1. Weh yoo laan bowt wi Kriyayta?

IF YOO mi rayz op az wahn Witnis, moa dan laikli yu mi laan bowt Jehoava fahn yu mi veri smaal. Dehn mi teech yu dat hihn da di Kriyayta, dat hihn ga byootiful kwalitiz, ahn dat hihn waahn mek di ert bee wahn paradais.—Gen. 1:1; Aks 17:24-27.

2. Weh sohn peepl tink bowt dehn wan weh bileev dat wahn Kriyayta egzis?

² Bot lata peepl noh bileev dat Gaad egzis er dat hihn kriyayt evriting. Insted, dehn bileev dat laif mi staat bai ihself ahn dat smaal livin tingz groa intu biga ahn moa grayta kaina livin tingz. Som a di peepl weh bileev dehnya tingz wel-ejukaytid. Dehn seh dat saiyens proov dat di Baibl rang ahn dat peepl weh ga fayt eena wahn Kriyayta ignarant, dehn noh ga wahn ejukayshan, er dehn jos bileev eni an evriting dehn hyaa.

3. Wai ih impoatant fi ga schranga fayt?

³ Yu tink peepl weh ga wahn gud ejukayshan ku mek wi staat tu dowt dat Jehoava da wi lovin Kriyayta? Wel, dat ku hapm if wi noh noa wai wi bileev dat Jehoava da di Kriyayta. Soh den, wai wi bileev dat Jehoava da wi Kriyayta? Da bikaaz adaz tel wi weh wi fi bileev er bikaaz wee tek di taim fi stodi bowt Hihn? (1 Kor. 3:12-15) Noh mata how lang agoa wi baptaiz az wan a Jehoava Witnisiz, aala wi need fi kip wi fayt schrang. If wi du dat, peepl noh wahn fool wi wen dehn klaym dat weh di Baibl seh faals. (Kol. 2:8; Heeb. 11:6) Eena dis aatikl, wi wahn diskos (1) wai lata peepl noh bileev dat wahn Kriyayta egzis, (2) how yu ku  ga schranga fayt eena Jehoava, di Kriyayta, ahn (3) how yu ku kip yu fayt schrang.

4. Akaadn tu Heebrooz 11:1, weh di Baibl seh da di meenin a fayt?

⁴ Sohn peepl tink dat wahn persn weh ga fayt bileev eena sohnting widowt eni proof dat ih egzis. Bot akaadn tu di Baibl, dat da noh reel fayt. (Reed Heebrooz 11:1.) Di Baibl eksplayn dat fayt bays pahn proof. Soh eevn doa wi kyaahn si Jehoava, Jeezas, ahn di Kingdom weh di rool da hevn, wi ga proof dat dehn egzis fi chroo. (Heeb. 11:3) Wahn saiyentis hoo mi geh baptaiz az wahn Witnis seh: “Jehoava Witnisiz ga proof a weh dehn bileev eena bikaaz dehn noh ignoar faks weh bays pahn saiyens.”

5. Wai lata peepl bileev dat laif mi staat widowt wahn Kriyayta?

⁵ Wi mait aks, ‘Eevn doa soh moch proof deh, wai lata peepl noh bileev dat Gaad mi kriyayt evri livin ting?ʼ Sohn peepl jos noh chrai fain owt di faks. Robert, hoo da wan a Jehoava Witnisiz, seh: “Dehn neva teech wi bowt kriyayshan da skool, soh Ai mi tink dat ih neva reel. Da neva til Ah mi eena mi erli 20ʼs dat Ah mi taak tu Jehoava Witnisiz an Ah laan dat di Baibl gi wi gud reezn fi bileev dat Gaad mi kriyayt evriting.” *—Si di baks “ Wahn Impoatant Mesij tu Payrents.”

6. Wai sohn peepl rijek di aidyaa dat wahn Kriyayta egzis?

⁶ Sohn peepl noh bileev eena wahn Kriyayta bikaaz dehn seh dat dehn bileev  onli eena weh dehn ku si. Bot akchwali, dehn doo bileev eena tingz weh dehn kyaahn si. Fi egzampl, dehn bileev eena graviti bikaaz dehn ga proof dat ih doo egzis. Di kaina fayt weh di Baibl taak bowt aalso bays pahn tingz weh wi “kyaahn si.” (Heeb. 11:1) Ih tek taim an enerji fi stodi bowt di fak dat wahn Kriyayta egzis ahn dat ih reel, bot lata peepl noh waahn spen taim di du dat. Wahn persn weh noh stodi ahn fain owt if wahn Kriyayta egzis mait staat tu tink dat Gaad noh egzis.

7. Yu tink evribadi weh ga wahn gud ejukayshan rijek di aidyaa dat Gaad mi kriyayt evriting pahn ert? Pleez eksplayn yu ansa.

⁷ Afta sohn saiyentis stodi ahn fain proof bowt kriyayshan, dehn andastan dat Gaad da di Kriyayta a di yoonivers. *  Jos laik Robert, weh wi mi menshan erliya, sohn peepl feel laik no Kriyayta egzis jos bikaaz dehn neva teech bowt kriyayshan da yooniversiti. Bot lata saiyentis geh fi noa ahn lov Jehoava. Jos laik dehnya saiyentis, aala wi need fi mek wi fayt eena Gaad geh schranga, noh mata humoch ejukayshan wi mait ga. Nobadi els ku du dat fi wi; da fi wee rispansabiliti.

8-9. (a) Weh kweschan wi wahn diskos? (b) How yoo wahn benifit if yu laan bowt di werl rong yu?

⁸ How yoo ku ga schranga fayt eena di Kriyayta? Mek wi diskos foa wayz how wi ku du dat.

⁹ Laan bowt kriyayshan. Yu ku ga moa fayt eena di Kriyayta wen yu tek wahn luk pahn di animalz, di plaants, ahn di staarz. (Ps. 19:1; Isa. 40:26) Di moa yu stodi dehndeh tingz, di moa shoar yu wahn bee dat Jehoava da di Kriyayta. Wi poblikayshan dehn aalwayz ga aatikl weh eksplayn difrent deetaylz bowt kriyayshan. Noh skip dehnya aatikl eevn if dehn haad fi andastan. Laan az moch az yu kud. Ahn noh ferget fi wach pahn wi websait, jw.org, di byootiful veedyo dehn bowt kriyayshan weh wi mi si da di difrent reejinal kanvenshan eena di paas fyoo yaaz.

10. Gi wahn egzampl weh proov dat wahn Kriyayta egzis. (Roamanz 1:20)

¹⁰ Wen yu stodi bowt kriyayshan, pay main tu weh yu ku laan bowt wi Kriyayta. (Reed Roamanz 1:20.) Fi egzampl, di son gi wi heet ahn lait weh nesiseri fi mek wi ku liv pahn ert. Bot som a di rayz weh kohn fahn di son noh gud fi wi badi. Soh wi need fi protek wiself fahn di rayz weh ku afek wi. An, af koars, sohnting di protek wi! Da wat? Dehn ga wahn gyas rong di ert weh protek wi fahn dehnya difrent ray, dehn kaal it di oazoan. Ahn wen dehnya haamful ray dehn geh schranga, di oazoan groa tu. Now dat yu noa dis, ih mek sens fi bileev dat wahn lovin ahn waiz Kriyayta mi dizain dis, noh chroo?

11. Wehpaat yu ku fain infamayshan weh ku mek yu fayt eena di Kriyayta geh schranga? (Si di baks “ Infamayshan Weh Wahn Mek Yu Fayt Eena di Kriyayta Geh Schranga.”)

¹¹ If yu luk eena di Risaach Gaid fi Jehoava Witnisiz ahn du risaach pahn jw.org, yu ku fain infamayshan bowt kriyayshan weh ku mek yu fayt geh schranga. Yu ku staat wid di difrent aatikl ahn veedyo dehn eena di seeriz “Proof Dat Sombadi Dizain It.” Luk anda “Baibl Teechinz” ahn goh da “Saiyens & di Baibl.” Dehnya aatikl shaat ahn dehn bring op sohn inchrestin faks bowt animalz ahn plaants. Dehnya aatikl aalso ga sohn egzampl a how saiyentis chrai kapi weh dehn si eena kriyayshan.

12. Weh yu fi pay main tu wen yu di stodi di Baibl?

¹² Stodi di Baibl. Di saiyentis weh wi mi menshan eena paragraaf 4, neva staat tu bileev eena di Kriyayta az soon az ih mi staat laan bowt ahn. Bot az taim mi paas, hihn mi staat tu bileev ahn ga fayt dat wahn Kriyayta doo egzis. Hihn seh: “Di reezn wai Ai staat tu ga fayt eena wahn Kriyayta, da neva onli bikaaz a weh Ah mi laan wen Ah mi stodi saiyens. Da mi aalso bikaaz a weh Ah mi laan wen Ah mi-di stodi di Baibl.” Maybi yoo noa di teechinz fahn di Baibl gud. Bot fi ga fayt eena yu Kriyayta, yu need fi kantinyu stodi Gaad Werd. (Josh. 1:8; Ps. 119:97) Fi egzampl, tink bowt how di Baibl gree wid hischri. Aalso, tink bowt di prafesi dehn eena di Baibl weh kohn chroo, ahn how di Baibl ga di saym mesij eevn doa difrent man mi rait it. Wen yu du dat, yu fayt  eena di lovin ahn waiz Kriyayta wahn geh schranga ahn yu wahn chros dat di Baibl da fahn Hihn.—2 Tim. 3:14; 2 Peet. 1:21.

13. Weh waiz advais wi fain eena Gaad Werd? Yooz di egzampl eena di paragraaf.

¹³ Wen yu stodi Gaad Werd, noatis how di advais ku help yu. Fi egzampl, fahn lang agoa di Baibl mi waan dat di lov a moni noh gud an ih bring “lata payn.” (1 Tim. 6:9, 10; Prov. 28:20; Mach. 6:24) Eevn doa da advais mi geh rait lang taim, yu tink ih stil gud fi wee tudeh? Wahn buk weh deel wid di atichood a peepl eena fi wee taim seh: “Moas a di taim, peepl weh bileev dat moni da di moas impoatant ting eena laif noh hapi ahn dehn dipres. Eevn peepl weh jos waahn ga moa moni noh hapi ahn dehn ga moa helt prablemz.” Soh di waanin weh wi geh fahn di Baibl bowt di lov a moni da veri gud advais! Yoo ku tink bowt eni ada advais fahn di Baibl weh don help yoo persnali? Wen wi tink bowt aal di gud advais weh deh eena di Baibl, wi wahn si dat wi lovin Kriyayta noa weh gud fi wee ahn wi wahn aalwayz chros eena fi hihn advais. (Jay. 1:5) If wi du dis, wi wahn bee reeli hapi.—Isa. 48:17, 18.

14. Weh wahn stodi a di Baibl ku teech yoo bowt Jehoava?

¹⁴ Wen yu stodi di Baibl, ga di goal fi noa Jehoava beta. (Jan 17:3) Az yu stodi di Skripchaz, yu wahn laan bowt Jehoava persnaliti an ih difrent kwaliti dehn. Dehnya da di sayhn kwaliti dehn weh yu mi laan bowt wen yu mi stodi bowt kriyayshan. Wen wi laan bowt Jehoava kwaliti dehn, ih kanvins wi dat Jehoava reeli egzis. (Ex. 34:6, 7; Ps. 145:8, 9) Az yu geh fi noa Jehoava beta ahn beta, yu fayt eena hihn wahn groa, yu lov fi hihn wahn geh biga, ahn yu frenship wahn geh schranga.

15. How yoo wahn benifit if yu taak tu adaz bowt Gaad?

¹⁵ Taak tu adaz bowt Gaad. Wen yu du dat, yu fayt wahn geh schranga. Bot wat if sombadi weh yu preech tu aks if weda er nat Gaad egzis ahn yu noh noa weh fi seh? Wel, chrai fain infamayshan eena wi poblikayshanz weh bays pahn di Baibl ahn taak bowt it wid di persn. (1 Peet. 3:15) Yu ku aalso aks wahn brada er sista fi help yu ansa da kweschan. Weda er nat di persn aksep di ansa, yoo wahn benifit bikaaz yu mi du risaach. Yu fayt wahn geh schranga, ahn yu noh wahn bileev dehn wan weh luk waiz er weh ga wahn gud ejukayshan wen dehn seh dat Gaad noh egzis.

16. Weh ku hapm if wi noh kip wi fayt schrang?

¹⁶ Noh mata how lang wi di serv Jehoava, wi fi kantinyu kip wi fayt eena hihn schrang. Wai? Bikaaz if wi noh du dat, wi fayt ku staat tu geh week. Laik weh wi don diskos, fayt bays pahn proof eena tingz weh wi kyaahn si. Ih ku bee soh eezi fi ferget bowt tingz weh wi kyaahn si. Dat da wai Paal mi seh dat wen sohnbadi fayt geh week, da laik wahn “sin weh eezi fi chrap wi.” (Heeb. 12:1) Soh weh wi ku du fi mek wi kip wi fayt schrang ahn noh faal eena da chrap?—2 Tes. 1:3.

17. Weh ku help wi fi kip wi fayt schrang?

¹⁷ Fers, kip di bayg Jehoava fi ih hoali spirit. Wai? Bikaaz fayt da wahn kwaliti weh kohn fahn Gaad hoali spirit. (Gal. 5:22, 23) Widowt di help a Gaad hoali spirit, wi kyaahn kip wi fayt schrang. If wi kip di aks Jehoava fi ih hoali spirit, hihn wahn gi wi. (Look 11:13) In fak, wi ku eevn pray: “Help wi fi ga moa fayt.”—Look 17:5.

18. Akaadn tu Psalm 1:2, 3, weh preshos gif wi ku injai tudeh?

 ¹⁸ Aalso, stodi Gaad Werd regyula. (Reed Psalm 1:2, 3.) * Wen da saam mi geh rait dong, onli som Izrelaits mi ga wahn kompleet kapi a Gaad Laa. Bot, di king ahn di prees dehn kuda mi geh wahn kapi, an evri sevn yaaz “di man dehn, di uman dehn, di chiljren,” ahn di farinaz mi kohn tugeda soh dat aala dehn kuda lisn wen dehn reed Gaad Laa. (Deut. 31:10-12) Eena Jeezas taim, onli wahn fyoo peepl kuda mi ga wahn kapi a di Skripchaz. Moas a dehndeh kapi mi deh eena di sinagag dehn. Ih veri difrent eena fi wee taim, doh, bikaaz moas peepl ku reed di hoal Baibl er som paat a it. Dat da wahn preshos gif! Bot how wee ku shoa dat wee apreeshiayt da gif?

19. Weh wi need fi du fi kip wi fayt schrang?

¹⁹ Wi ku shoa dat wi apreeshiayt di Baibl if wi reed ahn stodi it regyula. Wi shuda mek wahn skejul soh dat wi reed ahn stodi di Baibl evri day. Wi noh jos wahn reed it wen wi feel laik wi ga taim. If wi mek shoar wi stodi di Baibl regyula, wi wahn kip wi fayt schrang.

20. Weh wi waahn du?

²⁰ Fi wee fayt difrent fahn “di ejukaytid ahn waiz peepl”; ih bays pahn Gaad Werd. (Mach. 11:25, 26) Di Baibl eksplayn wai di ert deh di way ih deh rait now ahn weh Jehoava wahn du bowt it. Soh mek wi du evriting fi kip wi fayt schrang ahn help az moch peepl az pasabl fi ga fayt eena wi Kriyayta. (1 Tim. 2:3, 4) Ahn mek wi kantinyu di luk faawod tu di taim wen evribadi pan ert wahn prayz Jehoava ahn seh weh deh eena Revilayshan 4:11: “Jehoava, wi powaful Gaad, da yoo dizerv aala di gloari ahn di aana, bikaaz da yoo mek evriting.”