1, 2. ¿Xi zazíʼdinu lu artículo riʼ?

GUXUÍʼLUNU cabézanu guedandá xiixa ni biseendacabe para laanu, peru candaa para guedandá ni, zándaca chuʼnu xizaa ne guiníʼ íquenu ¿xiñee caʼruʼ guedandani? Nga runi Biblia ná lu Proverbios 13:12: «Ora cueza binni xiixa ne qué gaca ni la? runi huará ni ladxidóʼ». Peru pa gánnanu xiñee candaa ni la? Zándaca maʼ qué ziuʼnu xizaa ne zabézanu dede ora gueedani.

² Lu artículo riʼ zadúʼyanu caadxi textu ni zeeda lu Biblia ni zacané laanu cuézanu (Miq. 7:7). Laaca zadúʼyanu chupa cosa ni zanda guizaaca ra naquiiñeʼ gusihuínninu nápanu paciencia ne cuézanu guni Jehová xiixa. Ne últimu la? zadúʼyanu ca ndaayaʼ ni zacaa ca binni ni nanna cueza.

3. ¿Xi rusiidiʼ Proverbios 13:11 laanu?

³ Lu Proverbios 13:11 riete ti ejemplu ni rusihuinni pabiáʼ risaca nga cuézanu. Raca ná: «Ca cosa risaca rapa binni nagueenda, laaca nagueenda rirá, peru ca cosa rapa binni chaahuiʼ chaahuiʼ ridale». ¿Xi rusiidiʼ textu riʼ  laanu yaʼ? Ni jma jneza nga gúninu ca cosa ca chaahuiʼ chaahuiʼ.

4. ¿Xi conseju zeeda lu Proverbios 4:18?

⁴ Proverbios 4:18 ná: «Neza stiʼ ca binni nachaʼhuiʼ zeeda gaca casi biaaniʼ stiʼ siadóʼ ne zeʼ ora ziyácani jma nayaʼniʼ dede guiaaniʼ dxindxi». Ca diidxaʼ riʼ rusihuínnicani chaahuiʼ chaahuiʼ rusiidiʼ Jehová xquidxi propósitu stiʼ. Laaca rusiidiʼ textu riʼ laanu chaahuiʼ chaahuiʼ nga ruchaa ti xpinni Cristu xquendanabani ne ridxiña gaxha de Jehová. Pa guni estudiarnu ne gúninu ni ná ca conseju ni zeeda lu Stiidxa Dios ne ni rudii xquídxibe laanu, chaahuiʼ chaahuiʼ zusihuínninu ca cualidad stiʼ Cristu ne jma zunibiaʼnu Dios. Guidúʼyanu ti ejemplu ni biquiiñeʼ Jesús para bisiene ni.

5. ¿Xi ejemplu biquiiñeʼ Jesús para gusiidiʼ laanu ximodo ridxiña ti binni gaxha de Jehová?

⁵ Lu ti parábola ni guníʼ Jesús, bichaagabe mensaje stiʼ Reinu ni runi predicarnu né ti biidxihuiiniʼ ni riniisi chaahuiʼ chaahuiʼ ndaaniʼ ladxidóʼ ca binni ni nachaʼhuiʼ. Sicaríʼ guniʼbe: «Rindani ca biidxiʼ que ne riroobaʼ ca yagahuiiniʼ que, peru laabe [hombre ni rusaba biidxiʼ] qué gánnabe ximodo peʼ raca ni. Stubi si layú que rudii: primé riree bandaga, despué riree espiga, ne últimu la? ridxá biidxiʼ ni maʼ gula ndaaniʼ espiga que» (Mar. 4:27, 28). ¿Xi nuu Jesús gusiidiʼ né ca diidxaʼ riʼ yaʼ? Ora riziidiʼ ti binni de Stiidxaʼ Dios zeeda gaca casi ti yagahuiiniʼ, chaahuiʼ chaahuiʼ ruchaa para guni ni riuulaʼdxiʼ Dios. Ridúʼyanu ni ora ridxiña ca estudiante stinu Jehová ne ora ruzulú ruchaacaʼ xquendanabánicaʼ para gúnicaʼ ni nabe (Efes. 4:22-24). Peru cadi guiaandaʼ laanu Jehová nga rusiniisi biidxihuiiniʼ ca (1 Cor. 3:7).

6, 7. ¿Xi rizíʼdinu de modo bizáʼ Jehová Guidxilayú?

⁶ Ora runi Jehová xiixa, rusihuinni napa paciencia ne riquiiñeʼ biaʼ tiempu caquiiñeʼ para gúnini. Ne rúnibe ni para gusisaca binni labe ne gacanebe xcaadxi.  Guidúʼyanu ximodo bíʼnibe dxi bizaʼbe Guidxilayú para binni.

⁷ Dxi bizáʼ Jehová Guidxilayú riʼ, Biblia ná, «gudíxhebe medida stini», «base stini» ne «guié risaca stini» (Job 38:5, 6). Dede guleebe tiempu para guiníʼ íquebe lu ca cosa ni bizaʼbe (Gén. 1:10, 12). ¿Ñee riníʼ íquenu ximodo biʼniʼ sentir ca ángel ca ora bíʼyacaʼ cuzáʼ Jehová cada cosa la? Zándaca guizáʼ biéchecabe, ne dede bicaacabe ridxi para gusisácacabe Dios (Job 38:7). ¿Xi rizíʼdinu? Biquiiñeʼ Jehová stale iza para bizáʼ Guidxilayú, beleguí, manihuiiniʼ ne binni ne ora biiyadxibe guiráʼ ni bizaʼbe que, guniʼbe: «Nabé galán cani» (Gén. 1:31).

8. ¿Xi chiguizíʼdinu?

⁸ Casi bidúʼyanu lu ca ejemplu ni gudiʼdiʼ ca, lu Biblia zeeda stale principiu ni rusiidiʼ laanu pabiáʼ risaca nga gápanu paciencia. Yanna, guidúʼyanu chupa cosa ni zanda guizaaca ra naquiiñeʼ cuézanu guni Jehová xiixa.

9. ¿Pora nga naquiiñeʼ cuézanu guni Jehová xiixa?

⁹ Ora rábinu cadi cacabi gá Jehová ca oración stinu. Pa guinábanu Jehová gudii stipa laanu para gudxíʼlunu xiixa guendanagana o gacané laanu gusaananu de gúninu ti cosa malu, zándaca guni sentirnu candaabe para guicábibe laanu. Yanna, ¿xiñee qué ricabi gá Jehová ca oración ni rúninu laa yaʼ?

10. ¿Xiñee naquiiñeʼ gápanu paciencia ora guni orarnu?

¹⁰ Rucaadiaga Jehová ca oración ni rúninu (Sal. 65:2). Ne ora runi orarnu ruuyabe nápanu fe laabe (Heb. 11:6). Ne ora rinábanu Jehová gacané laanu gúninu ni riuulaʼdxiʼ laaca riuuláʼdxibe gúʼyabe cayúninu stipa pur guibáninu modo riuuláʼdxibe (1 Juan 3:22). Nga runi, pa canábanu Jehová gacané laanu gusaananu de gúninu xiixa cosa malu, zándaca naquiiñeʼ gápanu paciencia ne gúninu stipa pur gúninu ni canábanu lu oración stinu. Bisiidiʼ Jesús cadi guiráʼ biaje zacabi Jehová ca oración stinu nagueendaca, nga runi guniʼbe: «Laguinabaʼ ne zacaatu, laguyubi ne zadxélatu, laguxhidxináʼ ne zaxeleʼ chuʼtu. Purtiʼ guiráʼ tu guinabaʼ zacaa, guiráʼ tu guyubi zadxela, ne guiráʼ tu guxhidxináʼ zaxeleʼ chuʼ» (Mat. 7:7, 8). Pa chinándanu conseju riʼ ne cadi gusaana de guni orarnu, nannadxíchinu zucaadiaga Bixhózenu ni nuu guibáʼ ca oración ni rúninu ne zacabi laanu (Col. 4:2).

11. ¿Ximodo racané Hebreos 4:16 laanu ora riníʼ íquenu candaa Jehová para guicabi oración stinu?

¹¹ Zándaca guiníʼ íquenu candaa Jehová para guicabi oración stinu, peru maʼ guniʼbe zacábibe laanu «ora peʼ caquiiñenu» ni (biindaʼ Hebreos 4:16). Nga runi, cadi naquiiñeʼ guiníʼ íquenu cadi jneza cayuni Jehová pa cadi cacabi ca oración stinu ora racaláʼdxinu. Guzéʼtenu ti ejemplu, stale hermanu maʼ ziné stale iza de canábacaʼ Jehová gacané laacaʼ gúʼyacaʼ ora gunitilú Reinu stibe guidxilayú malu riʼ. Dede Jesús gudxi laanu guinábanu gueeda Reinu stiʼ Dios (Mat. 6:10). Peru ti guendahuati nga gusaana de gápanu fe Dios purtiʼ caʼruʼ gueeda fin stiʼ guidxilayú riʼ ora racaláʼdxinu (Hab. 2:3; Mat. 24:44). Ni maʼ jneza nga cadi gusaana de cuézanu guni Jehová xiixa ne gusihuínninu nápanu fe ora guni orarnu. Maʼ gudixhe Jehová padxí ne pora gunitilú guidxilayú riʼ ne biaʼsi  dxi maʼ gudíxhebe ca para guiranu (Mat. 24:36; 2 Ped. 3:15).

12. ¿Pora nga zándaca gaca nagana para laanu gápanu paciencia?

¹² Ora gúnicabe laanu cosa ni cadi jneza. Tiempu riʼ, nabé runi tratar binni mal xcaadxi purtiʼ hombre o gunaa laa, raza stiʼ, idioma ni riníʼ, cultura, guidxi ra nabeza o pur xiixa guendahuará ni napa. Nabé runinácabe stale xpinni Dios pur ni runi crecaʼ. Pa cayuni nácabe laanu casi maʼ bizéʼtenu riʼ, guietenaláʼdxinu ca diidxaʼ ni guníʼ Jesús: «Peru tu guni huantar dede ora gueeda fin la? zalá» (Mat. 24:13). Peru pa gánnanu maʼ biʼniʼ cometer tuuxa ti pecadu malu ne maʼ nanna ca ancianu ni, ¿ñee zabézanu ne zápanu confianza zacané Jehová laacabe para gacanécabe hermanu ni biʼniʼ cometer pecadu ca la? ¿Xi zuni ca ancianu ca yaʼ?

13. ¿Xi racalaʼdxiʼ Jehová guni ca ancianu ora biʼniʼ cometer ti hermanu ti pecadu malu?

¹³ Ora ranna ca ancianu caʼ maʼ biʼniʼ cometer tuuxa hermanu xiixa pecadu malu, rinábacabe Jehová «guendabiaaniʼ ni zeeda de guibáʼ» para ganda gúʼyacaʼ ca cosa ca modo ruuyabe ca ni (Sant. 3:17). Ni racaláʼdxicabe nga gacanécabe binni ca gusaana ca cosa malu ni cayuni (Sant. 5:19, 20). Laaca racaláʼdxicabe gúnicabe guiráʼ ni nuu lu nácabe para gacanécabe congregación ne quixhedxícabe ladxidóʼ ca ni gucaná (2 Cor. 1:3, 4). Ora ganna ca ancianu ca maʼ biʼniʼ cometer tuuxa ti pecadu malu, naquiiñeʼ gánnacabe primeru xi guiráʼ bizaaca. Riné ndiʼ tiempu. Despué, naquiiñeʼ guni orárcabe, iquiiñecabe Biblia para gudiicabe conseju binni ca ne guni corregírcabe laa «biaʼ caquiiñeʼ si» (Jer. 30:11). Neca qué zandaa ca ancianu, peru laaca que zacaadíʼcabe ti decisión nagueenda. Ora rinanda ca ancianu ca ni ná Jehová ribeendú congregación ca ni galán. Neca zacá, zándaca ziuuruʼ hermanu ni zuni sentir triste. Pa zacá cazaacanu, ¿xi zanda gúninu para gatadxí ladxidoʼno yaʼ?

14. ¿Xi ejemplu zeeda lu Biblia zanda gacané laanu pa maʼ bininá ti hermanu laanu?

¹⁴ ¿Ñee huayuniná tuuxa hermanu o hermana de congregación stinu laanu la? Pa zacá ni, lu Biblia zanda guidxélanu stale ejemplu ni zacané laanu  cuézanu guni chaahuiʼ Jehová ni cazaacanu. Guzéʼtenu ti ejemplu, neca biʼniʼ ca biʼchiʼ José laa stale cosa ni cadi jneza, peru qué nudiibe lugar nuchiichi ca ni laabe, sínuque jma gucuá íquebe gúnibe ni ná Jehová ne pur nga la? guluu ndaayaʼ Jehová laabe pur paciencia stibe ne pur biʼniʼ huantarbe (Gén. 39:21). Ra gudiʼdiʼ tiempu biʼniʼ perdonar José ca biʼchiʼ ne biiyabe ximodo guluu ndaayaʼ Jehová laabe (Gén. 45:5). Cásica José laanu laaca zatadxí ladxidoʼno ora guidxíñanu gaxha de Jehová ne gudiʼnu lugar laabe guni chaahuibe ca cosa ni cadi jneza (Sal. 7:17; 73:28).

15. ¿Xi gucané ti hermana guni huantar ora guníʼcabe cosa ni cadi dxandíʼ de laa?

¹⁵ Zándaca qué zazaacanu guiráʼ ni bizaaca José, peru guiranu racananu ora guni tratárcabe laanu mal. Pa nápanu ti guendanagana ne ti binni, neca cadi testigu stiʼ Jehová laabe, naquiiñeʼ chinándanu ca conseju ni zeeda lu Biblia (Filip. 2:3, 4). Guzéʼtenu ni biʼniʼ ti hermana ora gunna caníʼ compañera de dxiiñaʼ stiʼ cosa ni cadi dxandíʼ de laa. Neca guizáʼ gucanabe, peru qué nidxiichibe, sínuque guníʼ íquebe ejemplu stiʼ Jesús, purtiʼ qué niguudí binni ni guluudí laa (1 Ped. 2:21, 23). Ngue runi qué nulabi peʼ hermana que ni biʼniʼ xcompañera laa. Despué, gúnnabe guizáʼ huará ne nabé nuu xizaa. Ne guníʼ ique hermana que pur huará xcompañera nga guníʼ ca cosa que de laabe. Ngue runi gutadxí ladxidóʼ hermana que ne biecheʼ purtiʼ gupa paciencia ora biʼniʼ tratárcabe laa mal.

16. ¿Xi zanda quixhedxí ladxidoʼno pa cayúnicabe laanu ti cosa ni cadi jneza? (1 Pedro 3:12).

¹⁶ Pa cayuni huantarnu xiixa cosa ni cadi jneza o nápanu sti guendanagana ni cayuniná laanu, cadi guiaandaʼ laanu nuu Jehová gaxha de ca ni «maʼ gucadé ladxidóʼ» (Sal. 34:18). Nadxiibe laanu purtiʼ ribézanu ne rulaʼnu guiráʼ ni nuanu luguiabe (Sal. 55:22). Laabe nga Juez stiʼ Guidxilayú ne cayuuyabe guiráʼ ni cazaca luni (biindaʼ 1 Pedro 3:12). Nga runi, pa cadídinu lu ti guendanagana ni  qué ganda guni chaahuinu, cadi guiaandaʼ laanu naquiiñeʼ cuézanu guni Jehová xiixa.

17. ¿Xi cayabi Jehová laanu lu Isaías 30:18?

¹⁷ Maʼ cadi candaa, zaquiiñeʼ Jehová Reinu stiʼ para gudii laanu stale ndaayaʼ. Isaías 30:18 ná: «Cabeza Jehová guedandá dxi gacané laatu, nga runi ziásabe para guiabe laatu. Jehová nga ti Dios ni nanna guni juzgar. Guiráʼ ca ni cabeza laabe ziuucaʼ nayecheʼ». Ca ni cabeza guni Jehová xiixa zacaacaʼ stale ndaayaʼ yanna ne lu guidxilayú cubi ca.

18. ¿Xi ndaayaʼ cabézanu guicaanu?

¹⁸ Ndaaniʼ guidxilayú cubi ca, maʼ qué ziuuruʼ dxi guni huantar ca xpinni Dios guendanagana ni rápacaʼ tiempu riʼ. Maʼ qué ziuu tu guniná laacaʼ ne maʼ qué zápacaʼ yuubaʼ (Apoc. 21:4). Maʼ qué ziúʼrunu xizaa purtiʼ zápanu guiráʼ ni iquiiñenu (Sal. 72:16; Is. 54:13). ¡Aque galán xa!

19. ¿Xi para cayacané Jehová laanu?

¹⁹ Laga cabézanu guedandá dxi ca, cayacané Jehová laanu para gusaananu ca cosa ni cadi jneza ne gusihuínninu cualidad ni riuuláʼdxibe para ganda guibáninu ora maʼ guni mandar gobiernu stibe. Cadi guireʼnu gana ne guni huantarnu. Guizáʼ galán guiráʼ ca ndaayaʼ ni cabeza laanu, nga runi chuʼnu dispuestu cuézanu né paciencia guni Jehová ni maʼ guníʼ.