1-2. Башо со ка кера лафи ки акаја статија?

САР ка осетине тут ако аџикереа пакети со чаче ваљани туке, а на ресела ко време кеда очекујнеа ле? Дали сиан разочаримо? Ко Изреки 13:12 вакерела: „Таро бут аџикерибе насваљовела о вило“. Ама со ако дознајнеа кај иси шукар причине соске о пакети на ресља ко време? Тегани веројатно ка ове стрпливо хем спремно ка аџикере.

² Ки акаја статија ка дикха некобор библиска начелија со шај те поможинен аменге „стрпливо те аџикера“ (Мих. 7:7). Пало адава, ка кера лафи башо дуј ситуацие коленде со мора стрпливо те аџикера е Јехова. Ко крајо, ка дикха саве берекетија о Јехова спреминела околенге кола со спремно аџикерена.

3. Со сикљоваја таро начело сој пишимо ко Изреки 13:11?

³ Ко Изреки 13:11 пишинела башо јекх пример кова со сикавела кобор тано важно те ова стрплива. Атхе пхенела: „О барвалипе со сигате добинела пе нашавѓовела, а о барвалипе со кхедела пе хари по хари ка бајрол са повише“. Со сикљоваја таро акава стихо? Јекх мудро мануш на сиѓарела, ов керела о буќа стрпливо хем тегани иси ле шукар резултатија.

4. Со сикавела аменге о начело таро Изреки 4:18?

⁴ О Изреки 4:18 вакерела аменге кај „о друмо е праведниконгоро тано сар јекх силно сабалутни светлина, која со овела са посилно хем посилно са џикоте на пхравѓола  о диве“. Акала лафија јасно сикавена кај о Јехова хари по хари откринела пли намера пле народоске. Ама акава стихо исто аѓаар поможинела аменге те хаљова о начин сар јекх христијани духовно напредујнела. Те шај некој духовно те напредујнел ваљани леске време. Ако хор проучинаја хем применинаја о советија со добинаја лен таро е Девлескоро Лафи хем лескири организација, тегани хари по хари ка развина и христијанско личност. Исто аѓаар пошукар ка пенџара е Девле. Те дикха сар о Исус објаснинѓа акава.

5. Сави споредба користинѓа о Исус те шај те сикавел кај ваљани време те шај некој те керел промене?

⁵ О Исус користинѓа јекх споредба те шај те објаснинел сар о хабери башо Царство тано слично јекхе тикне семеа кова со по хари бајрола ко вило околенгоро со мангена и праведност. Ов вакерѓа: „О семе никнонела хем бајрола, а ов [о сејачи] ни на џанела сар. И пхув коркори пестар хари по хари анела плоди — прво стебло, пало адава класи хем ко крајо цело зрно ко класи“ (Мар. 4:27, 28). Со мислинѓа о Исус акале лафенцар? Ов мангља те вакерел кај, исто сар јекх растение со бајровела хари по хари слично, јекх мануш кова со прифатинела о хабери постепено духовно напредујнела. На пример, кеда амаре интересентија овена попаше е Јеховаја, почминаја те дикха о бут промене со керена лен (Еф. 4:22-24). Ама на смејнаја те бистра кај, о Јехова тано адава со керела о тикно семе те бајрол (1. Кор. 3:7).

6-7. Со сикљоваја таро начин сар о Јехова створинѓа и Пхув?

⁶ О Јехова секогаш стрпливо одвојнела песке добором време кобор со ваљани те шај те завршинел адава со почминѓа. Ов керела адава те шај те славинел пло анав хем те поможинел е јаверенге. На пример, размислин башо адава сар о Јехова постепено спреминѓа и Пхув е манушенге.

⁷ Кеда и Библија опишинела сар о Јехова створинѓа и Пхув, ој вакерела кај ов  „одрединѓа лакере мерке“, „чхивѓа лакере темелија“ хем чхивѓа „лакоро аголно бар“ (Јов 38:5, 6). Ов чак одвојнѓа песке време те проверинел адава со керѓа (1. Мој. 1:10, 12). Шај ли те замислине туке сар осетинена пе сине о ангелија џикоте дикхена сине сар о Јехова постепено створинела о буќа? Ола сине бут воодушевиме! (Јов 38:7). Со шај те сикљова таро акава? О Јехова одвојнѓа песке повише милја берша те шај те створинел и Пхув, о ѕвезде хем са јавер. Ама кеда дикхља са адава со ов внимателно створинѓа, вакерѓа кај тано „бут шукар“ (1. Мој. 1:31).

8. Башо со ка кера лафи?

⁸ Акала примерија сикавена аменге кај ко е Девлескоро Лафи иси начелија кола со истакнинена кобор тано важно те ова стрплива. Акана ка кера лафи башо дуј ситуацие коленде со мора те ова спремна те аџикера ко Јехова.

9. Која тани јекх ситуација ки која со ваљани те аџикера ко Јехова?

⁹ Шај ка ваљани стрпливо те аџикера о Јехова те одговоринел ко амаре молитве. Кеда молинаја е Јехова баши сила те истрајна ко проблемија хем баши помош те накхава несави слабост, шај мислинаја аменге кај о Јехова аџикерела бут време те накхел те шај те одговоринел ко амаре молитве. Соске о Јехова на одговоринела одма ко са амаре молитве?

10. Соске ваљани стрпливо те аџикера о Јехова те одговоринел ко амаре молитве?

¹⁰ О Јехова внимателно шунела амаре молитве (Пс. 65:2). Ко амаре искрена молитве ов дикхела сар доказ баши амари вера (Евр. 11:6). Ов исто аѓаар мангела те дикхел кобор сием одлучна те живина спрема амаре молитве хем те кера лескири волја (1. Јов. 3:22). Адалеске, ваљани те ова стрплива хем те да са амендар те шај те кера о потребна промене. О Исус поможинѓа аменге те хаљова кај несаве таро амаре молитве шај нане одма те овен одговориме. Ов вакерѓа: „Молинен хем ка дел пе туменге, роден хем ка аракхен, кхувен хем ка пхравел пе туменге, соске секој со молинела ка добинел, секој со родела ка аракхел хем секој со кхувела ка пхравел пе леске“ (Мат. 7:7, 8). Кеда применинаја акава совет хем истрајнаја ки молитва, шај те ова сигурна кај амаро небесно Дад шунела амаре молитве хем одговоринела аменге (Кол. 4:2).

11. Со на ваљани те бистра, ако мислинаја кај о Јехова на одговоринела ко амаре молитве? (Евреите 4:16)

¹¹ Иако шај те мислина аменге кај о одговор ко амаре молитве каснинела, о Јехова ветинела кај ка одговоринел аменге „кеда ваљани аменге помош“, а адава ка овел ко право време. (Читин Евреите 4:16.) Адалеске, никогаш на смејнаја те кривина е Јехова ако на одговоринела аменге ко време кеда амен мислинаја кај ваљани. На пример, бут џене бершенцар молинена пе те авел е Девлескоро Царство хем те анел крајо акале лошно светоске. О Исус чак вакерѓа те молина амен башо акава (Мат. 6:10). Ама ка овел бут глупаво ако нашаваја амари вера ко Девел адалеске со о крајо на ало ко време кеда амен очекујнѓем те авел (Авак. 2:3; Мат. 24:44). Ка ова мудра ако понадари да аџикераја ко Јехова хем иси амен вера џикоте молинаја амен леске. О крајо ка авел ко право време, соске о Јехова англедер више одрединѓа о точно „диве хем саати“ кеда те авел. Хем адава диве ка одговоринел сариненге (Мат. 24:36; 2. Пет. 3:15).

12. Кеда посебно шај те овел аменге пхаро те ова стрплива?

 ¹² Шај ка ваљани те ова стрплива џикоте трајнела несави неправда. О мануша бут пути трпинена неправда баши пумари раса, пол, култура или националност. Јавера тане малтретириме соске иси лен несаво физичко или психичко насвалипе. Бут таро е Јеховаскере сведокија мора сине те трпинен неправде башо пумаро верување. Ако доживинаја асавке неправде на ваљани те бистра е Исусескере лафија. Ов вакерѓа: „Кој ка истрајнел џи ко крајо ка овел спасимо“ (Мат. 24:13). Ама со ако шунеа кај некој таро собрание керѓа несаво сериозно грево? Откеда џанеа кај о старешине шунѓе башо адава грево, дали ка ове стрпливо хем ка овел тут доверба кај ола ка решинен адава проблеми ко начин сар о Јехова со мангела? Со шај ка ваљани те керен о старешине кеда некој керела сериозно грево?

13. Со очекујнела о Јехова таро старешине те керен кеда некој ка керел сериозно грево?

¹³ Кеда о старешине ка шунен кај некој таро собрание керѓа сериозно грево, ола ки молитва родена „мудрост упралдан“ те шај те хаљовен сар о Јехова дикхела ки адаја ситуација (Јак. 3:17). Ленгири цел тани, ако шај, те поможинен околеске со грешинела те „иранел пе таро пло лошно друмо“ (Јак. 5:19, 20). Исто аѓаар мангена те ден пестар са те шај те заштитинен о собрание хем те утешинен околен со сине повредиме (2. Кор. 1:3, 4). Кеда разглединена несаво сериозно грево, о старешине прво мора те дикхен са о доказија, а башо адава шај ка ваљани време. Пало адава ола молинена пе хем дена библиско совет хем укор „кова со одговоринела“ (Ерем. 30:11). Иако о старешине на мукхена те накхел бут време, ола на мангена те анен сигате одлука. Кеда икерена пе ко упатствија со дела лен о Јехова, тегани цело собрание ка овел ле корист. Сепак, окола со сине ленге кердо неправда шај понадари да те осетинен пе дукхавде, чак кеда о старешине керена са сар со ваљани. Ако ту да осетинеа тут аѓаар, со шај те кере те шај полокхе те накхе и дукх?

14. Кова библиско пример шај те утешинел тут ако сиан сине бут повредимо таро несаво пхрал или пхен?

¹⁴ Дали некој бут поврединѓа тут, шај чак несаво пхрал или пхен? Ко е Девлескоро Лафи иси примерија колендар со шај те  сикљове сар те аџикере о Јехова те исправинел и неправда. На пример, иако о Јосиф доживинѓа неправда таро пле пхраља ов на икерѓа холи ки песте. Наместо адава, леске сине најважно те служинел е Јеховаске хем адалеске о Јехова наградинѓа ле баши лескири стрпливост хем истрајност (1. Мој. 39:21). Пало несаво време, о Јосиф шај сине те простинел околенге со поврединѓе ле хем те дикхел сар о Јехова дела ле берекети (1. Мој. 45:5). Исто сар о Јосиф, амен да шај те утешина амен кеда сием паше е Јеховаја хем кеда мукхаја о буќа ко лескере васта (Пс. 7:17; 73:28).

15. Со поможинѓа јекхе пхењаке те трпинел неправда хем те овел ла андруно мир?

¹⁵ Џанѓола пе, нане са о неправде добором баре сар со доживинѓа о Јосиф. Ама саринен амен дукхала амен кеда доживинаја било сави неправда. Кеда иси амен некасаја проблеми, чак околенцар со на служинена е Јеховаске, секогаш тано корисно те применина о библиска начелија (Фил. 2:3, 4). Те дикха јекх искуство. Јекх пхен сине бут повредими кеда дознајнѓа кај јекх колешка керела сине негативно лафи баши лате. Вакерела сине е јаверенге буќа кола со на сине точна баши лате. Наместо сигате те иранел лаке, и пхен ачхили хем размислинѓа башо е Исусескоро пример. Кеда вреџинѓе ле ов на иранѓа ленге лошнипаја (1. Пет. 2:21, 23). И пхен мангља те постапинел исто, адалеске одлучинѓа те на керел проблеми таро адава. Покасно дознајнѓа кај адале колешка сине ла сериозно насвалипе хем адалеске сине бут секирими. Ој халили кај лакири колешка на мислинѓа чаче адава со вакерѓа хем адалеске и пхен сине бахтали со сине стрпливо хем шај сине те овел ла андруно мир.

16. Со шај те утешинел тут ако трпинеа неправда? (1. Петрово 3:12)

¹⁶ Ако сиан повредимо тари несави неправда или нешто јавер, ма бистре кај о „Јехова тано паше околенцар сој пхаге вилеа“ (Пс. 34:18). О Јехова мангела тут соске сиан стрпливо хем соске фрдеа тло пхарипе леске (Пс. 55:22, фус.). Ов тано о Судија упри цели Пхув хем дикхела са со случинела пе. (Читин 1. Петрово 3:12.) Адалеске,  кеда иси тут несаво сериозно проблеми кова со нашти те решине ле, дали сиан спремно те аџикере ко Јехова?

17. Спрема Исаија 30:18, со ветинѓа аменге о Јехова?

¹⁷ Панда хари, амаро небесно Дад преку пло Царство ка дел амен бут берекетија. Ко Исаија 30:18 пишинела: „О Јехова стрпливо аџикерела те керел туменге шукарипе... ка уштел те сикавел туменге милост, соске о Јехова тано праведно Девел. Бахтале тане сарине со аџикерена ки лесте“. Окола со аџикерена ко Јехова ка добинен бут берекетија — хем акана хем ко нево свето со ка авел.

18. Саве берекетија аџикерена амен?

¹⁸ Кеда е Девлескоро народо ка кхувел ко нево свето ола никогаш више на ка ваљани те трпинен о секирацие хем о пхарипа кола со иси лен авдиве. Нане те овел више неправда хем дукх (Отк. 21:4). На ка ваљани више те секирина амен дали ка овен амен о буќа со ваљани аменге, соске ка овел доволно секаске (Пс. 72:16; Иса. 54:13). Чаче ка овен амен бут берекетија!

19. Башо со спреминела амен о Јехова панда авдиве?

¹⁹ О Јехова панда авдиве спреминела амен те живина тели лескири влада. Ов керела адава аѓаар со поможинела аменге те цида о лошна навике хем те развина шукар особине коленцар со ка кера лескири волја. Адалеске, ма обесхрабрин тут хем ма откажин тут. Аџикерела амен бут пошужо живото! Џикоте аџикераја адава шужо време те авел, понадари да те ова спремна стрпливо те аџикера ко Јехова те керел о буќа кола со ветинѓа.