1. Cosa contigo ya enseña acerca na diaton Creador?

SI YA HACE contigo engranda como un Testigo de Jehova, posible bata pa lang tu, ya puede ya tu aprende acerca con Jehova. Ya enseña contigo que ele el Creador, tiene le bonito personalidad y tiene le un amable proposito para na maga gente.—Gen. 1:1; Act. 17:24-27.

2. Cosa el cuanto ta pensa con aquellos quien ta creé na Creador?

² Pero, manada gente el gendeh ta creé que ta existi el Dios o ele el ya crea con el todo las cosas. Sino, ta creé sila que derepente lang ya abuya el vida y hinay-hinay ya man evolve estaba na un simple forma de vida para na mas complicao forma de vida. El cuanto de ese maga gente bien educao. Posible, habla sila que el ciencia ya dale prueba que gendeh justo el Biblia y aquellos quien ta creé na Creador amo maga ignorante, gendeh inteligente o pronto lang engaña.

3. Porque importante que hace fuerte con el diaton mismo fe?

³ El cosa ta creé el cuanto bien educao persona hay causa ba kanaton para man duda que si Jehova el diaton amable Creador? Ta depende se si porque kita ta creé que si Jehova amo el Creador. Por causa ba cay ya habla kanaton que creé con ese o cay ya dale kita tiempo para examina con el maga evidencia? (1 Cor. 3:12-15) Maskin pa ya tarda ya kita ya queda un Testigo de Jehova, necesita siempre kita todo continua hace fuerte con el diaton fe. Na ese manera, gendeh kanaton puede engaña el “saber de filosofia y maga insiñanza falso” que ta enseña el maga gente quien tan contra na Palabra del Dios. (Col. 2:8; Heb. 11:6) Para ayuda kanaton, este articulo hay discuti (1) si porque manada gente el gendeh ta creé na Creador, (2) si paquemodo tu puede hace fuerte con el de tuyu fe con  Jehova, el de tuyu Creador y (3) si paquemodo tu puede continua hace fuerte con ese fe.

4. Asegun na Maga Hebreo 11:1, onde base el deverasan fe?

⁴ El cuanto maga gente ta pensa que si el un persona tiene fe, ta creé lang le na un cosa que nuay prueba. Pero asegun na Biblia, gendeh se el deverasan fe. (Le con el Maga Hebreo 11:1.) Este ta explica que el fe base na prueba. Poreso maskin pa gendeh kita ta puede mira con Jehova, con Jesus y con el Reino na cielo, tiene kita prueba que deverasan se. (Heb. 11:3) El un biochemist quien ya queda un Testigo de Jehova ya habla: “El diaton fe tiene basejan. Gendeh kita ta ignora con el verdad na ciencia.”

5. Porque manada gente ta creé que el vida ya principia que nuay Creador?

⁵ Posible kita pregunta, ‘Si tiene prueba que el Creador ta existi, porque manada gente el gendeh ta creé que con Dios ya origina el vida?’ El cuanto maga gente nuay lang gayot examina con el maga evidencia. Si Robert que un Testigo de Jehova ya ahora ya habla: “Ciendo nuay gayot menciona con el creacion na escuela, pensaba yo gendeh se deverasan. Pero cuando 22 año yo, ya puede yo man cuento con el maga Testigo de Jehova y alla pa yo ya sabe que el Biblia ta dale kanaton buen razon para creé que el Dios ya crea con el todo las cosas.” *—Mira con el cajon “ Un Importante Mensaje Para na Maga Mayores.”

6. Porque el cuanto gendeh ta creé que tiene Creador?

⁶ El cuanto gendeh ta creé na Creador cay ta habla sila que ta creé lang sila na cosa sila ta  puede mira. Pero el deverasan, ta creé sila con el cosas que gendeh sila ta puede mira. Por ejemplo, ta creé sila na gravity cay tiene sila evidencia que deverasan se. El clase de fe que ya menciona na Biblia base tambien na maga evidencia del maga “cosa-cosa que gendeh ta puede mira.” (Heb. 11:1) Ta necesita tiempo y esfuerzo para estudia con el maga evidencia y manada gente el no quierre hace esfuerzo para hace con ese. El un persona quien gendeh ta investiga con el evidencia posible habla que nuay Dios.

7. Todo ba maga educao persona el gendeh ta creé que el Dios el ya crea con el universo? Explica.

⁷ Despues estudia con el maga evidencia, el cuanto cientista ya queda convincido que el Dios ya crea con el universo. * Igual con Robert que ya menciona enante, el cuanto  ta pensa que nuay Creador cay nuay enseña con el creacion na universidad. Pero, manada maga cientista el ya conoce y ya ama con Jehova. Igual con ese maga cientista, todo kita debe hace fuerte con el diaton fe con Dios, estudiao man kita o gendeh. Nuay se quien puede hace para kanaton.

8-9. (a) Cosa pregunta kita hay considera ahora? (b) Paquemodo tu beneficia si estudia tu acerca na maga creacion?

⁸ Paquemodo tu puede hace fuerte con el de tuyu fe na Creador? Considera kita con el cuatro manera.

⁹ Estudia acerca na creacion. Puede tu hace fuerte con el de tuyu fe na Creador si observa tu con el maga animal, siembra y estrellas. (Sal. 19:1; Isa. 40:26) Si mas estudia tu con ese maga cosas, mas queda tu convincido que si Jehova el Creador. El diaton maga publicacion ta contene maga articulo que ta explica maga detalle acerca na creacion. No evita con ese maga articulo maskin pa tan dificil tu entende con ese. Pricura entende el cosa tu puede. Y no ulvida chequia con el diaton website, jw.org, y mira con el maga bonito video acerca na creacion que ya presenta durante el diaton asemblea de region del reciente maga año.

10. Dale un ejemplo si paquemodo el creacion ta dale prueba que tiene Creador. (Roma 1:20)

¹⁰ Si ta estudia acerca na creacion, nota si cosa se ta revela acerca na diaton Creador. (Le con el Roma 1:20, NWT.) Por ejemplo, posible sabe tu que puera que ta dale calor el diaton sol que ta sustene con el vida, ta produci tambien este maga gendeh bueno energia que ta llama ultraviolet ray. El maga gente necesita queda protegido na ese maga energia. Y deverasan protegido kita! Paquemodo? Tiene un layer de gas que ta llama ozone alrededor del tierra que ta protege kanaton desde con ese maga peligroso energia. Mientras mas ta queda fuerte el ultraviolet ray estaba na sol, mas ta omenta tambien el ozone. Ahora, gendeh ba tu man uyun que tiene quien ya diseña con ese proceso y ele un amable y un inteligente Creador?

11. Onde tu puede incuntra informacion que puede hace fuerte con el de tuyu fe na creacion? (Mira con el cajon “ Maga Informacion que Ta Hace Fuerte con el Fe.”)

¹¹ Puede tu incuntra manada informacion acerca na creacion que puede hace fuerte con el de tuyu fe na Watch Tower Publications Index y na jw.org. Puede tu principia na maga articulo y video estaba na serie “Was It Designed?” Corto lang este y ta dale bonito informacion acerca na maga animal y otro creacion. Ta contene tambien este maga ejemplo si paquemodo el maga cientista ya pruba copia con el maga cosa sila ya mira na creacion.

12. Si ta estudia con el Biblia, cosa el cuanto cosas que debe kita nota?

¹² Estudia con el Biblia. El biochemist que ya menciona enante nuay acepta que tiene Creador del primero. Pero na uliji, ya queda le convincido con ese. Ele ya habla: “El de mio fe gendeh lang base na cosa yo ya estudia na ciencia. Sino, base tambien este na cosa yo ya estudia na Biblia.” Posible, tiene ya tu el justo saber na cosa ta enseña el Biblia. Maskin pa ansina, para puede hace fuerte con el de tuyu fe na de tuyu Creador, necesita tu continua estudia con el Palabra del Dios. (Jos. 1:8; Sal. 119:97) Por ejemplo, nota si paquemodo de bien detallao el Biblia acerca na maga cosas que ya sucede de antes. Pone atencion con el maga profecia de este y si paquemodo de harmonia el cosa ya escribi el maga escritor del Biblia. Si hace tu se, hay queda fuerte el de  tuyu fe que el un amable y sabio Creador amo el quien ya hace kanaton y el Biblia amo el de suyu mensaje para kanaton. *—2 Tim. 3:14; 2 Ped. 1:21.

13. Cosa el un ejemplo del buen consejo que puede incuntra na Palabra del Dios?

¹³ Si ta estudia con el Palabra del Dios, nota si paquemodo el consejo de este puede ayuda kanaton. Por ejemplo de antes pa, el Biblia ya dale aviso que el amor na sen peligroso y ‘ta hace iri con el corazon.’ (1 Tim. 6:9, 10; Prov. 28:20; Mat. 6:24) Aplicable ba siempre ese consejo ahora? El libro The Narcissism Epidemic ya observa: “El maga materialistico gente gendeh alegre y mas depress. Maskin el maga gente quien ta desea lang tene manada sen gendeh ta sinti alegre y mas manada tambien kanila el tiene problema na salud.” Poreso, un buen consejo gayot el aviso del Biblia que gendeh kita ama con el sen! Puede ba tu pensa otro pa principio na Biblia que puede gayot kita beneficia? Si mas aprecia kita con el consejo del Biblia, hay mas confia tambien kita con el consejo que ta dale el diaton amable Creador. (Sant. 1:5) Como resulta, mas queda alegre el diaton vida.—Isa. 48:17, 18.

14. Cosa tu aprende acerca con Jehova si estudia tu con el Biblia?

¹⁴ Tene el justo motivo si ta estudia—para conoce con Jehova. (Juan 17:3) Si estudia tu con el Escritura, puede tu aprende acerca na personalidad de Jehova y de suyu maga calidad—el mismo maga calidad que puede tu aprende si observa tu con el maga creacion. Este maga calidad ta convinci kanaton que un deverasan Persona si Jehova y gendeh lang un producto del imaginacion del gente. (Ex. 34:6, 7; Sal. 145:8, 9) Si mas conoce tu con Jehova, mas queda grande el de tuyu fe, mas queda hondo el de tuyu amor y mas queda fuerte el de tuyu amistad con ele.

15. Paquemodo tu beneficia si man cuento tu con otro acerca con Dios?

¹⁵ Man cuento con otro acerca con Dios. Si hace tu se, hay queda fuerte el de tuyu fe. Pero, paquemodo si el persona con quien tu ta predica tan duda acerca na existencia del Dios y gendeh tu asigurao si paquemodo contesta? Pruba busca informacion que base na Biblia na uno del diaton maga publicacion y despues discuti se con el persona. (1 Ped. 3:15b) Puede tambien tu pidi ayuda na un experienciao Testigo. Acepta man aquel persona con el contestacion del Biblia o gendeh, hay beneficia tu na research que ya hace tu. Hay queda mas fuerte el de tuyu fe. Como resulta, gendeh tu creé con el maga gente quien dol maga sabio y inteligente quien ta habla que nuay Creador.

16. Cosa posible sucede si gendeh kita continua hace fuerte y mentena con el diaton fe?

¹⁶ Maskin paquemodo de tarda ya kita ta sirvi con Jehova, debe kita continua hace fuerte y mentena con el diaton fe con ele. Porque? Cay si gendeh kita con cuidao, posible queda mahina el diaton fe. Acorda que el fe ta inclui el maga evidencia del maga cosas que gendeh ta puede mira. El maga cosas que gendeh kita ta puede mira posible pronto lang kita ulvida. Gane ya habla si Pablo que si falta kita fe, ese un “pecado, que ta man cabit canaton.” (Heb. 12:1) Entonces, paquemodo kita puede evita con ese trampa?—2 Tes. 1:3.

17. Cosa kita necesita para mentena con el diaton fe?

¹⁷ Una, pidi con Jehova sagrao espiritu y hace con ese pirmi. Porque? Cay el fe amo un  aspeto del fruta del espiritu. (Gal. 5:22, 23) Gendeh kita puede hace fuerte y mentena con el diaton fe na diaton Creador si nuay el ayuda del sagrao espiritu. Si continua kita pidi sagrao espiritu con Jehova, hay dale le se kanaton. (Luc. 11:13) Gane, puede kita reza: “Omenta el diamon fe.”—Luc. 17:5.

18. Asegun na Salmo 1:2, 3, cosa privilegio kita tiene?

¹⁸ Omento pa, regular estudia con el Palabra del Dios. (Le con el Salmo 1:2, 3.) Cuando ya escribi con ese salmo, poco Israelita lang el tiene completo copia del Ley del Dios. Pero, el maga rey y sacerdote puede obtene copia y cada siete año, “el maga hombre, mujer, bata” y el maga estranjero quien ta queda na Israel ta man junto-junto para oi mientras ta le con el Ley del Dios. (Deut. 31:10-12) Na tiempo de Jesus, poco gente lang el tiene copia del Escritura y mayoria del maga copia puede lang incuntra na maga sinagoga. Pero na diaton tiempo ahora, mayoria del maga gente ta puede le con el cuanto porcion o con el entero Palabra del Dios. Un grande privilegio gayot se. Paquemodo kita dale mira que ta aprecia kita con ese privilegio?

19. Cosa kita necesita hace para mentena con el diaton fuerte fe?

¹⁹ Puede kita dale mira que ta aprecia kita con el privilegio que tene el Palabra del Dios si le kita con este regular. Debe kita hace schedule para estudia con el Biblia y gendeh lang le con ese si tiene kita el tiempo. Si hace kita regular con el diaton estudiada, puede kita mentena con el diaton fuerte fe.

20. Cosa kita debe determinao hace?

²⁰ Gendeh igual con “el maga estudiao” de este mundo, tiene kita el fuerte fe base na Palabra del Dios. (Mat. 11:25, 26) Como resulta del diaton estudiada de ese sagrao libro, sabe kita si porque malo el condicion del tierra y si cosa hace si Jehova acerca con ese. Poreso, queda kita determinao que hace fuerte con el diaton fe y ayuda con el mas manada si posible para tene el fe na diaton Creador. (1 Tim. 2:3, 4) Y continua kita espera con el tiempo cuando el todo gente na tierra hay habla con el maga palabra na Revelacion 4:11: “El diamon Dios y Señor [Jehova], Uste lang conviene recivi el gloria . . . cay Uste amo el quien ya hace con el entero mundo.”