1, 2. ¿Bin ya kilbeytik skʼoplal ta artículo ini?

JNOP KAʼIYTIK te ay bin yakotik ta smaliyel te bayal ya xtuun kuʼuntik, pero bayal jalajix. ¿Binwan yaʼiyel ya kaʼiy jbatik? Maniwan junuk koʼtantik. Jaʼ yuʼun te Proverbios 13:12 jich ya yal: «Teme ma xtal te bin ay ta mahliyel, ya xwocolij oʼtanil yuʼun». Pero ayniwan swentail bin yuʼun ma xjul ta ora te bin yakotik ta smaliyel. Teme jich-abi, jun-niwan koʼtantik ya jmaliytik.

² Ta artículo ini ya kiltik te bintik ya yal te Biblia yuʼun ya skoltayotik te jun koʼtantik ya jmaliytik (Miq. 7:7). Ta patil ya kiltik chaʼchajp te bin-utʼil ya skʼan jun koʼtantik ta smaliyel te bin ya spas te Jehová. Ta slajibal ya kiltik te bendicionetik ya jtatik teme jun koʼtantik ya jmaliytik.

3. ¿Bin ya yakʼ jnoptik te Proverbios 13:11?

³ Ta Proverbios 13:11 ya yakʼ ta ilel te mukʼ skʼoplal te ya jnaʼtik smaliyel. Jich ya yal: «Te cʼulejalil te ma lecuc tahbil, ya xpehcʼaj bahel, yan te machʼa cʼuncʼun ya stsob, ya xmucʼub bahel yuʼun». ¿Bin ya jnoptik ta versículo ini? Te kʼalal ay bin ya jpastik, jaʼ lek te kʼunkʼun ya yichʼ pasel.

4. ¿Bin ya yakʼ jnoptik te Proverbios 4:18?

⁴ Ta Proverbios 4:18 jich ya yal: «Te be yuʼun te machʼatic toj yoʼtanic hich ay te bin utʼil ya xhahch ta sacubel te qʼuinal, te behbe ya sacub ha to cʼalal tsʼacal sacubix te  qʼuinale». Ta texto ini ya yakʼ ta ilel te Jehová ya snojptes ta kʼunkʼun te j-abatetik yuʼun. Jaʼnix jich ya xkʼot ta stojol te machʼa yak ta chʼiel te schʼuunel yoʼtan, ma orauknax ya xchʼi, ya yichʼ tiempo. Teme ya jnoptik ta lek te Biblia sok ya jpastik ta jkuxlejaltik te bin ya yal te sKʼop Dios sok te organización, kʼunkʼun ya jtʼunbeytik stalel te Cristo sok ya jnaʼbeytikxan sba te Dios. Kiltik te bin-utʼil la scholbey skʼoplal te Jesús sok jun ejemplo.

5. ¿Bin lokʼombakʼop la yal te Jesús yuʼun ya yakʼ jnoptik te kʼunkʼun ya xchʼi te chʼuunel oʼtanil?

⁵ Ta jun lokʼombakʼop te Jesús la spajaltaybey skʼoplal te Wentainel, jich bitʼil te sit awal tsʼunubil te kʼunkʼun ya xchʼi ta yoʼtan te ants winiketik. La yal te machʼa ya yaʼiy tsʼunbajel ma snaʼ bin-utʼil ya xkol «como stuquel ya yacʼ sitinuc te qʼuinal: nahil te yaʼbinal, patil te snich, patil ya xnoj ta sit» (Mar. 4:27, 28). ¿Bin la yakʼ ta nopel? Jaʼ te kʼunkʼun ya xchʼi ta yoʼtan te machʼa ya smulan snopel te sKʼop Dios, jich bitʼil te awal tsʼunubil: kʼunkʼun ya xchʼi. Jaʼnix jich te kʼalal ay machʼa ya jnojptestik ta Biblia kʼunkʼun ya xnoptsaj ta stojol te Jehová sok ya kiltik te bitʼil ya sjeltay te skuxlejal (Efes. 4:22-24). Pero juluk ta koʼtantik te jaʼ Jehová te machʼa ya yakʼ chʼiuk te schʼuunel yoʼtane (1 Cor. 3:7).

6, 7. ¿Bin ya yakʼ jnoptik te bitʼil la spas Jehová te Balumilal?

⁶ Te Jehová ya snaʼ smaliyel sok ya yakʼbey tiempo te bin ya spas. Kʼalal jich ya spas, jaʼ ta swenta jlekilaltik sok ya yalbey yutsil skʼoplal te sbiil. Jun ejemplo, jaʼ te bin-utʼil la schajpan te Balumilal yuʼun tey ya xkuxin te ants winiketik.

⁷ Kʼalal te Jehová la spas te Balumilal, te Biblia ya yal te la yakʼbey «smucʼul», yiptajib sok «te ton te ipajem ae» (Job 38:5, 6, TZOXCH). La slokʼes tiempo yuʼun ya snopilan ta yoʼtan te bintik spasoj (Gén. 1:10, 12). ¿Binwan-utʼil la yaʼiy  sbaik te chʼul-abatetik kʼalal la yilik te bintik la spas te Jehová? Lek la yaʼiy sbaik sok «tseʼel yoʼtan awonic» yuʼun (Job 38:7). ¿Bin ya yakʼ jnoptik? Te Jehová kʼunkʼun la spas te Balumilal, te ekʼetik sok te bintik kuxajtik, pero kʼalal la yil spisil te bintik la spas la yal te «mero lec cʼoht» (Gén. 1:31).

8. ¿Bin ya kiltik ta ora ini?

⁸ Jich bitʼil la kiltik ta ejemploetik, te Biblia ya yal te mukʼ skʼoplal te ya jnaʼtik smaliyel. Ta ora ini ya kiltik chaʼchajp te banti ya skʼan ya kakʼtik ta ilel te ya jnaʼtik smaliyel te bin ya spas te Jehová.

9. Ala kaʼiytik te banti ya skʼan ya kakʼtik ta ilel te ya jmaliytik te Jehová.

⁹ Kʼalal ya kaʼiytik te maba ora ya sutbotik te j-oraciontik te Jehová. Teme ya jkʼanbeytik yip koʼtantik yuʼun ya jsitintaytik jun wokolil o ya skoltayotik te banti ya xchʼayotik, jichniwan ya kaʼiytik te yak ta jalajel yuʼun ya sutbotik te bin la jkʼanbeytik. ¿Bin yuʼun ma orauk ya sutbotik te j-oraciontik te Jehová?

10. ¿Bin yuʼun ya skʼan ya jmaliytik te ya yakʼbey sujtib jkʼoptik te Jehová?

¹⁰ Te Jehová ya yaʼiy stojol te jkʼoptik (Sal. 65:2). Kʼalal jich ya jpastik ya yil te ay schʼuunel koʼtantik (Heb. 11:6). Jaʼnix jich mukʼ skʼoplal ta yoʼtan te yakuk jpastik te bin ya jkʼanbeytik sok te bin lek yoʼtan yuʼun (1 Juan 3:22). Jaʼ yuʼun teme yakotik ta spasel tulan ta yijkitayel te bin ma lek, yaniwan skʼan te ya jnaʼtik smaliyel sok te ya jpastik te bin ya jkʼanbeytik ta oración te Jehová. Te Jesús la yakʼ ta naʼel te ma oraukniwan ya sutbotik te jkʼoptik te Dios te kʼalal jich la yal: «Cʼanahic, hich me ya xʼaʼbotex. Lehahic, hich me yac atahic ta lehel. Cʼopojanic, hich me ya xjambotex. Como spisil te machʼatic ya scʼanic, ya me xʼaʼbotic; te machʼa ya sle, ya me sta ta lehel; te machʼa ya stij puerta, ya me xjambot» (Mat. 7:7, 8). Teme jich ya jpastik sok ma jkom jbatik ta spasel te oración, seguro ayotik te jTatik te ay ta chʼulchan ya yaʼiy te jkʼoptik sok ya sutbotik (Col. 4:2).

11. ¿Bin-utʼil ya skoltayotik te Hebreos 4:16 te kʼalal ya kiltik te ya xjalaj te bin ya jkʼanbeytik ta oración te Jehová?

¹¹ Ayniwan ya kaʼiytik te ma orauk ya sutbotik jkʼoptik te Jehová, pero jamal yaloj te ya yakʼbey sujtib «ta yorahil» (kʼopona Hebreos 4:16). Ma skʼan ya kakʼbeytik smulin Jehová te kʼalal ma sutbotik te jkʼoptik te bin-ora ya jkʼantik te joʼotike. Jich bitʼil ay machʼatik bayalix jaʼbil yakik ta skʼanel ta oración te yakuk yilik te ya yichʼ lajinel te bintik ma lek. Jaʼ yuʼun te Jesús la yal te yakuk jkʼantik te ya xtalix te Wentainel yuʼun Dios (Mat. 6:10). Mel-oʼtantik sba teme ya xchebaj koʼtantik te kʼalal maba ya xtal te slajibal yuʼun te bintik ay te kʼalal joʼotik yakotik ta smaliyel (Hab. 2:3; Mat. 24:44). Te bin lek ya jpastik, jaʼ te yakuk jmaliytik te ya spas te bin snopoj te Jehová sok te ma jkom jbatik ta spasel te oración. Te Jehová yakʼbeyojix te bin «cʼahcʼalil soc bin orahil» ya xtal te slajibal. Jaʼ yorail te ya xkʼot ta pasel te bin yaloj te Jehová (Mat. 24:36; 2 Ped. 3:15).

12. ¿Banti wokol ya kaʼiytik te ya kakʼtik ta ilel te ya jnaʼtik smaliyel?

¹² Kʼalal ay bin ma stojil ya kichʼtik pasbeyel. Te ants winiketik ta kʼajkʼal ini,  ya spʼajik te machʼatik yan stsʼumbalik, slumalik, te bin kʼayemik ta spasel o ay chamel ta sbakʼetalik o ta sjolik. Bayal j-abatetik yuʼun Dios kontrainbilik ta swenta te schʼuunel yoʼtanik. Teme jich yak ta kʼaxel ta jtojoltik, ayuk ta koʼtantik te bin la yal te Jesús: «Pero te machʼa ya xcuhch yuʼun cʼalal ta slajibal, ha me ya xcol stuquel» (Mat. 24:13). Pero teme la kaʼiytik stojol te ay machʼa la spas tulan mulil ta jcongregaciontik te snaʼojikix stojol te ancianoetik, ¿bin ya jpastik? ¿Yabal jnaʼtik smaliyel sok ya smukʼulin koʼtantik te ya schajpanike?

13. ¿Bin-utʼil ya skʼan Jehová te ya yichʼ chajpanel te kʼalal ay machʼa ya spas tulan mulil?

¹³ Kʼalal te ancianoetik ya snaʼik stojol te ay machʼa la spas mulil, ya skʼanbeyik Jehová «te pʼijil-oʼtanil te ya xtal ta toyol», ta schajpanel jich te bin-utʼil ya skʼan stukel (Sant. 3:17). Te bin ya spasik, jaʼ te ya skoltayik te machʼa la spas te mulil yuʼun ya sujtes yoʼtan teme jich ya skʼane (Sant. 5:19, 20). Jaʼnix jich ya skanantayik te congregación te banti kʼalal ya xjuʼ yuʼunik sok ya yakʼbeyik smukʼul yoʼtan te machʼatik ay swokolik (2 Cor. 1:3, 4). Kʼalal te ancianoetik ya schajpanik jun tulan mulil, te bin nail ya spasik, jaʼ te ya yilik ta lek spisil te bin la yichʼ pasel. Ya yichʼ tiempo te kʼalal jich ya spasik. Ta patil ya spasik oración, ya stuuntesik te Biblia te kʼalal ya skoltayik sok ya yakʼbeyik tojobtesel, jaʼ chikan te bin mulil la spase (Jer. 30:11). Maba ya yakʼik te ya xkʼax bayal tiempo yuʼun ya schajpanik sok animaltiknax ya spasik, maba ya skʼan ya xkʼax bayal tiempo yuʼun ya yalik te bin la staik ta nopel sok ma orauknax ya skʼan ya spasik. Kʼalal te ancianoetik jich ya spasik te bitʼil ya yal te Jehová, ya sta slekilalik te machʼatik ayik ta congregación. Manchukme jich-abi, ayniwan machʼa kʼux la yaʼiy ta swenta te bin la yichʼ pasel. Teme jich yak ta kʼaxel ta jtojoltik, ¿bin ya xjuʼ ya skoltayotik?

14. ¿Bin ejemplo ta Biblia ya xjuʼ ya skoltayotik teme ay machʼa ay bin ma lek la spasbotik?

¹⁴ ¿Aybal bin ma lek la kichʼtik pasbeyel ta congregación? Teme aye, ta sKʼop Dios ya jtatik ejemploetik te ya  skoltayotik ta smaliyel te jaʼuk ya schajpan te Jehová. Jich bitʼil te José maba chebaj yoʼtan te kʼalal ay bin ma stojiluk la yichʼ pasbeyel yuʼun te yermanotak. Te bin la spase, jaʼ te bajt ta yoʼtan spasbeyel yaʼtel te Jehová sok akʼbot bendición te bitʼil la snaʼ smaliyel sok te kujch yuʼun (Gén. 39:21). Te José la spasbey perdón te yermanotak sok la yil bin-utʼil akʼbot bendición yuʼun te Jehová (Gén. 45:5). Jich bitʼil la spas te José, ay smukʼul koʼtantik te kʼalal ya xnoptsajotik ta stojol te Jehová sok jaʼ ya kakʼtik te ya schajpan te kʼope (Sal. 7:17; 73:28).

15. ¿Bin koltayot jtul hermana yuʼun ya xkujch yuʼun te bin ma stojiluk la yichʼ pasbeyel?

¹⁵ Maniwan jichuk ya xkʼax jwokoltik bitʼil te José, pero kʼux ya kaʼiytik te kʼalal ay bin ya kichʼtik pasbeyel. Teme ay machʼa jtaojtik kʼop sok, manchukme ma testigouk yuʼun Jehová, lek te jaʼ ya jpastik te bin ya yal te Biblia (Filip. 2:3, 4). Kiltik bin la spas jtul hermana kʼalal te sjoy ta aʼtel ay bin yak ta yalel ta stojol te ma smeleliluk. Manchukme kʼux la yaʼiy maba ilin yuʼun, jaʼ la snop ta yoʼtan te bin la spas te Jesús. Te kʼalal yak ta utel, maba la yakʼbey spakol (1 Ped. 2:21, 23). Jich yuʼun te hermana ma la yakʼ ta yoʼtan te bin la yichʼ pasbeyel. Patil la snaʼ stojol te tsakbil ta tulan chamel te sjoy ta aʼtel te ma lek ya yaʼiy sba. Jich yuʼun te hermana kʼot ta yoʼtan te ma spasemaluk yoʼtan te bin la spas. La sta slamalil yoʼtan sok tseʼel yoʼtan yuʼun te la snaʼ smaliyel te kʼalal ay bin ma stojiluk la yichʼ pasbeyel.

16. ¿Bin ya skoltayotik teme ya jsitintaytik wokoliletik? (1 Pedro 3:12).

¹⁶ Teme yakotik ta sitintayel wokolil o ay bin ma stojiluk la kichʼtik pasbeyel, juluk ta koʼtantik te nopol ay ta stojol Jehová te «machʼatic ayic ta mel-oʼtan» (Sal. 34:18). Kʼuxotik ta yoʼtan, melel ya jnaʼtik smaliyel sok ya kakʼbeytik ta stojol te jwokoltik (Sal. 55:22). Te Jehová jaʼ Juez ta stojol spisil te Balumilal sok ya yil spisil te bintik ay (kʼopona 1 Pedro 3:12). Jaʼ yuʼun teme ayotik ta sitintayel wokoliletik te ma xjuʼ kuʼuntik schajpanel,  ayuk ta koʼtantik te ya skʼanya jmaliytik te jaʼ ya schajpan te Jehová.

17. ¿Bin ya yalbotik te Jehová ta Isaías 30:18?

¹⁷ Te jTatik te ay ta chʼulchan nopol ya yakʼbotik bendicionetik ta swenta te Wentainel yuʼun. Te Isaías 30:18 jich ya yal: «Pero te Jehová yac ta smahliyel te ya scʼuxultayex; tseʼel yoʼtan te ya yaʼbeyex awilic te scʼuxul yoʼtan, como te Jehová ha Dios te toj ya xchahpanwan. ¡Bayel me yutsilic spisil machʼatic ha ya smahliyic!». Te machʼatik ya smaliyik te bin ya spas te Jehová, ya staik bendicionetik ta ora ini sok ta pajel chaʼbej ta achʼ balumilal.

18. ¿Bin bendicionetik ya jtatik ta pajel chaʼbej?

¹⁸ Ta achʼ balumilal, maʼyuk bin-ora ya jsitintaytik wokolil sok mel-oʼtan. Maʼyuk machʼa ya spasix te bin ma stojiluk sok maʼyukix bin kʼux ya kaʼiytik (Apoc. 21:4). Ma jmelix koʼtantik ta pajel chaʼbej, melel ayix kuʼuntik spisil (Sal. 72:16; Is. 54:13). ¡Tseʼelnax koʼtantik yuʼun!

19. ¿Bin swentail te yak ta schajpanbelotik te Jehová?

¹⁹ Te Jehová ya skoltayotik ta yijkitayel te bintik ma lek kʼayemotik ta spasel sok te yakuk jchʼitestik lekil taleliletik, jich yak ta schajpanbelotik yuʼun ya x-ayinotik ta Wentainel yuʼun. Mame xchebaj koʼtantik sok mame xlujbotik ta smaliyel. Melel nopol ya xkʼotix ta pasel te bin lek. Kʼax tʼujbil te bin ya jmaliytik ta pajel chaʼbej, jaʼ yuʼun junuk koʼtantik ta smaliyel te ya xkʼot ta pasel te bin yaloj ta jamal te Jehová.