1-2. Bici rhwaganirira mw’eci cigabi?

GURHI ociyumva erhi irhu lirimo akantu olagirireko lyakabula kuhika omu kasanzi walil’ilagirireko? K’oko kunakuvune omurhima? Emigani 13:12, Mashi Bible, edesire ntya: “Omulangaliro gurhahwa gunahoze.” Cikone, gurhi wakaciyumva erhi bakakubwira oku hali ebyarhumire er’irhu lirhakuhikako omu kasanzi wakagirhanya oku lyo lyahika? Muli oko, byanahûnaga olembere n’okugendekera kwalinda.

² Mw’eci cigabi, rhwaganirira makanuni manji g’Ebibliya gakarhurhabala rhube ‘n’oborhere bw’okulinda.’ (Mik. 7:7, NWT) Na kandi rhwaganirira njira ibirhi rhushinganine rhubemwo babidu okulinda Yehova. Na buzinda, rhwaganirira emigisho balya babà babidu okulinda Yehova akole bayishiba nayo.

3. Bici akanuni kali omu lwandiko lwa Emigani 13:11 karhuyigirizize?

³ Olwiganyo luyerekine obulagirire bw’okulembera luganirirwe omu lwandiko lwa Emigani 13:11. Ludesire ntya: “Obugale buyisha duba kuyônda buja bwayônda; oburhondêra hitya, bwo buja bwakula.” Ka hali akanuni olo lwandiko lukuyigirizize? Buba bwenge okulembera amango rhuli rhwajira bintu bilebe, na ntyo rhwanajira ngasi kantu omu kasanzi kako.

4. Bici akanuni kali omu lwandiko lwa Emigani 4:18 karhuyigirizize?

⁴ Emigani 4:18 erhubwizire oku “enjira y’abashinganyanya kw’eri nka bucè bwa lubûngu-bûngu [sezi-sezi], bwo buyisha bwakula kalînde kabâ kasirahînga [mulegerege].” Ezo nderho ziganirire enjira Yehova afulûliramwo abakozi bage omuhigo gwage bunyi-bunyi. Cikone kandi, olo lwandiko lwanakolesibwa kwa bulirî omu njira Omukristu ajira amajambere g’ekiroho omu kalamo kage. Binahûne akasanzi ly’omuntu ahikira  aha akula kiroho. Erhi rhwakakaciyigiriza n’okukolesa omu kalamo kirhu amahano rhukûla omu Kanwa ka Nnâmahanga n’ikubuliro lyage, rhwanagendekera rhwaba n’amorhere g’Ecikristu. Na kandi rhwanahikira aha rhwaba na bumanye bunji lugenda Nnâmahanga. Rhuganirire olwiganyo Yezu akolesagya ly’arhuhugûlira ntyo.

5. Lwiganyo luhi Yezu ahanyîre ly’ahugûla oku omuntu ajira amajambere g’ekiroho bunyi-bunyi?

⁵ Yezu akolesize olwiganyo luyerekine oku omwanzi gw’Obwami rhuja rhwayaliza ko guba nka mburho nsungunu eja yakula bunyi-bunyi omu mirhima y’abantu birhohye. Aderha ntya: “Emburho enacimerere, enakule [owayirhweraga] arhanamanyiri. Bulya obudaka bwonene buyêza, burhanzi ebyasi, hakulikire omusîsi, na buzinda amahemba omu musîsi.” (Mk. 4:27, 28) Bici Yezu alonzagya okuhugûla? Alonzangya okuhugûla oku nka kula emburho ekula bunyi-bunyi, ko n’omuntu oyemera omwanzi gw’Obwami akula bunyi-bunyi omu hali y’ekiroho. Kwa lwiganyo, erhi abanafunzi birhu b’Ebibliya birhohye barhondera okujira obwîra bwa hofi-hofi haguma na Yehova, rhunarhondere okubona mpindûlo zirhali nyi bamakajira omu kalamo kabo. (Ef. 4:22-24) Cikone rhushinganine rhukakengera oku Yehova yekuza eyo mburho nsungunu omu mirhima yabo.​—1 Kr. 3:7.

6-7. Bici rhuciyigirizize kugerera oku Yehova alemire igulu?

⁶ Omu ngasi mikolo Yehova ajira, anacihîrireho akasanzi alagirirekwo ly’ahikiriza omukolo gwage. Anajire ntyo ly’alerhera izino lyage irenge na kandi anakujire oku bunguke bw’abandi. Kwa lwiganyo, rhurhanye okubiyerekire oku Yehova arheganyig’izagyamwo bene bantu igulu bunyi-bunyi.

⁷ Omu kuganirira oku Yehova alemagamw’igulu, Ebibliya edesire okubiyerekire “olubibi,” aha amakôndo galyo “gasimikira,” n’okubiyerekire “ibuye ly’eciriba.” (Ayu. 38:5, 6) Na kandi aciha akasanzi k’okurhanya kw’ebi ali amajira. (Murh. 1:10, 12) Ka wanarhanya gurhi bamalahika baciyumvirhe erhi babona  kunganaci emikolo y’obulemi bwa Yehova eri yahikirira bunyi-bunyi? Kobinali oko kwabashagalusa bwenene! Kasanzi kaguma bahikira aha barhondera “bayimba n’omwishingo.” (Ayu. 38:7, Mashi Bible) Isomo lihi rhukuzire aho? Byahunyîre ebihumbi by’emyaka lyo Yehova ahikiriza emikolo yage y’obulemi, cikone erhi Yehova alabiriza ebi ali amalema n’erhi abirhanyako, anaderha oku “binali binja.”​—Murh. 1:31.

8. Bici rhukola rhwaganirira?

⁸ Nk’oku rhwanabwine omu nyiganyo ziri omu bifungo by’embere, rhwanabona makanuni manji omu Kanwa ka Nnâmahanga gasegize obulagirire bw’okuba bakulembera. Rhukolaga rhwaganirira njira ibirhi rhushinganine rhubemwo babidu okulinda Yehova akole.

9. Omu njira ehi nguma rhwakabamw’obulagirire bw’okulinda Yehova akole?

⁹ Nkaba rhwanaba n’obulagirire bw’okulinda oku amasala girhu gashuzibwa. Amango rhushenga Yehova oku arhuhe emisi y’okulwisa marhangulo malebe erhi oku arhurhabale rhuhime buzamba bulebe, hali amango rhurhanya nkaba oku Yehova amalegerera okurhushuza. Bulya gurhi Yehova arhashuza oku masala girhu goshi ho n’aho?

10. Bulya gurhi rhushinganine rhube bakulembera kuhika Yehova ashuze oku masala girhu?

¹⁰ Yehova anayumvirhize bwinja-bwinja amasala girhu. (Enna. 65:2) Amasala girhu garhenzire oku murhima ganamuyerese oku rhugwerhe obuyemere muli ye. (Hb. 11:6) Kandi Yehova anashagaluke bwenene erhi abona rhuli rhwajira okwirhu koshi lyo rhulama nk’oku amasala girhu ganadesire n’erhi rhujira okwirhu koshi lyo rhujira obulonza bwage. (1 Yn. 3:22) Co cirhumire rhushinganine rhube bakulembera n’okukola nk’oku amasala girhu ganadesire ngasi mango erhi rhulonza okuhima nkomêdu ndebe erhi buzamba bulebe. Yezu ahurhabire rhuhugûkwe oku hali masala girhu maguma maguma garhakashuzibwako ho n’aho. Aderha ntya: “Mugendekere mwahûna, mwahâbwa; mugendekere mwalonza, mwarhôla; mugendekere mwakomamba, mwayigulirwa; bulya ngasi ohûna anahâbwe, na ngasi olonza anarhôle, n’okomamba oku lumvi, anayigulirwe.” (Mt. 7:7, 8, NWT) Erhi rhwakakulikira er’ihano n’ “okushenga burhahusa,” rhwanayemera n’obwalagale oku Larha wirhu w’omu mpingu arhuyumvirhiza n’okushuza oku masala girhu.​—Kl. 4:2, NWT.

11. Gurhi olwandiko lwa Abahabraniya 4:16 lwakarhurhabalamwo amango ishuzo okw’isala lirhu lyakabonekana nka lyalegerire?

¹¹ Ciru akaba ishuzo okw’isala lirhu lyanabonekana nka lyalegerire, Yehova arhulaganyize oku ashuza oku masala girhu “omu mango gakwanine.” (Osome Abahabraniya 4:16, NWT.) Co cirhumire rhurhashinganini rhuderhe Yehova kubi erhi akaba kantu kalebe karhahikiriri duba-duba nk’oku rhwal’ilangalire. Kwa lwiganyo, bantu banji bakola bagwerhe myaka minji bali bahûna Nnâmahanga oku Obwami bwage buyishage bushereze er’igulu. Ciru Yezu naye arhubwizire oku rhukashenga ntyo. (Mt. 6:10) Cikone bwanaba buhwinja bunene erhi omuntu akanyihya obuyemere bwage muli Nnâmahanga mpu bulya obuzinda burhayishiri omu mango bene bantu balilangalire oku lyo bwayisha! (Hab. 2:3; Mt. 24:44) Rhwanaba benge erhi rhwakagendekera rhwalinda Yehova n’okugendekera rhwashenga n’okuba n’obuyemere muli ye. Obuzinda bwanayishe omu kasanzi kashinganine, kw’okuderha ‘olusiku n’akasanzi’ Yehova acishozire oku lyo bwayisha. N’olo lusiku lwanabonekane oku luli lwinja kuli abantu boshi.​—Mt. 24:36; 2 Pt. 3:15.

12. Omu kanga kahi oborhere bwirhu bw’okulembera bwakaja omu marhangulo?

 ¹² Rhwanaba n’obulagirire bw’okulinda oku obushinganyanya bwajirwa. Mw’er’igulu abantu banabonerere ababo mpu bulya bali balume erhi bulya bali bakazi, barhagwerhi irangi liguma lya mubiri, barhali ba bûko buguma, erhi bulya barhali b’ishanja liguma. Haligi n’abandi babonererwa bulya bali birema erhi bulya bagwerhe bwenge busungunu. Bakozi banji ba Yehova balembire obubule bw’obushinganyanya bajirirwe erhi buyemere bwabo buyimangire oku Bibliya burhuma. Rhushinganine rhukakengera ezi nderho za Yezu amango rhwamajirirwa okuli nk’oko. Aderha ntya: “Owanazibuhe [erhi kulembera] kuhika oku buzinda, oyo ye wacizibwa.” (Mt. 24:13, Mashi Bible) Cikone gurhi wakajira erhi wakabona hali mwene wirhu erhi mwali wirhu w’omu cigamba wajijire cijiro cilebe cibi? Abagula nka bamabwirwa kuli ogo mwanzi, ka wanagulekeraga omu maboko gabo, n’okulembera kuhika bagushibirire nk’oku Yehova alonzize? Bici abagula bashinganine okujira erhi muntu mulebe akajira ecaha?

13. Bici Yehova ahûnyire abagula bajire amango muntu mulebe w’omu cigamba anajijire ecaha?

¹³ Erhi abagula bamanya oku muntu mulebe omu cigamba anajijire ecaha cizibu, banalongereze kugerera isala “obumanye bw’enyanya” lyo bahugûkwa entanya za Yehova okubiyerekire ako kanga. (Yk. 3:17, Mashi Bible) Omuhigo gwabo guba gwakurhabala owajiraga ecaha cizibu arhenge “omu njira âli ahabukiremwo,” erhi byakahashikana okujira ntyo. (Yk. 5:19, 20) Na kandi banalonze okujira okwabo koshi lyo balanga ecigamba n’okurhuliriza abasarhazibagwa. (2 Kr. 1:3, 4) Amango abagula bali bashibirira ebintu biyerekire ecaha cizibu, banajire obusagasi lyo bahugûkwa bwinja ebintu, n’okujira ntyo kwanahûna kasanzi kanji. Na buzinda banasalira n’okuha oyo wajiraga ecaha amahano garhenzire omu Mandiko na ntyo bahâne obuhane nk’oku “bishinganine.” (Yer. 30:11) Ciru akaba abagula barhalegereza ebyo bintu, barhanarhôla omuhigo duba-duba. Erhi bakashibirira ebintu omu njira eshinganine, oko kwanalerhera ecigamba coshi obunguke. Hali amango ebintu bishibirirwa omu njira eshinganine eri nk’eyo, cikone owajirirwe igosa agalivunika omurhima. Erhi akaba oko kukola kukuhikire, gurhi wakajira ly’onyihya oku malumwa?

14. Lwiganyo luhi luli omu Bibliya lwakakurhabala olembere erhi akaba owinyu Mukristu anakusarhazize?

¹⁴ Ka hali omuntu erhi winyu mwemezi  okola akusarhazize? Wanabona enyiganyo nyinja omu Kanwa ka Nnâmahanga zakarhurhabala rhukaba babidu okulinda oku Yehova akubûla ebintu. Kwa lwiganyo, ciru akaba Yozefu akoleragwa okurhashinganini na bene wabo, arhalekaga ebyaha byabo birhume aba nyaburhundu. Lubero n’oko, agendekera asegeza obwenge bwage oku mukolo gwa Yehova, na Yehova ayishimuhemba enyanya z’oko kulembera. (Murh. 39:21) Erhi hagera nsiku, Yozefu arhacikagikengera amalumwa goshi ageragamwo, anakabona kunganaci Yehova amugishire. (Murh. 45:5) Aka Yozefu, rhunarhulirizibwe erhi rhuyegerera Yehova n’okuleka yene alerhe obushinganyanya omu kasanzi kashinganine.​—Enna. 7:17; 73:28.

15. Bici byarhabire mwali wirhu muguma alekere aho ebi owabo munyakasi amujiriraga?

¹⁵ Kobinali, obubule bw’obushinganyanya boshi burhaba buzibu nk’obo bwahikiraga Yozefu, cikone rhweshi rhurhaciyumva bwinja erhi bakarhujirira kubi omu njira nguma erhi yindi. Erhi hakaba hali okurhayumvikana egarhi kirhu n’owundi muntu, ciru n’orhali Muhamirizi wa Yehova, kwanaba kwa bulagirire bwenene erhi rhwakakolesa amakanuni g’Ebibliya. (Fl. 2:3, 4) Rhuganirire lwiganyo luguma. Mwali wirhu muguma avunika omurhima bwenene erhi amanya oku owabo bakag’ikola boshi akag’imuderha-derha kubi embere z’abandi n’okumushobeka obunywesi. Ahali h’okulutwa duba-duba, oyo mwali wirhu aciha akasanzi k’okurhanya oku lwiganyo lwa Yezu. Erhi baba badwirhe bamujacira, arhagalulaga bijaci. (1 Pt. 2:21, 23) Erhi akengera ezo nderho, ahiga oku abilekera aho. Enyuma z’aho, bayish’imubwira oku oyola wabo munyakasi alilwazire bwenene n’oko kwakagirhuma aciyumva kubi. Ho n’aho mwali wirhu ahugûkwa oku oyo wabo munyakasi arhakagirhanya kw’ebi akagiderha. Na ntyo mwali wirhu ashagaluka bwenene okubona alindirire n’okulembera ebyo bamuderherhaga, n’oko kwarhuma acibiba n’omurhula.

16. Bici byakakurhuliriza erhi akaba oli walembera obubule bw’obushinganyanya? (1 Petro 3:12)

¹⁶ Erhi akaba oli walembera obubule bw’obushinganyanya erhi kandi kantu kali kakusarhaza, okengere oku Yehova aba hofi “n’emirhima egayire.” (Enna. 34:18, NWT) Akuzigire enyanya z’oko kulembera kwawe n’okubona onamurhuleko emizigo yawe. (Enna. 55:22) Ye Mutwi w’Emanja w’igulu lyoshi. Anabone ebintu byoshi. (Osome 1 Petro 3:12.)  K’oba mubidu okulinda Yehova amango oli walwisa amazibu orhakahashihima?

17. Nk’oku biyerekinwe omu lwandiko lwa Izaya 30:18, bici Yehova arhulaganyize?

¹⁷ Hano hofi-hofi, Larha wirhu w’omu mpingu arhugisha bwenene kugerera Obwami bwage. Olwandiko lwa Izaya 30:18, NWT ludesire ntya: “Yehova ali alinda omu kulembera ly’abayereka obwinja, kandi ayimuka ly’ammuyereka olukogo lwage. Bulya Yehova aba Nyamuzinda mushinganyanya. Abw’obushagaluke bali balya boshi bamulinda.” Balya bagendekire balangalira Yehova banahâbwe migisho minji muli gano mango, banayishiyihâbwa omw’igulu lihyahya.

18. Migisho ehi rhuli rhwalindirira?

¹⁸ Amango abakozi ba Nnâmahanga baja omw’igulu lihyahya, barhakacilembera bundi amazibu n’ebindi bintu bibi balibalwisa muli gano mango. Obubule bw’obushinganyanya n’amalumwa birhakacihaba bundi. (Maf. 21:4) Rhurhakacirhama rhwalinda ebi rhulagirireko bulya ngasi muntu anabè na bintu binji bwenene. (Enna. 72:16; Iz. 54:13) Yanabè migisho minji na minja bwenene!

19. Bici Yehova ali arhurheganyako kurhangira ene?

¹⁹ Embere ako kasanzi kahike, Yehova ali arhurheganya lyo rhuyishilama omu burhegesi bwage; ali arhuhashisa rhuleke engeso mbi n’okuba n’amorhere minja gamusimisa. Orhavunikaga omurhima, orhanalekaga okumukolera. Ebintu binja biri omu njira! Bulya amango minja gayisha gali embere zirhu, rhugendekerage rhwalinda Yehova n’obulonza kuhika ayuse emikolo yage!