1. Ka hasubudirubei luagu Le adügübalin sun katei?

HÁDAN san iduheñu gefentiña luagu Heowá hagüriarúa? Lidan kesi le másiñati furendei humá luagu Heowá lúmagiñe hiñüraü. Furendeitün ligía lan adügübalin sun katei, furendeitün giñe anihein lan aban lubuidun igaburi luagu Heowá ani busén lan lun hawinwandun gürigia Ubouagu lidan aban paraísu (Agu. 1:1; Adü. 17:24-27).

2. Ka hasaminanbei fiu gürigia hawagun ha afiñebaña luagu le Adügübalin sun katei?

² Gíbetiña gürigia mafiñentiña anihein lan aban Bungiu le adügübalin sun katei. Afiñetiña saliguarügü lan ibagari ítaraguarügü, ani lárigiñe lan aba asansireina lan hámaru hámaru lúmagiñe lirahüñü katei le gabagaribei le arihíbei “kei ni kata” darí lun aban lan katei le dayarüti. Másiñati ariñaga hamá arufuda taali lan siensia bulíeigua tan Bíbülia ani gürigiarügüñanu lan ha ibidiouguabaña au, ha maleskuelabaña hama ha machuubaña au afiñerubaña anihein lan Adügüti sun katei.

3. Ka uagu súdini lubéi lun hederebudagüdüni kada aban hafiñen?

³ Kaba san lani wawagun le hariñagubei fiu gürigia ha gabafuti hererun? Ladügüba san le hariñagubei lun machourun wamani Heowá lan adügübalin sun katei? Libe-agei dan, según ka lan uagu wafiñera lun saminaü le. Ladüga san lariñawagúniwa woun mosu lan wafiñerun ítara liña lan? O ladüga díreihadiwa lan dan lun wachoururuni wagía woungua anhein ítara liña lubéi (1 Ko. 3:12-15). Meberesenga átiri hali lan dan wau eseriwida lun Heowá sun wagía mosu wasigirun ederebudagüdei wafiñen. Ánhawa adügei mígiraguagüdünbadiwa woungua houn “ha busenbaña heyeehan lau burí arufudahani málati” ha arufudahabaña  luagu iyeeni lan le tariñagubei Bíbülia (Kol. 2:8; Ebü. 11:6). Lun gayara lan wibihini, lidan aturiahani le warihiba ka lan uagu añahein lubéi saragu gürigia mafiñentiña luagu le Adügübalin sun katei luma ida luba lan wederebudagüdüni wafiñen luagu Heowá Bungiu le Adügübaliwa luma giñe ida luba lan wéredagüdüni wafiñen.

4. Según Ebüréu 11:1, ka san lébunabei afiñeni le inarüniti?

⁴ Añahein hádangiñe gürigia saminatiña dan le lan lafiñerun aban gürigia mini lan lafiñeruña lan luagu aban katei sin ni murusun ichouruni. Según le tariñagun Bíbülia mama afiñeni lira (aliiha huméi Ebüréu 11:1). Ariñagatu Bíbülia aban lan achoururuni le gumuti afiñeni le marihinti kei burí hamuga Heowá, Hesusu luma Larúeihan Bungiu (Ebü. 11:3). Ariñagati aban aturiahati siensia le Adügagubei lungua gefenti luagu Heowá: “Inarüniti wafiñen ani beresetiwa lau le tariñagubei siensia”.

5. Ka uagu mafiñen habéi saragu gürigia luagu Bungiu lan adügübalin sun le gabagaribei.

⁵ Ligíati, anhein anihein lubéi ichouruni le gumuti luagu anihein lan aban le Adügüti sun katei, ka uagu mafiñen habéi saragu Bungiu lan adügübalin sun le gabagaribei? Ladüga añahein hádangiñe makutihan hamuti hagía houngua katei le achoururagüdübalin. Ariñagati Robert, le ábanhali gefenti luagu Heowá guentó: “Kei mayanuhóun lubéi tidan leskuela luagu sun le adügǘbei, ábati nasaminarun luagu mama lan adügǘwarügüti sun le geyegubei wau. Ítara liña nasaminarun darí nagunfulirun 22 irumu dan le nayanuhan hama gefentiña luagu Heowá, aba harufuduni ariñahani nun le achoururagüdübalin le gumuti le tídanbei Bíbülia luagu adügǘwarügü lan sun  katei”. * (Ariha huméi rekuáduru “ Aban uganu súdiniti houn agübürigu”).

6. Ka uagu añahein lubéi gürigia máhatiña hánharun anihein lan adügüti sun katei?

⁶ Añahein gürigia máhatiña anihein lan aban Adügüti sun katei aba hariñagun luágurügübei lan le gayara habéi ariha hafiñera. Le linarün katei afiñetiña luagu katei le siñá habéi ariha. Kéiburi, afiñetiña anihein lan aban erei le achawahabalin katei ladüga chouru hamuti inarüni lan. Afiñeni le uágubei tayanuhan Bíbülia ligía aban achoururuni le gumuti luagu anihein lan burí katei lau sun marihin wamani (Ebü. 11:1). Inarüni lun ladügǘniwa katei le mégeiwati dan luma áfaaguni, gíbetiña gürigia mabuseeruntiña hadügüni. Ligía hasaminarunbei ua lan Bungiu.

7. Ida liña wasubudiruni mama lan sun gürigia ha íñuti hafurendei afiñetiña mama lan Bungiu adügübalin sun le geyegubei wau?

⁷ Lárigiñe hakutihani ha aturiahabarun siensia aba hachoururuni Bungiu lan adügübalin  sun katei le geyegubei wau. * Ítara kei Robert, le buga uágubei wayanuhan lidan párafu 5, másiñati aba lan hasaminarun ua lan Adügüti sun le geyegubei wau ladüga mayanuhounti lan luagu tidan luba furendei íñuti. Añahein saragu aturiahatiña siensia subudi hamaali Heowá ani hínsiñe ligía houn. Ítara kei hagía, sun wagía lunti wederebudagüdüni wafiñen luagu Bungiu, meberesenga furendei le ibiha wamaalibei. Siñati hadügüni ni aban katei le wawagu.

8, 9. a) Kaba álügüdahani wakutiha guentó? b) Ida luba líderaguniwa waturiahani sun le ladügübei Bungiu?

⁸ Ida luba wederebudagüdüni wafiñen luagu le Adügübalin sun katei? Ariha wamá gádürü igaburi.

⁹ Aturiaha waméi le adüga laalibei Bungiu. Ánhawa etenira buidu houn animaalugu, lun burí nadü luma burí tun waruguma líderagubadiwa lun derebugu lan wafiñen luagu le Adügübalin sun katei (Sal. 19:1; Isa. 40:26). Éibutima waturiahani sun burí katei le chóurutimabei wasandiragun woungua luagu Heowá lan Adügübalin sun katei. Súnwandan láfuridun tidan wani agumeiraguagüdüni, aturiahani le afuranguagüdübei fiu ariñahani luáguti sun katei le adüga láalibei Bungiu. Íbini genege lan hénrengu lan murusunraü, adüga waméi sun wayaraati lun waliihani ani furendei waméi le wayaraati. Ani mabulieida waméi lidan lan wani páhina jw.org, gayaraati warihini ábaya wéiyaasu bidéu luagu katei le ladügübei Bungiu le áfuachubei lidan lagumuhóun adamurini wéiriti.

10. Ru huma aban hénpulu le arufudubalin anihein lan aban le Adügübaliwa (Rómana 1:20).

¹⁰ Danme waturiahani sun katei le ladügübei Bungiu, teni wamá lun sun le larufudahabei woun luagu le Adügübaliwa (aliiha huméi Rómana 1:20). Kéiburi, mámarügüñein leiti luma lárouga líchiga Weyu lun ñein lan ibagari Ubouagu, ígiragüda lumuti giñe lanarime lisü lidan aban igaburi le denchati (rayos ultravioleta). Ka uagu madügün lubéi katei le dañu woun? Anuhein aban kapa gíritu osono, to ítaraboun kei aban idaüdinaü ani to ídehaboun lun madaga lan katei denchati le wawagu. Dan le hanarimetima lan laganwoundun lanarime lisü weyu le, aba giñe laganwoundun osono. Ma inarüni anihein lan aban chuti lau ani hínsiñehabuti le Adügüti sun katei burí le?

11. Halíagiñeba wadarira ariñahani luagu katei le ladügübei Bungiu? (Ariha huméi rekuáduru “ Agumeiraguagüdüni to ederebudagüdübalin wafiñen”).

¹¹ Ánhawa áluaha ariñahani lidan Índice de las publicaciones Watch Tower luma lidan jw.org, wadariruba saragu ariñahani luagu le adüga láalibei Bungiu ani gayaraabei líderaguniwa katei le ederebudagüdei wafiñen. Másiñati gayara lan wagumeserun lau burí aturiahani luma burí bidéu lidan fánreinti “¿Lo diseñó alguien?”, le burí chátiti ani lafuranguagüdübei fiu katei le aweiridagüdübarun wanigi hawagu burí animaalu luma burí nadü. Anihein giñe hénpulu luagu ida liña lan hálugun aturiahatiña siensia háyeihan lídangiñe le ladügübei Bungiu.

12. Kaba un wetenira danme waturiahanu Bíbülia?

¹² Aturiaha wamóun Bíbülia. Mafiñenti meha aban aturiahati siensia le buga uágubei wayanuhan lidan párafu 4 luagu le Adügübalin sun katei, lau lásügürün dan aba lasansiruni laritagun. Ariñagati: “Mámarügü luagu le naturiahabei tuagu siensia lébunabei nafiñen.  Ladüga nakutihanu Bíbülia buidu buidu?” Gayaraati giñe subudi lan woun buidu le tarufudahabei Bíbülia. Íbini ítara lunti wasigirun aturiahoun lun wederebudagüdüni wafiñen luagu le Adügübalin sun katei (Hos. 1:8; Sal. 119:97). Teni wamá lun sügǘ burí le asuseredubei lidan binadu dan, ida liña lan lagunfulirun sin ni murusun charati, luagu profesía luma luagu lagunfulirun lariñawagún. Aba laganwoundun wafiñen luagu chu lan lau ani hínsiñehabu lan le Adügübaliwa, ani ligía abürügüdübarun Bíbülia (2 Tim. 3:14; 2 Fe. 1:21). *

13. Arufuda humá aban hénpulu le arufudubalin lichú au le tídanbei Lererun Bungiu.

¹³ Dan le waturiahanu Lererun Bungiu teni wamá lun hu lan adundehani le tídanbei. Kei hénpulu, lüha tariñagun Bíbülia wuriba lan ínsiñeni luagu seinsu barǘ lan “asufuriruni” (1 Tim. 6:9, 10; Ari. 28:20; Mat. 6:24). Húugili san eweridihani le? Anha. Ariha waméi le tariñagubei líburu La epidemia del narcisismo: “Gürigia ha ganigibaña umegeguni lóuguati gunda hamá ani hírutiña ani añahein hagía hasufuriruña sandi lánina íruni. Gürigia ha burí áfaagubaña lun hibihin lanwoun haseinsun sánditimatiña luéigiñe hachügü; ani ariñawagúati giñe wawagu gíbetima lan hasandi”. Furanguti ani huuti eweridihani le tídanbei Bíbülia luáguti moun lumuti lan hínsiñe lan seinsu woun. Anihein san amu bérusu tídangiñeti Bíbülia le gayaraabei líderaguniwa? Eibu gebegitima lan adundehani le tídanbei Bíbülia woun, ábatima giñe wafiñerun luagu lichú lau Bungiu le magumuchadibei ani le giñe hínsiñehabubei (Sant. 1:5). Ánhawa adügei gúndaabadiwa (Isa. 48:17, 18).

14. Ka wafurendeirubei lúmagiñe Heowá dan le waturiahanu Bíbülia?

¹⁴ Aturiaha wamá lau aban igaburi le buiti: lun wasubudiruni Heowá buidu (Huan 17:3). Eibu haturiahanu Bíbülia, hasubudirubei lubuidun ligaburi Heowá, igaburi le arihíbei lidan le ladügübei. Lau wasubudirunu Lererun Bungiu buidu tíderagubadiwa lun wachoururuni aban lan Bungiu inarüniti Heowá (Afu. 34:6, 7; Sal. 145:8, 9). Eibu wasubudiruni Heowá buidu buidu, afiñetimaabadiwa luagu, hínsiñetimabei giñe woun ani ligíaba giñe besi wamada.

15. Ida luba líderaguniwa wayanuhan hama amu gürigia luagu wafiñen luagu Bungiu?

¹⁵ Ayanuha wamá hama amu gürigia luagu wafiñen luagu Bungiu. Lederebudagüdübei katei le wafiñen guánarügü. Gama lumoun, ánhawati lálügüda gürigia le unbei wapurichihan anhein anihein lubéi aban Bungiu ani ibidiñeti woun kaba lan wóunaba? Áluaha wamá tidan wani agumeiraguagüdüni óunabagülei le tídangiñeti Bíbülia ani lárigiñe arufuda waméi lun gürigia (1 Fe. 3:15). Gayaraati giñe wamuriahan luma aban íbiri le lǘhali lidan afiñeni lun líderaguniwa. Anha lan yebe gürigia lun le tariñagubei Bíbülia o maha lan, buídubei lidin woun ánhawa akutihei tema burí le, lugundun ábame lederebugudun wafiñen. Ánhawa adügei ítara madügünbei iyeeni le hariñagubei ha chúbaña au según ubóu, ha máhabaña anihein lan aban Bungiu le adügübalin sun katei, lun ledebilidun wafiñen.

16. Ka gayaraabei lasuseredun ánhawa mederebugudun wamá wafiñen ani móunigirun waméi?

¹⁶ Meberesenga átiri hali lan dan wau eseriwida lun Heowá, mosu ítarameme wamá ederebudagüdei luma óunigirei wafiñen luagu. Ka uagu? Lugundun anhein madügün wamá ledebiliduba wafiñen. Aritagua waméi ichouruni  lan lébunabei wafiñen luagu katei le marihinbei. Ani le marihinbei bulíeiwati lau lumenrengun. Anihán dimurei le lariñagubei Pábulu dan le layanuhan luagu lilouguan afiñeni: “Gidá waméi sun le eredehabaliwa wawariua, luma figóu le agüragubaliwa” (Ebü. 12:1). Ka lunbei wadügüni lun derebugu lan wafiñen? (2 Tesa. 1:3).

17. Kaba íderaguawa lun wakipuruni wafiñen derebuguñu?

¹⁷ Furumiñe, amuriaha wamá súnwandan luma Heowá lun líchuguni lani sífiri sandu woun. Ka uagu? Ladüga lun gayara lan lafiñerun gürigia megei lumuti lídehan sífiri sandu (Gal. 5:22, 23). Inarüni sin lan lídehan siñabei wóunigiruni ni wederebudagüdüni wafiñen luagu Le adügübalin sun katei. Sigí wamá amuriaha sífiri sandu luma Heowá ani ábame líchuguni (Luk. 11:13). Gayaraabei wariñagun: “Ruba lanwoun wafiñen” (Luk. 17:5).

18. Según Sálumu 1:2, 3, ka lubuidun chansi wámabei?

¹⁸ Ábaya katei, aturiaha wamóun Lererun Bungiu súnwandan (aliiha huméi Sálumu 1:2, 3). Dan meha le labürüdǘnbei sálumu le, míbetiña meha ísüraelina gánitiña aban kopia dayarügü lau burí Lilurudun Bungiu. Gama lumoun, ánhañati urúeigu hama fádirigu gayaraati meha hibihin aban. Ani kada sedü irumu “dandu wügüriña kei würiña, irahüñü hama sun terencha ha aganóutiña lidan burí huburugute” mosu meha hóundaragun lun haganbuni laliihóun Lilurudun Bungiu (2 Lur. 31:10-12). Lidan meha lidaani Hesusu, míbetiña meha gürigia tau burí hóuburatu to tani Lererun Bungiu ani saragu tídangiñe líburu to tídanñoun meha haligilisin huríu. Uguñe weyu, hiibe-agei gürigia anuhoun Bíbülia dayarügü hama o lidan aban fánreinti. Ida luba warufuduni gebegi lan lubuidun chansi le woun?

19. Ka lunbei wadügüni lun gayaraabei lan derebugu lan wafiñen?

¹⁹ Gayaraati warufuduni luagu gebegi lan lubuidun chansi le wámabei luagu anuhoun lan Lererun Bungiu wama lau waliihanu súnwandan. Moun lumuti wígiruni waturiaha wábuguarügü lun amu dan, o lúnrügü waturiaha dánrügü gadaani wamá. Ánhawa aturiaha lidan aban oura le direi wamaalibei, lederebugudunbei wafiñen.

20. Ka aranseñu wabéi lun wadügün?

²⁰ Mítarantiwa kei “chu tau hama gunfurandatiña” ha lánina ubóu, derebuguti wafiñen ani tídangiñeti Lererun Bungiu (Mat. 11:25, 26). Seremei waturiahanu Líburu sagüráutu to, wasubudirei ka lan uagu eibu lubéi dan agadeireina liña lubéi ubóu luma kaba lan ladüga Heowá libügürü. Ligíati aranseñu wamá lun wederebudagüdüni wafiñen luma lun wíderaguniña saragu gürigia ha wayaraatiña lun hafiñerun luagu Bungiu le Adügübaliwa (1 Tim. 2:3, 4). Ani sigí wamá agurabaha lau ugundani lachülürün weyu lun sun lan ha lúnbaña hawinwandun Ubouagu lun halawahani Heowá luma lun hariñaguni dimurei le lídanbei Arufudúni 4:11, le ariñagubei: Heowá “Wabungiute, garichatibu lun beresibiruni uéiriguni, [...] ladüga buguya adügübalin sun katei”.