1-2. Ne a mea ka sau‵tala tatou ki ei i te mataupu tenei?

E PEFEA ou lagonaga māfai e seki maua ne koe i te taimi tonu se kope o koe mai se fenua? E mata, ka fanoanoa koe? Ka maua eiloa ne koe a lagonaga kolā e fakaasi mai i te Faataoto 13:12: “A te fakamoemoega telā ko se taunu e fai ei te loto ke masaki.” Kae e a māfai ko iloa ne koe me isi ne pogai ne seki mafai ei o tō mai tou kope tenā? I te feitu tenā, ka kufaki eiloa koe kae loto fiafia o faka‵tali.

² I te mataupu tenei, ka onoono tatou ki nisi fakatakitakiga i te Tusi Tapu kolā e mafai o fesoasoani mai ki a tatou ke ati aka kae tumau i te “nofo fakatalitali.” (Mika 7:7) Ka oti, ko suke‵suke ei tatou ki feitu e lua e ‵tau ei mo tatou o fakatali‵tali mo te kufaki ke gasuesue a Ieova. Kae ko te ‵toe mea, ka sau‵tala tatou ki fakamanuiaga ka maua ne latou kolā e loto fia‵fia o faka‵tali ki a Ieova.

3. Se a te mea e faka‵mafa mai i te fakatakitakiga telā ne fakamau i te Faataoto 13:11?

³ A te fakaakoakoga telā e fakamatala mai ei a te tāua ke kufaki ne fakamau i te Faataoto 13:11. E fai mai: “A te maumea telā ne maua fakavave ka gasolo ifo o mu‵tana, kae ko te maumea o te tino telā e fakaputu malielie aka ne ia ka gasolo eiloa o uke.” Se a te mea e tauloto ne tatou mai te fuaiupu tenei? A te tino poto e fai faka‵lei ana mea mo te kufaki kae maua ne ia a ikuga ‵lei.

4. Se a te mea e faka‵mafa mai i te fakatakitakiga e maua i te Faataoto 4:18?

⁴ E fai mai te Faataoto 4:18 me i “te auala o te tino amiotonu e ‵pau mo te mainaga telā e maina aka i te tafataeao telā e gasolo aka eiloa o maina ke oko ki te taimi ko ao mai ei.” A pati  konei e fakasino tonu atu eiloa ki te auala e fakaasi malielie atu ne Ieova tena fuafuaga ki ana tino. Kae e mafai foki o fakauiga a te fuaiupu tenā ki te auala e gasolo atu ei ki mua se Kelisiano i te feitu faka-te-agaga. E manakogina a taimi e uke ke gasolo ki mua se tino. Kafai e suke‵suke faka‵lei tatou kae fakagalue aka a pati fakatonutonu e maua mai te Muna a te Atua mo tena fakapotopotoga, ka ati aka malielie ne tatou a uiga faka-Kelisiano. Ka gasolo aka foki ki luga ‵tou iloa e uiga ki te Atua. Mafau‵fau ki te auala ne fakamatala mai ei ne Iesu te manatu tenā.

5. Ne fakatusa pefea ne Iesu a te gasolo malielie ki mua o se tino i te feitu faka-te-agaga?

⁵ Ne fakaaoga ne Iesu se tala fakatusa ke fakamatala atu te auala e fakatusa ei te fekau o te Malo ki se fuaga foliki telā e ola malielie aka i loto o tino loto ‵lei. Ne fai mai a ia: “Kae ko fuaga ko ‵somo aka kae ko ma‵luga—kae e se iloa ne [te tino ne ‵toki ne ia] me ne ‵tupu aka pefea. Ne fakaolaola malielie aka ne te laukele a te fuaga. A te mea muamua ko te kausaito, tafa atu ki ei ko te kaufui saito, kae fakamuli loa ko fuaga i te kaufui saito kolā ko ma‵tua.” (Male. 4:27, 28) Se a te mea ne fakauiga ki ei a Iesu? Ne fai mai a ia me e pelā mo se fuaga telā e ola malielie aka, e penā foki te tino telā e talia ne ia te fekau o te Malo, e gasolo malielie ki mua i te feitu faka-te-agaga. E pelā me se fakaakoakoga, i te taimi e fakapili‵pili atu ei a ‵tou tino a‵koga ki te Tusi Tapu ki a Ieova, ka lavea i ei ne tatou a ‵fuliga ‵gali e uke e fai ne latou. (Efe. 4:22-24) Kae e ‵tau o masaua ne tatou me ko Ieova loa e fai ne ia te ola aka a te fuaga foliki tenā.—1 Koli. 3:7.

6-7. Ne a mea e tauloto ne tatou mai te auala ne faite ei ne Ieova a te lalolagi?

⁶ I mea katoa e fai ne ia, e kufaki eiloa a Ieova o fakaavanoa mai ne ia te taimi tenei ke fakaoti faka‵lei ei tena galuega. E fai ne ia penā ko te mea ke faka‵malu ei tena igoa kae ke fesoasoani atu foki ki nisi tino. Mafaufau ki te auala ne fakatoka malielie ei ne Ieova a te lalolagi mo ‵nofo i ei a tino.

⁷ E fai mai te Tusi Tapu, me i te taimi ne faite  ei ne Ieova te lalolagi ne “fua ne ia,” tuku ne ia “ana fakavae,” kae fakatakato “ana fatu tulimanu.” (Iopu 38:5, 6) Ne fakaaoga faka‵lei ana taimi ke iloilo ana galuega ne fai. (Kene. 1:10, 12) E mata, e mafai o fakaataata ne koe me pefea a lagonaga o agelu i te taimi ne lavea ne latou a mea ‵fou kae fakaofoofogia kolā ne faite ne Ieova? E mautinoa eiloa me ne fia‵fia ‵ki latou ki ei! Ona ko te mea tenā ne kamata ei latou o “paka‵laga ki luga.” (Iopu 38:7) Ne a mea e tauloto ne tatou? E lau i te fia afe o tausaga ne faite ei ne Ieova te lalolagi, kae i te taimi ne iloilo aka ne ia ana mea katoa ne faite, ne fai mai a ia me “ko oko eiloa i te ‵lei.”—Kene. 1:31.

8. Ne a mea ka sau‵tala tatou ki ei?

⁸ E pelā mo te mea ne lavea ne tatou i fakaakoakoga konā mai luga, e mafai o maua ne tatou a fakatakitakiga e uke i te Muna a te Atua kolā e faka‵mafa mai ei te manakoga ke kufaki. Ka onoono nei tatou ki feitu e lua kolā e ‵tau ei mo tatou o loto fia‵fia o fakatali‵tali ki a Ieova.

9. Se a te feitu e tasi e manakogina ei ke faka‵tali tatou ki a Ieova?

⁹ Kāti e manakogina ke faka‵tali ke tali mai a ‵tou ‵talo. Kafai e ‵talo atu tatou ke maua te malosi ke fakafesagai ki se tofotofoga io me fesoasoani ki se tino ke manumalo i se vāivāiga, e mafai o mafau‵fau tatou me ko tō leva te taimi ke tali mai ei a ‵tou ‵talo. Kaia e se tali fakavave mai ei ne Ieova a ‵tou ‵talo katoa?

10. Kaia e manakogina i ei te kufaki māfai ko ‵talo tatou?

¹⁰ A Ieova e fakalogologo faka‵lei mai ki ‵tou ‵talo. (Sala. 65:2) E kilo mai a ia ki ‵tou ‵talo kolā e fai atu mo te fakamaoni e pelā me se fakamaoniga o te ‵tou fakatuanaki. (Epe. 11:6) E fiafia foki a Ieova ke lavea ne ia ‵tou taumafaiga ke ola e ‵tusa mo ‵tou ‵talo kae ke fai tena loto. (1 Ioa. 3:22) Tela la, e manakogina ke fakaasi atu ne tatou te kufaki kae gasue‵sue e ‵tusa mo ‵tou ‵talo i so se taimi e taumafai ei tatou o manumalo i se amioga sē ‵lei io me se vāivāiga. Ne fai mai a Iesu me e se tali fakavave mai a nisi ‵talo a tatou. Ne fakamalosi mai a ia: “Tumau i te fakamolemole atu, kae ka tuku mai ki a koutou; tumau i te salasala atu, kae ka maua ne koutou; tumau i te tukituki atu, kae ka ‵tala mai ki a koutou; me i so se tino e fakamolemole atu, ka tuku atu ki a ia, kae ko so se tino e salasala atu ka maua ne ia kae ko so se tino e tukituki atu, ka ‵tala atu ki a ia.” (Mata. 7:7, 8) Kafai e tau‵tali tatou ki te manatu fakatonutonu tenā kae “‵talo malosi,” e loto tali‵tonu tatou me ka lagona ne te ‵tou Tamana faka-te-lagi kae ka tali mai ne ia a ‵tou ‵talo.—Kolose 4:2.

11. E fesoasoani mai pefea te Epelu 4:16 māfai e fui tali mai ‵tou ‵talo?

¹¹ E tiga eiloa e mafai o se tali fakavave mai ‵tou ‵talo, e tauto mai a Ieova me ka tali mai ne ia “i te taimi tonu.” (Faitau te Epelu 4:16.) Tenā te pogai e se ‵tau o mafau‵fau tatou me e fai ne Ieova se mea ‵se māfai e se tali fakavave ne ia a ‵tou ‵talo. E pelā me se fakaakoakoga, e tokouke a tino ne ‵talo atu mō se fia tausaga ke na fakaseai ne te Malo o te Atua a te olaga tenei. Ne fai mai foki a Iesu me e ‵tau o ‵talo atu tatou mō te mea tenā. (Mata. 6:10) Kae se mea valea māfai ko se fakatuanaki tatou ki te Atua ona ko te mea e fui oko mai te gataga e pelā mo te mea ne fakamoe‵moe ki ei a tino! (Sapa. 2:3; Mata. 24:44) Se faiga poto ke tumau tatou i te ‵nofo fakatalitali ki a Ieova kae ‵talo ki a ia i te fakatuanaki. Ka oko mai eiloa te gataga i tena taimi tonu, me ko oti eiloa ne filifili ne Ieova te “aso mo te itula” e oko mai i ei. Kae ka fai eiloa te aso tenā e pelā me ko te ‵toe taimi ‵lei eiloa ki tino katoa.—Mata. 24:36; 2 Pe. 3:15.

12. Ko te taimi fea kāti ka faigata ei ke kufaki tatou?

 ¹² Kāti e manakogina ke kufaki tatou i te taimi e faka‵tali ei ke faka‵lei a faifaiga sē fakamaoni. E fai fakamasei faeloa ne tino i te lalolagi nei a latou kolā e ‵kese olotou telega, itukāiga io me ko fenua. Nisi tino e fai fakamaseigina ona ko te mea e se katoatoa ‵lei io me ma‵saki olotou mafaufau. E tokouke a tino o Ieova ne kufaki i faifaiga sē fakamaoni ona ko olotou talitonuga kolā e fakavae ki te Tusi Tapu. Kafai e fai fakamasei tatou i vaegā auala penā, e ‵tau o masaua ne tatou a pati a Iesu. Ne fai mai a ia: “Te tino telā e kufaki ke oko ki te gataga ka sao eiloa.” (Mata. 24:13) Kae e a māfai e iloa ne koe se mea ‵se ne fai ne se tino i te fakapotopotoga? Kafai ko oti ne fakailoa mai ne toeaina te fakalavelave, e mata, ka fakatalitali koe moe te kufaki kae talitonu me ka faka‵lei eiloa ne latou te fakalavelave tenā i te auala o Ieova? Ne a mea kāti e ‵tau o fai ne toeaina māfai e fai ne se tino se agasala matagā?

13. Se a te mea e manako a Ieova ke fai ne toeaina māfai ne fai ne se tino se agasala matagā?

¹³ Kafai ko iloa ne toeaina me ne fai ne se tino se agasala matagā i te fakapotopotoga, e ‵talo latou kae ‵sala atu ki te “poto mai te lagi” ko te mea ke iloa ne latou te kilokiloga a Ieova ki te tulaga tenā. (Iako. 3:17) A te lotou fakamoemoega ko te fesoasoani atu ki te tino agasala ke ‵fuli kea‵tea “mai tena mea ‵se” māfai e mafai. (Iako. 5:19, 20) E ma‵nako foki latou o fai a mea katoa e mafai ne latou o fai ke puipui te fakapotopotoga kae fakamafanafana atu a latou kolā e logo‵mae. (2 Koli. 1:3, 4) Kafai e sukesuke ne toeaina se agasala matagā, e ‵tau o maua ne toeaina a fakamatalaga ‵tonu katoa, telā e manakogina se taimi leva. Ka oti ko ‵talo atu latou kae tuku atu a polopolokiga mai te Tusi Tapu kae faka‵tonu aka te mea ‵se “e ‵tusa mo te mea e ‵tau o maua” ne te tino. (Iele. 30:11) E tiga eiloa e se faka‵tali latou ki se taimi leva, e se ‵tau foki o fai fakavave ne latou se fakaikuga. Kafai e ‵teu faka‵lei ne latou a te fakalavelave, ka lavea ne te fakapotopotoga a ikuga ‵lei. Kae kafai foki e fai ne toeaina a mea i te auala tonu, e mafai loa o logo‵mae se tino telā e seai sena mea ‵se ne fai. Kafai e penā ou lagonaga, ne a mea e ‵tau o fai ne koe ke fakafeoloolo aka ei tou logo‵mae?

14. Se a te fakaakoakoga i te Tusi Tapu e mafai o fesoasoani mai ke kufaki māfai ne fakalogo‵mae koe ne se taina io me se tuagane Kelisiano?

¹⁴ E mata, kai fakalogo‵mae aka eiloa koe ne se tino, kāti se taina io me se tuagane? E mafai  o maua ne koe a fakaakoakoga ‵lei i te Muna a te Atua, telā e akoako mai ke iloa ne tatou o fakatalitali ke faka‵tonu ne Ieova a mea. E pelā mo Iosefa, ne logo‵mae a ia i faifaiga sē fakamaoni i lima o ana taina ‵tonu, kae ne seki talia ne ia olotou mea ‵se ke fai ei ke kaitaua a ia. I lo te fai penā, ne saga tonu a ia ki tena taviniga ki a Ieova, telā ne fakamanuia ne ia tou tagata ona ko tena kufaki. (Kene. 39:21) Fakamuli ifo, ne fakapuli ne Iosefa a mea fakalogo‵mae kolā ne fe‵paki mo ia kae ne kilo atu a ia ki te auala ne fakamanuia ne Ieova a ia. (Kene. 45:5) E pelā mo Iosefa, e fakamafanafanagina tatou māfai e fakapili‵pili malosi atu ki a Ieova kae fakatali‵tali ki te taimi ka faka‵tonu ei ne ia a faifaiga sē fakamaoni katoa.—Sala. 7:17; 73:28.

15. Se a te mea ne fesoasoani atu ki se tuagane ke sē saga atu ki se faifaiga sē ‵lei ki a ia?

¹⁵ E tonu, nisi faifaiga sē fakamaoni e se na loa ko matagā e pelā mo mea ne fe‵paki mo Iosefa, kae koi logo‵mae loa tatou māfai e fai fakamasei tatou ne se tino. Kafai e isi se fakalavelave o koe mo te suā tino, kāti se taina tapuaki o koe, ka maua ne koulua mea aoga māfai e fakagalue a fakatakitakiga i te Tusi Tapu. (Fili. 2:3,4) Mafaufau ki se tala e tasi. Ne logo‵mae ‵ki se tuagane i tena logoga me ne fakamasei ne se tino e ga‵lue tasi mo ia a tou fafine, kae fai ana tala ‵se ki nisi tino e uiga ki a ia. I lō te ita vave, ne fakaavanoa ne te tuagane tenei se taimi ke mafaufau ‵loto ki te fakaakoakoga a Iesu. I te taimi ne fai atu ne tino a pati ma‵sei ki a ia, ne seki taui atu ne ia ki pati ma‵sei. (1 Pe. 2:21, 23) Mai te mafaufau ki a Iesu, ne fakaiku ei ne tou fafine ke se saga atu ki ei. Fakamuli ifo, ne iloa aka ne ia me i te tino tenā ne masaki ‵ki kae ne kamata o manavase. Ne fakaiku aka ne te tuagane me kāti seki fakauiga ne ia ana pati ne fai. Tela la, ne fiafia ‵ki te tuagane me ne kufaki a ia i te faifaiga sē ‵lei tenā kae ne maua ne ia te filemu.

16. Se a te mea e mafai o fakamafanafana atu māfai e kufaki koe i faifaiga sē fakamaoni? (1 Petelu 3:12)

¹⁶ Kafai koe e kufaki i se faifaiga sē fakamaoni io me se isi mea, masaua me i a Ieova e pili malosi atu ki a “latou kolā e mafatia.” (Sala. 34:18) E alofa a ia ki a koe ona ko tou kufaki kae ‵pei atu tau amoga ki a ia. (Sala. 55:22) A ia ko te Famasino o te lalolagi kātoa. E lavea ne ia a mea katoa. (Faitau te 1 Petelu 3:12.) Kafai e fepaki koe mo fakalavelave kolā e se mafai o  faka‵lei aka ne koe, e mata, ka loto fiafia koe o faka‵tali ki a ia?

17. E pelā mo te mea ne fakamau i te Isaia 30:18, se a te fakatalitonuga e tuku mai ne Ieova ki a tatou?

¹⁷ Ko pili nei o fakamanuia ne te ‵tou Tamana faka-te-lagi a tatou e auala i tena Malo. E fai mai te Isaia 30:18: “Kae ko Ieova e fakatalitali mo te kufaki o fakaasi te alofa ki a koutou, kae ka tu aka a ia o fakaasi atu te alofa fakamagalo ki a koutou. Me i a Ieova ko te Atua fai mea tonu. E fia‵fia a latou katoa kolā e ‵nofo fakatalitali ki a ia.” A latou kolā e tumau i te ‵nofo fakatalitali ki a Ieova, ka maua ne latou a fakamanuiaga e uke i te taimi nei kae penā foki i te lalolagi fou telā ko pili o oko mai.

18. Ne a fakamanuiaga e faka‵tali mai mō tatou?

¹⁸ Kafai ko ulu atu a tino o te Atua ki te lalolagi fou, ka se toe kufaki latou i manavasega mo fakalavelave kolā e fe‵paki mo latou i aso nei. Ka fakaseai atu a faifaiga sē fakamaoni, kae ka se toe ai se ‵mae. (Faka. 21:4) Ka sē toe ‵nofo manava‵se tatou o ‵sala a mea e manakogina ne tatou, me ka lava kae ‵toe a mea mō tino katoa. (Sala. 72:16; Isa. 54:13) Tasi o fakamanuiaga gali ka maua ne tatou!

19. Se a te mea ko fakatokatoka malielie ne Ieova tatou ki ei i te taimi nei?

¹⁹ I te taimi tenei, e fakatoka ne Ieova tatou i te taimi nei ke ola mai lalo i tena pulega, mai te fesoasoani mai ke manumalo tatou i ‵tou uiga ma‵sei katoa kae ati aka a uiga kolā e fiafia a ia ki ei. Sa loto vāivāi, kae sa ‵fiu vave. Ko pili o oko mai te ‵toe olaga ‵lei! I te taimi e fakatali‵tali ei tatou ki te taimi gali tenā, ke na tumau tatou i te fakatali‵tali kae kufaki ke oko ki te taimi ka fakaoti ei ne Ieova a tena galuega!