1-2. Nyen la e yeke bâ na yâ ti article so?

TONGANA mo yeke ku mbeni ye so mo yeke tâ na bezoin ni me asi na ngoi so mo ye ape, a yeke sara mo tongana nyen? Mo yeke gi bê ti mo? Peut-être atënë so ayeke na aProverbe 13:12 ayeke atënë ti bê ti mo. Versê ni atene: “Ye so zo aku ni ngbii, si lo wara ni hio pëpe, a sara si bê ti lo anze kue.” Me tongana mo mä so anzoni raison ayeke dä so ndali ni ye so mo ku asi na ngoi so mo ye ape, a yeke sara mo tongana nyen? Tongana a yeke tongaso, peut-être mo yeke kanga bê ti ku.

² Na yâ ti article so, e yeke bâ ambeni mama-ndia ti Bible so apeut ti aidé e ti “ngbâ ti ku”. (Mi. 7:7). Na pekoni, e yeke bâ aye use so, na yâ ni, e doit ti kanga bê ti ku Jéhovah ti sara ye. Na nda ni, e yeke bâ anzoni ye so Jéhovah amû zendo ti sara ndali ti azo so ayeda ti ku lo.

3. Mama-ndia so ayeke na aProverbe 13:11 afa na e nyen?

³ Mbeni tapande so afa so e bezoin ti kanga bê ayeke na aProverbe 13:11. A tene: “Mosoro so zo awara ni gï hio tongaso ayeke kiri kete, me mosoro so zo abungbi ni kete na kete ayeke ga mingi.” Mo bâ mama-ndia ni? Zo ti ndara ayeke sara aye na hange nga na kangango bê, na lo yeke wara nzoni dä mingi.

4. Mama-ndia so ayeke na aProverbe 4:18 afa na e nyen?

⁴ A-Proverbe 4:18 atene so “lege ti azo ti mbilimbili ayeke tongana lumière ti lâ so asigi na ndapre si asu yeke yeke juska aga kota lâ.” Versê so afa na e polele so Jéhovah ayeke mû  maboko na azo ti lo yeke yeke ti mä yâ ti ye so lo leke na bê ti lo ti sara. Versê so apeut nga ti aidé e ti hinga tongana nyen la mbeni Chrétien ayeke sara achangement na yâ ti fini ti lo nga ti ga nduru mingi na Jéhovah. Ti tene zo aga nduru mingi na Jéhovah ahunda ngoi. Tongana e manda ye nzoni nga e sara ye alingbi na awango so Bible nga na bungbi ti Jéhovah amû, yeke yeke e yeke duti na asarango ye ti Christ. E yeke hinga nga Nzapa nzoni mingi. Bâ tongana nyen la mbeni tapande so Jésus amû afa ni.

5. Tapande wa la Jésus amû ti fa so ti tene zo asara achangement amû ngoi?

⁵ Jésus amû lani mbeni tapande ti fa tongana nyen la tënë ti Royaume so e yeke fa ayeke tongana mbeni kete ngongoa ti kobe so ayeke maï yeke yeke na yâ ti bê ti azo so aye ti sara ye na lege ni. Lo tene: “Ngongoa ti kobe ni asigi na akono, me lege so ye ni asi na ni, lo [zo ti lungo ni ahinga] pëpe. Sese ni wani asara si kobe ni asigi yeke yeke. Kozoni, keke ni asigi, na pekoni li ni asigi, nga na nda ni tâ lê ti kobe ni asigi na ndö ti keke ni.” (Marc 4:27, 28). Nyen la Jésus aye ti fa so? Lo ye lani ti fa so legeoko tongana ti so mbeni ye so a lu ayeke kono yeke yeke, zo so ayeda na tënë ti Royaume ayeke sara achangement yeke yeke. Na tapande, tongana azo so e manda Bible na ala aga nduru mingi na Jéhovah, e yeke komanse ti bâ anzoni changement so ala sara (aÉph. 4:22-24). Me a lingbi e girisa ape so Jéhovah la asara si kete ngongoa so akono.—1 aCor. 3:7.

6-7. Nyen la e manda na lege ti fason so Jéhovah acréé na sese?

⁶ Na yâ ti aye kue so Jéhovah asara, lo kanga bê lo mû ngoi so lo bezoin ni ti hunzi kua ti lo. Lo sara ni ndali ti gloire ti iri ti lo nga ti tene azo abâ nzoni dä. Na tapande, zia e bâ tongana nyen la yeke yeke Jéhovah aleke sese ndali ti azo.

⁷ Ti fa tongana nyen la Jéhovah acréé sese, Bible atene so lo fa “amesure ni”, lo “lu gere” ni nga lo ‘zia kozo tênë ti gere ni’. (Job 38:5, 6). Lo mû même ngoi ti gbu li na ndö ti kua  ti lo (Gen. 1:10, 12). Mo pensé a sara lani a-ange tongana nyen ti bâ afini ye oko oko kue so Jéhovah acréé? Terê ti ala adoit ti nzere lani mingi. Ndani la ala komanse ti “dekongo ti sepela” Nzapa (Job 38:7). Ye so afa na e nyen? Jéhovah amû angu saki mingi ti hunzi aye so lo créé, me tongana Jéhovah amû ngoi ti bâ aye so lo gbu li lani si lo créé, lo tene a yeke “nzoni mingi.”—Gen. 1:31.

8. Nyen la e yeke bâ fadeso?

⁸ Tongana ti so atapande so afa, amama-ndia mingi ayeke na yâ ti Bible so afa na e so e bezoin ti kanga bê. E yeke bâ fadeso aye use so, na yâ ni, e doit ti kanga bê ti ku Jéhovah.

9. Mbeni ye wa la na yâ ni e bezoin ti ku Jéhovah?

⁹ Peut-être e bezoin ti ku ti tene Jéhovah akiri tënë na asambela ti e. Tongana e sambela ti wara ngangu ti gbu ngangu na yâ ti mbeni tara wala ti wara mungo maboko ti hon ndö ti mbeni wokongo, e peut ti bâ so Jéhovah amû ngoi mingi ti kiri tënë na ni. Ngbanga ti nyen la Jéhovah ayeke kiri tënë na asambela ti e kue na lê ni lê ni ape?

10. Ngbanga ti nyen la e bezoin ti kanga bê e ku ti tene Jéhovah akiri tënë na asambela ti e?

¹⁰ Jéhovah ayeke dengi mê nzoni na asambela ti e (Ps. 65:2). Lo yeke bâ asambela so e sara na bê ti e kue tongana mbeni ye so afa so e yeke na mabe na lo (aHéb. 11:6). Na ngoi so e sambela Jéhovah ti aidé e ti zia ngia na bê ti lo, lo yeke gi ti bâ wala e yeda na bê ti e kue ti sara effort ti sara ye so bê ti lo aye (1 Jean 3:22). Tongaso, e bezoin peut-être ti kanga bê nga ti sara ye alingbi na asambela ti e na ngoi so e yeke gi ti hon ndö ti mbeni sioni sarango ye wala mbeni wokongo. Jésus a-aidé e ti hinga so peut-être Jéhovah ayeke kiri tënë na ambeni sambela ti e na lê ni lê ni ape. Lo tene: “Ala ngbâ ti hunda ye, na a yeke mû ni na ala. Ala ngbâ ti gi ye, na ala yeke wara ni. Ala ngbâ ti pika yanga-da, na a yeke zi ni na ala, ndali ti so zo kue so ayeke hunda ye ayeke wara ni, zo kue so ayeke gi ye ayeke wara ni, na zo kue so ayeke pika yanga-da, a yeke zi ni na lo.” (Mat. 7:7, 8). Tongana e mä wango so nga e “ngbâ lakue ti sambela”, e peut ti hinga na bê ti e kue so Babâ ti e ti yayu ayeke mä asambela ti e nga lo yeke kiri tënë na ni.—aCol. 4:2.

11. Tongana nyen la aHébreu 4:16 ayeke aidé e tongana e bâ so Jéhovah akiri tënë na asambela ti e hio ape?

¹¹ Atâa so e peut ti bâ so Jéhovah akiri tënë na mbeni sambela ti e hio ape, lo mû zendo ti kiri tënë na ni “na ngoi so e yeke na bezoin ti tene a mû maboko na e”, so ti tene na tâ ngoi ni. (Diko aHébreu 4:16.) Ndani la a lingbi e bi tënë lâ oko na li ti Jéhovah ape tongana mbeni ye asi hio ape tongana ti so e pensé fade. Na tapande, aita mingi asambela teti angu mingi ti tene Royaume ti Nzapa afuti sioni dunia so. Jésus ahunda même ti tene e sambela ndali ni (Mat. 6:10). Me a yeke duti ye ti buba mingi tongana mbeni zo azia si mabe ti lo na Nzapa awoko ndali ti so nda ni aga pëpe na ngoi so azo aku ti tene a ga na ni (Hab. 2:3; Mat. 24:44). E yeke sara ye na ndara tongana e ngbâ ti ku Jéhovah nga e ngbâ ti sambela, na hingango so lo yeke kiri tënë na e. Nda ni ayeke si tâ na ngoi ni, ndali ti so Jéhovah asoro awe ‘lango nga na l’heure’ so ayeke si na ni. A yeke duti ande tâ nzoni ngoi ndali ti azo kue so aye Jéhovah.—Mat. 24:36; 2 Pi. 3:15.

12. Na yâ ti mbilimbili ye wa la a peut ti duti ngangu na e ti kanga bê?

¹² Peut-être e bezoin ti kanga bê nga e gbu ngangu na ngoi so a sara ye na e na lege ni ape. Na yâ ti dunia so, fani mingi azo  ayeke sara ye na lege ni ape na azo so ayeke nde na ala, azo so couleur ti ala, yanga ti kodro ti ala, ngobo ti ala wala kodro ti ala ayeke nde na ti ala. A yeke sara ye na ambeni zo na lege ni ape ndali ti so ala yeke na mbeni kpale na terê ti ala wala na li ti ala. A-Témoin ti Jéhovah mingi ayeke gbu ngangu na yâ ti aye so a sara na ala na lege ni ape ndali ti aye so Bible afa so ala mä na bê na ni. Tongana a sara ye na e na lege ni ape, a lingbi e girisa tënë ti Jésus so ape. Lo tene: “Zo so agbu ngangu juska na nda ni, a yeke sö lo ande.” (Mat. 24:13). Me a yeke nzoni mo sara nyen tongana mo hinga so mbeni ita asara mbeni kota siokpari? Na peko ti so a sara tënë ni na a-ancien awe, eskê mo yeke zia tënë ni na maboko ti ala mo kanga bê mo ku ti tene ala leke ni tongana ti so Jéhovah aye? Nyen la a-ancien adoit ti sara tongana mbeni ita asara mbeni kota siokpari?

13. Nyen la Jéhovah aye ti tene a-ancien asara tongana mbeni ita asara mbeni kota siokpari?

¹³ Tongana a-ancien ahinga tënë ti mbeni kota siokpari so mbeni ita asara, ala yeke sambela ti wara “ndara so alondo na nduzu” tongaso si ala peut ti hinga bango ndo ti Jéhovah na ndö ti tënë ni (Jacq. 3:17). Ye so a-ancien ayeke gi ayeke ti mû maboko na zo so asara siokpari ti “kiri na nzoni lege” tongana lege ayeke dä (Jacq. 5:19, 20). Ala ye nga ti sara ye kue so ala peut ti sara ti bata congrégation nga ti mû maboko na azo so a sara sioni na ala (2 aCor. 1:3, 4). Na ngoi so a-ancien ayeke bâ lege ti akota siokpari, ala doit kozoni ti gi ti hinga aye kue na ndö ti tënë ni, ye so alingbi ti mû ngoi. Na pekoni, ala yeke sambela, nga na ndara ala yeke mû na zo ni wango so alondo na Bible nga ala yeke suku na zo ni “alingbi na ni”. (Jér. 30:11). Atâa so a-ancien ayeke ku ngbii ape, ala yeke mû desizion na yâ ti loro ape. Tongana a-ancien asara ye alingbi na fango lege ti Jéhovah, azo kue ti yâ ti congrégation ayeke bâ nzoni dä mingi. Même tongana a bâ lege ti mbeni kpale nzoni, bê ti mbeni zo so a sara sioni na lo apeut ti ngbâ ti son. Tongana a yeke ye so asi na mo la, nyen la mo peut ti sara ti tene bê ti mo ason mingi ape?

14. Tapande wa ti Bible apeut ti aidé mo ti gbu ngangu tongana mbeni mba ti mo Chrétien ason bê ti mo ngangu?

¹⁴ A si awe so mbeni zo wala même mbeni mba ti mo Chrétien asara mbeni ye so ason  mo mingi? Mo peut ti wara na yâ ti Bible anzoni tapande so afa na e tongana nyen ti ku Jéhovah ti leke aye so a sara na e so ayeke na lege ni ape. Na tapande, atâa so aita ti Joseph asara ye na lo na lege ni ape, lo bata tënë ni na bê ape. Me, lo ngbâ ti zia li ti lo na ndö ti kua ti Jéhovah so afuta lo mingi ndali ti so lo kanga bê lo gbu ngangu (Gen. 39:21). Na nda ni, Joseph awara lege ti pardonné azo so ason bê ti lo nga ti bâ tongana nyen la Jéhovah asara tufa na ndö ti lo (Gen. 45:5). Legeoko tongana Joseph, tongana e ga nduru na Jéhovah nga e ku lo ti leke aye so a sara na e na lege ni ape na ngoi ni, bê ti e ayeke dë.—Ps. 7:17; 73:28.

15. Nyen la a-aidé mbeni ita-wali ti kanga bê na ngoi so a sara mbeni ye na lo na lege ni ape?

¹⁵ Tâ tënë, asioni ye kue so a sara na e ayeke ngangu tongana ti Joseph ape, me mbeni sioni ye so a sara na e ayeke son e. Na ngoi so e wara tënë na mbeni zo, na tapande mbeni zo so avoro Jéhovah ape, tongana e sara ye alingbi na amama-ndia ti Bible e yeke bâ nzoni dä (aPhil. 2:3, 4). Bâ mbeni ye so asi. Bê ti mbeni ita-wali ason ngangu na ngoi so lo hinga so mbeni mba ti lo ti place ti kua ayeke tene asioni tënë, nga na atënë ti mvene na ndö ti lo na ambeni zo. Ita-wali ni adö terê ti lo ti sara ye ape, me lo mû ngoi ti gbu li na ndö ti tapande ti Jésus. Na ngoi so a zonga lani Jésus, lo kiri na peko ni ape (1 Pi. 2:21, 23). So lo gbu li tongaso, lo mû desizion ti girisa na ndö ti tënë ni. Ambeni ngoi na pekoni, lo ga ti hinga so mba ti lo ni ayeke na mbeni ngangu kpale ti seni nga lo gi bê ti lo mingi. Ita-wali ni atene so tënë so mba ti lo ni atene ayeke ye so lo ye ti tene fade ape. Nga, ita-wali ni ayeke na ngia mingi so lo kanga bê lo gbu ngangu na yâ ti ye ni so, nga lo duti na siriri.

16. Nyen la apeut ti dë bê ti mo tongana mo yeke gbu ngangu na yâ ti mbeni ye so a sara na mo na lege ni ape? (1 Pierre 3:12).

¹⁶ Tongana mo yeke gbu ngangu na yâ ti mbeni ye so a sara na mo na lege ni ape wala na yâ ti mbeni ye nde so ason bê ti mo, girisa ape so Jéhovah ayeke nduru na “azo so mbeni ye amû vundu na ala ngangu”. (Ps. 34:18). Lo ye mo ndali ti so mo kanga bê ti mo nga mo bi na ndö ti lo ye so ane mo (Ps. 55:22). Lo yeke Juge ti sese kue. Lo bâ aye kue.  (Diko 1 Pierre 3:12.) Tongana mo yeke na yâ ti akpale so mo peut ti leke ni ape, eskê mo peut ti ku Jéhovah?

17. Na Ésaïe 30:18, nyen la Jéhovah amû zendo ti sara?

¹⁷ Fafadeso, Babâ ti e ti yayu ayeke sara tufa mingi na ndö ti e na lege ti Royaume ti lo. Ésaïe 30:18 atene: “Jéhovah akanga bê ti lo, lo ku ti sara nzoni na ala, na lo yeke londo ti sara nzoni bê na ala, ndali ti so Jéhovah ayeke Nzapa ti mbilimbili. Ngia ayeke na azo kue so angbâ ti ku lo.” Azo so angbâ ti ku Jéhovah ayeke wara gbâ ti anzoni ye laso nga na yâ ti fini dunia so ayeke ga.

18. Anzoni ye wa la ayeke ku e?

¹⁸ Tongana azo ti Jéhovah alï ande na yâ ti fini dunia, ala yeke gbu ngangu encore ape na yâ ti akpale so ala doit ti gbu ngangu dä laso. Sarango ye na zo na lege ni ape nga na pasi ayeke duti dä encore ape (Apoc. 21:4). E yeke gi bê ti e ande pëpe so e lingbi pëpe ti wara aye so e bezoin ni ndali ti so aye ni ayeke si ande singo (Ps. 72:16; És. 54:13). Ye ni ayeke duti ande tâ pendere mingi!

19. Nyen la Jéhovah ayeke leke e yeke yeke ndali ni laso?

¹⁹ Jéhovah ayeke leke e laso ti vivre na gbe ti komandema ti lo, na lege so lo yeke aidé e ti hon ndö ti asioni sarango ye ti e nga ti maï anzoni sarango ye so anzere na lo. Découragé ape nga ngbâ ti gbu ngangu. Anzoni ye mingi angbâ na devant. Na ngoi so e yeke ku pendere ngoi so, zia e duti na ngia ti kanga bê ti ku ti tene Jéhovah asara aye so lo tene lo yeke sara ande.