1-2. Mang e gad ra weliy ko re article ney?

UW ROGON u wan’um ni faanra bay ba chugum nib t’uf rom ni ga be sonnag, ma de taw ko ngiyal’ nim lemnag? Gur, ra magafan’um? Be gaar e Proverbs 13:12: “Faanra i l’agan’uy nga ban’en me kireb fare n’em, me mulan’uy.” Machane ra uw rogon u wan’um ni faanra mu rung’ag ni bay fan nde taw fare chugum ko ngiyal’ nim lemnag? Dabisiy ni ga ra gum’an’nagem ngam son.

² Gad ra weliy ko re article ney boch i kenggin e motochiyel u Bible nra ayuwegdad ni nge ‘l’agan’dad ngak Got ma gad sonnag.’ (Mik. 7:7) Ngemu’ ma gad weliy l’agruw ban’en nthingar da gum’an’naged gadad ngad sonnaged Jehovah ni nge rin’ ban’en ngay. Ma bin tomur e gad ra weliy murung’agen boch e tow’ath nra yag ngak e piin nib m’agan’rad ngay ni ngar sonnaged Jehovah.

3. Mang e be fil e Proverbs 13:11 ngodad?

³ Be fil e Proverbs 13:11 ngodad fan nsusun e ngaud gum’an’gad. Be gaar: “Ra mu yognag e salpiy rom nrib mom, ma rib mom nra thay u paam. Ra mmo’maw’ ni mu thognag [“ra mu thognag ni buchuuw ma buchuuw,” NW], ma pire’ nrayog ngom.” Mang e gad be fil ko re thin ney? Be’ nib gonop e ma tiyan’ ko tin ma rin’ ma kub gum’an’, ma ra yib angin ngak.

4. Mang e be fil e Proverbs 4:18 ngodad?

⁴ Be yog e Proverbs 4:18 (BT) ngodad ni “fare pa’ i kanawo’ ni ma yan e girdi’ nib mat’aw u daken e bod e yal’ ni nge m’ug, ni be ga’ raen i yan nge mada’ ko ngiyal’ ni kari rran.” Re thin ney e be tamilangnag ni ma ayuweg Jehovah e girdi’ rok ni ngar nanged e n’en nib m’agan’ ngay ni buchuuw ma buchuuw. Re thin ney e ku be ayuwegdad ni ngad nanged rogon ni ma thilyeg reb e Kristiano boch ban’en u lan e yafos rok, me chugur e tha’ u thilrow Jehovah. Ba t’uf e tayim ni nge chugur be’ ngak Jehovah. Gad ra fil e pi fonow ni yibe pi’ ngodad u daken e Thin rok  Got nge ulung rok ma gad fol riy, ma ra munmun me yag pi fel’ngin Kristus ngodad mu kud nanged Got nib fel’ rogon. Mu lemnag rogon ni susunnag Jesus e re n’ey.

5. Mang fanathin e fanay Jesus ni nge tamilangnag nib t’uf ba ngiyal’ ni nge thilyeg be’ boch ban’en u rarogon?

⁵ I weliy Jesus ba fanathin ni nge tamilangnag ni fare thin ni murung’agen Gil’ilungun Got ni gad ma machibnag e bod ba awoch ni ke tugul me ilal u gum’irchaen e piin nib t’uf e tin nib mat’aw rorad ni buchuuw ma buchuuw. I gaar: “Be tugul fapi awoch ni be ga’ i yan. Machane de nang [faen ni yung e awoch] rogon e n’en ni rin’ me yodorom. But’ e ir e ayuweg e woldug nge ga’ nge yib wom’engin; som’on e muk’uf riy ni ka fini bor ni kab mererey, ma bin migid e ke m’ug fare muk’uf riy ni polo’ ndawori puf, me migid me puf i man wom’engin me m’ug wom’engin ni pire’.” (Mark 4:27, 28) Mang e be yip’ Jesus fan? Be yog ni be’ nra mich u wan’ fare thin ni murung’agen Gil’ilungun Got e ma mon’og ko tirok Got ban’en ni buchuuw ma buchuuw ni bod rogon ba woldug ni kan yung ni ma ilal ni buchuuw ma buchuuw. Bod nnap’an nra chugur e tha’ u thilin e piin gad be fil e Bible ngorad nge Jehovah, ma aram e gad ra tabab ni ngad guyed rogon ni be thil e ngongol rorad. (Efe. 4:22-24) Machane dab da paged talin ni Jehovah e ir e ma ayuweg fare awoch ni nge tugul me ga’.​—1 Kor. 3:7.

6-7. Mang e gad be fil u rogon ni sunmiy Jehovah e fayleng?

⁶ Demtrug ko mang e be rin’ Jehovah, ma ma gum’an’nag ir nge rin’ u n’umngin nap’an nib t’uf ni nge rin’, ya nge yag ni mu’nag e maruwel rok. Ma rin’ e re n’ey ya nge yag ni ngan n’uf e ngachal rok, miki ayuweg yugu boch e girdi’. Mu lemnag rogon ni ngongliy e fayleng ni buchuuw ma buchuuw ya nge yag ni par e girdi’ riy.

⁷ Nap’an ni be weliy e Bible rogon ni sunmiy Jehovah e fayleng me yog ni ke ‘dugliy ga’ngin ni nge yan i par,’ me ‘gagiyegnag ni nge par u tagil’,’ me ‘sunumeg e n’en ni nge gif ngay.’ (Job 38:5, 6) Ki tay ba ngiyal’ ni nge fal’eg i yaliy e tin ke ngongliy. (Gen. 1:10, 12) Mu lemnag rogon laniyan’ e pi engel e ngiyal’ nem u nap’an  ni yad ra guy reb e ban’en nib beech ni ka fini sunmiy Jehovah. Dabisiy nib gel e felfelan’ nra ted! Bochan e re n’ey, ma aram mu ur “tolulgad u fithik’ e felfelan’.” (Job 38:7) Ere mang e gad be fil riy? I sunmiy Jehovah e fayleng, nge pi t’uf, nge urngin ban’en nib fos u lan bokum biyu’ e duw. Machane nap’an ni par nge fal’eg i yaliy urngin ban’en ni ke sunmiy nrib fel’ rogon “ma rib fel’ u wan’.”​—Gen. 1:31.

8. Mang e ngad weliyed e chiney?

⁸ Pi n’ey ni kad weliyed e be tamilangnag ngodad ni boor e pi kenggin e motochiyel u lan e Thin rok Got ni be fil ngodad nib t’uf ni ngaud gum’an’gad. Chiney e ngad weliyed l’agruw ban’en nib t’uf ni ngad sonnaged Jehovah ni nge rin’ ban’en ngay.

9. Mang reb e ban’en nib t’uf ni ngad sonnaged Jehovah ni nge rin’ ban’en ngay?

⁹ Rayog nib t’uf ni ngad sonnaged Jehovah ni nge sulweg taban e meybil rodad. Nap’an ni gad ra meybil ngak Jehovah ni nge pi’ gelngidad ni ngad athamgilyed reb e magawon ni gad be mada’nag ara nge ayuwegdad ni ngad talgad i rin’ ban’en ndabun, ma rayog ni ngad lemnaged ni ke n’uw nap’an ma der sulweg taban e meybil rodad. Ere mang fan ni gathi gubin e meybil rodad ni ma sulweg Jehovah taban ni ka chingiyal’ nem?

10. Mang fan nib t’uf ni ngad gum’an’naged gadad ngad sonnaged Jehovah ni nge sulweg taban e meybil rodad?

¹⁰ Ma motoyil Jehovah ko meybil rodad nib fel’ rogon. (Ps. 65:2) Meybil ni gad ma tay ni ke yib u gum’ircha’dad e ma sap ngay ni aram e mich riy ni bay e michan’ rodad. (Heb. 11:6) Nap’an ni gad ra meybil ni nge ayuwegdad ni ngad rin’ed e n’en nib m’agan’ ngay, ma baadag ni nge guy ni gad be athamgil ni ngad rin’ed e n’en nib m’agan’ ngay. (1 John 3:22) Ere nap’an ni gad ra wenig ngak ni nge ayuwegdad ni ngad talgad i rin’ ban’en ndabun, ma rayog nib t’uf ni ngad gum’an’naged gadad ngad rin’ed e tin rayog rodad ya nge yag nda thilyeged e ngongol rodad. I yog Jesus ni bay boch e meybil rodad ndab ni sulweg taban ni ka chingiyal’ nem. I gaar: “Mu ninged, me yog ngomed; mu gayed mi gimed pirieg; mu tugtuguyed e mab, min bing e mab ngomed. Ya urngin e piin ni yad ra ning e ra yog ngorad, ma en nra gay e ra pirieg, ma mab e yira bing ngak e en nra tugtuguy.” (Matt. 7:7, 8) Faan gad ra fol ko re fonow ney ma dab da ‘paged e meybil,’ ma rayog ni nge pagan’dad nra rung’ag e Chitamangidad ni bay u tharmiy e meybil rodad me sulweg taban.​—Kol. 4:2.

11. Uw rogon nra ayuwegdad e Hebrews 4:16 u nap’an ni gad be lemnag ni ke n’uw nap’an ndanir sulweg taban e meybil rodad?

¹¹ Yugu aram rogon nsana gad be lemnag ni ke n’uw nap’an nder sulweg Jehovah taban e meybil rodad, machane ke micheg nra sulweg taban “ko ngiyal’ ndabi siy” ni nge rin’ riy. (Mu beeg e Hebrews 4:16.) Ere thingar dab don’ed e kireb nga daken Jehovah ni faanra de sulweg taban e meybil rodad ko ngiyal’ nda lemnaged ni nge rin’ riy. Bod ni boor e walag ni ke yoor e duw ni yad be yibilay ni nge thang Gil’ilungun Got e re m’ag ney. Mus ngak Jesus miki yog nsusun e ngad yibilayed e re n’ey. (Matt. 6:10) Machane rib balyang e en nra war michan’ rok ngak Got ni bochan e de yib e tomur ko ngiyal’ ni be lemnag e girdi’ ni nge yib riy! (Hab. 2:3; Matt. 24:44) Ere gad ba gonop ni faan gad ra sonnag Jehovah ma gad meybil ngak nib michan’dad nra sulweg taban. Ra yib e tomur ko ngiyal’ nib puluw ni nge yib riy, ya ke mu’ Jehovah i dugliy e ‘re rran nge re awa’ ni nge yib riy. Mab puluw e ngiyal’ nra buch e re n’ey riy.​—Matt. 24:36; 2 Pet. 3:15.

12. Mingiyal’ e rayog ni nge mo’maw’ ngodad ni ngad gum’an’naged gadad?

¹² Rayog nib t’uf ni ngad gum’an’naged gadad ngad athamgilgad u fithik’ e ngongol nde mat’aw  ni yibe rin’ ngodad. Girdi’ ko re fayleng ney e yad ma gafgownag yugu boch e girdi’ ni bochan e yad e pumoon ara ppin, ara bochan raen dowrad, ara yalen rorad, ara nam ni kar bad riy. Ku bay boch e girdi’ ni yima gafgownagrad ni bochan e bay ba mit e m’ar rorad. Boor e girdi’ rok Jehovah ni yad be athamgil u fithik’ e ngongol nde mat’aw ni yibe rin’ ngorad ni bochan e michan’ rorad. Nap’an ni yira gafgownagdad, ma dab da paged talin e n’en ni yog Jesus ni gaar: “En nra athamgil nge mada’ ko tomur e ra yog e yafos ngak.” (Matt. 24:13) Machane uw rogon ni faanra kam nang ni bay be’ u lan e ulung ni ke rin’ reb e denen nib ubchiya’? Nap’an nra nang e piin piilal e re n’ey, ma gur ga ra pag fan ngorad, mag gum’an’nagem ngam sonnagrad ni ngar rin’ed ban’en ngay u rogon nib m’agan’ Jehovah ngay, fa? Mang boch ban’en nrayog nib t’uf ni nge rin’ e piin piilal ko re n’ey?

13. Mang e baadag Jehovah ni nge rin’ e piin piilal u nap’an nra ngongliy be’ reb e denen nib ubchiya’?

¹³ Nap’an nra nang e piin piilal murung’agen reb e denen nib ubchiya’ ni ke rin’ be’ u lan e ulung, ma yad ma yibilay “fare gonop ni yib u tharmiy” ya nge yag nra sapgad ko fare magawon ni bod rogon ni be sap Jehovah ngay. (Jas. 3:17) N’en ni yad be nameg e ngar ayuweged facha’ ni nge ‘chuw ko kireb ni be ngongliy i yan’ ni faanra rayog. (Jas. 5:19, 20) Ku yad baadag ni ngar rin’ed urngin e tin rayog rorad ni ngar ayuweged e ulung, mu kur fal’eg laniyan’ e piin ke kireb lanin’rad. (2 Kor. 1:3, 4) Nap’an nra nang e piin piilal ni bay be’ ni ke rin’ reb e denen nib ubchiya’, ma thingar ra guyed rogon ngar nanged e n’en kari buch. Rayog nib t’uf e tayim ni ngar rin’ed e re n’ey riy. Ngemu’ mar meybilgad mar fonownaged nib fel’ rogon ni yad be fanay e thin nu Bible, mar yal’uweged u rogon nib “mat’aw” ni ngan rin’ riy. (Jer. 30:11, BT) Yugu aram rogon ndarur songad nge pag nap’an, machane ku darur gurgad ngar dugliyed e n’en ngan rin’. Nap’an nra fol e piin piilal ko fonow ni ke yib rok Jehovah, ma ra guy e ulung angin nra yib ngak urngin e girdi’. Machane mus ni faanra kan pithig fare magawon u rogon kanawoen nsusun e ngan rin’ riy, maku rayog ni nge kireb laniyan’ e piin ke magawonnagrad e n’en ke rin’ faen ke denen. Ere faanra ke buch ban’en rom ni aray rogon, ma uw rogon ni nge war e kireban’ rom?

14. Mini’ e bay murung’agen u Bible nrayog ni nge ayuwegem u nap’an ni ke rin’ reb e Kristiano ban’en ni kari kirebnag lanin’um?

¹⁴ Bay ba ngiyal’ ni ke rin’ be’ ara reb e walag  ban’en ni kari kirebnag lanin’um, fa? Rayog ni ngam pirieg murung’agen boch e girdi’ u lan e Thin rok Got ni be fil ngodad rogon ni ngad sonnaged Jehovah ni nge yal’uweg boch ban’en ni ma buch nde mat’aw. Bod ni yugu aram rogon nde mat’aw e n’en ni rin’ pi walagen Josef ngak, machane de pag e denen rorad ni nge k’aring ni nge par nib damumuw. Ya n’en ni rin’ e ulul ni nge pigpig ngak Jehovah u rogon nrayog rok, me tomur riy me tow’athnag Jehovah ko gum’an’ nge athamgil ni tay. (Gen. 39:21) Munmun me yag ni nge n’ag Josef fan e kireb ni kan rin’ ngak, me guy rogon ni tow’athnag Jehovah. (Gen. 45:5) Ere nap’an ni gad ra chugurnaged gadad ngak Jehovah ma gad sonnag ni nge yal’uweg e tin de mat’aw ni ke buch ko ngiyal’ nib puluw ni nge rin’ riy, ma aram e rayog ni nge fel’ lanin’dad ni bod Josef.​—Ps. 7:17; 73:28.

15. Mang e ayuweg reb e walag nib pin ni nge gum’an’nag ir ko n’en ni kan rin’ ngak nde mat’aw me gapas laniyan’?

¹⁵ Riyul’ ni gathi gubin ban’en nde mat’aw ni ma buch ni bod e n’en ni buch rok Josef, machane gad gubin ni ma kireban’dad u nap’an ni yira rin’ ban’en nib kireb ngodad. Ra bay e magawon u thildad be’ nib muun be’ ngay nder ma pigpig ngak Jehovah, ma ra yib angin ngodad ni faan gad ra fol ko pi kenggin e motochiyel u Bible. (Fil. 2:3, 4) Am lemnag e n’en ni buch rok reb e walag nib pin. Ri kireban’ u nap’an ni yan i nang ni bay be’ ni yow nga maruwel ni be weliy boch ban’en u murung’agen nib kireb maku de riyul’. Ere par nge fal’eg i lemnag e n’en ni rin’ Jesus ko bin ni nge guy rogon ni nge rin’ ban’en ngay ni ka chingiyal’ nem. Nap’an nnog e thin nib kireb ngak ma de tay puluwon ni thin nib kireb. (1 Pet. 2:21, 23) Ere dugliy ni nga yigi pag. Boch nga tomuren me yan i nang ni bay ba mit e m’ar nib ubchiya’ ni ke yib ko fare pin ma ri be mochuch. Ere lemnag ndabisiy ni gathi lem ko fare pin ni nge yog e pi n’em u murung’agen. Ri felfelan’ fare walag ni ke gum’an’nag ir ko n’en ni kan rin’ ngak, ma ke gapas laniyan’.

16. Faanra ga be gafgow ni bochan ban’en nde mat’aw ni yibe rin’ ngom, ma mang e rayog ni nge fal’eg lanin’um? (1 Peter 3:12)

¹⁶ Faanra ga be gafgow ni bochan ban’en nde mat’aw ni yibe rin’ ngom ara bochan yugu ban’en, ma dab mu pagtalin ni Jehovah e ba chugur ngak e “piin ni ke mulan’rad.” (Ps. 34:18)  Gab t’uf rok ni bochan e gum’an’ ni ga be tay ma ga be pi’ e gilab rom ngak. (Ps. 55:22) Ir e Tapufthin ko fayleng ni polo’, ere ma guy gubin ban’en ni ma buch. (Mu beeg e 1 Peter 3:12.) Faanra bay e magawon rom nib ga’ ndabiyog ni ngam pithig ni yigoo gur ma dab mu pagtalin nib ga’ fan ni ngam sonnag Jehovah ni nge rin’ ban’en ngay.

17. Mang e ke micheg Jehovah nra rin’ nrogon ni bay ko Isaiah 30:18?

¹⁷ Dabki n’uw nap’an ma ra tow’athnagdad e Chitamangidad ni bay u tharmiy u daken Gil’ilungun. Be gaar e Isaiah 30:18: “Somol e be sonnagmed ni ngam sulod ngak me ayuwegmed. Ba adag ni nge runguymed, ya gubin ngiyal’ ni ma rin’ e tin nib mat’aw. Ba felfelan’ e piin ni ke pagan’rad ngak Somol.” Piin yad ra sonnag Jehovah e boor e tow’ath nra yag ngorad e chiney, ngu lan e bin nib beech e fayleng ni bay yib.

18. Mang boch e tow’ath nra yag ngodad boch nga m’on?

¹⁸ Nap’an nra yan e girdi’ rok Got nga lan e bin nib beech e fayleng, ma dakuriy ba ngiyal’ nra magafan’rad, maku dab kur mada’naged e magawon ni yad be mada’nag e chiney. Ra chuw e tin nde mat’aw ma dab kun amith. (Rev. 21:4) Dariy rogon ni nge magafan’dad ko tin nib t’uf rodad ya ba gaman e tin nib t’uf ko girdi’. (Ps. 72:16; Isa. 54:13) Rib manigil e re n’ey!

19. Mang e be fil Jehovah rogon ngodad e chiney ni buchuuw ma buchuuw?

¹⁹ Chiney e be fil Jehovah ngodad rogon ni ngad uned ko par u tan e gagiyeg rok ni aram e be ayuwegdad ni ngad talgad i rin’ boch e ngongol nib kireb ni kad mechamgad ngay, me yag e pi fel’ngin ngodad nib m’agan’ ngay. Dabi mulan’um ngam tal ko pigpig ni ga be tay ngak Jehovah, ya bay boch ban’en ni bay yib ni kab gel e fel’ riy! Ere chiney ni gad be sonnag e re ngiyal’ i n’em e ngad pared ni gad ba felfelan’, mad gum’an’naged gadad ngad sonnaged Jehovah ni nge rin’ e tin ke yog nra rin’!