1-2. Kiki ekiturukwija kubazaaho omu kicweka kinu?

OYEHURRA ota obwoba olindiriire ekintu ekyorukwetaaga muno, baitu kikalema kwizira omu bwire obaire nonihira? Nosobora kweralikirra. Enfumo 13:12 rugamba: “Okunihira okurukuikaraho [kurwaza] omutima.” Baitu nosobora kwehurra ota, kakuba okimanya ngu haroho ensonga enungi habwaki ekintu kyawe kitaiziire omu bwire obw’obaire n’okinihirramu? Omu nyikara egi, nikisobora kukwanguhira kugumiisiriza kandi n’okulindirra.

² Omu kicweka kinu, nitwija kurora emisingi ya Baibuli ey’esobora kutukonyera kukurakuraniza okulindirra n’okwikara tulindiriire. (Mik. 7:7) Hanyuma nitwija kurora enyikara ez’emiringo ebiri nambere tusemeriire kulindirra Yahwe kugira ekiyakora. Ha kumalirra nitwija kurora emigisa abo abalindiriire Yahwe eibaratunga.

3. Ekyahandiikirwe ekiri omu Enfumo 21:5 nikitwegesa ki?

³ Enfumo 21:5, nirutwegesa ensonga habwaki tusemeriire kuba n’okugumiisiriza. Nihagamba ngu: “Omuntu wena ayanguhiriza, ayanguha okusega.” Orukarra runu nirutwegesa ki? Omuntu ow’amagezi akora ebintu bye n’obwegendereza, agumiisiriza, kandi ebirugamu biba birungi.

4. Omusingi ogurukusangwa omu Enfumo 4:18 nigwoleka ki?

⁴ Enfumo 4:18 nirutugambira ngu: “Orugendo orwabahikiriire ruli nkemamba obwesara, erukweyongera okusara okuhikya omusana okujwa.” Ebigambo binu nibyoleka omulingo Yahwe akonyera abaheereza be kwetegereza ekigendererwa kye mpora mpora. Baitu orukarra runu nirusobora n’okutukonyera  kwetegereza omulingo Omukristaayo akora empindahinduka omu bwomeezi bwe kandi airra haihi na Yahwe. Okukurakurana omu by’omwoyo titusobora kukwanguhiriza. Kitwara obwire kurora omuntu yairra haihi na Yahwe. Kakuba twesomesa n’obwegendereza kandi tukateeka omu nkora obuhabuzi kuruga omu kigambo kya Ruhanga hamu n’ekitebe kye, mpora mpora nitwija kukurakuraniza emiringo nk’eya Kristo. Kandi nitwija n’okweyongera kumanya kurungi Ruhanga. Katurole ekyokurorraho Yesu ekiyakozeseze kusoborraho ensonga enu.

5. Kyokurorraho ki Yesu ekiyahaire ekirukwoleka ngu kitwara obwire kurora omuntu yakora empindahinduka?

⁵ Yesu akakozesa ekyokurorraho kusoborra omulingo amakuru amarungi ag’Obukama agatutebeza gali nk’embibo entaito muno ey’ekura mpora mpora omu mitima ey’abantu abarukugonza ebihikire. Akagamba ati: “Embibo neyaruka nemera, uwe atamanyire okweyarukire. Itaka lyana lyonka, okubanza akanyansi, kandi entwe, hanyuma oburo [obukuzire] omu ntwe.” (Mar. 4:27, 28) Yesu akaba namanyisa ki? Akaba nasoborra ngu, nk’oku ekimera kikura mpora mpora, nukwo n’omuntu ow’aikiriza obutumwa oburukukwata h’amakuru amarungi ag’Obukama akura mpora mpora omu by’omwoyo. Ekyokurorraho, abeegi baitu aba Baibuli obubeyongera kwirra haihi na Yahwe, tutandika kurora empindahinduka nyingi ezibarukukora. (Bef. 4:22-24) Baitu tusemeriire kukiijuka ngu Yahwe nuwe asobozesa embibo enu entaito kukura omu mutima.​—1 Kol. 3:7.

6-7. Omulingo Yahwe yahangiremu ensi nigutwegesa ki?

⁶ Omu bintu byona Yahwe eby’akora, atwara obwire oburukumara kurora yamalirra omulimo gwe. Kinu akikora kuhaisa ibara lye ekitiinisa n’okugasira abantu abandi. Ekyokurorraho, tekerezaaho omulingo Yahwe yateekaniriize abantu ensi, mpora mpora.

⁷ Baibuli obweba n’esoborra omulingo Yahwe yahangiremu ensi, ebazaaho omulingo ‘yalengere’ ebipimo byayo, “emiganda yayo,” n’omulingo yataireho ibale lyayo “erya ha  karugu.” (Yob. 38:5, 6) Akatunga n’obwire obw’okwekebiija ebintu eby’akaba akozere. (Kub. 1:10, 12) Tekerezaaho omulingo bamalaika bayehuliire obubarozere ebintu ebihyaka Yahwe ebiyahangire? Baine kuba basemeriirwe muno! Enu niyo ensonga habwaki ‘baatokere habw’okusemererwa.’ (Yob. 38:7) Kinu nikitwegesa ki? Omulimo ogw’okuhanga, gukatwarra Yahwe enkumi n’enkumi y’emyaka kurora yagumara, baitu obuyarozere ebintu byona eby’akaba ahangire n’obwegendereza, akagamba ngu “bisemiire muno.”​—Kub. 1:31.

8. Kiki ekiturukugenda kubazaaho?

⁸ Ebyokurorraho ebitwabazaaho eruguru, nibitwoleka ngu Baibuli erumu emisingi nyingi ey’erukutwegesa ngu tusemeriire kuba n’okugumiisiriza. Hati nitugenda kubazaaho enyikara ez’emiringo ebiri nambere tusemeriire kulindirra Yahwe kugira ekiyakoraho.

9. Nyikara ki emu nambere tusemeriire kulindirra Yahwe?

⁹ Nikisobora kutwetaagisa kulinda Yahwe kugarukamu esaara zaitu. Obutusaba Yahwe kutuha amaani kugumira ekirengo rundi kuleka ekintu ekibi eky’atarukugonza, nitusobora kwehurra ngu akerererwa kugarukamu esaara zaitu. Habwaki Yahwe atagarukamu esaara zaitu zoona aho naaho?

10. Habwaki nitwetaaga kugumiisiriza obutusaba?

¹⁰ Yahwe ahuliiriza kurungi esaara zaitu. (Zab. 65:2) Esaara zaitu azirora nk’obwakaiso oburukwoleka ngu twine okwikiriza. (Baheb. 11:6) Obutusaba Yahwe atukonyere kukora ebirukumusemeza, agonza kurora obuturaaba tutamu amaani kukorra ha saara zaitu hamu n’okukora eby’agonza. (1 Yoh. 3:22) Nahabweki, obutusaba Yahwe atukonyere kuleka kukora ekintu eky’atarukugonza, nikisobora kutwetaagisa kugumiisiriza kandi n’okukora kyona ekirukusoboka kuhinduka. Yesu akatukonyera kwetegereza ngu obwire obumu esaara zaitu nizisobora kutagarukwamu aho naaho. Akagamba ati: “Mwikale nimusaba mulihebwa; mwikale nimuserra, mulizoora; mwikale nimweranga, mulikingurrwaho; baitu omuntu wena obwasaba, ahebwa, obwaserra azora; anyakweranga alikingurrwaho.” (Mat. 7:7, 8, NW) Obutuhondera obuhabuzi bunu, kandi tukaikara nitusaba tukigumye ngu Isiitwe ow’omu iguru n’atuhurra kandi naija kugarukamu esaara zaitu.​—Bak. 4:2.

11. Obuturaaba nitwehurra ngu Yahwe tagarukamu esaara zaitu, kiki ekitusemeriire kwijuka? (Abaheburaniya 4:16)

¹¹ Nobukiraaba ngu nikisobora kuzooka ngu Yahwe akereriirwe kugarukamu esaara yaitu, n’aturaganiza ngu naija kutugarukamu “obuturatagaga bwona,” omu kasumi akahikire. (Soma Abaheburaniya 4:16.) Egi niyo ensonga habwaki tutasemeriire kujunaana Yahwe kakuba esaara zaitu zitanguha kugarukwamu nk’oku tubaire nitunihira. Ekyokurorraho, baingi bamazire emyaka nyingi nibasaba Obukama bwa Ruhanga bwije bumaleho ensi enu embi. Yesu na uwe akagamba ngu tusabe bwije. (Mat. 6:10) Baitu nikiba ky’obudoma omuntu kakuba aleka okwikiriza kwe omuli Ruhanga kuceka ngu habwokuba empero tehikire omu bwire abantu baali nibaginihirramu! (Hab. 2:3; Mat. 24:44) Tuba b’amagezi obutwikara tulindiriire Yahwe kandi tukamusaba twine okwikiriza ngu naija kugarukamu esaara zaitu. Empero niija kuhika omu kasumi konyini akahikire habwokuba Yahwe akamara ira kukoma ekiro n’esaaha ekyeriiziramu. Kandi ako kaliba kaire konyini akasemeriire habw’abantu boona abarukugonza Yahwe.​—Mat. 24:36; 2 Pet. 3:15.

12. Nyikara ki ey’esobora kulenga okugumiisiriza kwaitu?

¹² Nikisobora kutwetaagisa kugumiisiriza  obuturukuba tulindiriire kutunga obwinganiza. Abantu omu nsi bakira kutwaza kubi abandi nibasigikirra ha buhangwa bwabo, erangi ey’omubiri, oruganda, orulimi, rundi ihanga nambere baruga. Abandi batwazibwa kubi habwokuba baine obulema ha mubiri, rundi baine oburwaire bw’omutwe. Abaheereza ba Yahwe baingi basoboire kugumira obutalibwinganiza habw’enyikiriza zaabo ezirukusigikirra ha Baibuli. Obututwazibwa kubi omu miringo nk’egi, tusemeriire kwikara nitwijuka ebigambo bya Yesu. Akagamba ati: “Anyakuguma okuhika ha mpero, nuwe alijunwa.” (Mat. 24:13) Baitu kiki eky’osemeriire kukora kakuba okimanya ngu haroho omuntu omu kitebe arukukora ekibi eky’amaani? Hanyuma y’okumanyisa abagurusi ha nsonga egi, oragibalekera kandi ogumiisirize bagikwate omu mulingo Yahwe arukugonza? Abagurusi nikisobora kubetaagisa kukora ki kakuba omuntu aba akozere ekibi eky’amaani?

13. Yahwe n’agonza abagurusi b’ekitebe bakole ki, omuntu obwarukuba akozere ekibi eky’amaani?

¹³ Abagurusi b’ekitebe obubakimanya ngu haroho omuntu akozere ekibi eky’amaani basaba Yahwe “amagezi aganyakuruga haiguru” nukwo basobole kurora ensonga omu mulingo agiroramu. (Yak. 3:17) Ekigendererwa kyabo kiri ky’okukonyera omusiisi kuruga omu kibi kye. (Yak. 5:19, 20) Ekindi, bakora kyona ekirukusoboka kulinda ekitebe kandi n’okuhuumuza abo ababa basaliziibwe. (2 Kol. 1:3, 4) Abagurusi obubakimanya ngu omuntu akozere ekibi eky’amaani, basemeriire kubanza kumanya kiki kyonyini eky’abaireho kandi eki nikisobora kutwara akaire. Hanyuma basaba, baha obuhabuzi kuruga omu Byahandiikirwe n’obwegendereza, kandi bahana omusiisi kuhika ha “rulengo orusemeriire.” (Yer. 30:11, NW) Nobukiraaba ngu abagurusi tibaikaraho kugonjoora ensonga zinu, tibanguhiriza kukora encwamu. Abagurusi obubahondera oburagirizi kuruga hali Yahwe, abali omu kitebe boona barora ebirungi ebirugamu. Baitu abagurusi n’obubakora ebintu omu mulingo oguhikire, abanyakukwasirweho nibasobora kwikara nibakyasaasa. Obworaaba nukwo orukwehurra oti, kiki eky’osobora kukora kukehyaho obusaasi?

14. Kyokurorraho ki kuruga omu Baibuli ekisobora kukukonyera kuguma kakuba Omukristaayo mugenzi wawe aba akukozere kubi?

¹⁴ Haroho omuntu ayakakukoraga kubi, kukira muno Omukristaayo mugenzi wawe?  Nosobora kusanga ebyokurorraho ebirungi omu Kigambo kya Ruhanga ebirukutwegesa omulingo tusobora kulindirra Yahwe kuterekereza ensonga. Ekyokurorraho, n’obukiraaba ngu bagenzi ba Yusufu bakamutwaza omu mulingo ogutali gw’obwinganiza, ataikirize ebibi byabo kumuletera kuba muntu ow’ekiniga. Oihireho, omutima akagwikaza ha kuheereza Yahwe kandi akamuha emigisa habw’okugumiisiriza kwe. (Kub. 39:21) Hanyuma y’obwire, Yusufu akaleka kuteeka omutima ha bintu ebibi ebyali bimuhikireho, baitu yaguteeka ha migisa Yahwe yali amuhaire. (Kub. 45:5) Nka Yusufu, naitwe tuhumuzibwa obutwirra haihi na Yahwe kandi tukamulinda kumaraho obutali bwinganiza omu kasumi akahikire.​—Zab. 7:17; 73:28.

15. Kiki ekyakonyire munyaanya itwe kugumira obutalibwinganiza?

¹⁵ Ky’amananu ngu, obutalibwinganiza obutuhikaho nibusobora kutaingana n’obwa Yusufu yarabiremu, baitu itwena tusaasa obututwazibwa kubi omu mulingo gwona. Obutuba twine ekizibu n’omuntu, otwaliiremu n’ogu atarukuheereza Yahwe, tugasirwa muno obututeeka omu nkora emisingi ya Baibuli. (Baf. 2:3, 4) Tekerezaaho ekyokurorraho kinu. Munyaanya itwe akasaalirwa muno obuyakyetegeriize ngu omukozi mutaahi we akaba namubazaaho kubi kandi n’amuhangirra. Omu kiikaro eky’okubiihirwa bwangu, munyaanya itwe akamara obwire nayecumitirizaaho ekyokurorraho kya Yesu. Yesu obu bamujumaga tiyabagarukamuga. (1 Pet. 2:21, 23) Nahabweki, akacwamu kutagira ekiyakoraho hali eki ekyali kibaireho. Hanyuma akakimanya ngu omukozi mutaahi we ogu, akaba arwaire muno kandi akaba ayeralikiriire ekihinguraine. Munyaanya itwe akakyetegereza ngu omukozi mutaahi we ogu n’asobora kuba akaba atarukumanyisa ebiyabalize. Nahabweki akasemererwa habwokuba akagumiisiriza obu bamutwaize kubi kandi akatunga obusinge.

16. Kiki ekisobora kukuhuumuza kakuba oba nogumira obutalibwinganiza? (1 Petero 3:12)

¹⁶ Obworaaba nogumira obutalibwinganiza rundi ekintu kyona ekirukukusaaliza, ijuka ngu Yahwe ali “haihi nabo abomutima ogucwekere.” (Zab. 34:18) N’akugonza habw’okugumiisiriza kwawe kandi na habw’okumunagira omugugu gwawe. (Zab. 55:22) Yahwe nuwe Omucwi w’Emisango ow’ensi yoona. Arora  buli kimu kyona ekibaho. (Soma 1 Petero 3:12.) Obwoba oine ebizibu eby’otasobora kumaraho, olindirra Yahwe kukukonyera?

17. Nk’oku kyolekerwe omu Isaya 30:18, kiki Yahwe ekyaraganiize kutukorra?

¹⁷ Omu kasumi akatali kahara, Isiitwe ow’omu iguru naija kutuha emigisa nyamwingi kurabira omu Bukama bwe. Isaya 30:18 nirugamba ngu: “Nikyo [Yahwe] alirindira, abagirre embabazi, kandi nikyo alinyumizibwa abaganyire: baitu [Yahwe] nuwe Ruhanga wobulyo; banyina omugisa bona abamutegereza.” Abo abaikara balindiriire Yahwe, nibaija kutunga emigisa nyingi hati n’omu nsi empyaka.

18. Migisa ki eiturukwija kutunga?

¹⁸ Abantu ba Ruhanga obubalitaaha omu nsi empyaka, tibalyongera kwetuntura n’okutalibanizibwa ebizibu ebibarukurabamu hati. Obutalibwinganiza hamu n’obusaasi nibiija kuba bihwaireho. (Kus. 21:4) Titulyeralikirra habw’ebyetaago byaitu habwokuba nihaija kubaho ebintu ebirukumara buli omu. (Zab. 72:16; Is. 54:13) Ogu kanigwija kuba mugisa gw’amaani muno!

19. Kiki Yahwe eky’aliyo n’atuteekaniriza mpora mpora omu kasumi kanu?

¹⁹ Omu kasumi kanu, Yahwe natutekaniza kwikara ha nsi y’obulemi bwe kurabira omu kutukonyera kusingura engeso embi hamu n’okukurakuraniza emiringo ey’erukumusemeza. Otahwamu amaani kandi otaleka kuheereza Yahwe. Obwomeezi oburukukirayo oburungi nibwija! Omu kasumi kanu, obutukyalindiriire akasumi ako akarungi, leka twikale twine okusemererwa n’okugumiisiriza kandi tulinde Yahwe obwalikora ebintu ebiyaraganiize!