1-2. Re tlo ithuta’ng sehlogong se?

A RE re o letetše mogwera wa gago gore a go tlišetše phasela yeo o tlogago o e hloka. O tlo ikwa bjang ge a ka se fihle ka nako yeo le kwanego ka yona? Na o tlo nyama? Diema 13:12 e re: “Go diega ga selo seo se letetšwego go bolaiša pelo.” Eupša o tlo ikwa bjang ge o ka kwa gore go na le mabaka a kwagalago ao a dirago gore mogwera wa gago a se tliše phasela yeo ka nako yeo le kwanego ka yona? Ke nnete gore o ka se fele pelo e bile o tla leta.

² Sehlogong se re tlo ithuta ka e mengwe ya melao ya motheo ya Beibele yeo e re thušago gore re be le “moya wa go leta.” (Mika 7:7) Re tlo ithuta le gore ke maemong afe a mabedi moo re swanetšego go leta Jehofa re sa fele pelo. Mafelelong re tlo ithuta le gore batho bao ba ikemišeditšego go leta Jehofa ba tlo hwetša ditšhegofatšo dife.

3. Molao wa motheo wo o lego go Diema 13:11 o re ruta’ng?

³ Diema 13:11 e re ruta gore ke ka baka la eng re sa swanela go fela pelo. E re: “Mahumo ao a tlago ka ditsela tša lefeela a a fokotšega, eupša a atela yo a kgoboketšago ka seatla sa gagwe [goba ganyenyane-ganyenyane].” Temana ye e re ruta’ng? E re ruta gore motho yo bohlale o dira dilo ka go se fele pelo gomme mafelelo a seo e ba a mabotse.

4. Molao wa motheo wo o lego go Diema 4:18 o re ruta’ng?

⁴ Diema 4:18 e re: “Tsela ya baloki e bjalo ka seetša se se phadimago ganyenyane-ganyenyane go fihlela e eba mosegare o mogolo.” Mantšu a a šupa go tsela yeo Jehofa a thušago batho ba gagwe go kwešiša morero wa gagwe ganyenyane-ganyenyane. Eupša temana ye e ka šupa gape le go tsela yeo Mokriste a  dirago tšwelopele ge a dutše a ithuta Beibele. Go tšea nako gore segwera sa motho le Jehofa se gole. Ge re dula re ithuta le go diriša keletšo yeo re e hwetšago ka Lentšung la Modimo le ka mokgatlong wa gagwe, ganyenyane-ganyenyane re tla ba le dika tšeo di swanago le tša Kriste le gona re tla tseba Modimo gakaone. A re kweng gore Jesu o ile a re thuša bjang go kwešiša taba ye.

5. Jesu o neile mohlala ofe go bontšha gore go tšea nako gore motho a dire diphetogo bophelong?

⁵ Jesu o ile a bapiša molaetša wa ditaba tše dibotse le peu e nyenyane yeo e golago ganyenyane-ganyenyane ka dipelong tša batho bao ba nyakago go tseba nnete. O itše: “Dipeu tša hloga tša gola, gore bjang ga a tsebe. Mmu ka bowona o enywa dienywa ganyenyane-ganyenyane, go thoma lekgaba, ke moka gwa latela lenono, mafelelong dithoro tše di tletšego seakong.” (Mar. 4:27, 28) Jesu o be a e ra go re’ng? O be a e ra gore go no swana le ge sebjalo se gola ganyenyane-ganyenyane, le motho yo a amogelago ditaba tše dibotse o dira tšwelopele ganyenyane-ganyenyane. Ka mohlala, ge barutwana ba Beibele ba thoma go ba le segwera se sebotse le Jehofa, re bona diphetogo tše dintši tše dibotse tšeo ba di dirilego. (Baef. 4:22-24) Eupša re swanetše go gopola gore ke Jehofa yo a dirago gore peu yeo e nyenyane e gole.—1 Bakor. 3:7.

6-7. Re ithuta’ng tseleng yeo Jehofa a bopilego lefase ka yona?

⁶ Ka ge Jehofa a sa fele pelo o dira modiro wa gagwe ka moka go fihla a o fetša. O dira seo ka gobane a nyaka gore leina la gagwe le retwe le go hola batho ba bangwe. Ka mohlala, nagana kamoo a ilego a bopela batho lefase ganyenyane-ganyenyane.

⁷ Beibele e re ge Jehofa a be a bopa lefase o ile a bea “meelo ya lona,” a tsema “mekoti,” a ba a bea le “leswika la lona la sekhutlo.” (Jobo 38:5, 6) Le gona o ile a hlahlobišiša dilo ka moka tšeo a di dirilego. (Gen. 1:10, 12) O nagana gore barongwa ba ka ba ba ile ba ikwa bjang ge ba bona dilo ka moka tšeo Jehofa a di dirilego? Ba swanetše go ba ba ile ba  thaba kudu! Ke ka baka leo Beibele e rego ba ile ba “gobela ka go hlalala.” (Jobo 38:7) Re ithuta’ng go se? Re ithuta gore Jehofa o feditše mengwaga e dikete a bopa dilo ka moka go fihlela a di fetša, eupša ge a lebelela dilo ka moka tšeo a di bopilego o ile a bona e le ‘tše dibotse kudu.’—Gen. 1:31.

8. Ga bjale re tlo boledišana ka’ng?

⁸ Ka ge re bone mehlaleng yeo re ithutilego ka yona dirapeng tše di fetilego, go na le melao ya motheo e mentši ka Beibeleng yeo e re thušago gore re se ke ra fela pelo. Ga bjale re tlo boledišana ka maemo a mabedi ao go ona re swanetšego go ikemišetša go leta Jehofa.

9. Ke boemong bofe bjo bongwe moo re swanetšego go leta Jehofa?

⁹ Re ka swanelwa ke go letela gore Jehofa a arabe dithapelo tša rena. Ge re rapela Jehofa gore a re fe matla a gore re kgone go kgotlelela bothata bjo itšego goba a re thuše go tlogela selo seo a sa se ratego, re ka bona eka o tšea nako go araba dithapelo tša rena. Ke ka baka la’ng Jehofa a sa arabe dithapelo tša rena ka moka ka nako yeo re mo rapelago ka yona?

10. Ke ka baka la’ng re swanetše go leta re sa fele pelo gore Jehofa a arabe dithapelo tša rena?

¹⁰ Jehofa o theetša dithapelo tša rena. (Ps. 65:2) O lebelela dithapelo tša rena tše di tšwago pelong e le bohlatse bja gore re na le tumelo go yena. (Baheb. 11:6) Le gona Jehofa o nyaka go bona ge e ba re ikemišeditše go phela ka go dumelelana le seo re se rapelelago le go dira thato ya gagwe. (1 Joh. 3:22) Ge re kgopela Jehofa gore a re thuše go tlogela mokgwa o itšego o mobe, ga se ra swanela go fela pelo eupša re swanetše go dira sohle seo re ka se kgonago gore re fetoge. Jesu o re thušitše go kwešiša gore Modimo a ka no se arabe tše dingwe tša dithapelo tša rena kapelapela. O itše: “Tšwelang pele le kgopela, le tla newa; tšwelang pele le tsoma, le tla hwetša; tšwelang pele le kokota, le tla bulelwa. Gobane yo mongwe le yo mongwe yo a kgopelago o a amogela, gomme yo mongwe le yo mongwe yo a tsomago o a hwetša, le yo mongwe le yo mongwe yo a kokotago o tla bulelwa.” (Mat. 7:7, 8) Ge re ka latela keletšo yeo gomme ra ‘phegelela thapelo,’ re ka kgodišega gore Tatago rena wa legodimong o tla re kwa gomme a araba dithapelo tša rena.—Bakol. 4:2.

11. Baheberu 4:16 e re thuša bjang ge re bona eka Jehofa ga a arabe dithapelo tša rena kapela?

¹¹ Le ge re bona eka Jehofa ga a arabe dithapelo tša rena kapela, eupša yena o re tshepiša gore o tla araba dithapelo tša rena “ka nako e swanetšego.” (Bala Baheberu 4:16.) Ke ka baka leo re sa swanelago go bea Jehofa molato ge re bona eka selo se itšego ga se direge kapejana kamoo re nyakago ka gona. Ka mohlala, ke kgale batho ba bantši ba rapelela gore Mmušo wa Modimo o tle o fediše lefase le la Sathane. Jesu le yena o ile a bolela gore re swanetše go rapelela Mmušo wo wa Modimo. (Mat. 6:10) Eupša e tla ba ga bošilo ge re ka se sa ba le tumelo ka ge bofelo bo se bja tla ka nako yeo rena batho re bego re nagana gore bo tla tla ka yona. (Habak. 2:3; Mat. 24:44) E tla ba mo gobotse ge re ka dula re letile Jehofa e bile re na le tumelo ya gore o tla re araba. Bofelo bo tla tla ka nako ya maleba ka gobane Jehofa o šetše a kgethile ‘letšatši le iri’ yeo bo tlago go tla ka yona. Le gona motho yo mongwe le yo mongwe o tlo bona gore letšatši leo Jehofa a le kgethilego ke la maleba.—Mat. 24:36; 2 Pet. 3:15.

12. Ke neng moo go ka bago thata gore re bontšhe go se fele pelo?

¹² Re swanetše go se fele pelo ge re dutše re letile gore Modimo a dire gore go be le toka.  Gantši batho ba lefase le ga ba sware gabotse batho bao ba fapanago le bona ka bong, ditšo, morafo le batho bao ba tšwago dinageng tše dingwe. Ba bangwe ga ba sware gabotse batho bao ba golofetšego mmeleng le bao ba nago le malwetši a monagano. Bahlanka ba Jehofa ba bantši ba kgotleletše go se swarwe gabotse ka baka la ditumelo tša bona. Ge e ba re swarwa ka tsela yeo, re swanetše go dula re gopola mantšu a Jesu. O itše: “Yo a kgotleletšego go fihla bofelong ke yena a tlago go phološwa.” (Mat. 24:13) Eupša ke’ng seo o tlago go se dira ge e ba o ka tseba gore motho yo o kopanelago le yena o dirile sebe? Ka morago ga gore bagolo ba tsebe ka taba yeo na o tlo e tlogelela ka diatleng tša bona o dutše o letile ka go se fele pelo gore ba e rarolle ka tsela ya Jehofa? Bagolo ba ka swanelwa ke go dira’ng ge e ba motho a dirile sebe?

13. Bagolo ba swanetše go dira’ng ge e ba motho yo mongwe a dirile sebe?

¹³ Ge bagolo ba ka lemoga gore motho yo mongwe ka phuthegong o dirile sebe, ba swanetše go rapela Jehofa gore a ba fe bohlale gore ba kgone go lebelela taba yeo ka tsela yeo yena a e lebelelago ka yona. (Jak. 3:17) Ba dira bjalo ka gobane ba nyaka go thuša modiradibe yoo gore ge go ‘kgonega a tlogele sebe seo.’ (Jak. 5:19, 20) Le gona ba nyaka go dira sohle seo ba ka se kgonago gore ba šireletše phuthego le go homotša bao ba kwešitšwego bohloko. (2 Bakor. 1:3, 4) Ge bagolo ba ka hwetša gore motho yo a itšego o dirile sebe, go ka ba tšea nako gore ba tsebe gore ge e le gabotse go diragetše eng. Ba tlo rapela ka taba yeo ke moka ba nyaka tlhahlo yeo e tšwago ka mangwalong ke moka ba phošolla modiradibe yoo “go fihla tekanyong e swanetšego.” (Jer. 30:11) Le ge bagolo ba ka se tšee nako e telele gore ba swaragane le taba yeo, ba ka se ahlole motho yoo kapelapela. Ge ba ka lebelela taba ka tsela yeo Jehofa a e lebelelago ka yona, phuthego e tla holega kudu. Le ge bagolo ba ka rarolla bothata ka tsela ya Jehofa, ditiro tša modiradibe yoo di ka šala di kweša ba bangwe bohloko. Ge e ba le wena se se ka go diragalela, o ka dira’ng gore o se ke wa kwa bohloko kudu?

14. Ke mohlala wa mang wa ka Beibeleng wo o ka go thušago ge o kwešitšwe bohloko ke Mokristegotee le wena?

¹⁴ Na o kile wa kwešwa bohloko kudu ke motho yo a itšego, mohlomongwe Mokristegotee  le wena? O ka hwetša mehlala e mebotse ya ka Beibeleng yeo e ka go thušago gore o tlogelele Jehofa gore a rarolle bothata bjoo. Ka mohlala, le ge bana babo Josefa ba ile ba mo swara gampe ga se a ka a dumelela dilo tšeo ba mo dirilego tšona di mo kweša bohloko kudu. Go e na le moo, o ile a dula a hlankela Jehofa yo a ilego a mo putsa ka ge a ile a dula a letile ka go se fele pelo e bile a kgotleletše. (Gen. 39:21) Ge nako e dutše e eya Josefa o ile a kgona go lebalela bana babo gomme a bona kamoo Jehofa a ilego a mo šegofatša ka gona. (Gen. 45:5) Go swana le Josefa, le rena re a kgothatšega ge re tiiša segwera sa rena le Jehofa e bile re tlogelela ditaba ka diatleng tša gagwe.—Ps. 7:17; 73:28.

15. Ke eng seo se thušitšego kgaetšedi yo mongwe gore a be le khutšo e bile a kgotlelele ge a be a sa swarwe gabotse?

¹⁵ Ke nnete gore ga se mathata ka moka ao e lego a magolo go swana le a Josefa eupša ge e ba re sa swarwe gabotse seo se ka dira gore re kwe bohloko. Ge e ba re na le bothata le motho yo mongwe go akaretša le yoo e sego Hlatse ya Jehofa, re tlo holega ge re ka diriša melao ya motheo ya ka Beibeleng. (Bafil. 2:3, 4) A re boneng mohlala wa seo. Kgaetšedi yo mongwe o ile a kwa bohloko kudu ka morago ga gore a kwe gore motho yo mongwe yoo a šomago le yena o be a bolela gampe ka yena. Go e na le gore a kitimele go itefeletša o ile a nagana ka mohlala wa Jesu. Ge Jesu a be a rogwa ga bohloko ga se a ka a ithogela. (1 Pet. 2:21, 23) Go nagana ka seo go ile gwa thuša kgaetšedi yoo gore a se ke a dira selo ka seo se diragetšego. Ka morago o ile a lemoga gore motho yoo a bego a bolela gampe ka yena o be a lwala kudu e bile a na le stress. Kgaetšedi yoo o ile a phetha ka gore motho yoo o be a sa itiriše. Ka gona o ile a thaba ka ge a ile a kgotlelela ka go se fele pelo ge a be a sa swarwe gabotse le gona o ile a ba le khutšo.

16. Ke eng seo se ka go homotšago ge o kgotleletše go se swarwe gobotse? (1 Petro 3:12)

¹⁶ Ge e ba o kgotleletše go se swarwe gabotse goba o kwešwa bohloko ke selo se itšego gopola gore Jehofa o “kgauswi le ba dipelo tše di robegilego.” (Ps. 34:18) O a go rata ka gobane o kgotleletše ka go se fele pelo e bile o mmotša mathata a gago. (Ps. 55:22) Ke yena Moahlodi wa batho ka moka mo lefaseng. Ka  baka leo o bona dilo ka moka tšeo di diregago. (Bala 1 Petro 3:12.) Ge e ba o na le mathata ao o sa kgonego go a rarolla, na o ikemišeditše go mo letela?

17. Go ya ka Jesaya 30:18, Jehofa o re tshepiša gore o tlo re direla’ng?

¹⁷ Kgauswinyane Tatago rena wa legodimong o tlo diriša Mmušo wa gagwe go re šegofatša kudu. Jesaya 30:18 e re: “Jehofa o tla dula a le letile gore a le gaugele, gomme o tla ema gore a le bontšhe kgaugelo. Jehofa ke Modimo wa kahlolo. Go thaba bao ba dulago ba mo letetše.” Bao ba dulago ba letetše Jehofa ba tlo šegofatšwa kudu gona bjale le lefaseng le lefsa.

18. Re tlo hwetša ditšhegofatšo dife?

¹⁸ Ge bahlanka ba Modimo ba fihla lefaseng le lefsa, ga ba sa tlo ba le mathata le diteko tšeo di ba welago lehono, ka gobane go hloka toka le bohloko di tla be di fedile. (Kut. 21:4) Re tla be re sa hlwe re tshwenyega ka dilo tšeo re se nago tšona gobane re tla be re na le dilo tše dintši. (Ps. 72:16; Jes. 54:13) Ruri Modimo o tla be a re šegofaditše kudu!

19. Ke eng seo Jehofa a re lokišeletšago sona ganyenyane-ganyenyane?

¹⁹ Ge Jehofa a re thuša gore re kgone go fenya mekgwa e mebe le go phela ka tsela yeo e mo thabišago, o re lokišeletša gore re tle re kgone go ipshina ka bophelo ge Mmušo wa gagwe o tla be o buša. O se ke wa nyama gomme wa tlogela go hlankela Jehofa. Ruri re letetše bophelo bjo bobotse nakong e tlago! Ka ge re tseba gore Jehofa o tlo re šegofatša, eka re ka dula re letile ka go se fele pelo gore nako yeo e fihle!