1-2. Sostar ka vaćera ko akava članko?

SAR osetineja tut ked ađićereja disavo važno paketi, ama ov nisar te resel? Da li tegani brinineja tut? Ko Poslovice 13:12 pisini: „Ked neko but ađićeri ovela tužno.“ Ama, so ako šunđan so isi šukar razlog sose o paketi pana na reslja? Tegani, verovatno ka ove strpljivo hem ka ađićere te resel.

² Ko akava članko, ka dikha nekobor načelija andi Biblija kola ka pomožinen amen strpljivo te ađićera (Mih. 7:7). Isto ađahar, ka dikha duj situacije ko kola valjani strpljivo te ađićera o Jehova te ćerel diso. Ko krajo, ka dikha kola blagoslovija ka ovel len okola kola strpljivo ađićerena upro Jehova.

3. So sikljovaja ando Poslovice 13:11?

³ O lafija ando Poslovice 13:11 sikavena amen sose valjani te ova strpljiva. Odothe pisini: „O barvalipe kova sigate ćedela pe, sar đala o vreme ka našalđol, a o barvalipe kova ćedela pe hari pohari, ka ovel pana pobaro.“ So sikljovaja ando akava načelo? O manuš kova tano mudro na siđari ked diso ćerela, već tano strpljivo hem ćerela o buća hari pohari.

4. So sikljovaja ando Poslovice 4:18?

⁴ Ko Poslovice 4:18 pisini: „Ama, o drumo ando pravednikija tano sar i svetlost koja avela sabale, koja svetlini sa  pobuter đi na phravđola o dive.“ Akava stih mothovi so o Jehova hari pohari pomožini pe narodose te haljol so ov mangela te ćerel e phuvjaja hem e manušencar. Ama, akava stih mothovi hem sar olese sluge ćerena promene ko po životi hem sar ovena popaše oleja. Te šaj neko te ovel paše e Jehovaja, valjani vreme. Ako proučinaja hem ako primeninaja o savetija kola dobinaja prekalo e Devleso Lafi hem prekali e Devlesi organizacija, hari pohari ka barjaćera o osobine kola isi le o Hrist. Isto ađahar, pana pošukar ka penđara e Devle. Te dikha sar o Isus objasninđa odova.

5. Sar o Isus mothovđa so valjani vreme te šaj neko te menjini pe?

⁵ O Isus koristinđa o primer ando tikno seme te šaj te objasnini sar o seme ando ćaćipe hari pohari barjola ko e manušeso vilo. Ov phenđa: „O seme niconi hem barjola, a ov ni na đanela sar. I phuv kokri pestar anela plod – prvo i stabljika, palo odova o klaso ando điv hem ko krajo o zrno kova tano zrelo“ (Mar. 4:27, 28). So o Isus manglja te phenel? Sar so i biljka barjola hari pohari, isto ađahar valjani vreme te šaj jekh manuš te menjini pe. Na primer, ked o manuš kova proučini i Biblija ovela popaše e Jehovaja, amen šaj te dikha sar ov hari pohari menjini pe (Ef. 4:22-24). Ama, na valjani te bistra so o Jehova tano okova kova dela odova tikno seme te barjol (1. Kor. 3:7).

6-7. So sikljovaja ando odova sar o Jehova ćerđa i phuv?

⁶ Ked diso ćerela, o Jehova na siđari. Ov ađahar ćerela sebepi po anav hem sebepi so mangela te pomožini averenđe. Na primer, ked ćerđa i phuv, ov ćerđa la hari pohari.

⁷ I Biblija vaćeri so ked o Jehova ćerđa i phuv, ov „odredinđa olake mere“, ćhivđa „olako temelji“ hem „olako glavno ugaono bar“ (Jov 38:5, 6). Ov čak odvojinđa  vreme te dikhel odova so stvorinđa (Post. 1:10, 12). Zamislin samo sar osetinđe pe o anđelija đi dikhlje sar o Jehova sa stvorini. Kobor hine bahtale! Čak počminđe „te hvalinen le“ (Jov 38:7). So sikljovaja ando akava? Nakhlje hiljade berša đi o Jehova na stvorinđa i phuv, o zvezde hem sa soj tano đivdo. Ama, ked o Jehova dikhlja sa odova so stvorinđa, ov phenđa soj tano sa šukar (Post. 1:31).

8. Sostar ka vaćera akana?

⁸ Sar so dikhljam ko akala primerija, ko e Devleso Lafi isi but načelija kola sikavena amen te ova strpljiva. Akana ka dikha ko kola duj situacije valjani te ova spremna te ađićera upro Jehova.

9. Ki koja situacija valjani te ađićera upro Jehova?

⁹ Ked ađićeraja te odgovorini ko amare molitve. Šaj isi amen disavo problemi hem molinaja e Jehova te del amen snaga te istrajina. Ja šaj isi amen disavi mana hem molinaja e Jehova te pomožini amen te cida la amendar. Tegani, šaj te dićhol amenđe so valjani lese but vreme te odgovorini ko amare molitve. Odolese, šaj pućaja amen: „Sose odmah na odgovorini ko me molitve?“

10. Sose valjani te ova strpljiva đi ađićeraja o Jehova te odgovorini ko amare molitve?

¹⁰ O Jehova tano okova kova šunela amare molitve (Ps. 65:2). Ked molinaja amen ando vilo, ađahar mothovaja so verujinaja lese (Jevr. 11:6). Isto ađahar, ov mangela te dikhel kobor hijam odlučna te ćera odova aso so molinđam amen (1. Jov. 3:22). Odolese, ked molinaja le te pomožini amen te ćhinava te ćera diso so na sviđini pe olese, valjani te ova strpljiva hem te da sa amendar te menjina amen. O Isus pomožini amen te haljova so ko disave amare molitve o Jehova na ka odgovorini odmah. Ov phenđa: „Molinen tumen hem ka ovel tumenđe dindo. Roden hem ka arakhen. Khuven hem ka ovel tumenđe phravdo. Sose svako ko molini, dobini. Svako ko rodela, arakhi. Svakonese kova khuvela, ka phravđol“ (Mat. 7:7, 8). Ked ićeraja amen ko akava savet hem ked hijam „istrajna ki molitva“, šaj te ova sigurna so amaro nebesko Dad ka šunel amen hem ka odgovorini ko amare molitve (Kol. 4:2).

11. So na valjani te bistra ako dićhola amenđe so o Jehova na odgovorini ko amare molitve? (Jevrejima 4:16)

¹¹ Iako šaj te dićhol amenđe so o odgovor ko amare molitve harini, o Jehova dela po lafi so „ked valjani amenđe pomoć“ ov ka odgovorini ko amare molitve hem so odova ka ovel ko pravo vreme. (Čitin Jevrejima 4:16.) Odolese, na valjani te holjana upro Jehova ako na odgovorini amenđe odobor sigate kobor bi amen mangaja. Na primer, šaj beršencar molinaja amen te avel e Devleso Kraljevstvo hem te cidel sa o lošna buća kola isi ko akava sveto. Čak hem o Isus phenđa so valjani te molina amen aso odova (Mat. 6:10). Ama, nane mudro te našala amari vera ko Devel samo sebepi so o kraj na alo tegani ked amen mislinđam (Avak. 2:3; Mat. 24:44). Amen ka mothova so hijam mudra, ako ađićeraja upro Jehova hem ako hijam uverime so ov ka odgovorini ko amare molitve. O Jehova već odredinđa o dive ked ka avel o kraj hem šaj te ova sigurna so odova dive na ka harini. Ov sigurno so odova dive ka ovel najšukar aso sa o manuša (Mat. 24:36; 2. Petr. 3:15).

12. Ked šaj te ovel amenđe pharo te ova strpljiva?

 ¹² Ked doživinaja nepravda. But putija, o manuša lošno ponašinena pe premalo avera kola tane averćhane olendar, šaj sebepi soj tane aver nacija ja avena andi aver kultura. Disave marena muj okolenđe kola tane naborme. Isto ađahar, disave e Jehovase sluge doživinena nepravda sebepi pe verovanja. Ked desinena pe asavke buća, valjani te setina amen ko e Isusese lafija: „Ko istrajini đi o krajo, ka ovel spasimo“ (Mat. 24:13). Ama, so valjani te ćera ako neko ki skupština ćerela disavo ozbiljno greh? Ako đanaja so o starešine šunđe aso odova problemi, da li hijam strpljiva hem da li isi amen poverenje so on ka rešinen odova problemi ko e Jehovaso način? So o starešine valjani te ćeren ako neko ki skupština ćerela disavo ozbiljno greh?

13. So o Jehova rodela ando starešine te ćeren ked neko ki skupština ćerđa ozbiljno greh?

¹³ Ked o starešine šunena so neko ki skupština ćerđa ozbiljno greh, on molinena pe hem rodena mudrost ando Jehova (Jak. 3:17). On ćerena odova sose ki odija situacija mangena te dikhen ađahar sar so o Jehova dikhela (Jak. 5:19, 20). Olengo cilj tano te pomožinen odole manušese. Isto ađahar, on dena sa pestar te arakhen i skupština hem te utešinen okolen kola tane povredime (2. Kor. 1:3, 4). Ked o starešine šunena so neko ćerđa ozbiljno greh, najangleder on mangena te haljon so ćaće ulo. Ama, aso odova valjani vreme. On molinena pe, dena savet ando e Devleso Lafi hem ukorinena odole manuše „odobor kobor valjani“ (Jer. 30:11). Ked valjani te anen odluke, o starešine na mangena te siđaren, niti but te ađićeren. Ked ićerena pe ko smernice kola avena ando Jehova, tegani odova ka koristini sarinenđe ki skupština. Ama, iako o starešine rešinđe o problemi ko ispravno način, šaj te ovel so neko ki skupština tano pana povredimo sebepi odova so ćerđa i osoba koja grešinđa. Ako tu hijan ki asavki situacija, so šaj te ćere te na osetine odobor bari dukh?

14. Kova primer andi Biblija šaj te pomožini tut ako neko but povredinđa tut?

¹⁴ Da li dijekh phen ja phral but povredinđa tut? Ki Biblija isi but primerija kola sikavena amen soj tano šukar te ađićera o  Jehova te rešini odova problemi. Na primer, e Josife olese phralja but povredinđe, ama ov na ićerđa i holi ano peste. Umesto odova, ov dinđa e Jehovase po najšukar hem o Jehova blagoslovinđa le sose hine strpljivo hem istrajno (Post. 39:21). Sar đelo o vreme, o Josif šaj hine te oprostini pe phralenđe hem te dikhel sar o Jehova blagoslovinđa le (Post. 45:5). Hem amenđe, sar e Josifese, ka ovel šukar ako aćhovaja paše e Jehovaja hem ako mukhaja olese te rešini o problemi (Ps. 7:17; 73:28).

15. So pomožinđa jekha phenjaće te istrajini ked doživinđa nepravda?

¹⁵ Amen šaj na ka ovel amen asavke problemija save hine le o Josif, ama šaj but te dukhal amen ako neko povredini amen. Ked isi amen problemi nekasa, čak hem okolencar kola na služinena e Jehovase, ka ovel šukar ako ićeraja amen ko e biblijake savetija (Fil. 2:3, 4). Te dikha jekh primer. Jekha phenja but povredinđa olaki koleginica ki buti, sose vaćerđa laće palo dumo. Umesto te reagujini sigate, amari phen razmislinđa ando e Isuseso primer. Ked vređinđe le, ov na irinđa lenđe (1. Petr. 2:21, 23). Sebepi odova, oj odlučinđa ništa te na ćerel. Hari palo odova, šunđa so olaki koleginica tani but nabormi hem so sebepi odova hine ko baro stres. Amari phen haljilji so odija koleginica verovatno na mislinđa odova so vaćerđa. Amare phenjaće hine but drago so ki akija situacija hine but strpljivo hem odolese hine la mir.

16. So šaj te utešini tut ked doživineja disavi nepravda? (1. Petrova 3:12)

¹⁶ Ako doživineja disavi nepravda ja ako neko but povredinđa tut, ma bistri so o Jehova tano paše okolencar kola tane „phage vileja“ (Ps. 34:18). Ov mangela tut sose hijan strpljivo hem sose fordeja to pharipe upro leste (Ps. 55:22). Ov tano Sudija andi celo phuv hem sa dikhela. (Čitin 1. Petrova 3:12.) Odolese, ked isi tut disavo baro problemi kova našti te rešine, but tano važno te ađićere upro Jehova.

17. So o Jehova obećini ko Isaija 30:18?

¹⁷ Pana hari, amaro nebesko Dad prekalo po Kraljevstvo ka del but bare blagoslovija e manušenđe. Ko Isaija 30:18 pisini: „O Jehova strpljivo ađićeri te mothovi tumenđe šukaripe, ov ka mothovi tumenđe milost. Sose o Jehova tano pravedno Devel. Bahtale tane sare kola ađićerena upro leste.“ Okola kola ađićerena upro Jehova, već akana isi len bare blagoslovija, a ko nevo sveto ka ovel len pana pobare blagoslovija.

18. Kola blagoslovija ađićerena amen?

¹⁸ E Devlese sluge ko nevo sveto više na ka ovel len pharipa hem brige kola isi len akana. Više na ka ovel nepravda, ni dukha (Otkr. 21:4). Na ka brininen pe nisose, sose ka ovel len sa so valjani lenđe (Ps. 72:16; Is. 54:13). Odova vreme ćaće ka ovel but šukar!

19. Aso so o Jehova već akana pripremini amen?

¹⁹ O Jehova već akana pripremini amen aso nevo sveto. Ov odova ćerela ađahar so pomožini amen te ćhinava te ćera o buća kola na sviđinena pe olese hem te ovel amen šukar osobine. Odolese, savo god pharipe te ovel tut, ma ćhinav te služine e Jehovase. O blagoslovija tane anglo amende! Đi na avela odova vreme, mangaja te aćhova bahtale hem strpljivo te ađićera o Jehova te ćerel odova so phenđa!