1-2. Ncinzi ncotutiilange-lange mucibalo eeci?

INO mulimvwa buti ikuti cintu ncomwali kulangila kapati camuka kusika kwiinda mbomwali kucilangila? Sena inga mwatyompwa? Ambweni mulimvwa mbubonya mbolwaamba lugwalo lwa Tusimpi 13:12 kuti: “Bulangizi busumpizyigwa bulacisizya moyo.” Pele ino inga mwalimvwa buti ciindi nomwazyiba kuti kuli twaambo tulimvwisya itwakapa kuti cintu eeco cimuke kwiinda mbomwakali kucilangila? Mubukkale oobo, ambweni inga mwayandika kukkazika moyo alimwi akulindila.

² Mucibalo eeci, tulalanga-langa njiisyo zyamu Bbaibbele zili mbozibede izikonzya kutugwasya ‘kukkazika moyo.’ (Mik. 7:7) Kumane, tulalanga-langa bukkale bobilo motweelede kulindila cakukkazika moyo kutegwa Jehova abweze ntaamu. Mpoonya, tulalanga-langa zilongezyo nzyababambilide Jehova aabo ibalibambilide kulindila.

3. Ino njiisyo iilembedwe kulugwalo lwa Tusimpi 13:11 ituyiisya nzi?

³ Cikozyanyo icitondezya mbociyandika kukkazika moyo cililembedwe kulugwalo lwa Tusimpi 13:11. Lwaamba kuti: “Lubono lujanwa cakufwambaana luyooceya, pele lubono lwayooyo uuluyobolola asyoonto-syoonto luyoovwula.” Ino twiiya nzi kunjiisyo eeyi? Muntu musongo ulacita zintu cakukkazika moyo akubikkila maano, alimwi kumamanino uyoozwidilila.

4. Ino twiiya nzi kunjiisyo iili kulugwalo lwa Tusimpi 4:18?

⁴ Lugwalo lwa Tusimpi 4:18 lutwaambila kuti “nzila yabaluleme ili mbuli mumuni wamafwumofwumo uumweka uuyaabumwekesya kusikila mane kwatuba buu.” Kapango aaka kalatondezya  cakusalazya Jehova mbwabagwasya bantu bakwe kumvwisya makanze aakwe asyoonto-syoonto. Nokuba boobo, kapango aaka alimwi kalakonzya kutugwasya kubona Munakristo mbwayaambele kumuuya mubuumi bwakwe. Cilatola ciindi kuti muntu abe acilongwe a Jehova. Ikuti cabusungu katwiiya alimwi akutobela lulayo ndotujana mu Jwi lya Leza alimwi ambunga yakwe, asyoonto-syoonto tuyooba abube bwa Kristo. Alimwi tuyoomuzyiba kabotu Leza. Atulange-lange cikozyanyo ncaakapa Jesu kujatikizya kaambo aaka.

5. Ncikozyanyo nzi ncaakapa Jesu ikutondezya kuti cilatola ciindi kuti muntu acince?

⁵ Jesu wakapa cikozyanyo ikupandulula mulumbe wa Bwami ngotukambauka, mbouli mbuli nseke nsyoonto iikomena asyoonto-syoonto mumyoyo yababombe myoyo. Wakaamba kuti: “Mbuto zilamena akukomena—pele [sikuminza] tazyibi bwini mbozikomena. Bulongo kubugama bulazyala micelo buce-buce, kusaanguna busonga mpoonya makunka, kumamanino kulaba nseke kumakunka.” (Mk. 4:27, 28) Ino Jesu wakali kupandulula nzi? Wakali kupandulula kuti mbubonya cisyango mbocikomena asyoonto-syoonto, awalo muntu iwatambula mulumbe wa Bwami ulakomena kumuuya asyoonto-syoonto. Mucikozyanyo, ciindi basikwiiya Bbaibbele besu nobayaabuba acilongwe ciyumu a Jehova, tulatalika kubona kucinca kubotu kunji nkobacita. (Ef. 4:22-24) Pele tweelede kuyeeya kuti ngu Jehova uupa kuti nseke nsyoonto eeyo ikomene.—1Kor. 3:7.

6-7. Ino twiiya nzi kujatikizya mbwaakailenga nyika Jehova?

⁶ Muzintu zyoonse nzyacita, Jehova cakukkazika moyo ulabelesya ciindi cili coonse ciyandika kutegwa amanizye mulimo wakwe. Ulacita oobo kutegwa alemeke zina lyakwe alimwi akugwasya bamwi. Mucikozyanyo, amubone Jehova mbwaakabalengela nyika bantu asyoonto-syoonto.

⁷ Ciindi nolipandulula Jehova mbwaakailenga nyika, Bbaibbele lyaamba mbwaakeenga  “masimpilo aanjiyo,” mbwaakasimpa “misemu yanjiyo,” alimwi ambwaakayala “bbwe lyayo lyakukkona.” (Job. 38:5, 6) Mane buya wakajana ciindi cakwiilanga-langa milimo yakwe. (Matl. 1:10, 12) Amweezeezye buyo mbobakalimvwa bangelo ciindi nobakali kubona cintu cimwi acimwi cipya Jehova ncaakalenga. Kweelede kuti bakakkomana kapati! Nkaambo bakatalika “koompolola cakubotelwa.” (Job. 38:7) Ncinzi ncotwiiya? Cakatola myaka minji kuti Jehova alenge nyika, nyenyeezi azintu zyoonse zipona. Pele ciindi Jehova naakalanga zintu zyoonse nzyaakalenga cakubikkila maano, wakaamba kuti “nzibotu kapati.”—Matl. 1:31.

8. Ncinzi ncotutiilange-lange lino?

⁸ Zikozyanyo eezyi zyatutondezya kuti kuli njiisyo zinji mu Jwi lya Leza izituyiisya kuti tweelede kukkazika moyo. Lino tulalanga-langa bukkale bobilo motweelede kulindila Jehova kuti abweze ntaamu.

9. Ino mbukkale nzi bumwi motweelede kulindila Jehova kuti abweze ntaamu?

⁹ Tweelede kulindila kuti Jehova aingule mipailo yesu. Ciindi notupaila kulomba nguzu zyakulwana sunko naa lugwasyo lwakuzunda kulezya kumwi, tulakonzya kulimvwa kuti lugwasyo lwamuka ikwiinda mbotwali kulangila. Nkaambo nzi Jehova ncatainguli mipailo yesu yoonse mpoonya-mpoonya?

10. Nkaambo nzi kukkazika moyo ncokuyandika ciindi notupaila?

¹⁰ Jehova ulaswiilila cakubikkila maano kumipailo yesu. (Int. 65:2) Mipailo yesu iizwa ansi amoyo wiibona kuti ncitondezyo cakuti tulamusyoma. (Heb. 11:6) Ciindi notupaila kuli Jehova kutegwa atugwasye kumukkomanisya, uliyandide kubona kuti tulilyaabide kubeleka canguzu kutegwa tucite kuyanda kwakwe. (1Joh. 3:22) Aboobo ciindi notulomba Jehova kuti atugwasye kuleka kucita cimwi cintu ncatayandi, inga twayandika kukkazika moyo alimwi akubeleka canguzu kutegwa tucince. Jesu wakaamba kuti mipailo yesu imwi taikonzyi kwiingulwa mpoonya-mpoonya. Wakaamba kuti: “Amuzumanane kulomba, eelyo muyoopegwa; amuzumanane kuyandaula, eelyo muyoojana; amuzumanane kukonkomona, eelyo muyoojulilwa; nkaambo kufwumbwa uulomba ulapegwa, uuyandaula ulajana, ayooyo uukonkomona uyoojulilwa.” (Mt. 7:7, 8) Ciindi notutobela lulayo oolu alimwi ‘akuyuma kupaila,’ tunoosinizyide kuti Taateesu wakujulu uyootumvwa alimwi akwiingula mipailo yesu.—Kol. 4:2.

11. Mbuti lugwalo lwa Bahebrayo 4:16 mbolutugwasya ciindi nokulibonya kuti mipailo yesu yamuka kwiingulwa?

¹¹ Nokuba kuti mipailo yesu inga yalibonya kuti yamuka kwiingulwa, Jehova utusyomezya kuti ulaingula mipailo yesu “aciindi ceelede.” (Amubale Bahebrayo 4:16.) Nkakaambo kaako ncotuteelede kumutongooka Jehova ikuti cintu cimwi ncotwali kulangila tiicacitika cakufwambaana kweelana ambotwali kulangila. Mucikozyanyo, banji bali kupaila kwamyaka minji kutegwa Bwami bwa Leza bumanizye bweende bwazintu oobu. Naba Jesu wakaamba kuti tweelede kwaapailila makani aaya. (Mt. 6:10) Pele inga bwaba bufwubafwuba ikucileka kusyoma muli Leza akaambo kakuyeeya kuti mamanino tanaasika muciindi ncotwali kwaalangila! (Hab. 2:3; Mt. 24:44) Pele ncabusongo kuzumanana kulindila Jehova kuti abweze ntaamu alimwi akupaila kulinguwe mulusyomo. Alimwi mamanino ayoosika aciindi ceelede nkaambo Jehova wakasala kale “buzuba oobo alimwi aciindi” mamanino naayoosika. Alimwi buzuba oobo buyootondezya kuti eeci nceciindi ceelede kubantu boonse.—Mt. 24:36; 2Pet. 3:15.

12. Ino ndilili nocikonzya kutukatazya kapati kukkazika moyo?

 ¹² Tweelede kukkazika moyo ciindi notulindila kuti bululami bucitwe. Bantu munyika eeyi, kanji-kanji balabapenzya bamwi akaambo kakuba musankwa naa mukaintu naa akaambo kakwiindana mubala, mwaambo naa cisi. Ibamwi balapenzyegwa akaambo kabulema. Bantu ba Jehova banji baliyumya kukusalululwa akaambo kazintu nzyobasyoma ziyeeme aa Bbaibbele. Ciindi notupenzyegwa tweelede kuyeeya ncaakaamba Jesu. Wakaamba kuti: “Ooyo uuliyumya kusikila kumamanino uyoofwutulwa.” (Mt. 24:13) Pele ino mweelede kucita nzi ikuti mwazyiba kuti muntu umwi wakacita cibi cipati mumbungano? Mwamana kubazyibya baalu, sena muyookkazika moyo alimwi akusyoma kuti bayakwaalanganya makani aayo munzila ya Jehova? Ino ncinzi cijatikizyidwe?

13. Ncinzi cijatikizyidwe mukulanganya makani munzila ya Jehova?

¹³ Ciindi baalu nobazyiba kuti umwi mumbungano wakacita cibi cipati, balapaila kulomba “busongo buzwa kujulu” kutegwa baalanganye makani munzila ya Jehova. (Jak. 3:17) Makanze aabo ngakugwasya sizibi kuti bamujole “kuzwa kunzila yakwe iilubide” ikuti kacikonzyeka. (Jak. 5:19, 20) Alimwi balasoleka kucita zyoonse nzyobakonzya kutegwa bakwabilile mbungano alimwi akuumbulizya baabo ibajatikizyidwe. (2Kor. 1:3, 4) Ciindi baalu nobazyiba kuti kuli cibi cipati cakacitwa, beelede kusaanguna kuzyiba twaambo toonse tujatikizyidwe calo icikonzya kutola ciindi. Balapaila akupa lulayo “cansaizi” iluzwa mu Magwalo akululamika yooyo wakacita cibi. (Jer. 30:11) Nokuba kuti baalu tabeelede kutola ciindi cilamfwu, pele alimwi tabeelede kufwambaana kapati kwaakosola makani. Ciindi baalu nobatobela busolozi bwa Jehova, basimbungano bayoobubona bubotu buzwa mpawo. Pele nokuba kuti baalu inga baalanganya munzila eeyi makani, ooyo iwakabisyilwa inga kacimuciside. Ikuti naa mbomulimvwa oobo, ncinzi cikonzya kumugwasya?

14. Ncikozyanyo nzi camu Bbaibbele icikonzya kumuumbulizya ikuti naa cakamucisa kapati ncaakamucitila Munakristo umwi?

¹⁴ Sena kuli nimwakacitilwa cibi cipati, ambweni amukwesu naa mucizyi? Mulakonzya kujana zikozyanyo zibotu mu Jwi lya Leza izikonzya kutugwasya kulindila Jehova  kuti alulamike zintu. Mucikozyanyo, nokuba kuti Josefa wakacitilwa cakutalulama abanabokwabo, kunyina naakazumizya kulubizya kwabo kumupa kunyema cakuzwa munzila. Muciindi caboobo, wakazumanana kubikkila maano kumulimo wakwe kuli Jehova, walo iwakamulumbula akaambo kakuliyumya cakukkazika moyo. (Matl. 39:21) Kumbele, Josefa tanaakabikkilila akaambo kazintu zyakamucitikila alimwi wakabona Jehova mbwaakamulongezya. (Matl. 45:5) Mbubwenya mbuli Josefa, tulaumbulizyigwa ciindi notuba acilongwe a Jehova alimwi akulindila kuti akakubambulule kutalulama muciindi ceelede.—Int. 7:17; 73:28.

15. Ncinzi cakagwasya mucizyi umwi kutabikkilila ciindi naakacitikilwa kutalulama?

¹⁵ Masimpe, takuli kuti kutalulama koonse kuleelene akooko ikwakamucitikila Josefa, pele kuteendelezyegwa kabotu kuli koonse kulakonzya kututyompya. Ikuti twaba apenzi amukombima umwi, kubikkilizya ayooyo uutakombi Jehova, tulakonzya kugwasyigwa ikuti twatobela njiisyo zyamu Bbaibbele. (Flp. 2:3, 4) Amubone cakuluula cimwi. Mucizyi umwi cakamucisa kapati ciindi naakazyiba kuti mubelesinyina umwi, wakali kwaambila bamwi zintu zibyaabi zyakubeja kujatikizya nguwe. Muciindi cakufwambaana kunyema, mucizyi ooyu wakazinzibala kuyeeya cikozyanyo ca Jesu. Ciindi naakali kutukilwa, kunyina naakatalika kutukila awalo. (1Pet. 2:21, 23) Kaayeeyede makani aaya, mucizyi ooyu wakasala kuumuna buyo. Kumbele, wakazoozyiba kuti mubelesinyina wakalicisidwe kapati alimwi wakalityompedwe. Kumbele mucizyi ooyu wakazyiba kuti mubelesinyina tanaakazyi ncaakali kwaamba. Aboobo mucizyi ooyu wakakkomana kuti wakaliyumya cakukkazika moyo kukupenzyegwa alimwi wakajana luumuno.

16. Ncinzi cikonzya kumuumbulizya ikuti kamuliyumya akaambo kakucitikilwa cakutalulama? (1 Petro 3:12)

¹⁶ Ikuti naa mulaliyumya akaambo kakucitikilwa cakutalulama naa penzi limbi buyo, amuyeeye kuti Jehova ulafwaafwi aboobo “batyompedwe mumoyo.” (Int. 34:18) Ulamuyanda akaambo kakukkazika moyo kwanu alimwi akuwaala mukuli wanu uuminya kulinguwe. (Int. 55:22) Ngo Mubetesi wanyika  yoonse. Ulazibona zintu zyoonse zicitika. (Amubale 1 Petro 3:12.) Ciindi nomujisi mapenzi aamwi ngomutakonzyi kumana, sena mulilibambilide kulindila Jehova kuti abweze ntaamu?

17. Kweelana alugwalo lwa Isaya 30:18, ncisyomezyo nzi Jehova ncatupa?

¹⁷ Lino-lino Taateesu wakujulu uyootulongezya kapati kwiinda mu Bwami bwakwe. Lugwalo lwa Isaya 30:18 lwaamba kuti: “Jehova ulalindila kakkazikide moyo kuti amufwide luzyalo, eelyo ulanyamuka kuti amufwide luse. Nkaambo Jehova ngu Leza uubeteka kabotu. Balikkomene boonse aabo bamulangila.” Aabo balangila Jehova bayootambula zilongezyo zinji lino alimwi amunyika mpya iiboola.

18. Nzilongezyo nzi nzyotulindila?

¹⁸ Ciindi bantu ba Leza baakunjila munyika mpya, kunyina nobayooyandika kuliyumya akaambo kakulibilika alimwi abuyumuyumu mbobajana mazuba aano. KutaIulama kuyoomana alimwi akucisa takukabi limbi. (Ciy. 21:4) Tatukalibiliki akaambo kazintu nzyotuyanda nkaambo zintu ziyoovwula. (Int. 72:16; Is. 54:13) Eelo kaka eeci ciyoobota!

19. Ncinzi Jehova ncali mukutugwasya kulibambila asyoonto-syoonto lino?

¹⁹ Kwalino, kufwumbwa naa tulwana cilengwa cibyaabi alimwi naa tuyanda kuba abube bwabunaleza, Jehova utugwasya kulibambila kuyoopona mubweendelezi bwakwe. Mutatyompwi akucileka kubelekela Jehova. Buumi bubotu bulaboola! Ciindi notulangila zintu zibotu eezyi, atuzumanane kukkazika moyo akulindila kuti Jehova amanizye mulimo wakwe!