1-2. Nuuni ha huuphe yohuwan ay beˈanee?

NEESSI issi asi koshshiyaabaa issiban yeggidi kiittidobay neeni naagido wodiyan gakkana xayiyaakko neeyyo aybi siyettanee? Neeni hirgguutee? Leemiso 13:12y yootiyoogaadan neeyyo siyettennan waayi aggana; hagaadan gees: “Koyiyoobi polettennan gam77iyoogee azzanissees; shin amottidobai polettiyoogee ufaissees.” Gidoppe attin, neessi koshshiyaabaa issiban yeggidi kiittidobay neeni naagido wodiyan gakkibeenna gaasuwaa ne erikko shin? Hanotay hegaadan gidikko, neeni danddayanawunne naagashshanawu eeno geennan waayi aggana.

² Nuuni aggennan ‘naagishshanaadan’ maaddana danddayiya, Geeshsha Maxaafay yootiyo amarida maarata ha huuphe yohuwan beˈana. (Mik. 7:7) Yaatidi, Yihooway issibaa oottanaashin nuuni danddayan naagana koshshiyo naaˈˈu hanotaa pilggana. Wurssettan, Yihoowa naagishshiyaageeti demmana anjjota beˈana.

3. Leemiso 21:5ppe nuuni tamaariyoobay aybee?

³ Nuuni danddayana koshshiyo gaasuwaa Leemiso 21:5 yootees. Hagaadan gees: “Mino oosanchchaa halchchoi dureyees; shin eesotiya ubbai hiyyeesana.” Nuuni ha xiqisiyaappe tamaariyoobay aybee? Aadhdhida eranchcha asi danddayidi akeekan issibaa oottiyoogee loˈˈo ayfiyaa demissees.

4. Leemiso 4:18n deˈiya maaray ay qonccissii?

⁴ Leemiso 4:18y “xillotu ogee gallassai seetana gakkanaashin,  gujji gujji poo7iya maallado xalqqiyaa mala” gidiyoogaa yootees. He qofay Yihooway ba halchchuwaa ba asawu loddan loddan qonccissiyo hanotaa bessiyaaba. Issi Kiristtaanee ba deˈuwan laamettiyo ogiyaanne Yihoowakko shiiqiyo ogiyaa nuuni akeekanaadankka ha xiqisee maaddees. Issi uri ayyaanaaban eesuwan diccanaadan oottana danddayokko. Hegee wode ekkiyaaba. Nuuni Xoossaa Qaalaappenne A dirijjitiyaappe demmiyo zoriyaa loyttidi xannaˈiyaabanne oosuwan peeshshiyaaba gidikko, loddan loddan Kiristtoosaagaa mala eeshshay deˈiyoogeeta gidoos. Qassi Xoossaa kaseegaappe loyttidi eroos. Ha qofaa Yesuusi waati qonccissidaakko qoppa.

5. Issi uri laamettanawu wodiyaa koshshiyoogaa qonccissanawu Yesuusi aybaa leemisuwaa goˈettidee?

⁵ Nuuni sabbakiyo Kawotettaa mishiraachchoy ashkke asatu wozanan guutta zerettaadan loddan loddan waanidi dicciyaakko qonccissanawu Yesuusi issi leemisuwaa goˈettiis. I hagaadan giis: “I ba huuphen waaniyaakkonne erennan, he zerettai mokkeesinne diccees. Biittai kattaa barkka mokkeesinne aifees; koiro carshshai caarees; guyyeppe aifanau kukkumees; qassi wurssettan kumetta aifiyaa aifees.” (Mar. 4:27, 28) Yesuusi woyganawu koyidee? Kattay loddan loddan dicciyoogaadan, Kawotettaa mishiraachchuwaa siyiya uri ayyaanaaban loddan loddan dicciyoogaa qonccissiis. Leemisuwawu, nuuni Geeshsha Maxaafaa xannaˈissiyoogeeti Yihoowakko shiiqiyo wode, eti daroban laamettiyoogaa nuuni akeekiyoogaa doommoos. (Efi. 4:22-24) SHin he guutta zerettay diccanaadan oottiyay Yihoowa gidiyoogaa nuuni hassayana bessees.—1 Qor. 3:7.

6-7. Yihooway saˈaa medhdhido ogiyaappe ay tamaariyoo?

⁶ Oottiyoobaa wurssanawu ay keena wode koshshikkonne, Yihooway ubbabaa danddayan oottees. I ba sunttaa bonchchissanawunne harata maaddanawu hegaadan oottees. Leemisuwawu, Yihooway saˈaa asawu loddan loddan waati giigissidaakko qoppa.

 ⁷ Yihooway saˈaa waati medhdhidaakko Geeshsha Maxaafay qonccissiyo wode ‘saˈay ay keenakko, saˈaa tuuqeti eqqidoogaanne saˈaa baasuwaa shuchchay wodhdhidoogaa’ yootees. (Iyy. 38:5, 6) I takki giidi ba oottidobaa wotti denttidi qoppiis. (Doo. 1:10, 12) Yihooway medhdhidobati lodda loddan giigi giigi biyoogaa beˈiyo wode kiitanchchatussi aybi siyettidaakko qoppana danddayay? Hegee eta keehi ufayssiis! Hegaa gishshawu eti ‘ufayssan ililidosona.’ (Iyy. 38:7) Nuuni hegaappe ay tamaariyoo? Yihooway medhdhiyoogaa wurssanawu daro shaˈu layttaa wurssidaba gidikkonne, Yihooway ba medhdhido ubbabaa xeellidi, hegee “daro lo77o” yaagiis.—Doo. 1:31.

8. Nuuni haˈˈi ay beˈanee?

⁸ Nuuni qommoora deˈiya leemisotuppe akeekidoogaadan, danddayana koshshiyoogaa qonccissiya daro maarati Xoossaa Qaalan deˈoosona. Nuuni Yihoowa naagishshanawu eeno gaana bessiyo naaˈˈu hanotaa haˈˈi beˈana.

9. Nuuni Yihoowa naagishshana koshshiyoobay aybee?

⁹ Yihooway nu woosaa zaaranaashin naagiyoogee koshshana danddayees. Metuwaa genccanawu minotettaa immana mala woy nuuni shugo gididobaa xoonanawu maaddana mala woossiyo wode, nuuni qoppido wodiyan woppaa demmibeennabadan nuussi siyettana danddayees. Nuuni woossiyo woosa ubbaa Yihooway eesuwan zaarennay aybissee?

10. Yihooway nu woosaa zaaranaashin nuuni danddayan naagana koshshiyoy aybissee?

¹⁰ Yihooway nu woosaa loytti ezggees. (Maz. 65:2) Nuuni wozanappe woossiyo woosaa I nu ammanuwaa qonccissiyaabadan xeellees. (Ibr. 11:6) Yihooway nuuni nu woosaara maayettiya ogiyan deˈanawunne A sheniyaa oottanawu keehi murttidoogaa beˈiyoogankka ufayttees. (1 Yoh. 3:22) Yaatiyo gishshawu, nuuni iita meeziyaa woy nu shugo gididobaa xoonanawu baaxetiyo wode ubban danddayanchchanne nu woosaara maayettiya ogiyan deˈiyaageeta gidana koshshees. Yesuusi nuuni woossiyo amarida woosay eesuwan zaaruwaa demmennaagaa nu akeekanaadan maaddiis. I hagaadan giis: “ Woossite; intte ekkana. Koyite; intte demmana. Kare yiidi xeesite; intteyyo karee dooyettana. Aissi giikko, woossiya ubbai ekkana; koyiya urai demmana; qassi kare yiidi xeesiya urau karee dooyettana.” (Maa. 7:7, 8) Nuuni ha zoriyaa kaalliyo wodenne ‘aggennan woossiyo’ wode, saluwan deˈiya nu Aaway nu woosaa siyidi zaaranaagaa ammanettana danddayoos.—Qol. 4:2.

11. Nu woosaa zaaroy takkidaba milatiyo wode, Ibraawe 4:16y nuna waati maaddii?

¹¹ Nu woosaa zaaroy takkidaba milatikkonne, ‘koshshiyo wodiyan’ Yihooway nu woosaa zaaranawu qaalaa geliis. (Ibraawe 4:16 nabbaba.) Yaatiyo gishshawu nuuni qoppidoogaadan Yihooway woosaa eesuwan zaarana xayikko, I balabaa oottiis giidi nuuni mule qoppana bessenna. Leemisuwawu, Xoossaa Kawotettay ha alamiyaa xayssin beˈanawu daroti unddenna layttawu woossiiddi takkidosona. Nuuni hegawu woossana koshshiyoogaa Yesuusikka yootiis. (Maa. 6:10) SHin nuuni qoppido wodiyan ha alamee xayibeenna gishshawu Xoossaa nu ammaniyo ammanoy shugganaadan oottikko hegee keehi eeyyatetta! (Imb. 2:3; Maa. 24:44) Nuuni Yihoowa ubbatoo naagishshiyoogeenne ammanuwan A woossiyoogee loˈˈo. Yihooway wurssettay yaana ‘gallassaanne saatiyaa’ keeri uttido gishshawu, wurssettay koshshiya wodiyan yaana. He gallassay ubbawu keehi  loˈˈo gallassa gidiyoogee qonccana.—Maa. 24:36; 2 PHe. 3:15.

12. Danddayanchcha gidiyoogee nuna keehi metana danddayiyoy awudee?

¹² Nuuni naaquwaa danddayiyoogeenne gencciyoogee koshshana danddayees. Mattuman, zariyan, sheeshshan, wogan woy yaran dummatiyaageeta ha alamiyaa asay darotoo naaqqees. Harati qassi bollay sila gididoogeeta woy guuggee sakkiyoogeeta naaqqoosona. Geeshsha Maxaafaa ammaniyoogaa gaasuwan gakkiya naaquwaa Yihoowa asaappe daroti genccidosona. Nuna hegaadan naaqoy gakkiyo wode, Yesuusi yootidobaa nuuni hassayana bessees. I hagaadan giis: “Wurssettaa gakkanaashin gencciya urai attana.” (Maa. 24:13) SHin gubaaˈiyan deˈiya issi uri wolqqaama nagaraa oottidoogaa neeni akeekikko waatuutee? He allaalliyaa cimatussi yoota simmada, eti hegaa Yihooway koyiyo ogiyan polanaagaa ammanettada danddayan naagashshuutee? Issi uri gita nagaraa oottiyo wode cimati waatana koshshii?

13. Issi uri gita nagaraa oottiyo wode cimati waatanaadan Yihooway koyii?

¹³ Issi uri gubaaˈiyan gita nagaraa oottidoogaa cimati eriyo wode, he allaalliyaa Yihoowaagaadan xeellana mala ‘bollappe yiya aadhdhida eratettaa’ demmanawu mintti woossoosona. (Yaaq. 3:17) Danddayettiyaaba gidikko, nagaraa oottida uri ‘ba bala ogiyaappe simmanaadan’ maaddanawu eti halchchoosona. (Yaaq. 5:19, 20) Qassi eti gubaaˈiyaa qohuwaappe naaganawunne qohettidaageeta minttettanawu banttawu danddayettida ubbabaa oottanawu koyoosona. (2 Qor. 1:3, 4) Gita nagaraara gayttida allaalliyaa cimati xeelliyo wode, hanidabaa shaakki erana bessees; qassi hegee wode ekkiyaaba gidana danddayees. Yaatidi eti loytti woossidi Geeshsha Maxaafaappe zoroosonanne ‘likke pirddanaadan’ yootiya qofaa oosuwan peeshshoosona. (Erm. 30:11) Cimati haganaa sugennaba gidikkonne, pirddanawu eesotokkona. Cimati Yihoowa kaaletuwaa kaalliyoogee ubbaa goˈˈiyoogaa gubaaˈee akeekana. SHin cimati issibaa maara ogiyan oyqqiyo wodekka, mooribeenna izaawu qohettana danddayees. Ne hanotay hegaa mala gidikko, keehi qohettennaadan waatana danddayay?

14. Issi Kiristtaanee nena keehi qohiyaaba gidikko, neeni minettanaadan maaddana danddayiya Geeshsha Maxaafay yootiyo taarikee awugee?

¹⁴ Issi uri, ubba qassi ne mala Kiristtaanee  nena keehi qohi erii? Yaatikko, Yihooway hegaa giigissanaashin nuuni A waati naagishshanaakko tamaaranaadan maaddiya leemiso gidiya loˈˈobaa Xoossaa Qaalaappe akeekana danddayaasa. Leemisuwawu, Yooseefa naaqoy A ishanttuppe gakkidaba gidikkonne, eti oottido iitabaa gaasuwan I keehi hanqqettibeenna. I baassi danddayettida ubban aggennan Yihoowayyo haggaaziis, qassi I danddayido gishshawunne genccido gishshawu Yihooway A anjjiis. (Doo. 39:21) Guyyeppe, Yooseefi bana qohidaageetusi atto giis, qassi Yihooway bana ay keena anjjidaakko akeekiis. (Doo. 45:5) Yooseefaagaadan, nuuni Yihoowakko shiiqiyo wodenne I likke wodiyan naaquwaa xayssanaashin naagiyo wode minettoos.—Maz. 7:17; 73:28.

15. Naaquwaa genccanaadan issi michchiyo aybi maaddidee?

¹⁵ Nuna gakkiya naaqo ubbay Yooseefaagaadan keehi wolqqaama gidana xayikkonne, bessenna ogiyan naaqoy gakkiyo wode nuuni qohettana danddayoos. Yihoowawu goynnenna uraa gujjin, issi uri nuna qohiyo wode, Geeshsha Maxaafay yootiyo maarata nuuni oosuwan peeshshiyoogee nuna maaddees. (Pili. 2:3,4) Issi hanotaa qoppa. Issi michchiyaa banaara oottiyaara ibaa iitabaanne tuma gidennabaa haratussi yootidoogaa akeekada keehi qohettaasu. Michchiyaa eesuwan zaariyoogaa aggada, takki gaada Yesuusa hanotaa wotta denttada qoppaasu. Asay A cayido wode, I eta cayibeenna. (1 PHe. 2:21, 23) A hegaa akeekada, merettidaban palamettennan agganawu kuuyaasu. A banaara oottiyaara wolqqaama harggiyaa harggiyoogaanne daroban unˈˈettiyoogaa guyyeppe akeekaasu. He michchiyaa banaara oottiyaara haasayidobay A haasayana koyidoba gidennaagaa akeekaasu. Hegaa gishshawu, michchiyaa bana gakkidabaa danddayada genccidoogan keehi ufayttaasunne woppu gaasu.

16. Neeni naaquwaa gencciyaaba gidikko nena minttettana danddayiyaabay aybee? (1 PHeexiroosa 3:12)

¹⁶ Neeni naaquwaa woy hara qohuwaa genccaydda deˈiyaaba gidikko, Yihooway “wozanai me77idoogeetussi” mataana gidiyoogaa hassaya. (Maz. 34:18) Ne danddayaa gishshawunne ne toohuwaa A bolli wottiyo gishshawu I nena siiqees. (Maz. 55:22) I saˈa ubbaa Daanna.  I haniya ubbabaa beˈees. (1 PHeexiroosa 3:12 nabbaba.) Neeni giigissana danddayenna metoy nena gakkiyo wode, Yihoowa naagashshanawu eeno guutee?

17. Isiyaasa 30:18y yootiyoogaadan, Yihooway waatanawu qaalaa gelidee?

¹⁷ Saluwan deˈiya nu Aaway ba Kawotettaa baggaara nuna mata wode daroban anjjana. Isiyaasa 30:18y hagaadan gees: “GODAI intteyyo kehanau naagees; i intteyyo qarettiyoogaa bessanau denddees. Aissi giikko, GODAI xillo pirddiya Xoossaa; a naagiyaageeti ubbati anjjettidaageeta.” Ubbatoo Yihoowa naagiyaageeti ha wodiyankka sinttappe yaana ooratta alamiyankka daro anjjota demmana.

18. Nuuni demmanawu naagiyo anjjoy aybee?

¹⁸ Xoossaa asay ooratta alamiyaa geliyo wode, ha wodiyan gakkiya unˈˈissiyaabaanne metuwaa eti mule genccana koshshenna. Naaqoy muleera xayana, qassi waayekka deˈenna. (Ajj. 21:4) He wode nuussi gidi palahiyaabay deˈiyo gishshawu, nuuyyo koshshiyaabaa demmanawu hirggana koshshenna. (Maz. 72:16; Isi. 54:13) Hegee keehi gita anjjo!

19. Yihooway nuna ha wodiyan loddan loddan aybawu giigissiiddi deˈii?

¹⁹ Yihooway nuuni iita eeshshata agganaadaaninne A ufayssiya eeshshati deˈiyoogeeta gidanaadan maaddiyoogan, ba haaruwan deˈana mala nuna ha wodiyan giigissiiddi deˈees. Hidootaa qanxxoppanne Yihoowayyo oottiyoogaa aggoppa. Nuuni sinttappe keehi loˈˈo deˈuwaa demmana! Keehi loˈˈo wodee sinttappe nuna naagiyo gishshawu, Yihooway ba oosuwaa polana gakkanaashin ubbatoo eeno giidi danddayan naagishshiyaageeta gidoos!