1, 2. Ndiéjunʼ guʼyáá náa artículo rígi̱ rá.

GUNDXAʼWAMÍJNA̱ dí kuwáánʼlú ruguaʼthi̱i̱n ma̱ʼkha̱nú mbá rí ninda̱ʼa̱ dí ndayúlú wéñuʼ, mú ndajyúuʼ wéñuʼ maʼkhanúu. Xú kaʼnii gákumulú rá. Mbáa maxmiéjunlú, ikha jngóo náa Proverbios 13:12 naʼthí: “Rí naraʼthi̱i̱n rí tséʼkha̱nú nacha̱. Maʼni rí a̱jkia̱nʼ maʼniuu nandii”. Mú á mu niʼdxawíín dí nirígá mbá dí gíʼdoo numuu ikha jngóo xóó tséʼkha̱núu rá. Á mu dí xúʼko̱, maʼngo̱o̱ a̱jkiu̱lú muguaʼthi̱i̱n má xúʼko̱.

² Náa artículo rígi̱ mbuʼyáá mbaʼa ikha rí na̱ʼkha̱ náa Biblia dí ma̱ndoo mambáyulúʼ mu maʼngo̱o̱ a̱jkiu̱lú muguaʼthi̱i̱n má xúʼko̱ (Miq. 7:7). Nda̱wa̱á, mbuʼyáá a̱jma̱ enii náá gíʼmaa maʼngo̱o̱ a̱jkiu̱lú ga̱jma̱a̱ muguaʼthi̱i̱n asndu índo̱ Jeobá má gáʼnimbánuu. Nda̱wa̱á kayuuʼ mbuʼyáá ndiéjunʼ dí májánʼ gúndrígúu bi̱ maʼngu̱u̱n muguaʼthi̱i̱n.

3. Xú kaʼnii ikha rí nagájnuriyoʼ náa Proverbios 13:11 rá.

³ Náa Proverbios 13:11 nuxkamaa mbá xkri̱da rí nasngájmulú rí gíʼdoo numuu maʼngo̱o̱ a̱jkiu̱lú muguaʼthi̱i̱n. Ikhí naʼthí: “Rí naraʼdáá mbá nacha̱ mandáti̱ga̱a̱, mú rí natruwaa chíʼgíʼ chíʼgíiʼ maʼga rajoo itháan”. Ndiéjunʼ ikha eʼsngúlúʼ náa versículo rígi̱ rá. Rí itháan májánʼ nindxu̱u̱ rí maʼngo̱o̱ a̱jkiu̱lú índo̱ rígá mbá dí mu̱ʼni̱ mú mañu mañúú gúʼni.

4. Ndiéjunʼ ikha exkamaa náa Proverbios 4:18 rá.

⁴ Náa Proverbios 4:18 naʼthúlúʼ dí “Kambu̱ún bi̱ jmbiin nindxu̱u̱ xóo rí nambiʼi miʼcha̱ rí na̱jkha̱ raʼni itháan mba̱a̱ asndu índo̱ nambiʼi májánʼ”. Ajngáa rígi̱ nasngájmulú kaʼwu dí Jeobá  naʼsngúún mañu mañúú xa̱bi̱i̱ dí gíʼdoo maʼni. Náa versículo rígi̱ ma̱ngaa ma̱ndoo muʼthá ga̱jma̱a̱ numuu mbáa bi̱ nagíʼ maʼni itháan ñajuunʼ Jeobá. Mú maguma ñajunʼ rígi̱ ndayóoʼ mba̱yu̱u̱ʼ mbiʼi ga̱jma̱a̱ xáʼyóoʼ maguma mbá nacha̱. Á mu nuʼnigajmaa tsumáá ma̱ngaa á mu nuʼgíʼ nuʼnimbaníí consejo rí na̱ʼkha̱ náa Ajngá rawuunʼ Dios ga̱jma̱a̱ ikha rí naxná xuajñuu, mañu mañúú gúʼgua̱ ruyaʼridáá̱ Cristo ga̱jma̱a̱ muniʼnííʼ itháan májánʼ Dios. Jesús nijmuu mbá xkri̱da mu maʼthí rígi̱. Guʼyáá.

5. Xú káʼnii xkri̱da nijmuu Jesús mu maʼsngúlú rí mañu mañúú nindxu̱u̱ rí mu̱ʼni̱ ñajunʼ Dios rá.

⁵ Náa mbá xkri̱da, Jesús niʼni mbríguii ajngáa ndrígóo Reino dí nuʼtáraʼa xóo mbá tsígáʼ dí nda̱ja̱a̱ mañu mañúú náa xa̱bu̱ bi̱ májánʼ a̱jkiu̱ún. Ikhaa niʼthí: “Mú tsígáʼ nakráʼáan ga̱jma̱a̱ ndaʼya, mú ikhaa [bi̱ naʼdu] tséʼyoo xóo egaja̱a̱. Ku̱ba̱ʼ naʼni rí mbaja̱a̱ ikháá: Ginii ndaʼya ixu̱u̱, nda̱wa̱á nakráʼáan iñuu ikhú najti tsígooʼ” (Mar. 4:27, 28). Ndiéjunʼ nindoo gáʼthi xá. Rí mbáa xa̱bu̱ bi̱ nagruigú ajngáa ndrígóo Reino mañúú gáʼga̱ raniniiʼ itháan Dios xó má ejkha̱ ra̱ja̱a̱ mañúú mbá planta. Mbáa xkri̱da rígi̱ nandoo nduʼyáá náa xa̱bu̱ bi̱ nuʼnigajmaa gajmiúlú Biblia índo̱ nagún kanuu náa Jeobá, nduʼyáá xóo egíʼdi̱i̱ eriʼkumijnáa (Efes. 4:22-24). Mú garmáʼáan a̱jkiu̱lú dí Jeobá nindxu̱u̱ bi̱ naʼni maga̱ja̱a̱ tsígáʼ rúʼko̱ (1 Cor. 3:7).

6, 7. Ndiéjunʼ ejmañuluʼ rí xóo Jeobá niʼniriyaʼ Ku̱ba̱ʼ rá.

⁶ Índo̱ rígá mbá dí naʼni Jeobá, naʼngo̱o̱ a̱jkiu̱u̱n nagi̱ʼthu̱u̱n ga̱jma̱a̱ ndajyúuʼ nguáthá má mbiʼi eyóoʼ. Naʼni rúʼko̱ mú magruigú gamajkhu ga̱jma̱a̱ rí eʼwíinʼ makuwá ma̱ja̱nʼ. Guʼyáá mbá xkri̱da, xóo ni̱jkha̱ raʼni mújúunʼ Ku̱ba̱ʼ mu makuwá xa̱bu̱ numbaaʼ.

⁷ Rí muʼthá ga̱jma̱a̱ numuu xóo kaʼnii Jeobá niʼniriyaʼ Ku̱ba̱ʼ, náa Biblia naʼthí; “ndiʼyoo nguáthá ma̱ja̱nʼ gáʼniʼ” xóo “gáwi̱ji̱” ga̱jma̱a̱ “náa phú gági̱ʼi̱” (Job 38:5, 6). Ma̱ngaa niriyaʼ mbiʼi mu mandxaʼwáminaʼ rí niʼniwíi (Gén. 1:10, 12). Lá nandoo nundxaʼwamíjná xú kaʼnii nikumu̱ún ángeles mámbá índo̱ Jeobá niguámbóo niʼniriyá ráʼ. Ra̱ʼkha̱ tháán nikúwá  gagi rí asndu “nindxa̱ʼwa̱ ga̱jma̱a̱ gagi” (Job 38:7). Ndiéjunʼ ejmañuluʼ rá. Rí Jeobá ndijyúuʼ mba̱yu̱u̱ʼ tsiguʼ mu maʼniriyaʼ Ku̱ba̱ʼ, maʼniwíin a̱ʼgua̱a̱n ga̱jma̱a̱ xúgíinʼ bi̱ nduya. Mú, índo̱ niwi̱ji̱ mu mayejxu̱u̱ xúgíʼ rí niʼniwíi, niʼthí dí “xúgíʼ nindxu̱u̱ májánʼ wéñuuʼ” (Gén. 1:31).

8. Ndiéjunʼ gúʼyáá xúgi̱ rá.

⁸ Xó má ndiʼyáá náa xkri̱da dí ninújngoo, náa Biblia kagu̱ mbaʼa wéñuuʼ ikha rí naʼsngúlú rí gíʼdoo numuu maʼngo̱o̱ a̱jkiu̱lú muguaʼthi̱i̱n. Xúgi̱ mbuʼyáá a̱jma̱ dí narígá rí naʼsngúlú rí ndayóoʼ maʼngo̱o̱ a̱jkiu̱lú muguaʼthi̱i̱n rí Jeobá má gáʼnimbánuu.

9. Xú kaʼnii nindxu̱u̱ tikhu náa ndayóoʼ muguaʼthi̱i̱n rí Jeobá má gáʼnimbánuu rá.

⁹ Índo̱ nakumulú rí Jeobá na̱nguá eriʼña̱a̱ mbá nacha̱ rí nuʼtákáñii. Á mu nunda̱ʼa̱a̱ Jeobá rí maxnúlú tsiakii mu maʼngulú muraʼníí mbóoʼ xkujndu o rí mambáyulú mu̱ʼni̱ gajmiúlú mbá rí naʼniulú mingíjyúuʼ muriʼkhumijná, mbáa nakumulú rí ndajyúuʼ wéñuuʼ mu mariʼñulú. Náa numuu rí tsériʼñulú mbá nacha̱ xúgíʼ rí nuʼtákáñii Jeobá rá.

10. Náá numuu rí ndayóoʼ maʼngo̱o̱ a̱jkiu̱lú muguaʼthi̱i̱n índo̱ nuʼtajkháan rá.

¹⁰ Jeobá nagíʼ májánʼ edxu̱u̱ mu maʼdxaun rí nuʼtákáñíí (Sal. 65:2). Ikháá ndaʼyoo rí xúʼko̱ nusngájma fe rí kuaʼdáálú (Heb. 11:6). Ma̱ngaa, nandoo wéñuuʼ mbaʼyoo á mu gajkhun nuʼgími̱jna̱ makuwáánʼlú ga̱jma̱a̱ rí xóo ninda̱ʼa̱a̱ ma̱ngaa rí mu̱ʼni̱ ñajuunʼ (1 Juan 3:22). Ikha jngóo á mu kuwáánʼ ru̱ʼni̱ gajmiúlú mbá dí ra̱májánʼ rí naguʼwunlu nu̱ʼni̱ o mbá rí naʼniulú miʼskhoo muriʼkumijnálu, mbáa ndayóoʼ maʼngo̱o̱ a̱jkiu̱lú muguaʼthi̱i̱n ga̱jma̱a̱ rí muʼgími̱jna̱ mu̱ʼni̱ xó má rí nitajkháan. Jesús niʼni makru̱ʼu̱lú rí Jeobá xáriʼña̱a̱ mbá nacha̱ xúgíʼ rí gúʼtákáñíí, índo̱ niʼthí: “Gúnda̱ʼa̱ má xúʼko̱ mu makhánala, guʼyáʼ má xúʼko̱ mu muxkamaa, gudi̱i̱ má xúʼko̱ xkrugua mu mambaʼtoo. Numuu rí asndu tsáa na̱nda̱ʼa̱ nakhánúu, ga̱jma̱a̱ asndu tsáa bi̱ ndayáʼ naxkamaa ga̱jma̱a̱ asndu tsáa bi̱ naʼdu̱u̱ xkrugua nambaʼtoo” (Mat. 7:7, 8). Á mu nuʼnimbáníí consejo rígi̱ ga̱jma̱a̱ rí muʼtájkáan má xúʼko̱, ma̱ndoo mbuʼyáá gajkhun rí Anu̱lú bi̱ xtáa mekhuíí naʼdxawuun ga̱jma̱a̱ mariʼñulú (Col. 4:2).

11. Xú kaʼnii embáyulú Hebreos 4:16 índo̱ nakumulú rí ndajyúuʼ maxtiʼña̱a̱ rí nuʼtájkáan rá.

¹¹ Mbáa nakumulú rí tséxtiʼña̱a̱ mbá nacha̱ rí nuʼtajkháan, mú Jeobá nakudaminaʼ rí mariʼñulu ‹náa phú mbiʼi› rí kaʼyoo (atraxnuu Hebreos 4:16). * Ikha jngóo nimbá miʼtsú xúndxaʼwamijnalú rí Jeobá raʼkhí eʼni rí na̱nguá eriʼñulú índo̱ ikháánʼ nakumulú dí gíʼmaa mariʼña̱a̱. Mbá xkri̱da, mba̱yu̱u̱ʼ tsiguʼ kúwá runda̱ʼa̱ tikhun rí maxnún mbuyáá xóo kaʼnii gáʼkha̱ Reino ndrígóo mu maʼni gámbáa dí ra̱májánʼ dí rígá náa tsu̱du̱u̱ ku̱ba̱ʼ rígi̱. Jesús asndu niʼthúluʼ rí munda̱ʼa̱ ma̱ʼkha̱ Reino ndrígóo Dios (Mat. 6:10). Mú ra̱ʼkhá tháán misngúndiánʼ gáʼni á mu nuniʼñáʼ raguáʼdáá fe náa Dios numuu rí xóó tséʼkha̱ fin mbiʼi rí ikháánʼ kuaʼti̱i̱nlú (Hab. 2:3; Mat. 24:44). Rí itháan májánʼ rí mu̱ʼni̱ nindxu̱u̱ dí muraʼti̱i̱n má xúʼko̱ asndu índo̱ Jeobá gáʼnimbánuu ma̱ngaa rí muʼtájkáan má xúʼko̱ ga̱jma̱a̱ xúgíʼ a̱jkiu̱lú. Fin ma̱ʼkha̱ náa rí phú mbiʼi dí kaʼyoo, numuu dí Jeobá niraʼwíí má “náá mbiʼi ga̱jma̱a̱ náá hora” gáʼkha̱ ma̱ngaa mani̱ndxu̱u̱ mbóoʼ mbiʼi rí xúgiáanʼ gáʼyulúʼ (Mat. 24:36; 2 Ped. 3:15).

12. Nguáná naʼni mingíjyúuʼ maʼngo̱o̱ a̱jkiu̱lú muguaʼthi̱i̱n rá.

¹² Índo̱ nagumáánʼ mbá dí raʼkhí. Xa̱bu̱ rí mbiʼi xúgi̱, nunigíniin bi̱ ni̱ndxu̱ún mixtiʼkuiin  ki xóo ikhiin dí xóo kaʼniún rí xóo raza ndrígu̱ún, ajngáa rí ethi, náa eguwáʼ ga̱jma̱a̱ náa xuajñún o numuu mbá rí tséjmiin gúni o dí nandoo naʼñún nandii. Mbaʼin wéñuʼ xa̱bi̱i̱ Dios nunigíniin numuu dí nuraʼwíi makuwá xó má rí najmañún náa Biblia. Á mu kuwáánʼ rumíniiʼ ga̱jma̱a̱ numuu mbá rí ndiʼyáá gi̱i̱, garmáʼáan a̱jkiu̱lú ajngáa rígi̱ dí niʼthí Jesús: “I̱ndó bi̱ gáʼngo̱o̱ asndu índo̱ gátumuu mbiʼi, makríyaaʼ” (Mat. 24:13). Mú, á mu nidxaʼwíín rí mbáa bi̱ xtáa náa congregación nikudaminaʼ mbá aʼkhá mbiiʼ rá. Á mu a̱ngiu̱lú bi̱ kuya̱ edxu̱u̱ nidxawíín má, lá maʼngo̱o̱ a̱jkiu̱lú muguaʼthi̱i̱n ga̱jma̱a̱ makumulúʼ kuʼñúún rí munimbánii xkujndu ndrígóo xó má ikha rí na̱ʼkha̱ náa Jeobá rá. Ndiéjunʼ gúni̱ xá.

13. Xú káʼnii eyoo Jeobá rí mambanúu xkujndu índo̱ narígá aʼkhá mbiiʼ rá.

¹³ Índo̱ bi̱ kuya̱ edxu̱u̱ naguánu nduyáá rí mbáa bi̱ xtáa náa congregación nikudaminaʼ mbá aʼkhá mbiiʼ, nunda̱ʼa̱a̱ Jeobá rí maxnúún “ku̱ma̱ rí na̱ʼkha rijma̱a̱” mu mbuyáá mangiin xó má eʼyoo ikhaa xkujndu rúʼko̱ (Sant. 3:17). Ikhiin nandún mumbayíí xa̱bu̱ bi̱ nikudaminaʼ aʼkhá mu “mata̱nga̱a̱ náa kamba̱a̱ raʼkhí dí ejkha̱” á mu nandoo (Sant. 5:19, 20). Ma̱ngaa nandún muni̱ xúgíʼ xó má eʼngo̱o̱ mu muñewu̱u̱n bi̱ kúwá náa congregación ga̱jma̱a̱ muni̱i̱ a̱jkiu̱ún bi̱ niguma gawúúnʼ (2 Cor. 1:3, 4). Índo̱ nunimbánii xkujndu náa narígá aʼkhá dí mbiiʼ, bi̱ kuya̱ edxu̱u̱ ginii gíʼmaa mbuyáá xúgíʼ xóo nirígá. Dí maguma rígi̱ ndajyúuʼ mba̱yu̱u̱ʼ. Nda̱wa̱á, gíʼmaa mutajkáan, muxnáá tsumáá consejo xa̱bu̱ ga̱jma̱a̱ Biblia ga̱jma̱a̱ muxpriguíí “asndu xó má awáán gíʼmaa maʼni” (Jer. 30:11). Gajkhun má, xáʼyóoʼ manújngoo mba̱yu̱u̱ʼ wéñuuʼ rí muthi dí gáʼyóoʼ miʼni, ni má rí maguma mbá nacha̱. Índo̱ bi̱ kuya̱ edxu̱u̱ nunimbánii ikha ndrígóo Jeobá, nambáñún xúgíinʼ bi̱ kúwá náa congregación. Maski ajndu xúʼko̱, mbáa kúwá tikhun bi̱ niguma gawúúnʼ wéñuuʼ. Á mu xúʼko̱ kuwáánʼ, ndiéjunʼ gándoo mu̱ʼni̱ mu xágawúnlú wéñuuʼ rá.

14. Xkáʼnii xkri̱da dí na̱ʼkha̱ náa Biblia gámbáyulú á mu niʼni gawúnlú wéñuuʼ mbáa ndxájulú rá.

¹⁴ Lá nirígá mbá miʼtsú dí mbáa niʼni gawúnlú wéñuuʼ rí asndu ni̱ndxu̱ún a̱ngiu̱lú rá. Á mu xúʼko̱, náa Ajngá rawuunʼ Dios ma̱ndoo muxkamaa xkri̱da rí ma̱ndoo mambáyulúʼ rí muraʼti̱i̱n dí Jeobá má gáʼnimbánuu xkujndu. Mbá xkri̱da, José takasngáñuunʼ ga̱jma̱a̱ numuu xúgíʼ dí raʼkhí nini̱i̱ a̱ngui̱i̱n. Ikhaa  niʼni ñajuunʼ má xúʼko̱ Jeobá ga̱jma̱a̱ ikhaa má niʼni tsajkurámaaʼ numuu rí niʼngo̱o̱ a̱jkiu̱u̱n ga̱jma̱a̱ rí tákanájkooʼ (Gén. 39:21). Nda̱wa̱á José niʼni mba̱a̱ a̱jkiu̱u̱n kaʼñúún a̱ngui̱i̱n ga̱jma̱a̱ ndiʼyoo xú káʼnii Jeobá niʼni tsajkurámaaʼ (Gén. 45:5). Xó má José, ikháánʼ ma̱ngaa naʼni̱i̱ a̱jkiu̱lú índo̱ na̱jkua̱ kanuu náa Jeobá ga̱jma̱a̱ nuniʼñááʼ rí ikhaa má gáʼni rí jmbu (Sal. 7:17; 73:28).

15. Ndiéjunʼ nimbáyúu mbáa ndxájulú maʼngo̱o̱ a̱jkiu̱u̱n índo̱ nithi dí raʼkhí ga̱jma̱a̱ numuu rá.

¹⁵ Gajkhun má dí mbáa xúguaʼnii dí raʼkhí wéñuʼ xóo nigíʼnuu José, mú xúgiáánʼ nagawúnlú índo̱ nuniulúʼ dí raʼkhí. Asndu xkáʼnii má, á mu kuaʼdáá xkujndu gajmiúlú mbáa, maski ajndu na̱nguá nindxu̱u̱ xa̱bi̱i̱ Jehová, mambáyulúʼ wéñuuʼ muʼnimbáníí ikha dí na̱ʼkha̱ náa Biblia (Filip. 2:3, 4). Guʼyáá rí niʼni mbáa ndxájulú a̱ʼgu̱ índo̱ ndiʼyoo rí mbáa a̱ʼgu̱ bi̱ nañajunʼ ga̱jma̱a̱ niʼthí dí raʼkhí ga̱jma̱a̱ numuu ikhaa dí ragájkhun. Maski ajndu nigawúunʼ wéñuuʼ, mú niʼngo̱o̱ a̱jkiu̱u̱n tákiʼnáa, ikhaa nindxa̱ʼwáminaʼ náa xkri̱da ndrígóo Jesús. Índo̱ nitháán dí raʼkhí, ikhaa na̱nguá nitanga̱a̱ maʼthúún dí raʼkhí (1 Ped. 2:21, 23). Ikha jngó ndxájulú tayáʼ maʼni xkujndu dí nirígá. Nda̱wa̱á ni̱jkha̱nú ndiʼyoo dí a̱ʼgu̱ bi̱ niñajunʼ ga̱jma̱a̱ gíʼdoo mbá nandii mbiiʼ. Ikhú ndxájulú a̱ʼgu̱ ni̱jkha̱nú ndiʼyoo rí mbáa táʼni kiejuunʼ. Ikha jngóo nánguá má nixmiéjuunʼ ga̱jma̱a̱ nidxuu wéñuʼ numuu rí niʼngo̱o̱ a̱jkiu̱u̱n índo̱ nini̱i̱ dí raʼkhí.

16. Ndiéjunʼ gámbáyuluʼ maʼni̱i̱ a̱jkiu̱lú á mu kuwáánʼ raʼngulú mbá dí raʼkhí niniulú xá. (1 Pedro 3:12.)

¹⁶ Á mu kuwáánʼ raʼngulú mbá dí raʼkhí niniulú o i̱mba̱ xkujndu dí naʼni magawúnlú, garmáʼáan a̱jkiu̱lú rí “Jeobá xtáa mijngii náa xa̱bu̱ bi̱ nagawúunʼ a̱jkiu̱ún” (Sal. 34:18). Ikhaa nandoo kaʼyulú numuu rí naʼngo̱o̱ a̱jkiu̱lú ga̱jma̱a̱ rí nuʼtháán xúgíʼ dí naʼni maxmiéjunlú (Sal. 55:22). Ikhaa nindxu̱u̱ bi̱ Kaʼyoo maʼthí ndiéjunʼ gaguáʼníí bi̱ nuni̱ dí raʼkhí ga̱jma̱a̱ ikhaa ndaʼyoo xúgíʼ dí narígá (atraxnuu 1 Pedro 3:12). * Ikha jngóo, á mu kuaʼdáá mbá xkujndu rí tséʼngulú gúʼnimbáníí, garmáʼáan a̱jkiu̱lú dí gíʼmaa muraʼti̱i̱n dí Jeobá má gáʼnimbánuu.

17. Ndiéjunʼ ekudaminaʼ maʼni Jeobá náa Isaías 30:18 rá.

¹⁷ Inu má rí Anu̱lú bi̱ xtáa mekhuíí maʼni tsajkurámáanʼ wéñuuʼ índo̱ gáʼtañajunʼ Xa̱bu̱ ñajunʼ ndrígóo. Isaías 30:18 naʼthí: “Ikha jngó Jeobá maxtáa xawii mu mambáyala, ga̱jma̱a̱ matuxu̱u̱ mu magaʼwíínʼ a̱jkiu̱u̱n kaʼyála. Numuu rí Jeobá nindxu̱u̱ mbáa Dios bi̱ jmbii. Gagi kúwi̱i̱n bi̱ naguáʼthi̱i̱n náa ikhaa”. Bi̱ naguáʼthi̱i̱n rí Jeobá má gáʼnimbánuu, maguma tsajkurámiinʼ wéñuuʼ xúgi̱ ga̱jma̱a̱ nda̱wa̱á náa numbaaʼ nuxi̱ʼ.

18. Ndiéjunʼ rí naguáʼthi̱i̱n xúgiáánʼ rá.

¹⁸ Náa numbaaʼ nuxi̱ʼ, xa̱bi̱i̱ Dios nditháan xúraʼníí nimbá xkujndu ni má xáxmiéjunlú xóo rí mbiʼi xúgi̱. Ni xárígá dí raʼkhí ni má ga̱ʼkhu̱ (Apoc. 21:4). Ni má xáxmiéjunlú mbuʼyáʼ rí ndayóoʼ mámbá mbiʼi numuu dí marigá xúgíʼ dí gáʼyulúʼ (Sal. 72:16; Is. 54:13). ¡Ra̱ʼkhá tháán nagui̱i̱ gáʼni!.

19. Ndíjkha rí Jeobá naʼni ratánʼlú mañu mañúú rá.

¹⁹ Rí xúgi̱ Jeobá naʼni ratánʼlú mañu mañúú mu makuwáánʼ náa maʼtáñajunʼ ikhaa, índo̱ nambáyulúʼ mu̱ʼni̱ gaʼduunʼ dí ra̱májánʼ ga̱jma̱a̱ rí manindxu̱lú májáanʼ xa̱bu̱. Xákaguabáanʼlú ga̱jma̱a̱ xákanájkulú, numuu rí gíʼ mijngii marigá dí itháan májánʼ. Kuáʼti̱i̱n marigá dí májánʼ wéñuuʼ nda̱wa̱á, ikha jngó gaʼngo̱o̱ a̱jkiu̱lú muguaʼthi̱i̱n asndu índo̱ Jeobá gáʼnimbánuu xúgíʼ rí nikudaminaʼ maʼni.