1-2. Ano an aton hihisgotan hini nga artikulo?

ANO an imo inaabat kon an usa nga package nga an sulod kinahanglan mo gud diri naabot ha imo ginlalaoman nga panahon? Nasusubo ka ba? Bangin abaton mo an ginsisiring han Proberbios 13:12: “An ginpapamulat nga nalalangan nakakapasubo han kasingkasing.” Pero ano man kon nahibaroan mo nga may maopay nga mga rason kon kay ano nga an package waray makaabot ha panahon nga imo ginlalaoman? Posible nga magigin mapailubon ka gud ngan magigin andam ha paghulat.

² Hini nga artikulo, hihisgotan naton an pipira nga prinsipyo ha Biblia nga makakabulig ha aton nga ‘mapailubon nga maghulat.’ (Mic. 7:7) Sunod, uusisahon naton an duha nga sitwasyon diin kinahanglan mapailubon nga maghulat kita ha paggios ni Jehova. Katapos, mahibabaroan naton an mga bendisyon nga makakarawat hadton andam maghulat kan Jehova.

3. Ano an igintututdo ha aton han prinsipyo nga nakarekord ha Proberbios 13:11?

³ An usa nga ehemplo nga nagpapakita nga kinahanglan an pagin mapailubon amo an nakarekord ha Proberbios 13:11. Ito nasiring: “An bahandi nga madagmit nga nakukuha magtitikaguti, pero an bahandi nga hinay-hinay nga natitirok han usa nga tawo magtitikadamu.” Ano an aton mahibabaroan hini nga teksto? Ginhihimo han usa nga maaramon nga tawo hin hinay-hinay ngan may pagpailob an mga butang, ngan nagkakaada ito maopay gud nga resulta.

4. Ano an ginpapabug-atan han prinsipyo nga mababasa ha Proberbios 4:18?

⁴ An Proberbios 4:18 nasiring nga “an aragian han magtadong pariho han malamrag nga kahayag ha aga nga mas nagtitikalamrag  tubtob ha kaudtuhon.” Ini nga mga pulong angayan nga naaplikar ha paagi ni Jehova ha pagpahayag ha iya katawohan han iya katuyoan​—hinay-hinay. Pero ini nga teksto mahimo liwat iaplikar ha paagi han pag-uswag ha espirituwal han usa nga Kristiano. An espirituwal nga pag-uswag diri puydi apurahon. Nagkikinahanglan ito hin panahon. Kon maduruto kita nga nag-aaram ngan nag-aaplikar han sagdon nga aton nakakarawat ha Pulong han Dios ngan ha iya organisasyon, hinay-hinay nga magkakaada kita hin personalidad nga pariho han kan Jesu-Kristo. Maghihilarom liwat an aton kahibaro mahitungod ha Dios. Tagdon naton kon paonan-o igin-ilustrar ni Jesus ito nga punto.

5. Ano nga ehemplo an gin-gamit ni Jesus basi ipakita nga an pag-uswag ha espirituwal nagkikinahanglan hin panahon?

⁵ Hi Jesus ginamit hin ilustrasyon basi isaysay kon paonan-o an mensahe han Ginhadian nga aton iginsasangyaw maipapariho hin gutiay nga binhi nga hinay-hinay nga natubo ha mga tawo nga tangkod an kasingkasing. Hiya nagsiring: “An mga binhi nanunurok ngan nahitaas, pero diri hiya [an magsarabwag] maaram kon paonan-o. An tuna nakakalugaring pamunga hin hinay-hinay, siyahan an lawas, sunod an uhay, ngan ha urhi an matimgas nga lugas ha uhay.” (Mar. 4:27, 28) Ano an iginpapasabot ni Jesus? Iginsasaysay niya nga sugad la nga hinay-hinay an pagtubo han usa nga tanom, hinay-hinay liwat an pagtubo ha espirituwal han usa nga nakarawat han mensahe han Ginhadian. Pananglitan, kon an aton sinsero nga mga Bible study nagigin duok kan Jehova, nakikita naton an damu nga mag-opay nga pagbag-o nga ira ginbubuhat. (Efe. 4:22-24) Pero kinahanglan hinumdoman naton nga hi Jehova an nagpapatubo hiton gutiay nga binhi.​—1 Cor. 3:7.

6-7. Ano an aton mahibabaroan tikang ha paagi han paglarang ni Jehova han tuna?

⁶ Ha ngatanan nga ginbubuhat ni Jehova, mapailubon hiya ngan naggagahin hiya han ginkikinahanglan nga panahon basi matapos an iya buruhaton. Ginhihimo niya ito basi mahimaya an iya ngaran ngan magpahimulos an iba. Pananglitan, tagda an hinay-hinay nga pag-andam ni Jehova han tuna para ha mga tawo.

 ⁷ Han iginhulagway han Biblia kon paonan-o ginlarang ni Jehova an tuna, nagsiring ito nga nagbuot hiya han “mga sukol hito,” naglubong han “mga pundasyon hito,” ngan nagbutang han “bato nga pandugtong ha eskina hito.” (Job 38:5, 6) Naggahin pa ngani hiya hin panahon basi usisahon an iya mga ginhimo. (Gen. 1:10, 12) Naiimadyin mo ba an gin-abat han mga anghel han nakita nira an tagsa nga bag-o nga butang nga ginlarang ni Jehova? Sigurado nga eksayted gud hira! Ngani tungod hito, nagtikang hira “pagsinggit hin pagdayaw.” (Job 38:7) Ano an aton mahibabaroan hito? Inabot hin yinukot ka tuig antes matapos an mga ginlarang ni Jehova, pero han gin-usisa niya ito ngatanan nga iya ginhimo hin hinay-hinay, nagsiring hiya nga “maopay gud ito.”​—Gen. 1:31.

8. Ano an aton hihisgotan yana?

⁸ Sugad han aton nahibaroan ha gin-unabi nga mga ehemplo, damu nga prinsipyo ha Pulong han Dios an nagpapabug-at nga kinahanglan magin mapailubon kita. Uusisahon naton yana an duha nga sitwasyon diin kinahanglan magin andam kita ha paghulat kan Jehova.

9. Ano an usa nga sitwasyon diin kinahanglan kita maghulat kan Jehova?

⁹ Bangin kinahanglan maghulat kita nga batunon an aton mga pag-ampo. Kon nag-aampo kita para hin kusog nga makaya an usa nga problema o buligan kita nga maatohan an usa nga kaluyahan, bangin abaton naton nga maiha ihatag ni Jehova an aton gin-iinaro ha iya. Kay ano nga diri dayon ginbabaton ni Jehova an iba naton nga mga pag-ampo?

10. Kay ano nga kinahanglan mapailubon kita nga maghulat han baton ni Jehova ha aton mga pag-ampo?

¹⁰ Hi Jehova namamati hin maopay ha aton mga pag-ampo. (Sal. 65:2) Para ha iya, an aton sinsero nga mga pag-ampo ebidensya nga may pagtoo kita ha iya. (Heb. 11:6) Interesado liwat hi Jehova nga makita kon ano kita kadeterminado magkinabuhi uyon ha aton mga pag-ampo ngan ha pagbuhat han iya kaburut-on. (1 Juan 3:22) Salit bangin kinahanglan kita magpailob ngan gumios uyon ha aton mga pag-ampo kon nangangalimbasog kita nga maatohan an usa nga maraot nga buhat o usa nga kaluyahan. Ginbuligan kita ni Jesus nga masabtan nga may pipira kita nga mga pag-ampo nga bangin diri dayon batunon. Hiya nagsiring: “Padayon nga mangaro, ngan tatagan kamo; padayon nga mamiling, ngan makakaagi kamo; padayon nga magtuktok, ngan aabrihan kamo; kay an bisan hin-o nga nangangaro nakakakarawat, an bisan hin-o nga namimiling nakakaagi, ngan an bisan hin-o nga nagtutuktok aabrihan.” (Mat. 7:7, 8) Kon susundon naton ini nga sagdon ngan ‘magpapadayon ha pag-ampo,’ makakasarig kita nga pamamatian kita han aton langitnon nga Amay ngan babatunon niya an aton mga pag-ampo.​—Col. 4:2.

11. Paonan-o an Hebreo 4:16 mabulig ha aton kon baga hin diri dayon ginbabaton an usa naton nga pag-ampo?

¹¹ Bisan kon baga hin diri ginbabaton dayon an usa nga pag-ampo, nagsasaad hi Jehova nga babatunon niya an aton pag-ampo “ha husto nga panahon.” (Basaha an Hebreo 4:16.) Salit kinahanglan diri gud naton basulon hi Jehova kon diri dayon niya ginbabaton an aton pag-ampo ha panahon nga aton karuyag. Pananglitan, damu an maiha na nga nag-iinampo nga tapuson na unta han Ginhadian han Dios ini nga sistema. Nagsiring pa ngani hi Jesus nga kinahanglan ig-ampo naton ito. (Mat. 6:10) Pero kalurongan gud kon tutugotan han usa nga magluya an iya pagtoo ha Dios tungod kay waray umabot an kataposan ha panahon nga ginlalaoman han mga tawo nga maabot ito! (Hab. 2:3; Mat. 24:44) Maaramon kita kon padayon nga maghuhulat kita kan Jehova ngan mag-aampo ha iya nga may pagtoo. An kataposan maabot ha husto gud nga panahon, tungod kay hi Jehova may ginpili  na nga “adlaw ngan oras” kon san-o ito maabot. Ngan ito nga igin-eskedyol nga panahon amo an magigin pinakamaopay para ha ngatanan.​—Mat. 24:36; 2 Ped. 3:15.

12. Ha ano nga sitwasyon bangin labi nga makurian kita nga magpailob?

¹² Bangin kinahanglan magpailob kita samtang ginhuhulat naton nga makarawat an hustisya. An mga tawo hini nga kalibotan kaurogan na nga maraot an ira pagtratar ha diri nira kapariho an sekso, lahi, tribo, kultura, o nasyonalidad. An iba gintatratar hin maraot kay may depekto hira ha pisikal o ha mental. Damu nga katawohan ni Jehova an nag-aantos hin kawaray-hustisya tungod han ira mga gintotoohan nga iginbasar ha Biblia. Kon sugad hito an aton sitwasyon, kinahanglan padayon naton nga hinumdoman ini nga ginsiring ni Jesus: ‘An magpailob tubtob ha kataposan matatalwas.’ (Mat. 24:13) Pero ano man kon maaram ka nga may bugto ha kongregasyon nga nagbubuhat hin seryoso nga sala? Kon nasumatan na hito an mga tigurang, masarig ka ba nga hira na an bahala hito, ngan mapailubon nga maghuhulat nga panginanoon nira ito uyon ha paagi ni Jehova? Ano an bangin kinahanglan buhaton han mga tigurang kon may nakakabuhat hin seryoso nga sala?

13. Ano an karuyag ni Jehova nga buhaton han mga tigurang kon may nakakabuhat hin seryoso nga sala?

¹³ Kon maaram na an mga tigurang nga may-ada ha kongregasyon nagbubuhat hin seryoso nga sala, nag-aampo hira ngan nangangaro hin “kinaadman nga tikang ha kahitas-an” basi mahibaroan nira an panhunahuna ni Jehova hito nga sitwasyon. (San. 3:17) Katuyoan nira nga buligan an nakasala nga bumaya ha iya sayop nga dalan kon posible. (San. 5:19, 20) Karuyag liwat nira nga himoon an bug-os nira nga makakaya basi protektaran an kongregasyon ngan liawon an nasakitan. (2 Cor. 1:3, 4) Kon an mga tigurang may-ada gin-aasikaso nga seryoso nga sala, kinahanglan hibaroan anay nira kon ano gud an nahitabo, ngan bangin magkinahanglan ito hin pipira ka panahon. Katapos, mag-aampo hira ngan maghahatag hin sagdon tikang ha Kasuratan ngan ipapadapat nira an disiplina “ha husto nga sukol.” (Jer. 30:11) Bisan kon an mga tigurang diri naglalangan-langan, diri liwat hira nagdadagmit ha paghimo hin desisyon. Kon ginsusunod han mga tigurang an giya ni Jehova, magpapahimulos an bug-os nga kongregasyon. Pero bisan kon an mga problema gin-aasikaso ha sugad hito nga paagi, an inosente nga bugto bangin masakitan la gihapon. Kon ito an imo  sitwasyon, ano an mahimo mo buhaton basi maibanan an imo kasakit?

14. Ano nga ehemplo ha Biblia an makakaliaw ha imo kon may usa nga Kristiano nga nakapasakit gud ha imo?

¹⁴ May-ada na ba nakapasakit gud ha imo, bangin usa pa ngani nga igkasi-tumuroo? May mag-opay nga mga ehemplo ha Pulong han Dios nga nagtututdo ha aton kon paonan-o maghuhulat kan Jehova nga tadungon an kawaray-hustisya. Pananglitan, bisan kon nag-antos hi Jose hin kawaray-hustisya ha iya mismo kabugtoan, waray niya tuguti an ira mga sala nga makapasina ha iya. Lugod, nagpabilin hiya nga pokus ha pag-alagad kan Jehova, nga hura nga nagbalos ha iya tungod han iya pagin mapailubon. (Gen. 39:21) Inabot an panahon, napasaylo na ni Jose an mga nakapasakit ha iya, ngan nakita niya nga ginbendisyonan hiya ni Jehova. (Gen. 45:5) Pariho kan Jose, maliliaw kita kon magigin duok kita kan Jehova ngan maghuhulat nga iya tadungon an kawaray-hustisya ha husto nga panahon.​—Sal. 7:17; 73:28.

15. Ano an nakabulig ha usa nga sister nga mailob an kawaray-hustisya nga iya naeksperyensyahan?

¹⁵ Syempre, diri ngatanan nga kawaray-hustisya sugad kagrabe han naeksperyensyahan ni Jose. Pero kita ngatanan nasasakitan kon gintatratar kita hin maraot ha anoman nga paagi. Kon may problema kita ha usa nga tawo, pati na ha usa nga diri nagsisingba kan Jehova, makakapahimulos kita kon iaaplikar naton an mga prinsipyo ha Biblia. (Fil. 2:3, 4) Tagda ini nga eksperyensya. Nasakitan gud an usa nga sister han nahibaroan niya nga may katrabaho hiya nga nagpipinangistorya hin maraot ngan diri totoo mahitungod ha iya. Imbes nga masina dayon hiya, ginpamalandong niya an ehemplo ni Jesus. Han gin-insulto hi Jesus, waray hiya bumulos. (1 Ped. 2:21, 23) Tungod hito, nagdesisyon an sister nga diri padakuon an problema. Ha urhi, nahibaroan niya nga an iya katrabaho may-ada ngay-an grabe nga sakit ngan naiistres gud. Naghunahuna an sister nga posible nga diri intensyon han iya katrabaho nga pakarauton hiya. Salit nalipay gud hiya nga gin-ilob niya an maraot nga pagtratar ha iya, ngan nagkaada hiya kamurayawan.

16. Ano an makakaliaw ha imo kon nag-aantos ka hin kawaray-hustisya? (1 Pedro 3:12)

¹⁶ Kon nag-aantos ka tungod ha kawaray-hustisya o ha anoman nga rason, hinumdumi nga hi Jehova hirani ha mga “ruba an kasingkasing.”  (Sal. 34:18) Hinigugma ka niya tungod kay nagpapailob ka ngan iginpapasa mo ha iya an imo pinas-an. (Sal. 55:22) Hiya an Hukom ha bug-os nga tuna. Nakikita niya an ngatanan nga nahitatabo. (Basaha an 1 Pedro 3:12.) Kon may mga problema ka nga diri mo kaya solusyonan, andam ka ba maghulat ha iya?

17. Ano an saad ha aton ni Jehova ha Isaias 30:18?

¹⁷ Diri mag-iiha, hura nga bibendisyonan kita han aton langitnon nga Amay pinaagi han iya Ginhadian. An Isaias 30:18 nasiring: “Hi Jehova mapailubon nga naghuhulat basi magpakita ha iyo hin pagkabuotan, ngan mabuhát hiya basi magpakita ha iyo hin kalooy. Kay hi Jehova usa nga Dios han hustisya. Malipayon an ngatanan nga nagpapadayon ha pagpamulat ha iya.” Adton padayon nga nagpapamulat kan Jehova makakakarawat hin damu nga bendisyon yana ngan ha tiarabot nga bag-o nga kalibotan.

18. Ano nga mga bendisyon an aton makakarawat?

¹⁸ Kon an katawohan han Dios sumulod na ha bag-o nga kalibotan, diri na gud nira maieksperyensyahan utro an mga kabaraka ngan mga problema nga ira gin-aatubang yana. Mawawara na an kawaray-hustisya ngan kasakit. (Pah. 21:4) Diri na kita mababaraka nga mawad-an kita han aton mga panginahanglan tungod kay magkakaada na didto hin kahuraan. (Sal. 72:16; Isa. 54:13) Makalilipay gud ito nga mga bendisyon!

19. Para ha ano hinay-hinay nga igin-aandam kita yana ni Jehova?

¹⁹ Igin-aandam kita yana ni Jehova para magkinabuhi ilarom han iya pagmando pinaagi ha pagbulig ha aton nga maatohan an aton maraot nga mga buhat ngan magkaada han mga kalidad nga iya nalilipayan. Diri kita manluya ngan diri kita umundang ha pag-alagad kan Jehova. Hirani na kita magkaada pinakamaopay nga kinabuhi. Samtang ginpapamulat naton iton makalilipay nga kabubuwason, hinaot padayon kita nga mapailubon nga maghulat kan Jehova samtang gintatapos niya an iya buruhaton!