1-2. Ko e hā te tau lāulea ki ai ʻi he kupu ko ení?

ʻOKÚ KE ongoʻi fēfē ʻi he ʻikai ke aʻu mai ʻi he taimi naʻá ke ʻamanekiná ha fakamoimoi ʻoku ʻomi ai ha meʻa ʻokú ke fuʻu fiemaʻu? ʻOkú ke loto-mamahi? ʻI he Palōveepi 13:12 ʻoku fakahaaʻi mahino ai: “Ko e ʻamanaki ʻoku tuai ʻene hokó ʻokú ne ʻai ke tutue ʻa e lotó.” Kae fēfē kapau ʻokú ke ʻiloʻi ʻoku ʻi ai ha ʻuhinga lelei ki he tuai ʻa e aʻu mai ʻa e fakamoimoí? ʻI he tuʻunga ko iá, ʻoku ngalingali te ke kātaki pea loto-lelei ke tatali.

² ʻI he kupu ko ení, te tau vakai ai ki he ngaahi tefitoʻi moʻoni Fakatohitapu ʻe lava ke ne tokoniʻi kitautolu ke fakatupulekina pea tauhi maʻu “ha fakakaukau faʻa tatali.” (Mai. 7:7) Te tau sivisiviʻi leva ha tafaʻaki ʻe ua ʻa ia kuo pau ke tau tatali anga-kātaki ai kia Sihova ke ngāue mai. Fakaʻosí, te tau lāulea ki he ngaahi tāpuaki ʻoku tuku tauhi mai ki he faʻahinga ʻoku nau loto-lelei ke tatali kia Sihová.

3. Ko e hā ʻoku fakamamafaʻi ʻe he tefitoʻi moʻoni ʻoku hiki ʻi he Palōveepi 13:11?

³ Ko ha fakatātā ʻokú ne akoʻi mai ʻa e fiemaʻu ke kātakí ʻoku hiki ʻi he Palōveepi 13:11. ʻOku pehē ai: “Ko e koloa ʻoku maʻu vavé ʻe fakaʻau pē ke holo hifo, ka ko e koloa ʻa e tokotaha ʻokú ne tātānakí ʻe tupulaki.” ʻOkú ke vakai ki he tefitoʻi moʻoní? ʻOku fakapotopoto ke fai ʻa e ngaahi meʻá ʻi he kātaki, ʻo fai taha taha pē.

4. Ko e hā ʻoku fakamamafaʻi ʻe he tefitoʻi moʻoni ʻi he Palōveepi 4:18?

⁴ ʻOku tala mai ʻi he Palōveepi 4:18 ko e “hala ʻo e kau māʻoniʻoní ʻoku hangē ia ko e maama ʻi he pongipongí ʻa ia ʻoku fakaʻaʻau ke toe maama ange kae ʻoua kuo hoʻatā mālie.” Ko e ngaahi lea ko ení ʻoku feʻungamālie hono ngāueʻaki ki he founga hono fakaeʻa  māmālie mai ʻe Sihova ʻene taumuʻá ki heʻene kakaí. Kae kehe, ʻoku lava ke toe ngāueʻaki ʻi ha founga lahi ange ʻa e vēsí ki he fakalakalaka fakalaumālie ʻoku fai ʻe ha Kalisitiane ʻi heʻene moʻuí. Ko e tupu fakalaumālié ʻoku ʻikai lava ke fakavaveʻi. ʻOku fiemaʻu ki ai ʻa e taimi. Kapau ʻoku tau ako fakamākukanga pea ngāueʻaki ʻa e faleʻi ʻoku tau maʻu fakafou ʻi he Folofola ʻa e ʻOtuá mo ʻene kautahá, te tau fakatupulekina māmālie ai ha angaʻitangata hangē ko Kalaisí. ʻE toe tupulekina ai ʻetau ʻiloʻi ʻa e ʻOtuá. Fakakaukau ki he anga hono fakatātaaʻi ʻe Sīsū ʻa e poini ko iá.

5. Naʻe anga-fēfē hono fakatātaaʻi ʻe Sīsū ʻa e tupu māmālie fakalaumālié?

⁵ Naʻe ngāueʻaki ʻe Sīsū ha talanoa fakatātā ke fakamatalaʻi ʻa e hangē ʻa e pōpoaki ʻo e Puleʻangá ʻoku tau malangaʻí ko ha kiʻi tengaʻiʻakau ʻoku tupu māmālie ʻi he loto ʻo e faʻahinga loto-totonú. Naʻá ne pehē: “ʻOku tupu ʻa e tengá ʻo ʻalu hake ʻo fuʻu lahi​—ka ʻoku ʻikai haʻane [ko e tokotaha tūtūʻí] teitei ʻiloʻi pe naʻe anga-fēfē. ʻOku fakafua māmālie mai ia ʻe he kelekelé ʻiate ia pē, ʻo kamataʻaki ʻa e vaʻa, pea hoko ai ʻa e fisí, pea fua mai leva ko e foʻi uite.” (Mk. 4:27, 28) Ko e hā naʻe ʻuhinga ki ai ʻa Sīsuú? Naʻá ne fakamatalaʻi ʻi he hangē pē ko e tupu māmālie ha fuʻu ʻakau, ʻoku pehē pē mo e tupu māmālie fakalaumālie ha tokotaha ʻokú ne tali ʻa e pōpoaki ʻo e Puleʻangá. Ko e fakatātaá, ʻi he taimi ʻoku ʻunuʻunu ofi ange ai ʻetau kau ako Tohi Tapu loto-moʻoní kia Sihová, ʻoku kamata ke tau sio ki he ngaahi liliu lelei kuo nau fakahokó. (ʻEf. 4:22-24) Ka kuo pau ke tau manatuʻi ko Sihova ʻokú ne ʻai ʻa e kiʻi tengaʻi ʻakaú ke tupú.​—1 Kol. 3:7.

6-7. Ko e hā ʻoku tau ako mei he founga hono fakatupu ʻe Sihova ʻa e māmaní?

⁶ ʻI he meʻa kotoa ʻoku fai ʻe Sihová, neongo pe ko e hā ʻa e fuoloa ʻo e taimi ʻoku fiemaʻu ke ne fakakakato ai ʻene ngāué, ʻokú ne kātaki pē. ʻOkú ne fai ia koeʻuhi ko e lāngilangi hono huafá pea ke maʻu ʻaonga mei ai ʻa e niʻihi kehé. Ko e fakatātaá, fakakaukau ki he founga hono teuʻi māmālie ʻe Sihova ʻa e māmaní maʻá e faʻahinga ʻo e tangatá.

⁷ ʻI hono fakamatalaʻi ʻa e founga hono fakatupu ʻe Sihova ʻa e māmaní, ʻoku lave ʻa e  Tohi Tapú ki heʻene fokotuʻu “ʻa hono ngaahi fuá,” ʻohifo “ʻa hono ngaahi poú,” pea fakatoka “ʻa hono maka-tulikí.” (Siope 38:5, 6) Naʻe aʻu ʻo ne vaheʻi mo e taimi ke fakakaukau ki heʻene ngāué. (Sēn. 1:10, 12) ʻE lava ke ke sioloto atu ki he anga ʻo e ongoʻi ʻa e kau ʻāngeló ʻi heʻenau vakai ki he hā māmālie mai ʻa e ngaahi ngāue fakaefakatupu ʻa Sihová? Kuo pau pē naʻa nau fiefia lahi! Koeʻuhi ko e meʻá ni, naʻe kamata ke nau “kaila fakahīkihiki.” (Siope 38:7) Ko e hā ʻoku tau ako mei aí? Ko e ngaahi ngāue fakaefakatupu ʻa Sihová naʻe feʻunga mo e ngaahi laui afeʻi taʻu, ka ʻi he taimi naʻe ʻafio ai ʻa Sihova ki he meʻa kotoa naʻá ne fakatupu fakaleleí, naʻá ne folofola “kuo lelei ʻaupito.”​—Sēn. 1:31.

8. Ko e hā te tau lāulea ki ai ʻi he taimi ní?

⁸ Hangē ko ia kuo tau vakai ki ai ʻi he ngaahi fakatātā ʻi ʻolungá, ʻoku lava ke tau maʻu ʻa e ngaahi tefitoʻi moʻoni lahi ʻi he Folofola ʻa e ʻOtuá ʻoku fakamamafaʻi ai ʻa e fiemaʻu ke kātakí. Te tau vakai ʻi he taimí ni ki ha tafaʻaki pau ʻe ua kuo pau ke tau loto-lelei ai ke tatali kia Sihova.

9. Ko e hā ʻa e tafaʻaki ʻe taha ʻoku fiemaʻu ke tau tatali ai kia Sihová?

⁹ ʻE fiemaʻu nai ke tau tatali ke tali ʻetau ngaahi lotú. ʻI he taimi ʻoku tau lotu ai ki ha mālohi ke fekuki ai mo ha ʻahiʻahi pe ke ikuʻi ha vaivaiʻanga, te tau ongoʻi nai ko e fakafiemālie ʻoku tau kumi ki aí ʻoku tuai ʻene hoko maí. Ko e hā ʻoku ʻikai ke tali vave mai ai ʻe Sihova ʻa e kotoa ʻetau ngaahi lotú?

10. Ko e hā ʻoku fiemaʻu ai ʻa e kātakí ʻi he fekauʻaki mo ʻetau ngaahi lotú?

¹⁰ ʻOku fanongo tokanga mai ʻa Sihova ki heʻetau ngaahi lotú. (Saame 65:2) ʻOkú ne vakai ki heʻetau ngaahi lotu loto-moʻoní ko ha fakamoʻoni ia ʻetau tuí. (Hep. 11:6) ʻOku mahuʻingaʻia foki ʻa Sihova ʻi heʻene vakai mai ki heʻetau fakapapau ke moʻui ʻo fehoanaki mo ʻetau ngaahi lotú pea fai ʻa hono finangaló. (1 Sio. 3:22) Ko ia ʻoku fiemaʻu nai ke tau fakahāhā ʻa e kātakí pea ngāue ʻo fakatatau ki heʻetau ngaahi lotú ʻi ha taimi pē ʻoku tau feinga ai ke ikuʻi ha tōʻonga kovi pe ko ha vaivaiʻanga. Naʻe fakahuʻunga ʻe Sīsū ko e niʻihi ʻo ʻetau ngaahi lotú heʻikai nai ke tali ʻi he taimi pē ko iá. Naʻá ne ekinaki: “Hanganaki kole, pea ʻe foaki atu kiate kimoutolu; hanganaki kumi, pea te mou ʻilo; hanganaki tukituki, pea ʻe fakaava atu kiate kimoutolu; he ko ia kotoa pē ʻoku kolé te ne maʻu, pea ko ia kotoa pē ʻoku kumí te ne ʻilo, pea ko ia kotoa pē ʻoku tukitukí, ʻe fakaava kiate ia.” (Māt. 7:7, 8) ʻI he taimi ʻoku tau muimui ai ʻi he faleʻi ko ení pea “kītaki ʻi he lotú,” ʻoku tau tuipau ʻoku fanongo mai ʻetau Tamai fakahēvaní pea te ne tali ʻetau ngaahi lotú.​—Kol. 4:2.

11. ʻOku anga-fēfē hono tokoniʻi kitautolu ʻe he Hepelū 4:16 ʻi he hā ngali toloi hono tali ha lotu?

¹¹ Neongo ʻe hā ngali toloi nai hono tali ha lotu, ʻoku talaʻofa mai ʻe Sihova te ne tali ʻetau lotú “ʻi he taimi totonú.” (Lau ʻa e Hepelū 4:16.) Ko e ʻuhinga ia kuo pau ke ʻoua ʻaupito te tau tukuakiʻi ʻa Sihova kapau ʻoku ʻikai ke hoko vave ha meʻa ʻo hangē ko ia naʻa tau fakakaukau ki aí. Hangē ko ení, ko e tokolahi kuo nau lotu ʻi he laui taʻu ke hoko mai ʻa e Puleʻanga ʻo e ʻOtuá ʻo fakangata ʻa e fokotuʻutuʻu ko ení. Naʻe aʻu ʻo pehē ʻe Sīsū ʻoku totonu ke tau lotu fekauʻaki mo e meʻá ni. (Māt. 6:10) Ka he fakavalevale ē kapau ʻe fakaʻatā ʻe ha tokotaha ke fakavaivaiʻi ʻene tui ki he ʻOtuá koeʻuhí ko e ʻikai ke hoko mai ʻa e ngataʻangá ʻi he taimi naʻe ʻamanekina ʻe he tangatá! (Hap. 2:3; Māt. 24:44) ʻOku fakapotopoto ke tau hanganaki tatali kia Sihova pea lotu kiate ia ʻi he tui. ʻE hoko mai ʻa e ngataʻangá ʻi hono taimi totonú, he kuo ʻosi kotofa ʻe Sihova ʻa e “ʻaho mo e houa” ke hoko mai aí. Pea ko e ʻaho ko iá ʻe hoko moʻoni ko e taimi lelei taha ia ki he taha kotoa.​—Māt. 24:36; 2 Pita 3:15.

12. Ko e hā ʻa e tuʻunga ʻe tautefito nai ai hono ʻahiʻahiʻi ʻetau kātakí?

 ¹² ʻE fiemaʻu nai ke tau tatali anga-kātaki ke fakahoko ha fakamaau totonu. Ko e kakai ʻi he māmaní ʻoku nau faʻa ngaohikovia ʻa e niʻihi ʻo makatuʻunga ʻi honau matakalí, puipuituʻá, anga fakafonuá pe ko e tangata pe fefine kinautolu. Ko e niʻihi ʻoku ngaohikovia koeʻuhí ʻoku nau maʻu ha palopalema fakaesino pe fakaʻatamai. Ko e tokolahi ʻo e kakai ʻa Sihová kuo nau kātekina ʻa e fakamaau taʻetotonu koeʻuhí ko ʻenau ngaahi tui Fakatohitapú. ʻI hono ngaohikovia kitautolu ʻi he ngaahi founga peheé, kuo pau ke tau manatuʻi ʻa e ngaahi lea ʻa Sīsuú. Naʻá ne pehē: “Ko e tokotaha kuó ne kātaki ʻo aʻu ki he ngataʻangá ʻe fakahaofi.” (Māt. 24:13) Kae fēfē kapau ʻokú ke lāuʻilo ki ha faihala mafatukituki ha tokotaha ʻi he fakatahaʻangá? Hili hono fakahā ia ki he kau mātuʻá, te ke tuku ia ki honau ʻaofinimá, ʻo tatali anga-kātaki ke nau ngāue ki ai ʻi he founga ʻa Sihová? Ko e hā nai ʻoku kau ki aí?

13. Ko e hā ʻoku kau ki hono fakaleleiʻi ʻa e ngaahi meʻá ʻi he founga ʻa Sihová?

¹³ ʻI he taimi ʻoku lāuʻilo ai ʻa e kau mātuʻá ki ha faihala mafatukituki ʻi he fakatahaʻangá, ʻoku nau kumi ʻi he faʻa lotu ki he “poto ʻoku mei ʻolungá” koeʻuhi ke lava ʻo nau maʻu ʻa e vakai ʻa Sihová ki he tuʻungá. (Sēm. 3:17) Ko ʻenau taumuʻá ke tokoniʻi ʻa e tokotaha faiangahalá ke ne tafoki “mei hono ʻalunga halá” ʻo ka malava. (Sēm. 5:19, 20) ʻOku nau loto foki ke fai ʻa e kotoa te nau malavá ke maluʻi ʻa e fakatahaʻangá pea fakafiemālieʻi ʻa e faʻahinga kuo fakamamahiʻí. (2 Kol. 1:3, 4) ʻI he ngāue ʻa e kau mātuʻá ki ha faihala mafatukituki, kuo pau ke nau ʻuluaki maʻu ʻa e ngaahi moʻoniʻi meʻá kotoa, ʻa ia ʻe fiemaʻu nai ki ai ʻa e taimi. Pea ʻoku nau lotu pea ʻoatu ha akonaki mei he Folofolá pea fai ha fakatonutonu “feʻunga pē.” (Sel. 30:11) Neongo ʻoku ʻikai ke tautoloi ʻa e kau mātuʻá, ʻoku ʻikai ke nau fakavave ke fakamaau. ʻI hono fakaleleiʻi ʻa e ngaahi meʻá ʻi he founga totonú, ʻe sio ʻa e fakatahaʻangá ko e lelei taha ia ki he tokotaha kotoa. Neongo ia, naʻa mo hono fakaleleiʻi ʻa e palopalemá ʻi he founga ko ení, ʻe kei ongoʻi mamahi pē nai ʻa e tokotaha tonuhiá. Kapau ʻoku hoko eni kiate koe, ko e hā ʻe lava ke ke fai ke fakasiʻisiʻi ai ʻa e mamahí?

14. Ko e hā ʻa e faʻifaʻitakiʻanga Fakatohitapu ʻe lava ke ne tokoniʻi koe ke fekuki mo hano fakalotomamahiʻi lahi koe ʻe ha Kalisitiane?

¹⁴ Kuo faifai ange pea fakalotomamahiʻi lahi koe ʻe ha taha, naʻa mo ha kaungālotu? ʻE lava  ke ke maʻu ʻa e ngaahi faʻifaʻitakiʻanga tuʻu-ki-muʻa ʻi he Folofolá ʻa ia ʻoku akoʻi mai ai ʻa e founga ke tatali kia Sihova ke ne fakatonutonu ʻa e ngaahi meʻá. Ko e fakatātaá, neongo naʻe tofanga ʻa Siosifa ʻi he fakamaau taʻetotonu mei hono fanga tokouá tonu, naʻe ʻikai ke ne fakaʻatā ʻenau ngaahi angahalá ke fakatupunga ia ke hoko ko ha tokotaha loto-ʻita. ʻI hono kehé, naʻá ne nofoʻaki tokangataha ki heʻene ngāue kia Sihová, ʻa ia naʻá ne fakapaleʻi lahi ia ki heʻene kātekina anga-kātakí. (Sēn. 39:21) ʻI he faai atu ʻa e taimí, naʻe malava ke sio fakalaka atu ʻa Siosifa ʻi he ngaahi mamahi naʻá ne hokosiá pea vakai ki he anga hono tāpuakiʻi ia ʻe Sihová. (Sēn. 45:5) Hangē ko Siosifá, ʻoku tau fiemālie ʻi he taimi ʻoku tau ʻunuʻunu ofi ai kia Sihová pea tuku ʻa e fakamaau totonú ki hono toʻukupú.​—Saame 7:17; 73:28.

15. Ko e hā naʻá ne tokoniʻi ha tuofefine ke ne tukunoaʻi ʻa e fakamaau taʻetotonú?

¹⁵ Ko e moʻoni, ʻoku ʻikai ke mafatukituki tatau ʻa e ngaahi fakamaau taʻetotonu kotoa mo ia naʻe hokosia ʻe Siosifá, ka ko e fakafeangai kovi ʻe niʻihi ʻe kei fakalotomamahi pē kiate kitautolu. ʻI heʻetau fetōkehekeheʻaki mo ha taha, kau ai ha tokotaha ʻoku ʻikai ke lotu kia Sihova, te tau maʻu ʻaonga kapau te tau ngāueʻaki ʻa e ngaahi tefitoʻi moʻoni Fakatohitapú. (Fil. 2:3,4) Fakakaukau ki ha hokosia ʻe taha. Naʻe loto-mamahi lahi ha tuofefine ʻi heʻene ʻiloʻi naʻe fai ʻe hono kaungāngāué ha fakamatala ʻikai lelei mo taʻemoʻoni fekauʻaki mo ia ki he niʻihi kehé. ʻI he ʻikai ke fakafeangai vave ki aí, naʻe vaheʻi ʻe he tuofefiné ha taimi ke fakakaukauloto ki he faʻifaʻitakiʻanga ʻa Sīsuú. ʻI hono leakoviá, naʻe ʻikai te ne tali ʻaki ki he niʻihi kehé ha lea kovi. (1 Pita 2:21, 23) ʻI heʻene manatuʻi iá, naʻá ne fili ke tukunoaʻi ʻa e meʻa naʻe hokó. Ki mui ai, naʻá ne ʻiloʻi naʻe fekuki hono kaungāngāué mo ha puke lahi pea naʻá ne loto-mafasia lahi. Naʻe fakamulituku ʻe he tuofefiné ʻoku ngalingali naʻe ʻikai ʻuhingaʻi ʻe hono kaungāngāué ʻene leá. Ko ia naʻe fiefia lahi ʻa e tuofefiné naʻá ne kātekina anga-kātaki ʻa e ngaohikoviá, peá ne maʻu ʻa e nonga.

16. Ko e hā ʻe lava ke hoko ko ha fakafiemālie kapau ʻokú ke kātekina ha fakamaau taʻetotonu? (1 Pita 3:12)

¹⁶ Kapau ʻokú ke kātekina ha fakamaau taʻetotonu pe ko ha meʻa fakalotomamahi kehe, manatuʻi ʻoku ʻunuʻunu ofi ʻa Sihova “ki he loto-laveá.” (Saame 34:18) ʻOkú ne ʻofa ʻiate koe koeʻuhi ko hoʻo kātakí pea mo hoʻo lī ange hoʻo  kavengá kiate iá. (Saame 55:22) Ko ia ʻa e Fakamaau ʻo e māmaní kotoa. ʻOku ʻikai ha meʻa te ne taʻeʻafioʻi. (Lau ʻa e 1 Pita 3:12.) ʻI hoʻo tofanga ʻi ha faingataʻa ʻoku ʻikai lava ke ke fakaleleiʻi, ʻokú ke loto-lelei ke tatali kiate ia?

17. Hangē ko ia ʻoku hiki ʻi he ʻAisea 30:18, ko e hā ʻa e fakapapau ʻoku ʻomai ʻe Sihova kiate kitautolú?

¹⁷ ʻOku vavé ni ke tāpuakiʻi lahi kitautolu ʻe heʻetau Tamai fakahēvaní fakafou ʻi hono Puleʻangá. ʻOku pehē ʻi he ʻAisea 30:18: “ʻOku tatali anga-kātaki ʻa Sihova ke fakahaaʻi atu kiate kimoutolu ʻa e hōifuá, pea te ne tuʻu hake ke fakahaaʻi atu kiate kimoutolu ʻa e mēsí. He ko Sihová ko ha ʻOtua ʻo e fakamaau totonu. He fiefia ē ka ko e faʻahinga kotoa ʻoku hanganaki ʻamanaki kiate iá.” Ko e faʻahinga ʻoku nau hanganaki ʻamanaki kia Sihová te nau maʻu ʻa e ngaahi tāpuaki lahi fakatouʻosi ʻi he taimí ni pea ʻi he māmani foʻou ka hoko maí.

18. Ko e hā ʻa e ngaahi tāpuaki ʻoku fakatatali mai kiate kitautolú?

¹⁸ ʻI he taimi ʻe hū atu ai ʻa e kakai ʻa e ʻOtuá ki he māmani foʻoú, heʻikai ʻaupito ke nau toe kātekina ʻa e ngaahi loto-moʻua mo e pole kuo pau ke nau fekuki mo ia ʻi he ʻaho ní. ʻE mole atu ʻa e fakamaau taʻetotonú pea ʻe ʻikai ke toe ʻi ai ha langa. (Fkh. 21:4) Heʻikai fiemaʻu ke tau tatali ʻi he loto-hohaʻa ki he meʻa ʻoku tau fiemaʻú koeʻuhi ʻe lahi fau ʻa e meʻa kotoa. (Saame 72:16; ʻAi. 54:13) He tāpuaki ē ko ia!

19. Ko e hā ʻoku teuʻi māmālie kitautolu ʻe Sihova ki ai he taimi ní?

¹⁹ ʻI he lolotongá ni, ʻi heʻetau ikuʻi ʻa e tōʻonga kovi kotoa pē pea fakatupulekina ʻa e ʻulungaanga fakaʻotua kotoa pē, ʻoku teuʻi ai kitautolu ʻe Sihova ki he moʻui ʻi he malumalu hono tuʻunga-pulé. ʻOua ʻe loto-siʻi pea ʻoua ʻe foʻi. Ko e moʻui lelei tahá ʻoku teu ke hoko mai! ʻI heʻetau fakatuʻotuʻa atu ki ha kahaʻu fakafiefiá, ʻofa ke tau hokohoko atu ke tatali loto-lelei mo anga-kātaki kia Sihova ʻi heʻene fakakakato ʻene ngāué!