba lö göi alua khöra gabula dödö tanö böʼö simane nitaögöra iadaʼa. Lö hadöi saʼae falöʼatulö hegöi faʼafökhö. (Fam. 21:4) Lö saʼae moguna taʼaombösi tödö zoguna khöda börö me fahöna dania zoguna khöda ba daʼö. (Si. 72:16; Yes. 54:13) No sahöli-höli dödöda howu-howu daʼa!

19. Hana wa ifaʼanö ita Yehowa iadaʼa?

¹⁹ Ba götöda andre, ifaʼanö ita Yehowa enaʼö tola auri ita barö Wamatörönia. Daʼö mbörö wa ifahaʼö ita ba wamöhöli amuata si lö sökhi hegöi ba wangokhögö bua-bua sangomusoiʼö tödönia. Börö daʼö, böi ide-ide dödöu ba böi awuwu ndraʼugö. Hasambalö örasoi waʼomuso dödö ba zi so miföna. Fatua lö alua dötönaföda sahöli-höli dödö andrö, yalötebulö so khöda waʼomuso dödö ba wombaloi Yehowa si fao faʼebolo dödö ba wamalua hadia zi no ifabuʼu!