1-2. Kakɔna kayotɔsɛdingola lo sawo nɛ?

NGANDE watoyoyaokaka naka otshumu wele l’ɛngɔ kɛmɔtshi keyɛ mɛtɛ l’ohomba watakome etena kawolongamɛyɛ? Onde wɛ ayɔkɔmɔ? Ondo wɛ toyaokaka oko watamadiɔ lo Tokedi 13:12 ɔnɛ: “Elongamelo kahatakotshama mbishaka paa l’asolo.” Ko kayotota naka wɛ ambeya ɔnɛ l’ɔtɛ w’ɛkɔkɔ w’amɛna mbele otshumu watakome l’etena kawolongamɛyɛ? L’etena kɛsɔ, ondo wɛ ayonga la solo dia lotutsha ndo ayetawɔ nkonga.

² Lo sawo nɛ, tayɔsɛdingola atɔndɔ amɔtshi wa lo Bible wakoka tokimanyiya dia monga ndo nama ‘mbekelo ka nkonga.’ (Mika 7:7) Oma laasɔ, tayɔsɛdingola awui ahende wele sho pombaka nkonga la solo dia lotutsha dia Jehowa nsala dui dimɔtshi. L’ekomelo, tayɔsɛdingola ɛtshɔkɔ walamɛwɔ wanɛ wetawɔ kongɛɛ le Jehowa.

3. Tɔndɔ diele lo Tokedi 13:11 tɔtɔmiyaka dui diakɔna?

³ Ɛnyɛlɔ kɛmɔtshi kɛnya ohomba wa monga la solo dia lotutsha tanemaka lo Tokedi 13:11. Diɔ mbutaka ɔnɛ: “Ɔngɔnyi wakondjama esadi esadi wayokitakita, koko ɔngɔnyi w’onto layanga yema yema wayodɛ.” Wetshelo akɔna wakondjaso oma lo divɛsa nɛ? Onto lele la lomba salaka akambo l’ɔkɔmi ndo la solo dia lotutsha ndo nde kondjaka etombelo woleki amɛna.

4. Tɔndɔ diele lo Tokedi 4:18 tɔtɔmiyaka dui diakɔna?

⁴ Tokedi 4:18 totɛka ɔnɛ “mboka k’anto w’ɛlɔlɔ kekɔ oko osase wa pindju wataleke ntetemala ngamɔ polo la yanyi ya tɛɛ.” Ɛtɛkɛta ɛsɔ mɛnyaka dia Jehowa kimanyiyaka ekambi ande dia tashihodiaka sangwelo diande yema yema. Koko, divɛsa  nɛ kokaka kambema nto lo yoho yasala Okristo ehamelo wa lo nyuma lo lɔsɛnɔ lande. Ehamelo wa lo nyuma hawokoke salema lowangolowango. Vɔ mbɔsaka etena. Naka sho mbeka la yambalo ndo nkamba l’alako walongolaso oma l’Ɔtɛkɛta wa Nzambi ndo oma le okongamelo ande, kete tayotakɛnɛmɔlaka yema yema lonto l’Okristo. Ndo nto, ewo kaso kendana l’awui wa Nzambi kayohama. Tɔsɛdingole ɛnyɛlɔ kakasha Yeso lo dikambo sɔ.

5. Ɛnyɛlɔ kakɔna kakakambe la Yeso kɛnya dia ohamelo salemaka yema yema?

⁵ Yeso akakambe l’ɛnyɛlɔ kɛmɔtshi dia nembetshiya woho wele losango la Diolelo lasambishaso lekɔ oko lɔtɔngɔ la tshitshɛ lahama yema yema l’etema w’anto w’ɛlɔlɔ. Nde akate ate: “Ntɔngɔ totombaka ndo tolaka woho wahandeye [onto lonɛ ntɔngɔ]. Nkɛtɛ yɔamɛ totondjaka etombatomba yema yema, ntondotondo lɔnɔngɔ, oma laasɔ ko lɔlɛngɛsɛ ndo l’ekomelo disha dioludi la nsɛkɛ.” (Makɔ 4:27, 28) Kakɔna kakalange Yeso mbuta? Nde akalembetshiya ɔnɛ oko watolaka eononɛ yema yema, mbele onto letawɔ losango la Diolelo pamaka lo nyuma yema yema. Ɛnyɛlɔ, etena katayasukanya ambeki wa Bible la Jehowa, sho tatɛka mɛna etshikitanu efula w’amɛna wasalawɔ. (Ɛf. 4:22-24) Koko sho pombaka mbohɔ ɔnɛ Jehowa mboodia lɔtɔngɔ la tshitshɛ lɔsɔ.​—1 Kɔr. 3:7.

6-7. Wetshelo akɔna wakondjaso oma lo woho wakatonge Jehowa nkɛtɛ?

⁶ Lo kɛnɛ tshɛ kasalande, la solo dia lotutsha tshɛ Jehowa mbɔsaka etena kahombama dia nshidiya olimu ande. Nde salaka dui sɔ dia ntombola lokombo lande ndo lo wahɔ w’anto akina. Ɛnyɛlɔ, tɔsɛdingole woho wakatalɔngɔsɔlaka Jehowa nkɛtɛ lo dikambo di’anto yema yema.

⁷ Dia nembetshiya woho wakatonge Jehowa nkɛtɛ, Bible mbitaka ɔnɛ nde “akashikikɛ tɛdikɔ tatɔ,” ‘akakitsha dikitshelo diatɔ’ ndo “akakitsha dive diatɔ dia tshuku.” (Jɔbɔ 38:5, 6) Nde akɔshi ndo etena ka nsɛdingola olimu ande. (Eta. 1:10, 12) Onde wɛ koka  nkanyiya woho wakayaoke andjelo etena kakawɛnyi woho wakatoongaka diangɔ diakatonge Jehowa elangala yema yema? Ndooko onyake vɔ wakangɛnangɛna efula! Diakɔ diele, l’etena kɛmɔtshi vɔ wakatatɛ “mbida tosalemba la ɔlɔ w’efula.” (Jɔbɔ 38:7) Wetshelo akɔna wakondjaso? Elimu w’etongelo wa Jehowa wakɔshi nunu di’ɛnɔnyi dia vɔ ndjoshila, koko etena kakende Jehowa diangɔ tshɛ diakandatonge l’ɔkɔmi tshɛ, nde akate dia “diɔ diekɔ amɛna efula.”​—Eta. 1:31.

8. Kakɔna kayangaso nsɛdingola kakianɛ?

⁸ Oko wakatadiɛnyi lo bɛnyɛlɔ dia la diko, sho koka ntana atɔndɔ efula oma l’Ɔtɛkɛta wa Nzambi watɔtɔmiya ohomba wa monga la solo dia lotutsha. Kakianɛ tayanga nsɛdingola awui ahende shikaa wahombaso mbetawɔ kongɛɛ le Jehowa.

9. Lo dui diakɔna diele ayonga ohomba dia sho kongɛɛ le Jehowa?

⁹ Mbeyaka monga ohomba dia sho kongɛɛ di’alɔmbɛlɔ aso kadimɔma. Etena kalɔmbaso dia nkondja wolo wa ndɔshana l’ohemba ɔmɔtshi kana dia tokimanyiya dia ntondoya wɔdu ɔmɔtshi, sho koka mfɔnya dia Jehowa ambɔsa etena kotale dia nkadimola alɔmbɛlɔ aso. Lande na kele aha alɔmbɛlɔ aso tshɛ mbakadimola Jehowa ko wonya akɔ?

10. Lo kɛnɛ kendana l’alɔmbɛlɔ aso, lande na kele solo dia lotutsha diekɔ ohomba?

¹⁰ Jehowa pokamɛka alɔmbɛlɔ aso la yambalo y’efula. (Os. 65:2) Nde mbɔsaka alɔmbɛlɔ aso wa l’otema ɔtɔi oko djembetelo ya mbetawɔ kaso. (Hɛb. 11:6) Jehowa mbidjaka nto yimba lo woho wɛnande tayashikikɛ dia nsɛna lo yoho yɔtɔnɛ l’alɔmbɛlɔ aso ndo dia nsala lolango lande. (1 Jni. 3:22) Diakɔ diele, ayonga ohomba dia sho monga la solo dia lotutsha ndo nsala akambo lo yoho yɔtɔnɛ l’alɔmbɛlɔ aso etena tshɛ kasalaso la wolo dia minya mbekelo kɛmɔtshi kana wɔdu ɔmɔtshi. Yeso akɛnya dia koka monga ko alɔmbɛlɔ aso amɔtshi hawotokadimɔma mbala kakɔ ɔtɔi. Nde akate ate: “Nyotetemale nɔmba, ko wayonyosha; nyotetemale nyanga, ko nyayotana; ndo nyotetemale nkɔkɔla, ko wayonyodihola. Nɛ dia onto tshɛ lalɔmba ayolongola; onto tshɛ layanga ayotana ndo onto tshɛ lakɔkɔla wayowodihola.” (Mat. 7:7, 8) Etena kayelaso dako sɔ ndo ‘katetemalaso nɔmba,’ sho koka monga l’eshikikelo ɔnɛ Shɛso lele l’olongo ekɔ lo tohokamɛ ndo ayokadimola alɔmbɛlɔ aso.​—Kɔl. 4:2.

11. Ngande watokimanyiya Hɛbɛru 4:16 etena kɛnaso oko okadimwelo lo dɔmbɛlɔ dimɔtshi wambotshimbatshimba?

¹¹ Kaanga mbakoka okadimwelo lo dɔmbɛlɔ dimɔtshi mɛnama oko wambotshimbatshimba, Jehowa tolakaka dia nde ayokadimola dɔmbɛlɔ diaso “lo etena kahombama.” (Adia Hɛbɛru 4:16.) Diakɔ diele, hatohombe pondjo momalɛ Nzambi naka dui dimɔtshi hadiosalemi esadi esadi oko wafɔnyaso wotodiosalema. Ɛnyɛlɔ, anto efula wambɔlɔmba l’edja k’ɛnɔnyi efula dia Diolelo dia Nzambi komiya dikongɛ nɛ di’akambo. Ndo Yeso akate dia sho pombaka nɔmba lo dikambo sɔ. (Mat. 6:10) Koko ayonga dui di’enginya di’onto ɔmɔtshi mbetawɔ dia mbetawɔ kande le Nzambi mbɔla l’ɔtɛ w’ɔnɛ ekomelo haye etena kalongamɛ anto! (Hab. 2:3; Mat. 24:44) Tayonga akanga wa tomba naka sho ntetemala kongɛɛ le Jehowa ndo mbɔlɔmbaka la mbetawɔ. Ekomelo kayoya paka etena kahombama, nɛ dia Jehowa amboshilaka nsɔna ‘lushi la wonya’ wahombatɔ ndja. Ndo ɔsɔ mbayonga etena koleki dimɛna le anto tshɛ.​—Mat. 24:36; 2 Pe. 3:15.

12. Lo dui diakɔna diakoka lo yoho ya laande solo diaso dia lotutsha mbɔtɔ l’ohemba?

 ¹² Sho mbeyaka monga l’ohomba wa solo dia lotutsha etena kakongaso dia losembwe salema. L’andja ɔnɛ, mbala efula anto salɛka wanɛ wele bu apami kana wamato oko vɔ, anto wotshikitanyi la wɔ lokoho la demba, dioho, mbekelo kana wodja akambo lo yoho ya kɔlɔ. Anto amɔtshi salɛka anto akina akambo wa kɔlɔ l’ɔtɛ wewɔ l’ɛkɔmɔ lo demba kana l’ɔtɛ wewɔ la paa ka l’ɔtɛ. Ekambi wa Jehowa efula wekɔ lo mbikikɛ awui wele bu la losembwe l’ɔtɛ wa dietawɔ diawɔ diohikami lo Bible. Naka wambotosalɛ awui wa kɔlɔ lo yoho shɔ, kete sho pombaka ntetemala nama ɛtɛkɛta wa Yeso ɛnɛ lo yimba. Nde akate ate: “Onto layokikɛ polo l’ekomelo mbayoshimbamɛ.” (Mat. 24:13) Ko, ahombayɛ nsala naka wɛ ambeya di’ose etshumanelo ɔmɔtshi ambosala pɛkato ka woke? Naka dikumanyi wambeya dui sɔ, onde wɛ ayotshika dui diakɔ l’anya awɔ ndo kongɛɛ la solo dia lotutsha tshɛ ɔnɛ vɔ wayokandola dui sɔ lo yoho yalanga Jehowa? Kakɔna kakoka dikumanyi nsala naka onto ɔmɔtshi ambosala pɛkato ka woke?

13. Kakɔna kalɔmbama dia nkandola akambo lo yoho yalanga Jehowa?

¹³ Naka dikumanyi wambeya di’ose etshumanelo ɔmɔtshi akasale pɛkato ka woke, vɔ nyangaka “lomba l’oma la diko” lo dɔmbɛlɔ dia vɔ nkondja kanyi ya Jehowa lo dikambo sɔ. (Jak. 3:17) Oyango awɔ ele wa nkimanyiya ɔnɛ lakasale pɛkato dia nde nkalola “oma lo mboka kande ka kɔlɔ” naka kokaka. (Jak. 5:19, 20) Vɔ nangaka nto nsala dui tshɛ diakokawɔ nsala dia nkokɛ etshumanelo ndo nkeketsha wanɛ wakawasalɛ kɔlɔ. (2 Kɔr. 1:3, 4) Etena kakandolawɔ awui wendana la pɛkato ya weke, dikumanyi pombaka ntondotondo mbeya kiambokambo tshɛ, ndo dui sɔ koka mbɔsa etena kɛmɔtshi. Oma laasɔ, vɔ wayɔlɔmba ndo wayosha alako w’oma l’Afundelo l’ɔkɔmi tshɛ ndo wayongola onto “lo yɛdikɔ yakoka.” (Jɛr. 30:11) Kaanga mbahawahombe ntshindjatshindja akambo, dikumanyi hawosasɛ dia mbɔsa yɛdikɔ. Naka akambo kandɔma lo yoho ya dimɛna, kete ase etshumanelo tshɛ wayokondja wahɔ. Koko, oyadi akambo salema lo yoho shɔ, onto lakawasalɛ kɔlɔ koka ntetemala monga la paa. Naka ngasɔ mbediɔ le yɛ, akokayɛ nsala dia nkitshakitsha paa kayɛ?

14. Ɛnyɛlɔ kakɔna ka lo Bible kakoka kokimanyiya naka Okristo ɔmɔtshi akakosalɛ akambo lo yoho ya kɔlɔ?

 ¹⁴ Onde onto ɔmɔtshi kana osekayɛ ɔtɛmɔdi atakosalɛka akambo lo yoho ya kɔlɔ? Wɛ koka ntana bɛnyɛlɔ di’amɛna efula l’Ɔtɛkɛta wa Nzambi diatetsha woho wakokaso kongɛɛ dia Jehowa nkandola akambo lo yoho ya dimɛna. Ɛnyɛlɔ, kaanga mbele anango Yɔsɛfu wakoosalɛ akambo aha la losembwe, nde kombetawɔ pɛkato yawɔ mbokonya dia monga ɛkɛlɛkɛlɛ keto l’ɔtɛ wa dui sɔ. Koko, nde akatetemala ndjasha l’olimu wa Jehowa, ɔnɛ lakayowɔtshɔkɔla efula l’ɔtɛ wa solo diande dia lotutsha di’efula. (Eta. 39:21) L’edjedja ka wonya, Yɔsɛfu akayonga l’akoka wa dimanyiya wanɛ wakoosalɛ kɔlɔ ndo Jehowa akɔtshɔkɔla. (Eta. 45:5) L’ɛnyɛlɔ ka Yɔsɛfu, sho keketshamaka etena kayasukanyaso la Jehowa ndo katshikaso dia nde nsala akambo la losembwe.​—Os. 7:17; 73:28.

15. Kakɔna kakakimanyiya kadiyɛso kɛmɔtshi dia nde minya yimba oma l’awui wele bu la losembwe wakawosalɛ?

¹⁵ Lo mɛtɛ, aha awui tshɛ wele bu la losembwe mbele weke oko wakakomɛ Yɔsɛfu, koko naka wambotosalɛ awui wa kɔlɔ lo yoho mɔtshi, kete dui sɔ koka ntetemala tosha paa l’asolo. Etena keso l’okakatanu l’onto ɔmɔtshi, kaanga l’onto lahatɛmɔla Jehowa, tayokondja wahɔ naka sho nkamba l’atɔndɔ wa lo Bible. (Flpɛ. 2:3, 4) Tɔsɛdingola ɛnyɛlɔ kɛmɔtshi. Kadiyɛso kɛmɔtshi akanyange efula etena kakandashola di’osekande ɔmɔtshi la l’olimu akatɛka anto awui wa kɔlɔ ndo wa kashi lo dikambo diande. Lo dihole dia nde nsala akambo l’esasesase, kadiyɛso akɔshi etena ka nkana yimba la ɛnyɛlɔ ka Yeso. Etena kakawɔtɛngaka, nde kombatɛngaka. (1 Pe. 2:21, 23) La dui sɔ lo yimba, kadiyɛso akɔshi yɛdikɔ ya minya yimba lo dui sɔ. L’ɔkɔngɔ diko, kadiyɛso akayeya di’osekande la l’olimu akadiɛnɛka l’okakatanu ɔmɔtshi wa wolo wendana la yoonge ndo dui sɔ diakokiyanyaka. Kadiyɛso mbutaka ate ondo osekami la l’olimu koshihodiaka kɛnɛ kakandataka. Diakɔ diele, kadiyɛso kɛsɔ aki l’ɔngɛnɔngɛnɔ lo yoho ya laande l’ɔtɛ wakandakikɛ la solo dia lotutsha awui wa kɔlɔ ndo nde aki la wɔladi.

16. Kakɔna kakoka kokeketsha naka wɛ ekɔ lo mbikikɛ dui dimɔtshi diele bu la losembwe? (1 Petero 3:12)

¹⁶ Naka wɛ ekɔ lo mbikikɛ dui dimɔtshi diele bu la losembwe kana dui dikina diakonyangiya,  kete ohɔ dia Jehowa “ekɔ suke la wanɛ wele l’etema wambatɛ.” (Os. 34:18) Nde kookaka ngandji l’ɔtɛ weyɛ la solo dia lotutsha ndo l’ɔtɛ wakitshayɛ wotsho ayɛ le nde. (Os. 55:22) Nde ekɔ Shushi ya nkɛtɛ k’otondo. Ndooko dui diahandeye. (Adia 1 Petero 3:12.) Naka wɛ ekɔ lo diɛnɛ l’ekakatanu wa wolo wahayakoke nkandola, onde wɛ mbetawɔka kongɛɛ le nde?

17. Oko wofundamidiɔ lo Isaya 30:18, eshikikelo kakɔna katosha Jehowa?

¹⁷ Keema edja, Shɛso lele l’olongo ayanga tɔtshɔkɔla efula lo tshimbo ya Diolelo diande. Isaya 30:18 mbutaka ɔnɛ: “Jehowa ekɔ lo nkonga la solo dia lotutsha dia nyosalɛ ɔlɔlɔ, ndo nde ayemala dia nyoka kɛtshi. Nɛ dia Jehowa ekɔ Nzambi ka losembwe. Ɔngɛnɔngɛnɔ le wanɛ tshɛ watetemala nongamɛ le nde.” Wanɛ watetemala nongamɛ le Jehowa wayokondja ɛtshɔkɔ efula nshi nyɛ ndo l’andja w’oyoyo wayaye.

18. Ɛtshɔkɔ akɔna watokongɛɛ?

¹⁸ Etena kayɔtɔ ekambi wa Nzambi l’andja w’oyoyo, vɔ hawotokikɛ nto pondjo ekiyanu ndo ekakatanu wahomana la wɔ nshi nyɛ. Awui wele bu la losembwe wayoshila ndo paa hatoyala nto. (Ɛny. 21:4) Hatotokongɛɛ nto tele l’ekiyanu kɛnɛ keso l’ohomba nɛ dia diangɔ diayoyala tshavutshavu. (Os. 72:16; Isa. 54:13) Ɔsɔ mɛtɛ ayonga dui dia diambo!

19. Kakɔna katatɔlɔngɔsɔla Jehowa yema yema l’etena kɛnɛ?

¹⁹ Jehowa ekɔ lo tɔlɔngɔsɔla kakianɛ dia tɔsɛna l’ɛlɔmbwɛlɔ kande lo tokimanyiya dia ndɔshana la mbekelo ya kɔlɔ ndo nkɛnɛmɔla waonga w’ɔngɛnyangɛnya. Tɔkɔmɔke ndo tohekoke. Awui woleki amɛna efula wekɔ lo tokongɛɛ! Lam’ele nshi yayaye y’amɛna efula yekɔ lo tokongɛɛ, nyɛsɔ totetemale mbetawɔ kongɛɛ Jehowa la solo dia lotutsha dia nde nshidiya olimu ande!