1-2. Nkinyi ki’atutalula mu uno muisambo?

OPUSHAA naminyi nsaa y’otengiela ebofu di bintu biodi mukumine, kadi dish’adifiki nsaa yu’editengiela? Opushaa bi bubi su? Pangi we kuipusha nka abiakula Nkindji 13:12 shi: “Kukulupila kintu kyooshyoopete akukyengyeshaa kwishimba.” Kadi, we kupusha naminyi su owuka tubingilo tui buwa atulesha buakinyi ebofu ta ndifikie pa nsaa yu’editengielanga? Su bi biabia, okumina kutengiela na luishinko.

² Mu uno muisambo, atumono angi mayi a kulonda e mu Bible aetukuasha bua ‘kuyindjila [na luishinko, NWT].’ (Mik. 7:7) Akupu, atutalula mianda ibidi ayitungu’shi tutengiele Yehowa na luishinko. Ku nfudilo, atuakuila mianda i buwa ilee Yehowa ayitengiela baba boso abamuyindila.

3. Nkinyi akitulongiesha Nkindji 13:11?

³ Kileshesho akilesha bia kuikala na luishinko, ki mu Nkindji 13:11, EEM. Amba’shi: “Bupeta bwa mu kapindji n’aka t’abwimanaa kwishêta. Bwa mu kapêla kapêla namu abufwimâ.” Nkinyi akitulongiesha uno verse? Muntu sha binangu akita mianda na kalolo, kapela kapela, na apetaa bipeta bi buwa.

4. Nkinyi akitulongiesha Nkindji 4:18?

⁴ Nkindji 4:18 amba’shi, “eshinda dya balulame dii buu etaata dya pa nkyèelo, adyend’aditamanga mpaa na mu nkatsh’efuku.” Bino bishima abilesha mushindo ukuete Yehowa kufumbuila muilo waye mpango yaye kapela kapela. Uno verse etukuasha dingi bua kupusha mushindo ulombene muina Kidishitu kushintuluka na kuifubuila pepi na Yehowa. Muntu t’anyinga  mu kikudi muifuku dimune nya, abiataa mafuku. Su tualonga kalolo na kutumikila malango e Muiyi di’Efile Mukulu, na aetupa ndumbuluilo aye, kapela kapela atukimbi nyikashi ya bena Kidishitu. Atutamisha dingi kiukilo ki’etu bu’Efile Mukulu. Tala bibadi Yesu muibipatule.

5. Nkileshesho kinyi kibadi Yesu mutushe bua kulesha bilombene muntu kushintuluka kapela kapela?

⁵ Yesu badi mufubishe kileshesho bua kupatula mushindo awikala mukandu wa Bufumu w’atulungula bu katete kapela akende na kutama muishimba dia muntu mululame. Bambile’shi: “Yaya mbyo aishipuka, imene mu kipaso kyasheûku [mudimi]. Nsenga i nabêne aikomeshâ bikunwanga bitûkye mu mbyo mu kino kipaso: kwibedi kinkolwa akikulu, akitûsha myepo, ku nfudîlo ngano ayitwele munda.” (Mak. 4:27, 28) Yesu badi akiebe kuakula kinyi? Badi akiebe kuakula’shi nka bu abikulaa mutshi kapela kapela, muntu akumina mukandu wa Bufumu akulaa mu kikudi kapela kapela. Bu kileshesho, nsaa i balongi ba Bible abefubuila pepi na Yehowa, atubanga kumona mianda i bungi y’abashintula mu nshalelo abo. (Ef. 4:22-24) Abitungu tutentekieshe’shi Yehowa nyi kuete kukusha tuatua tutete tupela.​—1 Kod. 3:7.

6-7. Nkinyi kibatulongiela ku mushindo ubadi Yehowa mupangie nsenga?

⁶ Mu bioso bi’akitaa, Yehowa ataa nsaa yoso ayitungu bua kukumbasha mudimo waye. Ebikitaa bua ntumbo y’eshina diaye na bua buwa bua bangi. Bu kileshesho, tala mushindo ubadi Yehowa mulumbuluile bantu nsenga kapela kapela.

⁷ P’alesha mushindo ubadi Yehowa mupangie nsenga, Bible alesha’shi ‘beyipimine,’ ashimika “bitako byaayo,” na “baatudile ebwe dyaayo dya mwitungi.” (Yob. 38:5, 6) Badi mpa na muate nsaa ya kutalula mudimo waye. (Kib. 1:10, 12) We kunangushena mushindo ubadi ba mikeyilu bapushe p’ababadi abamono kintu kioso kipia kibadi Yehowa apanga? Abadi na muloo biabia! Pa muanda wa bibabadi abamono, ababangile kuela “musaase wa  kusepeela.” (Yob. 38:7) Bino abitulongiesha kinyi? Bibadi biate bipua binunu bua’shi midimo ya Yehowa ikumbane, na nsaa ibayipuile, batadile kantu koso kabapangile aye nkuamba’shi, bi “buuwa bukabe.”​—Kib. 1:31.

8. Nkinyi kitatutalula binobino?

⁸ Bino bileshesho bibatukatuka mu kumona kunundu, bibetulesha’shi kui mayi e bungi a kulonda e mu Bible aetulongiesha bua kuikala na luishinko. Binobino, taluleyi mianda ibibi ayitulesha buakinyi abitungu tutengiele Yehowa.

9. Nsaa kinyi ayitungu’shi tutengiele Yehowa?

⁹ Abitungu tutengiele bua’shi Yehowa alule nteko yetu. Nsaa y’atutekie Yehowa bukome bua kunyingila mianda yetu sunga bua kuleka kukita kintu kampanda kishikue Yehowa, tui kumona bu ata nsaa i bungi bua kualula nteko yetu. Buakinyi Yehowa t’alulaa nteko yetu yoso musango umune?

10. Buakinyi abitungu tutengiele na luishinko loso bua’shi Yehowa alule nteko yetu?

¹⁰ Yehowa atemeshaa nteko yetu kalolo. (Mis. 65:3) Amonaa nteko yatuele n’eshimba di’etu dioso bu kishinkamisho kia’shi tui na lukumino. (Eb. 11:6) Nsaa y’atutekie Yehowa bukuashi bua kumusankisha, akuminaa kumona bi’atuikitshisha bua kukita mianda muyile nteko yetu, na kukita kikiebe ki’eshimba diaye. (1 Yo. 3:22) Biabia, abitungu tuleshe luishinko na tukite mianda muyile nteko yetu, p’atukiebe kukambila kiubishi kampanda ki bubi sunga kubofula kampanda. Yesu muitukuashe bua kupusha’shi ingi nteko yetu t’abeyalulaa musango umune nya. Bakuile’shi: “Tekaayi, abenupa; kimbayi, anupete; kookolayi, abeenushitwila. Mwanda, ooso atekye, apete; akimbi, amono, akookola, abamushitwila.” (Mat. 7:7, 8) Su tualonda dino elango, na ‘kuikala atutekye na mufwaka,’ atuikala bashinkamishe’shi Nshetu e muiyilu etupusha na alula ku nteko yetu.​—Kol. 4:2, EEM.

11. Mushindo kinyi awitukuasha Bena-Ebelu 4:16, nsaa ayimueka lualulo lua luteko luetu bu lubayisha?

¹¹ Sunga luteko luetu lua mueneka bu lubayisha kushi lualulo, Yehowa mmulee’shi akalula pa “kipindji kikumbane.” (Badika Bena-Ebelu 4:16.) Nyi buakinyi t’abitungu tutopekie Yehowa nsaa y’atumono’shi lualulo t’alufikie bukidi bu bi’atupuandikishanga. Bu kileshesho, be bungi mbapue kuteka munda mua bipua bi bungi bua’shi Ndumbuluilo a Efile Mukulu afudishe uno ndumbuluilo e bubi. Ta bi bubi, muanda Yesu badi mpa na muambe’shi tutekie bua uno muanda. (Mat. 6:10) Su tuashimisha lukumino luetu mui Efile Mukulu muanda wa’shi nfudilo tangifikie bu biatutengielanga, nyi nkukutua kua binangu! (Aba. 2:3; Mat. 24:44) Atulesha’shi tui na kinangu, pa kutungunuka na kutengiela Yehowa na kumuteka na lukumino. Nfudilo, ayikafiki pa kipindi kikumbane muanda Yehowa mmupue kusangula “efuku na nguba,” diayifiki. Na diadia efuku adikekala di buwa bua bantu boso.​—Mat. 24:36; 2 Mp. 3:15.

12. Nsaa kinyi yabidi bilombene kuituelela bukopo bua kuikala na luishinko?

¹² Abitungu tuikale na luishinko na tunyingile kukutua kua kululama. Mu uno ndumbuluilo, bantu abakiengiesha bangi muanda ta balume sunga bakashi nabo, ekoba, kisamba, bipikua sunga eumbo dimune. Bangi abebakiengieshaa muanda wa’shi be na bilema sunga’shi mbitesha. Ba Temwe ba Yehowa be bungi bakuete kunyingila kukutua kua kululama muanda wa lukumino luabo luimene mu Bible. Nsaa y’atukiengieshibua mu uno mushindo, abitungu tutentekieshe mayi a Yesu. Bambile’shi: “Akashaala munyingye nyaa na ku  mfudiilo, yaawa apanda.” (Mat. 24:13) Nkinyi akitungu’shi tukite su betukitshina muanda wi bubi kui muina kakongye? Kunyima kua bakulu kuuka wawa muanda, weulekie mu masa muabo, otengielaa na luishinko bua’shi beupue mu mushindo aukiebe Yehowa su? Nkinyi akikitaa bakulu nsaa ayikitshi muntu muluisho ukata?

13. Yehowa akumina’shi bakulu bakite kinyi nsaa ayikitshi muntu muluisho ukata?

¹³ Nsaa ayuku bakulu’shi muina kakongye bakitshi muluisho ukata, abatekie bua kupeta “binangu bya muiyilu,” bua’shi baukie bi mueneno a Yehowa pabitale wawa muanda. (Shak. 3:17) Kepatshila kabo nka ‘kukatusha sha milwisho mwishinda di bubi,’ su kui mushindo. (Shak. 5:19, 20) Na dingi, abakitshi muabo moso bua kukaluila kakongye na kunyingisha yawa abadi baluishishe. (2 Kod. 1:3, 4) Nsaa yabatalula muanda wa muntu mukite muluisho ukata, abitungu’shi bakulu baukie kikitshikie binyibinyi, na bino mbilombene kuata mafuku e bungi. Akupu, abatekie na mashimba abo oso, abatusha malango emene mu Bible na kutusha ‘dinyoka dilulame sunga dikumbane.’ (Yel. 30:11) Sunga biabidi’shi bakulu t’abakamba kuisha bua kuata kitshibilo, t’abekiataa bukidibukidi nya. Nsaa i bakulu abalondo bukunkushi bua Yehowa, kakongye nkalombene kumona muanda ubakitshika kalolo. Sunga biekala’shi bakulu mbatalule muanda mu mushindo wi buwa, yawa abadi bakitshine bubi ekutungunuka nka na kuipusha bibi. Su ngi biuepusha, nkinyi kiodia kukita bua kupela kukamba kuipusha bi bubi?

14. Nkileshesho kinyi ki nkukuasha bua kunyingila su mbakuluishishe kui muina Kidishitu nobe?

¹⁴ Tabadi bakukitshine muanda kampanda kui muntu kampanda, pangi mpa na kui muina Kidishitu nobe su? We mulombene kupeta kileshesho ki buwa Muiyi di’Efile Mukulu aditulongiesha bua kuindila Yehowa bua’shi alumbule mianda. Bu kileshesho, sunga bibadi bakuabo na Yosefe bamukiengieshe, tabadi mutadile’shi miluisho yabo imufitshishe munda nya. Pa mutue pa biabia, batungunukile na kuipana mu mudimo wa Yehowa, na Yehowa badi mumuelele miabi bua luishinko na kunyingila kuaye. (Kib. 39:21) Muenda mafuku, Yosefe badi mufuile abadi bamuluishishe lusa na kumona abimuelela Yehowa miabi. (Kib. 45:5) Nka bu Yosefe, atunyingishibua  p’atuifubuila pepi na Yehowa na kutula mianda yoso mu masa muaye.​—Mis. 7:18; 73:28.

15. Nkinyi kibadi kikuashe mukuetu mukashi buadia kunyingila kukutua kua kululama na kupeta butale?

¹⁵ Eyendo, t’atunyingila mianda ya kukutua kululama bu ibadi inyingile Yosefe nya, anka muanda wi bubi wabadi betukitshine ngulombene kutungunuka na kuitutapa kuishimba. Nsaa yatudi na muanda na muntu, sunga na yawa shi mulanguidi a Yehowa, atupete miabi su atutumikila mayi a kulonda e mu Bible. (Fid. 2:3, 4) Banda kutala uno muanda. Ungi mukuetu mukashi badi mutapikie kuishimba ngofu nsaa ibadi mupushe’shi, ungi muina mudimo naye badi amuakula mianda i bubi kui bangi. Pamutue pa kuenda na mianda bukidi bukidi, mukuetu mukashi badi muate nsaa ya kunangushena pa kileshesho kia Yesu. Nsaa ibabadi abamukaa, tabadi ebakaa namu nya. (1 Mp. 2:21, 23) Na uno muanda mu binangu, mukuetu mukashi batshile kitshibilo kia kupela kukita kintu su nkimune pabitale uno muanda. Kunyima bafikile mu kuuka’shi yawa muina mudimo naye badi na mukumbo wi bukopo ubadi aumukalakasha mu binangu. Mukuetu mukashi batunduile’shi, pangi muina mudimo naye tabadi auku kibadi akula. Na mukuetu mukashi badi na muloo wi bungi, muanda badi munyingile kukutua kua kululama na luishinko, na aye nkupeta butale.

16. Nkinyi kilombene nkunyingisha su okuete kunyingila kukutua kua kululama? (1 Mpyeele 3:12)

¹⁶ Su okuete kunyingila kukutua kua kululama muanda wa’shi mbakuluishishe, tentekiesha’shi Yehowa e pepi na basha “mashimba asâsukye.” (Mis. 34:19, EEM) Mmukufule bua luishinko lobe na muanda wa’shi okuete kumusumbuila bushito bobe. (Mis. 55:23) Nyi Nsushi a be pa nsenga boso. Ta kui kintu su nkimune kiash’amono. (Badika 1 Mpyeele 3:12.) Nsaa yodi mu nkalakashi yoshi biakupua obe nabene, okumina kutengiela Yehowa su?

17. Muyile Yeeshaya 30:18, Yehowa etupa nkishinkamisho kinyi?

¹⁷ Binobino, Nshetu e muiyilu etuelela miabi i bungi ku bukuashi bua Bufumu buaye. Yeeshaya 30:18 amba’shi: “Yehowa mmutengyele  kipungo kilombeene kwinufwila lusa; akeebwo bwa kwinuleesha kalolo kaaye, mwanda Yehowa nyi Efile Mukulu a bululame: bee na mwabi mbano booso abakakulupila mwadi.” Boso abatungunuka na kukulupila mui Yehowa, abapete miabi i bungi kubanga binobino mpa na mu nsenga ipia.

18. Miabi kinyi aitutengiela?

¹⁸ Nsaa ayikatuele muilo w’Efile Mukulu mu nsenga ipia, taukekala dingi na kia kunyingila tuinyongoshi sunga nkalakashi yabanyingila lelo uno nya. Kukutua kua kululama akukapu, na mitanyo tayikekala dingi kuanka. (Kibaf. 21:4) T’atukekalakasha bua bintu biatudi nabio lukalo nya, muanda muamua amukekala bintu bioso. (Mis. 72:16; Yesh. 54:13) Bino abikekala buwa biabia!

19. Yehowa kuete kuitulumbula binobino buakinyi?

¹⁹ Binobino, Yehowa kuete kuitulumbula bua nkekala mu bukunkushi buaye pa kuitukuasha bua kukambila biubishi bi bubi na kudima nyikashi aimusankisha. Tobofulanga kuishimba na tolekanga kufubila Yehowa. Nshalelo e buwa tadi pepi! Patuki’atutengiela ano mafuku e buwa, tuikalei na muloo patuki’atutengiela Yehowa na luishinko bua’shi akumbashe milailo yaye!