1-2. Ndaga jitshi tuza muzuelela mu longo edi?

LUHOLO lutshi wana gudivua gula udi munengenena gima gimoshi uvi giene gidi muladiga? Muila wana guguleba ba? Yajiya gukhala egi wana gudivua gifua luholo mukanda wa Ishima 13:12 wana zuela egi: ‘Gula ushigo muheta gima wakhalele gudi felela, wajiya guvua gikenene gu mutshima.’ Na henyaha gula aguwambela ndaga jiatshitshi egi gima giene giladige, luholo lutshi wana gudivua? Ndaga jiene jiajiya gugutuma ha gunengenena nu guhuiminyina guagasue.

² Mu longo edi tuza gumona malongo a Biblia ajiya gutukuatesa ha gukudisa khadilo dia ‘gunengenena nu guhuiminyina guagasue.’ (Mika 7:7) Tuza nji muzuelela ndaga mbadi jiana toga egi tunengenene Yehowa nu guhuiminyina guagasue. Gungima tuza gumona ndaga jiawaha Yehowa walayele athu ana gunengenena nu guhuiminyina guagasue.

3. Ndaga itshi mukanda wa Ishima 13:11 udi gutulongesa?

³ Mukanda wa Ishima 13:11 udi gutumonesa gishina tudi naye gukhala nu khadilo dia guhuiminyina. Udi muzuela egi: ‘Umonyi wana guhetewa muphushi mbawutota, uvi umonyi wana guhetewa mage-mage mbawudivudisa.’ Longo ditshi tuazula mu verse eyi? Muthu watema wana gukalagala ndaga nu guhuiminyina guagasue. Mbawuheta nji mbuto jiawaha.

4. Longo didi mu Ishima 4:18 didi muzuela itshi?

⁴ Mukanda wa Ishima 4:18 udi gutuwambela egi: ‘Njila ya athu abonga idi gifua muanya udi muzoga mu gimenegena. Udi mulandula gudivudisa mage-mage uu tangua diza mutua muanya.’ Mbimbi eji jidi mumonesa haphelo egi Yehowa wana gukuatesa  akombeledi’enji ha gukotesele felela dienji mage-mage. Uvi verse yajiya nji gutukuatesa ha gukotelesa luholo Muklisto wana kalagala usombegeshi mu monyo wenji nu luholo wana sala wagujinginyina gudi Yehowa. Yajiya guzula tangua diavula hagula muthu akolese ufuta wenji nu Yehowa. Gula tudi mulonguga Biblia muabonga, tudi mukalegela ndaga tudi mulonguga nu tudi mukalegela malongo Nzambi wana gutuhana mu njila ya organizasio wenji, mbatukudisa mage-mage makalegelo a Klisto. Mbatujiya nji Nzambi muabonga. Tutadilenu luholo Yesu wamonesele ndaga yene.

5. Gifezegeselo gitshi Yesu wahanele ha gumonesa egi muthu wajiya guzula tangua ha gusombegesa makalegelo enji?

⁵ Yesu wakalegele gifezegeselo gimoshi ha gumonesa egi, lukuma luabonga lua Ufumu tuana longesa ludi gifua lumbale luazonda ludi mukula mage-mage mu mitshima ya athu ana zumba ndaga jiabonga. Wazuelele egi: ‘Mbuto jiazoga jiakula, uvi muene [mukunyi wa mbuto] gujiya ndo luholo jidi mukula. Mavu adi muzola mbuto ene hakhawo hazonda-zonda. Thomo mutshi, gungima gisusu, gu gisugishilo bundu dia mudidi mukatshi dia gisusu.’ (Mako 4:27, 28) Ndaga itshi Yesu watshiginyile guzuela? Wakhadile muzuele egi gifua luholo mutshi wana gukula mage-mage, luholo lumoshi nji muthu wana gutshigina lukuma luabonga lua Ufumu wajiya guzula tangua ha gukalagala usombegeshi mu monyo wenji. Ha gufezegesa, gula athu tuana longesa Biblia asendesa gukuata ufuta wakola nu Yehowa, tuana mona luholo ana kalagala usombegeshi mu monyo wawo mu ndaga jiavula. (Ef. 4:22-24) Uvi tushigo naye gubuita mutshima egi Yehowa wana gukudisa lumbale luene luazonda.—1 Kol. 3:7.

6-7. Longo ditshi tuazula mu luholo Yehowa wafugile mavu?

⁶ Yehowa wana monesa khadilo dia guhuiminyina mu ndaga jiagasue jiana kalagala muene ha gutaganesa midimo yenji. Wana kalagala ngenyi mukunda nu lutumbu lua jina dienji nu ha gukuatesa athu ako. Ha gufezegesa, tutadilenu luholo Yehowa walondele mavu mage-mage mukunda nu athu.

 ⁷ Tangua Biblia yana monesa luholo Yehowa wafugile mavu, yana guzuela luholo ahagele ‘gukoma nu guleha guenji,’ nu luholo ajigile ‘makunji enji,’ nu luholo ahagele ‘fondasio yenji.’ (Yobo 38:5, 6; Ngi. 104:5) Yehowa wazudile nji tangua dia gutala midimo yenji. (Gis. 1:10, 12) Tangiza gale luholo ba anjelo adivuile tangua akhadile gumona ima yagasue ihe-ihe Yehowa wakhalele mufuga mage-mage! Akhadile diago nu gusuanguluga guavula hene akhadile ‘gumba miyelele.’ (Yobo 38:7) Longo ditshi tuazula? Yehowa wazudile ivo yavula ha gufuga mavu nu themua nu ima yagasue idi nu monyo. Uvi tangua atadile luko ima yene yagasue afugile, wazuelele egi yakhalele ‘yawaha lume.’—Gis. 1:31.

8. Itshi tuza muzuelela henyaha?

⁸ Ifezegeselo eyi yagasue idi gutumonesa egi, Mbimbi ya Nzambi idi nu malongo avula adi gutulongesa egi, khadilo dia guhuiminyina didi nu ndando. Henyaha tuzuelelenu ndaga mbadi jiana toga egi tunengene Yehowa nu guhuiminyina guagasue.

9. Tuajiya gunengenena Yehowa mu ndaga itshi?

⁹ Tuajiya gunengena egi Yehowa ahane mvutu gu isambu yetu. Tangua tuana toga Yehowa ngolo ha gulua nu malamba nga ha gubemba gukalagala ndaga imoshi yabola, tuajiya gutangiza egi Yehowa ashigo muhana mvutu gu isambu yetu muphushi. Mukunda natshi Yehowa anago guhana mvutu gu isambu yetu yagasue muphushi?

10. Mukunda natshi tudi naye gunengenena nu guhuiminyina guagasue egi Yehowa ahane mvutu gu isambu yetu?

¹⁰ Yehowa wana gutegelela isambu yetu muabonga. (Ngi. 65:2) Wana mona isambu yetu gifua ndaga idi mumonesa gutshigina guetu gudi muene. (Heb. 11:6) Yehowa wana suanguluga nji ha gumona luholo tuana gukalagala ngolo ha gukalagala ndaga ha gudivua nu gutshigina guenji nu mu gudivua nu isambu yetu. (1 Yone 3:22) Hene, tudi naye gukhala nu khadilo dia guhuiminyina, tudi naye nji gukalagala ndaga mu gudivua nu isambu yetu tangua diagasue tudi mutshigina gubemba khadilo dimoshi diabola. Yesu watukuatesele ha gujiya egi Nzambi anago guhana mvutu gu isambu yetu iko muphushi. Wazuelele egi: ‘Landulenu gutoga, mbaamihana; landulenu gukamba, mbamuheta; landulenu gukokola, mbaamizuluila; handaga muthu wagasue udi mutoga, mbaamuhana. Muthu wagasue udi mukamba, mbawuheta. Muthu wagasue udi mukokola, mbaamuzuluila.’ (Mat. 7:7, 8) Gula tudi mulandula longo edi nu ‘tuafubidila mu gisambu,’ tuajiya gusha mutshima egi Tata wetu wa dilu mbawututegelela nu mbawuhana mvutu gu isambu yetu.—Kol. 4:2.

11. Luholo lutshi Hebelu 4:16 yajiya gutukuatesa gula tudi mutangiza egi mvutu ya isambu yetu idi muladiga?

¹¹ Tuajiya gutangiza egi mvutu ya isambu yetu idi muladiga, uvi Yehowa udi gutulaya egi mbawuhana mvutu gu isambu yetu ‘mu tangua diabonga.’ (Tanga Hebelu 4:16.) Hene tushigo naye guvuila Yehowa khabu gula ashigo muhana mvutu gu isambu yetu muphushi gifua luholo tuakhalele gudi felela. Ha gufezegesa, athu avula ana kombelela sendese mualeha ha gumona luholo Ufumu wa Nzambi mbawushiya mavu awa. Yesu nji watuwambelele ha gukombelela mukunda nu Ufumu wene. (Mat. 6:10) Uvi gula tuatotesa gutshigina guetu gudi Nzambi handaga gisugishilo gia mavu awa gishigo muza muphushi gifua luholo tuakhalele gudi felela, mbatumonesa egi tushigo athu atema! (Hab. 2:3; Mat. 24:44) Uvi mbatumonesa egi tudi athu atema gula tudi mulandula gunengenena Yehowa nu tudi gumukombelela nu gutshigina guagasue. Gisugishilo mbagiza mu tangua diabonga, handaga Yehowa watombele gale ‘lusugu nu tangua’ mbagiza. Lusugu luene mbalukhala diago tangua diabonga mukunda nu athu agasue.—Mat. 24:36; 2 Phet. 3:15.

12. Mu ndaga itshi yajiya gukhala lamba egi tumonese khadilo dia guhuiminyina?

 ¹² Tudi naye gunengena nu guhuiminyina guagasue tangua athu ako adi gutukalegela ndaga jiabola. Athu a ha mavu awa ana gumonesa lamba gudi athu ashigo nawo gilema gia muila gimoshi, giphuta gimoshi, kutime jimoshi nga gifutshi gimoshi. Athu ako ana gumonesewa lamba handaga adi nu ukhashi mu muila nga mu matangi. Akombeledi a Yehowa avula ana gumonesewa lamba mukunda gutshigina guawo. Gula tudi mutagana nu ndaga jia luholo elu, tudi naye guwunguluga ndaga jiazuelele Yesu egi: ‘Muthu mbawukolesela uu nu gu gisugishilo, muene mbawuhuluishiwa.’ (Mat. 24:13) Uvi itshi wajiya gukalagala gula udi mujiya egi phangi mumoshi wa mu hungu wakalagala gubola guakoma? Gula akulu ajiyi gale ndaga yene, mbawunengenena nu guhuiminyina guagasue nu mbawusha mutshima egi, ene mbaazula desizio didi gudivua nu gutshigina gua Yehowa ba? Ndaga itshi akulu adi naye gukalagala gula muthu mumoshi watshita gubola guakoma?

13. Gula muthu mumoshi watshita gubola guakoma, itshi Yehowa wana tshigina egi akulu akalagale?

¹³ Gula akulu ajiya egi muthu mumoshi mu hungu wa kalagala gubola guakoma, ana gukombelela Yehowa ha gumutoga ‘ndunge jia mu dilu’ jinyi jiajiya guakuatesa ha gukotelesa ndaga yene kiawaha. (Yak. 3:17) Felela diawo diakhala dia gukuatesa muthu wakalagala gubola ‘ha gukatuga mu njila yabola yajimbidile muene’ gula luholo ludi guene. (Yak. 5:19, 20) Ana nji gutshita yagasue ha gubamba hungu nu ha gukuatesa aphangi akhadi gudisagesa mukunda nu ndaga yene. (2 Kol. 1:3, 4) Tangua akulu ana gutadila ndaga yabola yakalagala muthu, ana kamba thomo gujiya ndaga yene muabonga. Gutshita ngenyi guajiya guzula matangua avula. Gungima ana kombelela, ana hana muthu muene malongo a Biblia nu disipline ‘ha gutadila ndaga yakalagala muene.’ (Yel. 30:11) Akulu ashigo naye gunengenena matangua avula ha guzula desizio diene, uvi ashigo naye nji gudizula muphushi. Gula akulu azula desizio didi gudivua nu malongo a Biblia, mbayikhala ndaga yabonga mukunda nu aphangi agasue mu hungu. Akulu ajiya gawo guhana muthu wakalagala gubola disipline, uvi athu anyi avuile ndaga yene ajiya gulandula gudisagesa. Gula aye nji wana gudivua luholo elu, itshi wajiya gukalagala hagula udisagesago muavula?

14. Gifezegeselo gitshi gia Biblia giajiya gugukuatesa ha gukolesela gula phangi mumoshi wa gukalegela gubola guakoma?

¹⁴ Agukalegele gale gubola guakoma gudi muthu mumoshi nga gudi phangi’etu wa Muklisto ba? Wajiya guheta ifezegeselo yabonga idi  mu Mbimbi ya Nzambi, idi gutulongesa luholo tudi naye gunengena nu guhuiminyina guagasue egi Yehowa alondege ndaga jiagasue jiabola. Ha gufezegesa, aphangi a Yozefe amukalegele ndaga jiavula jiabola, uvi Yozefe walanduilego guavuila khabu mukunda nu ndaga jiene. Walanduile gudihana muavula mu mudimo wa Yehowa, hene Yehowa wamushimbigile mukunda nu khadilo dienji dia guhuiminyina nu dia gukolesela. (Gis. 39:21) Gungima Yozefe wazudile desizio dia gutotesela aphangi’enji nu wamonele ishimbigo ya Yehowa. (Gis. 45:5) Esue nji tuana heta gikhesa gifua Yozefe, tangua tuana kolesa ufuta wetu nu Yehowa nu tuana gunengenena nu guhuiminyina guagasue egi muene hakhenji alondege ndaga mu tangua diatagana.—Ngi. 7:17; 73:28.

15. Itshi yakuatesele phangi mumoshi wa mukhetu ha gukolesela nu guhuiminyina guagasue tangua amukalegele ndaga yabola?

¹⁵ Idi yadiago egi ndaga jiagasue jiabola athu ana gutukalegela jiana khala ndo luholo lumoshi nu jinyi Yozefe ataganele najio. Uvi mukut’etu agasue tuana gudisagesa gula muthu watukalegela ndaga yabola. Gula tudi nu mulonga nu phangi’etu wa Muklisto nga nu muthu munu wanago gukombelela Yehowa, tuajiya guwubinga gula tudi mukalegela malongo a Biblia. (Fili. 2:3, 4) Tutadilenu ndaga yabuidile phangi mumoshi wa mukhetu. Wadisagesele muavula tangua ajiyile egi mukhetu mumoshi akhadile gukalagala nenji mudimo hamoshi wakhadile muwambela athu ako ndaga jia mambo mukunda nu muene. Ha fundo dia gukalagala ndaga muphushi, phangi muene wazudile tangua dia gutangigiza gifezegeselo gia Yesu. Tangua athu akhadile mushingana Yesu, muene waavutudilego mashingo. (1 Phet. 2:21, 23) Gifezefeselo giene giamukuatesele ha gubemba mulonga wene. Gungima wavuile egi mukhetu muene udi mukata muavula nu udi nji gudisagesa muavula mu matangi. Phangi muene wakotelesele egi, yajiya gukhala egi mukhetu muene akhadilego mujiya ndaga akhadile muzuela. Hene, wakhadile nu gusuanguluga luholo wakolesele nu guhuiminyina guagasue mu mulonga wene, wahetele nji guhuima.

16. Itshi yajiya gugukuatesa gula udi mutagana nu ndaga ya lamba? (1 Phetelo 3:12)

¹⁶ Gula udi gudisagesa mukunda nu ndaga yabola muthu wa gukalegela nga mukunda nu ndaga iko, ujimbilago egi Yehowa wakhala hehi nu ‘athu adi nu gikenene.’ (Ngi. 34:18) Wana guguzumba  mukunda nu khadilo diaye dia guhuiminyina nu luholo wana gutulula ginemo giaye gudi muene. (Ngi. 55:22) Yehowa udi Nzuji ya mavu agasue. Wana gumona ndaga jiagasue jiana gukalegewa. (Tanga 1 Phetelo 3:12.) Hene, gula udi mutagana nu mulonga unu wajiyilego gumanesela, ujimbilago egi idi nu ndando ha gunengenena Yehowa nu guhuiminyina guagasue.

17. Ndaga itshi Yehowa adi gutulaya mu Yeshaya 30:18?

¹⁷ Gualeha ndo Sh’etu wa mu dilu mbawukalegela Ufumu wenji ha gutuhana ima yavula yabonga. Mukanda wa Yeshaya 30:18 udi muzuela egi: ‘Yehowa udi munengenena nu guhuiminyina guagasue ha gutuvuila khenda, muene mbawuzuga ha gututotesela gubola. Handaga Yehowa udi Nzambi wana kalagala ndaga mu luholo luatagana. Athu adi mulandula gumunengenena adi nu gusuanguluga.’ Athu adi mulandula gunengena Yehowa, mbaaheta ishimbigo yavula mangino nu mu mavu ahe-ahe.

18. Ndaga jitshi jiabonga akombeledi a Nzambi mbaaheta?

¹⁸ Tangua akombeledi a Nzambi mbaangina mu mavu ahe-ahe, mbaashigo mumona luko malamba nu ndaga jia gikenene adi mutagana najio mangino. Ndaga jiabola nu malamba mbaakhadigo luko. (Yat. 21:4) Mbatudisagesago mukunda nu ima tudi nayo funu, handaga mbatukhala nu ima yavula. (Ngi. 72:16; Yesh. 54:13) Mbayikhala diago ndaga yabonga!

19. Formasio itshi Yehowa adi gutuhana sendese mangino?

¹⁹ Yehowa udi gutuhana formasio sendese mangino ha gukhala mu Ufumu wenji, luholo adi gutukuatesa ha gubemba makalegelo abola nu ha gukudisa makalegelo abonga adi gumusuanguluisa. Tulebigo muila nu tumbembigo gukombelela Yehowa, handaga ndaga jiabonga jidi gutunengena gutuama! Luholo tudi munengena masugu abonga adi muza, tulandulenu gunengenena nu guhuiminyina guagasue tangua Yehowa mbawutaganesa ndaga jiagasue atulayele!