1-2. Wanem nao bae iumi storyim lo disfala study?

HAO nao bae iu feel sapos iu expectim fren blo iu for tekem kam wanfala pasol for iu, bat hem no kam lo taem wea iufala markem? Waswe, bae iu feel nogud? Proverbs 13:12, NW sei: “Taem man expectim samting bat hem delay datwan savve mekem hem wikdaon.” Bat sapos iu savve gudfala reason stap why fren blo iu no savve kam, bae iu willing for patient and weitim hem.

² Lo disfala study, bae iumi storyim samfala Bible principle wea bae helpem iumi for luksavve why iumi need for patient. (Maeka 7:7) And tu, bae iumi storyim tufala samting wea iumi mas weitim Jehovah for duim. Then bae iumi storyim olketa blessing wea iumi bae kasem sapos iumi willing for weit lo Jehovah.

3. Wanem nao iumi lanem from principle lo Proverbs 13:11, NW?

³ Wanfala Bible principle wea helpem iumi for luksavve why iumi need for patient hem Proverbs 13:11, NW. Hem sei: “Taem man kasem riches kwiktaem bae hem savve lusim, bat man wea tek taem for kasem riches bae hem gohed kasem samfala moa.” Disfala principle showimaot iumi mas patient and hem savve tek taem for duim samfala samting.

4. Wanem nao iumi lanem from principle lo Proverbs 4:18, NW?

⁴ Proverbs 4:18, NW sei: “Road wea raeteous man followim hem olsem laet lo early morning wea kakamap braet go kasem bigfala daylaet.” Toktok hia showimaot  Jehovah isisi helpem pipol blo hem for luksavve lo plan blo Hem. Scripture hia hem wanfala principle wea showimaot hao hem bae tek taem for wanfala Christian kamap mature. Sapos iumi studyim gud Bible and followim kaonsel from Bible and organization blo Jehovah, baebae iumi kamap mature Christian wea garem olketa nambawan wei blo Christ. And baebae iumi lanem staka nara samting abaotem God tu. Jesus storyim wanfala tokpiksa abaotem datwan.

5. Hao nao Jesus showimaot wanfala Bible study bae tek taem for change?

⁵ Tokpiksa blo Jesus showimaot message abaotem Kingdom wea iumi preachim hem olsem smol seed wea tek taem for grow lo heart blo pipol wea herem message hia. Jesus storyim really seed taem hem sei: “Olketa seed start for grow and kamap big. [Man wea plantim] no savve tu hao nao olketa seed hia grow. Graon nao mekem olketa seed grow, gogo olketa garem frut. First samting for kamap hem leaf, then hem garem flaoa, gogo hem garem frut.” (Mark 4:27, 28) Wanem nao Jesus minim? Jesus showimaot wanfala plant hem tek taem for grow, so man wea tinghae lo Kingdom message bae isisi changem samfala samting lo laef blo hem. Olsem example, taem Bible study gohed for lane abaotem Jehovah, datwan bae helpem hem for garem olketa gudfala wei. (Eph. 4:22-24) Bat iumi savve Jehovah nao mekem datfala smol seed lo heart blo pipol for grow.—1 Cor. 3:7.

6-7. Wanem nao iumi lanem from hao Jehovah wakem earth?

⁶ Lo evri samting wea Jehovah duim, hem tek taem for mek sure hem barava gud, bikos datwan bae mekhae lo nem blo hem and bae mekem olketa narawan kasem gud samting. Olsem example, tingim hao Jehovah wakem earth mekem earth redi for man stap lo hem.

⁷ Bible sei taem Jehovah wakem earth  hem tek taem for duim evri samting lo gudfala wei, olsem hem “makem saes” blo hem, and “putum faondesin an kona ston.” (Job 38:5-7) Then Jehovah tek taem for lukluk gud lo wanem hem wakem. (Jenesis 1:10, 12) Masbi olketa angel barava hapi tumas taem olketa lukim wanem Jehovah wakem! Bible sei olketa angel “singaot” witim hapi. (Job 38:7) Wanem nao iumi lanem? Nomata hem tekem staka thousand year for Jehovah wakem earth, bihaen hem finisim datwan hem fit for sei hem “barava gud tumas.”—Jenesis 1:31–2:1.

8. Wanem nao bae iumi storyim distaem?

⁸ Olsem iumi storyim finis, Bible garem staka principle wea showimaot iumi need for patient. Distaem bae iumi storyim tufala samting wea iumi mas willing for weitim Jehovah for duim.

9. Wanem nao wanfala samting wea iumi need for weitim Jehovah for duim?

⁹ Maet iumi need for weitim Jehovah for ansarem olketa prea blo iumi. Taem iumi askem Jehovah for helpem iumi deal witim hard taem or for winim wanfala wik point, maet iumi tingse hem tek longtaem for hem ansarem datfala prea. Iumi laek for savve why Jehovah no ansarem olketa prea blo iumi stretawe.

10. Why nao iumi need for patient bihaen iumi askem Jehovah for helpem iumi?

¹⁰ Jehovah herem olketa prea blo iumi. (Ps. 65:2, NW) Taem iumi prea hem showimaot iumi garem faith lo Jehovah. (Heb. 11:6) Bat Jehovah laek for lukim tu sapos bae iumi duim samting followim wanem iumi prea abaotem and followim wanem hem laekem. (1 John 3:22) So sapos iumi trae for winim wanfala wik point, maet iumi need for duim samting followim prea blo iumi firstaem, and patient for weitim Jehovah for ansarem prea blo iumi. Jesus tu showimaot maet iumi no kwiktaem kasem ansa lo olketa prea blo iumi. Hem sei: “Gohed for ask and iufala bae kasem samting wea iufala ask for hem. . . . Gohed for noknok long door and bae hem open for iufala. Bikos evriwan wea ask bae kasem samting, . . . and door bae open for evriwan wea noknok long hem.” (Matt. 7:7, 8) Taem iumi followim advaes hia and “gohed for prea,” iumi savve sure Dadi blo iumi savve herem and ansarem olketa prea blo iumi.—Col. 4:2.

11. Sapos iumi tingse Jehovah delay for ansarem prea, hao nao Hebrew 4:16 savve helpem iumi for minim datwan?

¹¹ Nomata maet iumi tingse Jehovah delay for ansarem prea blo iumi, Jehovah bae ansarem lo stretfala taem. (Readim Hebrew 4:16.) So hem no fitim for sei Jehovah hem delay for ansarem olketa prea. Olsem example, maet samfala prea for Kingdom blo God finisim disfala nogud world for staka year finis, and Jesus talem iumi for prea abaotem datwan. (Matt. 6:10) Bat sapos end no kam lo taem wea samwan laekem, bae hem karangge samting for letem datwan mekem hem wikdaon! (Habakuk 2:3; Matt. 24:44) Wise samting for duim hem for gohed weit lo Jehovah and garem faith bae hem ansarem olketa prea blo iumi. End bae kam lo barava stretfala taem, bikos Jehovah hem markem finis “day and taem” for hem kam.​—Matt. 24:36; 2 Pet. 3:15.

12. Olketa wanem samting nao savve mekem iumi no laek for patient?

 ¹² Maet iumi need for weitim Jehovah for stretem nogud samting wea kasem iumi. Samfala treatim nogud narawan bikos lo kala skin, tribe, or kantri blo hem. Samfala savve treatim nogud tu olketa woman, or olketa wea disable or mentol. And tu, pipol persecutim olketa Witness bikos olketa followim wanem Bible talem. Sapos olketa nogud samting hia kasem iumi, hem gud for tingim toktok blo Jesus. Hem sei: “Man wea bae sev nao hem man wea no givap go kasem taem world hem finis.” (Matt. 24:13) Bat waswe sapos iumi savve samwan lo kongregeson duim bigfala sin? Sapos olketa elder savve finis lo datwan, waswe, bae iu leavim for olketa deal witim and patient for olketa duim datwan followim hao Jehovah laekem? Hao nao olketa elder savve deal witim kaen samting olsem?

13. Taem brata or sista duim bigfala sin, wanem nao olketa elder bae duim?

¹³ Taem olketa elder faendemaot wanfala brata or sista duim bigfala sin, olketa prea for “wisdom” mekem olketa luksavve lo hao Jehovah ting lo wanem hem happen. (Jas. 3:17) Goal blo olketa elder hem for helpem man wea sin for “lusim rong samting wea hem duim.” (Jas. 5:19, 20) And tu, olketa laek for protectim kongregeson and for comfortim olketa wea datfala sin affectim olketa. (2 Cor. 1:3, 4) Bifor olketa elder savve disaedem eni samting, olketa mas savve lo tru samting wea happen, bat for faendemaot datwan hem savve tek taem. Then olketa iusim olketa scripture for stretem man wea duim sin. (Jeremaea 30:11) Olketa elder bae ting raonem gud evri samting bifor olketa mekem disison. Taem olketa followim direction wea kam from Jehovah, kongregeson bae kasem gud samting. Nomata olketa elder duim evri samting hia, samfala brata or sista wea kasem nogud samting bikos lo datfala sin maet feel nogud yet. Sapos datwan kasem iu, wanem nao savve helpem iu for no gohed feel nogud?

14. Wanem example lo Bible nao savve helpem iumi sapos brata or sista duim samting wea mekem iumi feel nogud?

¹⁴ Waswe, eni brata or sista duim samting wea mekem iu barava feel nogud?  Iumi savve lane from example blo samfala lo Bible wea weit lo Jehovah for stretem olketa nogud samting wea happen. Olsem example, nomata olketa brata blo Joseph barava treatim hem nogud, hem no kros olowe. Hem evritaem tingim wanem hem savve duim for Jehovah, and Jehovah blessim hem from hem patient and no givap. (Jenesis 39:21) Gogo Joseph forgivim olketa brata blo hem, and hem luksavve hao Jehovah iusim hem for helpem pipol blo God. (Jenesis 45:5) Sapos iumi depend lo Jehovah for stretem olketa nogud samting olsem Joseph duim, iumi bae no gohed feel nogud lo samting wea kasem iumi.—Sams 7:17; 73:28.

15. Wanem nao helpem wanfala sista for no gohed feel nogud lo wanfala woman lo waka ples?

¹⁵ Maet iumi no kasem barava hard samting olsem Joseph, bat taem olketa narawan treatim iumi nogud datwan savve mekem iumi for sorre. Taem wanfala brata or sista or narawan mekem iumi feel nogud, hem gud for gohed followim olketa Bible principle. (Phil. 2:3, 4) Olsem example, wanfala sista barava feel nogud taem hem faendaot woman wea tufala waka tugeta tok spoelem hem lo olketa narawan. Hem no go tok lo datfala woman, bat hem ting raonem example blo Jesus firstaem. Hem tingim hao taem pipol tok spoelem Jesus, hem no tok spoelem olketa. (1 Pet. 2:21, 23) So hem disaed for leavim nomoa. Bihaen, datfala sista faendemaot woman hia garem bigfala sik and hem barava warim datwan. Sista hia luksavve masbi datfala woman no kontrolem toktok blo hem bikos hem sik. So datfala sista hapi from hem patient witim woman hia and from hem no tok strong lo hem.

16. Sapos iumi deal witim samting wea no stret, wanem nao savve comfortim iumi? (1 Peter 3:12)

¹⁶ Sapos iumi deal witim samting wea no stret or samting wea mekem iumi feel wikdaon, remember Jehovah hem tingim olketa wea “sore tumas.” (Sams 34:18) Hem lovem iumi from iumi patient and hem laekem iumi for storyim olketa wari blo iumi lo hem. (Sams 55:22) Jehovah lukim pipol duim nogud samting and bae  hem stretem olketa samting hia. (Readim 1 Peter 3:12.) Taem iumi deal witim samting wea iumiseleva no savve stretem, waswe, iumi willing for weit for Jehovah hem stretem?

17. Olsem Isaiah 30:18, NW storyim, wanem nao Jehovah laek for duim for iumi?

¹⁷ Klosap nao Jehovah bae iusim Kingdom blo hem for stretem evri samting. Isaiah 30:18, NW sei: “Jehovah hem barava laek for helpem iufala, and hem bae duim samting for showimaot mercy lo iufala. Jehovah hem God wea evritaem duim stret samting. Olketa wea gohed weitim hem bae hapi.” Olketa wea willing for weitim Jehovah bae kasem staka blessing distaem and insaed lo niu world tu.

18. Olketa wanem gud samting nao bae iumi kasem lo niu world?

¹⁸ Taem iumi kasem niu world, no enitaem moa bae iumi wari or deal witim olketa hard samting wea iumi feisim distaem. God bae finisim pain and evri samting wea no stret. (Rev. 21:4) Bae iumi no need for wari bikos bae iumi kasem evri samting iumi needim. (Sams 72:16; Aesaea 54:13) Iumi barava luk forward lo datfala taem!

19. Wanem nao Jehovah redyim iumi for hem distaem?

¹⁹ Jehovah hem redyim iumi distaem for stap anda lo rul blo hem. Hem helpem iumi for lusim olketa nogud wei and garem olketa gudfala wei. No wikdaon and feel olsem iu laek givap from olketa nogud samting wea happen. Laef lo future bae barava gud tumas! So gohed patient and weit lo Jehovah for duim wanem hem promisim!