1-2. Cossa che ndaremo studiar adesso?

PROA imaginar che te sì drio spetar che qualchedun el te porte una roba che te vol tanto, ma questa roba no la riva quando te vol. Fursi te te senti come dise Proverbi 13:12: ‘Quando una roba no la sucede quando spetemo, el cuor el sofre.’ Ma, se te capissi parché che questa roba no la ze ancora rivada, fursi te sarè bon spetar con passiensa.

² In questo stùdio, ndaremo ricordarse arquanti prinsipi dela Bìblia che i ne giuta a spetar con passiensa la ora de Geovà far le robe. (Mic. 7:7) Ndaremo anca veder due robe che pol suceder nela nostra vita che gavaremo de spetar Geovà far qualcossa. Dopo, ndaremo studiar sora le bele robe che Geovà el promete dar a quei che i speta con passiensa.

3. Cossa che imparemo de Proverbi 13:11?

³ Proverbi 13:11 dise che quando presto imuciemo su soldi, anca presto li perdemo. Ma, quando li imuciemo pin pian, restemo cada volta con de pi. Questo testo el mostra che el sàbio el porta passiensa parché el sa che, quando el fà le robe un pochetin ala volta, le robe le va ben.

4. Che prinsìpio ghen’è in Proverbi 4:18?

⁴ Proverbi 4:18 dise: ‘Ma la strada del giusto la ze come la luce che la slusa ala matina, che la sciara cada volta de pi fin che pròpio sciara el di.’ Questo testo el mostra che  Geovà ne giuta a capir pin pian quel che lu el ndarà far. El testo anca ne giuta a capir che ghe vol tempo par un fradel cognosser cada volta meio a Dio, gaver le medèsime qualità de Cristo e deventar pi amigo de Geovà. Noantri saremo boni de far questo sol se seitemo a studiar la Bìblia, se metemo in pràtica quel che imparemo e se obedimo ala organisassion de Geovà. Podemo capir meio questo par meso de una ilustrassion che Gesù el ga contà.

5. Che ilustrassion Gesù el ga fato?

⁵ Varda una ilustrassion de Gesù che mostra cossa che sucede quando una persona scomìnsia a imparar sora el Regno de Dio. Gesù el ga dito che le semense le buta e le vien grande anca se quel che el semena no’l capisse come questo sucede. Quel che se pianta vien su pin pian. Prima el cresse, dopo vien su la spiga e par fin el grano mauro nela spiga. (Mar. 4:27, 28) Gesù l’era drio dir che, cossita come una pianta la vien su pin pian, una persona la va far i cambiamenti e deventar amiga de Geovà pin pian. Par esémpio, quando un studiante el scomìnsia a esser amigo de Geovà, pin pian vedemo i cambiamenti che el fà nela so vita. (Efe. 4:22-24) Ma, mai ghemo de desmentegarse che l’è Geovà che el fà la pianta vegner su. — 1 Cor. 3:7.

6-7. Cossa che imparemo dela maniera che Geovà el ga creà tute le robe?

⁶ Quando Geovà el vol far una roba, el vol dar onor al so nome e giutar ai altri. Par quela che el fà tuto con passiensa e el dopera el tempo che ghe vol par farlo. Varda come che el ga fato questo quando el ga creà la Tera par i umani.

⁷ La Bìblia la dise che quando Dio el ga fato la Tera, lu el ga scoliesto le so misure, i so fondamenti e el ga metesto el so prinsipal sasso. (Giò 38:5, 6) Dopo,  Geovà el se ga fermà par veder quel che lu el gavea creà e el ga visto che l’era tanto bel. (Gén. 1:10, 12, 31) Cossa che imparemo de questo? Imparemo che a Geovà ghe ga metesto miliari de ani par crear tuto. Lu el ga fato tute le robe pin pian, ma l’è restà tuto pròpio bel! Sicuro che i àngeli i restea tanto contenti cole robe che Geovà l’era drio crear, parché la Bìblia la dise che lori i osea par lodar a Dio. — Giò 38:7

8. Cossa che ndaremo studiar adesso?

⁸ Come ghemo visto fin adesso, tanti prinsipi dela Bìblia i ne giuta a esser passienti. Adesso, ndaremo veder due robe che pol suceder nela nostra vita che ghemo bisogno de passiensa.

9. Quando ghemo de mostrar passiensa?

⁹ Fursi ghemo de spetar Geovà risponder ale nostre orassion. Pol esser che preghemo a Geovà par domandar che el ne dae forsa par infrontar le dificoltà e par fermarse de far qualcossa sbaliada. Ma fursi pensemo che Geovà l’è drio meterghe tanto par risponderne. Parché che Geovà no’l risponde presto a tute le nostre orassion?

10. Quando domandemo qualcossa a Dio, parché che ghemo de spetar con passiensa?

¹⁰ Geovà el ga caro de scoltar le nostre orassion. (Sal. 65:2) Quando preghemo a Geovà de cuor, mostremo che ghemo fede in lu. (Ebr. 11:6) Geovà el vol esser sicuro che volemo quel che domandemo e se ndaremo pròpio sforsarse par far quel che semo drio domandarghe. (1 Gio. 3:22) Par quela che ghemo bisogno de passiensa quando domandemo che Geovà el ne giute a fermarse de far qualcossa sbaliada. Gesù el ga dito che Geovà no’l ndaria suito risponder ale nostre orassion. Lu el ga dito: ‘Seité a domandar e riceveré, seité a ndar in serca e cataré, seité a bater nela porta e i ve la verderà. Parché quel che el domanda el riceve, quel che el va in serca, el cata, e quel che el bate, i ghe verderà la porta.’ (Mat. 7:7, 8) Se seitemo a pregar, podemo esser sicuri che Geovà el ndarà scoltar e risponder ale nostre orassion. — Col. 4:2.

11. Come che Ebrei 4:16 pol giutarne quando ne par che Dio l’è drio meterghe massa par risponder ale nostre orassion?

¹¹ Fursi pensemo che Geovà l’è drio meterghe massa par risponder quel che ghemo domandà a lu. Ghemo de ricordarse che Geovà no’l sbàlia mia e el va risponderne nela ora giusta. (Ledi Ebrei 4:16. *) Par esémpio, fursi fà tanti ani che domandemo che Geovà el finissa con questo mondo bruto. E no l’è sbalià domandarlo parché Gesù el ne ga insegnà de farlo. (Mat. 6:10) Ma saria una roba pròpio stùpida perder la fede in Geovà parché el fin no l’è vegnesto quando noantri spetéino. (Aba. 2:3; Mat. 24:44) Alora, cossa ghemo de far? Ghemo de seitar a pregar e a esser sicuri che Geovà el ndarà risponderne. Geovà el ga belche scoliesto el giorno e la ora che vegnarà el fin, e podemo esser sicuri che la ze la ora giusta e la meio par tuti. — Mat. 24:36; 2 Pie. 3:15.

12. Quando che fursi l’è fadiga gaver passiensa?

 ¹² Fursi ghemo de spetar con passiensa che la giustìssia la sìpia fata. Arquante persone no le ze tratade con giustìssia par causa dela so rassa, cultura o del paese che le ze vegneste. Altre no le ze tratade con giustìssia parché le ga problemi nel corpo o nela mente. Tante Testimònie de Geovà le sofre parché le obedisse a quel che ghen’è nela Bìblia. Ma, se semo drio sofrir una roba de queste, ghemo de ricordarse che Gesù el ga dito che ‘quei che persevera fin el fin i sarà salvi’. (Mat. 24:13) Ghemo anca de spetar con passiensa quando qualchedun nela nostra congregassion el ga fato un bruto pecato. Se i ansiani belche i sa de quel che ga sucedesto, sarà che gavaremo passiensa de spetar che lori i risolva el assunto dela maniera de Geovà? Cossa i ansiani i ga de far par risolver un problema?

13. Quando qualchedun el fà un bruto pecato, cossa che Geovà el speta dei ansiani?

¹³ Quando una persona la fà un bruto pecato, i ansiani i domanda a Geovà la sabedoria par veder le robe dela so maniera. (Tiago 3:17) I ansiani i vol tanto giutar questa persona , proteger la congregassion e giutar a quei che i ga sofrio qualche ingiustìssia par causa del bruto pecato. (Tiago 5:19, 20; 2 Cor. 1:3, 4) Cossa che i ansiani i ga de far quando qualchedun el ga fato un bruto pecato? Lori i ga de proar capir ben quel che ga sucedesto, pregar a Geovà, darghe consili dela Bìblia e anca la dissiplina che ghe vol. (Ger. 30:11) Sicuro che i ansiani i vol risolver el problema, ma ghe vol tempo par far tute queste robe. Se i ansiani i fà cossita, sarà meio par tuta la congregassion. Ma pol esser che i ansiani i fae el meio che i pol, e anca cossita qualchedun el reste ancora disgustà. Se questo l’è drio suceder con ti, cossa che pol giutarte?

14. Se te sì disgustà con qualche fradel, che esémpio pol giutarte?

¹⁴ Se te sì drio sofrir par causa de qualcossa che un fradel nela congregassion el ga fato, la Bìblia la pol giutarte. Nela Bìblia, ghen’è arquanti esempi  de persone che le ga bio de spetar che Geovà el fesse giustìssia. Par esémpio, Giusepe el ga sofrio tanto parché i so fradei no i lo ga tratà con giustìssia, ma lu no l’è deventà una persona trista par causa de questo. Invesse, el ga seità a far el so laoro par Geovà e el ga perseverà con passiensa. Par quela che Geovà lo ga benedio tanto. (Gén. 39:21) Dopo de un tempo, Giusepe l’è stà bon de perdonar ai so fradei. (Gén. 45:5) Alora, come Giusepe, saremo consoladi se femo pi forte la nostra amicìssia con Geovà e assemo che lu el fae giustìssia nel tempo giusto. — Sal. 7:17; 73:28.

15. Cossa che ga giutà una sorela che no la ze stata tratada con giustìssia?

¹⁵ Fursi no semo drio passar par una roba bruta come Giusepe, ma l’è sicuro che restemo disgustadi quando no semo tratadi con giustìssia. Questo pol suceder intrà noantri e un fradel dela congregassion o anca con una persona che no la serve mia a Geovà. Ma la meio roba che podemo far la ze meter in pràtica quel che dise la Bìblia. (Fil. 2:3, 4) Varda quel che ga sucedesto con una sorela. Ela la ga savesto che una dona nel so laoro la era drio parlar robe brute sora ela. Invesse de far suito qualcossa, la ga pensà sora el esémpio de Gesù. Quando le persone le ghe disea su, lu no’l ghe disea indrio. (1 Pie. 2:21, 23) Alora, la sorela la ga assà star. Dopo, la ga savesto che quela dona la era drio infrontar una bruta malatia e la era tanto ansiosa. Alora la sorela la ga capio che quela dona no la volea disgustarla aposta. Cossita, la ze restada tanto contenta parché la ga bio passiensa e anca la ga sentio la pace.

16. De acordo con 1 Piero 3:12, cossa che pol giutarte se no te sì stà tratà con giustìssia?

¹⁶ Se te sì drio sofrir parché no te sì mia tratà con giustìssia o par causa de altra dificoltà, ricòrdate che “Geovà l’è darente de quei che i ga el cuor pien de tristessa”. (Sal. 34:18) Ricòrdate che se te parli a Geovà quel che te sì drio infrontar e te ghè passiensa, Geovà el resta  tanto contento con ti. (Sal. 55:22) Ricòrdate anca che Geovà l’è el Giuis de tuta la Tera e lu el vede tuto quel che sucede. (Ledi 1 Piero 3:12. *) Alora, se te sì drio infrontar un problema che no te sì bon de dàrghene fora, speta Geovà far quel che ghe vol.

17. De acordo con Isaia 30:18, de cossa Geovà ne assa sicuri?

¹⁷ Geovà el ndarà benedirne tanto par meso del so Regno. Isaia 30:18 dise: ‘Geovà l’è drio spetar con passiensa e el ndarà levarse su par mostrar compassion e misericòrdia, parché l’è un Dio giusto. Felici i ze tuti quei che i seita a spetarlo.’ Quei che i speta Geovà far le robe nela so ora giusta i riceverà tante benedission adesso e anca nel futuro.

18. Che benedission gavaremo?

¹⁸ In Paradiso, i servi de Geovà no i ndarà pi infrontar ansietà, dificoltà, ingiustìssia e sofrimento. (Apo. 21:4) Noantri gavaremo tuto quel che ghemo de bisogno nela ora giusta. Gavaremo anca de pi de quel che semo boni de imaginar. (Sal. 72:16; Isa. 54:13) Geovà el ndarà benedirne tanto!

19. Geovà l’è drio pareciarne par far cossa?

¹⁹ Intanto che Geovà no’l finisse con questo mondo bruto, lu l’è drio pareciarne par viver nel Paradiso. Come? Lu el ne giuta a fermarse de far robe sbaliade e a gaver bele qualità. Alora, no ghemo de restar desanimadi. Pitosto, ghemo de ndar avanti e spetar Geovà far giustìssia. Quel che Geovà el promete par el futuro l’è tanto bel!