1, 2. მუს გუვარჩიენთ თე სტატიას?

წერმიდგინით, ნამდა ელუთ მეგობარს, ნამდგაქ გოსაჭირნან ფერ ნივთ ოკო მოიღან. მუს იგინანდით, თინა დროულო ვა მიშ-და? გურ ხომ ვა გოიტირხუდეს? შილებე დუდ თეშ იგინითკო, მუჭოთ იგავეფიშ 13:12-ს ჭარჷ: „ბრელ ხანიშ ჯინა გურს ალახენს“. მარა, მუჟამსით ქიგეგენდით, ნამდა თქვან მეგობარს სერიოზულ მიზეზეფ უღუდ, მუდგაშ გურშენ მორაგადაფილ დროს ვა მართინ, უმოსო გეგმირჩქინანდით მოთვინებას დო მზათ იჸუაფუდით, ქუჯინითკო.

² თე სტატიას გუვარჩიენთ მუსხირენ ბიბლიურ პრინციპის, ნამუთ მიმეხვარებნა, გუვავითარათ დო ვა ვოდინუათ მოთვინებათ ჯინაშ უნარ (მიქ. 7:7). თეს გეძინელ, გუვარჩიენთ ჟირ სიტუაციას, მუჟამსით საჭირო რე, მოთვინებათ ვუჯინათ იეჰოვას დო ბოლოს ქიგებგენთ თი კურთხევეფიშ გურშენ, ნამუთ ელნა თინეფს, მით მზათ რენა, ქუჯინან თის.

3. მუ იძირე იგავეფიშ 13:11-ის მოჩამილ პრინციპშე?

³ იგავეფიშ 13:11-ის მოჩამილ მაგალითშე იძირე, ნამდა მოთვინება რე საჭირო. თექ ჭარჷ: „ართუცფას შიბულ ქონებას ბორია მიდეღანს, მარა, მით ჭიე-ჭიეთ შაყარანს, უმოს დო უმოს ქონება აღვენუ“. მუ პრინციპ იძირე თავრეშე? ბრძნულ რე, ნამდა საქმექ მოთვინებათ, თითო-თითო ნაბიჯო, იკეთინას.

4. მუ იძირე იგავეფიშ 4:18-ს მოჩამილ პრინციპშე?

⁴ იგავეფიშ 4:18-ს ბკითხულენთ, ნამდა „მართალ კათაშ შარა ოჭმარეშ სინთეცალ რე, ნამუთ ონდღეშახ უმოსო დო უმოსო ბარჩხალანს“. თავრეშე იძირე, მუჭო უცხადენს  იეჰოვა მუშ ხალხის ჭიე-ჭიეთ მუშ განზრახვას. მარა თე მუხლიქ შილებე უმოს ფართე გაგებათ იჸუას გიმორნაფილქ, მაგალთო, ქრისტიანიშ სულიერო წიმი ულაშ ეიოჭარალო. სულიერო წიმი ულა ართუცფას ვა ხვადუ, თის დრო ოსაჭირ. მუჟამსით მთელ შურდოგურით ქიდიბგურუანთ დო გეგმიბრინუანთ რჩევეფს, ნამდგას ღორონთიშ სიტყვა დო თიშ ორგანიზაციაშე ბღებულენთ, ჭიე-ჭიეთ გუვავითარენთ თიცალ თვისებეფს, მუნერით ქრისტეს უღჷ. თეს გეძინელ, ღორონთიშ გურშენ ხოლო მეტ რჩქინა მაღვენუნა. გუვარჩუათ, მუ მაგალით გიმირინუ იესოქ თე პროცესიშ ეიოჭარალო.

5. მუ მაგალით მიჸუნ იესოქ თიშ ეიონწყუმალო, ნამდა პიროვნებაშ თირუას დრო ოსაჭირ?

⁵ იესოქ მაგალით მიჸუნ თიშ ეიონწყუმალო, მუჭო მოგენს ჭიჭე თასის სამეფოშ ცნობა, ნამდგას ჩქი ფქადაგენთ დო ნამუთ ჭიე-ჭიეთ ირდუ სიმართლეშ მოჸოროფე ადამიანეფიშ გურს. თიქ თქუ: „თას ეფალუნს დო ირდუ, მარა თის [მათასალს] ვა უჩქჷ, მუჭო. დიხას მუშით მიკუღ ნაყოფ: დიო ჯეჯილ, უკულ დუდ დო ბოლოს ჯგირ მარცვალ“ (მარ. 4:27, 28). მუშ რაგად ოკოდ იესოს? თიქ ენწყჷ, ნამდა მუჭოთ მცენარე ირდუ ჭიე-ჭიეთ, თეშ პიროვნება ხოლო, ნამუთ სამეფოშ ცნობას ღებულენს, ჭიე-ჭიეთ ირდუ სულიერო. მაგალთო, მით შურდოგურით გურაფლენს ბიბლიას, ეახლოებ იეჰოვას, მუდგაშ შედეგო ვორწყეთ, მუჭო თირანს თინა მუშ ცხოვრებას უჯგუშობაშა (ეფეს. 4:22—24). მარა ჩქი ოკო ვაგმოჭყორდან, ნამდა თე ჭიჭე თასის იეჰოვა რდუნს (1 კორ. 3:7).

6, 7. მუს ბგურაფლენთ თევრეშე, მუჭო გაჭყჷ იეჰოვაქ დედამიწა?

⁶ მუდგას ვართუდასინ, იეჰოვა მოთვინებას გიმირჩქინანს დო თისხი დროს გიმურთუნს არძა საქმეს, მუსხით საჭირო რე თიშ ბოლოშა მიოჸუნაფალო. ღორონთ თეს მუშ სახელიშ განდიდებელო დო შხვეფიშ საჯგირობუოთ ორთჷ. მაგალთო, დეფიფქრათ, მუჭო მანწყუ იეჰოვაქ ადამიანეფშო დედამიწა ჭიე-ჭიეთ.

⁷ თიშ ეიოჭარალო, მუჭო გაჭყჷ იეჰოვაქ დედამიწა, ბიბლია იჩიებ, ნამდა თიქ „დუდგინ საზღვარეფ“, გუკეთ „ფუნდამენტ“ დო „გეუდვჷ კუნთხუშ ქუა“ (იობ.  38:5, 6). ღორონთიქ თის ხოლო გიმურთჷ დრო, ნამდა თოლ ქიგნულინუკო მუშ ნამუშერს (დაბ. 1:10, 12). წერმიდგინით, მუს იგინანდეს ანგელოზეფ, მუჟამსით ქოძირუნდეს, მუჭო მიშჷ წიმი იეჰოვაშ შემოქმედებით საქმიანობა! მუ გახარებულეფ იჸუაფდეს თინეფ, მუდგაშ გურშენ ხონარმაღალო ქიდიჭყეს ღორონთიშ განდიდება (იობ. 38:7). მუს ბგურაფლენთ თავრეშე? იეჰოვაშ შემოქმედებით საქმიანობა ანთასობით წანას მიშჷ დო მუჟამსით თიქ ქიგნაჯინ მუშ გურგედვალირო ნაკეთებ საქმეეფს, ქოძირ, ნამდა „ირფელ მანგარ ჯგირ რდჷ“ (დაბ. 1:31).

8. მუს გუვარჩიენთ ანწიან ქვესათაურს?

⁸ მუჭოთ თე მაგალითეფშე ბძირით, ღორონთიშ სიტყვას ბრელ პრინციპ რე მოჩამილ, სოვრეშეთ ვორწყეთ, ნამდა მოთვინება რე საჭირო. ასე ჩქი გუვარჩიენთ ჟირ სიტუაციას, მუჟამსით საჭირო რე, მოთვინებათ ვუჯინათ იეჰოვას.

9. ნამ რე ართ-ართ მხარე, სოდეთ საჭირო რე, ვუჯინათ იეჰოვას?

⁹ ჩქი შილებე ოჯინექ მაჸუან ლოცვეფიშ პასუხშა. მუჟამსით ბლოცულენთ, ნამდა ღორონთიქ ქომჩან ძალა სირთულეეფშა გარზებელო ვარდა სისუსტეეფშა გიორჯგინალო, შილებე იფიფქრათ, ნამდა იეჰოვა აგვიანენს პასუხიშ მოჩამას. მუშენ ვა პასუხენს იეჰოვა ხეთეშე ჩქინ არძა ლოცვას?

10. მუშენ რე საჭირო, მოთვინებათ ქუჯინათ იეჰოვას, ნამდა მიბღათ პასუხ ჩქინ ლოცვეფშე?

¹⁰ იეჰოვა ყურადღებათ ურჩქილე ჩქინ ლოცვეფს (ფსალმ. 65:2). თინა ჩქინ შურდოგურით რაგადებულ ლოცვეფს უჯინე, მუჭოთ ჩქინ ძალიერ რწმენაშ მტკიცებულებას (ებრ. 11:6). თეს გეძინელ, იეჰოვას ოკო თიშ ძირაფა, მუსხით ფცხოვრენთ ჩქინ ლოცვეფიშ თანახმას, ნამდა შევასრულათ თიშ ნება (1 იოან. 3:22). ათეშენ, მუჟამსით ვოცადუთ, გივორჯგინათ გლახა ჩვევეფს დო სისუსტეეფს, შილებე მოსაჭირდან მოთვინება დო ლოცვაწკუმა ართო მოქმედება. იესოქ მიმეხვარეს თიშ გაგებას, ნამდა იეჰოვაქ მინშა შილებე ხეთეშე ვა უპასუხას ჩქინ ლოცვას. თიქ ელამჩეს: „ქითხით დო მუგაჩამნა, დოგორით დო ქოძირუნთ, დუხაკეთ დო გუგანჯამუნა, მუშენდა მით თხულენს, ღებულენს, მით გორუნს, ძირუნს, დო მით უხაკუანს, განჯამუ“ (მათ. 7:7, 8). თე რჩევას ქიმეპუნთ დო ირიათო ქობლოცულენთ-და, შემლებნა ბჯერდან, ნამდა ჩქინ ზეციერ მუმა მირჩქილენა დო პასუხის ქომჩანა (კოლ. 4:2).

11. მუჭო მოხვარნა ებრაელეფიშ 4:16, მუჟამსით ჩქინ ლოცვეფიშ პასუხ დაგვიანებულო იძირე?

¹¹ მართალ რე, შილებე ლოცვაშ პასუხ დაგვიანებულო იძირედას, მარა იეჰოვა მოპირნა, ნამდა თის „საჭირო დროს“ მიბღენთ (წეკითხით ებრაელეფიშ 4:16). ათეშენ ოკო ვადვადანაშაულათ იეჰოვა, მუჟამსით მუდგარენ ხეთეშე ვა ხვადუ, მუჭოთ თეს ჩქი ფიფქრენდით. მაგალთო, ბრელ პიროვნება წანეფ რე ლოცულენს, ნამდა ქოძირას, მუჭო განადგურენს ღორონთიშ სამეფო თე ქვეყნიერებაშ საქმეეფს. იესოქ ხოლო ელამჩეს, თეშ გურშენ იბლოცითკო (მათ. 6:10). მუ არაგონივრულ იჸუაფუდ, მითინს ღორონთიშ რწმენა დასუსტებუდკო თიშ გურშენ, ნამდა აღსასრულქ თიმწკუმა ვა მორთჷ, მუჟამსით თეს ადამიანეფ ელდეს! (აბაკ. 2:3; მათ. 24:44). ჩქი გონივრულო იფქციებუთ თით, ნამდა ვუჯინეთ იეჰოვას დო რწმენათ ბლოცულენთ. აღსასრულ ზუსტას საჭირო დროს ქუმურს, მუშენდა იეჰოვას უკვე გიშაგორილ აფჷ „დღა დო საათ“ თე მოვლენაშო. თიმწკუმა დებრწმუნებუთ, ნამდა ირკოჩშო უჯგუდ თენა ზუსტას თი დროს მოხვალამედკო (მათ. 24:36; 2 პეტ. 3:15).

12. მუ სიტუაციეფს შილებე განსაკუთრებულო გამჭირდან მოთვინებაქ?

¹² ჩქი შილებე მათვინებელქ მაჸუან, მუჟამსით  ვუჯინეთ სამართლიანობაშ აღდგენას. ამდღა ადამიანეფ ხშირას ოქცუნა გლახათ თინეფს, მით განსხვავებულ სქესიშ, რასაშ, წარმომავლობაშ, კულტურაშ ვარდა ეროვნებაშ რენა. შხვეფს ფიზიკურ ვარდა გონებრივ შესაძლებლობეფ აფნა შეზღუდულინ თიშენ ოქცუნა გლახათ. იეჰოვაშ ხალხშე ბრელ ბიბლიაშა გერსხილ რწმენაშ გურშენ ხვადუ უსამართლობას. თეცალ სიტუაციას თქვა ხოლო ქორეთ-და, საჭირო რე, რშუდან იესოშ სიტყვეფ: „მით ბოლოშახ მითვინენს, გინოსქიდუ“ (მათ. 24:13). მარა მუ ოკო აკეთათ, მუჟამსით კრებას მიდგარენ სერიოზულო აშენს? თიშ უკულ, მუთ უხუცესეფ თეშ გურშენ ქიგეგენა, ქიდიტენთო თე საქმეს თინეფიშ ხეს დო მოთვინებათ ქუჯინეთო, ნამდა თეს იეჰოვაშ მოსაწონო გეგნოჭყვიდნა? მუ შილებე უხუცესეფქ გაკეთან, მუჟამსით ნამდგარენ სერიოზულო აშენს?

13. მუს ელჷ იეჰოვა უხუცესეფშე, მუჟამსით კრებას ნამდგარენს სერიოზულ ცოდვა აფჷ ჩადენილ?

¹³ მუჟამსით უხუცესეფ ქიგეგენა, ნამდა კრებას ნამდგარენს სერიოზულ ცოდვა აფჷ ჩადენილ, თინეფ ქილოცენა „ღორონთიერ სიბრძნეშ“ მიოღებელო, ნამდა თე სიტუაციაშ დროს იეჰოვაშ ხემძღვანელობას მიაჸუნან (იაკ. 3:17). უხუცესეფიშ მიზან რე, ქიმეხვარან შემცოდველს დო არასწორ შარაშე გემკართინუან (იაკ. 5:19, 20). თეწკუმა ართო, თინეფს ოკონა, ირფელ გაკეთან კრებაშ ოთხილარო დო გურშა ეუქექუან დაზარალებურს (2 კორ. 1:3, 4). სერიოზულ დანაშაულიშ შემთხვევას თინეფქ არძა ფაქტ ოკო დოშაყარუან, მუდგას შილებე დროქ დესაჭირას. უკულ ლოცვათ დო სიფრთხილეთ ქიმეჩანა დუმაშებელს თიცალ ბიბლიურ რჩევეფს დო მითითებეფს, მუნერით თიშ დანაშაულს მეურე (იერ. 30:11). მართალ რე, უხუცესეფს დრო ვემუღნა, მარა ვართ ჩქარენა გადაწყვეტილებაშ მეღებას. თინეფიშ მხარეშე იეჰოვაშ მითითებეფიშ მეუნას ირკოჩშა მოუღ ჯგირობუა დო თეს მთელ კრება ორწყე. მარა თიმწკუმა ხოლო, მუჟამსით თეშნერო გინოჭყორდუ საქმე, დაზარალებურ პიროვნება იშენით შილებე დიდ ჭუას გინაფლენდას. თეცალ მდგომარეობას ქორეთ-და, მუშ კეთება შეილებნა, ნამდა ეიქექუათ გურჭუა?

14. თანაქრისტიანქ სერიოზულო ქუდაიშეს-და, ნამ ბიბლიურ მაგალითის შეულებ თქვან მოხვარა?

¹⁴ დღას სერიოზულო ქუდუშებნო თქვანდა მითინს, თინეფ შქას თანამორწმუნეს? თქვა შეილებნა ღორონთიშ სიტყვას  ძირათ ჯგირ მაგალითეფ, სოვრეშეთ გურაფლენთ, მუჭო უჯინათ იეჰოვას, ნამუთ გეგშასწორენს უსამართლობას. მაგალთო, მართალ რე, იოსებიქ უსამართლობას მუშ ჯიმალეფშე შეხვად, მარა თინეფიშ დანაშაულშა ვემუჩამ საშვალება, გურშა ჟღამ ქალუდვუკო. თეშ მანგიორო, თიქ მთელ ყურადღება იეჰოვაშ მსახურებაშა გეგნიღ, მიდგაქ თინა მოთვინებაშენ აკურთხჷ (დაბ. 39:21). დროშ მიკულაშ უკულ იოსების შეიალებუ, ქაპატუკო თინეფს, მიდგაქ გურჭუა მიორინუ დო ქოძირკო, მუჭო არზენდჷ იეჰოვა კურთხევას (დაბ. 45:5). იოსებცალო, ჩქი ხოლო გურშა ემქექუანა იეჰოვაწკუმა დაახლოება დო თიშა მენდება, ნამდა საჭირო დროს გეგშასწორენს უსამართლობას (ფსალმ. 7:17; 73:28).

15. მუქ მეხვარ ართ დას, ნამდა მითვინკო შეურაცხყოფა?

¹⁵ მუშო ოკო რაგად, არძა უსამართლობა ვა რე თიცალ სერიოზულ, მუნერსით იოსებიქ შეხვად, მარა თინეფშე ნამთინეს შეულებ გურ ქელმოჭუან. მუჟამსით შხვეფწკუმა, თინეფ შქას იეჰოვაშ მოწმე ვა რენ ფერეფწკუმა, პრობლემა რჩქინდუ, ირფელს უჯგჷ ბიბლიურ პრინციპეფიშ გიმორნაფა (ფილ. 2:3, 4). გუვარჩუათ ართ შემთხვევა. ართ დას მანგარო ქალაჭვჷ გურქ, მუჟამსით ქიგეგ, ნამდა თანამშრომელ უარყოფით დო ტყურა ინფორმაციას ავრცელენდჷ თიშ გურშენ. ხეთეშე მოქმედებაშ მანგიორო, თე დაქ დრო გეგმურთჷ იესოშ მაგალითშე დაფიქრებას. მუჟამსით იესოს შეურაცხყოფას მიორინუანდეს, თინა მანგიორს ვეგნუგანდჷ (1 პეტ. 2:21, 23). ათეშენ თე დაქ გინოჭყვიდ, საპასუხოთ მუთუნ ვა უკეთებუდკო. ჭიჭე ხანშა თიქ ქიგეგ, ნამდა თე თანამშრომელ სერიოზულო ჸოფე დალახებურ დო მანგარ სტრეს ნოღვე. თე დაქ იფიქრჷ, ნამდა თის შილებე გურს მუთუნ გლახა ვა უღუდკო. შედეგო, განსაკუთრებულ ხიოლ დო სიმშვიდე იგინ, თიშ გურშენ, ნამდა მოთვინებათ გინიღ შეურაცხყოფა.

16. მუს შეულებ გურშა ეიქექუან, მუჟამსით უსამართლობას ითვინენთ? (1 პეტ. 3:12)

¹⁶ თქვა ხოლო უსამართლობაშ ვარდა შხვა მიზეზიშ გურშენ ქიტანჯებუთ-და, რშუდან, ნამდა იეჰოვა „ხოლოს რე გურგოტახილეფწკუმა“ (ფსალმ. 34:18). თის უჸორთ თქვან მოთვინებაშენ დო თიშ გურშენ, ნამდა „ოღალს“ თის გინოჩანთ (ფსალმ. 55:22). თინა რე მთელ დედამიწაშ მოსამართლე დო თიშ თოლს მუთუნ ვამკაკორდუ (წეკითხით 1 პეტრეშ 3:12). ქორეთო მზათ ქუჯინათ იეჰოვას, მუჟამსით თიცალ სირთულეშ წოხოლე გერეთ, ნამდგაშ გერჯგინა ვეშეილებნა?

17. მუჭოთ ესაიაშ 30:18-ს ჭარჷ, მუშა მარწმუნენა იეჰოვა?

¹⁷ მალას ჩქინ ზეციერ მუმა მუშ სამეფოშ საშვალებათ მანგარო მაკურთხენა. ესაიაშ 30:18 იჩიებ: „იეჰოვა მოთვინებათ იჯინე, ნამდა ჭყოლოფა გეგმირჩქინას თქვანო დო გემწოდირთუ, ნამდა ქეშეიცოდილუან, მუშენდა იეჰოვა სამართლიან ღორონთ რე. ბედნერ რე არძა, მით ელჷ თის“. იეჰოვას ელნან თინეფ მიღენა ბრელ კურთხევას ქოთ ამდღა დო ქოთ ახალ ქვეყნიერებას.

18. მუ კურთხევეფ მელნა?

¹⁸ მუჟამსით ღორონთიშ ხალხ ახალ ქვეყნიერებაშა გეგნურს, თინეფს მეტო ვაჸინა გარზებელ ოწუხებელ დო სირთულეეფშა, ნამდგას ამდღა ხვადუნა. უსამართლობა დო ჭუა ართ დო სამუდამოთ მისპუ (გამოცხ. 21:4). მეტო ვა მაჸინა ოწუხებელ თიშ მიოღებელო, მუთ მოსაჭირნა, მუშენდა არძას ხვეიანო აღვენუ ირფელ (ფსალმ. 72:16; ეს. 54:13). თენა მართალო დიდ კურთხევა იჸუაფ!

19. მუშო მამზადენა იეჰოვა ჭიე-ჭიეთ?

¹⁹ იეჰოვა მუშ მართველობაშ დროს ოცხოვრებელო თით მამზადენა, ნამდა ამდღარშე მოხვარნა, ჩეფთხინუათ გლახა ჩვევეფ დო გუვავითარათ ჯგირ თვისებეფ. გურქ ვა გოიტირხან დო ვემიოტუათ თიშ მსახურება. არძაშ უჯგუშ ცხოვრება წიმი მელნა! თე სარკო დროშ მოულაშახ, მორთ გუვაგრძელათ მოთვინებათ დო მზადყოფნათ თიშ ჯინა, მუჟამ მიჸონანს იეჰოვა ბოლოშა მუშ საქმეს!