1, 2. Мае ми эскеромы та статьяын?

 ПУКТЭ син азяды: тӥ возьмаськоды, эшты тӥледлы кулэ луись арбериез ваёз шуыса. Мае тӥ шӧдысалды, со вераськем дыре ӧз вуысал ке? Тӥ ӝоже усьысалды, дыр. Мадёнъёсын 13:12 шонер верамын: «Кема дыр ӵоже быдэсмисьтэм оскиськон сюлэмез шугъяськытэ». Нош тӥ тодысалды ке, тӥляд эшты кулэ луись мугъёсъя дырыз дыръя ӧз вуы шуыса, соку тӥледлы чиданы капчигес луысал, дыр.

² Та статьяын ми эскеромы Библиысь кӧня ке возетъёсты, кудъёсыз юрттозы милемлы чидаса возьманы (Бӧрд. 3:26). Собере ми учкомы, кыӵе кык учыръёсын милемлы кулэ чиданы но возьманы, куке Иегова маке но карыны кутскоз. Озьы ик ми тодомы, кыӵе бакель каронъёс возьмало соосты, кинъёс Иеговаез чидаса возьманы дась.

3. Мае возьмато кылъёс, кудъёсыз гожтэмын Мадёнъёсын 21:5?

³ Со сярысь, макем кулэ чидась луыны, верамын Мадёнъёсын 21:5: «Котькудӥз дыртӥсь адями ыштонъёс адӟоно луэ». Мае возьмато та кылъёс? Визьмо луоз ужъёсты дыртытэк, каллен-каллен лэсьтыны.

4. Мае возьмато Мадёнъёсысь 4:18 кылъёс?

⁴ Мадёнъёсын 4:18 гожтэмын: «Шонер улӥсьёслэн сюрессы — пиштыса улӥсь шунды кадь, нунал вордӥськемъя со югытгес но югытгес луэ». Ӵем дыръя ми та кылъёсты герӟаськомы таӵе малпанэн: Иегова пумен-пумен усьтэ аслэсьтыз малпанъёссэ. Озьы ик та кылбур юрттоз милемлы  валаны, кызьы христиан мурт аслэсьтыз улонзэ воштэ но Иеговалы матэгес луэ. Адямилы дыр кулэ, Иеговалы матэгес луон понна. Ми уже кутӥськомы ке визь-кенешъёсты, кудъёссэ Инмар сётэ аслаз Кылыз пыр но организациез пыр, соку эшшо но умойгес возьматӥськомы сямъёсты, кудъёсыз Христослэн вань. Озьы ик ми умойгес тодӥськомы Инмарез. Ойдолэ учкомы, кызьы Иисус та малпанэз валэктӥз.

5. Кызьы Иисус пример вылын возьматӥз, адямилы воштӥськыны дыр кулэ шуыса?

⁵ Иисус пример вылын возьматӥз, Инмарлэн Эксэйлыкез сярысь ивор зӥбыт-востэм адямилэн сюлмаз каллен-каллен будэ шуыса. Со вераз: «Изе но, султэ но, уйин но, нуназе но, кызьы уда, кызьы ӝужа кидыс — со [кизись] уг тоды. Уго музъем ачиз нырысь вож узьым поттэ, собере — шеп, шепе тыраз ю люка» (Марк 4:27, 28). Мае возьмато Иисуслэн кылъёсыз? Кызьы будос каллен-каллен будэ, озьы ик адями но, кудӥз Эксэйлык сярысь иворлы оске, каллен-каллен воштӥськонъёс лэсьтэ. Но макем дышетскись Иеговалы матэгес луэ, сокем умойгес адӟисько солэн умой пала воштӥськонъёсыз (Еф. 4:22—24). Нош милемлы тодамы возёно: пичи кидыслэн будэмез понна Иегова кыл кутэ (1 Кор. 3:7).

6, 7. Малы дышетэ милемыз со, кызьы Иегова музъемез кылдытӥз?

⁶ Куке Иегова кыӵе ке уж борды басьтӥське, та ужлы со чидаса тырмыт дыр висъя. Инмар тае лэсьтэ, солэсь нимзэ сӥлы мед карозы шуыса, озьы ик мукетъёслы пайда ваён понна. Тае умой адӟыны луэ отысь, кызьы Иегова адямиослы музъемез пумен-пумен дасяз.

⁷ Библиын гожтэмъя, асьмелэсь музъеммес кылдытон понна, Иегова «солэсь быдӟалазэ мертаз», «понӥз солэсь пыкъет иззэ» но сое «юн инъетъёс вылэ» пуктӥз (Иов 38:5, 6; Пс. 103:5). Ужзэ быдэстыкуз, Иегова тырмыт дыр висъяз, солы дунъет сётон понна (Ул.-выл. 1:10, 12). Пуктэ син азяды, мае шӧдӥзы кылчинъёс, кудъёсыз чаклазы,  кызьы быдэс дунне но музъем пумен-пумен кылдытэмын вал. Иеговалэн инмысь пиосыз сокем паймизы солэн кибашлы луэмезлы, соос шумпотыса Инмарез данъяны кутскизы (Иов 38:7). Ма сярысь та вера? Быдэс дуннеез кылдытон понна, трос сюрс аръёс кошкизы. Аслаз ужъёсыз шоры учкыса, Иегова вераз, солэн ваньмыз «туж умой» пӧрмиз шуыса (Ул.-выл. 1:31).

8. Мае ми али эскеромы?

⁸ Кызьы ми адӟимы, Библиын вань трос возетъёс, кудъёсыз возьмато, макем кулэ чидась луыны. Нош али ми эскеромы кык учыръёсты, кудъёсаз милемлы кулэ возьманы, куке Иегова маке но карыны кутскоз.

9. Кыӵе учырын милемлы Иеговаез возьмано?

⁹ Куддыръя милемлы возьмано луэ, куке Иегова вӧсяськонмылы ответ сётоз. Куке ми Иеговалэсь кужым куриськомы, шуг-секытмы пыр потон понна яке кыӵе ке умойтэм сямъёсынымы нюръяськон понна, ответсэ соку ик ум адӟиське. Малы Иегова вань вӧсяськонъёсмылы соку ик ответ уг сёты?

10. Малы милемлы чидаса возьманы кулэ вӧсяськонъёсмылы ответъёс?

¹⁰ Куке ми вӧсяськиськомы, Иегова милемыз сак кылзэ (Пс. 64:3). Милям сюлмысь вӧсяськонъёсмы Иеговалы возьмато, ми солы оскиськомы шуыса (Евр. 11:6). Эшшо Иеговалэн адӟемез потэ, мылкыд кариськомы-а ми асьмелэн вӧсяськонъёсмыя улыны но солэсь эриксэ быдэсъяны (1 Иоанн 3:22). Кылсярысь, ми Иеговаез куриськомы юрттыны, кыӵе ке урод сямъёсынымы нюръяськыны. Сыӵе учыре милемлы чидась луоно но кужым пононо, та урод сямен нюръяськон понна. Иегова котькуд вӧсяськонмылы соку ик ответ уг сёты шуыса верало Иисуслэн кылъёсыз но: «Курелэ — тӥледлы сётэмын луоз; утчалэ — шедьтоды; йыгаське — тӥледлы усьтозы. Уго котькудӥз курись мурт басьтэ, утчась мурт шедьтэ, йыгаськисьлы — усьтозы» (Матф. 7:7, 8). Ми та визь-кенешлэсь кылзӥськиськомы ке но ялан вӧсяськиськомы ке, соку оскыны быгатӥськомы: Инмысь Атаймы кылэ милемыз но одно ик ответ сётоз (Кол. 4:2).

11. Кызьы милемлы юрттыны быгато Еврейёслы 4:16 кылъёс, куке ми малпаськомы, вӧсяськонмылы ответ ӝега шуыса?

¹¹ Куддыръя ми малпаны быгатӥськомы, Иегова вӧсяськонъёсмылы соку ик ответ уг сёты шуыса. Нош учконо ке, со ответ сётэ «кулэ дыръя». (Лыдӟе Еврейёслы 4:16.) Соин ик кулэ ӧвӧл Иеговаез янгыше уськытыны, ми вӧсяськонмылы ответ ӧм басьтэ шуыса соку, куке милям потэ вал. Кылсярысь, тросэз адямиос дасо аръёс ӵоже ини вӧсясько, Инмарлэн Эксэйлыкез та лек дуннелы пум мед поноз шуыса. Иисус вераз, та сярысь вӧсяськыны кулэ шуыса (Матф. 6:10). Нош визьмо ӧй луысал Инмарлы оскемысь дугдыны, малы ке шуоно выль дунне ӧз вуы соку, куке адямиос сое возьмазы! (Авв. 2:3; Матф. 24:44). Умой луысал азьланяз но Иеговалы вӧсяськыны но оскыны, со ответ сётоз шуыса. Та дуннелы пум дырыз дыръя вуоз, малы ке шуоно Иегова со понна «нуналэз но часэз» бырйиз ини (Матф. 24:36; 2 Пётр 3:15). Со сяна, солэн быръем дырыз тужгес но тупамон луоз соослы, кинъёс Иеговаез ярато.

12. Эшшо кыӵе учырын чиданы туж ик капчи ӧвӧл?

¹² Куддыръя милемлы возьмано луэ, куке шонерлыктэм ужъёсын пумиськиськомы. Та дуннеысь тросэз адямиос адӟемпотостэм каро мукет расаысь, калыкысь потэм адямиосты. Озьы ик пиосмуртъёс кышномуртъёсты  ултӥяны быгато, нош кышномуртъёс — пиосмуртъёсты. Со сяна, уродэн учкыны быгато сӧсыр адямиос шоры, озьы ик соос шоры, кинъёслэн психикаен герӟаськем висёнзы вань. Иеговалэн тросэз Адӟись-Ивортӥсьёсыз но шонерлыктэм ужъёсын пумиськыло. Ми но сыӵе ужъёсын пумиськимы ке, милемлы тодамы возьыны кулэ Иисуслэсь кылъёссэ: «Пумозяз чидам мурт утиськоз» (Матф. 24:13). Нош куддыръя кин ке но христиан муртъёс пӧлысь но секыт сьӧлык лэсьтэ. Шуом, тӥ со сярысь тодӥды, тӧроос но со сярысь тодо. Быгатоды-а тӥ возьманы, кыӵе ужпум соос кутозы? Чиданы капчигес луоз, куке тодӥськомы, мае куре Иегова тӧроослэсь, та выллем ужъёсты эскерыкузы.

13. Мае Иегова возьма тӧроослэсь, куке соос эскеро секыт сьӧлыкам христиан муртлэсь ужзэ?

¹³ Куке тӧроос тодо, кенешын секыт сьӧлык лэсьтэмын вал шуыса, соос «вылӥысь васькись визьлык» курыса вӧсясько, та югдур шоры Иеговалэн синъёсыныз учкон понна (Иак. 3:17). Соослэн ужпумзы — юрттыны сьӧлыкам адямилы «ӧрекчаськон сюресэз» кельтыны (Иак. 5:19, 20). Озьы ик соос тыршо лэсьтыны ваньзэ, мае быгато, кенешез утён понна но буйгатон понна соосты, кинъёс та секыт сьӧлык сэрен курадӟоно луизы (2 Кор. 1:3, 4). Куке тӧроос тодо, кин ке но секыт сьӧлыказ шуыса, соос нырысь тодыны тыршо, мар зэмзэ ик луиз. Нош со понна дыр кулэ. Собере соос вӧсясько, тыршыса быръё Библиысь кылбуръёсты, кудъёсыз сьӧлыкам адямилы юрттозы, но сое сьӧлыкамез понна кыл кутыто (Иер. 30:11). Тӧроос дыртыса ужпум уг куто, берлолы но сое уг кельто. Соослэн Иеговалэсь курон-косонъёссэ кылзэмзы быдэс кенешлы пайда вае. Тӧроос ваньзэ шонер лэсьто ке но, христиан муртлэн сьӧлыкез куректонэн пумиськем вын-агайёслэн но сузэр-апайёслэн сюлмазы мур яраос кельтыны быгатэ. Пумиськиды-а тӥ та выллем учырен? Пумиськиды ке, соку мар юрттоз тӥледлы вӧсь луэмдэс капчигес карыны?

14. Библиысь кыӵе пример юрттоз тӥледлы, куке тӥ пумиськиды кенешын шонерлыктэм ужен?

¹⁴ Тӥ но кенешын пумиськиды, дыр, шонерлыктэм ужъёсын. Соку тӥ тросэзлы дышетскыны быгатоды Библиын гожтэм  адямиослэсь, кудъёсыз чидаса возьмазы, куке Иегова ваньзэ тупатоз. Тодамы ваёмы Иосифез. Со аслаз агайёсыз сэрен куректонэн пумиськоно луиз. Озьы ке но со йыркуръяськыса ӧз улы. Иосиф вань кужымзэ сётӥз Иеговалы ужаны-тыршыны, нош чидамез но юн луэмез понна Иегова сое бакель кариз (Ул.-выл. 39:21). Дыр ортчыса, Иосиф простить карыны быгатӥз агайёссэ, кудъёсыз солы сомында куректон вайизы, но адӟиз, та югдуръёсын Иегова кивалтӥз шуыса (Ул.-выл. 45:5). Иосиф сямен ик, ми но чидаса возьманы быгатомы, куке Иегова дырыз дыръя ваньзэ тупатоз (Пс. 7:18; 72:28).

15. Мар юрттӥз одӥг сузэрмылы, куке со пумиськиз шонерлыктэм ужен?

¹⁵ Зэм но, Иосифлэн кадь куректонэн ми ваньмы ум пумиське, нош котькудӥз ми пӧлысь вӧсь луыны быгатэ, куке шонерлыктэм ужен пумиське. Милемыз вӧсь карись адями Иеговалы ужа-тырше-а яке уг-а, милемлы юрттозы Библиысь возетъёс (Флп. 2:3, 4). Эскеромы одӥг сузэрмылэсь учырзэ. Со тодӥз, солэн ӵош ужась эшез со сярысь урод кылъёс вӧлмытэ шуыса. Сузэрмылы туж вӧсь луиз ке но, со ӧз тыршы пунэмзэ берыктыны. Со интые, со малпаськиз Иисуслэн примерез вылын. Иисусэз трос пол ултӥязы ке но, со соослэн пумитазы номыр ӧз вера (1 Пётр 2:21, 23). Соин ик сузэрмы ӵош ужась эшезлэн кылъёсызлы бадӟым саклык ӧз висъя. Берлогес со тодӥз, ӵош ужасезлэн секыт висёнэз вань шуыса, кудӥз сэрен со туж сюлмаськыса улӥз. Та юрттӥз сузэрмылы валаны, ӵош ужась эшез малпаськытэк вераз, вылды, шуыса. Сузэрмы туж шумпотӥз, куке чидамезлы луыса та югдурын со ассэ туж визьмо возиз. Со ӵош ужасез вылэ йыркуръяськыса ӧз улы.

16. Кыӵе малпан тӥледыз буйгатыны быгатэ, тӥ шонерлыктэм ужен пумиськиды ке?

¹⁶ Тӥ куректӥськоды ке, шонерлыктэм ужен пумиськиды шуыса, яке кыӵе ке мукет мугъёсын сэрен, тодады возе: Иегова матын луэ соослы, кинъёслэн мылкыдзы куашкамын (Пс. 33:19). Со яратэ тӥледыз, тӥ чидаськоды шуыса но шуг-секытъёстэс сэрттыны-пертчыны солы сётӥськоды шуыса  (Пс. 54:23). Иегова — быдэс музъемлэн Судьяез. Со ваньзэ адӟе. (Лыдӟе 1 Пётрлэсь 3:12.) Соин ик, тӥ секыт югдуре сюриды ке но уд ке тодӥське, кызьы отысь потоно, тодады возе: туж кулэ Иеговаез чидаса возьманы.

17. Кызьы Иегова милемыз бакель кароз, Исаиялэн 30:18 гожтэмъя?

¹⁷ Ӝоген Инмысь Атаймы бакель кароз милемыз аслаз Эксэйлыкез пыр. Выль дуннелэн берыктэмаз Исаиялэн 30:18 гожтэмын: «Иегова возьмалоз, тӥледлы ӟечлыксэ возьматон понна, соин ик со ӝутскоз, тӥледыз гажан-жалян понна. Уго Иегова — шонерлыклэн Инмарез. Шудоесь ваньмыз сое возьмасьёс». Соос, кинъёс Иегова вылэ оскисько но сое возьмало, трос бакель каронъёс басьтозы та дуннеын но, озьы ик выль дуннеын но.

18. Кыӵе бакель каронъёс милемыз возьмало?

¹⁸ Выль дуннеын Инмарлэн ужась-тыршисьёсызлэн нокыӵе шуг-секытъёссы но сюлмаськонъёссы уз луэ ини. Шонерлыктэм ужъёс но вӧсь луон, кудзэ со вае, пыраклы быдтэмын луозы (Усьт. 21:4). Нокин но уз сюлмаськы ини кулэяськонъёсыз сярысь, малы ке шуоно ваньмыз тырмыт луоз (Пс. 71:16; Ис. 54:13). Макем бадӟым шумпотон со вае!

19. Кыӵе улонлы Иегова милемыз али дася?

¹⁹ Али Иегова милемыз дася аслаз кивалтэмез улсын улыны. Со юрттэ милемлы урод сямъёсынымы нюръяськыны но умой сямъёс будэтыны. Милемыз туж умой азьпал улон возьма, соин ик эн сётске! Ойдолэ азьланяз но чиданмес возьматомы но возьмаломы, куке Иегова вань кылсётонъёссэ быдэстоз!