1-2. E na i nɔ bu ekobee ue ama a?

WEE a tɔɔ̄loo doodoo wa sɔ̄ ziī nu o gaa bee ɛmadɛɛ̄ naa lu nyɔɔ sɔ̄ ni? Ekɔ a naa wee a nɛ taāŋa ni? Naa daba etɔɔ̄ a loo dookɛ̄ kpa Kam 13:12 kɔ doo, lo a kɔ: “Bɛābu a nyɔɔ ina gbɛnɛ-edo sɔ̄ doo kɔ beenyiɛ a ɛrɛ dumɛnu.” Mɛ etɔɔ̄ a loo doodoo wa lo o suā nu anua nu o gaa bee ɛmadɛɛ̄ a naa lu nyɔɔ sɔ̄? Lo ama edoo kɔ o kpɛ̄naloo e’egerebu sa tɔɔ̄ baɛ.

² Bu ekobee ue ama, i muɛ pio daakuu Baibol lo edap i yerebah nɛ kɔ i ɛrɛ sa nyimɛ elap dogo “tɔɔ̄ baɛ.” (Maika 7:7) Lɛɛ i nɔ baɛ sīdee i dap egerebu sa tɔɔ̄ baɛ sɔ̄ Jɛhova edoo dogo. Bu kpɛdumɛ, i nɔ pya leelee pya a kpɛ̄naloo etɔɔ̄ baɛ Jɛhova e’ɛrɛ.

3. E na ue a le bu kpa Kam 13:11 i tɔgɛ a?

³ Ziī edoba a tɔgɛ nu anua alu ebɛɛ̄ kɔ i egerebu na lo a le bu kpa Kam 13:11, lo a kɔ: “Zɔ alu bu nwaanwaabah gaa le kii kɛ̄, mɛ nɛɛ a bɔŋɛnɛloo kina kina gaa le ɛrɛ gbɛnɛ yii loo.” E na i nɔ aāloo ue a le bu dɔ ama a? Suānu le bu doo nu kina kina, doo ziī ziī nu ziī ziī sɔ̄.

4. E na zuurabahtɔ̄ a le bu kpa Kam 4:18 i tɔgɛ a?

⁴ Kpa Kam 4:18 kɔ i nɛ kɔ “nwī dee lo pya kaāna dogo le doodoo ɛɛdee sɔ̄ lɔɔrɛ; lo a mɔ ɛɛrɛ kɛ̄ mmɛ sɔ̄ dee eyira.” Pya ue ama gaa kɔ kaāna nu akiiloo kɛ̄ Jɛhova muuna ye ekɛɛrɛ nɛ pya ye nɛɛ kina kina doo. Kerewo dɔ ama ɛrɛnage nu edoo kiiloo kɛ̄ ziī Nɛɛ  Kraist kwabaloo ye sīdee tɔɔ̄dum sa tɔɔ̄ waɛloo Jɛhova doo. Nyim kiisī bu edɔɔ̄ naale nu etɛɛ loo. A wee su sɔ̄. Lo i su sɔ̄ nɔā sa su pya zuurabahtɔ̄ i ɛrɛ aābu Muɛ̄ Ue Bari le ye bɔŋanaloo yere bu dogo, kina kina i ɛrɛ pya elap dogo Kraist bee ɛrɛ. I nyimnage yiiloo bu i suānu Bari. Naa ɛp kɛ̄ Jizɔs bee baatɛ̄ lo gah ama doo.

5. Amunu edoba na Jizɔs bee su kɔā kɛ̄ nyim kiisī wee lu kina kina doo a?

⁵ Jizɔs bee su ziī edoba nu baātɛ̄ kɛ̄ yereue Buɛ̄-mɛnɛ i zue le doodoo nwīgbagbara eyuu te a gaa dum bu beenyiɛ pya nɛɛ le beenyiɛ doo. A bee kɔ: “Eyuu a si mɛɛ̄ sa nyim, [nɛɛ a bee foh] naa sua kɛ̄ a tɛɛ̄ doo. Kɛnɛkɛ̄ alɛɛ loo mum bee, tua sɔ̄ ye mɛɛ̄, lɛɛ ye ko-bah, lɛɛ a lu ye kaāna ko.” (Maak 4:27, 28) E na Jizɔs aa bee kɔ a? Nu a gaa bee baatɛ̄ na kɔ dookɛ̄ nu alu efoh wee dum kina kina doo, kɛ̄ nɛɛ a su baɛ bah suā yereue Buɛ̄-mɛnɛ wee nyimnage kina kina bu edɔɔ̄ doolo. Bu edoba, sɔ̄ pya i gaa nyɔɔnɛ nɔ Baibol agɛrɛbah tɔɔ̄ waɛloo Jɛhova, i wee bɔātɛ̄ muɛ gbɛnɛ-edo lele nyaa bu wa dum. (Ɛfɛs 4:22-24) Mɛ a lee kɔ i nyɛŋiabu kɔ ɛɛ Jɛhova na a doo kɔ nwīgbagbara eyuu ama a nyim a.—1 Kɔr 3:7.

6-7. E na i nɔ aāloo kɛ̄ Jɛhova bee dɛm nyɔuwe doo a?

⁶ Bu dɛ̄dɛɛ̄ nu Jɛhova doo, a wee su egerebu siā dɛ̄dɛɛ̄ ye tam kaɛlɛɛ sɔ̄ a ye su bah. A wee doo wo lo enɛ ka ye bee le lokwa pya dɔɔ̄na ɛrɛnage biī aāloo. Bu edoba, naa kɛɛrɛ kɛ̄ Jɛhova bee kwa kɛnɛkɛ̄ kina kina nɛ pya miɔŋɔ nɛɛ doo.

⁷ Sɔ̄ Baibol aa baatɛ̄ kɛ̄ Jɛhova bee dɛm nyɔuwe doo, a kɔ nu akiiloo “ye edo,” kɛ̄ alu “edɔɔra ye ekatɛ̄ yere kɛ̄” doo, le kɛ̄ alu “esere ye dɛm bee-ga-daɛ̄” doo. (Job 38:5, 6) A bee sunage sɔ̄ ɛma ye tam. (Jɛn 1:10, 12) O dapge kɛɛrɛ kɛ̄ nu bee tɔɔ̄loo pya ɛnjɛl doo sɔ̄  ba bee muɛ kɛ̄ Jɛhova aa bee dɛm nu kina kina doo ni? Naa ɛp kɛ̄ lo ama bee wa dap ɛɛrɛbu doo a! Wo bee doo kɔ ba a “wiikpā bu ɛɛbu.” (Job 38:7) E na i nɔ aāloo a? Jɛhova bee su gbɛnɛ-edo zua dɛma nu, mɛ sɔ̄ a su sɔ̄ ɛma dɛ̄dɛɛ̄ nu a bee dɛm, a bee kɔ a “lee gbɛnɛ.”—Jɛn 1:31.

8. E na i kɛɛrɛbu anyaawo a?

⁸ Dookɛ̄ i emɔna bu pya edoba i ekɔa nu akiiloo doo, i dap ɛrɛ gbɛnɛ-edo zuurabahtɔ̄ aābu Muɛ̄ Ue Bari lo a kɔ kɛ̄ alu ebɛɛ̄ kɔ i ɛrɛ egerebu doo. Nyaawo, i kɛɛrɛbu baɛ sīdee i ɛrɛ etɔɔ̄ baɛ Jɛhova.

9. Ziī amunu sīdee na alu ebɛɛ̄ kɔ i tɔɔ̄ baɛ Jɛhova a?

⁹ Dap lu ebɛɛ̄ kɔ i tɔɔ̄ baɛ sɔ̄ Jɛhova e’agara i kara. Sɔ̄ i yere kara bara yerebah lo e’ɛrɛ e’agaloo lo ebe eebah taāŋa ale e’ɔaloo, i dap kɛɛrɛ kɔ a naa nwaabah agara i kara dookɛ̄ i bee ɛmadɛɛ̄ doo. E na anua Jɛhova naa wee agara dɛ̄dɛɛ̄ i kara taɛ sɔ̄ i bee ɛmadɛɛ̄ ani?

10. E na anua i egerebu mmɛ sɔ̄ elu e’agara pya i kara a?

¹⁰ Jɛhova wee gbaɛ̄tɔ̄loo pya i kara. (Yɔɔ 65:2) A ɛp pya kara i yere aā taɛ bu i beenyiɛ nua nu a tɔgɛ kɔ i ɛrɛe ye yira bu. (Hib 11:6) A taɛnage Jɛhova emuɛ sɔ̄ i biaɛfii lo etɔɔ̄dum a gbaaloo pya kara i yere sa doo nu alu ye nia. (1 Jɔn 3:22) Nyɔɔwo, a dap lu ebɛɛ̄ kɔ i egerebu sa si tam a gbaaloo pya i kara ɛrɛgeba sɔ̄ i gaa piiga lo ebe eebah pɔrɔ elap ale kɛ̄ i ɔloo. Jizɔs bee doo kɔ i suā kɔ naale elu e’agara pio pya i kara aba sɔ̄. A yere i mɛm loo kɔ: “Baraa, e a elu enɛ i; gbiā e bui egbī muɛ, tɔābaloo e a elu ekpaāna i nɛ. Nyɔnɛbee ɛrɛgeba nɛɛ a bara wee ɛrɛ, e nɛɛ a gbī wee gbī muɛ, e nɛɛ a tɔābaloo na a wee lu ekpaāna nɛ a.” (Mat 7:7, 8) Lo i nyɔɔnɛ zuurabahtɔ̄ ama sa tɔɔ̄ “agara bu yere kara,” i dap dɛrɛ nyiɛ nyɔɔ i Tɛ a le li bunyɔɔ kɔ edā sa agara pya i kara.—Kɔl 4:2.

11. Mɛ sīdee na Pya Hibru 4:16 i dap yerebah nɛ sɔ̄ a bee kɔ a naa lu enwaabah agara pya i kara a?

¹¹ Kereadoo a bee kɔ a naa lu enwaabah agara i kara, Jɛhova yira yii lo e’agara i kara ‘taɛ sɔ̄ a bɔloo.’ (Buū Pya Hibru 4:16.) Nu anua ii le ebege ue Jɛhova sɔ̄ nu naa nwaabah sira dookɛ̄ i bee ɛmadɛɛ̄ doo lo. Bu edoba, gbɛnɛ-edo nɛɛ eyere kara kɔ Buɛ̄-mɛnɛ Bari a su kuma mmɛ loo nyɔuwe ama. Jizɔs bee kɔnage kɔ i yere kara bara lo ama. (Mat 6:10) Mɛ naa ɛp kɛ̄ elu nu ezu doo lo a le ziī nɛɛ lɛɛbaloo kɔ yira a ɛrɛ bu Bari a ɔloo nyɔɔbee kuma naa lu taɛ sɔ̄ pya nɛɛ bee ɛmadɛɛ̄ doo a! (Hab 2:3; Mat 24:44) Nyɔɔwo, alu nu suānu le loo kɔ i tɔɔ̄ baɛ Jɛhova, ye yere kara nɛ sa suā kɔ e’agara i nɛ. Kuma elu taɛ sɔ̄ a bɔloo, nyɔɔbee Jɛhova esagɛ taɛ “dee . . . le hour” elu. E lo dee elee loo dɛ̄dɛɛ̄ nɛɛ.—Mat 24:36; 2 Pit 3:15.

12. Taɛ mɛ sɔ̄ na a dap i agabah e’egerebu a?

¹² A dap lu ebɛɛ̄ kɔ i egerebu baɛ sɔ̄ elu ebiaɛ kaāna biaɛ. Gbɛnɛ-edo sɔ̄ pya nɛɛ wee aara pya a naa lu wa barasī, edo, ale pya wa doonu kɛnɛkɛ̄ lu kee loo lo alaba bu sīdee a naa lee gbaānage loo kɛ̄ pya nɛɛwa le pya nɛɛdam aara ziī doo. Lu e’aara pya dɔɔ̄na bu pɔrɔ sīdee  nyɔɔ wa dumɛloo ale nyɔɔbee ba ɛrɛ boh. Booboo Pya Ekeebee Jɛhova aa egerebu kɛ̄bah pɔrɔ biaɛ nyɔɔbee wa yira a dɛɛa nyɔɔ Baibol. Ɛrɛgeba sɔ̄ alu e’aara i bu pɔrɔ sīdee i ɛrɛ ekɛɛrɛbu pya ue Jizɔs a kɔ: “Nɛɛ a egerebu mmɛ kuma elu ekpɔā.” (Mat 24:13) Mɛ e na o doo lo o suā kɔ ziī nɛɛ a le bu bɔŋanaloo esia gbɛnɛ pɔrɔ a? O lɛɛge baloo bie bah pya kanɛɛ lo a le elua edoo kɔ ba a suā nu akiiloo sa egerebu baɛ kɔ ba a aabaloo bu sīdee Jɛhova yerekpotɛ̄ ni? E na pya kanɛɛ edoo sɔ̄ ziī nɛɛ si gbɛnɛ pɔrɔ a?

13. E na Jɛhova gbī kɔ pya kanɛɛ a doo lo a le ziī nɛɛ si gbɛnɛ pɔrɔ a?

¹³ Lo pya kanɛɛ suā kɔ ziī nɛɛ a le bu bɔŋanaloo esia gbɛnɛ pɔrɔ, ba wee yere kara bara “suānu a aa nyɔɔ” lokwa ba dap ɛp lo kɛ̄tɔɔ̄ dookɛ̄ Jɛhova ɛp doo. (Jem 3:17) Nu ba seeasī na lo eyerebah nɛ nɛɛ a bee si pɔrɔ a kɔ a obia aaloo “ye tɛɛ̄ ekwɔ.” (Jem 5:19, 20) Ba gbīnage edoo dɛ̄dɛɛ̄ nu ba dap doo lo ekpega bɔŋanaloo sa nɛ egbɔ̄nyiɛ pya a bee lu edoo piya nu loo. (2 Kɔr 1:3, 4) Sɔ̄ pya kanɛɛ aa aabaloo ue akiiloo nɛɛ a si gbɛnɛ pɔrɔ, ba ɛrɛ edasī gbītɛ̄ dɛ̄dɛɛ̄ nu akiiloo lo ue leere, e lo ama dap wa su gbɛnɛkpo sɔ̄ bah. Lɛɛ ba yere kara sa nɛ zuurabahtɔ̄ a aabu Kpa Kaɛ sa leredeebah nɛɛ a bee si pɔrɔ a ‘dookɛ̄ a bɔloo doo.’ (Jer 30:11) Kereadoo pya kanɛɛ naa ɛrɛ e’aaloo kɔ gbɛnɛ-edo sɔ̄ a tɛɛ̄ lɛɛ ba gae biaɛ ziī ue, ba naale egbara sa nwaabah fiibee lo ue. Lo alu e’aabaloo pya ue a sira bu bɔŋanaloo bu sīdee a lee, edɔbiī nɛ dɛ̄dɛɛ̄ nɛɛ a le bu bɔŋanaloo. Kɛādoo, kere alu e’aabaloo ue bu sīdee ama, nɛɛ a bee lu edoo piya nu loo dap lege aa ɛrɛ ekiɛ̄nu. Lo alu kɛ̄ a a tɔɔ̄loo doolo, e na o dap doo lokwa oo ɛrɛ gbɛnɛ ekiɛ̄nu ani?

14. Amunu edoba a le bu Baibol na edap a yerebah nɛ lo a le ziī o wuga bu bɔŋanaloo doo a piya nu loo a?

¹⁴ Ziī nɛɛ ebee a dooge gbɛnɛ piya nu loo, naa daba ziī wuga nɛɛdam ale wuga nɛɛwa bu bɔŋanaloo ni? O dap nɔnu aāloo pya lele edoba a le bu Muɛ̄ Ue Bari lo a i tɔgɛ kɛ̄ etɔɔ̄ baɛ Jɛhova kɔ a sere bee loo ue doo. Bu edoba, kere Josɛf bee tɔga kɛ̄bah pɔrɔ biaɛ a  aabah pya ye wuga, a naa bee lɛɛbaloo kɔ nu ba ye doo loo a doo kɔ aa ɛrɛna ɛɛbu. Taāwo, a bee bie ekɛɛrɛ nyɔɔ ye esiatam nɛ Jɛhova, e a bee ye nɛ ekpɛanu nyɔɔ ye egerebu. (Jɛn 39:21) Sɔ̄ sɔ̄ aa kiisī, Josɛf bee aaloo nɛ pya a bee ye doo piya nu loo sa sere ekɛɛrɛ nyɔɔ kɛ̄ Jɛhova enɛa ye leelee doo. (Jɛn 45:5) Doodoo Josɛf, i wee ɛrɛ egbɔ̄nyiɛ sɔ̄ i tɔɔ̄ baɛ Jɛhova kɔ a doo kaāna biaɛ taɛ sɔ̄ a bɔloo.—Yɔɔ 7:17; 73:28.

15. E na a bee yerebah nɛ ziī wuga nɛɛwa kɔ a dap egerebu sɔ̄ a bee lu edoo ye piya nu loo a?

¹⁵ Alu kaka kɔ naale dɛ̄dɛɛ̄ pɔrɔ biaɛ a i siraloo na a agabah bee lo Josɛf a, kerewo a wee i zinage loo sɔ̄ alu e’aara i bu pɔrɔ sīdee. Lo ziī nɛɛ le ii ɛnia taāŋa, kere alu nɛɛ a naa gaa taāŋabah Jɛhova, pya daakuu a le bu Baibol eyerebah i nɛ. (Fil 2:3,4) Naa ɛp ziī edoba ama. Bu ziī wuga nɛɛwa bee biira kaāna sɔ̄ a bee gbī muɛ kɔ nɛɛ le ɛɛ aa gbaa siniatam bee kɔ pɔrɔ pɔrɔ ue a naa lu kaka a ye kiiloo nɛ pya dɔɔ̄na. Taā lo wuga nɛɛwa nwaabah doo dogo, a bee dasī su sɔ̄ ɛā ekɛɛrɛ nyɔɔ edoba Jizɔs. Sɔ̄ a bee lu egbɛ ye a naa bee wa obia gbɛ. (1 Pit 2:21, 23) A bee biaɛfii kɔ a naale edooe ue loo nu a bee sira a. Sɔ̄ esaa na a suā kɔ lo nɛɛ a bee ye biirebu a bee le bu gbɛnɛ eyɔloo a gaa ye taɛŋɛ. Nyɔɔwo lo wuga nɛɛwa bee aadee su kɔ lo nɛɛ le ɛɛ aa bee gbaa siniatam a naa suā kɔ ekɔae pɔrɔ ue. Nyɔɔwo, bu lo wuga nɛɛwa bee ɛɛ kaāna kɔ a bee ɛrɛe egerebu sɔ̄ a bee lu ekɔ pɔrɔ pɔrɔ ue ye kumaeloo, sa a bee ɛrɛ efɛɛloo beenyiɛ.

16. E na edap a nɛ egbɔ̄nyiɛ lo a le o gaa egerebu kɛ̄bah pɔrɔ biaɛ a? (1 Pita 3:12)

¹⁶ Lo a le o gaa egerebu kɛ̄bah pɔrɔ biaɛ ale ɛrɛgeba dɔɔ̄na pɔrɔ sīdee alu e’aara a, nyɛŋiabu kɔ Jɛhova tɔɔ̄ waɛloo “pya beenyiɛ baara.” (Yɔɔ 34:18) A were a loo nyɔɔ kɛ̄ o egerebu doo le kɔ o su dɛ̄dɛɛ̄ o dumɛ toh ye toore doodoo toh. (Yɔɔ 55:22) Alɛ na alu Nɛɛ Biaɛ loo dɛ̄dɛɛ̄ nyɔuwe a. Lɔgɔ nu naa gɔā ye kɛ̄dɛɛ̄. (Buū 1 Pita 3:12.)  Nyɔɔwo, sɔ̄ o gaa tɛɛ̄ bu taāŋa lo oo le edap kwa, o kpɛ̄nageloo etɔɔ̄ baɛ sɔ̄ Jehova edoo dogo ni?

17. Amunu agɛrɛ nyiɛ na Jɛhova i nɛ bu kpa Aisaia 30:18 a?

¹⁷ Sɔ̄ sɔ̄ naa binia i Tɛ a le li bunyɔɔ enɛ i leelee tɛ̄maloo ye Buɛ̄-mɛnɛ. Kpa Aisaia 30:18 kɔ: “Jɛhova gaa le tɔɔ̄ baɛ loo e’ɛrɛ i ewonu loo; nyɔɔbee wo a dana loo ye nɛ nyɔɔ loo e’ɛrɛ i toesaɛ̄ loo. Nyɔnɛbee Jɛhova lu Bari loo kaāna biaɛ; leelee a le nɛ dɛ̄dɛɛ̄ pya a ye tɔɔ̄ baɛ.” Pya a tɔɔ̄ baɛ Jehova e’ɛrɛ gbɛnɛ-edo leelee anyaawo le bu aā nyɔuwe a gaa lu.

18. Amunu leelee na a gaa i tɔɔ̄ baɛ a?

¹⁸ Sɔ̄ pya nɛɛ Bari eyii bu aā nyɔuwe, ba naale esinakɛ̄ egerebu kɛ̄bah pya taāŋa le etɛɛrɛloo ba le bu anii’ee. Pɔrɔ biaɛ naale elena, e ii le e’ɛrɛna ezialoo. (Mum 21:4) Lɔgɔ nu naale etaāŋɛ na i, nyɔnɛbee i ɛrɛ gbɛnɛkpo nu a i gbɔɛ̄loo. (Yɔɔ 72:16; Ais 54:13) Ɛp kɛ̄ lo ama elu leelee doo a!

19. E na Jɛhova aa i yerebah nɛ kɔ i kpɛ̄naloo loo anyaawo a?

¹⁹ Kuma sɔ̄ i gaa tɔɔ̄ge baɛ lo sɔ̄ a, Jɛhova aa i yerebah nɛ kɔ i kpɛ̄naloo anyaawo lokwa i dap tɔɔ̄ kɛɛ̄ ye bɛbɛɛ, tɛ̄maloo eyerebah i nɛ kɔ i be eebah pɔrɔ pɔrɔ elap dogo sa ɛrɛ pya elap dogo a ye nia. O aa ɔɛloo a, e o aa pee beenyiɛ a. Ekpeloo dum le deesī. Kuma sɔ̄ i gaa ɛmadɛɛ̄ kɔ deesī li elee a, doraa i egerebu sa tɔɔ̄ baɛ Jɛhova mmɛ sɔ̄ edoo pya yii a bee i yira nɛ.