1-2. Die yen a cha fuẹrẹn vwẹ uyono nana?

MAVỌ yen oma ru we ọ da dianẹ wọ rhẹro rẹ orọnvwọn ọvo rọ ghanre kẹ wẹ mamọ jẹ ọ fobọ te we obọ-ọ? Ofu dje we? Oborẹ Isẹ 13:12 tare sa dia uyota vwọ kẹ ohwo tiọyena, ọ tare nẹ, “emu rẹ phi ẹro phihọ nu ra da kparọ ọ nẹrhẹ udu rẹ ohwo mwa ọga.” Ọ da rha dianẹ o vwo orọnvwọn ọghanghanre ọvo rọ nẹrhẹ obo wo rhẹro rọyen na kruko vwo-o? Ọtiọyena wo che vwo odirin ji vwo owenvwe wọ vwọ hẹrhẹ.

² Vwẹ uyono nana, avwanre cha fuẹrẹn uchebro ri Baibol evo re sa chọn avwanre uko vwo vwo uruemu rẹ a vwọ “hẹrhẹ.” (Maika 7:7) A da mrẹ ọyena nu, ka cha ta ota kpahen ẹdia ivẹ ro de fo nẹ avwanre vwo odirin hẹrhẹ Jihova. Ukuotọ rọyen, ka cha ta ota kpahen ebruphiyọ rehẹ obaro vwọ kẹ ihwo ri vwo owenvwe rẹ ayen vwọ hẹrhẹ Jihova.

3. Die yen Isẹ 13:11 yono avwanre?

³ A niyẹnrẹn rẹ udje ọvo ro dje oboresorọ re vwo vwo odirin phiyọ Isẹ 13:11. Ẹkpo yena tare nẹ, “efe rẹ okpakpa obobotọ ọ ra, ẹkẹvuọvo ohwo rọ kọn okọn ememerha ko che vwo buebu.” Die yen ẹkpo ri Baibol nana yono avwanre? Ọyen emu rẹ aghwanre siẹrẹ e de vwo odirin ji ru erọnvwọn ememerha.

4. Die yen uchebro rọhẹ Isẹ 4:18 yono avwanre?

⁴ Isẹ 4:18 tare nẹ, “Idjerhe re ohwo esiri ọhọhọ ọke ro rhie cha, ro lo gala gala bẹsiẹ rẹ ọke vwo kpo.” Eta nana dje oborẹ Jihova vwọ chọn ihwo rọyen uko vwo vwo ẹruọ rẹ ọhọre rọyen ememerha. Ẹkpo nana je sa chọn avwanre uko vwo vwo ẹruọ rẹ oborẹ Onenikristi ru ewene vwẹ akpeyeren rọyen ji siẹkẹrẹ Jihova phiyọ wan. Oyerinkugbe  rẹ avwanre vẹ Jihova dia obo re brokpakpa rọye-en. Ọ reyọ ọke. Siẹrẹ avwanre da nabọ frẹkotọ yono Baibol na je vwẹ uchebro rehẹ Ota rẹ Ọghẹnẹ vẹ e rẹ ukoko ri Jihova vwọ kẹ avwanre vwo ruiruo, ememerha na kẹ avwanre sa vwẹrokere Kristi. Ọke yena re, kẹ avwanre ji che vughe Ọghẹnẹ phiyọ. Roro kpahen oborẹ Jesu vwẹ udje vwo dje ẹkpo nana fiotọ wan.

5. Udje vọ yen Jesu vwo djephia nẹ ọ reyọ ọke e ki se ruẹ ewene?

⁵ Jesu vwẹ udje vwo dje oborẹ ovuẹ rẹ Uvie na rẹ avwanre ghwoghwo na vwọ họhọ ubi otete rọ djẹ ememerha vwẹ ubiudu rẹ ihwo ri vwo ẹguọno rẹ obo ri yoma. Ọ da ta: “Emamọ na me djẹ phia e me rho kpenu ọ [ọkekankọn na] gbe riẹn obo re epha-a. Otọ na me mọ emamọ rẹ obọ rọye ẹsosuọ uvwere, kẹsiẹye o ki te ẹbe, ukuko rọye uvi rẹ ọka kọ phia vwe enu rẹ ẹbe na.” (Mak 4:27, 28) Ọrhọ yen ẹkpo rẹ ota ri Jesu na? O djephia nẹ kirobo rẹ okankọn djẹ ememerha ye, ọtiọyen ohwo ro rhiabọreyọ ovuẹ rẹ Uvie na ji ru ewene ememerha vwẹ ẹga ri Jihova. Kerẹ udje, ọke rẹ ihwo ra vwẹ Baibol yono de siẹkẹrẹ Jihova phiyọ ye, kẹ avwanre cha rhe mrẹ ewene iyoyovwin sansan rẹ ayen rure. (Ẹfe. 4:22-24) Ofori nẹ avwanre karophiyọ nẹ Jihova yen nẹrhẹ ubi otete tiọyena djẹ.—1 Kọr. 3:7.

6-7. Die yen avwanre yono vwo nẹ oborẹ Jihova ma akpọ na wan?

⁶ Vwẹ kemu kemu ro ruẹ eje, Jihova reyọ ọke ro fori eje vwo ruẹ obo rọ guọnọ ru. O ruẹ ọnana rere o vwo jiri odẹ rọyen je chọn ihwo efa uko. Kerẹ udje, vwẹ ẹro roro idjerhe rẹ Jihova vwo muegbe rẹ otọrakpọ na vwọ kẹ ihworakpọ ememerha.

⁷ Ro vwo dje oborẹ Jihova ma otọrakpọ na wan, Baibol na de djisẹ rẹ ọrhuẹrẹphiyọ rọyen, “ovwanvwọn rọye,” obo rọ “tọn phihọ esiri rọye” kugbe obo rọ “vwẹ ubienyẹ rọye vi” wan. (Job 38:5, 6)  Ọ tobọ ghwọrọ ọke vwọ fuẹrẹn obo rọ mare na. (Jẹn. 1:10, 12) Wọ sa vwẹ ẹro roro oborẹ oma ru emekashe na ọke rẹ ayen vwọ mrẹ emama rẹ Ọghẹnẹ re vwẹ oma phia ememerha? Omuẹro nẹ oma vwerhen ayen mamọ. Ọyensorọ ayen vwo “kperẹ vẹ aghọghọ.” (Job 38:7) Die yen avwanre yonori? Ọ reyọ ikpe uriorin buebun Jihova vwọ ma emama rọyen na, ẹkẹvuọvo ọke rọ vwọ mrẹ oborẹ ọ ghwọrọ ọke vwọ ma na, ọ da tanẹ “oyovwiri gangan.”—Jẹn. 1:31.

8. Die yen a cha fuẹrẹn enẹna?

⁸ Kirobo ra mrẹre vwẹ idje re djunute re na, avwanre sa mrẹ iyono ri Baibol rehẹ Ota rẹ Ọghẹnẹ ri dje ọghanrovwẹ rẹ odirin phia. Enẹna, e gbe jẹ a fuẹrẹn ẹdia ivẹ ro de fo nẹ avwanre vwo owenvwe ra vwọ hẹrhẹ Jihova.

9. Ẹdia vọ yen o de fo nẹ a hẹrhẹ Jihova?

⁹ Ọkiọvo a cha hẹrhẹ Jihova ọ vwọ kpahenphiyọ ẹrhovwo rẹ avwanre. Ọke rẹ avwanre da nẹrhovwo vwọ kẹ ẹgba re se vwo yerin ghene ebẹnbẹn yẹrẹ ukẹcha re se vwo phi ovwiẹrẹ kparobọ, e se roro nẹ ọ reyọ Jihova ọke grongron ọ ke kpahanphiyọ ẹrhovwo avwanre. Diesorọ Jihova rha kpahanphiyọ ẹrhovwo rẹ avwanre eje ugege ra vwọ nẹ-ẹ?

10. Diesorọ a vwọ guọnọ odirin siẹrẹ avwanre da nẹrhovwo?

¹⁰ Jihova nabọ kerhọ rẹ ẹrhovwo rẹ avwanre. (Une 65:2) Ẹrhovwo rẹ avwanre pha kerẹ odjephia rẹ esegbuyota rẹ avwanre vwẹ ẹro ri Jihova. (Hib. 11:6) Oma vwerhen Jihova siẹrẹ ọ da mrẹ owenvwe rẹ avwanre vwori re vwo ru nene ẹrhovwo rẹ avwanre ji ru ọhọre rọyen. (1 Jọn 3:22) Ọtiọyena, ofori nẹ avwanre vwo odirin ji ru nene ẹrhovwo rẹ avwanre siẹrẹ avwanre da guọnọ phi orharhe uruemu yẹrẹ ovwiẹrẹ kparobọ. Kirobo ri Jesu tare, ọ dia ọkieje yen Jihova vwọ kpahanphiyọ ẹrhovwo rẹ avwanre ugege ra vwọ nẹ-ẹ. Jesu da ta: “Nọ, ka kẹ wẹ: guọnọ kẹ wọ mrẹ; hworo ẹchẹ kẹ rhie kẹ wẹ: Kidie ohwo kohwo rọ nọre kọ mrẹ, ọ rọ guọnọre ko vwo, ọ ro hworo ẹchẹ ke rhie kẹ.” (Mat. 7:7, 8) Ọke rẹ avwanre de ru nene uchebro rọyen na ji “phi obọ phihọ ẹrhovwo ẹnẹ,” e se vwo imuẹro nẹ Ọsẹ rẹ avwanre rọhẹ obo odjuvwu che nyo avwanre je kpahenphiyọ ẹrhovwo rẹ avwanre.—Kọl. 4:2.

11. Mavọ yen Hibru 4:16 sa vwọ chọn avwanre uko siẹrẹ e de roro nẹ Jihova fobọ kpahenphiyọ ẹrhovwo rẹ avwanre-e?

¹¹ E se no nẹ ọ fobọ kpahenphiyọ ẹrhovwo rẹ avwanre-e, ẹkẹvuọvo Jihova veri nẹ ọ cha kpahenphiyọ ẹrhovwo rẹ avwanre “vwẹ ọke rẹ ọbẹnvwẹ” yẹrẹ ọke ro fori. (Se Hibru 4:16.) Ọtiọyena, Jihova rha kpahenphiyọ ẹrhovwo rẹ avwanre kpakpata kerẹ oborẹ avwanre guọnọre-e, ofori nẹ avwanre brenu kpahọ-ọn. Kerẹ udje, ikpe buebun re, yen ihwo buebun vwọ nẹrhovwo rere Uvie rẹ Ọghẹnẹ vwo phi oba phiyọ eyeren nana. Jesu tobọ tanẹ a nẹrhovwo kpahọn. (Mat. 6:10) Ọyen emu rẹ ẹkpa siẹrẹ a da vwẹ uphẹn vwọ kẹ esegbuyota rẹ avwanre nẹ ọvwiẹrẹ kidiẹ nẹ oba na rhere vwẹ ọke rẹ ihworakpọ vwo rhẹro rọye-en. (Hab. 2:3; Mat. 24:44) Ofori nẹ avwanre hẹrhẹ Jihova je nẹrhovwo vworẹ esegbuyota. Oba na cha rhe vwẹ ọke rẹ ofori, kidie Jihova sane “ọke na eyẹ ẹdẹ na” phiyotọ nure. Ẹdẹ yena cha dia omamọ ẹdẹ vwọ kẹ avwanre eje.—Mat. 24:36; 2 Pita 3:15.

12. Ọke vọ yen ọ ma vwọ dia bẹnbẹn re vwo vwo odiri?

 ¹² Ofori nẹ e vwo odirin ọke ra da hẹrhẹ orhiẹn-ebro abavo. Ihworakpọ fobọ vwẹ ẹro okueku vwo nẹ ihwo re fẹnẹ ayen, ihwo rẹ ẹkuotọ yẹrẹ ejajẹ rayen fẹnẹre. O vwo ihwo efa re nẹ kueku fikiridie nẹ asan ọvo shechọ vwẹ oma rayen. Buebun rẹ idibo ri Jihova chirakon rẹ oshenyẹ fikirẹ oborẹ ayen segbuyota. Ọke rẹ ihwo de ru avwanre chọ vwẹ idjerhe ọtiọyena, ofori nẹ a karophiyọ eta ri Jesu rọ vwọ ta: “Ihwo ri se chirako te oba, kẹ eye re cha rhọ.” (Mat. 24:13) Ẹkẹvuọvo, die yen wo che ru wọ da riẹn nẹ ohwo ọvo vwevunrẹ ukoko na ru obo re chọre? Ekpako na de nyo kpahọn, wo che vwo odiri je vwẹroso ayen nẹ ayen cha vwẹrote ota na vwo nene odjekẹ ri Jihova? Die yen ọnana churobọ si?

13. Die yen Jihova guọnọ nẹ ekpako na ru ọke rẹ ohwo ọvo de ru umwemwu?

¹³ Ekpako na da riẹn nẹ ohwo ọvo ru obo re chọre vwevunrẹ ukoko na, kẹ ayen nẹrhovwo vwọ yare “aghwanre ro nẹ obenu rhe” rere ayen se vwo vwo ẹruọ rẹ ẹdia na kirobo ri Jihova vwo ẹruọ rọyen. (Jems 3:17) Ọdavwẹ rayen ọyen ayen vwọ chọn ohwo ro ru chọ na uko vwo “kurhẹriẹ nẹ idjerhe rọye” ọ da dia oborẹ ayen se ru. (Jems 5:19, 20) Ayen je guọnọ ru oborẹ ayen se ru eje ayen sa vwọ sẹro rẹ ukoko na je vwẹ uchebro kẹ ihwo rẹ ẹwẹn rayen kuọnre. (2 Kọr. 1:3, 4) Ọke rẹ ekpako na da mrẹvughe nẹ ohwo ọvo ru umwemwu, ẹsosuọ, ayen cha nabọ guọnọ otọ rẹ ota na tavwen, ọnana sa reyọ ọke. Kẹ ayen cha nẹrhovwo je guọnọ odjekẹ ro nẹ Baibol na rhe, ayen me je vwẹ “umuchẹghwọ” ro fo vwọ kẹ ẹdia na vwọ phia. (Jer. 30:11) Dede nẹ ekpako na ghwọrọ ọke-e, jẹ ayen ji bru orhiẹn rẹ okpakpa-a. Siẹrẹ ekpako na de nene odjekẹ ri Jihova, ukoko na eje cha mrẹ erhuvwu gbidiki ro che no rhe. Ekpako na da tobọ ru erọnvwọn nene odjekẹ ri Jihova dede, ẹwẹn rẹ ohwo re gbeku na sa je kuọnrọ. Ọ da dianẹ ọnana obo re phia kẹ wẹ, die yen wo se ru rere ọmiavwẹ na se vwo kpotọ?

14. Udje ri Baibol vọ yen sa chọn wẹ uko, ọ da dianẹ oniọvo ọvo gbe we ku?

¹⁴ O vwo ọke ọvo rẹ ohwo ọvo yẹrẹ oniọvo ọvo vwo gbe we ku jovwore? Wọ sa mrẹ omamọ rẹ idje vwẹ Baibol na ri  yono avwanre oborẹ a sa vwọ hẹrhẹ Jihova ọke rọ da rhuẹrẹ ẹdia evo phiyọ. Kerẹ udje, dede nẹ Josẹf rioja rẹ oshenyẹ vwẹ obọ rẹ iniọvo rọyen, ọ vwẹ uphẹn vwọ kẹ umwemwu rayen, rọ vwọ nẹrhẹ ọ dia orharhe rẹ ohwo-o. Ukperẹ ọtiọyen, ọ tẹnrovi oyerinkugbe rọyen vẹ ọ ri Jihova, Jihova de bruba kẹ fikirẹ odirin rọyen. (Jẹn. 39:21) Ọke vwọ yanran na, Josẹf de vwo ghovwo iniọvo rọyen ri gbere ku na, ọ da je rhe mrẹ oborẹ Jihova vwo bruphiyọ kẹ ọyen re. (Jẹn. 45:5) Kerẹ Josẹf, avwanre sa mrẹ obicha siẹrẹ e de sikẹrẹ Jihova je vwẹ uphẹn kẹ ọ vwọ rhuẹrẹ erọnvwọn phiyọ.—Une 7:17; 73:28.

15. Die yen chọn oniọvo aye ọvo uko ro se vwo phi oshenyẹ kparobọ?

¹⁵ Vwọrẹ uyota, ọ dia oshenyẹ eje yen ganre kerẹ e rẹ Josẹf rhiẹro mrẹ na-a, ẹkẹvuọvo e de ru avwanre chọ, ọ je sa da avwanre mamọ. Ọke rẹ ohwo de ru avwanre chọ, ọ da tobọ dianẹ ọ dia Oseri ri Jihova-a, erere che no rhe a da vwẹ uchebro ri Baibol vwo ruiruo vwẹ ẹdia ọtiọyen. (Fil. 2:3,4) Roro kpahen udje ọvo. Ivun miovwo oniọvo aye ọvo mamọ ọke rọ vwọ riẹn nẹ ohwo rọ vẹ ọyen gbe ruiruo, ta eta ri je fo kpahan ọyen vwẹ obuko. Ukperẹ ọ vwọ fobọ muophu, oniọvo aye na da nabọ ghwọrọ ọke vwo roro kpahen udje ri Jesu. Ọke ra vwọ harhọ, ọ harhe ihwo rhivwi-in. (1 Pita 2:21, 23) Eriyina, oniọvo na de brorhiẹn rọ vwọ kpairoro vrẹ obo re phiare na. Ọke vwọ yanran na, oniọvo na de rhi noso nẹ ohwo rọ vẹ ọyen gbe ruiruo na nene okpọga ọvo muabọ, o ji rhiẹromrẹ ukeke ọgangan. Oniọvo na de no nẹ ohwo rọ vẹ ọyen gbe ruiruo na di muẹ eta ta. Ọtiọyena, oma da vwerhen oniọvo na mamọ, nẹ ọyen se chirakon rẹ oshenyẹ na, o de ri vwo ufuoma.

16. Die yen sa chọn wẹ uko siẹrẹ wo de chirakon rẹ oshenyẹ? (1 Pita 3:12)

¹⁶ Ọ da dianẹ wo chirakon rẹ oshenyẹ yẹrẹ ẹdia efa, karophiyọ nẹ Jihova sikẹrẹ “otu rẹ udu rayen vwirhiri.” (Une 34:18) O vwo ẹguọnọ wẹ fikiridie wo vwo odirin wo ji mu ẹnwan wẹn vwọ ya. (Une 55:22) Ọyen oguẹdjọ rẹ akpọ na eje. Ọ mrẹ erọnvwọn eje re phia. (Se 1 Pita 3:12.) Ọke wo de nene ẹdia ọgangan re  wọ cha sa rhuẹrẹphiyọ-ọ muabọ, wo vwo owenvwe wọ vwọ hẹrhẹ Jihova?

17. Kirobo rẹ Aizaya 30:18 tare, imuẹro vọ yen Jihova vwọ kẹ avwanre?

¹⁷ O rhe che kri-i, Ọsẹ rẹ avwanre rọhẹ obo odjuvwu che ku ebruphiyọ gbidiki ku avwanre womarẹ Uvie rọyen. Aizaya 30:18 da ta: “Ọrovwohwo vwọ hẹrhẹ ro vwo ni arodọvwẹ wẹ kọye ọ da vwẹ oma rọye kpenu ro vwo dje aruẹdọn rọye kẹ wẹ. Kidie Ọrovwohwo ọye Ọghẹnẹ rẹ ọsoso ebruba kẹ ayen ihwo re hẹrherẹ.” Ihwo re hẹrhẹ Jihova che vwo ebruphiyọ buebun asaọkiephana kugbe akpọ kpokpọ rọ cha vwẹ obaro na.

18. Ebruphiyọ vọ yen avwanre rhẹro rọyen?

¹⁸ Ihwo rẹ Ọghẹnẹ da ro akpọ kpokpọ na re, o re vwo ọke vuọvo rẹ ayen che vwo chirakon rẹ ẹnwan yẹrẹ egbabọse rẹ ayen rhiẹro mrẹ nonẹna-a. Oshenyẹ che vwoba, odjadja ji che no. (Ẹvwọ. 21:4) Avwanre rha cha ro ẹnwan rẹ oborẹ avwanre guọnọre-e, kidie erọnvwọn eje ra guọnọre cha dia buebun. (Une 72:16; Aiz. 54:13) A mrẹ vwo dje ebruphiyọ tiọyena-a!

19. Die yen Jihova muegbe rẹ avwanre hẹrhẹ enẹna?

¹⁹ Enẹna, Jihova muegbe rẹ avwanre a sa vwọ dia vwẹ otọ rẹ usuon rọyen womarẹ ọ vwọ chọn avwanre uko vwọ kẹnoma kẹ erharhe rẹ iruemu ri rhe avwanre ji vwo iruemu re vwerhen oma. Wo jẹ ofu dje we wọ vwọ dobọ rẹ ẹga ri Jihova ji-i. Omamọ rẹ akpeyeren cha vwẹ obaro na! Avwanre vwo rhẹro rẹ omamọ rẹ akpeyeren vwẹ obaro na, e gbe jẹ avwanre vwẹ ọkieje vwo vwo owenvwe ra vwọ hẹrhẹ Jihova ro vwo ruẹ orugba rẹ iruo rọyen na!