1. Јарадан һагда сизә нәләри өјрәтмишдиләр?

СИЗ Јеһованын Шаһидләринин аиләсиндә бөјүмүсүнүзсә, сөзсүз ки, ушаг јашларыныздан Јеһова һагда нәләрисә өјрәнмисиниз. Билирсиниз ки, Јеһова Јарадандыр, еҹазкар хүсусијјәтләри вар вә Јер күрәсини Ҹәннәтә чевирмәк нијјәтиндәдир (Јар. 1:1; Һәв. 17:24—27).

2. Бәзи инсанлар Јараданын варлығына инанан кәсләрә неҹә бахыр?

² Амма чох адам Аллаһын варлығына вә ја Онун һәр шејин Јараданы олдуғуна инанмыр. Онлар һесаб едир ки, һәјат тәсадүф нәтиҹәсиндә әмәлә ҝәлиб, сонра исә тәдриҹән садә һәјат формасындан даһа мүрәккәб һәјат формасына тәкамүл едиб. Буна инананларын арасында јүксәк тәһсилли инсанлар вар. Онларын бәзиләри иддиа едир ки, елм Мүгәддәс Китабын сәһв олдуғуну сүбут едир вә тәкҹә савадсыз, ҹаһил инсанлар Јараданын олдуғуна инаныр.

3. Нәјә ҝөрә иманымызы ҝүҹләндирмәлијик?

³ Бәс бу нүфузлу инсанларын фикирләри Јеһованын Јараданымыз олдуғуна иманымызы сарсыдаҹаг? Бу, әсас етибарилә ондан асылыдыр ки, Јеһованын Јарадан олдуғуна нәјә ҝөрә инанырыг. Она ҝөрә инанырыг ки, бизи белә өјрәдибләр, јохса вахт ајырыб дәлилләри өзүмүз арашдырыб әмин олмушуг? (1 Кор. 3:12—15). Нечә илләрдир Јеһованын Шаһиди олмағымыздан асылы олмајараг, һәр биримиз иманымызы мөһкәмләндирмәјә давам етмәлијик. Белә даврансаг, Аллаһын Кәламына зидд фикирләр өјрәдән инсанларын фәлсәфәсинә, пуч вә јанлыш фикирләринә алданмајаҹағыг (Кол. 2:8; Ибр. 11:6). Мәгалә бизә бу саһәдә көмәк едәҹәк. Өјрәнәҹәјик ки, 1) нәјә ҝөрә чохлары Јараданын варлығына инанмыр; 2) Јараданымыз Јеһоваја иманымызы неҹә ҝүҹләндирә биләрик вә 3) иманымызы  мөһкәм сахламаг үчүн нә едә биләрик.

4. Ибраниләрә 11:1 ајәсинә әсасән, әсл иман нәјә әсасланыр?

⁴ Бәзиләри дүшүнүр ки, иман нәјәсә сүбут олмадан инанмаг демәкдир. Амма Мүгәддәс Китаба әсасән, бу, әсл иман дејил. (Ибраниләрә 11:1 ајәсини охујун.) Ҝөрүнмәјән ҝерчәкликләрә, мәсәлән, Јеһоваја, Исаја, сәмави Падшаһлыға иман ачыг-ашкар сүбутлара әсасланыр (Ибр. 11:3). Биокимјачы бир Јеһованын Шаһиди буну белә изаһ едир: «Бизим иманымыз кор-коранә дејил, биз елми фактлара ҝөзүмүзү бағламамышыг».

5. Нәјә ҝөрә чохлары инаныр ки, һәјат Јарадан олмадан әмәлә ҝәлиб?

⁵ Ҝөрәсән, һәр шеји Аллаһын јаратдығына ачыг-ашкар сүбутлар олдуғу һалда, нәјә ҝөрә чохлары буна инанмыр? Чүнки бәзиләри өзләри бу сүбутлары арашдырмајыб. Һал-һазырда Јеһованын Шаһиди олан Роберт дејир: «Мәктәбдә јарадылыш тәдрис олунмадығы үчүн буна инанмырдым, та ки 22 јашымда Јеһованын Шаһидләри илә данышана кими. Онлар Мүгәддәс Китабдан Јараданын вар олдуғуна даир мәнтигли вә әсаслы дәлилләр ҝәтирдиләр» *. (« Валидејнләрә мүраҹиәт» адлы чәрчивәјә бахын.)

6. Нәјә ҝөрә бәзиләри Јарадана инанмыр?

⁶ Бир башгалары исә анҹаг ҝөрдүкләринә инандыглары үчүн Јараданын варлығына инанмыр. Белә дедикләринә бахмајараг, әслиндә, ҝөрмәдикләри чох шејә инанырлар, мәсәлән, ҹазибә гүввәсинә, чүнки бу, ҝерчәкдир. Мүгәддәс Китабда мәһз бу ҹүр имандан  данышылыр, бу иман диҝәр «ҝөзлә ҝөрүнмәјән ҝерчәкликләрин» сүбутуна әсасланыр (Ибр. 11:1). Бу сүбутлары шәхсән арашдырмаг үчүн вахт вә ҝүҹ сәрф етмәк лазымдыр, чох адам исә өзүнү әзијјәтә вермәк истәмир. Сүбутлары арашдырмајан инсан асанлыгла Јараданын олмадығы гәнаәтинә ҝәлә биләр.

7. Тәһсилли инсанларын һамысы каинаты Аллаһын јаратдығыны инкар едир? Изаһ един.

⁷ Амма бәзи алимләр өзләри сүбутлары арашдырыб вә әмин олублар ки, каинаты Аллаһ јарадыб *. Јухарыда ады чәкилән Роберт кими, бәзи инсанларын да Јараданын варлығына инанмамаларына сәбәб университетдә јарадылышын тәдрис олунмамасыдыр. Амма чохлу сајда алим Јарадан Аллаһ олан Јеһованы  таныјыб вә Ону севирләр. Бу алимләр кими, биз дә, алдығымыз тәһсилдән асылы олмајараг, Аллаһа иманымызы мөһкәмләндирмәлијик; буну бизим әвәзимизә һеч ким етмәјәҹәк.

8, 9. а) Инди һансы суалы арашдыраҹағыг? б) Тәбиәт һагда өјрәнмәјинизин сизә һансы фајдасы олаҹаг?

⁸ Јарадана иманынызы неҹә ҝүҹләндирә биләрсиниз? Ҝәлин бунун дөрд јолу һагда данышаг.

⁹Тәбиәт һагда өјрәнин. Сиз һејванлары, биткиләри вә улдузлары мүшаһидә едәрәк, Јарадана иманынызы мөһкәмләндирә биләрсиниз (Зәб. 19:1; Әшј. 40:26). Бу кими шејләр һагда нә гәдәр чох өјрәнсәниз, Јеһованын Јарадан олдуғуна әминлијиниз бир о гәдәр артаҹаг. Нәшрләримиздә јарадылышла бағлы мүхтәлиф тәфсилатларын изаһ олундуғу мәгаләләр вар. Бу кими мәгаләләр сизә гәлиз ҝәлсә дә, јенә дә охујун. Баҹардығыныз гәдәр баша дүшмәјә чалышын. Һәмчинин сон илләрдә реҝионал топлантыларда јарадылышла бағлы ҝөстәрилән видеолар jw.org сајтымыза јерләшдирилиб. Бу ҝөзәл видеолара јенидән бахмағы да унутмајын.

10. Тәбиәт Јараданын олдуғуна неҹә шәһадәт едир? Нүмунә чәкин (Ромалылара 1:20).

¹⁰ Тәбиәт һагда өјрәнәркән, дүшүнүн: «Бу шејләр мәнә Јарадан һагда нә дејир?» (Ромалылара 1:20 ајәсини охујун.) Билдијимиз кими, Ҝүнәш һәјат үчүн зәрури олан истилик мәнбәји олмагла јанашы, ултрабәнөвшәји шүалар шәклиндә зәрәрли енержи дә јајыр. Инсан бу шүалардан горунмалыдыр вә горунур да. Бәс неҹә? Јашадығымыз Јер күрәсинин өзүнүн мүһафизә гаты вар. Озон газындан ибарәт олан бу гат Јери Ҝүнәшин зәрәрли шүаларындан горујур. Ҝүнәшин јајдығы ултрабәнөвшәји шүалар артдыгҹа, озон гатынын да һәҹми артыр. Јәгин разы оларсыныз ки, бу просес өз-өзүнә ола билмәз, бунун Јараданы вар вә О, мәһәббәтли вә һикмәтлидир.

11. Јарадылышла бағлы иманы ҝүҹләндирән фактлары һарадан тапа биләрсиниз? (« Иманы ҝүҹләндирән бәзи мәнбәләр» адлы чәрчивәјә бахын.)

¹¹ «Јеһованын Шаһидләринин нәшрләри үзрә ахтарыш» вәсаитиндә, һәмчинин jw.org сајтында јарадылышла бағлы иманынызы ҝүҹләндирән фактлар тапа биләрсиниз. «Тәкамүл, јохса јарадылыш мөҹүзәси?» рубрикасындакы мәгаләләрдән вә видеолардан башлаја биләрсиниз. Орада һејванларла вә биткиләрлә бағлы гыса вә һејрәтамиз мәлуматлар јер алыр. Һәмчинин алимләрин тәбиәтдән илһамланараг нәләр јаратмаға чалышдығы илә бағлы нүмунәләр вар.

12. Мүгәддәс Китабы мүталиә едәркән нәләрә фикир вермәлијик?

¹²Мүгәддәс Китабы дәриндән мүталиә един. Бајаг һаггында данышдығымыз биокимјачы әввәл-әввәл Јараданын варлығыны инкар едирди. Амма сонра онда иман јаранды. О дејир: «Иманым тәкҹә елми тәдгигатларыма әсасланмырды. Һәмчинин Мүгәддәс Китабы да дәриндән арашдырдым». Ола билсин, сиз артыг Мүгәддәс Китаб тәлимләрини јахшы билирсиниз. Амма буна бахмајараг, Јарадана иманынызы мөһкәмләндирмәк үчүн бундан сонра да Мүгәддәс Китабы дәриндән мүталиә етмәлисиниз (Јуш. 1:8; Зәб. 119:97). Мәсәлән, Мүгәддәс Китабда тарихи һадисәләрин неҹә тәфсилаты илә гејд олундуғуна диггәт јетирин. Орадакы пејғәмбәрликләрин јеринә јетмәсинә, дахили ујғунлуғуна фикир верин. Бунун сајәсиндә даһа да әмин олаҹагсыныз ки, бизи мәһәббәтли вә һикмәти Аллаһ јарадыб вә Мүгәддәс Китаб Онун илһамы илә јазылыб * (2 Тим. 3:14; 2 Бут. 1:21).

13. Аллаһын Кәламындакы һикмәтә даир бир нүмунә чәкин.

 ¹³ Мүгәддәс Китабы мүталиә едәркән орадакы мәсләһәтләрин неҹә фајдалы олдуғуна диггәт јетирин. Та гәдимдән Мүгәддәс Китабда хәбәрдарлыг олунмушду ки, пулпәрәстлик зәрәрлидир вә чохлу әзаблара сәбәб олур (1 Тим. 6:9, 10; Мәс. 28:20; Мәт. 6:24). Бу нәсиһәт һәлә дә актуалдыр? «Нарсизим епидемијасы» китабында дејилир: «Үмуми ҝөтүрдүкдә, маддијјата өнәм верән инсанлар елә дә хошбәхт дејилләр вә депрессијаја мејиллидирләр. Һәтта садәҹә олараг бир аз артыг пул газанмаг истәјән инсанларда зеһни зәифлик мүшаһидә олунур; һәтта физики сағламлыглары илә бағлы даһа чох проблем јашајырлар» («Тһе Нарҹиссисм Епидемиҹ»). Һәгигәтән дә, Мүгәддәс Китабда пулпәрәстликдән чәкинмәклә бағлы верилән мәсләһәт бизим хејримизәдир! Мүгәддәс Китабдакы башга һансы мәсләһәтләрин хејрини ҝөрмүсүнүз? Орадакы мәсләһәтләрин дәјәри һагда нә гәдәр чох дүшүнсәк, Јараданын вердији бу һикмәтли мәсләһәтләрә бир о гәдәр чох бел бағлајаҹағыг (Јаг. 1:5). Беләҹә, һәјатдан даһа чох зөвг алаҹағыг (Әшј. 48:17, 18).

14. Мүгәддәс Китабы мүталиә етдикҹә Јеһова һагда нә өјрәнәҹәксиниз?

¹⁴Мүгәддәс Китабы охујанда гој мәгсәдиниз Јеһованы даһа јахындан танымаг олсун (Јәһ. 17:3). Мүталиә етдикҹә Јеһованын неҹә уҹа Варлыг олдуғуну даһа ајдын ҝөрәҹәксиниз. О Варлыг ки, хүсусијјәтләри јарадылышда әкс олунан хүсусијјәтләрлә һәмаһәнҝдир. Ҝүн кими ајдындыр ки, бу хүсусијјәтләр киминсә ујдурмасы ола билмәз, онлар вар олан Аллаһа мәхсусдур (Чых. 34:6, 7; Зәб. 145:8, 9). Јеһованы даһа јахындан таныдыгҹа, Она иманыныз артаҹаг, мәһәббәтиниз дәринләшәҹәк вә Онунла даһа мөһкәм дост олаҹагсыныз.

15. Етигадыныз һагда башгаларына данышмағын сизә һансы хејри олаҹаг?

¹⁵Аллаһа иманыныз һагда башгаларына данышын. Бу сизин өз иманынызы мөһкәмләндирәҹәк. Ола билсин, тәблиғ етдијиниз инсан Аллаһын варлығына шүбһә етдијини дејир вә сиз она нә дејәҹәјинизи билмирсиниз. Бу заман нә едә биләрсиниз? Белә мәгамда нәшрләримиздән Мүгәддәс Китаба әсасланан ҹаваб тапын вә һәмин инсанла бөлүшүн (1 Бут. 3:15). Һәмчинин тәҹрүбәли диндашыныздан да көмәк истәјә биләрсиниз. Һәмин инсан Мүгәддәс Китабдан вердијиниз ҹавабы гәбул етсә дә, етмәсә дә, арашдырмағынызын сизин өзүнүзә хејри олаҹаг. Иманыныз даһа да мөһкәм олаҹаг. Нәтиҹәдә, һикмәтли вә ағыллы һесаб олунан инсанлар Јараданын олмадығыны иддиа едәндә сиз бу јаланлара алданмајаҹагсыныз.

16. Иманымызы ҝүҹләндирмәјә вә мөһкәм сахламаға чалышмасаг, нә баш верә биләр?

¹⁶ Јеһоваја нечә мүддәтдир ибадәт етмәјимиздән асылы олмајараг, иманымызы ҝүҹләндирмәли вә мөһкәм сахламалыјыг. Чүнки еһтијаты әлдән версәк, иманымыз зәифләјә биләр. Гејд етдијимиз кими, иман ҝөзлә ҝөрүнмәјән ҝерчәкликләрин сүбутуна әсасланыр. Ҝөрмәдијимиз шеји исә асанлыгла унуда биләрик. Елә буна ҝөрә дә Булус иман азлығыны «бизи асанлыгла чашдыран ҝүнаһ» адландырмышды (Ибр. 12:1, «Мүгәддәс Китаб Ширкәти», 2009). Бәс иманымызы неҹә мөһкәм сахлаја биләрик? (2 Салон. 1:3).

17. Иманымызы мөһкәм сахламаг үчүн нәјә еһтијаҹымыз вар?

¹⁷ Әввәла, Јеһовадан мүгәддәс руһ диләјин вә буну һәмишә един. Чүнки иман мүгәддәс руһун бәһрәсинә дахилдир (Гал. 5:22, 23). Мүгәддәс руһун көмәји олмадан биз Јарадана иманымызы нә ҝүҹләндирә,  нә дә мөһкәм сахлаја биләрик. Биз Јеһовадан мүгәддәс руһ диләмәјә давам етсәк, О, дуамызы ҹавабсыз гојмајаҹаг (Лука 11:13). Һәтта конкрет олараг белә дуа едә биләрик: «Иманымызы артыр» (Лука 17:5).

18. Зәбур 1:2, 3 ајәләринә әсасән, бу ҝүн бизим һансы үстүнлүјүмүз вар?

¹⁸ Һәмчинин Аллаһын Кәламыны мүнтәзәм мүталиә един. (Зәбур 1:2, 3 ајәләрини охујун.) Бу мәзмур јазыланда Исраилдә Ганунун бир нечә там нүсхәси вар иди. Бу нүсхәләр јалныз тәк-түк исраиллиләр үчүн, мәсәлән, падшаһ вә каһинләр үчүн әлчатан иди. Һәр једди илдән бир «кишиләри, гадынлары, ушаглары» вә Исраилдә јашајан јаделлиләри бир јерә јығыб, һамынын ешитмәси үчүн Гануну охујурдулар (Ган. 31:10—12). Исанын јашадығы дөврдә Мүгәддәс Јазыларын тумарлары тәк-түк инсанда вә синагогда вар иди. Бу ҝүн исә әксәр инсанлар Аллаһын Кәламыны там шәкилдә вә ја мүәјјән һиссәләрини әлдә едиб охуја биләр. Бу, чох бөјүк үстүнлүкдүр! Бәс биз буну гијмәтләндирдијимизи неҹә ҝөстәрә биләрик?

19. Иманымызы мөһкәм сахламаг үчүн нә етмәлијик?

¹⁹ Аллаһын Кәламыны гијмәтләндирдијимизи ону мүнтәзәм охумагла ҝөстәрә биләрик. Биз фәрди мүталиәни һәрдәнбир, вахтымыз оландан олана етмәмәлијик. Ҹәдвәлимиздә мүталиәјә вахт ајырыб, буна әмәл етсәк, иманымызы мөһкәм сахлаја биләҹәјик.

20. Биз нә етмәјә гәти гәрарлы олмалыјыг?

²⁰ Бу дүнјадакы «һикмәтли вә ағыллы адамлардан» фәргли олараг, бизим Аллаһын Кәламына әсасланан мөһкәм иманымыз вар (Мәт. 11:25, 26). Мүгәддәс Китабы мүталиә етдијимиз үчүн билирик ки, дүнјадакы вәзијјәт нәјә ҝөрә писләшир вә Јеһова бунунла бағлы һансы тәдбири ҝөрәҹәк. Одур ки, ҝәлин иманымызы мөһкәмләндирәк вә мүмкүн гәдәр чох инсана Јарадана иман етмәјә көмәк едәк (1 Тим. 2:3, 4). Ҝәлин нәзәримизи ҝәләҹәјә ҹәмләјәк. О заман јер үзүндә олан һәр кәс бир ағыздан нөвбәти сөзләри дејәҹәк: «Аллаһымыз Јеһова, Сән шана... лајигсән! Чүнки һәр шејин јараданы Сәнсән» (Вәһј 4:11).